প্রধানমন্ত্রীগী লোইশঙ
প্রধান মন্ত্রীনা সি.এল.ই.এ-কম্মনৱেল্থ এত্তোর্নিজ এন্দ সোলিসিএতর্স জেনেরেল কনফরেন্স ২০২৪ হৌদোকখ্রে
“ফজরবা ভারত মপুংফানা য়েংনবা ঐনা মালেমগী অতিথিশিংদা হায়জরি”
“ভারতনা প্রসিদেন্ত ওইবা মতমদা অফ্রিকান য়ুনিয়ন জি-২০গী শরুক অমা ওইবদা ঐখোয় চাউথোকচবা ফাওই”
“অচুম্বা অসি নিংতম্না মশা মরোমদোম লৈবাক ঙাকচনবগী মরুনি, অমসুং অচুম্বা য়াওদনা, লৈবাক অমা হিংবা ফাওবা ঙম্লোই”
“ঐখোয়না মতেং পাংনবা মতমদা, ঐখোয় অমনা অমগী সিস্তেমশিং হেন্না ফজনা খঙগনি। নিংথিনা খঙবনা হেন্না পুন্না থবক তৌমিন্নগনি। পুন্না থবক তৌমিন্নবনা অচুম্বা য়াংনা ফংহনবা ঙমগনি”
“২১শুবা চহিচাগী খুদোংচাদবশিং ২০শুবা চহিচাগী থৌওংনা থেংনবা ঙম্লোই। অমুক খন্থবা, অমুক হন্না ৱাখল শাগৎপা অমসুং অওনবা পুরকপা দরকার ওই”
“অচুম্বা ৱায়েন ফংবা হেনগৎহনবদা লিগেল ইজুকেসন অসি মরুওইবা অমনি”
“হৌজিক্কী অচুম্বশিং মমি তাহন্নবা ভারতশু আইনশিং মতমগা চুনবা মওংদা শেমদোক্লে”
“মীওই খুদিংমক মতম চানা অচুম্বা ৱায়েন ফংবা অমসুং কনা অমতা চিৎথহৌদবা মালেম অমা ঐখোয় শেমগৎলসি”
Posted On:
03 FEB 2024 12:11PM by PIB Imphal
প্রধান মন্ত্রী শ্রী নরেন্দ্র মোদীনা ঙসি নিউ দিল্লিদা বিগ্যান ভাবন্দা কম্মনৱেল্থ লিগেল ইজুকেসন এসোসিএসন(সি.এল.ই.এ)-কম্মনৱেল্থ এত্তোর্নিস এন্দ সোলিসিএতর্স জেনেরেল কনফরেন্স ২০২৪ হৌদোকখ্রে। মীফম অদুগী থিমদি “ক্রোস-বোর্দর চেলেঞ্জেস ইন জর্জতিস দেলিভরি” হায়বনি। মীফম অদুদা জুদিসিএল ত্রান্সসিসন অমসুং আইনগী থবকশিংগী ইথিকেল ওইবা শরুকশিং, ইজুকিউতিপ একাউন্তেবিলিতি অমসুং অনৌবা যুগকী লিগেল ইজুকেসনগী মতাং য়াওনা লো অমসুং জর্জতিসকা মরী লৈনবা ৱাফমশিং খন্নগনি।
তিনখিবা মীয়ামদা ৱা ঙাংবদা প্রধান মন্ত্রীনা হায়খি, মালেম শীনবা থুংবগী শক্নাইরবা আইনগী মীওইশিং শরুক য়ারিবা কম্মনৱেল্থ লিগেল ইজুকেসন এসোসিএসন(সি.এল.ই.এ)-কম্মনৱেল্থ এত্তোর্নিস এন্দ সোলিসিএতর্স জেনেরেল কনফরেন্স ২০২৪ হৌদোকপদা অপেনবা পোকই অমসুং ভারতমচা করোর ১৪০গী মহুৎশীন্দুনা মালেমগী অতিথিশিং তরাম্না ওকচরি। ফজরবা ভারত মপুংফানা য়েংনবা ঐনা মালেমগী অতিথিশিংদা হায়জরি।
মীফম অসিদা অফ্রিকাগী মীহুৎশিং শরুক য়াবা অসি পল্লদুনা, প্রধান মন্ত্রীনা হায়খি ভারতনা অফ্রিকান য়ুনিয়নগা অখন্নবা মরী অমা লৈনরি অমসুং ভারতনা প্রসিদেন্ত ওইবা মতমদা অফ্রিকান য়ুনিয়ন জি-২০গী শরুক অমা ওইবদা ঐখোয় চাউথোকচবা ফাওই। মসিনা অফ্রিকাগী মীয়ামগী অনিংবশিং থুংহন্নবা লম্বী অমা ওইরগনি।
