জয় গুরু রবিদাস!

উত্তর প্রদেশকী মুখ্য মন্ত্রী, য়োগী অদিত্যনাথ জী, ভারতকী মফম পুম্বদগী মফমসিদা তিনবিরিবা ইকায়খুম্নরবা লম্বোয়বশিং অমসুং লাই নীংজবশিং, অমসুং ঐগী ইচিল ইনাও অসি ইচে ইচলশিং,

ঐনা ময়াম পুম্নমক্কীম ফমদা গুরু রবিদাস জীগী মপোক কুমওন্না লাকপদা মহাক্কী পোক্নফম লমদমসিদা তরাম্না ওকচরি‍। ময়াম অমনা থাপ্ল-থাপ্লবা মফম কয়াদগী রবিদাস জীগী মপোক কুমওন থৌরম শরুক য়াবা লেঙবিরক্লিবা অসি উবদা থম্মোয়দা অপেনবা পোকই‍। মরুওইনা, পঞ্জাবতগী ইচিল ইনাও অমসুং ইচে ইচল ময়াম অমা লেঙবিরক্তুনা বরানসী অসি ‘অপীকপা পঞ্জাব’ অমগুম উরিবসি নুংঙাই‍। পুম্নমক অসি সন্ত রবিদাস জীগী থৌজালদগী ওইবা ঙম্লিবনি‍। ঐহাকপুসু রবিদাস জীনা মহাক্কী পোক্নফম লমদমসিদা হঞ্জিন হঞ্জিন কৌরি‍। মসিনা ঐগী ইফমদা মহাক্কী ফিদমশিং মখা তানা শন্দোক্নবা অমসুং মহাক্কী তুংইনবা মীওই মিলিয়ন কয়াগী থৌগল তৌজনবগী খুদোংচাবা পীবিরি‍। মহাক্কী তুংইনবা পুম্নমকপু গুরুগী পোক্নফম লমদমসিদা থৌগল তৌবা ফংজবা হায়বসি ঐগীদমক্তদি থৌজাল অমদগী তাদ্রে‍।

অদুগা ঐগী নুংশিরবা ইচিল ইনাওশিং,

কন্সতিত্যুএন্সী অসিগী এম.পি. অমা ওইনা, কাসিগী মীহুৎ অমা ওইনা, মসি ঐগী অখন্নবা থৌদাং অমসু ওইরিবনি‍। ময়াম পুম্নমকপু মফমসিদা বনারসতা তরাম্না ওকচবা, অমসুং অদোম্না নুংঙাইনা লৈনবগীদমক চেকশিন্না হোৎনজবা হায়বসি ঐগী থৌদাংনি‍। ঙসিগী য়াইফরবা নুমিৎ অসিদা, ঐনা ঐগী থৌদাং য়াবা ফংজনবা তাঞ্জা অদু ফংজরে‍। ঙসি, বনারস চাওখৎনবগীদমক লুপা করোর চা কয়াগী ওইগদবা চাওখৎ থৌরাংগী প্রোজেক্ত কয়া শঙ্গারি অমসুং উরেপ উয়ুং তম্লি‍। মসিনা লাই নীংজবশিংনা মফমসিদা লাকপগী খোঙচৎপু হেন্না নুংঙাইবা অমদি মহাও লৈবা ওইহনগনি‍। মসিগী মথক্তা, সন্ত রবিদাস জীগী পোক্নফম লমদমদা চাওখৎপা পুরক্নবগী লুপা করোর কয়াগী ওইগদবা প্রোজেক্ত ময়াম অমসু শঙ্গাখ্রে‍। লাইশঙ অমসুং লাইশঙগী অকোয়বগী মফমশিং শেমগৎপা, লাইশঙ তাবা লম্বীশিং শেমগৎপা, ইন্তরলোকিং অমসুং খোংলমগী থবক, লাই নীংজবা কয়ানা ‘সতসং’ (লাইনিংগী মীতিন) য়াওনবা অমসুং ‘সাধনা’ (লাইনিংগী থবক থৌওংশিং) তৌনবা তোঙান তোঙানবা ফেসিলিতীশিং শেমগৎ শাগৎপা, ‘প্রসাদ’ (লাইগী লুকমন) ফংজনবা শিন-লাঙবা, পুম্নমক অসিনা লাই নীংজবা মীওই লাখ কয়াদা খুদোংচাবা ফংহনগদৌরিবনি‍। লাই নীংজবশিংনা মাঘী পুর্নিমা মতমদা লাই খুরুম্বা লাকপদা লাইনিংগী লমদা অপেনবা ফংজবতা নত্তনা খুদোংথিবা কয়াদগীসু কোক্লগনি‍। ঙসি, ঐহাক্না সন্ত রবিদাস জীগী অনৌবা মীদম মায়খুম হাংদোক্নবগী তাঞ্জা ফংজরে‍। সন্ত রবিদাস ম্যুজিয়মগী উরেপ উয়ুংসু ঙসি তম্লে‍। হায়রিবা চাওখৎ থৌরাংগী থবকশিং অসিগীদমক ঐনা ময়াম পুম্নমক্কী মফমদা নুংঙাইবা ফোঙদোকচরি‍। লৈবাক পুম্বদগী অমদি মালেমগী মফম কয়াদগী লাই নীংজবা মীওইশিংগী মফমদা সন্ত রবিদাস জীগী মপোক কুমওনগী অমসুং মাঘী পুর্নিমাগী য়াইফ পাউজেল পীজরি‍।

