শ্রী স্বামী নরায়ন জয় দেব, হিস এক্সলেন্সী শৈখ নহয়ান অল মুবারক, নুংশিরবা মহন্ত স্বামীজী মহারাজ, ভারত, য়ু.এ.ই. অমসুং মালেমগী তোঙান-তোঙানবা মফমশিংদগী লেংবীরক্লিবা মীথুংলেন অমসুং মালেমগী মফম কয়াদগী ঙসিগী থৌরমসিদা শরুক য়ারিবা ঐহাক্কী ইচিল ইনাওশিং!

য়ুনাইতেদ অরাব ইমিরেৎসনা ঙসি মীওইবা খুন্নাইগী পুৱারীদা সনাগী য়ুগ অমা হৌদোকখ্রে। অবু ধাবীদা নীংথিরবা অমসুং চাউরবা লাইশঙ অমা শঙ্গাখিবগা লোয়ননা মতম কয়াদগী ৱানা হোৎনরকপগী মহৈ য়ালহনখ্রে অমসুং চাউরবা মঙলান অমসু মঙফাওনহনখ্রে। ভগ্বান স্বামী নরায়নগী থৌজালগা ঙসিগী শক্নাইরবা পুঙফম অসিগা অমত্তা ওইমিন্নরি। প্রমুখ স্বামী নরায়ন্না লৈরিবা লাইরৈবাক্কী মফম অদুদা মহাক্কী থৱাইনা শোইদনা নুংঙাইবা ফাওরমগনি। ঐহাক্কা স্বামীগগী মরক্তা লৈনখিবা মরীদি মপা অমসুং মচাগা লৈমিন্নবা মরীগুম্বনি। ঐহাক্না মহাক্কা পুঞ্জবা ফংবগী লাইবক ফরবা খুদোংচাবা ফংজখি অমসুং মহাক্কী মফমদগী মপা ওইবগী মীনুংশি ফংজখিবা অসিনা ঐহাক্কী পুন্সিগী মশক থোক্লবা শরুক অমা ওইরি। ঐহাক্না মুখ্য মন্ত্রী অমসুং প্রধান মন্ত্রী ওইবগী মতমশিংদা মহাক্কী মফমদগী পাউতাক লেপ্তনা ফংজখি। পনবা য়াবা ৱাফম অমনা, দিল্লীদা অকশর্ধাম শারিঙৈ মতমদা ঐহাকসু মহাক্না হায়বদগী উরেপ উয়ুং তম্বগী থৌরমদা শরুক য়াজখি। মসিদি ঐহাক্কী রাজনীতিগী পুন্সি হৌদ্রিঙৈগী মমাংদনি। মহাক্না য়মুনা তুরেলগী তোর্বান্দা শেংলবা লাইশঙ অমা শাদুনা মহাক্কী গুরুগী য়াথং ইনখিবগুম্না, হায়বা ইনবা তুং ইনবা অমগী ৱাখল্লোন শাগোন্নদুনা, ঙসি ঐহাক্না চপ মান্নবা ৱাখল্লোনগা লোয়ননা, ঐহাকসু অদোমগী মাঙদা লেপচরি, অমসুং প্রমুখ স্বামী মহারাজকী মঙলান মঙফাওনবা ফংহনবা ঙম্বদা লাইবক ফবগী ইথিল ফাওজরি। মসিদা নত্তনা, ঙসি অসিদি বসন্ত পঞ্চমী হৌবা অমসুং শেংলবা শাস্ত্রীজী মহারাজকী মপোক কুমওনগী শেংলবা নুমিৎ অমসু ওইরি। বসন্ত পঞ্চমীনা মীওইবগী লৌশিং অমসুং নুংগী ৱাখল্লোনগী লাইরেম্বী সরস্বতীবু লাৎচবগী খুদোংচাবা পীরি। মসিগুম্বা লৌশিং অসিনা ঐখোয়না পুন্সিদা তেংবাংনবা, নুংশি-চানবা অমসুং অমত্তা ওইবগী ৱাখল্লোনবু থবক্তা পাংথোকপা ঙমহল্লি। লাইশঙ অসিনা মীওইবা খুন্নাইগী তুংগী য়াইফরবা মতম অমা পুবীরক্কনি, নুংশি চান্ননা লৈবগী খুদম ওইগনি অমসুং মালেম্না অমত্তা ওইবগী ইথিল পীগনি হায়না ঐহাক্না থাজবা থমজরি।

