প্রধান মন্ত্রী শ্রী নরেন্দ্র মোদী জুলাই ৭ অমসুং জুলাই ৮,২০২৩ দা রাজ্য ৪ দা চৎকনি। প্রধান মন্ত্রী জুলাই ৭তা ছতিসগর অমসুং উত্তর প্রদেসতা চৎকনি। প্রধান মন্ত্রী জুলাই ৮দা তেলঙ্গানা অমসুং রাজস্থানদা চৎকনি।

জুলাই ৭গী অয়ুক পুং ১০:৪৫ রোম তাবদা রাইপুরদা পাংথোকপা মীয়ামগী থৌরম অমদা প্রধান মন্ত্রীনা তোঙান-তোঙানবা চাউখৎ-থৌরাংগী প্রোজেকশিং উরেপ-উয়ুং তমগনি অমসুং মীয়ামদা কৎথোক্কনি। নুংথিলগী পুং ২:৩০ রোম তাবদা প্রধান মন্ত্রী উত্তর প্রদেসকী গোরাখপুরদা থুংগনি অমসুং মফম অদুদা মহাক্না গীতা প্রেস গোরাখপুরগী চহি ১০০ শুবগী থৌরম লোইশিনবদা শরুক য়াগনি অমসুং তুংদা গোরাখপুর রেলৱে স্তেসন্দা বন্দে ভারত এক্সপ্রেস ত্রেনশিং লমথাগনি। মতুংদা, নুংথিলগী পুং ৫ রোম তাবদা, প্রধান মন্ত্রী বরানসীদা থুংগনি অমসুং মফমদা অদুদা মহাক্না মীয়ামগী থৌরম অমা শরুক য়াগন, মফম অদুদা মহাক্না তোঙান-তোঙানবা চাউখৎ-থৌরাংগী প্রোজেকশিং উরেপ-উয়ুং তমগনি, শঙ্গাগনি অমসুং মীয়ামদা কৎথোক্কনি।

জুলাই ৮গী অয়ুক পুং ১০:৪৫ রোম তাবদা প্রধান মন্ত্রী তেলঙ্গানাগী ৱারাঙ্গলদা থুংগনি অমসুং মফম অদুদা মহাক্না তোঙান-তোঙানবা চাউখৎ-থৌরাংগী প্রোজেকশিং উরেপ-উয়ুং তমগনি।  প্রধান মন্ত্রীনা নুংথিলগী পুং ৪:১৫ রোম তাবদা বিকানরদা থুংগনি অমসুং মফম অদুদা মহাক্না তোঙান-তোঙানবা চাউখৎ-থৌরাংগী প্রোজেকশিং উরেপ-উয়ুং তমগনি অমসুং মীয়ামদা কৎথোক্কনি।

রাইপুরদা প্রধান মন্ত্রী

ইনফ্রাস্ত্রকচর চাউখৎনবা অচৌবা থৌরাং অমদা, প্রধান মন্ত্রীনা লুপা করোর ৬,৪০০ রোমগী ছতিসগরদা নেসনেল হায়ৱে প্রোজেক ৫ কৎথোক্কনি অমসুং উরেপ-উয়ুং তমগনি। মীয়ামদা কৎথোক্কদবা প্রোজেকশিংগী মনুংদা জবলপুর-জগদালপুর নেসনেল হায়ৱেদা রাইপুরদগী কোদেবোর সেক্সন্দা কিলোমিতর ৩৩ শাংবা লেন-৪ শেমগৎপা য়াওরি। মসিনা তুরিজম চাউখৎহনবগী মথক্তা জগদালপুর ময়াদা স্তিল প্লান্তশিংগী শেম-শারবা পোৎথোকশিং পুথোক পুশিন খুদোংচাহনগনি। এন.ঐচ-১৩০গী বিলাসপুরদগী অম্বিকাপুর সেক্সনগী কিলোমিতর ৫৩গী বিলাসপুর-পাথ্রাপালি পরিং প্রধান মন্ত্রীনা মীয়ামদা কৎথোক্কনি। মসিনা ছতিসগর অমসুং উত্তর প্রদেসকী মরক্তা চৎথোক-চৎশিন অমসুং নক্নবা মফমশিংদগী কোয়লা পুথোক-পুশিনগী থবক হেনগৎহনগনি।