হৌখিবা থা খর অসিদা মালেম শীনবা থুংবগী আইনগী মীওইশিং মহাক্কা উনখিবা অদু নিংশিংলদুনা, প্রধান মন্ত্রীনা হায়খি নুমিৎ খরনিগী মমাঙদা ভারতকী সুপ্রিম কোর্তকী দাইমন্দ জুব্লি থৌরম পাংথোকখ্রে অমসুং ভারত মন্দাপমদা সেপ্তেম্বরদা মালেমগী উকিলশিংগী মীফম পাংথোক্কনি। হায়রিবা মীফমশিংঅসি অচুম্বা ৱায়েন ফংহনবগী থবকশিং হরাওবা ফোংদোক্নবা পাম্বৈ অমা ওইরে অমসুং অচুম্বা ৱায়েন নিংথিনা অমসুং মতিক চানা ফংহন্নবা খুদোংচাবশিং পীরে।
প্রধান মন্ত্রীনা হায়খি ভারতকী হায়নবা অমা লৈরি: ‘न्यायमूलं स्वराज्यं स्यात्’, মসিনা হায়রি মদুদি অচুম্বা অসি নিংতম্না মশা মরোমদোম লৈবাক ঙাকচনবগী মরুনি, অমসুং অচুম্বা য়াওদনা, লৈবাক অমা হিংবা ফাওবা ঙম্লোই।
মীফম অসিগী থিম “ক্রোস-বোর্দর চেলেঞ্জেস ইন জর্জতিস দেলিভরি” পল্লদুনা, প্রধান মন্ত্রীনা হায়খি ঙসিগী য়াংনা হোঙলক্লিবা মালেম অসিদা তোপিক অসি য়াম্না চুনরে অমসুং অচুম্বা ৱায়েন ফংহন্নবা লৈবাক কয়া পুন্না থবক তৌমিন্নবা দরকার ওইরে। ঐখোয়না মতেং পাংনবা মতমদা, ঐখোয় অমনা অমগী সিস্তেমশিং হেন্না ফজনা খঙগনি। নিংথিনা খঙবনা হেন্না পুন্না থবক তৌমিন্নগনি। পুন্না থবক তৌমিন্নবনা অচুম্বা য়াংনা ফংহনবা ঙমগনি।
প্রধান মন্ত্রীনা হায়খি এয়র অমসুং মেরিতাইম ত্রাফিক কন্ত্রোলগুম্বা থবকশিংদা মতেং পাংনবা দরকার ওই। ঐখোয়না ইনভেস্তিকেসন অমসুং অচুম্বা ৱায়েন ফংহনবদা মতেং পীনবা হেনগৎহনবা দরকার ওই। ঐখোয়না পুন্না থবক তৌমিন্নবা মতমদা অমনা অমগী ঙমখৈ ইকায়খুম্নগদবনি অমসুং অচুম্বা ফংহনবদা জুরিসদিক্সন অসি খুৎলায় অমা ওইরে।
হন্দক ক্রাইমশিংগী মওং হোংলক্লিবা অসিগী মতাংদা প্রধান মন্ত্রীনা হায়খি লৈবাক কয়া শীনবা থুংনা মীফত্তশিংনা পাক-চাউরবা মরীশিং শেমগৎলে অমসুং শেন খোমগৎনবা অমসুং থবক পাংথোক্নবা খ্বাইদগী নৌবা তেক্নোলোজি শীজিন্নরে। লমদম অমদা পাংথোকপা শেন-থুমগী ফত্তবা থবকশিংনা অতোপ্পা লমদমশিংদা ফন্দ থাদনবা শীজিন্নরে অমসুং ক্রিপ্তোকরেন্সি অমসুং সাইবরকী শিংনবা কয়া হেনগৎলক্লে। ২১শুবা চহিচাগী খুদোংচাদবশিং ২০শুবা চহিচাগী থৌওংনা থেংনবা ঙম্লোই। অমুক খন্থবা, অমুক হন্না ৱাখল শাগৎপা অমসুং অওনবা পুরকপা দরকার ওই।
প্রধান মন্ত্রীনা হায়খি য়াম্না লাইনা অচু্ম্বা ৱায়েন ফংহনবা অসি অচুম্বা ফংহনবগী য়ুম্বী ওইনা অচুম্বা ৱায়েন ফংহনবগী থবক অসি মীয়ামগী য়াইফনবা হোৎনবা য়াওদ্রবদি অওনবা পুরকপা ওইথোক্লোই। মহাক্না গুজরাতকী চীফ মিনিস্তর ওইরিঙৈদা, মীয়াম্না মখোয়গী থবক লোইরবা মতুংদা হিয়ারিং শরুক য়াবা ঙম্নবা নুমিদাংগী কোর্তশিং লিংখৎখি। মসি অচুম্বা ফংহন্নবা, শেন অমসুং মতম কন্নবা খোঙথাং অমনি অমসুং মীওই চা কয়া কান্নবা ফংহনখি।
