Ka India kan pyni sha ka pyrthei ia ka lynti kaba thymmai ha kaba iadei bad ki biofuel lyngba ka Global Biofuels Alliance, la ong u Hardeep Singh Puri, u Myntri Sorkar Pdeng ba dei khmih ia ki tnat Petroleum & Natural Gas bad Housing & Urban Affairs. Ha ka jingai ia ki jingsngew jong u ha ki post ha ka rynsan social media ka ‘X’ u Myntri u la ong ba da kaba bud ia ka ‘Vasudhaiva Kutumbakam’, kane ka sienjam jong u Myntri Rangbah Duh, u Narendra Modi kan pynduna ia ka jinghap shaniah ha ka petrol bad diesel ha kylleng ka pyrthei.

Ha ka jingthaw ia ka histori ha ki kam bording jong ka pyrthei, u Myntri Rangbah Duh, u Narendra Modi u la pynbna ia ka jingsdang jong ka Global Biofuels Alliance (GBA) ha ka jaka ba la pynlong ia ka G20 Summit hynnin ka sngi. 19 tylli ki ri bad 12 tylli ki kynhun jong ki ri bapher bapher ki la ia mynjur ban iasoh lang bad kane ka alliance.

Ka GBA ka dei ka sienjam ba ialam lynti da ka India ban don ka alliance ne ka jingiatrei lang jong ki Sorkar, ki kynhun bapher bapher jong ki ri, bad ki jaka treikam ban plie lad ia ka jingpdiang ia ki biofuel. Da kaba wanrah lang ia ki nongpyndonkam bad ki nongpynmih biofuel ba heh tam ban kyntiew ia ka jingshna bad jingpyndonkam ia ki biofuel, kane ka sienjam ka thmu ban kyntiew ia ki biofuel kum ka bynta ba kongsan ha ka jingkylla ki kam bording bad ruh ban plie lad ia ka jingioh kam bad ka roi ka jingkiew jong ka ioh ka kot.

U Hardeep Puri u la ong ba ka jingpyrshang ka pyrthei ban ioh ia ka bording kaba khuid ka la kiew shaphrang lyngba ka jingsdang jong ka GBA ha ka jaka ba la pynlong ia ka G20 Summit.

U Myntri ka Sorkar India ba dei khmih ia ka tnat Petroleum and Natural Gas u la ai jingsngewnguh ia ka Jennifer Granholm, Secretary ka tnat Kam Bording, US; u Alexandre Silveira, Myntri Kam Bording ka Brazil; & Dr Evandro Gussi President & CEO ka UNICA Brazil kiba la trei naduh ka jingpyrkhat nyngkong ban sdang ia ka Global Biofuels Alliance.

U Hardeep Singh Puri u la ong ba ka Global Biofuels Alliance kaba ioh jingkyrshan na ki ri G20 bad ki kynhun kiba iadei bad ka bording kum ka International Energy Agency (IEA), International Civil Aviation Organization (ICAO), World Economic Forum (WEO) bad World LPG Association ha ryngkat kiwei kiwei kan pynkhlain ia ka jingkhaii ia ki biofuel bad ki rukom treikam ba biang tam ka ban iarap ia ki ri ba kin pynbeit bad kyrda ia ki jingeh kiba iadei bad ka bording. Kane kan kyntiew ia ka jingkylla jong ki nongrep jong ngi na ki ‘Annadata sha ki Urjadata’ kum kawei pat ka lad kamai jakpoh. Ha kine ki 9 snem ba la dep, ngi la ai ₹71,600 klur ia ki nongrep jong ngi. Lyngba ka jingpyntreikam ka India ia ka E20 shuwa u snem 2025, Ka India kan tyngkai kumba ₹45,000 klur na ka jingshalan ia ki umphniang nabar ri bad kumba 63 MT ka umphniang ha ka shi snem, u la ong.

Ka GBA kan kyrshan ia ki kam shna bad pyndonkam ia ki biofuel kiba iaineh ha kylleng ka pyrthei da kaba pynbiang ia ki kam kyntiew jinglah treikam bapher bapher, ka jingkyrshan ha ka teknoloji na ka bynta ki kam ha ki ri bad ka jingkyntiew ia ka jingiasam ia ki jingshem na ki polisi. Kan plie lad ia ka jingpyndonkam ia ka iew digital ban ai jingiarap ia ki karkhana, ki ri, kito kiba don bynta ha kine ki kam ban sngewthuh ia ka jingdawa bad ka jinglah pynbiang, ha ryngkat ka jingpyniasoh ia ki nongai teknoloji bad ki nongpyndonkam ia kine ki teknoloji. Kan plie lad ruh ia ka jingshna, jingpdiang bad jingpyntreikam jong ki kyndon ba la ithuh da ki ri, ki nongrim na ka bynta ka jingiaineh bad ki jingtehlakam ban ai jingmyntoi ia ka jingpdiang bad ka khaii pateng ia ki biofuel.

Kane ka sienjam kan iarap ia ka India ha ki rukom bapher bapher. Ka GBA kum ka jingmih na kane ka G20 presidency, kan iarap ban pynkhlain ia ka kyrdan jong ka India ha ka pyrthei. Shuh shuh, kane ka alliance kan peit bniah ia ka jingiatreilang bad kan plie shuh shuh ki lad ia ki karkhana ka India ha kaba iadei bad ka jingshalan ia ki teknoloji bad ki kor. Kan iarap ban pynstet ia ki prokram biofuel jong ka India ba la don lypa kum ka PM-JIVANYojna, SATAT, bad ka skhim GOBARdhan bad kane kan kyntiew ia ka ioh ka kot jong ki nongrep, kan plie ia ki lad ioh kam bad kan kyntiew ia ka India. Ka iew ethanol jong ka pyrthei ka dei kaba la antad ha ka USD 99.06 billion ha u 2022 bad la antad ba kane kan kiew ha ka CAGR kaba 5.1% shuwa u 2032 bad kan tam ia ka USD 162.12 billion shuwa u 2032. Katkum ka IEA, kan don ka lad kiew 3.5-5 shah ha ki kam biofuel shuwa u 2050 namar ki thong Net Zero, bad kane ka plie ki lad ia ka India.

*******