U Mynytri Rangbah Duh, u Narendra Modi u la iashim bynta ha ka prokram kaba long ka dak jong ka jingkut jong ka Amrit Kalash Yatra hapoh ka Meri Maati Mera Desh campaign ha Kartavya Path ha New Delhi mynta ka sngi. Kane ka prokram ka long ruh ka dak jong ka jingkut jong ka Azadi Ka Amrit Mahotsav. Ha kane ka prokram, u Myntri Rangbah Duh u la buh ia u maw nongrim jong ka Amrit Vatika bad Amrit Mahotsav Memorial bad u la pyllait paidbah ia ka ‘Mera Yuva Bharat’ – ka rynsan MY Bharat na ka bynta ki samla jong ka ri.

U Modi u la sam ruh ia ki khusnam Azadi Ka Amrit Mahotsav ia ki lai tylli ki Jylla lane ki Union Territor bad ruh ki Tnat Sorkar Pdeng ba la treikam bha tam. Kine ki lai tylli ki Jylla ne Union Territory ki long ka Jammu and Kashmir, Gujarat bad Haryana bad Rajasthan kiba la iawan lang ha ka kyrdan kaba lai, katba ki lai tylli ki Tnat Sorkar Pdeng kiba la jop ki long ka Tnat External Affairs, 2. Ka Tnat Iada Ri; bad ka Tnat Kam Rel bad Tnat Kam Pule Puthi kiba la wan lang ha ka kyrdan kaba lai.

Ha ka jingai jingkren ha kane ka sngi, u Myntri Rangbah Duh u la ong ba ka Kartavya Path ka dang iohi ia ka Mahayagya ha ka lyngkhuh sngi kha jong u Sardar Saheb. U la kren shaphang ka 12 tarik u Lber 2021 ha kaba ka jingsdang jong ka Azadi Ka Amrit Mahotsav ka dei kaba la ioh mynsiem na ka Dandi Yatra jong u Mahatma Gandhi. U Myntri Rangbah Duh u la ong ba ka jingkut jong ka Azadi Ka Amrit Mahotsav ka long ha ka 31 tarik u Risaw 2023, ka lyngkhuh sngi kha jong u Sardar Patel. Da kaba ai nuksa da ka Dandi March Yatra kaba la ioh ia ka jingiashim bynta jong baroh ki briew jong ka ri, u Myntri Rangbah Duh u la ong ba ka Azadi Ka Amrit Mahotsav ka la buh ia ka rekod ha ka jingiashim bynta ki briew. “Ka Dandi March ka la pynim biang ia ka jingshitrhem na ka bynta ka jinglaitluid katba ka Amrit Kaal ka long ka jingkut jingmut na ka bynta ka jingiaid lynti 75 snem ka India sha ka roi ka par,” la ong u Modi. U la ong ba ka jingrakhe kaba ar snem jong ka Azadi Ka Amrit ka poi sha kaba kut lyngba ka ‘Meri Maati Mera Desh’ Abhiyan. U la kren ruh shaphang ka jingbuh maw nongrim jong ka Smarak ka ban pynkynmaw ia ki pateng ban wan shaphang kane ka prokram mynta ka sngi ka ban sah ha ka nam. U la ai khublei ruh ia ki Jylla, Union Territory bad ki Tnat Sorkar Pdeng kiba la ioh ia ki khusnam ha kane ka sngi.

U la ong ba katba ngi pynkut ia kane ka jingrakhe, ngi dang sdang ia ka jingkut jingmut ba thymmai lyngba ka MY Bharat. “Ka MY Bharat kan don ka bynta kaba heh ha ka jingtei ia ka ri ha ki spah snem ba 21,” la ong u Modi.

U la kren shaphang ka bor jong ka jingiatylli ki samla jong ka India ha kaba u la ong, “Ka Meri Mati Mera Desh Abhiyan ka dei ka nuksa kumno ki samla jong ka India ki lah ban iatrei lang bad pynurlong ia kano kano ka thong.” U Modi u la kren ruh shaphang ka jingiashim bynta jong ki samla na baroh ki bynta jong ka ri bad u la ong ba 8500 tylli ki Amrit Kalash ki la poi sha ka Kartavya Path na kylleng ka ri bad da ki klur ngut ki briew ka India ki la shim ia ka jingbam smai Panch Pran bad ki la upload ia ki selfie ha ka website jong kane ka prokram.