ইচিল ইনাওশিং,

য়ু.এ.ই.গী তোলরেন্স মন্ত্রী, হিস এক্সলেন্সী শৈখ নহয়ান অল মুবারক্না ঙসিগী থৌরমসিদা শরুক য়ারিবা অসিনা নুমিৎ অসিবু অখন্নবা ওইহল্লি। মহাক্না মশাগী ৱাখল্লোন ফোংদোকপীদুনা অমসুং ঐখোয়গী ইথিল ৱাংখৎহন্নবা মশাগী ৱাহৈদা নীংথিনা পাউদম্বীবগীদমক্তা ঐহাক্না মহাকপু থাগৎচরি।

মরুপশিং,

লাইশঙ অসিবু শাবদা য়ু.এ.ই. সরকারনা পাংখিবা মশক থোকপা তেংবাংশিং ঐখোয়না কাওবা ঙম্লোই। অদুবু, নীংথিরবা লাইশঙ অসিগী মঙলান মঙফাওনহনবদা খ্বাইদগী চাউবা থৌদাং লৌবীখিবা, অমসুং মায় পাকপা অসিগী মহৈদি ঐহাক্কী ইনাও, হিস হাইনেস শৈখ মোহম্মদ বিন জায়েদকী মফমদা পীজগনি। রাস্ত্রপতি শৈখ মোহম্মদ বিন জায়েদকী লুচিং মখাদা য়ু.এ.ই.গী অপুনবা সরকারনা ভারত মচা করোর কয়াগী অপাম্বা মতৌ করম্না ফংহনখিবগে হায়বা ঐহাক খঙই। মহাক্না ভারত মচা করোর 140গী থম্মোইদা মফম কনবা ঙমখিবতা নত্তনা প্রমুখ স্বামীজী মঙলান ওইরম্বা লাইশঙ অসিবু অশেংনা ওইহনবদা অচৌবা থৌদাংসু লৌবীখিবনি। হিস হাইনেস শৈখ মোহম্মদ বিন জায়েদকী থম্মোই চাউবগী মতৌবু ইমিৎমক্না উবা ফংখিবতা নত্তনা প্রোজেক্ত অসিনা হৌরকখিবদগী মায় পাক্না লোইশিনবা ফাওবগী থাক্কা মরী লৈনবা ফংজখিবা অসি ঐহাক্কী লাইবক ফবনি হায়না লৌই। ঐহাক্না মহাক্কী মফমদা মতম পুম্বগী তৌবীমল খঙবা উৎচরি। মহাক্কী থাক অমসুং ভারত য়ু.এ.ই.গী মরীনা চেৎশিন্নরিবা অসিগী মতৌবু ভারত অমসুং য়ু.এ.ই.গী মীয়াম খক্তা নত্তনা মালেম পুম্বনা খঙবা হায়বসি ঐহাক্কী অপাম্বনি। ঐহাক্কী ইং ২০১৫গী য়ু.এ.ই.গী খোঙচত্তা ঐহাক্না লাইশঙ অসিগী ৱাখল্লোনবু হিস হাইনেস শৈখ মোহম্মদকা খন্নখিবা অদু ঐহাক্না নীংশিংলি। ভারত মীয়ামগী অপাম্বা অসিবু মহাক্কী মফমদা পাউদম্বা মতমদা, মহাক্না ঐহাক্কী ৱাহৌদোকপু খুদক্তা অমসুং থৱাই য়াওনা য়াবীখি। মহাক্না লসিশঙ অসিগীদমক্তা চাউরবা লম অমা য়াম্না থুনা পীরকখি, মহাক্না লোইবা নাইদনা তেংবাংগনি হায়বগী মতৌ উৎপীরকখি। মসিদা নত্তনা, লাইশঙ অসিগা মরী লৈনবা অতোপ্পা শিংনবা অমবুসু মহাক্না লোইশিনখি। ঐহাক্কী ইং 2018গী য়ু.এ.ই. খোঙচত্তা, ব্রহ্মবীরি স্বামীজীনা তাকপীবগুম্না, লোকেল সন্ত অমনা লাইশঙ অসিগী মোদেল অনি লান্থোকখি। মোদেল অমনা ভারতকী অরিবা বেদগী মওং-মতৌনা ইথিল পীবা চাউরবা লাইশঙ অমনি, অদুগা অতোপ্পা অমনা, হিন্দু ধর্মগী সীম্বোলশিংনা মপান্থোংদা লৈতেংবা অচম্বা দিজাইন অমনি। য়ু.এ.ই. সরকারনা অয়াবা পীবা দিজাইন অদু শাগনি হায়না সন্ত অসিনা তাকপীখি। হিস হাইনেস শৈখ মোহম্মদকা ৱাফম অসিগী মতাংদা খন্নবদা, মহাক্কী ৱাখল্লোনদা য়েৎননীংঙাই লৈখিদে। অবু ধাবীদা শাগদৌরিবা লাইশঙ অসিদি য়াম্না চাউগদবনি অমসুং নীংথিজগদবনি হায়না মহাক্না হায়বীরকখি। মহাক্না মসিবু লাইশঙ অমখক ওইনা উবগী মথক্তা লাইশঙগী আর্কিতেকচর অশেংনবা অদুমক শাগোন্নগদবনি হায়না উখিবনি।

