U Myntri Rangbah duh, u Narendra Modi u la plie, aiti sha ka ri bad buh maw nongrim ia ki projek kam pynroi bapher bapher ba shongdor kumba T. 7500 klur ha ki kam kum ka koit ka khiah, lynti rel, surok, umphniang bad gas ha Shirdi, Ahmednagar, Maharashtra mynta ka sngi. Ki projek kam pynroi bapher bapher ki kynthup ka Ayush Hospital ha Ahmednagar Civil Hospital; ka jingpyniasoh bording elektrik ha ka bynta surok bad bynta lynti rel Kurduwadi-Latur (186 Km); ki lynti rel ba 3 bad 4 ba pyniasoh ia ka Jalgaon sha Bhusaval (24.46 km); ka surok four lane jong ka bynta na Sangli sha Borgaon ha ka surok bah NH- 166 (Package-I); bad kiwei kiwei ki jingshakri ha Manmad Terminal of Indian Oil Corporation Limited. U la buh maw nongrim ia ka Maternal & Child Health Wing ha Ahmednagar Civil Hospital. U Modi u la sam ruh ia ki Ayushman card bad ki Svamitva card sha kiba dei ban ioh ia ki jingmyntoi.

Ha ryngkat kiwei kiwei ki projek, u Modi u la plie ia ka Darshan Queue complex ba thymmai ha Shirdi, bad aiti sha ka ri ia ka bynta ka diang (85 km) jong ka nala jong ka Nilwande Dam, bad plie ia ka ‘Namo Shetkari Mahasanman Nidhi Yojana’ ka ban ai jingmyntoi ia palat 86 lak ki nongrep kiba dei ban ioh ia ka jingmyntoi.

Hashuwa kane, u Modi u la leh ia ka pooja bad darshan ha Shri Saibaba Samadhi Temple, Shirdi bad pyndep ia ka Jal Pujan ha Nilwande Dam.

Ha ka jingai jingkren ha ka jingialang, u Myntri Rangbah duh u la ong ba la plie ia ki projek ba shongdor T. 7500 klur bad la buh maw nongrim da ki jingkyrkhu jong u Sai Baba. Haba kren shaphang ka kam ba iadei bad ka Nilwande Dam kaba la sahteng la sanphew snem, u Myntri Rangbah duh u la pynbna ia ka jingplie ia ka mynta ka sngi. U la pynpaw ruh ka jingsngewnguh haba u la ioh lad ban leh ia ka Jal Pujan ha kane ka jaka. Haba kren shaphang ka Darshan Queue Complex ha Shri Saibaba Samadhi Temple, u Modi u la pyntip shaphang ka jingbuh maw nongrim ia ka ha u bnai Risaw 2018 bad ong ba kane kan kyntiew shuh shuh ka jingbit jingbiang na ka bynta ki pilkrim na India bad na shabar ri ruh kumjuh.

U Myntri Rangbah duh u la kren shaphang ka jingkhlad jong u Baba Maharaj Satarkar jong ka jaitbynriew Warkari mynta mynstep. U Myntri Rangbah duh u la pyndon burom ia u Baba Maharaj bad kynmaw ia ki kam ban wanrah jingshai jong u lyngba ka Kirtan bad Pravachan ki ban bteng ban ai mynsiem ia ki pateng ban wan.

“Ka jingmut ba shisha jong ka hok ha ka imlang sahlang kalong haba ka ri ka lait na ka jingduk bad ki briew kiba duk ki ioh kyrhai ki kabu”, la ong u Myntri Rangbah duh da kaba iai ban ia ka mantra jong ka Sorkar ka ‘Sabka Saath Sabka Vikas’. U la ong ba ka bha ka miat jong ki briew kiba duk kadei kaba kongsan tam ia ka Sorkar kaba ar bynta bad pyntip ia ka jingkiew ka mang tyngka na ka bynta kane namar ka ioh ka kot jong ka ri ka nang iar. U la kren shaphang ka jingsam 1 klur 10 lak tylli ki Ayushman Card sha kiba dei ban ioh ia ki jingmyntoi ha Maharashtra ki ban ioh ia ka health insurance haduh T. 5 lak ha kaba ka sorkar ka pynlut T. 70,000 klur. U la pyntip ruh shaphang ka jingpynlut jong ka sorkar kaba palat T. 4 lak klur na ka bynta ban ai ei ia ki mar bam sha ki briew ba duk bad ka jingshna ia ki iing kiba paka na ka bynta jong ki. U Myntri Rangbah duh u la kdew ruh ba ka jinglut kalong hynriew shah kaba palat ia kaei kaba ju long ha ki phew snem hashuwa u 2014. Ban pynpoi kor um sha ki iing jong ki briew ba duk ba suk, u Myntri Rangbah duh u la pyntip ba ka sorkar ka la pynlut palat T. 2 lak klur. Hapoh ka skhim PM Svanidhi, u la pyntip ba ki briew kiba die jingdie harud surok ki ioh jingiarap haduh da ki hajar tyngka. U Modi u la kren ruh shaphang ka jingplie thymmai ia ka skhim PM Vishwakarma kaba ai jingiarap ia ki lak tylli ki longiing jong ki misteri, nongshna ksiar, nongshna khiew bad nongoh shrong lyngba ka jinglut na ka sorkar kaba palat T. 13,000 klur.