৬-লেন গ্রিনফিল্দ রাইপুর-ভিশাখাপত্নম কোরিদোরগী ছতিসগর সেক্সনগী নেসনেল হায়ৱে প্রোজেক ৩ প্রধান মন্ত্রীনা উরেপ-উয়ুং তমগনি। হায়রিবা প্রোজেকশিং অসিগী মনুংদা এন.ঐচ-১৩০ সি.দিদা কিলোমিতর ৪৩ শাংবা লেন-৬গী ঝানকি-সারগি সেক্সন শেমগৎপা; এন.ঐচ-১৩০ সি.দিদা কিলোমিতর ২৫ শাংবা লেন-৬ বসানৱাহি-মরাঙপুরি সেক্সন শেমগৎপা য়াওরি। প্রোজেক অসিগী মরুওইবা শরুক্তি উদান্তি ৱাইল্দলাইফ সেঙ্কচুরি এরিয়াদা লম্লক্কী শা-উচেকশিং অপনবা লৈতনা চৎথোক-চৎশিন য়ানবা এনিমেল পাস ২৭ অমসুং মংকি কেনোপি ১৭ য়াওবা কিলোমিতর ২.৮ শাংবা লেন-৬গী তন্নেল অমা য়াওরি। হায়রিবা প্রোজেকশিং অসিনা ধামতারিদা ফৌগী মিলশিং অমসুং কানকারদা বাউসাইদ মরাং কাইনা ফংবা মফমশিং হেন্না চৎথোক-চৎশিন নুংঙাইহনগনি অমসুং লমদম অসিগী শেন-থুমগী ফিবম ফগৎহনগনি।

লুপা করোর ৭৫০ চঙনা পায়খৎখিবা কিলোমিতর ১০৩ শাংবা রাইপুর-খারিয়ার রোদ রেল লাইন দব্লিংগী থবক প্রধান মন্ত্রীনা মীয়ামদা কৎথোক্কনি। মসিনা ছতিসগরদা হিথাংফমশিংদগী উদোগশিংগী কোয়লা, স্তিল, হার অমসুং অতোপ্পা পোৎলমশিং পুথোক-পুশিনগী থবক লাইহল্লগনি। কেওতি-অন্তগর শম্নবা কিলোমিতর ১৭গী অনৌবা রেলৱে লাইনসু প্রধান মন্ত্রীনা মীয়ামদা কৎথোক্কনি। লুপা করোর ২৯০ চঙনা পায়খৎপা অনৌবা রেলৱে লাইন অসিনা দাললি রাজহারাগী আইরন ওর মাইনশিংগা ভিলাই স্তিল প্লান্তগা শম্নহনগনি অমসুং অশুকপা উমংশিং ফাওরগা খা থংবা ছতিসগরগী মনুং হুঞ্জিনবা মফমশিংগা শম্নগনি।

কোর্বদা লুপা করোর ১৩০ চঙনা শাবা চহি অমদা মেত্রিক তন লিশিং ৬০ কেপাসিতি লৈবা ইন্দিয়ান ওইল কোর্পোরেসনগী বোত্তলিং প্লান্ত অমা প্রধান মন্ত্রীনা মীয়ামদা কৎথোক্কনি। তুংদা প্রধান মন্ত্রীনা অয়ুস্মান ভারতকী মখাদা বেনিফিসরিশিংদা কার্দ লাখ ৭৫ রোম য়েন্থোকপা হৌগনি।

গোরাখপুরদা প্রধান মন্ত্রী

প্রধান মন্ত্রীনা গোরাখপুরদা গীতা প্রেসতা চৎকনি অমসুং পুৱারি ওইরবা প্রিন্তিং প্রেস অসিগী চহি ১০০ শুবগী থৌরমশিং লোইশিনবগী থৌরম শরুক য়াগনি। মহাক্না থৌরম অদুদা চিত্রময়া সিব পুরানা গ্রান্থ ফোঙগনি। মহাক্না গীতা প্রেসতা লীলা চিত্রা লাইশঙদা চৎকনি।

প্রধান মন্ত্রীনা গোরাখপুর রেলৱেস স্তেসন্দা বন্দে ভারত ত্রেন অসিন লমথাগনি। ত্রেন অনি অদুদি গোরাখপুর-লখনৌ বন্দে ভারত এক্সপ্রেস অমসুং জোধপুর-অহমেদবাদ(সবরমাতি) বন্দে ভারত এক্সপ্রেসনি।