মরুপশিং,

মসিদি য়াম্না পীকপা ৱাফম নত্তে, মসিদি চাউরবা থবক অমনি। মসিদি মফমসিদা শুপ্নগী লাইশঙ অমা শাবখক নত্তে। মসিদি মফমসিদা তসেংবা লাইশঙ অমা লৈবগী ইথিল ফাওহনবা অদুনি। ভারতা মচিল মনাও ওইবগী ইথিল অমা লৈরিবা অসিনা ঐখোয়গী খ্বাইদগী চাউবা লন্নি। ঐখোয়না ঙসি উরিবা চাউরবা লাইশঙ অসিমক হিস হাইনেস শৈখ মোহম্মদকী চাউরবা মিৎয়েংগী খুদম্নি। য়ু.এ.ই. অসি হৌজিক ফাওবদা বর্জ খলিফা, ফ্যুচর ম্যুজিয়ম, শৈখ জায়েদ মোস্ক অমসুং তোপ-তোপ্পা আর্কিতেকচর কয়াগীদমক্তা হৌজিক ফাওবা মমিং চৎলম্বনি। হৌজিক্তি, লৈবাক অসিগী শক্তাক্তা অনৌবা শক্তাক অমসু হাপচিল্লে। মশিং য়াম্লবা লাইনীংবা কয়ানা তুংগী মতমদা মফমসিদা লাক্কনি, য়ু.এ.ই.দা লাকপা মীওই মশিং হেনগৎলক্কনি, অমসুং পীপল-তু-পীপল রিলেসন্স হেনগৎহনগনি হায়না ঐহাক্না থাজবা থম্লি। ভারত অমসুং মালেমগী মফম কয়াদা লৈরিবা ভারত মচা করোর কয়াগী মহুৎ শিন্দুনা, ঐহাক্না হিস হাইনেস শৈখ মোহম্মদ অমসুং য়ু.এ.ই. সরকারগী মফমদা থম্মোই শেংনা থাগৎচরি। য়ু.এ.ই.গী রাস্ত্রপতিগী মফমদা ঐখোয়না মফমসিদগী লেপ্তুনা খুবাক হৌনা খুদুনা ইকায় খুম্নবা উৎপদা অদোম পুম্নমক্না ঐহাক্কী শরুক য়াবীনবা হায়জরি। অদোম্বু থাগৎচরি। ঐহাক্না য়ু.এ.ই.গী মীয়াম্বু মখোয়না পাংখিবা মতেং কয়াগীদমক্তসু থাগৎচরি।