Ha ka jingbatai balei la pyndonkam ia ka khyndew ha kane ka jingpynkut ia ka Azadi Ka Amrit Mahotsav, u Myntri Rangbah Duh u la shim na ki kyntien jong u myllung bad u la ong ba ka dei ha ka khyndew jong ka jaka ba ka imlang sahlang ka la roi, ki briew ki la kiew shaphrang bad ka don ka jingktah da ki spah snem. “Ka khyndew jong ka India ka don ka jingim. Ka la iada ia kane ka ri naduh ki por hyndai haduh mynta,” la ong u Modi da kaba kdew ba ki don shibun ki imlang sahlang kiba la kut hynrei ka India ka dang ieng skhem. “Ka khyndew jong ka India ka wanrah ia ka jingiajan jong ka mynsiem bad ka jingngeit,” u la ong da kaba kdew sha ki khana shaphang ka jingshlur jong ka India bad u la kren ruh shaphang ki jingnoh synniang jong u Shaheed Bhagat Singh. U la ong ba baroh ki briew ki don ka jingiadei kaba jan bad ka khyndew jong ka ri da kaba bynrap, “Kaei ka jingim lada kam dei ka jingsiew kylla ia ka khyndew jong ka India.” U la ong ba ka khyndew na ki hajar tylli ki ‘Amrit Kalash’ ka la poi ha Delhi bad kan pynkynmaw ia baroh shaphang ka jingngeit ha ka Kartavya lane ka kamram bad kan ai mynsiem ia baroh ban pynurlong ia ka jingkut jingmut na ka bynta ka Viksit Bharat. U la kyntu ia baroh ban noh synniang sha ka jingtei ia ka ri.

U Myntri Rangbah Duh u la ong ba ka Amrit Vatika ka ban tei da ki symbai dieng na baroh kawei ka ri kan hikai ia ki pateng ban wan shaphang ka ‘Ek Bharat Shreshtha Bharat’. U Myntri Rangbah Duh u la iathuh shaphang ka jingsaindur ia ka Jan, Janani, Janambhoomi ha ka Iing Dorbar Thaw Ain Parliament Bba thymmai kaba la tei da 75 ngut ki longkmie nongsaindur na ka khyndew ba la wan na baroh ki jylla.

U Myntri Rangbah duh u la ong ba ka jingktah kaba ai mynsiem bha jong ka Azadi Ka Amrit Mahotsav (AKAM) kaba la iaid kumba 1000 sngi ka la long na ka bynta ki samla jong ka ri. U la ong ba ka pateng ba mynta kam shym la mad ia ka jingshah teh mraw bad ma u ruh u long u Myntri Rangbah duh ba nyngkong ban kha ha ka India kaba la ioh jinglaitluid. U la ong ba ka AKAM ka la pynkynmaw ia ki briew ba kam shym la don wat tang kawei ruh ka khyllipmat ha ka por synshar ki phareng haba kam don kano kano ka jingiakhih na ka bynta ka jinglaitluid bad ym don kano kano ka bynta lane ka thain ka bym shym la sngewktah na kine ki jingiakhih.

U Myntri Rangbah duh u la ong, “ha kawei ka rukom ka Amrit Mahotsav, ka la wanrah ia ki sla ba jah jong ka histori na ka bynta ki pateng ban wan.” U la ong ba ki briew jong ka India ki la pynlong ia ka Amrit Mahotsav ka jingiakhih jong ki paidbah. U la ong ba ka jingjop jong ka Har Ghar Tiranga kadei ka jingjop jong man u briew jong ka ri. Ki briew ki la ioh jingtip shaphang ka jingnohsynniang kiba haiing jong ki bad ki shnong ha ka jingiakhun na ka bynta ka jinglaitluid. U la ong ba la thaw ia ka database katkum ki distrik na ka bynta ki briew kiba iakhun ia ka jinglaitluid.

U Myntri Rangbah duh u la kren shaphang ki jingjop jong ka India ha ka AKAM bad u la kdew ia ka jingkiew ka India na ki san tylli ki ri kiba khlain ha ka ioh ka kot ha ka pyrthei, ka jingjop jong ka Chandrayaan 3, ka jingpynlong ia ka G20 Summit, ka jingioh khur palat 100 tylli ki takma ha ka lympung ialehkai Asian Games bad Asian Para Games, ka jingplie ia ka jingtei ba thymmai jong ka Parliament, ka jingmynjur ia ka Nari Shakti Vandan Adhiniyam, ki rekod ba thymmai ha ki kam shalan tiar, ka jingpynmih ia ki mar rep, ka jingpyniar ia ka rel Vande Bharat, ka jingsdang ia ka campaign Amrit Bharat Station, ka Regional Rapid train ba nyngkong jong ka ri, ka Namo Bharat, ka jingthaw palat 65,000 tylli ki Amrit Sarovar, ka jingplie bad pyniar ia ka made in India 5G, bad ka jingplie ia ka PM Gatishakit Masterplan ban kyntiew ia ki lad ka leit ka wan.