মরূপশিং,

ঙসি অসি অথোইবা লম্বোইবা অমসুং খুন্নাইদা অহোংবা পুরক্লম্বা, গেদ্জ বাবাগী মপোক কুমওন নুমিৎসু তারি‍। সন্ত রবিদাসকুম্না, গেদ্গ বাবাসু খুন্নাই অসিবু মান্নদবা মীৎয়েঙ য়েংনবা কোকহন্নবা অমসুং তুহৎপিরবা অমসুং শোত্থহৌরবা ফুরুপশিংগী য়াইফনবগীদমক য়াম্না কন্না হোৎনজরম্বা মীওই অমনি‍। বাবাসাহেব অম্বেদকর মশামক গেদ্গ বাবাবু য়াম্না লুনা লৌজবা মীশক অমা ওইরম্মি‍। গেদ্জ বাবাসু বাবাসাহেব্না ইথিল য়াম্না পীখি‍। ঙসি, থৌরম অসিদা, ঐনা গেদ্গ বাবাগী খুয়াখাদসু ইকোক নোঞ্জরি‍।

মরূপশিং,

ফম্পাক অসিদা কাখৎলকত্রিঙৈদা, ঐহাকসু সন্ত রবিদাস জীগী মীতমদা লৈ কৎপা অমদি ইকায়খুম্নবা উৎপা চঙজরুই‍। মতমদুদা, ঐঙোন্দা য়াম্না চাউথোকচবা অমসুং নুংঙাইবগী ইথিল অমা ফাওজখি‍। চহি কয়াগী মমাঙদা ফাওবা, ঐনা রাজনিতীদা খোঙদাদ্রিঙৈদা, ফম অমত্তা পায়দ্রিঙৈদা, ঐনা সন্ত রবিদাস জীনা তাকপি তম্বিরম্বশিংদগী লমজিং কয়া ফংজখি‍। ঐনা মতম পুম্নমক্তা রবিদাস জীগী থৌগল তৌজনবগী অপাম্বা ফাওদুনা লাকখি‍। অদুগা ঙসি, সন্ত রবিদাস জীগা মরী লৈনবা ফিরেপশিং কাসী খক্তদা নত্তনা, লৈবাকসিগী অতৈ মফমশিংদসু থবক ওইনা পায়খৎলি‍। রবিদাস জীনা তাকপি তম্বিরম্বশিং শন্দোক্নবা অনৌবা মফমশিং লিংখৎলি‍। থা খরগী মমাঙদা, সন্ত রবিদাস মেমোরিএল এন্দ আর্ত গেল্লরী সাগর, মধ্য প্রদেশতা উরেপ উয়ুং তম্নবগী খুদোংচাবা ফংজখি‍। চাওখৎপগী গঙ্গা পুম্বা কাসিতী চেল্লি‍।

