ভারত ইমানা য়াইফরে

ভারত ইমানা য়াইফরে

ভারত ইমানা য়াইফরে

রেলৱেগী লমদা অচৌবা য়াওল অমা লাক্লে‍। ঙসি মাপনশুবা অমদি তরাশুবা বন্দে ভারত ত্রেনশিং অসি লৈবাক মীয়ামগী মফমদা কত্থোকপদা ঐঙোন্দা তশেংনা নুংঙাইবা ফাওই‍।

মহারাস্ত্রগী মুখ্যমন্ত্রী শ্রীমান একনাথ জী, উপ মুখ্যমন্ত্রী দেবেন্দ্র জী, মন্ত্রীমন্দলগী ঐগী মরূপশিং, মহারাস্ত্রগী মন্ত্রীশিং, এম.পি.শিং, এম.এল.এ.শিং, অতৈ লেঙশিনবিরিবা অথোইবা মীওইশিং, ইচিল ইনাও অমদি ইচে ইচলশিং,

ঙসিগী নুমিৎ অসি ইন্দিয়র রেলৱেগীদমক্তদি, মরুওইনা মুম্বাই অমদি মহারাস্ত্রগী মতমগা চুনবা কন্নেক্তিবিতীগী মরুওইবা নুমিৎ অমনি‍। ঙসি অহানবা ওইনা বন্দে ভারত ত্রেন অনি পুন্না লমথারি‍। হায়রিবা বন্দে ভারত ত্রেনশিং অসিনা মুম্বাই অমদি পুনেগুম্বা লৈবাকসিগী শেন্মিৎলোনগী সেক্তরশিংবু ঐখোয়গী নাৎ-চৎনবীগী অচৌবা মফমশিংগা শম্নহনগনি‍। মসিনা কলেজ চত্থোক চৎশিন তৌবা, ওফিস অমদি বিজিনেসকীদমক চত্থোক চৎশিন তৌবা, লৌমীশিং অমদি লাই খুরুম্বা চৎপা মীওইশিং পুম্নমক্তা কান্নবা পীগনি‍।

মসিনা মহারাস্ত্রগী তুরিজম অমদি লাই খুরুম্বগী খোঙচৎশিং চাওনা য়োকখৎলগনি‍। সির্দীদা সাই বাবা খুরুমজবা, নাসিক্তা লৈরিবা রাম কুন্দদা চৎপা, ত্রিম্বকেস্বর অমদি পঞ্চবতী ক্ষেত্রদা লাই খুরুম্বা চৎপা ওইরবসু, অনৌবা বন্দে ভারত ত্রেনশিং অসিনা পুম্নমক লায়থোকহল্লগনি‍।

মতৌ অসুম্না মুম্বাই-সোলাপুর বন্দে ভারত ত্রেন অসিনা পন্ধরপুরদা লৈবা বিত্থল-রখুমাই, সোলাপুরগী সিদ্ধোস্বর মন্দীর, অক্কলকোৎকী স্বামী সমর্থ, অমদি আই তুলজাভবানী খুরুম্বা চৎপদা পুম্নমক্তা নুংঙাইহল্লগনি‍। বন্দে ভারত ত্রেন্না সহ্যাদ্রী ঘাত ফাওদুনা চেল্লকপা মতমদা, মীয়াম্না মহৌশাগী অঙকপা ফংনা ফজরবা শক্তমশিং উবা ফংগনি হায়বা ঐ খঙই‍। হায়রিবা বন্দে ভারত ত্রেনশিং অসিগীদমক ঐনা মুম্বাই অমদি মহারাস্ত্রগী মীয়ামগী মফমদা নুংঙাইবা ফোঙদোকচরি‍।

মরূপশিং,

বন্দে ভারত ত্রেন, ঙসিগী মতমসিগী ভারতকী লেমজনিংঙাই ওইরবা শক্তম্নি‍। মসিদা ভারতকী খোঙজেল, ভারতকী স্কেল অনিগী মমি তারি‍। লৈবাকসিনা বন্দে ভারত ত্রেনশিং থুনা হৌদোক্লিবা অদোমসু উবিরি‍। হৌজিক ফাওবদা অসিগুম্বা ত্রেন ১০ লৈবাক শিনবা থুংনা চেনবা হৌখ্রে‍। ঙসিদি, বন্দে ভারত এক্সপ্রেসনা লৈবাকসিগী স্তেত ১৭কী দিস্ত্রিক্ত ১০৮বু শম্নহল্লে‍।

এম.পি.শিংনা মখোয় মখোয়গী মফমশিংদা ত্রেনবু স্তেসন্দা খামহন্নবা, মিনৎ অমা নৎত্রগা অনিদং ওইরবসু খামহন্নবা চে ইনরম্বা মতম অমা লৈরম্বা ঐ নিংশিংলি‍। হৌজিক্তি লৈবাক পুম্বদগী পার্লিয়ামেন্তরিয়নশিংগী মীফমদা মখোয়গী মফমদা বন্দে ভারত ত্রেন য়ৌহল্লক্নবা ৱাফম পুখৎনরক্লে‍। মসিনি ঙসি বন্দে ভারত ত্রেনগী মতাঙদা লৈরিবা ফীভম‍।