গোরাখপুর-লখনৌ বন্দে ভারত এক্সপ্রেসনা অয়োধ্যা ফাউদুনা চেনগন অমসুং রাজ্য অসিগী মরুওইবা সহরশিংগা শম্নবা হেনগৎহনগনি। জোধপুর-অহমেদবাদ(সবরমাতি) বন্দে ভারত এক্সপ্রেসনা জোধপুর, অবু রোদ, অহমেদবাদ শম্নবা হেনগৎহল্লগনি অমসুং লমদম অসিগী শেন-থুমগী ফিবম চাউখৎহনগনি।

প্রধান মন্ত্রীনা গোরাখপুর রেলৱে স্তেসন অমুক হন্না শেমগৎনবা উরেপ-উয়ুং তমগনি। স্তেসন অসি লুপা করোর ৪৯৮ চঙনা শেমগৎকনি অমসুং মালেম থাক্কী খুদোংচাবশিং ফংহনগনি।

বরানসীদা প্রধান মন্ত্রী

বরানসীদা পাংথোকপা মীয়ামগী থৌরম অমদা, প্রধান মন্ত্রীনা লুপা করোর ১২১০০ রোমগী তোঙান-তোঙানবা চাউখৎ-থৌরাংগী প্রোজেকশিং উরেপ-উয়ুং তমগনি।

প্রধান মন্ত্রীনা দেদিকেতেদ ফ্রেদ কোরিদোরগী পন্দিৎ দিনদয়াল উপধ্যায়া জঙ্কসন- সন নাগর রেলৱে লাইন  শঙ্গাগনি। লুপা করোর ৬৭৬০ চঙনা পায়খৎপা অনৌবা লাইন অসিনা পোৎ-চৈ পুথোক পুশিন অমসুং চৎথোক-চৎশিন্দা হেন্না নুংঙাইহল্লগনি। লুপা করোর ৯৯০ চঙনা পায়খৎপা রেলৱেজ লাইন অহুম মৈ ফংহনবা নত্ত্রগা দবল লাইন ওনখৎপগী থবকশিং প্রধান মন্ত্রীনা মীয়ামদা কৎথোক্কনি।  হায়রিবা লাইনশিং অদুদি ঘাজিপুর সিতি-আউরিহার রেল লাইন, আউনরিহার-জাউনপুর রেল লাইন অমসুং ভাতনি-আউনরিহার রেল লাইন্নি। মসি উত্তর প্রদেসতা রেলৱেজ লাইনশিং চাদা ১০০ মৈ ফংহনবগী থৌরম পাংথোক্কনি।

লুপা করোর ২৭৫০ চঙনা পায়খৎপা এন.ঐচ-৫৬গী বরানসী-জাউনপুর সেক্সন লেন-৪ দা ওনখৎখিবা অদু প্রধান মন্ত্রীনা মীয়ামদা কৎথোক্কনি,মসিনা বরানসীদগী লখনৌদা ফাওবা চৎপা লাইহল্লগনি।

বরানসীদা প্রধান মন্ত্রীনা শঙ্গাগদবা প্রোজেকশিংগী মনুংদা পি.দব্লিউ.দি প্রোজেক ১৮ নৌনা শেমজিনবা; বি.ঐচ.য়ুদা মালেমগী নুপীমচাশিংগী হোস্তেল শাবা; কারাসারা খুঙ্গংদা সিপেত ভোকেসনেল ত্রেনিং সেন্তর শাবা; পুলিস স্তেসন সিন্ধাউরাদা মী লৈনবা বিল্দিংশিং শাবা; ইকোনোমিক ওফেন্সেস রিছার্স ওর্গনাইজেসন বিল্দিং শাবা; মোহন কাত্রাদগী কোনিয়া ঘাত ফাওবা সিৱের লাইনশিং শাবা; রামনা খুঙ্গংদা অনৌবা সেপতেচ মেনেজমেন্ত সিস্তেম শাবা; নাকল অনি লোংবা এল.ই.দি য়ুনিপোল ৩০; রামনগর এন.দি.দি.বি মিল্ক প্লান্তদা ষন্থিগী বাইও-গ্যাস প্লান্ত অমা শাবা; দাসাশ্বামেধ ঘাত্তা ফ্লোতিং চেঞ্জিং রুম শাবা য়াওরি।

প্রধান মন্ত্রীনা উরেপ-উয়ুং তমগদৌরিবা প্রোজেকশিংগী মনুংদা কাদিপুর অমসুং হারদাত্তপুরদা লেন-২গী রেল ওভর ব্রিজ অনি শাবা; ভ্যাসনগর-পন্দিৎ দিনদয়াল উপধ্যয় জঙ্কসন রেল ফ্লাইওভর; অমসুং পি.দব্লিউ.দি লম্বী ১৫ নৌনা শেমজিনবা অমসুং শেমগৎপনি। হায়রিবা প্রোজেকশিং অসি লুপা করোর ৭৮০ চঙনা পায়খৎকদবনি।

