প্রধানমন্ত্রীগী লোইশঙ
প্রধান মন্ত্রীনা মহারাস্ত্রগী সিরিদা লুপা করোর ৭৫০০ রোমগী তোঙান-তোঙানবা চাউখৎ-থৌরাংগী প্রোজেকশিং উরেপ-উয়ুং তমখ্রে অমসুং মীয়ামদা কৎথোকখ্রে
চাউখৎ-থৌরাংগী প্রোজেকশিংগী মনুংদা হকশেল, রেল, লম্বী, থাউ অমসুং গ্যাসনচিংবা হিরমশিং য়াওরি
শ্রী সাইবাবা সমাধি লাইশঙদা অনৌবা দর্সন ক্বিউ কমপ্লেক্স শঙ্গাখ্রে
নিলৱন্দে দামগী ওইথংবা তোর্বানগী কেনেল নেতৱার্ক মীয়ামদা কৎথোকখ্রে
‘নমো সেতকরি মহাসন্মান নিধি য়োজনা’ হৌদোকখ্রে
বেনিফিসরিশিংদা অয়ুস্মান কার্দশিং অমসুং শ্বামিতভা কার্দশিং য়েন্থোকখ্রে
“লৈবাক অসিদা লায়রবা লৈত্রবা অমসুং লায়রবশিংনা খুদোংচাবশিং মরাংকাইনা ফংলবা মতমদা খুন্নাইগী অচুম্বগী অশেংবা ৱাহন্থোক ফংগনি”
“গরিব কলয়ান অসি দবল-ইঞ্জিন সরকারগী খ্বাইদগী মরুওইবনি”
“লৌমীশিংগী ফিবম ফগৎনবা সরকারনা থবক পায়খৎলে”
“কোওপরেতিপকী ইহৌ মপাঙ্গল কনখৎহন্নবা ঐখোয়গী সরকারনা থবক পায়খৎলি”
“মহারাস্ত্র অসি খুদোংচাবা কয়াগী মফম অমা ওইরক্লে”
“মহারাস্ত্রনা চাউখৎলকপগা লোয়ননা ভারত য়াংনা চাউখৎকনি”
Posted On:
26 OCT 2023 5:23PM by PIB Imphal
ঙসি প্রধান মন্ত্রী শ্রী নরেন্দ্র মোদীনা মহারাস্ত্রাগী অহমেদনগরদা লৈবা সিরদিদা হকশেল, রেল, লম্বী, থাউ অমসুং গ্যাস সেক্তরশিংদা লুপা করোর ৭৫০০ রোমগী তোঙান-তোঙানবা চাউখৎ-থৌরাংগী প্রোজেকশিং উরেপ-উয়ুং তমখ্রে অমসুং মীয়ামদা কৎথোকখ্রে। তোঙান-তোঙানবা চাউখৎ-থৌরাংগী প্রোজেকশিংগী মনুংদা অহমেদনগর সিভিল হোস্পিতালদা আয়ুশ হোস্পিতাল, কুর্দুৱারি-লতুর রোদ রেলৱে সেক্সন মৈ থানবা (১৮৬ কিমি); জাল্গাওনদগী ভুসাবল (২৪.৪৬ কিমি) শম্নরিবা ৩শুবা অমসুং ৪শুবা রেলৱে লাইন; এন.ঐচ-১৬৬ (পেকেজ-১) সঙ্গলিদগী বোরগাও সেক্সন লেন মরি ওইহনবা; ইন্দিয়ন ওইল কোর্পোরেসন লিমিতেদকী মনমাদ তর্মিনেলদা অহেনবা ফেসিলিতী হাপ্পা য়াওরি। মহাক্না অহমেদনগর সিভিল হোস্পিতালদা মেতর্নেল অমসুং চাইল্দ হেল্থ ৱিংগী উরেপ উয়ুং তমখ্রে। শ্রী মোদীনা বেনিফিসরিশিংদা অয়ুস্মান কার্দশিং অমসুং শ্বামিতভা কার্দশিং য়েন্থোকখ্রে।