U Myntri Rangbah duh u ban jur ba, “Ha ka Azadi Ka Amrit Mahotsav, ka ri ka pyndep ia ka jingiaid lynti na Rajpath sha Kartavya Path. Ngi la weng ruh shibun ki dak jong ka jingshah teh mraw.” U la ong ba u mot jong u Netaji Subhash Bose ha India Gate, kalong dak ba thymmai jong ka Navy, ka jingai kyrteng ia ka dewlynnong Andaman and Nicobar, ka jingpynbna ia ka Janjatiya Gaurav Diwas, Veer Baal Diwas ha ka jingkynmaw burom ia u Sahibzaade bad ka rai ban pyndon burom ia ka Vibhajan Vibhishika Diwas ha ka 14 tarik Nailar man ka snem.

 “Ka jingkut jong kaei kaei ka dei ka dak jong ka jingsdang jong kaei kaei kaba thymmai,” la ong u Myntri Rangbah duh, da kaba batai ia ka Sankrit Shlok. U la kren shaphang ka jingplie ia ka MY Bharat ha ka jingpynkut ia ka Amrit Mahotsav bad ong ba, “Ka MY Bharat kadei ka jingpynbna ia ka bor jong ki samla jong ka ri.” U la ong ba kan long ka lad kaba khraw ban wanrah lang ia man ki samla jong ka ri ha kawei ka rynsan bad ban pynthikna ka jingiashim bynta ha ka jingtei ia ka ri. U la pyntip shaphang ka jingplie ia ka website MY Bharat bad ong ba ki prokram bapher bapher ba la pynlong na ka bynta ki samla yn kynthup ha ka rynsan. U Myntri Rangbah duh u la kyntu ia ki samla ban pyniasoh katba lah bad kane, pyndap ia ka India da ka bor kaba thymmai, bad rah shakhmat ia ka ri.

Ha ka jingpynkut ia ka jingkren, u Myntri Rangbah duh u la ong ba ka jingioh jinglaitluid ka India kadei ka jingpynurlong ia ki jingkut jingmut lang jong man ki nongshong shnong bad u la kyntu ban iada ia ka lyngba ka jingiatylli. Da kaba kdew ia ka jingkut jingmut ban pynlong ia ka India ka ri kaba la kiew hashuwa u snem 2047, u la ong ba yn kynmaw ia kane ka sngi ba kyrpang da ka ri haba kan dap 100 snem ka jingioh jinglaitluid. “Ngin hap ban pynurlong ia ka rai kaba ngi la shim, ki jingkular kiba ngi la shim na ka bynta ka pateng ban wan,” la ong u Myntri Rangbah duh da kaba kyntu ban pynkhlain ia ki sienjam. “Ka jingnohsynniang jong man u briew jong ka ri kalong kaba donkam ban kot sha ka thong ban long ka ri kaba la kiew. Wan, to ngin sdang ia ka jingiaid lynti ba thymmai jong ka Amrit Kaal jong ka Viksit Bharat lyngba ka Amrit Mahotsav,” u la pynkut.

U Myntri Sorkar Pdeng ba dei khmih ia ka Tnat Kam Pohiing, u Amit Shah, u Myntri Sorkar Pdeng ba dei khmih ia ka Tnat Information & Broadcasting, u Anurag Singh Thakur bad u Myntri Sorkar Pdeng ba dei khmih ia ka Tnat Deiriti, u G Kishan Reddy ki la iadonlang ha kane ka jingialang lem bad kiwei kiwei.

