চহি অসিদা অহানবা ওইনা ভারতনা এন্নেসি ইন্তরনেসনেল এনিমেসন ফেস্তিবেল শরুক য়ারি। ইনফোর্মেসন অমসুং ব্রোদকাস্তিংগী সেক্রেতরি, শ্রী অপুরভা চন্দ্রনা লুচিংবা ভারতকী মীহুৎ কাংবু অমনা  এনিমেসন ইন্দস্ত্রিগী শক্নাইরবশিংগা লোয়ন্না এনিমেসন অমসুং ভি.এফ.এক্স কন্তেন্ত শেম্বদা ভারতকী হৈশিংবা অদু মালেমগী ভাবকশিংদা উৎখ্রে।

মালেমগী প্রদক্সন হাওশিংগী এনিমেসন অমসুং ভি.এফ.এক্স কন্তেন্তগী পাম্নরবা মফম অমা ভারতনা থেংনা ওইরক্লি। ২০২১দা ভারত্তা এনিমেসন অমসুং ভি.এফ.এক্সগী কৈথেলগী ভেলু অসি বিল্লিয়ন ১০৯ ওইরি অমসুং ভি.এফ.এক্স মথন্তগী ললোন-ইতিক্কী ভেলু অসি লুপা বিল্লিয়ন ৫০ ওইরি। মসি ২০২৪ দা বিল্লিয়ন ১৮০ হেনগৎলকপা য়াই হায়না পানরি। মালেমগী বয়রশিংদা সেক্তর অসিদা ভারতকী হৈথোই-শিংথোইবা উৎনবা ভারতনা ফেস্তিবেল অসিদা শরুক য়াবা য়াম্না মরুওই।

ভারতনা শরুক য়ারিবা অসিগী মতাংদা শ্রী চন্দ্রনা হায়খি শীনফম অসিদা হৈথোই-শিংথোইরবা মীওইশিংগা লোয়ন্না মালেম থাক্কী তেক্নিকশিং অমসুং অনৌবা তেক্নোলোজিশিং শীজিন্নবদগী এনিমেসন, গেমিং, ভিজুএল ইফেক্তস অমসুং কোমিক সেক্তরদা ভারত খুমাঙচাউশিল্লে। ভারত্তা এ.ভি.জি.সি কন্তেন্ত শেম্নবা মপানগী কম্পেনিশিংদা শেনগী মতেং পীবা লৈবাক খরগী মনুংদা ভারত য়াওরে। ভারত্তা ফিল্ম নম্বদা পীরিবা শেনগী মতেং পীরিবা অদুগা চপ মান্নৈ। মসি কম্পেনিশিংগী অচৌবা খুদোংচাবনি। ইন্দস্ত্রিদা মতেং পীনবা ঐখোয়না থাজবা পীখিবা অদুগী শরুক অমা ওইনা, ভারত্তা ফিল্ম পুথোক্ত্রিঙৈ অমসুং ফিল্ম পুথোক্লবা মতুংগী থবকশিংদা মতেং পীরি।

ফেস্তিবেল অদুদা চন্দ্রনা এ.আই.এ.এফকী দিরেক্তর মাইকেল মার্তিনগা উনখি অমসুং  এন্নেসিদা ভারত শরুক য়াবা হেনগৎহন্নবা পায়খৎপা য়াবা থবকশিংগী মতাংদা খন্নখি অমসুং ভারত্তা এনিমেসন ফিল্ম ফেস্তিবেল অমা পাংথোক্নবা ভারত অমসুং ফ্রান্সকী মরক্তা মতেং পীন্নবা খন্নখি। সরশ্বাতি য়ান্ত্রাগী থিমদা দিজাইন তৌবা ভারতকী পেভিলিয়ন শ্রী চন্দ্রনা হাংদোকখি অমসুং এন্নেসি ফেস্তিবেল কম্পিতিসন ২০২৩দা শরুক য়ারিবা ভারতকী ফিল্ম মেকরশিংগা ৱারি শানখি।

অতোপ্পা লৈবাকশিংগী দেলিগেদশিংগা শ্রী চন্দ্রগা উনখি অমসুং এ.ভি.জি.সি সেক্তরদা মিনিস্ত্রিনা পায়খৎলিবা তোঙান-তোঙানবা থবকশিং অমসুং সেক্তর অসিদা ভারত সরকারনা পীরিবা মতেংশিংগী মতাংদা পাউদমখি।

****