ঙসি কেবিনেত সেক্রেতরি শ্রী রজিব গৌবাগী লুচিং মখাদা নেসনেল ক্রাইসিস মেনেজমেন্ত কম্মিতি(এন সি এম সি)না মীফম পাংথোকখ্রে অমসুং অরাবিয়ান সিদা থোক্লিবা নোংলৈ নুংশিৎ ‘বিপারজয়’গী গুজরাত সরকার অমসুং কেন্দ্রগী মিনিস্ত্রিশিং/এজেন্সিশিংনা শেম-শারিবশিং হন্না য়েংশিনখ্রে।

ইস্তসেন্ত্রেল অরাবিয়ান সি মথক্তা থোক্লিবা অকনবা নোংলৈ নুংশিৎ ‘বিপারজয়’গী হৌজিক ওইরিবা ফিবমগী মতাংদা ইন্দিয়া মেতিওরোলোজিকেল দিপার্তমেন্ত(আই এম দি)গী দিরেক্তর জেনেরেলনা কম্মিতিদা পাউদমখি। জুন ১৪গী অয়ুক ফাওবদা নোংলৈ নুংশিৎ অসি অৱাংলোমদা চৎলবা য়ারি, অদুদগী অৱাং-অৱাংনোংচুপ লোমদা চৎখিবা য়াই অমসুং মসিনা কুছ, দেবভুমি দ্বারকা অমসুং জামনাগর য়াওনা গুজরাতকী সমুদ্র মপানগী জিলাশিংদা অকনবা নোং তারবা য়াই অমসুং জুন ১৪-জুন ১৫দা গুজরাতকী পোর্বন্দর, রাজকোত, মোর্বি অমসুং জুনাগর জিলাশিংদা অকনবদগী য়াম্না কনবা ফাওবা নোং চুরবা য়াই হায়রি। নোংলৈ নুংশিৎ অদু য়াংবগী চাং পুং অমদা কিমি ১২৫-১৩৫দগী পুং অমদা কিমি ১৫০ ফাওবা ওইরবা য়াই হায়রি।

নোংলৈ নুংশিৎ অসিনা লাকপা য়াই হায়না থাজনরিবা লম্বীদা লৈবা মীওইশিং ঙাক-শেন্নবা পায়খৎলিবা থবকশিং অমসুং মফম অদুগী লৈঙাক্না পায়খৎলিবা থবকশিংগী মতাংদা গুজরাতকী চীফ সেক্রতরিনা কম্মিতিদা পাউদমখি। ঙামীশিংদা সমুদ্রদা ঙা ফাবা চত্তনবা অমসুং সমুদ্র ময়াইদা লৈরিবশিং হল্লক্নবা ঙামীশিংদা পাউতাক পীখ্রে। হৌজিক ফাওবদা হি ২১,০০০ রোম মফম চানা থম্লে। মী হোন্দোকপগী থবক পায়খৎনবা খুদোংথিনিঙাই ওইবা খুঙ্গংগী মমিং পরেং অমা শেম্লে। থুম শুংবদা শিন্মীশিং শাফগদবা মফমশিংদা পুথোক্নবা থৌরাং তৌরে। লৈফমশিং, মৈ পীনবা, হিদাক-লাংথকশিং অমসুং অথু-অকায়গী থবকশিং থৌরাং তৌদুনা থম্লে অমসুং এস.দি.আর.এফকী তিম ১০ থমখ্রে।

