যোৱা ন বছৰত কেনেকৈ চৰকাৰী নীতি আৰু কাৰ্যক্ৰমে সমাৱেশী বিকাশত অৰিহণা যোগালে সেই বিষয়ে আলোচনা কৰিবলৈ "জন জন কা বিশ্বাস" শীৰ্ষক এখন বৈঠকত সমাজৰ বিভিন্ন খণ্ডৰ প্ৰতিনিধি নতুন দিল্লীৰ বিজ্ঞান ভৱনত সমৱেত হয়। প্ৰসাৰ ভাৰতীৰ দ্বাৰা আয়োজিত এই বৈঠকৰ বিষয় আছিল "ৰাষ্ট্ৰীয় সন্মিলন: ৯ বছৰ - সেৱা, সুশাসন, গৰীব কল্যাণ"। আলোচকসকলৰ মাজত আছিল বক্সাৰ নিখত জৰীণ; অভিনেতা নৱাজুদ্দিন ছিদ্দিকি; ইউনিচেফৰ ভাৰতৰ প্ৰতিনিধি চীণ্ঠিয়া মেককাফ্ৰি; নাৰ্ছ তথা পদ্মশ্ৰী বঁটা প্ৰাপক শান্তি টেৰেছা লাক্ৰা; পৰিৱেশবিদ অনিল প্ৰকাশ যোশী আৰু শিখোৰ সহ-প্ৰতিষ্ঠাপক দিব্য জৈন। বৈঠকৰ আঁত ধৰে সাংবাদিক ৰিচা অনিৰুদ্ধই।

খেলো ইণ্ডিয়াই ভাৰতৰ ক্ৰীড়া প্ৰতিভাক বিশ্ব মঞ্চত প্ৰদৰ্শন কৰিবলৈ সক্ষম কৰিছে: নিখত জৰীণ 

ভাৰতীয় বক্সাৰ আৰু দুবাৰ বিশ্ব চেম্পিয়ন হোৱা নিখত জৰীণে দৰ্শকক কয় যে চৰকাৰৰ ধ্বজাবাহক আঁচনি খেলো ইণ্ডিয়াই ভাৰতীয় ক্ৰীড়া প্ৰতিভাক ডেউকা দিছে আৰু অধিক যুৱ তথা প্ৰতিভাশালী ভাৰতীয়ক ৰাষ্ট্ৰীয় আৰু আন্তঃৰাষ্ট্ৰীয় মঞ্চত প্ৰদৰ্শনৰ বাবে সক্ষম কৰি তুলিছে। তেওঁ লগতে কয় যে ছোৱালী আৰু তেওঁৰ দৰে মহিলাক সবল কৰি তোলাৰ ক্ষেত্ৰত বেটী বচাও বেটী পঢ়াওৰ ৰূপান্তৰকাৰী প্ৰভাৱ পৰিছে।

ছোৱালীৰ প্ৰতি দৃষ্টিভংগী এতিয়া সলনি হৈছে, বেটী বচাও বেটী পঢ়াওক ধন্যবাদ: নৱাজুদ্দিন ছিদ্দিকি 

অভিনেতা নৱাজুদ্দিন ছিদ্দিকিয়ে স্মৰণ কৰে যে যোৱা বছৰবোৰত পৰিবহণ অধিক সহজ হৈছে। যিকোনো যুৱক-যুৱতীয়ে এতিয়া নিজৰ সপোন সাকাৰ কৰিবলৈ যথেষ্ট সহায়ক ব্যৱস্থা পাব পাৰে বুলি তেওঁ কয়। বেটী বচাও বেটী পঢ়াওৰ বিষয়ে উল্লেখ কৰি, অভিনেতাজনে কয় যে কন্যা শিশুৰ প্ৰতি দৃষ্টিভংগী আৰু মানসিকতাৰ এতিয়া পৰিৱৰ্তন হৈছে, ছোৱালীৰ প্ৰতি আৰু মহিলাৰ প্ৰাপ্তিৰ প্ৰতি অভিভাৱকৰ পৰিৱৰ্তিত মানসিকতাৰ প্ৰতিফলন ঘটিছে। আত্মোপলব্ধিৰ বাবে মহিলাৰ ৰুদ্ধ কণ্ঠ এতিয়া ওলাই আহিছে আৰু সমাজেও এই কথা মানি লৈছে, তেওঁ কয়।

"বিশ্ব মঞ্চত ভাৰতক প্ৰাসংগিক কৰি তুলিবলৈ চৰকাৰে উৎকৃষ্ট কাম কৰিছে"

