મહામહિમ, પ્રધાનમંત્રી મિત્સો-ટાકિસ,

બંને દેશોના પ્રતિનિધિઓ,

મીડિયાના મિત્રો,

નમસ્તે!

પ્રધાનમંત્રી મિત્સો-ટાકિસ અને તેમના પ્રતિનિધિમંડળનું ભારતમાં સ્વાગત કરતાં મને ઘણો આનંદ થાય છે. ગયા વર્ષે મારી ગ્રીસની મુલાકાત પછી તેમની ભારતની મુલાકાત એ બંને દેશો વચ્ચેની વ્યૂહાત્મક ભાગીદારી વધુ મજબૂત થવાની નિશાની છે.અને સોળ વર્ષના આટલા લાંબા અંતરાલ પછી ગ્રીસના પ્રધાનમંત્રીની ભારત મુલાકાત એ પોતાનામાં એક ઐતિહાસિક પ્રસંગ છે.

મિત્રો,

આજે અમારી ચર્ચાઓ ખૂબ જ અર્થપૂર્ણ અને ઉપયોગી હતી. આ ખુશીની વાત છે કે અમે 2030 સુધીમાં દ્વિપક્ષીય વેપાર બમણા કરવાના લક્ષ્ય તરફ ઝડપથી આગળ વધી રહ્યા છીએ. અમે અમારા સહયોગને નવી ઊર્જા અને દિશા આપવા માટે ઘણી નવી તકો ઓળખી છે. બંને દેશો વચ્ચે કૃષિ ક્ષેત્રે ગાઢ સહકારની ઘણી શક્યતાઓ છે. અને મને આનંદ છે કે બંને પક્ષો ગયા વર્ષે આ ક્ષેત્રમાં થયેલા કરારોને લાગુ કરવા માટે પગલાં લઈ રહ્યા છે. અમે ફાર્મા, મેડિકલ ડિવાઈસ, ટેક્નોલોજી, ઈનોવેશન, સ્કિલ ડેવલપમેન્ટ અને સ્પેસ જેવા અનેક ક્ષેત્રોમાં સહકાર વધારવા પર ભાર મૂક્યો હતો.

અમે બંને દેશોના સ્ટાર્ટ-અપ્સને જોડવા અંગે પણ ચર્ચા કરી. શિપિંગ અને કનેક્ટિવિટી બંને દેશો માટે ઉચ્ચ પ્રાથમિકતાના વિષયો છે. અમે આ ક્ષેત્રોમાં સહકાર વધારવાની પણ ચર્ચા કરી.

મિત્રો,

સંરક્ષણ અને સુરક્ષામાં વધતો સહયોગ અમારા ઊંડા પરસ્પર વિશ્વાસને દર્શાવે છે. આ ક્ષેત્રમાં કાર્યકારી જૂથની રચના સાથે, અમે સંરક્ષણ, સાયબર સુરક્ષા, આતંકવાદ વિરોધી, દરિયાઈ સુરક્ષા જેવા સામાન્ય પડકારો પર પરસ્પર સંકલન વધારી શકીશું.

ભારતમાં ડિફેન્સ મેન્યુફેક્ચરિંગમાં કો-પ્રોડક્શન અને કો-ડેવલપમેન્ટની નવી તકો ઊભી થઈ રહી છે, જે બંને દેશો માટે ફાયદાકારક બની શકે છે. અમે બંને દેશોના સંરક્ષણ ઉદ્યોગોને જોડવા માટે સંમત થયા છીએ. આતંકવાદ સામેની લડાઈમાં ભારત અને ગ્રીસની સમાન ચિંતાઓ અને પ્રાથમિકતાઓ છે. અમે આ ક્ષેત્રમાં અમારો સહયોગ કેવી રીતે વધુ મજબૂત બનાવવો તેની વિગતવાર ચર્ચા કરી.