অতোপ্পা প্রোজেকশিংগী মনুংদা, শ্রী মোদীনা শ্রী সাইবাবা সমাধি লাইশঙদা অনৌবা দর্সন ক্যু কমপ্লেক্স শঙ্গাখ্রে অমসুং নিলৱন্দে দামগী ওইথংবা তোর্বানগী( ৮৫ কিমি) কেনেল নেতৱার্ক মীয়ামদা কৎথোকখ্রে অমসুং লৌমী বেনিফিসরিশিং লাখ ৮৬ হেন্না কান্নবা পীরিবা ‘নমো সেতকরি মহাসন্মান নিধি য়োজনা’ হৌদোকখ্রে।
মসিগী মমাঙদা, শ্রী মোদীনা সিরিদা লৈবা শ্রী সাইবাবা সমাধি লাইশঙদা পুজা অমসুং দর্সন পাংথোকখি অমসুং নিলৱন্দে দামদা জল পুজন পাংথোকখি।
থৌরম অদুদা তিনখিবা মীয়ামদা ৱা ঙাংবদা, প্রধান মন্ত্রীনা হায়খি সাই বাবাগী থৌজালদগী লুপা করোর ৭৫০০ রোমগী প্রোজেকশিং শঙ্গারে অমসুং উরেপ-উয়ুং তমখ্রে। চহি ৫০ হেন্না পন্দুনা লাক্লবা নিলৱন্দে দাম ঙসি শঙ্গারে। দাম অসিদা জল পুজন পাংথোক্নবগী খুদোংচাবা অমা ফংলে। শ্রী সাইবাবা সমাধি লাইশঙদা ওক্তোবর ২০১৮দা দর্সন ক্যু কমপ্লেক্স শানবা উরেপ-উয়ুং তমখি অমসুং মসিনা মসিনা মখা তানা ভারত অমসুং মপান লৈবাকশিংদগী লাই খুরুম্বা লাকপশিংদা খুদোংচাবা হেনগৎহল্লগনি।
ঙসি অয়ুক ৱারকারি ফুরুপকী বাবা মহারাজ সতারকার লৈখিদবদা প্রধান মন্ত্রীনা অৱাবা ফোঙদোকখি। প্রধান মন্ত্রীনা বাবা মহারাজগী মফমদা ইকায়খুম্নবা উৎখি অমসুং কির্তন অমসুং প্রবাচন্না খুন্নাই ৱাখল তাহন্নবা মহাক্না পাংথোক্লম্বা থবকশিং নিংশিংখি অমসুং মসিনা তুংগী মীরোলশিং ইথিল পীরগনি হায়না ফোঙদোকখি।
প্রধান মন্ত্রীনা হায়খি লৈবাক অসিদা লায়রবা লৈত্রবা অমসুং লায়রবশিংনা খুদোংচাবশিং মরাংকাইনা ফংলবা মতমদা খুন্নাইগী অচুম্বগী অশেংবা ৱাহন্থোক ফংগনি। সরকারগী লাইৱাদি ‘সবকা সাথ সবকা বিকাস’ হায়বনি। গরিব কলয়ান অসি দবল-ইঞ্জিন সরকারগী খ্বাইদগী মরুওইবনি অমসুং লৈবাক্কী শেন-থুমগী ফিবম ফগৎলকপা লোয়ননা লায়রবশিংগী য়াইফনবা থবকশিংগী বজেত হেনগৎলে। মহারাস্ত্রদা বেনিফিসরিশিংদা অয়ুস্মান কার্দ করোর ১.১০ য়েন্থোক্লে অমসুং মখোয়না লুপা লাখ ৫ ফাওবগী হেল্থ ইন্সুরেন্স ফংনবা সরকারনা লুপা করোর ৭০,০০০ চাদিং তৌগনি। লায়রবশিং লেম্না চেঙ পীনবা অমসুং মখোয়গী চেক্কী য়ুম শানবা সরকারনা লুপা করোর লাখ ৪ হেন্না চাদিং তৌখ্রে।