জল জিবন মিসনগী মখাদা লুপা করোর ৫৫০ হেনবগী খু্ঙ্গংগী থক্নবা ঈশিং পীনবা স্কিম ১৯২ শানবা প্রধান মন্ত্রীনা উরেপ-উয়ুং তমগনি। মসিনা খুঙ্গং ১৯২ দা মীওই লাখ ৭দা অফবা থক্নবা ঈশিং পীগনি।

মনিকারনিকা অমসুং হরিশচন্দ্র ঘাতশিং অমুক হন্না শেমগৎনবা প্রধান মন্ত্রীনা উরেপ-উয়ুং তমগনি। ঘাতশিং নৌনা শেমজিনবা অসিনা মীয়ামদা মী ঙাইফম, শিং থম্ফম, অমোৎপা লংথোকফম অমসুং অকোয়বগী ফিবম শোকহন্দবা পোলোইফম শেমগৎপা অসিনি।

রাজ্য অদুদা উরেপ-উয়ুং তমগদবা অতোপ্পা প্রোজেকশিংগী মনুংদা বরানসীদা গঙ্গা তুরেলদা মরুওইবা ঈরুজফম ঘাতশিংদা অতাওবা ফি হোংফমশিং শাবা অমসুং সিপেত কেম্পস কারসারাদা মহৈরোয়শিংগী হোস্তেল শাবনি।

থৌরম অদুদা প্রধান মন্ত্রীনা উত্তর প্রদেসতা পি.এম শ্বানিধিগী লোনশিং, পি.এম.এ.ৱাইগী য়ুমশিংগী শোশিং অমসুং অয়ুস্মান কার্দশিং য়েন্থোক্কনি। পি.এম.এ.ৱাইগী বেনিফিসরি লাখ ৫দা শোশিং য়েন্থোক্কনি, বেনিফিসরি লাখ ১.২৫ তা পি.এম শ্বানিধি লোনশিং অমসুং অয়ুস্মান কার্দ করোর ২.৮৮ য়েন্থোক্কনি।

ৱারাঙ্গলদা প্রধান মন্ত্রী

প্রধান মন্ত্রীনা তেলাঙ্গানাদা লুপা করোর ৬,১০০ রোমগী মরুওইবা চাউখৎ-থৌরাংগী প্রোজেকশিং উরেপ-উয়ুং তমগনি।

প্রধান মন্ত্রীনা উরেপ-উয়ুং তমগদবা মরুওইবা প্রোজেকশিংগী মনুংদা লুপা করোর ৫,৫০০ হেনবগী কিলোমিতর ১৭৫ শাংবা নেসনেল হায়ৱেজ প্রোজেকশিং য়াওরি। প্রোজেকশিংগী মনুংদা নাগপুর-বিজায়াৱাদা কোরিদোরগী কিলোমিতর ১০৮ শাংবা মাঞ্চেরিয়েল-ৱারাঙ্গাল সেক্সন য়াওরি। সেক্সন অসিনা মাঞ্চেরিয়েল অমসুং ৱারাঙ্গালগী কিলোমিতর ৩৪ তেনশিনহনগনি অমসুং এন.ঐচ-৪৪ অমসুং এন.ঐচ-৬৫ দা লম্বী চিনবা হন্থহনগনি। মহাক্না এন.ঐচ-৫৬৩গী কিলোমিতর ৬৮ শাংবা কারিমনাগর-ৱারাঙ্গাল সেক্সন ফগৎহন্নবা উরেপ-উয়ুং তমগনি। মসিনা হায়দ্রবাদ-ৱারাঙ্গাল ইন্দস্ত্রিএল কোরিদোর, কাকাতিয়া মেগা তেক্সতাইল পার্ক অমসুং এস.ই.জেৎ ৱারাঙ্গালদা চৎথোক-চৎশিনগী ফিবম ফগৎহনগনি। 