Haba kren shaphang ki nongrep barit baria, u Myntri Rangbah duh u la kren shaphang ka PM Kisan Samman Nidhi ha kaba ki nongrep barit baria ki ioh 2 lak 60 hajar klur tyngka kynthup 26 hajar klur tyngka na ka bynta ki nongrep barit baria jong ka jylla Maharashtra. U la pynpaw ka jingkmen jong u ba ka sorkar Maharashtra ka la sdang ia ka ‘Namo Shetkari Mahasanman Nidhi Yojana’ ha kaba ki longiing Shetkari jong ka Maharashtra kin ioh shuh 6000 tyngka, kaba mut ba ki nongrep barit baria ha ka thain kin ioh 12,000 tyngka ka Samman Nidhi, u la ong.

Haba pynshai halor ka projek Nilwande kaba la ioh jingmynjur ha u snem 1970 bad kaba la sahteng la san phew snem, u Myntri Rangbah duh u la ong ba la lah ban pyndep ia kane tang hadien ba kane ka sorkar ka la wan ha ka bor. “Kito kiba leh politik ban ioh vote ha ka kyrteng jong ki nongrep ki la wanrah ia ka jingeh ban ioh wat tang khyndiat ka um,” u la ong. “Mynta la leh ia ka Jal Pujan hangne.” U la ong ba ka the Right Bank Canal shen kan sa sdang treikam. U la kren ruh shaphang ka Baliraja Jal Sanjeevani Yojana kaba long ruh ka jingmyntoi ia ki jaka ba shah ktah ha ka jingtyrkhong um jong ka jylla. U la ong ba ka sorkar pdeng ka trei na ka bynta ban pyndep sa 26 tylli ki projek pynpoi um ha Maharashtra kiba la sahteng da ki phew snem ka ban long ka jingmyntoi kaba khraw ia ki nongrep ha ka thain.

U Myntri Rangbah duh u la ban jur ba ka sorkar ka kut jingmut ban pynkup bor ia ki nongrep. U Myntri Rangbah duh u la pyntip ba ha ki 7 snem ki mar bam ba shongdor 13.5 lak klur tyngka la thied hapoh ka dor MSP katba kane ka jingkhein kalong tang 3.5 lak klur ha ka samoi jong u heh nongialam jong ka sorkar ba mynshuwa. La thied ia ki Oilseed bad ki shana dai ba shongdor 1 lak 5 hajar klur hadien u 2014 haba ianujor bad 500-600 klur tyngka ka jingthied hapoh ka MSP ha ki por ba mynshuwa. Ka Direct Benefit transfer ka la weng ia ka jingbamsap bad ka jingjah pisa, u la ong.

Haba kren shaphang ki Rai ba dang shen jong ka Kynhun Myntri ban kyntiew ia ka MSP jong ki jingthung Rabi, u Modi u la pyntip ba ka MSP jong u shana la kyntiew da T. 105 bad jong u kew bad safflower da T. 150. U la ong ruh ba ka MSP na ka bynta u pai la kyntiew sha ka T. 315 shi quintal. Ha ki 9 snem ba la leit, u Myntri Rangbah duh u la pyntip ba la thied ia ka ethanol ba shongdor kumba T. 70,000 klur bad ka pisa ka la poi sha ki nongrep pai. “Ban pynthikna ka jingsiew biang por sha ki nongrep pai, la ai jingiarap ba shongdor da ki klur tyngka sha ki jaka tylliat shini bad ki cooperative society,” u la bynrap.

U Myntri Rangbah duh u la ong “ka sorkar jong ngi ka trei ban pynkhlain ia ki kam cooperative. La seng palat 2 lak ki cooperative society ha kylleng ka ri.” Ban pynthikna ka jingbuh kaba bit ba biang bad ki jaka buh kiba rim, la pynbiang ia ki jingdonkam jong ki PAC bad ki cooperative. La pyniasoh ia ki nongrep kiba trei ha ki lyngkha kiba rit lyngba ki FPO ha kaba palat 7500 tylli ki FPO ki la treikam.