মরূপশিং,

লৈবাকসিনা মথৌ তারকপা খুদিং লম্বোইবা, মুনি, নৎত্রগা অথোইবা মীশক খরদি অদুমক মফমসিদা পোক্লকই হায়বসি ভারতকী পুৱারীদা থেংনদুনা লাক্লি‍। রবিদাস জী শোন্থরবা অমসুং খাইবুং তারবা ভারতকী মফমদা অনৌবা মতিং হাপখিবা, ‘ভক্তি’ (নীংজবা) ঈহৌগী অথোইবা লম্বোইবা অমা ওইরম্মি‍। রবিদাস জীনা খুন্নাইদা মনিং মখা তম্বগী মরুওইবা ৱাফমশিং শন্দোক্লম্মি অমসুং খুন্নাইদা খাইবুং তানরিববু তাইশিন্ননবা হোৎনরম্মি‍। মহাক্না মতমদুদা অচৌ মচা খায়বা, অচান মীরান নাইবা, অমসুং কাঙলুপ ফুরুপ খায়বগী মায়োক্তা খোঞ্জেল থোক্না লাউখি‍। সন্ত রবিদাস লাইনিং, কাঙলুপ, নৎত্রগা ৱাখল্লোনগী পনখৈনুংদা পুনশিন্দুনা থম্বা য়াদবা লম্বোইবা অমনি‍। রবিদাস জী মীপুক খুদিংমক্কীনি, অমসুং মীপুম খুদিংমক রবিদাস জীগীনি‍। জগদগুরু রমানন্দগী শিন্দম্লোয় অমা ওইনা, বৈষ্ণব কাঙলুপ্না মহাকপু মখোয়গী গুরু ওইনা লৌনৈ‍। সিখ ইচিল ইনাওশিংনসু মহাকপু অৱাংবা থাক্তা ইকায় খুম্ন‍ৈ‍। কাসীদা লৈরিঙৈদা, মহাক্না ‘मन चंगा तो कठौती में गंगा’ (করিগুম্বা অদোমগী পুক্নিংনবু ফরবদি অদোম্না বাল্তিন অমদসু গঙ্গা উবা ফংগনি) হায়বা ৱাফম তম্বিরম্মি‍। মরম অদুনা, কাসীবু লুম্না লৌজবা, ইমা গঙ্গাদা থাজবা থমজবা মীওইশিংনসু রবিদাস জীদগী পুক্নিং থৌগৎনফম ওইনৈ‍। ঙসি ঐখোয়গী লৈঙাক্না রবিদাস জীগী ফিদমবু মাঙদা পুদুনা চৎলিবসিদা ঐ নুংঙাইবা ফাওই‍। বি.জে.পি. লৈঙাক অসি মীপুম খুদিংমক্কীনি‍। বি.জে.পি. লৈঙাক্কী স্কীমশিং মীপুম খুদিংমক্কীনি‍। ‘সবকা সাথ, সবকা বিকাস, সবকা বিস্বাস অমসুং সবকা প্রয়াস’ হায়বসিনা ঙসিদি লৈবাকসিগী মীওই করোর ১৪০বু শম্নহন্নবগী লাইৱা ওইরে‍।

