ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଆଜି ଭିଡିଓ କନଫରେନ୍ସିଂ ମାଧ୍ୟମରେ ବିକଶିତ ଭାରତ ସଂକଳ୍ପ ଯାତ୍ରାର ହିତାଧିକାରୀ ମାନଙ୍କ ସହ ଆଲୋଚନା କରିଛନ୍ତି । ଏହି ଅବସରରେ ପ୍ରଧାନମନ୍ତ୍ରୀ ମଧ୍ୟ ଉପସ୍ଥିତ ଜନତାଙ୍କୁ ସମ୍ବୋଧିତ କରିଥିଲେ ।

ଏହି କାର୍ଯ୍ୟକ୍ରମରେ ଦେଶର ବିଭିନ୍ନ ସ୍ଥାନରୁ ବିକଶିତ ଭାରତ ସଂକଳ୍ପ ଯାତ୍ରାର ହଜାର ହଜାର ହିତାଧିକାରୀ ଯୋଗ ଦେଇଥିଲେ । ଏହି କାର୍ଯ୍ୟକ୍ରମରେ କେନ୍ଦ୍ର ମନ୍ତ୍ରୀ, ସାଂସଦ, ବିଧାୟକ ଓ ସ୍ଥାନୀୟ ଜନ ପ୍ରତିନିଧିମାନେ ଯୋଗ ଦେଇଥିଲେ ।

ଏହି ଅବସରରେ ପ୍ରଧାନମନ୍ତ୍ରୀ କହିଥିଲେ ଯେ , ବିକଶିତ ଭାରତର ସଂକଳ୍ପ ସହ ଏହି ଅଭିଯାନ ଆଗେଇ ଚାଲିଛି । ବିକଶିତ ଭାରତ ସଂକଳ୍ପ ଯାତ୍ରା ଆରମ୍ଭ ହେବାର ୫୦ ଦିନ ଅତିକ୍ରମ କରିନଥିଲେ ମଧ୍ୟ ଏପର୍ଯ୍ୟନ୍ତ ଏହି ଯାତ୍ରା ୨.୨୫ ଲକ୍ଷ ଗାଁରେ ପହଞ୍ଚିଛି । ଏହା ଏକ ରେକର୍ଡ ବୋଲି କହିବା ସହିତ, ସେ ସମସ୍ତଙ୍କୁ, ବିଶେଷ କରି ମହିଳା ଓ ଯୁବବର୍ଗଙ୍କୁ ଧନ୍ୟବାଦ ଜଣାଇଛନ୍ତି । ବିକଶିତ ଭାରତ ସଂକଳ୍ପ ଯାତ୍ରାର ଉଦ୍ଦେଶ୍ୟ ହେଉଛି ସେହି ବ୍ୟକ୍ତିଙ୍କ ପାଖରେ ପହଞ୍ଚିବା, ଯିଏ କୌଣସି କାରଣରୁ ଭାରତ ସରକାରଙ୍କ ଯୋଜନାରୁ ବଞ୍ଚିତ ହୋଇଛନ୍ତି ।

ପ୍ରଧାନମନ୍ତ୍ରୀ କହିଥିଲେ ଯେ ଲୋକମାନଙ୍କ ପାଖରେ ଏହି ସକ୍ରିୟ ପହଞ୍ଚର ଉଦ୍ଦେଶ୍ୟ ହେଉଛି ସେମାନଙ୍କୁ ଆଶ୍ୱାସନା ଦେବା ଯେ ସରକାରୀ ଯୋଜନା ଗୁଡିକ ସମସ୍ତଙ୍କ ପାଇଁ ଉପଲବ୍ଧ ଏବଂ ଏଥରେ କୌଣସି ଅନୁଗ୍ରହ କିମ୍ବା ଭେଦଭାବ ନାହିଁ । ଏଥିରୁ ବାଦ୍ ପଡ଼ିଥିବା ଲୋକ ମାନଙ୍କୁ ମୁଁ ଖୋଜୁଛି ବୋଲି ସେ କହିଛନ୍ତି । ପ୍ରଧାନମନ୍ତ୍ରୀ ହିତାଧିକାରୀ ମାନଙ୍କ ମଧ୍ୟରେ ଅଭୂତପୂର୍ବ ଆତ୍ମବିଶ୍ୱାସକୁ ଉଲ୍ଲେଖ କରିଥିଲେ ଏବଂ କହିଥିଲେ ଯେ "ଗତ ୧୦ ବର୍ଷ ମଧ୍ୟରେ ସାରା ଦେଶରେ ପ୍ରତ୍ୟେକ ହିତାଧିକାରୀଙ୍କର ସେମାନଙ୍କ ଜୀବନରେ ହୋଇଥିବା ପରିବର୍ତ୍ତନ ବିଷୟରେ ଏକ କାହାଣୀ ଅଛି । ଏହା ଏକ ସାହସଭରା କାହାଣୀ ।