প্রধান মন্ত্রীনা হায়খি হায়রিবা শেনফমশিং চাদিং তৌখিবা অসি ২০১৪গী মমাঙদা চাদিং তৌখিবা অদুদগী শরুক তরুক হেল্লবনি। লায়রবশিংগী য়ুমশিংদা তোতি ঈশিং পীনবা সরকারনা লুপা করোর লাখ ২ হেন্না চাদিং তৌখ্রে। প্রধান মন্ত্রী শ্বানিধি স্কিমগী মখাদা, লম্বী মতাইদা পোৎ য়োল্লিবশিংনা লুপা লিশিং ২ ফাওবগী শেন্থং ফংলে। নৌনা হৌদোকখিবা পি.এম বিশ্বকর্মা স্কিম্না উ শুবা, সনা শাবা, চফু শাবা অমসুং মুর্তি শাবশিংগী ইমুং লাখ কয়াদা মতেং পীনবা সরকারনা লুপা করোর ১৩,০০ হেন্না চাদিং তৌখ্রে।
লায়রবা অপীকপা লৌমীশিংগী মতাংদা প্রধান মন্ত্রীনা হায়খি মহারাস্ত্রগী লায়রবা অপীকপা লৌমীশিংগী লুপা করোর লিশিং ২৬ য়াওনা পি.এম কিষান সম্মান নিধিগী মখাদা অপীকপা লৌমীশিংনা লুপা করোর লাখ ২.৬০ ফংখ্রে। মহারাস্ত্র সরকারনা নমো সেতকারি মহাসন্মান নিধি য়োজনা হৌদোক্তুনা মসিগী মখাদা মহারাস্ত্র সেতকরি ইমুংশিংনা অহেনবা লুপা ৬০০০ ফংলে, হায়বদি লমদম অসিগী অপীকপা লৌমীশিংনা সম্মান নিধিগী লুপা ১২,০০০ ফংলগনি।
১৯৭০দা অয়াবা পীখিবা নিলৱন্দে প্রোজেক অমসুং চহি ৫০ পন্দুনা লৈরকখিবগী মতাংদা প্রধান মন্ত্রীনা হায়খি হৌজিক পাল্লিবা সরকার অসি লাক্লবা মতুংদা প্রোজেক অসি লোইশিনখি। ভোৎকী রাজনিতি তৌরিবশিংনা লৌমীশিংগী মিংদা অদোম্না ঈশিং মরিক অমা ফাওবা খৌরাংনা ঙাইহল্লে। ঙসি মফম অসিদা জল পুজন পাংথোক্লে। রাইত বেঙ্ক কেনেল অথুবা মতমদা থবক হৌরগনি। রাজ্য অসিগী ইকং মায়োক্নরিবা মফমশিং বালিরাজা জল সঞ্জিবনি য়োজননা অচৌবা কান্নবা অমা পীরগনি। চহি কয়া পন্দুনা লাক্লবা ইথৈ পীনবা প্রোজেক ২৬ লোইশিন্নবা কেন্দ্র সরকারনা থবক পায়খৎলে অমসুং মসিনা লমদম অসিগী লৌমীশিংদা কান্নবা য়াম্না পীরগনি।
প্রধান মন্ত্রীনা হায়খি লৌমীশিংগী ফিবম ফগৎনবা সরকারনা থবক পায়খৎলে। চহি ৭তা লুপা করোর লাখ ১৩.৫ রোমগী মহৈ-মরোং এম.এস.পিগী মখাদা লৈরে, মসিগী মশিং অসি মমাঙগী সরকারগী অহল ওইরবা লুচিংবা অমগী মতমদা শুপ্নগী লুপা করোর লাখ ৩.৫ খক ওইখি। ২০১৪গী মতুংদা লুপা করোর লাখ ১.১৫গী থাউ থোকপা মরুশিং অমসুং হৱাইশিং লৈখি, মসি মমাঙদা এম.এস.পিদা লুপা করোর ৫০০-৬০০ ওইখি। দাইরেক্ত বেনিফিদ ত্রান্সফরনা শেঞ্জা-থুমজা অমসুং নারোন্দা লৌথোকপা লৈহন্দ্রে।