মরুপশিং,

ভারত অমসুং য়ু.এ.ই.গী মরী অসিদি অমনা অমবু থাজবা অমসুং তেংবাংনবগী মোদেল অমনি হায়না মালেম পুম্বনা লৌনরিবনি। অখন্নবা ওইনা, হন্দক্কী চহি খরসিদা ঐখোয়গী মরীনা মমাংদা য়ৌরমদবা থাক্তা য়ৌখি। অদুবু, ভারতনা মরী অসিবু হৌজিক মতমগী লৈনরিবা হীরম খক্তগী মিৎয়েংদগী য়েংদে। মরীশিং অসিগী ফম্বাক্ত চহি লিশিং কয়াগী মমাংদগী শেমখ্রবনি হায়না ঐখোয়না লৌই। চহি চা কয়াগী মমাংদা, অরাব মালেম্না ভারত অমসুং য়ুরোপকী ত্রেদকী মরু ওইবা থোং ওইনা থৌ পুরম্মি। ঐহাক্কী পোকফম রাজ্য ওইরিবা গুজরাতকী লল্লোনশিংগী ওইনা অরাব মালেম অসিদি হায়রিবা ত্রেদকী মরীশিং অসিগী মরু অইবা হব অমা ওইরিবনি। মসি ঐখোয়গী ইপা ইপুশিংগী মতমদগী ওইদুনা লাক্লবনি। সিবিলাইজেসন অনিনা মফমসিদা থেংনবা অসিদগী অনৌবা খুদোংচাবা কয়া লাকখিবনি, আর্ত, লিতরেচর অমসুং কলচরগী অনৌবা থোঙ কয়া হাংদোকখিবনি। অদুনা, অবু ধাবীদা লাইশঙ শাবগী মরু ওইবা অসি ঐখোয়না হন্থনা লৌবা য়ারোই। লাইশঙ অসিনা ঐখোয়গী অরিবা মতমগী মরীদা নাৎকী ওইবা অনৌবা ইনোৎ অমসু হাপ্লিবনি।

মরুপশিং,

অবু ধাবীদা লৈরিবা চাউরবা লাইশঙ অসিদি শুপ্নগী লাইনীংবগী মফম অমখক নত্তে, মসিদি মীওইবা খুন্নাইগী হেরিতেজ লান্নবগী খুদম অমসু ওইরিবনি। মসিনা ভারত অমসুং অরাবিয়াগী মীয়ামগী নুংশি চানবগী মতৌ শাগোন্নরি অমসুং ভারত-য়ু.এ.ই. মরীগী স্পিরিচুএল ওইবা মায়থোংগী মমিসু মসিদা তারি। ঐহাক্না BAPSকী লুপ অমসুং মখোয়গী মেম্বরশিংবু মসিগুম্বা শক্নাইরবা মায় পাকপা অসিগীদমক্তা থাগৎচরি। ঐহাক্না হরী নিংবা মীওইশিংগী মতৌবুসু থাগৎচরি। BAPS লুপ্না মালেম শিনবা থুংবদা লাইশঙ কয়া শারি, পুম্নমক অসি ঐখোয়গী নুংশিরবা মুনি কয়াগী লমজিং লমতাক্কী মখাদা পাংথোক্লি। লাইশঙশিং অসিদা মিৎয়েং চঙলিবা বেদগী কুপ্লবা মওং মতৌ খুদিংবু মতমগা চুনবা মতৌগা চান্নরি। স্বামীনরায়ন সনয়াস্কী চৎনবীনা মীওই অমনা মশাগী অরিবা ৱাখল্লোন ইন্ন-ইন্না মালেমগী মতমগী চৎনবীবুসু মতৌ করম্না ইন্দুনা চৎপগে হায়বা উৎলি। দিভোতী খুদিংগী মফমদা মিৎয়েং চঙলিবা, অদোমগী লুপকী তাশিন খোমজিনবগী মতিক অমসুং নীংথিনা মথৌ পাংথোকপগী মতৌবু মীপুম খুদিংনা তম্ফম থোকই। পুম্নমক অসিদি ভগ্বান স্বামীনরায়নগী লাইওইরবা মতৌগী শাইওন্নি। ঐহাক্না ঙসিগী শক্নাইরবা পুঙফম অসিদা ভগ্বান স্বামীনরায়নগী মফমদা কোক নোঞ্জরি। লৈবাক অমসুং মালেমগী মফমদা লৈরিবা দিভোতী খুদিংবু ঐহাক্না থাগৎচরি।

