প্রধান মন্ত্রী শ্রী নরেন্দ্র মোদীগী থা খুদিংগী শন্দোকপা রেদিওগী থৌরম মন কি বাত অসি অপুনবা মীশিংগী চাদা ৯৬ হেনবনা খঙই। থৌরম অসি মীওই করোর ১০০না তারে অমসুং থৌরম অসি অমুক খক্তা ওইরবসু তারে। প্রাসার ভারতিনা শীন্নবদগী ইন্দিয়ান ইন্সতিতুৎ ওফ মেনেজমেন্ত, রোহতাক্না অখন্ননা থিজিনবদগী হায়রিবা ৱাফমশিং অসি খঙবা ঙমখিবনি। প্রাসার ভারতিগী সি.ই.ও শ্রী গৌরব দ্বিবেদি অমসুং আই.আই.এম রোহতাক্কী দিরেক্তর শ্রী ধিরাজ পি.শর্মা অনিনা পাংথোকপা পাউগী মীফম অমদা থিজিনবদগী ফংলকপশিং লাউথোকখিবনি।

থিজিনবা অদুদা ফংলকপশিংগী মতাংদা শ্রী শর্মানা হায়খি মীওই করোর ২৩না থৌরম অসি চাংনাইনা তারি অমসুং  অতোপ্পা মীওই করোর ৪১না মরক মরক্তা তাদুনা চাংনাইনা তাবা মীওই অমা ওইরকপা য়াবগী ফিবমদা লৈরি। প্রধান মন্ত্রীগী রেদিওগী থৌরম পাম্নবগী মরমশিং অমসুং থৌরম অসিদা মীয়াম্না পাম্নবগী খ্বাইদগী মরুওইবা মরমশিং রিপোর্ত অসিনা ফোঙদোক্লি। শক্তি লৈবা অমসুং ৱারেপ লৌবা ঙম্বা লুচিংবা অমনা অতাবশিংনা থম্মোয়গী ওইবা মরী অমা শেমগৎনবা ৱা ঙাংবা অসিনা থৌরম অসি পাম্নবগী মরম ওইরি। লৈবাক অসিগী মীয়াম্না প্রধান মন্ত্রী অসি লৌশিং লৈবা অমসুং মীনুংশি খঙবা মীওই অমনি হায়না থাগৎনখি। মীয়ামগা হকথেংন্না পাউ ফাউনবা অমসুং লমজিংবা অসিনা থৌরম অসিদা থাজবা থম্বগী মরম অমসু ওইরি।

হৌজিক ফাওবদা শন্দোকখ্রবা মন কি বাতকী ইপিসোদ ৯৯না মীয়ামদা পীখিবা ইথিল অদু থিজিনবা অদুনা নৈনখি। অতাবা মীওই অয়াম্বনা সরকারগী থবকশিং খঙই অমসুং চাদা ৭৩না থাজবা লৈখি অমসুং লৈবাক অসি চাউখৎলি হায়না খনখি। রেদিও অতাবশিংগী চাদা ৫৮না মখোয়গী পুন্সি মহিং ফিবম ফগৎলে হায়না পাউখুম পীখি অমসুং চাদা ৫৯না সরকারদা থাজবা থম্লে হায়খি। চাদা ৬৩না মখোয়না সরকারদা হায়জবা মতমদা অফবা ফল ফংখি হায়রি অমসুং চাদা ৬০না লৈবাক শেমগৎনবা থবকশিংদা শরুক য়ানিংবগী অপাম্বা ফোঙদোকখি হায়না সর্ভেগী মতুংইন্না হায়রি।

মীওই চাদা ৪৪.৭না থৌরম অসি তি.ভিদা তাখি অমসুং চাদা ৩৭.৬না মোবাইল হেন্দসেত্তগী তাখি। থৌরম অসি তাবনা হেন্না পাম্নখি অমসুং পাউখুম পীরকখিবশিংগী চহি ১৯দগী ৩৪গী মনুংদা লৈবা মীওই চাদা ৬২না তি.ভিদা থৌরম অসি য়েংখি।

মন কি বাতা তারিবশিংগী অয়াম্বা শরুক হিন্দীদা তাখি অমসুং অতাবশিংগী চাদা ৬৫না অতোপ্পা লোলশিংদা তাখি অমসুং চাদা ১৮না ইংলিসতা তাখি।