নিংথম লৌরোক্কী মহৈ-মরোংশিংগী এম.এস.পি হেনগৎনবা হন্দক মন্ত্রীমন্দলনা ৱারেপ লৌখিবা অদুগী মতাংদা প্রধান মন্ত্রীনা হায়খি গ্রামগী এম.এস.পি লুপা ১০৫তা হেনগৎলে অমসুং গেহু অমসুং সেফ্লোৱারগী লুপা ১৫০দা হেনগৎলে। চুগী এম.এস.পি কুইন্তল অমদা লুপা ৩১৫দা হেনগৎলে। হৌখিবা চহি ৯দা লুপা করোর ৭০,০০০ রোমগী ইথানোল লৈখ্রে অমসুং শেনফমশিং চু থাবা লৌমীশিংদা ফংহনখ্রে। চু থাবা লৌমীশিংদা মতম চানা শেন পীথোক্নবা, চিনিগী মিলশিং অমসুং কোওপরেতিপ সোসাইতিশিংদা লুপা করোর লিশিং কয়াগী শেন্থং পীখ্রে।
প্রধান মন্ত্রীনা হায়খি কোওপরেতিপকী ইহৌ মপাঙ্গল কনখৎহন্নবা ঐখোয়গী সরকারনা থবক পায়খৎলি। লৈবাক শীনবা থুংনা কোওপরেতিপ সোসাইতি লাখ ২ হেন্না শেম্লে। হেন্না ফবা পোৎ-চৈ থমফমশিং লৈহন্নবা পি.এ.সিশিং অমসুং কোওপরেতিপশিংদা খুদোংচাবশিং পীরে। এফ.পি.ওশিংগী খুৎথাংদা অপীকপা লৌমীশিং থবক তৌরে অমসুং এফ.পি.ও ৭৫০০ হেন্না থবক তৌরে।
লোইশিল্লকপদা, প্রধান মন্ত্রীনা হায়খি মহারাস্ত্র অসি খুদোংচাবা কয়াগী মফম অমা ওইরক্লে। মহারাস্ত্রনা চাউখৎলকপগা লোয়ননা ভারত য়াংনা চাউখৎকনি। প্রধান মন্ত্রীনা মুম্বাই অমসুং সিরদি শম্নবা বন্দে ভারত ত্রেন লমথাখি অমসুং মহারাস্ত্রদা রেলৱেজ নেতৱার্ক লেপ্তনা শেমগৎলি হায়না ফোঙদোকখি। মহাক্না হায়খি জলগাউন অমসুং ভুসাবলগী মরক্তা অহুশুবা অমসুং মরিশুবা রেলৱে লাইনশিং থবক হৌখিবদগী মুম্বাই-হাওরা রেল লম্বীদা চৎথোক-চৎশিন হেন্না নুংঙাইহল্লগনি। সোলাপুরদগী বোরগাউন ফাওবা লেন মরিগী লম্বী শেমগৎপা অসিনা কোনকান লমদম শীনবা থুংনা লম্বী-থোংগী ফিবম ফগৎহন্দুনা উদোগশিং অমসুং লমদম অসিগী চু, অঙ্গুর অমসুং য়াইঙং থাবা লৌমীশিং কান্নবা পীরগনি। মসিগী লম্বী অসিনা চৎথোক-চৎশিনগী অনৌবা লম্বী অমা পীবতা নত্তনা চাউখৎপা অমসুং শেন-থুম ফগৎনবগী অনৌবা লম্বী অমা ওইরগনি।
থৌরম অদুদা শরুক য়াখিবশিংগী মনুংদা মহারাস্ত্রাগী রাজ্যপাল শ্রী রমেস বাইস, মহারাস্ত্রাগী চীফ মিনিস্তর শ্রী একনাথ সিন্দে অমসুং মহারাস্ত্রগী দিপুতি চীফ মিনিস্তর শ্রী দেবেন্দ্র ফদনাবিস অমসুং শ্রী অজিত পৱার য়াওখি।
নুঙগীৱারোল