Ka Nongrim

Meri Maati Mera Desh

Ka campaign Meri Maati Mera Desh kadei kaba pyndon burom ia riewshlur kiba ngi tip kum ki Veer bad Veerangana kiba la aiti ia la ka jingim na ka bynta ka ri. Ha ka jingngeit jong ka Jan Bhagidari, ka campaign ka kynthup ia shibun ki prokram bad ki jingrakhe ba la pynlong ha kylleng ka ri ha ki Panchayat/ ki shnong, ki Block, ki bor pyniaid shnong ha ki jaka sor bad ki Jylla. Ki prokram ki kynthup ka jingshna ia ka Shilaphalakam (ki jingsah jingkynmaw) ban pynpaw ka jingsngewnguh ia baroh ki riewshlur kiba la lenlade, ka jingbam smai ‘Panch Pran’ da ki briew ha ki Shilaphalakam; ka jingthung ia ki tynrai dieng bad ka jingtei ia ka ‘Amrit Vatika’ (Vasudha Vandhan) bad ki jingialang pynkup burom ia ki nongiakhun jinglaitluid bad kiba haiing jong ki nongiakhun jinglaitluid kiba la khlad noh (Veeron ka Vandan) bad kiwei kiwei.

Ka campaign ka la long kaba jop, ha kaba palat 2.3 lak tylli ki Shilaphalakam la shna ha 36 tylli ki Jylla/UT; jan 4 klur la upload ia ki jingbam smai Panch Pran; la pynlong 2 lak tam ki prokram ‘Veeron ka Vandan’ ha kylleng ka ri, palat 2.36 klur la thung ia ki tynrai dieng; bad 2.63 lak ki Amrit Vatika la shna hapoh ka phang Vasudha Vandan ha kylleng ka ri.

Ka campaign ‘Meri Maati Mera Desh’ ka kynthup ruh ia ka Amrit Kalash Yatra, kaba kynthup ka jinglum ia ka mitti (khyndew) bad u khaw na palat 6 lak tylli ki shnong ha ki jaka nongkyndong bad na ki ward ha ki jaka sor, bad phah pat sha ki block (ha kaba la khleh lang ki khydew ba la lum na baroh ki shnong ha ka block) bad hadien sa phah sha nongbah jong ka jylla. Ia u khyndew na ka jylla la phah pat sha nongbah jong ka ri, ha ka jingsynranlang da ki hajar ngut ki Amrit Kalash Yatri.

Hynnin ka sngi, ha ka Amrit Kalash Yatra la sakhi ia baroh ki Jylla bad ki UT kiba la mihkhmat da ki block bad ki bor pyniaid shnong ha ki jaka sor bapher bapher jong ki kiba la buh ia ka khyndew na ka Kalash jong ki ha kawei ka Amrit Kalash kaba heh bha ha ka jingngeit jong ka ‘Ek Bharat Shreshtha Bharat’. Ia u maw nongrim ba la buh da u Myntri Rangbah duh na ka bynta ka Amrit Vatika bad Amrit Mahotsav Memorial, yn tei na ka khyndew ba la lum na baroh ki bynta jong ka ri.

La saindur ia ka campaign Meri Maati Mera Desh kum ka jingialang pynkut ia ka 'Azadi Ka Amrit Mahotsav'. Ia ka Azadi Ka Amrit Mahotsav la sdang ha ka 12 tarik Lber 2021 ban rakhe ia ka jingdap 75 snem ka jingioh jinglaitluid ka ri. Naduh kane ka por la sakhi ia ka jingpynlong palat ar lak tylli ki prokram ha kylleng ka ri lyngba ka jingiashim bynta shitrhem ki briew jong ka ri.

Ka MY Bharat

Ia ka ‘Mera Yuva Bharat’ - MY Bharat la seng kum ka kynhun shimet ban long kum kawei ka rynsan jong ka jingtrei baroh kawei ka Sorkar na ka bynta ki samla jong ka ri. Katkum ka jingthmu jong u Myntri Rangbah Duh ban pynbiang ki lad ba ryntih ia baroh ki samla jong ka ri, ka MY Bharat kan pyndonkam ia ka teknoloji ban plié lad ha baroh ki bynta jong ka Sorkar khnang ba kin lah ban pynurlong ia ki jingthmu jong ki bad noh synniang sha ka jingtei ia ka ‘Viksit Bharat’. Ka thong jong ka MY Bharat ka dei ban ai mynsiem ia ki samla ba kin long ki nongwanrah ia ka jingkylla ha ka imlang sahlang bad ki nongtei jong ka ri bad plié lad ia ki ba kin long ki ‘Yuva Setu’ hapdeng ka Sorkar bad ki briew jong ka ri. Ha kane ka ruko, ka ‘MY Bharat’ kan kyntiew ia ka ‘Roi ka par ba ialam lynti da ki samla’ ha ka ri.