পাউখুম পীরকখিবা মীওইশিংগী মরমদা দিরেক্তর শ্রী ধিরাজ শর্মনা হায়খি থিজিনবা অসিগীদমক সেম্পল ১০০০৩ লৌখৎখি অমসুং মখোয়গী মনুংদা চাদা ৬০না নুপাশিং অমসুং চাদা ৪০না নুপীশিংনি। হায়রিবা মীওইশিং অসি শীনফম ৬৮ হেনবদা থবক তৌবশিংনি অমসুং চাদা ৬৪না ইনফোর্মেল অমসুং মশানা মশাবু থবক পীজবা কাংলুপ্তগীনি অমসুং চাদা ২৩না মহৈরোয়শিংনি।

শ্রী শর্মনা মখা তানা হায়খি স্নোবোল সেম্পলিং শীজিন্নদুনা ভারতকী অৱাং, খা, নোংপোক অমসুং নোংচুপ থংবা শরুকশিংদগী দেতা খোমজিনবনি অমসুং চাউরাক্না জোন অমদগী মীওই ২৫০০না পাউখুম পীরকখি।

শ্রী গৌরব দ্বিবেদিনা হায়খি ভারতকী লোল ২২ অমসুং দাইলেক্ত ২৯গী মথক্তা মপান লৈবাকশিংগী ললোন ১১দা মন কি বাত শন্দোকখি। ইংলিস য়াওদনা থৌরম অসি শন্দোকখিবা মপান লৈবাক্কী লোল অদুদি ফ্রেঞ্চ, চাইনিস, ইন্দোনেসিয়ান, তিবেতান, বর্মিজ, বালুচি, অরাবিক, পাসতু, পর্সিয়ান, দারি অমসুং শ্বাহিলিনি । ওল ইন্দিয়া রেদিওগী সেন্তর ৫০০ হেনবদা মন কি বাত থৌরম শন্দোকখি।

শ্রী দ্বিবেদিনা হায়খি মতম মতমগী মতুংইন্না অকক্নবা ইপিসোদ অমা খক্তগী ওইনা মীয়ামদগী মখোয়গী ফোঙদোক্নিংবা ৱারোলশিং লৌবগী মথক্তা অপুনবা থৌরমগী মতাংদা মীয়ামগী অনিংবশিং খঙদোক্নবা থিজিনবা অসি পাংথোকপনি। মন কি বাত থৌরমশিং দিজিতেল ওইনা ফংলে। থিজিনবগী থবক অসি আই.আই.এম রোহতাক্তা এপ্রিল ১৮,২০২২দা শীন্নখিবনি।

মন কি বাতকী মরমদা:

ওল ইন্দিয়া রেদিওগী মমিং লৈরবা থৌরম, প্রধান মন্ত্রীগী মন কি বাত ওক্তোবর ৩,২০১৪দগী শন্দোকপা হৌখি অমসুং থা অমগী অরোইবা নোংমাইজিং খুদিংগী অয়ুক পুং ১১দগী এ.আই.আর অমসুং দি.দি নেতৱার্কতা শন্দোক্লি। মিনিত ৩০গী থৌরম অসি লাক্লিবা এপ্রিল ৩০,২০২৩দা ১০০শুবা ইপিসোদ মপুংফারে। ওল ইন্দিয়া রেদিওনা মন কি বাত অসি ভারতকী লোল ২২, দাইলেক্ত ২৯ অমসুং ইংলিস য়াওদনা মপান লৈবাক্কী লোল ১১দা হন্দোক্লে। হায়রিবা লোলশিং অদুদি হিন্দী, সংস্কৃত, পঞ্চাবী, তামিল, তেলুগু, কন্নর, মরাথি, গুজরাতি, মালায়ালম, ওরিয়া, কোনকানি, নেপালি, কাস্মিরি, দোগ্রি, মনিপুরি, মাইথিলি, বেঙ্গালি, অসামিজ, বোরো, সন্থালি, উর্দু, সিন্ধিনি। দাইলেক্তশিংগী মনুংদা ছতিসগরহি, গোন্দি, হালবী, সারগুজিয়া, পহারি, শিনা, গোজরি, বালতি, লাদাখী, কার্বি, খাসি, জেন্তিয়া, গারো, নাগামিস, মার, পাইতে, থাদৌ, কবুই, মাও, তাঙ্খুল, নিসি, অদি, মোনপা, অও, অঙ্গামি, কোকবোরো, মিজো, লেপচা, সিক্কিমিস(ভুতিয়া) য়াওরি।

*****