মরুপশিং,

হৌজিক অসিদি ঐখোয়গী লাইনিং অমসুং চৎনবীগী সনাগী য়ুগ অমসু ওইরিবা ভারতকী অমৃত কালগী মতম্নি। চহি কয়াদগী মঙলান ওইনা মঙদুনা লাকখিবা অয়োধ্যাগী ফজরবা রাম মন্দিরসু মমাংগী থামক্তদা মঙফাওনখ্রে। রাম্লল্লানা ঙসিদি মহাক্কী লৈফমদা লেংশিনখ্রে, মসিনা ওইহনখিবা নুংশি চানবা অমসুং হরাও তয়াম্বগী মতৌনা ভারত অমসুং ভারত মচা খুদিংগী মফমদা শন্দোক্লি। অদুগা ঙসিদি, ঐহাক্কী নুংশিরবা মরুপ ব্রহ্মবীরি স্বামীনা মোদীজীনা মখোয়গী খ্বাইদগী মাঙদা লৈবা পুজারীনি হায়বীখ্রে। লাইশঙ অমগী পুজারী ওইবগী গুন অসি ঐহাক্কী নুংদা য়াওই নত্ত্রগা য়াওদে হায়বদি ঐহাক খঙজদে, অদুবু ঐহাক্তি ভারত ইমাবু নীংজবা মীওই অমা ওইজবসিদা য়াম্না চাউথোকচৈ। ঐহাক্কী মফমদা পীবিরিবা পুঙফম খুদিং অমসুং মপুনা ঐহাক্কী হকচাংদা পীবিরিবা পোৎলম খুদিংমক ইমা ভারতীগী মফমদা পুম্নমক কত্থোকচরবনি। ঐহাক্কী লৈবাক মীয়াম করোর 140 অসিনা ঐহাক্কী নুংশিজরবা ঈশ্বরশিংনি।

মরুপশিং,

ঐখোয়না অয়োধ্যাদা ফাওখিবা নুংঙাইবগী মতৌ অদুবু ঐখোয়না ঙসি অবু ধাবীদা উরিবা নুংঙাইবগী মতৌনা অমুক্কা হেন্না হেনগৎহল্লে। অহানবদা অয়োধ্যাদা রাম মন্দির উজবা ফংবা, অদুগা হৌজিক্না অবু ধাবীদা লাইশঙ অসিবু উজবা ফংলিবা অসিমক ঐহাক্কী লাইবক ফবনি হায়না ঐহাক্না খঞ্জরি।

