সেপ্তেম্বর ৯-১০,২০২৩ দা পাংথোকখিবা নিউ দিল্লি জি-২০ মীফম মাইপাকপদা ঙসি ফমখিবা কেন্দ্রগী মন্ত্রীমন্দলগী মীফম্না থাগৎপগী ৱারেপ অমা লৌখ্রে।

 ‘মালেম অমা, ইমুং অমা, তুংলমচৎ অমা’ হায়রিবা থিম অসিদা তোঙান-তোঙানবা থবকশিং পাংথোক্নবা থমখিবা প্রধান মন্ত্রী নরেন্দ্র মোদীগী মঙলান মন্ত্রীমন্দলনা থাগৎপা ফোঙদোকখি। জন ভাগিদারিগী প্রধান মন্ত্রীগী থৌরাং অসিদা শরুক য়াদুনা জি-২০গী থৌরমশিংদা ঐখোয়গী খুন্নাইগী কাংলুপ খুদিংমক শরুক য়াখি। জি-২০ থৌরমশিংগীদমক মীফম ২০০ হেন্না সহর ৬০ হেনবদা পাংথোকখি। মসিগী ফল ওইনা, ভারতনা জি-২০গী প্রসিদেন্ত ওইবা অসি তশেংনা মীয়ামগী ওইখি অমসুং লৈবাক্কী থবক অমা ওইরকখি।

মীফমগী ফলশিংনা অওনবশিং পুরকখি অমসুং লাক্লিবা চহিশিংদা মালেমগী চৎন-কাংলোনশিং অমুক হন্না শেমদোকপদা মতেং পাংগনি। মরুওইনা, স্তেনেবল দিবলপমেন্ত গোলশিং মশক খঙবদা, মালেমগী শেন-থুমগী লুপশিং হন্না শেমদোকপদা, দিজিতেল পব্লিক ইনফ্রাস্ত্রকচর শেমগৎপা, মহৌশাগী অকোয়বগী ফিবম অমা য়োকখৎপদা অমসুং নুপীনা লমজিংবা চাউখৎপদা মীৎয়েং থম্লি।

নোংপোক-নোংচুপ য়াম্না কন্না তোখায় তানবা মতমদা অমসুং অৱাং-খা খায়দোক্নবা মতমদা, মতম অসিগী য়াম্না মরুওইবা ৱাফমশিংদা প্রধান মন্ত্রীনা পায়খৎলিবা থবকশিংনা ৱাখল তামিন্নবা ঙমহল্লে হায়না মন্ত্রীমন্দলনা ৱারেপ লৌখি।

‘গ্লোবেল সাউথকী খোল্লাউ’ মীফম অসিদা পুথোক্তুনা ভারতনা প্রসিদেন্ত ওইবা অসি অখন্নবা অমা ওইখি। ভারতকী থবক্না লমজিংদুনা অফ্রিকান য়ুনিয়ন জি-২০গী লেংদবা মেম্বর ওইখিবা অসি অপেনবা পোকপা মচাক অমনি।

নিউ দিল্লি সম্মিৎ অসিদা ভারতকী হৌজিক্কী তেক্নোলোজিগী চাউখৎপা, ঐখোয়গী নাৎকী লনশিং, নাৎশিং অমসুং চৎনবীশিং উৎনবা খুদোংচাবা অমা পীখ্রে। মসি জি-২০ মেম্বর লৈবাকশিংগী লুচিংবশিং অমসুং মীহুৎশিংনা মসি পাক-শান্না পাম্নখি।

জি-২০ মীফমগী মরুওইবা ৱারেপশিং হায়বদি মালেমগী শেন-থুমগী মতেং পাংনবা হেনগৎহনবা, চাউখৎ-থৌরাংগীদমক অহেনবা রিছোর্সশিং ফংহনবা, তুরিজম চাউখৎহনবা, মালেমগী ওইনা থবক শুফম হেন্না ফংহনবা, মিল্লেত পুথোক্তুনা চীঞ্জাক ৱাৎহন্দবা অমসুং বাইওফুয়েলশিং শীজিন্নবা অসিনা লৈবাক শীনবা থুংনা কান্নবা পীগনি। মীফম মনুংদা ৱারেপ লৌখিবা ইন্দিয়া-মিদল ইস্ত-য়ুরোপ ইকোনোমিক কোরিদোর এগ্রিমেন্ত অমসুং গ্লোবেল বাইওফুয়েল এল্লাইন্স অসি শিংথানিঙাইবা ওইবা চাউখৎপশিংনি।

জি-২০ মীফম মাইপাক্নবা হোৎনবদা মতেং পাংখিবা লুপশিং অমসুং লনাই মীওইশিং কেন্দ্রগী মন্ত্রীমন্দলনা থাগৎপা ফোঙদোকখি। ভারতকী মীয়াম, মরুওইনা নহারোলশিংনা মীফম অসিগী থবক-থৌরমশিংদা থৱায় য়াওখিবা অসি মন্ত্রীমন্দলনা থাগৎপা ফোঙদোকখি। প্রধান মন্ত্রী নরেন্দ্র মোদীগী লুচিং মখাদা ভারতনা জি-২০গী প্রসিদেন্ত ওইবদগী মালেমদা চাউখৎনবা অকনবা মাইকৈ অমদা তাকপদা মন্ত্রীমন্দলনা থাগৎপা ফোঙদোকখি।

*****