ପ୍ରଧାନମନ୍ତ୍ରୀ କହିଥିଲେ ଯେ ଏହି ସୁବିଧାଗୁଡ଼ିକ ହିତାଧିକାରୀ ମାନଙ୍କୁ ସେମାନଙ୍କ ଜୀବନକୁ ଆହୁରି ଉନ୍ନତ କରିବାକୁ ପ୍ରେରଣା ଦେଉଛି । ଆଜି ଦେଶର ଲକ୍ଷ ଲକ୍ଷ ହିତାଧିକାରୀ ସରକାରୀ ଯୋଜନାକୁ ଏକ ମାଧ୍ୟମ ଭାବେ ବ୍ୟବହାର କରି ଆଗକୁ ବଢ଼ୁଛନ୍ତି ।

ସେ କହିଛନ୍ତି ଯେ ମୋଦି କି ଗ୍ୟାରେଣ୍ଟି କି ଗାଡି ଯେଉଁ ସ୍ଥାନକୁ ଯାଉଛି , ତାହା ଲୋକଙ୍କ ଆତ୍ମବିଶ୍ୱାସ ବୃଦ୍ଧି କରୁଛି ଏବଂ ଲୋକଙ୍କ ଆଶା ପୂରଣ କରୁଛି । ଭିବିଏସୱାଇ ସମୟରେ ଉଜ୍ଜ୍ୱଳା ଗ୍ୟାସ ସଂଯୋଗ ପାଇଁ ୪.୫ ଲକ୍ଷ ନୂଆ ଆବେଦନ ଦାଖଲ କରାଯାଇଛି, ୧ କୋଟି ଆୟୁଷ୍ମାନ କାର୍ଡ ପ୍ରଦାନ କରାଯାଇଛି, ୧.୨୫ କୋଟି ସ୍ୱାସ୍ଥ୍ୟ ପରୀକ୍ଷା କରାଯାଇଛି, ୭୦ ଲକ୍ଷ ଲୋକଙ୍କର ଯକ୍ଷ୍ମା ପରୀକ୍ଷା କରାଯାଇଛି ଏବଂ ୧୫ ଲକ୍ଷ ସିକେଲ ସେଲ ରକ୍ତହୀନତା ପରୀକ୍ଷା କରାଯାଇଛି । ଏକା ସହିତ ଏବିଏଚ୍‌ଏ କାର୍ଡ ପ୍ରଦାନ କଲେ ହିତାଧିକାରୀ ମାନଙ୍କ ମେଡିକାଲ ରେକର୍ଡ ତିଆରି ହେବ ବୋଲି ସେ ସୂଚନା ଦେଇଛନ୍ତି । ଏହା ସମଗ୍ର ଦେଶରେ ସ୍ୱାସ୍ଥ୍ୟ ସମ୍ପର୍କରେ ନୂତନ ସଚେତନତା ସୃଷ୍ଟି କରିବ ବୋଲି ସେ ମତ ଦେଇଛନ୍ତି ।

ଅନେକ ନୂତନ ଲୋକ ଏହି ସୁବିଧା ପାଉଛନ୍ତି ବୋଲି ଦର୍ଶାଇ ପ୍ରଧାନମନ୍ତ୍ରୀ ସ୍ଥାନୀୟ ସଂସ୍ଥାର ପ୍ରତିନିଧି ମାନଙ୍କ ଦାୟିତ୍ୱ ଉପରେ ଗୁରୁତ୍ୱାରୋପ କରିବା ସହ ଗ୍ରାମ, ୱାର୍ଡ, ସହର ଏବଂ  ଅଞ୍ଚଳରେ ପ୍ରତ୍ୟେକ ଯୋଗ୍ୟ ବ୍ୟକ୍ତିଙ୍କୁ ଚିହ୍ନଟ କରିବାକୁ କହିଥିଲେ ।