প্রধান মন্ত্রীনা শঙ্গাগখিবা সিরদিদা লৈবা অনৌবা দর্শন ক্যু কমপ্লেক্স অসি লাইনিংবশিংগী নুংঙাইনা ঙাইনবগী মফম পীনবগী ৱাখল্লোন্দা শাবা স্তেত-ওফ-দি-আর্ত ওইবা অনৌবা অচৌবা বিলদিং অমনি। মসিদা পুন্না লাইনিংবা মীওই লিশিং তরা হেনবনা ফম্বা চনগদবা ঙাইনবগী কাজাওশিং য়াওরি। মসিদা মীয়ামগী নুংঙাইনবা এয়র-কন্দিসন হাপ্লবা ক্লোক রেমশিং, অমাংশঙশিং, বুকিং কাউন্তরশিং, প্রসাদ কাউন্তরশিং, ই-পাউগী সেন্তরনচিংবা কয়া লৈরি। মসিগী অনৌবা দর্শন ক্যু কমপ্লেক্স অসি ২০১৮ গী ওক্তোবরদা প্রধান মন্ত্রীনা উরেপ-উয়ুং তমখিবনি।
প্রধান মন্ত্রীনা নিলৱন্দে ইকোনগী ওইথংবা (৮৫ কিমি) খোংবানগী কেনেল নেতৱর্ক মীয়ামদা কৎথোকখ্রে। মসিনা ঈশিং পাইপতা থাদুনা তেহসিল ৭ (অহমেদনাগর জিল্লাদা ৬ অমসুং নাশিক জিলাদা ১) তগী খুঙ্গং ১৮২ দা কান্নবা পীগনি। নিলৱন্দে দাম অসি ১৯৭০ দা ইহান হানবা ওইনা হৌদোকখিবনি। মসি লুপা করোর ৫১৭৭ চঙনা শেমগৎপনি।
মীয়ামগী থৌরম অমদা, প্রধান মন্ত্রীনা 'নমো শেতকারি মহাসন্মান নিধি য়োজনা' হৌদোকখ্রে। য়োজনা অসিনা প্রধান মন্ত্রী কিষান সম্মান নিধি য়োজনাগী কান্নবা ফংবা য়ারবা মহারাস্ত্রগী লৌমী লাখ ৮৬ হেনবদা চহি অমদা লুপা ৬০০০গী অহেনবা শেনফম পীদুনা কান্নবা পীগনি।
প্রধান মন্ত্রীনা অহমেদনগর সিভিল হোস্পিতালদা আয়ুশ হোস্পিতাল, কুর্দুৱারি-লতুর রোদ রেলৱে সেক্সন মৈ থানবা (১৮৬ কিমি); জাল্গাওনদগী ভুসাবল (২৪.৪৬ কিমি) শম্নরিয়া ৩শুবা অমসুং ৪শুবা রেলৱে লাইন; এন.ঐচ-১৬৬(পেকেজ-১) সঙ্গলিদগী বোরগাও সেক্সন লেন মরি ওইহনবা; ইন্দিয়ন ওইল কোর্পোরেসন লিমিতেদকী মনমাদ তর্মিনেলদা অহেনবা ফেসিলিতী হাপ্পা য়াওনা তোঙান-তোঙানবা চাউখৎ খোঙথাংগী প্রোজেক্ত কয়া উরেপ উয়ুং তমখ্রে অমসুং লৈবাক মীয়ামদা কৎথোকখ্রে। মহাক্না অহমেদনগর সিভিল হোস্পিতালদা মেতর্নেল অমসুং চাইল্দ হেল্থ ৱিংগী উরেপ উয়ুং তমখি। শ্রী মোদীনা আয়ুশ্মান ভারত কার্দ অমসুং স্বামিত্বা কার্দশিং কান্নবা ফংগদবশিংদা য়েন্থোকখি।
****
(Release ID: 1971857)
Visitor Counter : 61
Read this release in:
Khasi
,
English
,
Urdu
,
Marathi
,
Hindi
,
Bengali
,
Assamese
,
Punjabi
,
Gujarati
,
Odia
,
Tamil
,
Telugu
,
Kannada
,
Malayalam