মরূপশিং,

রবিদাস জীনা থোং মান্নবা অমসুং পুকচেল খোইজেল তিন্নবগী পারাসু তম্বিরম্মি, অমসুং দলিত অমসুং শোত্থহৌরবা কাঙলুপশিংগীদমক মতম পুম্বদা খল্লম্মি‍। থোং মান্নবা হায়বসি খুন্নাইগী শোত্থহৌরবা কাঙলুপশিংদা মরুওইবা মীৎয়েঙ থম্লবা মতমদা লাক্কদৌরিবনি‍। মরম অদুননি হৌখিবা চহি তরাসিদা চাওখৎপা পুরকপদা ময়ায়দগী খ্বায়দগী হেন্না লাপ্না লৈবশিংবু ময়ায়দা পুরক্তুনা থবক পায়খৎলক্লিবসি‍। মমাঙদা খ্বায়দগী লায়রবনি অমসুং খ্বায়দগী পীকপনি খন্নরম্বশিং অদুগীদমক হৌজিক্তি খ্বায়দগী চাউবা স্কীমশিং হৌদোক্লি‍। হায়রিবা স্কীমশিং অসি হৌজিক্তি মালেমগী ওইনা খ্বায়দগী চাউবা লৈঙাক্কী স্কীম্নি হায়না খন্নরি‍। য়েংবিয়ু, চাওখ্রবা লাংফম কোরোনা লাকখি‍। ঐখোয়না লায়রবা মীওই করোর ৮০দা লেম্না চেঙ চাক ফংহন্নবা স্কীম অমা পায়খৎৎখি‍। কোরোনাগী মতুংদসু, ঐখোয়না লেম্না চেঙ চাক ফংহনবা লেপত্রি‍। মরমদি ঐখোয়না মরোমদোম লেপখৎচরক্লিবা লায়রবশিংবু মখোয়গী অশাংবা খোঙচৎকীদমক ফিরেপ মশানা লৌজহনবা পাম্মি‍। মখোয়দা অহেনবা পোৎলুম অমত্তা পুহল্লোইদবনি‍। অসিগুম্বা স্কীম অমা অসুম্না পাক চাউনা পায়খৎপা অসি মালেমগী লৈবাক অমত্তদা লৈতে‍। ঐখোয়না স্বচ্চ ভারত অভিয়ান পায়খৎখি‍। লৈবাকসিগী খুঙ্গং খুদিংদা লৈরিবা ইমুং খুদিংগী তোইলেৎ লেম্না শাবিখি‍। মসিগী কান্নবা দলিত অমসুং শোত্থহৌরবা ইমুংশিং, মরুওইনা ঐখোয়গী এস.সি., এস.তি., ও.বি.সি. ইমা অমসুং ইচে ইচলশিংনা অয়াম্বা ফংলি‍। মখোয়না লমহাংদা থোকপা অমসুং খুদোংচাদবা কয়া মায়োক্নরম্মি‍।

ঙসিদি, লৈবাকসিগী খুঙ্গং খুদিংদা অরূবা ঈশিং ফংহন্নবা জল জীবন মিসন পায়খৎলি‍। চহি মঙা ফাদনা, য়ুমথোঙ করোর ১১ হেনবদা তোতিগী ঈশিং ফংহল্লে‍। লায়রবা মীওই করোর কয়ানা লেম্না লায়েংনবা অয়ুস্মান কার্দশিং ফংলে‍। মখোয়দা অহানবা ওইনা অনাবা অমা হেক্তা য়াওরকপা মতমদা লায়েংবা ঙমদবনা মখোয়গী মপুন্সি লোইররোই হায়বগী থাজবা ফংলে‍। মতৌ অসুম্না, লায়রবশিংনা জন ধন একাউন্তকী খুত্থাঙদা বেঙ্কতা চৎননবগী মঙম ফংলে‍। হায়রিবা একাউন্তশিং অসিদা লৈঙাক্না শেল হকথেংননা থারি‍। হায়রিবা একাউন্তশিং অসিদগীনি লৌমীশিংনা কিসাম সম্মান নিধিগী কান্নবা ফংলিবা, মখোয়গী মনুংদা লৌমী করোর ১.৫গী ময়াদি ঐখোয়গী দলিত লৌমীশিংনি‍। দলিৎ অমসুং শোত্থহৌরবা লৌমী কয়ানা ফসল বিমা য়োজনাদগী কান্নবা ফংলি‍। নহাশিংগী ওইনসু, ঙসি ঐকোয়না দলিত নহাশিংনা মখোয়না ২০১৪গী মমাঙদা ফংলম্বা স্কোলার্সিপকী চাংদগী শরুক অনি হেন্না পীরি‍। মতৌ অসুম্না, পি.এম. অৱাস য়োজনাগী মখাদা মখোয় মশাগী পক্কাগী য়ুমদা লৈবা ফংহন্নবা লুপা করোর লিশিং কয়া ২০২২-২৩ মনুংদা দলিত ইমুংশিংগী একাউন্ততা থাজিনখি‍।

