মহৈরোইশিংগী মরক্তা পরিক্ষাগী অৱাববু মাইয়োক্নবা ঙমহন্নবা পাংথোকপা তোপ-তোপ্পা খোঙথাং অমা ওইরিবা পরিক্ষা পে চর্চা 2024গা মাংওইননা লৈবাক শিনবা থুংবগী লাই য়েকপগী চাংয়েংনবা অমা জনুৱারী 23দা লৈবাক্কী জিলা 774গী কেন্দ্র বিদ্যালয় 657 অমসুং নবোদয়া বিদ্যালয় (NVS) 122দা পাংথোকখ্রে।

প্রধান মন্ত্রী, শ্রী নরেন্দ্র মোদীনা ইবা একজাম ৱারিয়র হায়বা লাইরিক্তগী লৌথোকপা মন্ত্র কয়ানা থীম ওইরিবা চাউরবা থৌরম অসিদা মহৈরোই 60,000 হেনবনা শরুক য়াখি।

ঙসিগী নুমিৎ অসি নেতাজী সুভাস চন্দ্র বোসকী মপোক কুমওন্নি অমসুং অথোইবা লুচিংবা অসিগী পুন্সিনা মহৈরোইশিংগী মফমদা লৈবাক নীংবগী ইথিল লৈহন্নবগীদমক্তা নুমিৎ অসিবু ‘পরাক্রম দিবস’ হায়না পাংথোক্লি।

মহৈরোইশিংগী ক্রিএতিব ওইবা মতৌবু পুক্নিং থৌগৎনবগীদমক্তা, এজুকেসন মন্ত্রালয়না লৈবাক শিনবা থুংবগী মফমদা লাই য়েকপগী চাংয়েংনবা য়াওনা অতোপ্পা থবক কয়া পাংথোক্নবা পুক্নিং থৌগৎলি। মরাথোন চেনবা, ঈশৈ নোংমাইগী চাংয়েংনবা, মীম চাংয়েংনবা, নুক্কর নাতক, পোস্তর শেম্বা অমসুং য়োগগা লোয়ননা ধ্যান তৌবগী চাংয়েংনবগুম্বা থবক থৌরম কয়া লৈবাক্কী নহাশিংগী নুমিৎ ওইরিবা জনুৱারী 12তগী হৌদুনা জনুৱারী 23 ফাওবগী মনুংদা শিন লাঙলি।

ওজা অমসুং মহৈরোই কয়ানা জনুৱারী 23দা পাংথোকপা লাই য়েকপগী চাংয়েংনবা অসিদা থৱাই য়াওনা শরুক য়ানখি।

প্রধান মন্ত্রীনা স্কুলগী মহৈরোই, ওজা অমসুং মহৈরোইশিংগী মমা-মপাশিংগা ৱারী শাবগী থৌরম ‘পরিক্ষা পে চর্চা 2024’ গী তরেৎশুবা ইদিসন অসিদা মহৈরোই করোর 2.26না মাইগোবতা রেজিস্তর তৌরক্তুনা রেকোর্দ থমখ্রে। মসিনা লৈবাক্কী মহৈরোইশিংনা থৌরম অসিদা শরুক য়ানীংবা অমসুং প্রধান মন্ত্রীগা উন্নদুনা ৱারী শানিংবগী মতৌ উৎলি।

হন্দক্কী চহিগী পরিক্ষা পে চর্চা 2024 অসি জনুৱারী 29দা নই দিল্লীগী প্রগতী মৈদান্দা লৈবা ITPOগী ভারত মন্দপমদা অয়ুক্কী পুং 11দগী তাউন হোল ফোর্মেত্তা পাংথোক্কনি। থৌরম অসিদা চাউরাকপা মহৈরোই 3000মুক্না প্রধান মন্ত্রীগা উন্নগনি। রাজ্য অমসুং য়ু.তি. অমমমদগী ওজা অমসুং মহৈরোই অনিগা লোয়ননা কলা উৎসবকী ৱিন্নরবু মপুং থৌরমগী মীথুংলেন ওইনা শরুক য়ানবা পাউজেল পীখ্রবনি। লৈবাক্কী তোঙান-তোঙানবা মফমদা লৈবা এক্লাব্যা রেসিদেন্সিএল মোদেল স্কুল (EMRS)দগী লাকপা মহৈরোই 100না থৌরম অসি হেক হৌদোকখিবদগী ঙসি ফাওবগী ওইনা অহানবা ওইনা শরুক য়াগনি।

পরিক্ষা পে চর্চা অসিদি নহাশিংগী ওইবা অৱাবগী পোৎলুম লৈতবা অকোয়বগী ফিভম অমা শেম্নবা প্রধান মন্ত্রীনা লুচিংদুনা হৌদোকপা অচৌবা ইহৌ অমগী শরুক্নি। মসিদি প্রধান মন্ত্রীগী মহৈরোই, ওজা অমসুং খুন্নাইবু অমত্তা ওইনা পুরক্তুনা অঙাং অমগী তোপ-তোপ্পা মহৈবু শকখঙবা, য়োকখৎপা অমসুং হালেংবা লৈতনা ফোংদোকচবা ঙমহন্নবা হোৎনজমন অসিগী মনুং চনবা ইহৌ অমনি। ইহৌ অসিবু প্রধান মন্ত্রীনা ইবা একজাম ৱারিয়র কৌবা লাইরিক অসিনা ইথিল পীরি অমসুং লাইরিক অসি হিন্দি, ইংলিশ অমসুং অতোপ্পা মরু ওইবা লোলশিংদা ফংগনি।

***