শিখোৰ সহ-প্ৰতিষ্ঠাপক দিব্য জৈনে শ্ৰোতা-দৰ্শকক কয় যে মহিলা-নেতৃত্বাধীন বিকাশ হৈছে এটা ডাঙৰ পৰিৱৰ্তন যিটো হৈছে। যোৱা ন বছৰত ৭ কোটি মহিলাই আত্মসহায়ক গোটত যোগ দিছে, তেওঁ উল্লেখ কৰে। চৰকাৰী আঁচনিসমূহ এনেদৰে প্ৰস্তুত কৰা হৈছে যি মহিলাসকলক আগবাঢ়ি আহিবলৈ সমৰ্থ কৰিছে। "মহিলাসকলে আগবাঢ়ি আহিবলৈ সংকোচ কৰিছিল, এতিয়া, মহিলাসকল আগবাঢ়ি আহিছে, সমগ্ৰ সমুদায়টো আগবাঢ়ি আহিছে আৰু গোটেই সমাজখন সলনি হৈছে। এই পৰিৱৰ্তন গাঁওসমূহৰ ভূ-স্তৰত দেখিবলৈ পোৱা গৈছে।"

এজন ষ্টাৰ্টআপ উদ্যমী হিচাপে বক্তব্য ৰাখি, দিব্য জৈনে কয় যে যোৱা বছৰটোত ভাৰতে এফডিআইৰ সৰ্ববৃহৎ অন্তঃপ্ৰবাহৰ সাক্ষ বহন কৰে। "আজি, বিশ্ব মঞ্চত ভাৰত প্ৰাসংগিক। আমাক প্ৰাসংগিক কৰি তুলিবলৈ চৰকাৰে উৎকৃষ্ট কাম কৰিছে, আমি এই কথা স্পষ্ট কৰি দিলোঁ যে আমাৰ উদ্যমী আৰু আমাৰ যুৱক-যুৱতীক আমি লক্ষ্য কৰিব লাগিব, আমিয়েই সেইসকল যি ভৱিষ্যতক সংজ্ঞায়িত কৰিব।" 

"আয়ুষ্মান ভাৰতে পশ্চাদ্ভূমিতো সমানে নাগৰিকক সবল কৰি তুলিছে"

মেডিকেল নাৰ্ছ, চিকিৎসা বৃত্তিধাৰী আৰু পদ্মশ্ৰী বঁটা প্ৰাপক আন্দামান আৰু নিকোবৰ দ্বীপপুঞ্জৰ শান্তি টেৰেছা লাক্ৰাই কয় যে আয়ুষ্মান ভাৰতৰ অধীনত স্থাপিত ৱেলনেছ চেণ্টাৰবোৰে জনসাধাৰণক সবল কৰাত গুৰুত্বপূৰ্ণ পদক্ষেপ গ্ৰহণ কৰিছে। তেওঁ কয় যে এই আঁচনিৰ অধীনত প্ৰদান কৰি থকা বিত্তীয় সহযোগিতা বিশেষকৈ পশ্চাদ্ভূমিত আৰু আওহতীয়া অৰণ্যাঞ্চলত বাস কৰা অনুসূচিত জনজাতিৰ লোকসকলৰ বাবে সহায়ক হৈছে। তেওঁ কয় যে যিহেতু এই লোকসকলৰ ওচৰলৈ গৈ পোৱাটো জটিল, সেয়ে ডিজিটেল ইণ্ডিয়া আৰু দূৰসংযোগ তৎপৰতাৰ অধীনত চলি থকা প্ৰগতিয়ে এই লোকসকলৰ স্বাস্থ্যৰ উন্নতিত সহায় কৰিছে। উদাহৰণ স্বৰূপে, এই কথা আনুষ্ঠানিক প্ৰসৱ বৃদ্ধিত প্ৰতিফলিত হৈছে। তেওঁ লগতে কয় যে সাগৰৰ ওপৰত দলং নিৰ্মাণে আন্দামান আৰু নিকোবৰ দ্বীপপুঞ্জত পথ সংযোগ উন্নত কৰিছে।

"চৰকাৰে গাঁৱৰ বিকাশত গুৰুত্ব দিছে, ইণ্ডিয়াৰ সলনি ভাৰত অগ্ৰসৰ হৈ আছে"

পৰিৱেশবিদ অনিল প্ৰকাশ যোশীয়ে কয় যে দেশে এতিয়া সমাৱেশী আৰু পৰিৱেশক লৈ সচেতন সমৃদ্ধিৰ কথা ভাবিবলৈ লৈছে। তেওঁ কয় যে গাঁৱৰ বিকাশ সাধন কৰিবলৈ কেন্দ্ৰীয় বাজেটে আৰম্ভ কৰিছে আৰু এক উন্নত অৰ্থনীতিৰ অগ্ৰগতিৰ বাবে পৰিৱেশগত আন্তঃগাঁথনিৰ ওপৰত গুৰুত্ব দিছে। তেওঁ বৰষুণ ধৰা আৰু ভূমিৰ স্বাস্থ্যৰ দৰে তৎপৰতাৰ শলাগ লয় আৰু কয় যে অংশগ্ৰহণৰ ব্যৱস্থা থাকিলেহে শাসন দীৰ্ঘস্থায়ী হয়। তেওঁ কয় যে ইণ্ডিয়াৰ সলনি ভাৰত অগ্ৰসৰ হৈ আছে, গাঁৱৰ বিকাশত গুৰুত্ব আৰোপ কৰি।

