പ്രധാനമന്ത്രി ശ്രീ നരേന്ദ്ര മോദി 2024 മാർച്ച് 11നു ഹരിയാനയിലെ ഗുരുഗ്രാം സന്ദർശിക്കും. ഉച്ചയ്ക്കു 12നു പ്രധാനമന്ത്രി രാജ്യമെമ്പാടുമുള്ള ഒരുലക്ഷം കോടി രൂപയുടെ 112 ദേശീയപാതാ പദ്ധതികളുടെ ഉദ്ഘാടനവും തറക്കല്ലിടലും നിർവഹിക്കും.

ദേശീയപാത-48ൽ ഡൽഹിക്കും ഗുരുഗ്രാമിനും ഇടയിലുള്ള ഗതാഗതത്തിരക്കു കുറയ്ക്കാനും ഗതാഗതം മെച്ചപ്പെടുത്താനുമായി, ദ്വാരക അതിവേഗപാതയുടെ ഹരിയാന ഭാഗം പ്രധാനമന്ത്രി ഉദ്ഘാടനം ചെയ്യും. എട്ടുവരി ദ്വാരക അതിവേഗപാതയുടെ 19 കിലോമീറ്റർ നീളമുള്ള ഹരിയാന ഭാഗം 4100 കോടിരൂപ ചെലവിലാണു നിർമിച്ചത്. ഡൽഹി-ഹരിയാന അതിർത്തി മുതൽ ബസായി റെയിൽ മേൽപ്പാലം (ROB) വരെയുള്ള 10.2 കിലോമീറ്റർ ഭാഗം, ബസായി റെയിൽ മേൽപ്പാലംമുതൽ​ ഖേഡ്കി ദൗല വരെയുള്ള 8.7 കിലോമീറ്റർ ഭാഗം എന്നിവ ഇതിൽ ഉൾപ്പെടുന്നു. ഡൽഹിയിലെ ഐജിഐ വിമാനത്താവളത്തിലേക്കും ഗുരുഗ്രാം ബൈപ്പാസിലേക്കും ഇതു നേരിട്ടു സമ്പർക്ക സൗകര്യമൊരുക്കും.

പ്രധാനമന്ത്രി ഉദ്ഘാടനം ചെയ്യുന്ന മറ്റു പ്രധാന പദ്ധതികൾ ഇനിപ്പറയുന്നു: നഗരവുമായി ബന്ധിപ്പിക്കുന്ന 9.6 കിലോമീറ്റർ നീളമുള്ള ആറുവരിപ്പാത-II (UER-II)- നാംഗ്ലോയ് - നജഫ്ഗഢ് റോഡ് മുതൽ ഡൽഹിയിലെ സെക്ടർ 24 ദ്വാരക ഭാഗം വരെയുള്ള പാക്കേജ് 3; ഉത്തർപ്രദേശിൽ 4600 കോടി രൂപ ചെലവിൽ വികസിപ്പിച്ച ലഖ്‌നൗ റിങ് റോഡിന്റെ മൂന്നു പാക്കേജുകൾ; ആന്ധ്രപ്രദേശിൽ ഏകദേശം 2950 കോടിരൂപ ചെലവിൽ വികസിപ്പിച്ച ദേശീയപാത-16ന്റെ ആനന്ദപുരം - പെന്ദുർത്തി - അനകാപ്പള്ളി ഭാഗം; ഹിമാചൽ പ്രദേശിൽ ഏകദേശം 3400 കോടിരൂപ ചെലവിട്ട ദേശീയപാത-21ന്റെ കിരത്പുർ മുതൽ നെർചൗക്ക്‌ വരെയുള്ള ഭാഗം (2 പാക്കേജുകൾ); കർണാടകയിൽ 2750 കോടി രൂപയുടെ ദാബസ്പേട്ട - ഹൊസകോട്ടെ ഭാഗം (2 പാക്കേജുകൾ). കൂടാതെ, രാജ്യത്തുടനീളമുള്ള വിവിധ സംസ്ഥാനങ്ങളിലായി 20,500 കോടി രൂപയുടെ മറ്റ് 42 പദ്ധതികൾക്കും പ്രധാനമന്ത്രി തുടക്കം കുറിക്കും.

രാജ്യത്തുടനീളമുള്ള വിവിധ ദേശീയപാതാ പദ്ധതികൾക്കും പ്രധാനമന്ത്രി തറക്കല്ലിടും. ആന്ധ്രാപ്രദേശിൽ 14,000 കോടി രൂപയുടെ ബെംഗളൂരു - കടപ്പ - വിജയവാഡ അതിവേഗപാതയുടെ 14 പാക്കേജുകൾ; കർണാടകയിൽ 8000 കോടി രൂപയുടെ ദേശീയപാത-748എ-യുടെ ബെലഗാവി - ഹുനഗുണ്ഡ – റായചൂരു ഭാഗത്തിന്റെ ആറു പാക്കേജുകൾ; ഹരിയാനയിൽ 4900 കോടിയുടെ ഷാംലി-അംബാല പാതയുടെ മൂന്നു പാക്കേജുകൾ; പഞ്ചാബിൽ 3800 കോടിയുടെ അമൃത്‌സർ - ബഠിണ്ഡ ഇടനാഴിയുടെ രണ്ടു പാക്കേജുകൾ എന്നിവയാണു പ്രധാനമന്ത്രി തറക്കല്ലിടുന്ന പ്രധാന പദ്ധതികൾ. രാജ്യത്തുടനീളമുള്ള വിവിധ സംസ്ഥാനങ്ങളിലായി 32,700 കോടി രൂപയുടെ മറ്റ് 39 പദ്ധതികൾക്കും അദ്ദേഹം ശിലാസ്ഥാപനം നടത്തും.

ഈ പദ്ധതികൾ ദേശീയപാതാശൃംഖലയുടെ വളർച്ചയ്ക്കും സാമൂഹ്യ-സാമ്പത്തിക വികസനത്തിനും തൊഴിലവസരങ്ങൾ വർധിപ്പിക്കുന്നതിനും രാജ്യത്തുടനീളമുള്ള പ്രദേശങ്ങളിൽ വ്യാപാരവും വാണിജ്യവും പ്രോത്സാഹിപ്പിക്കുന്നതിനും സഹായകമാകും.

--SK--