ବ୍ଲୁ ଫ୍ଲାଗ୍ ମାନ୍ୟତାପ୍ରାପ୍ତ ଡିଉର ସ୍ୱଚ୍ଛ ଓ ନିର୍ମଳ ଘୋଘ୍‌ଲା ବିଚ୍ ରେ ଆୟୋଜିତ ଭାରତର ପ୍ରଥମ ମଲ୍ଟି-ସ୍ପୋର୍ଟସ୍ ବେଳାଭୂମି କ୍ରୀଡ଼ା-୨୦୨୪ ଉଦଯାପିତ ହୋଇଯାଇଛି । ଏଥିରେ ମଧ୍ୟପ୍ରଦେଶ ୭ଟି ସ୍ୱର୍ଣ୍ଣ ପଦକ ସହ ମୋଟ ୧୮ଟି ପଦକ ସହ ପଦକ ତାଲିକାର ଶୀର୍ଷରେ ରହିଛି। ଏହି ଉଲ୍ଲେଖନୀୟ ସଫଳତା କେବଳ ମଧ୍ୟପ୍ରଦେଶ ଦଳର କ୍ରୀଡ଼ା ଦକ୍ଷତା ପ୍ରଦର୍ଶନ କରିନାହିଁ ବରଂ ରାଜ୍ୟ ଭିତରେ ସୃଷ୍ଟି ହୋଇଥିବା ପ୍ରତିଭାର ଗଭୀରତାକୁ ମଧ୍ୟ ସାମ୍ନାକୁ ଆଣିଛି ।

ମହାରାଷ୍ଟ୍ର ୩ ଟି ସ୍ୱର୍ଣ୍ଣ ସହ ୧୪ ଟି ପଦକ ଜିତିଥିବା ବେଳେ ତାମିଲନାଡୁ, ଉତ୍ତରାଖଣ୍ଡ ଏବଂ ଆୟୋଜକ ଦାଦରା, ନଗର ହାଭେଳୀ, ଡିଉ ଏବଂ ଡାମନ ୧୨ ଟି ଲେଖାଏଁ ପଦକ ଜିତିଛନ୍ତି । ଆସାମ ୮ଟି ପଦକ ଜିତିଥିବା ବେଳେ ସେଥିରେ ୫ଟି ସ୍ୱର୍ଣ୍ଣ ପଦକ ରହିଛି।

ଏକ ରୋମାଞ୍ଚକର ଘଟଣାକ୍ରମରେ ଲାକ୍ଷାଦ୍ୱୀପ ବିଚ୍‌ ଫୁଟ୍‌ବଲରେ ସ୍ୱର୍ଣ୍ଣ ପଦକ ହାସଲ କରିଛି, ଯାହା ଏହି ସୁନ୍ଦର ଦ୍ୱୀପ ଅଞ୍ଚଳ ପାଇଁ ଏକ ଐତିହାସିକ ସଫଳତା। ପ୍ରତିଦ୍ୱନ୍ଦ୍ୱିତାପୂର୍ଣ୍ଣ ଫାଇନାଲରେ ସେମାନେ ମହାରାଷ୍ଟ୍ରକୁ ୫-୪ ଗୋଲରେ ପରାସ୍ତ କରିଥିଲେ। ଲାକ୍ଷାଦ୍ୱୀପର ବିଜୟ କେବଳ ପଦକ ବିଜେତାଙ୍କ ବିବିଧ ସାମର୍ଥ୍ୟକୁ ବଢ଼ାଇ ନାହିଁ ବରଂ ଡିଉ ବିଚ୍ ଗେମ୍ସ ୨୦୨୪ର ସାମଗ୍ରିକ ଏବଂ ଦେଶବ୍ୟାପୀ ପ୍ରଭାବକୁ ମଧ୍ୟ ସୂଚାଇଦେଇଛି।

ଜାନୁଆରୀ ୪ରୁ ୧୧ ତାରିଖ ପର୍ଯ୍ୟନ୍ତ ଏହି କ୍ରୀଡ଼ା ପ୍ରତିଯୋଗିତା ଉତ୍କର୍ଷର କେନ୍ଦ୍ରବିନ୍ଦୁ ପାଲଟିଥିଲା। ୨୦୫ ମ୍ୟାଚ୍ ଅଧିକାରୀଙ୍କ ସହଯୋଗରେ ୨୮ଟି ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳର ୨୧ ବର୍ଷରୁ କମ୍ ବୟସର ୧୪୦୪ ଜଣ ଆଥଲେଟ୍ ବିଭିନ୍ନ କ୍ରୀଡ଼ା ବିଭାଗରେ ପ୍ରତିଦ୍ୱିନ୍ଦ୍ୱିତା କରିଥିଲେ।

ପ୍ରତ୍ୟେକ ଦିନ ୨ଟି ଅଧିବେଶନରେ ଖେଳ ଆୟୋଜନ କରାଯାଇଥିଲା। ସକାଳ ଅଧିବେଶନ ସକାଳ ୮ଟାରୁ ଆରମ୍ଭ ହୋଇ ମଧ୍ୟାହ୍ନରେ ଶେଷ ହେବା ପରେ ଅପରାହ୍ନ ଅଧିବେଶନ ଅପରାହ୍ନ ୩ଟାରୁ ଆରମ୍ଭ ହେଉଥିଲା। ଏହି ସମୟସୂଚୀ କେବଳ ଉପଯୁକ୍ତ ପାଣିପାଗ ପରିସ୍ଥିତିରେ କ୍ରୀଡ଼ାବିତଙ୍କ ପ୍ରଦର୍ଶନକୁ ସର୍ବୋତ୍ତମ କରିନଥିଲା ବରଂ ଉତ୍ସାହୀ ଦର୍ଶକଙ୍କ ପାଇଁ ଏକ ଗତିଶୀଳ ଏବଂ ଆକର୍ଷଣୀୟ ଅନୁଭୂତି ପ୍ରଦାନ କରିଥିଲା।