ঈচিল ইনাওশিং,

ভারতনা অসিগুম্বা অচৌবা থবকশিং অসি তৌবা ঙম্লিবগী মরমদি ঙসি লৈঙাক্না দলিতশিং, তুহৎপিরবা, শোত্থহৌরবা, অমসুং খুন্নাইগী লায়রবা কাঙলুপকীদমক্তা লৈরিবা অনিংবা অসি ময়েক শেংই‍। ভারতনা থবকশিং অসিদা মায় পাকপা ঙম্লিবসিগী মরমদি অদোমগী ‘সাথ’ (ঙাক্লৌ) অমসুং অদোমগী ‘বিস্বাস’ (থাজবা) ঐখোয়গী ইফমদা লৈবননি‍। লম্বোইবশিংগী ৱাহৈশিংনা চক খুদিংদা ঐখোয়বু লমজিংবিরি, অমসুং মখোয়না ঐখোয়দা চেকশিনৱা থম্বিরি‍।

রবিদাস জীনা হেক হেক হায়:

जात पात के फेर महि, उरझि रहई सब लोग।

मानुष्ता कुं खात हई, रैदास जात कर रोग॥

অতোপ্পা ৱাহৈদা হায়রগা, মী অয়াম্বা ফুরুপ অমসুং কাঙলুপ খায়বগী ৱাখল্লোন্দা উংদুনা লৈবনা, অমাঙ অতা কয়া থোকহল্লি‍। ফুরুপ খায়বগী লায়না অসিনা মীওইবা খুন্নাইদা অমাঙ অতা থোকহল্লি‍। হায়বদি, কনাগুম্বা অমনা অতোপ্পা কনাগুম্বা অমবু ফুরুপ নৎত্রগা কাঙলুপকী মিংদা অচান মীরান নাইবা মতৌ উৎলবদি, মখোয়না মীওইবা খুন্নাইদা অমাঙ অতা থোকহল্লি‍। করিগুম্বা কনাগুম্বা অমনা অতোপ্পা মীওইশিংদা ফুরুপকী মিংদা ফত্তবা ৱাফমশিং ইনশিল্লবদি, মখোয়নসু মীওইবা খুন্নাইবু মাঙথহল্লি‍।

মরম অদুনা, ইচিল ইনাওশিং,

ঙসি, লৈবাকসিগী দলিৎ খুদিংমক্না অমসুং শোত্থহৌরবা মীপুম খুদিংনা ৱাফম অমা নীংশিংবা মথৌ তাই‍। ফুরুপ্তা য়ুম্ফম ওইরগা খাইবুং তাহনবদা তাংদুনা লৈরিবা ইন্দিয়া কোএলিসনগী মীওইশিংনা দলিৎ অমসুং শোত্থহৌরবা মীওই কাঙলুপশিংগী য়াইফ-থৌরাংগী স্কীমশিংগী মায়োক্তা লৈরি‍। অশেংবা ৱাফমদি হায়রিববা মীওইশিং অসিনা ফুরুপশিংগী য়াইফনবগী মিংদা মশাগীতা খনবগী রাজনিতী শান্নরি‍। অদোমসু নীংশিংবিরমগনি হায়রিবা মীওইশিং অসিনা লায়রবশিংগী তোইলেৎ শাননবা স্কীম হৌদোরকপা মতমদা নোক্নখিবনি‍। মখোয়না জন ধন য়োজনাবু করেম্নখি‍। মখোয়না দিজিতেল ইন্দিয়াগী মায়োক্তা লেপখি‍। মসিদসু নত্তনা, ইমুং মনুংগী ওইবা রাজনিতীগী অতোপ্পা লীচৎ অমদি মখোয়গী ইমুং মনুংশিংখক নত্তনা মখোয়না দলিৎ নৎত্রগা ত্রাইবেল মীওইবু খুমাঙ চাওশিলহনবা পামদে‍। মখোয়না দলিৎ অমসুং ত্রাইবেল মীওইশিং অৱাংবা ফমদা ফমদনা লৈবা উবা ঙমদে‍। অদোমসু নীংশিংবিরমগনি, লৈবাকসিনা অহানবা ওইনা ত্রাইবেল নুপী, হর এক্সেলেন্সী দ্রৌবদী মুর্মুনা রাস্ত্রপতীগী মীখল লেপ্লকপদা, কনানা মহাক্কী মায়োক্তা লেপখি‍? করম্বা পার্তীশিংনা মহাকপু মায়থিবা পীননবা পুনশিন্নখি‍? মখোয় পুম্নমক, দলিত, শোত্থহৌরবা কাঙলুপশিং, অমসুং ত্রাইবেল ফুরুপশিংবু মীখল মতমদা ভোত বেঙ্ক অমা ওইনা উবা ইমুং মনুংদা তাশিন্দনা লৈবা পার্তীশিংনি‍। হায়রিবা মীওইশিং অসিদগী অমসুং মখোয়গী ৱাখল্লোন্দগী ঐখোয়না চেকশিন্না লৈবা মথৌ তাই‍। ঐখোয়না রবিদাস জীনা তম্বিরম্বা অফবা পারাশিং ইন্দুনা চৎপা অমসুং কাঙলুপ খায়বগী ফত্তবা ৱাখল্লোন্দগী নাথৈদুনা লৈবা মথৌ তাই‍।

