ইকায়খুম্নরবা, প্রধান মন্ত্রী কিসিদা,

লৈবাক অনিমক্কী দেলিগেদশিং,

মেদিয়াগী মরুপ-মপাংশিং,

খুরুমজরি!

অহানবদা, ঐনা প্রধান মন্ত্রী কিসিদা অমসুং মহাক্কী দেলিগেদ ভারত্তা তরাম্না ওকচরি। হৌখিবা চহিদা প্রধান মন্ত্রী কিসিদা অমসুং ঐ কয়ারক উনখ্রে। উনবা খুদিংগী, ঐনা মহাক্কী অফবা থবকশিং ভারত-জপান মরীগী মতাংদা থাজবা পীখিবশিং অদু নিংশিংলি। মরম অদুনা, ঙসিগী মহাক্কী খোঙচৎ অসি ঐখোয়গী মতেং পাংনবা অসি মপাঙ্গল কনখৎহনবদা য়াম্না কান্নগনি।

মরুপশিং,

ঙসি ঐখোয় উনরিবা অসি অতোপ্পা মরম অমদা য়াম্না মরুওই। চহি অসিদা ভারতনা জি-২০গী থৌবু ওইরি অমসুং জপান্না জি-৭গী থৌবু ওইরি। মরম অদুনা, ঐখোয় ঐখোয়গী লৈবাকশিংগী মরুওইবশিং অমসুং দরকার ওইবশিংদা পুন্না থবক তৌমিন্ননবগী চপ চারবা খুদোংচাবনি। ঙসি ঐনা প্রধান মন্ত্রী কিসিদাদা ভারতনা জি-২০গী প্রসিদেন্দ ওইবগী মরুওইবগী মতাংদা শন্দোক্না তাকখ্রে। গ্লোবেল সাউথকী মরুওইবা থবকশিংগী মতাংদা খঙহনবা হায়বসি ঐখোয়না জি-২০গী প্রসিদেন্দ ওইবগী মরুওইবা য়ুম্বী অমনি। ঐখোয়না ‘ভসুধাইবা কুতুম্বকম’দা থাজবগী চৎনবী অমা লৈবা অমসুং মসি মীওই খুদিংমক্কা শাগোন্নবা মরম্না মসিগী থবক অসি ঐখোয়না পাংথোকপনি।

মরুপশিং,

ঐখোয়না থাজবা থম্লিবা গনতন্ত্রগী মগুনশিং অমসুং মালেমগী আইনশিং ইকায়খুম্নবা উৎপা অসিনা ইন্দিয়া-জপানগী অচেৎপা মরুপ-মপাং ওইবা মরী অমসুং মালেমগী মরীশিংগী য়ুম্ফম ওইরি। মসিগী মরী অসি মপাঙ্গল কনখৎহনবা অসি লৈবাক অনিগী মরুওইবা খক নত্তনা, মসিনা ইন্দো-পেসিফিক লমদমদা শান্তি, নুংঙাই-য়াইফবা অমসুং তুংদু-লৈতাবা হেনগৎহল্লি। ঙসি ঐখোয়না ৱারি শানবদা, ঐখোয়গী লৈবাক অনিগী মরীশিংগী ফিবম হন্না খন্নখ্রে। ঙাক-শেনগী খুৎলায় অমসুং তেক্নোলোজিদা মতেং পীনবা, হকশেল, ললোন-ইতিক অমসুং দিজিতেলদা মতেং পীনবগী মতাংদা ঐখোয়গী ওইবা ৱাফমশিং ফোঙদোক্নখ্রে। সেমিকন্দক্তরশিং লেপ্তনা ফংহনবা অমসুং অতোপ্পা মরুওইবা অরুবা তেক্নোলোজিশিংগী মতাংদা ঐখোয়না কান্নবা ৱাফমশিং খন্নখ্রে। হৌখিবা চহিদা, লাক্লিবা মথং চহি ৫দা জপান্না ভারত্তা য়েন ত্রিল্লিয়ন ৫(লুপা করোর লাখ ৩.২০) থাদবা হায়না পান্দম থমখি। মাইকৈ অসিদা নিংথিনা খুমাংচাউশিনবদা অপেনবা পোকই।

২০১৯দা ঐখোয়না ইন্দিয়া-জপান ইন্দস্ত্রিএল কম্পিতিতিপনেস পার্তনর্সিপ লিংখৎখি। মসিগী মখাদা, লোজিস্তিক্স, চীঞ্জাক শেম-শাবা, এম.এস.এম.ই, তেক্সতাইল, মেছিন্নরি অমসুং স্তিলগী লমদা ভারতকী উদোগতা ঐখোয় চাংদম্না হেনগৎলক্লে। ঐখোয়না মুম্বাই-অহমেদবাদ হায় স্পিৎ রেলগী থবকশিং য়াম্না খুমাংচাউশিল্লে। ঐখোয়না ২০২৩ অসি তুরিজম একচেঞ্জগী চহি হায়না থৌরম পাংথোকপদা ঐ হরাওই। মসিগীদমক ঐখোয়না “হিমালয়গা মাউন্ত ফুজিগা শম্নবা’ হায়বসি থিম অসি খল্লে।

মরুপশিং,

ঙসি, প্রধান মন্ত্রী কিসিদানা ঐহাক লাক্লিবা মে থাদা হিরোসিমাদা পাংথোক্কদৌরিবা জি-৭ লুচিংবশিংগী মীফম শরুক য়ানবা চেবাউ অমা পীরম্লে। মসিগীদমক মহাক ঐনা থম্মোয় শেংনা থাগৎচরি। থা খরগী মতুংদা সেপ্তম্বরদা, জি-২০ লুচিংবশিংগী মীফম শরুক য়ানবা ঐনা অমুক হন্না প্রধান মন্ত্রী কিসিদা ভারত্তা তরাম্না ওক্কনি। ঐখোয়গী ৱারি শানবা অমসুং উনবা অসি হন্দক পাংথোক্লিবা অসিগুম্বা মখা চৎথহনসি অমসুং ভারত-জপানগী মরীশিং মখা তানা অৱাংবা থাকশিংদা পুখৎসি, মসিগা লোয়ন্না ঐগী ৱারোল লোইশিঞ্জরে।

অদোম থাগৎচরি।

*****