ଗ୍ରାମୀଣ ଅର୍ଥନୀତିକୁ ତ୍ୱରାନ୍ୱିତ କରିବା ପାଇଁ , ଭାରତ ସରକାର ଗ୍ରାମ ଗ୍ରାମରେ ମହିଳା ମାନଙ୍କୁ ଆତ୍ମନିଯୁକ୍ତି ଦେବା ପାଇଁ ଏକ ବିରାଟ ଅଭିଯାନ ଚଳାଇଛନ୍ତି । ଗତ କିଛି ବର୍ଷ ମଧ୍ୟରେ ଦେଶର ପ୍ରାୟ ୧୦ କୋଟି ଭଉଣୀ, ଝିଅ ଓ ଦିଦି ସ୍ୱୟଂ ସହାୟକ ଗୋଷ୍ଠୀରେ ସାମିଲ ହୋଇଛନ୍ତି । ଏହି ଭଉଣୀ ଓ ଝିଅ ମାନଙ୍କୁ ବ୍ୟାଙ୍କ ପକ୍ଷରୁ ସାଢ଼େ ୭ ଲକ୍ଷ କୋଟି ଟଙ୍କାରୁ ଅଧିକ ସହାୟତା ପ୍ରଦାନ କରାଯାଇଛି । ପ୍ରଧାନମନ୍ତ୍ରୀ ଘୋଷଣା କରିଥିଲେ ଯେ "ଏହି ଅଭିଯାନକୁ ଆହୁରି ବ୍ୟାପକ କରିବା ପାଇଁ ମୁଁ ଆଗାମୀ ତିନି ବର୍ଷ ମଧ୍ୟରେ ୨ କୋଟି ଲକ୍ଷପତି ଦିଦି ସୃଷ୍ଟି କରିବାକୁ ଲକ୍ଷ୍ୟ ରଖିଛି । ସେ ନମୋ ଡ୍ରୋନ ଦିଦି ଯୋଜନା ବିଷୟରେ ମଧ୍ୟ ଉଲ୍ଲେଖ କରିଥିଲେ ଯାହା ଗ୍ରାମୀଣ ମହିଳା ମାନଙ୍କ ଆତ୍ମବିଶ୍ୱାସ ବୃଦ୍ଧି କରିବ । 

କ୍ଷୁଦ୍ର କୃଷକ ମାନଙ୍କୁ ସଂଗଠିତ କରିବା ଅଭିଯାନ ବିଷୟରେ ବିସ୍ତୃତ ବିବରଣୀ ଦେଇ ପ୍ରଧାନମନ୍ତ୍ରୀ ଏଫପିଓ ଏବଂ ପିଏସି ଭଳି ସମବାୟ ଉଦ୍ୟୋଗ ବିଷୟରେ ଆଲୋଚନା କରିଥିଲେ । ସେ କହିଥିଲେ ଯେ ଆମର ପ୍ରୟାସ ହେଉଛି ଭାରତରେ ଗ୍ରାମୀଣ ଜୀବନର ଏକ ମଜଭୁତ ଦିଗ ଭାବରେ ସମବାୟ ସମିତି ଯେପରି ଉଭା ହେବ । ବର୍ତ୍ତମାନ ପର୍ଯ୍ୟନ୍ତ ଆମେ କ୍ଷୀର ଏବଂ ଆଖୁ କ୍ଷେତ୍ରରେ ସମବାୟର ଲାଭ ଦେଖିଛୁ । ବର୍ତ୍ତମାନ ଏହାକୁ ଚାଷର ଅନ୍ୟାନ୍ୟ କ୍ଷେତ୍ର ଏବଂ ମାଛ ଉତ୍ପାଦନ କ୍ଷେତ୍ରରେ ମଧ୍ୟ ବିସ୍ତାର କରାଯାଉଛି । ଆଗାମୀ ଦିନରେ ୨ ଲକ୍ଷ ଗ୍ରାମରେ ନୂଆ ପ୍ୟାକ୍ସ ସୃଷ୍ଟି କରିବାକୁ ଲକ୍ଷ୍ୟ ରଖି ଆମେ ଆଗକୁ ବଢ଼ୁଛୁ । ଦୁଗ୍ଧ ଓ ସଂରକ୍ଷଣ କ୍ଷେତ୍ରରେ ସମବାୟ ସମାଧାନକୁ ପ୍ରୋତ୍ସାହିତ କରିବା ପାଇଁ ପ୍ରସ୍ତାବ ସମ୍ପର୍କରେ ମଧ୍ୟ ସେ ସୂଚନା ଦେଇଥିଲେ । ଖାଦ୍ୟ ପ୍ରକ୍ରିୟାକରଣ କ୍ଷେତ୍ରରେ ୨ ଲକ୍ଷରୁ ଅଧିକ କ୍ଷୁଦ୍ର ଶିଳ୍ପକୁ ସୁଦୃଢ଼ କରିବାକୁ ପ୍ରୟାସ କରାଯାଉଛି ବୋଲି ସେ କହିଛନ୍ତି ।