মরূপশিং,

রবিদাস জীনা হায়রম্মি:

सौ बरस लौं जगत मंहि जीवत रहि करू काम।

रैदास करम ही धरम है करम करहु निहकाम॥

অতোপ্পা ৱাহৈদা হায়রগনা, করিগুম্বা কনাগুম্বা অমনা চহি চাম্ম পুন্সিরবসু, মহাক্না মপুন্সি চুপ্পা থবক তৌবা তাই মরমদি থবক তৌবনা অচুম্বা চৎপগী মতিক্নি‍। ঐখোয়না ঐখোয়গী থৌদাংশিং ওইজবা থিদনা তৌগদবনি‍। হায়রিবা সন্ত রবিদাস জীগী পাউতাক অসি ঙসি লৈবাক পুম্বদা মরুওই‍। লৈবাক অসিনা নীংতম্বগী ‘অমৃত কাল’ মতমদা খোঙ থাংজিল্লি‍। অদুগা হৌখিবা চহিশিংদা, ‘অমৃত কাল’গী মতমসিদা ‘ভিক্সিত ভারত’ অমগী অচেৎপা য়ুম্ফম অমা থোনখ্রে‍। হৌজিক্তি, লাক্কদৌরিবা চহি মঙাসিদা, ঐখোয়না হায়রিবা য়ুম্ফম অসিবু হেন্না চেৎশিলহন্নবা মখা তানা হোৎনবা তাই‍। হৌখিবা চহি ১০ চঙশিন্দুনা লাক্লিবা লায়রবা অমসুং শোত্থহৌরবা কাঙলুপশিংগী থৌগলগী কেম্পেন অসি মথঙগী চহি ৫ অমগসু শাংথবা মথৌ তারি‍। পুম্নমক অসি লৈবাকসিগী মীওই করোর ১৪০না শরুক য়ারবখক্তদা ওইথোক্কদৌরিবনি‍। মরম অদুনা, লৈবাকসিগী মীপুম খুদিংমক্না মখোয়গী থৌদাংশিং পাঙথোকপা মরুওই‍। ঐখোয়গী লৈবাক্কীদমক খনবা মথৌ তাই‍। ঐখোয়না খাইবুং তাবা ৱাখল্লোন্দগী থাপ্না লৈদুনা লৈবাকসিগী অপুনবগী পাঙ্গল হেন্না কনখৎহনবা মথৌ তাই‍। লৈবাকসিগী মীয়ামগী মঙলান সন্ত রবিদাস জীগী থৌজালগা লোয়ননা শোয়দনা মঙফাওনগনি হায়না ঐনা চেৎনা থাজৈ‍। অমুক্কা হন্না, ঐনা ময়াম পুম্নমক্কী মফমদা, সন্ত রবিদাস জয়ন্তীগী থৌরমসিদা য়াইফ-পাউজেল পীজরি‍।

হন্না হন্না থাগৎচরি!

দিস্ক্লেমর: মসি প্রধান মন্ত্রীগী ৱারোলগী চাউরাকপা ৱাহন্থোক্নি‍। অশেঙবা ৱারোলদি হিন্দীদা পীখিবনি‍।

***