মরুপশিং,

ঐখোয়গী বেদনা ‘একাম সত বিপ্রা বহুদা বদন্তী’ হায়রি, মসিনা হায়বদি, স্কোলরশিংনা চপ মান্নবা ঈশ্বর অমসুং অচুম্ববু মখল কয়াগী পাম্বৈ শিজিন্নদুনা ৱাহন্থোক পী হায়বনি। মসিগী ৱাখল্লোন অসি ঐখোয়গী ভারতকী নুংগী অমসুং ময়োল ওইরিবা ৱাখল্লোন্দা য়াওই। অদুনা, ঐখোয়না মীপুম খুদিংবু নুংশিবতা নত্তনা পুম্নমকপুসু তরাম্না ওক্লিবনি। ঐখোয়না দাইবর্সিতীবু খেন্নবা পুথোক্নবা লৌদে, ঐখোয়গী তোপ তোপ্পা পাঙ্গল ওইনা লৌই। মসিগী থাজবা অসিনা ঐখোয়না মালেমগী ওইবা শিংনবা অমসুং ইরাং থেংনবা মতমদা ঐখোয়গী পাঙ্গল হাপ্পি, ঐখোয়না মীওইবা খুন্নাইদা থম্বা থাজববু ঙাক শেন্দুনা থম্মি। লাইশঙ অসিদা কানবা খোঙথাং খুদিংদা, অদোম্না দাইবর্সিতীদা থাজবা লৈবগী মতৌ উগনি। হিন্দু আইকোনোগ্রাফীগা লোয়ননা, লাইশঙগী ফক্লাংশিং অসিদা ইজিপ্সিয়নশিংগী হৈরোগ্লীফ অমসুং বাইবল অমদি কুরানগী পাউতাকশিং য়াওরি। ঐহাক্না লাইশঙ মনুংদা হেক চঙবা মতমদা, ৱাল ওফ হার্মোনীনা ঐহাক্কী পুক্নিং চীংশিনখি, মসিদি বোহরা মুস্লিম খুন্নাইনা শাবনি। মসিগা লোয়ননা, পার্সী খুন্নাইনা হৌদোক্তুনা, লাইশঙ অসিগী নীংথিরবা 3D এক্সপেরিএন্স অমসু উৎলি। ঐখোয়গী সিখ ইচিল ইনাওশিংনা মফমসিদা লঙ্গরগী থৌদাংসু লৌবীরি। লাইনিং মখল খুদিংগী মীয়াম্না লাইশঙ অসি শাবদা থৌদাং য়াখি। লাইশঙ অসিগী য়ুম্বী নত্ত্রগা মিনারেৎ তরেৎ অসিনা য়ু.এ.ই.গী ইমিরেৎস তরেৎকী খুদম ওইরিবা অসিমকসু য়াম্না নুংঙাইবা ৱাফম অমা ওইরি। ঐখোয়না মফম খুদিংদা চৎলুবা মতমদা, মফমদুগী চৎনবী অমসুং মীয়াম্বু ইকায় খুম্নৈ হায়বা ভারত মচাশিংগী মওং-মতৌবু ইথিল অসিনা উৎলি। পুম্নমকপু ইকায় খুম্নবগী মতৌ অসিমক হিস হাইনেস শৈখ মোহম্মদকী পুন্সিদসু শাগোন্নবগী মতৌ উবসিদা থৱাই নুংঙাইবা ফাওই। ঐহাক্কী ইনাও, মরুপ, শৈখ মোহম্মদ বিন জায়েদসু মসিগুম্বা ইচিল ইনাও ওইবগী ৱাখল্লোন চেল্লি। মহাক্না অবু ধাবীদা অব্রহ্মিক ইমুংগী হাউস শাখি, মসিদা মোস্ক, চর্চ অমসুং সীনাগোগ অমা য়াওরি। অদুগা, হৌজিক্না অবু ধাবীদা লৈরিবা ভগ্বান স্বামী নরায়ন লাইশঙ অসিনা য়ুনিতী ইন দাইবর্সিতীগী ৱাখল্লোন্দা অনৌবা মাইকৈ অমা উৎলি।

মরুপশিং,

ঙসিদি, মসিগুম্লবা নীংথিরবা অমসুং শেংলবা মফমসিদগী, ঐহাক্না অতোপ্পা নুংঙাইবা পাউ অমগা তমজবদা নুংঙাইবা ফাওজরি। ঙসিগী অয়ুক্তা, য়ু.এ.ই.গী উপ-রাস্ত্রপতিনা ভারতকী শিন্মীশিংগী হোস্পিতাল শানবা লম পীরগনি লাউথোকপীখ্রে। ঐহাক্না মহাক অমসুং ঐহাক্কী ইনাও, শৈখ মোহম্মদ বিন জায়েদপু ৱাফম অসিগীদমক্তা থম্মোই শেংনা থাগৎচরি।