লোক অদালতকী থবকশিং শন্দোক্না তাক্লদুনা, প্রধান মন্ত্রীনা হায়খি মসিনা অপীকপা কেসশিং লোইশিন্নবা খুদোংচাবা অমা পীরে অমসুং কোর্ত য়ৌদ্রিঙৈগী থবক অসিনা কেস লিশিং কয়া য়ানবা পুরক্তুনা অচুম্বা ফংহল্লে। অসিগুম্বা থবকশিং খন্ন-নৈনবনা মালেমদা অফবা হেনগৎহনগনি।
প্রধান মন্ত্রীনা হায়খি অচুম্বা ৱায়েন ফংবা হেনগৎহনবদা লিগেল ইজুকেসন অসি মরুওইবা অমনি। ইজুকেসনগী খুৎথাংদা নহারোলশিংদা শীনফম অসি পামজবা অমসুং মতিক চাবা হেনগৎহল্লে। হিরম খুদিংমক্তা নুপীশিংগী তৌবা ঙম্বা লৈরি অমসুং লাইরিক-লাইশু তম্বগী থাক্তা হিরম খুদিংমক্না পুম্নমক কোনশিনগদবনি। লো স্কুলশিংদা নুপী মশিং হেনগৎলকপা অসিনা আইনগী শীনফমদা নুপী মশিং হেনগৎলক্কনি। কমদৌনা নুপীশিং লিগেল ইজুকেসন্দা পুরক্কনি হায়বগী মতাংদা অনৌবা ৱাখলশিং পীথোক-পীশিন তৌনগদবনি।
প্রধান মন্ত্রীনা হায়খি হোংলক্লিবা মতম অমসুং তেক্নোলোজিশিংগা চুশিন্নবা ঙম্নবা লিগেল ইজুকেসন্না হোৎনবা দরকার ওই অমসুং নহা ওইরিবা আইনগী লমদা লৈরিবা মীওইশিং থৌদোক কয়া থেংনবা দরকার ওই। ক্রাইমশিং, থিজিনবা অমসুং প্রমানগী মতাংদা খ্বাইদগী নৌবা মখলশিং খঙনবা মীৎয়েং চঙগদবনি।
প্রধান মন্ত্রীনা হায়খি লো য়ুনিভর্সিতিশিংনা লৈবাকশিংগী মরক্তা থৌরমশিং পাংথোকপা হেনগৎহনগদবনি। ফোরেন্সিক সাইন্সকী মালেমগী অমতা ঙাইরবা য়ুনিভর্সিতি ভারত্তা লৈরি। মহৈরোয়শিং, ওজাশিং অমসুং তোঙান-তোঙানবা লৈবাকশিংগী জর্জশিং মফম অসিদা অতেনবা কোর্সশিং শরুক য়াবা কান্নগনি। অচুম্বা ৱায়েন ফংহনবগা মরি লৈনবা মালেমগী লুপশিংদা হেন্না মশিং য়াম্না শরুক য়ানবা চাউখৎলক্লিবা লৈবাকশিংনা পুন্না থবক তৌমিন্নগদবনি অমসুং মালেমগী খ্বাইদগী ফবা আইনগী থবকশিং তম্বা ঙম্নবা মহৈরোয়শিং ইনতর্নশিপ থিবদা মতেং পাংগদবনি।
প্রধান মন্ত্রীনা হায়খি ভারতকী আইনগী থবকশিং অসি লোয়লম লৈঙাক্তগী লৌহৌবনি, অদুবু হৌখিবা চহি খর অসিদা রেকোর্দ ওইনা অওনবশিং পুরক্লে। লোয়লম লৈঙাক মতমগী চৎনদ্রবা অরিবা আইন লিশিং কয়া মুৎথৎলে। মসিনা মীয়াম হিংবদা লাইবা হেনগৎহল্লে অমসুং ললোন-ইতিক পাংথোকপা লাইবা হেনগৎহল্লে। হৌজিক্কী অচুম্বশিং মমি তাহন্নবা ভারতশু আইনশিং মতমগা চুনবা মওংদা শেমদোক্লে। অনৌবা আইন অহুম্না চহি ১০০ হেল্লবা লোয়লম লৈঙাক মতমগী ক্রিমিনেল লোশিংগী মহুৎশীল্লে। মমাঙদা, চৈরাক পীবদা মীৎয়েং থমখি। হৌজিক অচুম্বা ফংহনবদা মীৎয়েং থম্লে। মরম অদুনা, মীয়াম্না অকিবা লৈবগী মহুত্তা থাজবা অমা লৈরে।