নেসনেল দিজাস্তর রেসপোন্স ফোর্স(এন দি আর এফ)না মাঙজৌন্না তিম ১২ থমখ্রে অমসুং অহেনবা তিম ৩ গুজরাতকীদমক থৌরাং তৌদুনা থম্লে। অথুবা মতমদা এয়রলিফ তৌনবা অহেনবা তিম ১৫ অরাকোনম(তামিল নাদু), মুন্দলি(ওরিসা) অমসুং বথিন্দা(পঞ্জাব)তা মিকুপ-নাহুম শিংনা লৈহনখ্রে। সমুদ্র মপান্দা সর্ভিলিয়েন্স এয়রক্রাফ অমসুং হেলিকোপ্তরশিংনা মথক্তগী য়েংশিল্লি। লান্মী, নেভি অমসুং কোস্ত গার্দকী দিজাস্তর রিলিফ তিম(দি আর তি) অমসুং মেদিকেল তিম(এম তি) স্তেন্দবাইদা লৈরে।

থৌরাং তৌবা, মী কনবা অমসুং অমুক হেন্না শেমজিন-শাজিন্নবগী থবকশিংগীদমক গুজরাত রাজ্যগী মতেং পাংনবা লান্মী, নেভি, এয়রফোর্স অমসুং কোস্ত গার্দকী তিমশিং মরাং কাইনা লৈরে। দি.জি সিপ্পিংনা মরী লৈনবশিং অমসুং মেরিতাইম বোর্দশিংদা চাংনাইনা চেকশিনৱাশিং অমসুং পাউতাকশিং পীরে। সমুদ্র ময়াইদা লৈবা ওইল ফিল্দশিং চাং নাইনা য়েংশিল্লি অমসুং গুজরাতকী ওফসোর ইন্সতোলেসনশিংদা থবক তৌরিবা মীওইশিং খুদক্তা হল্লক্নবা পাউতাক পীখ্রে। কান্দলা অমসুং মুন্দ্রাগী মরুওইবা হিথাংফমশিং চেকশিন্না লৈরে অমসুং অতোপ্পা হিথাংফমশিংসু মাঙজৌন্না চেকশিন-থৌরাং লৌখৎনবা পাউতাক পীখ্রে।

কেন্দ্রগী এজেন্সিশিং অমসুং গুজরাত সরকারনা শেম-শারিবশিংগী ফিবম হন্না য়েংশিল্লদুনা, কেবিনেত সেক্রেতরি শ্রী রজিব গৌবানা হায়খি কেন্দ্রগী এজেন্সিশিং অমসুং গুজরাত সরকারনা মাঙজৌন্না চেকশিন-থৌরাংশিং পায়খৎকদবনি। মী শিবা অমসুং অমাং-অতা থোক্তনবা হোৎনগদবনি অমসুং করিগুম্বা ইনফ্রাস্ত্রকচরশিং শোকপা তারবদি অতেনবা মতমগী মনুংদা শেমজিনগদবনি।

কেবিনেত সেক্রেতরিনা হায়খি ঙামীশিংদা সমুদ্রদগী কৌখৎকদবনি অমসুং নোংলৈ-নুংশিৎ অসি কংফাল য়ৌরক্ত্রিঙৈদা খুদোংথিনিঙাই ওইবা মফমশিংদা লৈরিবা মীয়াম শাফগদবা মফমশিংদা থৈদোক্কদবনি। পাংবা য়াবা মতেংশিং পাংনবা কেন্দ্রগী এজন্সিশিং থৌরাং তৌদুনা লৈরে।

মীফম অদুদা গুজরাতকী চীফ সেক্রেতরি, য়ুনিয়ন হোম সেক্রেতরি, রেলৱে বোর্দকী চিয়ারমেন অমসুং সি.ই.ও, সিবিল এভিএসন, পৱার, পোর্তস, সিপ্পিং অমসুং ৱাতরৱেজ মিনিস্ত্রিশিংগী সেক্রেতরিশিং, দি.জি তেলিকোম, এন.দি.এম.এগী মেম্বর সেক্রেতরি, আই.এম.দিগী দি.জি, এন.দি.আর.এফকী দি.জি, কোস্ত গার্দকী দি.জি অমসুং হোম এফেয়ার্স মিনিস্ত্রিগী সেনিয়র ওফিসিএলশিং শরুক য়াখি।

****