মরুপশিং,

ঐখোয়গী বেদনা “সমানো মন্ত্রা সমিথী সমানী, সমামম মনাহ সাহা চিত্তম ইশম” হায়বা লৌশিং পীবিরি। মসিনা হায়বদি, ঐখোয়গী ৱাখল অসি পুনগদবনি, ঐখোয়গী ৱাখল্লোনসু পুনগদবনি অমসুং ঐখোয়গী ৱারেপসু পুনগদবনি হায়বনি। মসিনা মীওইবা খুন্নাইনা অমত্তা ওইবগী মতৌ চেন্সি অমসুং ঐখোয়গী স্পিরিচুএলিতীগী তঙাই ফদবা মগুন চেন্সি হায়রি। ঐখোয়গী লাইশঙশিংনা মসিগুম্বা পাউতাক অমসুং ৱারেপ কয়াগী হব অমা ওইনা থৌ পুরি। থৱাই পানবা জিব খুদিংমক অমত্তা ওইগদবনি, মালেমগী য়াইফ য়ুম্বাল লৈগদবনি হায়না ঐখোয়না খুদিংনা বেদগী মন্ত্রা শোন্দুনা লাইশঙ অসিদগী অমত্তা ওইবা খোঞ্জেল তাহল্লসি। মালেম পুম্বা অসি ইমুং অমনি হায়বা বাসুদৈবা কুতুম্বাকমগী ৱাখল্লোন লাইশঙশিং অসিনা ঐখোয়দা তাকপীরি। ৱাখল্লোন অসিনা লমজিংদুনা ভারতনা মালেমগী শান্তিগী খোল্লাও লাওরি। হন্দক্কী ভারতকী G20গী প্রসিদেন্সী মতমদা, মেম্বর লৈবাকশিংনা ‘ৱান আর্থ, ৱান ফেমিলী, ৱান ফ্যুচরগী ৱারেপ লৌদুনা তুংলমচত্তা পুনবা য়ানখি। ‘ৱান সন, ৱান ৱর্ল্দ, ৱান গ্রিদ’কুম্বা কেম্পেনশিংনা ঐখোয়গী থবকশিংগী খুদম ওইরি। ‘সর্বে ভবন্তু সুকিনাহাঃ সর্বে সন্তু নিরামায়া’গী ইথিলগা লোয়ননা, ভারতনা ‘ৱান আর্থ, ৱান হেল্থ’কী মিসনগী মায়কৈদা চঙশিল্লি। ঐখোয়গী চৎনবী অমসুং লাইনীংনা ঐখোয়বু মালেমগী য়াইফ য়ুম্বালগীদমক্তা থবক তৌনবা ইথিল পীরি। ভারতনা সবকা সাথ, সবকা বিকাস, সবকা বিশ্বাস অমসুং সবকা প্রয়াসকী মন্ত্রগী মায়কৈদা খোঙদারি। অবু ধাবী লাইশঙনা শাগোন্নরিবা মীওইবা খুন্নাইগী অফবা তৌবগী মিৎয়েং অসিনা ঐখোয়গী ৱারেপশিংদা পাঙ্গল হাপ্তুনা থবক ওইনা পাংথোকপা ঙমহনগনি হায়না ঐহাক্না থাজৈ। থাজবা অসিগা লোয়ননা, ঐহাক্না ঙসি তিল্লিবা মীয়াম খুদিংগী মফমদা থমোই শেংনা থাগৎচরি। ঐহাক্না লাইশঙ অসিবু মীওইবা খুন্নাইদা কত্থোকচরি। ঐহাক্না ইকায়খুম্ননীংঙাই ওইরবা মহান্ত স্বামীজীগী মফমদা কোক নোঞ্জরি অমসুং ইকায়খুম্ননীংঙাই ওইরবা প্রমুখ স্বামীজীবু ইকায় খুম্নজবগা লোয়ননা দিভোতী খুদিংদা “জয় স্বামী নরায়ন”গী য়াইফ পাউজেল পীজরি।

পুম্নমকপু থাগৎচরি।

***