ଟଗ୍ ଅଫ୍ ଓ୍ଵାର୍ ରେ ରଣନୀତିକ ପ୍ରଦର୍ଶନଠାରୁ ଆରମ୍ଭ କରି ସି ସୁଇମିଂର ରୋମାଞ୍ଚ ସୃଷ୍ଟିକାରୀ କୌଶଳ, ପେନକାକ୍ ସିଲାଟ୍‌ର ମାର୍ଶାଲ ଆର୍ଟିଷ୍ଟ୍ରି, ମାଲ୍ଲଖମ୍ବର ଆକ୍ରୋବେଟିକ୍ ପ୍ରଦର୍ଶନ, ବିଚ୍ ଭଲିବଲର ଦ୍ରୁତ କ୍ରୀଡ଼ା କୌଶଳ, ବିଚ୍ କବାଡିର ରଣନୀତିକ ଲଢ଼େଇ ଏବଂ ବିଚ୍ ଫୁଟବଲର ଚମତ୍କାର କିକ୍ ଏବଂ ଲକ୍ଷ୍ୟ ପର୍ଯ୍ୟନ୍ତ ପ୍ରତ୍ୟେକ କ୍ରୀଡ଼ା ବର୍ଗରେ ଏହି ପ୍ରତିଯୋଗିତା ନିଜର ଅନନ୍ୟ ଉତ୍ସାହ ଭରିଥିଲା। ବିଚ୍ ବକ୍ସିଂର ପଦାର୍ପଣ କ୍ରୀଡ଼ା ଉତ୍ସାହରେ ଏକ ଅତିରିକ୍ତ ସ୍ତର ଯୋଡ଼ିଥିଲା, ଯାହା ଉଭୟ ପ୍ରତିଯୋଗୀ ଏବଂ ଦର୍ଶକଙ୍କୁ ଆମୋଦିତ କରିଥିଲା । ଏହା ଦେଶର କ୍ରୀଡ଼ା ଯାତ୍ରାରେ ଏକ ଐତିହାସିକ ମୁହୂର୍ତ୍ତ ଭାବେ ଲିପିବଦ୍ଧ ହୋଇଛି ।

କେନ୍ଦ୍ର ଯୁବ ବ୍ୟାପାର ଏବଂ କ୍ରୀଡ଼ା ମନ୍ତ୍ରୀ ଅନୁରାଗ ଠାକୁର ସାମାଜିକ ଗଣମାଧ୍ୟମ ଏକ୍ସରେ ଏହି କ୍ରୀଡ଼ା ସମାରୋହକୁ ନେଇ ନିଜର ସମର୍ଥନ ଏବଂ ଉତ୍ସାହ ପ୍ରକଟ କରିଛନ୍ତି । ସେ ଲେଖିଛନ୍ତି, ‘‘କ୍ରୀଡ଼ାବିତମାନଙ୍କ ଶକ୍ତି ଏବଂ ଡିଉର ସୌନ୍ଦର୍ଯ୍ୟ ଏକ ଆକର୍ଷଣୀୟ ଓ ଉତ୍ସାହଜନକ ଭାବନା ବୁଣିଛି। ସେ ଆହୁରି ମଧ୍ୟ କହିଛନ୍ତି ଯେ, ଗୁଜରାଟ ଉପକୂଳରେ ଡିଉଠାରେ ପ୍ରଥମ ଥର ପାଇଁ ବିଚ୍ ଗେମ୍ସ ଆୟୋଜନ କରାଯିବା ସହିତ ଭାରତର ବେଳାଭୂମିକୁ ନୂତନ ଜୀବନ ଦେବା ପାଇଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ସଂକଳ୍ପ ଏକ କ୍ରୀଡ଼ା ପ୍ରତିଯୋଗିତାର ମୋଡ଼ ନେଇଛି।

ଭୌଗୋଳିକ ଦୃଷ୍ଟିରୁ ଭାରତ ବିଶ୍ୱର ସବୁଠାରୁ ସୁନ୍ଦର ବେଳାଭୂମିରେ ସଜ୍ଜିତ ଦେଶ । ଭାରତର ୧୨ଟି ବେଳାଭୂମିରେ ସ୍ଥାୟୀ ପର୍ଯ୍ୟଟନକୁ ପ୍ରୋତ୍ସାହିତ କରି ବେଳାଭୂମିକୁ ସ୍ୱଚ୍ଛ କରିବା ପାଇଁ ବ୍ଲୁ ଫ୍ଲାଗ୍ ମାନ୍ୟତା ଦିଆଯାଇଛି। ତେବେ ଦେଶର ଅଧିକାଂଶ ବେଳାଭୂମିରେ ଯେତିକି ଅନୁସନ୍ଧାନ ହେବା କଥା, ସେତିକି ହୋଇପାରି ନାହିଁ। ତେଣୁ ଡିଉ ବିଚ୍ ଗେମ୍ସର ସଫଳ ଆୟୋଜନ ଏକ ଆନନ୍ଦଦାୟକ ଖବର।

ଡିଉ ବେଳାଭୂମିକ୍ରୀଡ଼ାର ଫଟୋ