મિત્રો,

બે પ્રાચીન અને મહાન સભ્યતાઓ તરીકે, ભારત અને ગ્રીસમાં ઊંડા સાંસ્કૃતિક અને લોકો વચ્ચેના સંબંધોનો લાંબો ઇતિહાસ છે. લગભગ અઢી હજાર વર્ષથી બંને દેશોના લોકો વેપાર અને સાંસ્કૃતિક સંબંધો તેમજ વિચારોનું આદાન-પ્રદાન કરે છે.

આજે અમે આ સંબંધોને આધુનિક સ્વરૂપ આપવા માટે ઘણી નવી પહેલો ઓળખી કાઢી છે. અમે બંને દેશો વચ્ચે શક્ય તેટલી વહેલી તકે સ્થળાંતર અને ગતિશીલતા ભાગીદારી કરાર પૂર્ણ કરવા ચર્ચા કરી. આનાથી અમારા લોકો-થી-લોકોના સંબંધો વધુ મજબૂત થશે.

અમે બંને દેશોની ઉચ્ચ શિક્ષણ સંસ્થાઓ વચ્ચે સહકારને પ્રોત્સાહન આપવા પર પણ ભાર મૂક્યો હતો. અમે આવતા વર્ષે ભારત અને ગ્રીસ વચ્ચેના રાજદ્વારી સંબંધોની 75મી વર્ષગાંઠની ઉજવણી કરવા માટે એક એક્શન પ્લાન તૈયાર કરવાનું નક્કી કર્યું. આ સાથે, અમે વૈશ્વિક મંચ પર સમાન વારસો, વિજ્ઞાન અને ટેક્નોલોજી, નવીનતા, રમતગમત અને અન્ય ક્ષેત્રોમાં બંને દેશોની સિદ્ધિઓ દર્શાવી શકીશું.

મિત્રો,

આજની બેઠકમાં અમે ઘણા પ્રાદેશિક અને આંતરરાષ્ટ્રીય મુદ્દાઓ પર પણ ચર્ચા કરી. અમે સંમત છીએ કે તમામ વિવાદો અને તણાવનો ઉકેલ સંવાદ અને રાજદ્વારી દ્વારા થવો જોઈએ. અમે ગ્રીસની સક્રિય ભાગીદારી અને ઈન્ડો-પેસિફિકમાં સકારાત્મક ભૂમિકાને આવકારીએ છીએ. ગ્રીસે ઈન્ડો-પેસિફિક મહાસાગર પહેલમાં જોડાવાનો નિર્ણય લીધો છે તે ખુશીની વાત છે. પૂર્વ ભૂમધ્ય પ્રદેશમાં સહકાર માટે પણ સમજૂતી થઈ છે.    G-20ના ભારતના પ્રમુખપદ દરમિયાન શરૂ કરાયેલ, I-MAC કોરિડોર લાંબા ગાળે માનવતાના વિકાસમાં મહત્વપૂર્ણ યોગદાન આપશે.

ગ્રીસ પણ આ પહેલમાં મહત્વપૂર્ણ ભાગીદાર બની શકે છે. અમે યુએન અને અન્ય વૈશ્વિક સંસ્થાઓમાં સુધારા કરવા સંમત છીએ, જેથી તેમને સમકાલીન બનાવી શકાય. ભારત અને ગ્રીસ વૈશ્વિક શાંતિ અને સ્થિરતામાં યોગદાન આપવા માટે તેમના પ્રયાસો ચાલુ રાખશે.

મહામહિમ

આજે સાંજે તમે રાયસીના ડાયલોગમાં મુખ્ય અતિથિ તરીકે ભાગ લેશો. અમે બધા ત્યાં તમારું સંબોધન સાંભળવા આતુર છીએ. તમારી ભારત મુલાકાત અને આપણી ફળદાયી ચર્ચા માટે હું તમારો ખૂબ ખૂબ આભાર માનું છું.

AP/GP/JD

સોશિયલ મીડિયા પર અમને ફોલો કરો :  @PIBAhmedabad    /pibahmedabad1964    /pibahmedabad  pibahmedabad1964[at]gmail[dot]com