14C-യുടെ കീഴിലുള്ള നാഷണൽ സൈബർ ക്രൈം ത്രെറ്റ് അനലിറ്റിക്‌സ് യൂണിറ്റ് (NCTAU) സംഘടിത നിക്ഷേപം/നിശ്ചിത ജോലി എന്നിവയിലൂടെ പാർട്ട് ടൈം ജോലി തട്ടിപ്പുകൾ  നടത്തുന്ന  100-ലധികം വെബ്‌സൈറ്റുകൾ കഴിഞ്ഞയാഴ്ച കണ്ടെത്തി നടപടിക്കായി ശുപാർശ ചെയ്തു

ഇലക്‌ട്രോണിക്‌സ് ആൻഡ് ഇൻഫർമേഷൻ ടെക്‌നോളജി മന്ത്രാലയം (MeitY), 2000-ലെ ഇൻഫർമേഷൻ ടെക്‌നോളജി ആക്‌ട് പ്രകാരമുള്ള അധികാരം ഉപയോഗിച്ച് ഈ വെബ്‌സൈറ്റുകൾ ബ്ലോക്ക് ചെയ്‌തു.

ന്യൂഡൽഹി : 06  ഡിസംബർ 2023

പ്രധാനമന്ത്രി ശ്രീ നരേന്ദ്ര മോദിയുടെ നേതൃത്വവും കേന്ദ്ര ആഭ്യന്തര മന്ത്രി ശ്രീ അമിത് ഷായുടെ മാർഗ്ഗനിർദ്ദേശവും സമന്വയിപ്പിച്ചു സൈബർ കുറ്റകൃത്യങ്ങളെ പ്രതിരോധിക്കുന്ന ഇന്ത്യ അഥവാ  "സൈബർ സേഫ് ഇന്ത്യ" കെട്ടിപ്പടുക്കുക  എന്നതിനാണ്   ആഭ്യന്തര മന്ത്രാലയത്തിന്റെ മുൻ‌ഗണന.

കേന്ദ്ര ആഭ്യന്തര മന്ത്രി ശ്രീ അമിത് ഷായുടെ മാർഗ്ഗനിർദേശാനുസരണം  സൈബർ കുറ്റകൃത്യങ്ങൾ തടയുന്നതിനും സൈബർ ഭീഷണി നടത്തുന്നവരിൽ നിന്നും  ജനങ്ങളെ സംരക്ഷിക്കുന്നതിനും  കേന്ദ്ര  ആഭ്യന്തര മന്ത്രാലയം പ്രതിജ്ഞാബദ്ധമാണ്. ഇത്തരം തട്ടിപ്പുകാർ ഉപയോഗിക്കുന്ന ഫോൺ നമ്പറുകളും സോഷ്യൽ മീഡിയ ഹാൻഡിലുകളും പൗരന്മാർ ഉടൻ തന്നെ എൻസിആർപിയെ (www.cybercrime.gov.in) അറിയിക്കേണ്ടത് അഭിലഷണീയമാണ്.

രാജ്യത്തെ സൈബർ കുറ്റകൃത്യങ്ങളെ ഏകോപിതമായും സമഗ്രമായും  കൈകാര്യം ചെയ്യുന്നതിനായി  കേന്ദ്ര ആഭ്യന്തര മന്ത്രാലയം ആരംഭിച്ച  ഒരു സംരംഭമാണ് ഇന്ത്യൻ സൈബർ ക്രൈം കോർഡിനേഷൻ സെന്റർ (I4C). കേന്ദ്ര ആഭ്യന്തര മന്ത്രാലയത്തിന്റെ കീഴിലുള്ള 14C-യുടെ മേൽനോട്ടത്തിൽ  നാഷണൽ സൈബർ ക്രൈം ത്രെറ്റ് അനലിറ്റിക്‌സ് യൂണിറ്റ് (NCTAU) സംഘടിത നിക്ഷേപം/നിശ്ചിത ജോലി എന്നിവയിലൂടെ പാർട്ട് ടൈം  ജോലി തട്ടിപ്പുകൾ  നടത്തുന്ന  100-ലധികം വെബ്‌സൈറ്റുകൾ കഴിഞ്ഞയാഴ്ച കണ്ടെത്തി നടപടിക്കായി ശുപാർശ ചെയ്തിരുന്നു.

ഇലക്‌ട്രോണിക്‌സ് ആൻഡ് ഇൻഫർമേഷൻ ടെക്‌നോളജി മന്ത്രാലയം (MeitY), 2000-ലെ ഇൻഫർമേഷൻ ടെക്‌നോളജി ആക്‌ട് പ്രകാരമുള്ള അധികാരം ഉപയോഗിച്ച് ഈ വെബ്‌സൈറ്റുകൾ ബ്ലോക്ക് ചെയ്‌തിട്ടുണ്ട്. നിശ്ചിത ജോലി അധിഷ്‌ഠിതമായും അല്ലെങ്കിൽ  സംഘടിത നിയമവിരുദ്ധ നിക്ഷേപവുമായി ബന്ധപ്പെട്ട സാമ്പത്തിക കുറ്റകൃത്യങ്ങൾ സുഗമമാക്കുന്നതുമായ  ഈ വെബ്‌സൈറ്റുകൾ പ്രവർത്തിപ്പിക്കുന്നത് വിദേശരാജ്യങ്ങളിൽ നിന്നാണെന്നും അവ ഡിജിറ്റൽ പരസ്യം, ചാറ്റ് മെസഞ്ചറുകൾ എന്നിവ ഉപയോഗിക്കുന്നതായും കണ്ടെത്തിയിട്ടുണ്ട്. കൂടാതെ അവർ  മ്യൂൾ  അല്ലെങ്കിൽ  വാടകയ്ക്ക് എടുത്ത അക്കൗണ്ടുകൾ എന്നിവയേയും ഉപയോഗിക്കുന്നു.

ഇത്തരം വൻതോതിലുള്ള സാമ്പത്തിക തട്ടിപ്പുകളിൽ നിന്നുള്ള വരുമാനം കാർഡ് ശൃംഖല, ക്രിപ്‌റ്റോ കറൻസി, വിദേശത്തുള്ള  എടിഎം വഴി പണം പിൻവലിക്കൽ, അന്താരാഷ്ട്ര ഫിൻ‌ടെക് കമ്പനികൾ എന്നിവ ഉപയോഗിച്ച് ഇന്ത്യയിൽ നിന്നും പുറത്തേക്ക് മാറ്റുന്നതായും  കണ്ടെത്തിയിട്ടുണ്ട്. ഇതുമായി ബന്ധപ്പെട്ട് 1930 ഹെൽപ്പ് ലൈൻ, എൻസിആർപി എന്നിവയിലൂടെ നിരവധി പരാതികൾ ലഭിച്ചിരുന്നു.  ഈ കുറ്റകൃത്യങ്ങൾ പൗരന്മാരെ  സംബന്ധിച്ചിടത്തോളം സാരമായ ഭീഷണി ഉയർത്തുന്നവയും ഡാറ്റാ സുരക്ഷ സംബന്ധിച്ച ആശങ്കകൾ ഉളവാക്കുകയും ചെയ്യുന്നവയാണ്.