অচুম্বা ফংহনবগী থবকশিংদা তেক্নোলোজিগী কান্নবগী মতাংদা প্রধান মন্ত্রীনা হায়খি হৌখিবা চহি খরদা ভারত্তা লমশিংগী মেপ য়েক্নবা দ্রোনশিং শীজিন্নরে অমসুং খুঙ্গংগী মীয়ামদা লন-থুমগী অশেংবা কার্দশিং পীরে, য়ানদবা অমসুং কোর্ততা চৎপগী থবক হন্থহল্লে। দিজিতাইজেসনগী থবক্না লৈবাক অসিগী কোর্ত কয়াদা মতেং পাংলে, ওনলাইন্দা কোর্তকী থবকশিং পাংথোক্লে, মসিনা অরাপ্পদা লৈরিবা মীওইশিং অচুম্বা ফংহনবদা মতেং পাংলে। হিরম অসিগী মতাংদা অতোপ্পা লৈবাকশিংদা পাউদমদা ভারতনা হরাওবা ফাওই। অসিগুম্বা থবকশিং ভারতনা অতোপ্পা লৈবাকশিংদগী তম্নিংবা লৈরি।
লোইশিল্লকপদা, প্রধান মন্ত্রীনা হায়খি কনাগুম্বা অমনা অচুম্বা ৱায়েনগী পামজবা অদু লৈবাকশিংগী মরক্তা শরুক য়ামিন্নরবদি অচুম্বা ৱায়েন ফংহনবদা থেংনরিবা খুদোংচাদবা খুদিংমক কোকহনবা ঙমগনি। মীফম অসিনা মসিগী ৱাখল্লোন অসি মপাঙ্গল কনখৎহনবা ওইরসনু। মীওই খুদিংমক মতম চানা অচুম্বা ৱায়েন ফংবা অমসুং কনা অমতা চিৎথহৌদবা মালেম অমা ঐখোয় শেমগৎলসি।
থৌরম অদুদা শরুক য়াখিবশিংগী মনুংদা ভারতকী চীফ জর্জতিস দোক্তর জর্জতিস দি ৱাই চান্দ্রচুর, লো অমসুং জর্জতিসকী য়ুনিয়ন মিনিস্তর শ্রী অর্জুন রাম মেঘাৱাল, ভারতকী সুপ্রিম কোর্তকী জর্জ জর্জতিস সু্র্য়া কান্ত, ভারতকী এত্তোর্নি জেনেরেল দোক্তর আর ভেনকাতারমনি, ভারতকী সোলিসিএতর জেনেরেল শ্রী তুসার মেহতা অমসুং কম্মনৱেল্থ লিগেল ইজুকেসন এসোসিএসনগী প্রসিদেন্ত প্রোফেসার দোক্তর এস সিবকুমার য়াওখি।
নুঙগীৱারোল
মীফম অদুদা এসিয়া-পেসিফিক, অফ্রিকা অমসুং কারিব্বিয়ানদা লৈরিবা কম্মনৱেল্থ লৈবাকশিংগী এত্তোর্নি জেনেরেলশিং অমসুং সোলিসিএতরশিং শরুক য়াখি। কম্মনৱেল্থ লৈবাকশিংদা আইনগী লমদা থবক তৌরিবা তোঙান-তোঙানবা মরী লৈনবশিং খন্ন-নৈনবগী খুদোংচাবা অমা মীফম অসিনা পীরগনি। লিগেল ইজুকেসন অমসুং ঙমখৈ লান্না ৱায়েল পাংথোকপদা থেংনরিবা খুদোংচাদবশিংগী কোকহন্নবা লম্বী অমা শেম্নবা পান্দমদা এত্তোর্নি জেনেরেলশিং অমসুং সোলিসিএতরশিং খক্তগী ওইবা অখন্নবা রাউন্দ তেবল অমসু মীফম অসিদা পাংথোক্কনি।
****
(Release ID: 2002208)
Visitor Counter : 78
Read this release in:
Kannada
,
Telugu
,
English
,
Urdu
,
Marathi
,
Hindi
,
Assamese
,
Bengali
,
Bengali-TR
,
Punjabi
,
Gujarati
,
Odia
,
Tamil
,
Malayalam