"ষ্টাৰ্টআপ ইণ্ডিয়াই আমাৰ যুৱ আৰু গতিশীল উদ্যমীসকলক জাতিষ্কাৰ হোৱাত সহায় কৰিছে"

বায়কন লিমিটেড আৰু বায়কন বায়লজিক্স লিমিটেডৰ কাৰ্যকৰী অধ্যক্ষ তথা প্ৰতিষ্ঠাপক কিৰণ মজুমদাৰ শ্বই এটা ৰেকৰ্ডেড ভিডিঅ'বাৰ্তাৰ মাধ্যমত কয় যে চৰকাৰে বহু ৰূপান্তৰকাৰী তৎপৰতা গ্ৰহণ কৰিছে, যি জনসাধাৰণৰ জীৱনত ইতিবাচক প্ৰভাৱ পেলাইছে। তেওঁ কয় যে আৰোগ্য সেতু আৰু কোউইন এপ উভয়েই বাটকটীয়া প্ৰযুক্তি যি আমাক কোভিড-১৯ মহামাৰীৰ মোকাবিলা কৰিবলৈ সক্ষম কৰিলে, এটা ডিজিটেল প্লেটফৰ্মৰ জৰিয়তে গণ টীকাকৰণ সম্ভৱ কৰি তুলিলে। আয়ুষ্মান ভাৰতৰ বিষয়ে উল্লেখ কৰি, তেওঁ কয় যে জন ঔষধী কেন্দ্ৰসমূহে বহু লোকৰ বাবে জীৱনদায়ী ঔষধ প্ৰাপ্তি উন্নত কৰিছে। তেওঁ কয় যে আমাৰ বহু যুৱ আৰু গতিশীল উদ্যমী আছে, ষ্টাৰ্টআপ ইণ্ডিয়া আৰু চৰকাৰে সিবিলাকৰ প্ৰতি আগবঢ়োৱা সমৰ্থনক ধন্যবাদ।

"ৰাষ্ট্ৰীয় শিক্ষা নীতিয়ে হলিষ্টিক শিক্ষাক সহায় কৰি আছে"

ভাৰতৰ ইউনিচেফৰ প্ৰতিনিধি চীণ্ঠিয়া মেককাফ্ৰিয়ে কয় যে ভাৰত চৰকাৰে এটা নেচনেল এচিভমেণ্ট ছাৰ্ভে কৰিছিল, য'ত শিশুসকলে কি শিকি আছে আৰু ভাৰতীয় ছাত্ৰ-ছাত্ৰীয়ে প্ৰকৃততে কি জানে সেই সন্দৰ্ভত পৰ্যবেক্ষণ কৰা হৈছিল। "তাৰ ওপৰত ভিত্তি কৰি, চৰকাৰে নীতি প্ৰস্তুত কৰিছিল যাতে প্ৰতিজন ছাত্ৰ-ছাত্ৰীৰ কাষ চাপিব পাৰি আৰু শিক্ষা ব্যৱস্থা শক্তিশালী কৰিব পাৰি। ইয়াৰ পৰিণতিত ভাৰতে আধাৰভিত্তিক শিক্ষণৰ ওপৰত এক বিনিয়োগ কৰে, লগতে এই কথাও সুনিশ্চিত কৰা হয় যাতে আমি শিশুসকলক বিদ্যালয়ত এক সুৰক্ষিত বাতাবৰণত ৰাখিব পাৰোঁ। স্বচ্ছ ভাৰত মিছন, আয়ুষ্মান ভাৰতে শিশুৰ জীৱন আৰু শিক্ষা গ্ৰহণক সুচল কৰি তুলিবলৈ একেলগে আগবাঢ়ি আহে। অনাময় আৰু পুষ্টি নিশ্চিত কৰিবলৈও আঁচনিসমূহ একেলগে আগবাঢ়ি আহে। ইয়াৰ বাবে একাধিক পদ্ধতিৰে দক্ষতা বৃদ্ধি, শিশুৰ স্বাস্থ্যসন্মত বৃদ্ধি, আৰু তেওঁলোকক ২১শ শতিকাৰ দক্ষতাসমূহ আহৰণ কৰাত সহায় কৰি চৰকাৰে এক উদ্ভাৱনী তৎপৰতাৰে আধাৰভিত্তিক শিক্ষণৰ ওপৰত আলোকপাত কৰে। তেওঁ লগতে কয় যে ৰাষ্ট্ৰীয় শিক্ষা নীতিৰ জৰিয়তে আধাৰভিত্তিক শিক্ষণ, অৱসৰকালীন শিক্ষা আৰু উদ্যমিতাৰ শিক্ষাই শিশুক সবল কৰে, এক হলিষ্টিক শিক্ষা পাবলৈ তেওঁলোকক সক্ষম কৰি তোলে।

****