Haba pynkut ia ka jingkren, u Myntri Rangbah duh u la ong, “Ka Maharashtra kalong ka jaka pdeng jong ka jingbun ki lad ki lynti. Katba nang kiew sted ka Maharashtra, ka India India ruh kan nang kiew sted.” U Myntri Rangbah duh u Modi u la kynmaw ia ka jingpyllait ia ka rel Vande Bharat kaba pyniasoh ia ka Mumbai bad Shirdi bad u la ong ba ki lynti rel ha Maharashtra ki dang iar katba dang iaid ki sngi. U la ong ba ka leit ka wan ha lynti rel Mumbai- Howrah kan kham suk da ka jingsdang ia ki lynti rel ba lai bad saw hapdeng ka Jalgaon bad Bhusaval. Kumjuh ruh, ka jingshna ia ka surok four-lane na Solapur sha Borgaon kan kyntiew ia ka leit ka wan ha ka thain Konkan baroh kawei ka ban long ka jingmyntoi ia ki karkhana bad kumjuh ruh ia ki nongrep pai, soh grape bad ki nongrep shynrai  ha ka thain. “Kane ka lad jingpyniasoh kan wanrah ka lynti ba thymmai ym tang ha ka leit ka wan hynrei kumjuh ruh ka jingkiew ka ioh ka ioh ka kot,” u la pynkut.

U Lat ka jylla Maharashtra, u Ramesh Bais, u Myntri Rangbah jong ka Maharashtra, u Eknath Shinde, bad ki Symbud Myntri jong ka Maharashtra, u Devendra Fadnavis bad u Ajit Pawar ki la iadonlang ha kane ka jingialang bad kiwei kiwei.

Ka Nongrim

La plie da u Myntri Rangbah duh ka ri, ka Darshan Queue complex ba thymmai ha Shirdi kadei ka jingtei kaba la bit ba la biang katkum ka juk mynta kaba don ki jaka ap ba bit ba biang na ka bynta ki riewngeit. Ka don bun ki kamra ap bad ki jaka shong ba ngiam palat shiphew hajar ngut ki riewngeit. Ka don shibun ki jaka shong ha kaba palat shiphew hajar ngut ki briew ki lah ban ap ha kano kano ka por. La pynbiang ia ki jingdonkam jong ki briew kum ki jaka buh jain, ki painkhana, ki jaka thied jingthied, ki jaka shim Prasad, ki jaka ioh jingtip bad kiwei kiwei. Ia u maw nongrim na ka bynta kane ka Darshan Queue Complex ba thymmai la buh da u Myntri Rangbah duh ha u bnai Risaw 2018.

U Myntri Rangbah duh u la aiti sha ka ri ia ka bynta ka diang (85km) jong ka nala jong ka Nilwande Dam. Kane kan ai jingmyntoi ia 182 tylli ki shnong na 7 tylli ki Tehsil (6 ha Ahmednagar district bad 1 na Nashik district) da kaba plié lad ia ka jingpynpoi um lyngba ki pipe. Ka jingpyrkhat ban shna ia ka Nilwande Dam la sdang nyngkong ha u snem 1970. La shna ha ka jinglut kumba T. 5177 klur.

U Myntri Rangbah duh u la plie ia ka ‘Namo Shetkari Mahasanman Nidhi Yojana’. Ka  Yojna kan ai jingmyntoi ia palat 86 lak ki nongioh jingmyntoi jong ka Pradhan Mantri Kisan Samman Nidhi Yojana ha Maharashtra da kaba ai shuh sa T. 6000 shi snem sha ki.

U Myntri Rangbah duh u la plie bad aiti ruh sha ka ri ia ki projek kam pynroi bapher bapher ba kynthup ka Ayush Hospital ha Ahmednagar Civil Hospital; ka jingpynpoi bording elektrik ha bynta jong ka surok bad ka lynti rel jong ka Kurduwadi-Latur (186 Km); ka lynti rel ba 3 bad 4 ba pyniasoh ia ka Jalgaon sha Bhusaval (24.46 km); ka surok four lane jong ka Sangli sha Borgaon section jong ka surok bah NH-166 (Package-I); bad kiwei kiwei ki jingshakri ha Manmad Terminal jong ka Indian Oil Corporation Limited. U la buh maw nongrim ia ka Maternal & Child Health Wing ha Ahmednagar Civil Hospital. U Modi u la sam ruh ia ki Ayushman card bad ki Svamitva card sha ki nongioh jingmyntoi.

*****