প্রধান মন্ত্রীনা রেলৱে মেনুফেকচরিং য়ুনিত, কাজিপেত শানবা উরেপ-উয়ুং তমগনি। ৱাগোন শানবা য়ুনিত অসি লুপা করোর ৫০০ চঙনা পায়খৎকদবনি। মসিদা খ্বাইদগী নৌবা তেক্নোলোজি অমসুং ৱাগোনশিং রোবোতনা রং থাবগী থবকশিং য়াওগনি অমসুং অনৌবা মেছিনশিং অমসুং অনৌবা পোৎ-চৈ থমফমশিং য়াওগনি। মসিনা মফম অদুদা থবক ফংনবগী খুদোংচাবা পীগনি।

বিকানরদা প্রধান মন্ত্রী

প্রধান মন্ত্রীনা বিকানরদা লুপা করোর ২৪,৩০০ হেনবগী চাউখৎ-থৌরাংগী প্রোজেকশিং উরেপ-উয়ুং তমগনি।

অমৃতশর-জামনগর ইকনোমিক কোরিদোরগী লেন ৬গী গ্রিনফিল্দ এক্সপ্রেসৱে সেক্সন অমসুং  গ্রিন ইনর্জি কোরিদোরগী ইন্তর-স্তেৎ ত্রান্সমিসন লাইনগী ফেজ-১ প্রধান মন্ত্রীনা মীয়ামদা কৎথোক্কনি। কিলোমিতর ৫০০ হেন্না শাংবা হনুমানগর জিলাদা জাখদৱালি খুঙ্গংদগী জালোর জিলাগী খেতলাৱাস ফাওবগী সেক্সন অসি লুপা করোর ১১,১২৫ চঙনা শাগদবনি। এক্সপ্রেসৱে অসিনা মরুওইবা সহরশিং অমসুং ইন্দস্ত্রিএল কোরিদোরশিং শম্নগনি অমসুং তুরিজম অমসুং শেন-থুমগী ফিবম ফগৎহনগনি।

লমদম অদুদা পৱার সেক্তর চাউখৎহন্নবা, লুপা করোর ১০,৯৫০গী অহানবা ফেজগী গ্রিন ইনর্জি কোরিদোরগী ইন্তর-স্তেৎ ত্রান্সমিসন লাইন মীয়ামদা কৎথোক্কনি। গ্রিন ইনর্জি কোরিদোর অসিনা গিগৱাত ৬গী রিনিউএবল পৱার পুনশিনগনি অমসুং নোংচুপ থংবা লমদমদা রিনিউএবল পৱার অমসুং থর্মেল পৱার পুথোকপা অসি চাং চানা থম্বদা মতেং পাংগনি। প্রধান মন্ত্রীনা বিকানরদগী ভিৱাদি ত্রান্সমিসন লাইনসু মীয়ামদা কৎথোক্কনি। লুপা করোর ১,৩৪০ চঙনা শেমগৎপা মন্ত্রীনা বিকানরদগী ভিৱাদি ত্রান্সমিসন লাইন অসিনা রাজস্থানদা গিগৱাত ৮.১গী সোলার পৱার শীজিন্নবদা মতেং পাংগনি।

প্রধান মন্ত্রীনা বিকানরদা নৌনা শাবা ফমুং ৩০ লৈবা ইমপ্লোয়িজ স্তেৎ ইন্সুরেন্স কোর্পোরেসন হোস্পিতাল মীয়ামদা কৎথোক্কনি। হোস্পিতাল অসিনা মফম অদুগী মীয়ামদা অফবা মগুন লৈবা অনা-লায়য়েংগী খুদোংচাবশিং ফংহনগনি।

মখা তানা, প্রধান মন্ত্রীনা বিকানর রেলৱে স্তেসন অমুক হন্না শেমগৎনবা উরেপ-উয়ুং তমগনি। লুপা করোর ৪৫০ চঙনা স্তেসন নৌনা শেমগৎকদৌরবা অসিদা প্লেতফোর্মশিং অমুক হন্না শেমগৎপা, রেলৱে স্তেসন অসিগী হেরিতেচকী ফিবম কাইহন্দনা থম্বা য়াওরি।

প্রধান মন্ত্রীনা কিলোমিতর ৪৩ শাংবা চুরু-রাতানগর সেক্সন লাইন অনিদা ওনখৎনবা প্রোজেক উরেপ-উয়ুং তমগনি। লাইন অনিদা ওনখৎপা অসিনা বিকানর লমদমদগী লৈবাক্কী অতৈ মফমশিংদা জিপসম, শুনু নুঙ, মহৈ-মরোংশিং অমসুং হারগী পোৎথোকশিং পুথোক-পুশিন তৌবদা হেন্না খুদোংচাহনগনি।

****