ପ୍ରଧାନମନ୍ତ୍ରୀ ଏକ ଜିଲ୍ଲା ଗୋଟିଏ ଉତ୍ପାଦ ଯୋଜନା ବିଷୟରେ ମଧ୍ୟ ଆଲୋଚନା କରିଥିଲେ ଏବଂ 'ଭୋକାଲ୍ ଫର୍ ଲୋକାଲ' କୁ ପ୍ରୋତ୍ସାହିତ କରିବାର ଆବଶ୍ୟକତା ଉପରେ ଗୁରୁତ୍ୱାରୋପ କରିଥିଲେ ।  ସେ କହିଛନ୍ତି ଯେ ମୋଦୀ କି ଗ୍ୟାରେଣ୍ଟି କି ଗାଡି ଲୋକଙ୍କୁ ସ୍ଥାନୀୟ ଉତ୍ପାଦ ବିଷୟରେ ସୂଚନା ଦେଉଛି ଏବଂ ଏହି ଉତ୍ପାଦ ଗୁଡିକ ଜିଇଏମ୍ ପୋର୍ଟାଲରେ ମଧ୍ୟ ପଞ୍ଜୀକୃତ ହୋଇ ପାରିବ । ମୋଦି କି ଗ୍ୟାରେଣ୍ଟି କି ଗାଡିର ନିରନ୍ତର ସଫଳତା ଆଶା କରି ସେ ବକ୍ତବ୍ୟ ଶେଷ କରିଥିଲେ ।

ପୃଷ୍ଠଭୂମି

୧୫ ନଭେମ୍ବର, ୨୦୨୩ ରେ ଏହାର ଶୁଭାରମ୍ଭ ପର ଠାରୁ ପ୍ରଧାନମନ୍ତ୍ରୀ ସମଗ୍ର ଦେଶରେ ବିକଶିତ ଭାରତ ସଂକଳ୍ପ ଯାତ୍ରାର ହିତାଧିକାରୀ ମାନଙ୍କ ସହ ନିୟମିତ ଭାବରେ ଆଲୋଚନା କରିଛନ୍ତି । ଭିଡିଓ କନଫରେନ୍ସିଂ ମାଧ୍ୟମରେ (୩୦ ନଭେମ୍ବର, ୯  ଡିସେମ୍ବର ଏବଂ  ୧୬ ଡିସେମ୍ବର) ଏହି ଆଲୋଚନା ହୋଇଛି । ଏହା ବ୍ୟତୀତ ପ୍ରଧାନମନ୍ତ୍ରୀ ତାଙ୍କ ନିକଟରେ ବାରଣାସୀ ଗସ୍ତ ସମୟରେ କ୍ରମାଗତ ଦୁଇ ଦିନ (ଡିସେମ୍ବର ୧୭ - ୧୮) ବିକଶିତ ଭାରତ ସଂକଳ୍ପ ଯାତ୍ରା ହିତାଧିକାରୀ ମାନଙ୍କ ସହ ଶାରୀରିକ ଭାବରେ ଉପସ୍ଥିତ ରହି ଆଲୋଚନା କରିଛନ୍ତି ।

ଏହି ଯୋଜନା ଗୁଡ଼ିକର ସୁଫଳ ଯେପରି ନିର୍ଦ୍ଧାରିତ ସମୟରେ ସମସ୍ତ ହିତାଧିକାରୀ ମାନଙ୍କ ପାଖରେ ପହଂଚି ପାରିବ ସେଥିପାଇଁ ସରକାରଙ୍କ ପ୍ରମୁଖ ଯୋଜନା ଗୁଡ଼ିକରେ ସଂତୃପ୍ତି ହାସଲ କରିବା ଉଦ୍ଦେଶ୍ୟରେ ସମଗ୍ର ଦେଶରେ ବିକଶିତ ଭାରତ ସଂକଳ୍ପ ଯାତ୍ରା କରାଯାଉଛି ।

***

SSP