মরূপশিং,

ঙসি মুম্বাইগী মীয়ামগী পুন্সি কোমহনগদবা প্রোজেক্তশিংসু মফমসিদা হৌদোক্লিবসিদা ঐ নুংঙাইবা ফাওই‍। ঙসি হৌদোক্লিবা এলিবেতেদ কোরিদোর অসিনা মুম্বাইদা মথৌ তারম্বা ইস্ত ৱেস্ত কন্নেক্তিবিতী ফংহল্লগনি‍। মুম্বাইগী মীয়াম্না মতম কুইনদগী মসিবু ঙাইদুনা লৈরক্লিবনি‍। কোরিদোর অসিদগী নুমিৎ খুদিংগী ভারী লাখ ২ হেনবা চৎপা য়াগনি অমদি মীয়ামগী মতমসু মাঙহল্লরোই‍।

হৌজিক্তি ইস্তর্ন অমদি ৱেস্তর্ন সব-অর্মান মফমশিংগী কন্নেক্তিবিতীসু মসিনা মরম ওইরগা ফগৎহল্লগনি‍। কুরার অন্দরপাসসু য়াম্না মরুওইবা অমনি‍। ঐনা মুম্বাইকারশিংগী মফমদা হায়রিবা প্রোজেক্তশিং অসিনা লোইশিল্লকপসিদা নুংঙাইবা ফোঙদোকচরি‍।

মরূপশিং,

২১শুবা চহিচাগী ভারতনা খোঙজেল থুনা মাগী পব্লিক ত্রান্সপোর্ত সিস্তেম ফগৎহনবা তাই‍। ঐখোয়গী পব্লিক ত্রান্সপোর্ত সিস্তেম্না খোঙলৈ থুনা ফগৎলিবমখৈ, লৈবাক মীয়ামগী ইজ ওফ লিভিংসু ফগৎলক্কদৌরিবনি, মখোয়গী পুন্সিগী ক্বালিতীসু ফগৎলক্কদৌরিবনি‍। হায়রিবা ৱাখল্লোনসিদা ঙসি লৈবাকসিদা মতমগা চুনবা ত্রেনশিং চেলহল্লিবনি, মেত্রো হৌদোক্লিবনি, অনৌ-অনৌবা এয়রপোর্তশিং অমদি হিথাংফমশিং শেমগৎ শাগৎলিবনি‍। নুমিৎ খরনিগী মমাঙদা পুথোকখিবা লৈবাক্কী বজেৎ অদুনা ৱাখল্লোন অসিবু হেন্না চেৎশিনহল্লি‍। ঐখোয়গী মুখ্যমন্ত্রী জী অমদি উপ মুখ্যমন্ত্রীজীনা মদুবু য়াম্নসু থাগৎখি‍।

ভারতকী পুৱারীদা অহানবা ওইনা লুপা করোর লাখ ১০ ইনফ্রাস্ত্রকচর ফগৎহন্নবখক্কীদমক খাক্লি‍। মসি চহি মাপানগী ওইনা য়েংনবদা শরুক ৫ হেল্লবনি‍। মসিদা রেলৱেগী শরুক লুপা করোর লাখ অনি মখায় য়াওরি‍। মহারাস্ত্রগীসু রেল বজেত্তা পুৱারী ওইগদবা মওংদা হেনগৎলে‍। দবল ইঞ্জিন লৈঙাক্কী দবল হোৎনজমলনা মহারাস্ত্রগী কন্নেক্তিবিতীবু হেন্না খোঙজেল য়াঙনা মতমগা চুনবা ওইহল্লক্কনি হায়না ঐনা থাজৈ‍।

মরূপশিং,

ইনফ্রাস্ত্রকচরদা থাদখিবা শেনফম খুদিংমক্না অনৌবা থবক পীবগী খুদোংচাবা শেমগৎলি‍। মসিদা চঙলিবা সিমেন্ত, নুং, য়োৎ, শেমগৎ শাগৎপদা চঙলিবা মেচিনশিং, হায়রিবশিং অসিগা মরী লৈনবা ইন্দস্ত্রী খুদিংদা পাঙ্গল হাপ্লিবনি‍। মসিনা বিজিনেস তৌরিবা মিদ্দল ক্লাসকী মীওইশিংদসু কান্নহল্লি, লায়রবশিংদসু থবক শুবা ফংহল্লি‍। মসিনা ইঞ্জিনিয়রশিংসু থবক ফংহল্লি, লংফৈদা লৈবা শিন্মীশিংসু থবক ফংহল্লি‍। মসিনা তাকপদি ইনফ্রাস্ত্রকচর শেমগৎপদা, পুম্নমক্তা কান্নহল্লি অমদি শেমগৎপা লোয়রবা মতমদনা অনৌবা ইন্দস্ত্রীশিং, অনৌবা বিজিনেসশিংগীদমক অনৌবা লম্বী পী‍।

ইচিল ইনাও অমদি ইচে ইচলশিং,

হন্দক্কী বজেতনা মিদ্দল ক্লাসকী মীওইশিংদা কমদৌনা মপাঙ্গল হাপ্লিবগে হায়বা ৱাফম ঐনা মরুওইনা মুম্বাইগী মীয়ামগী মফমদা থমজনিংই‍। তলব চাবা কাঙবু নৎত্রগা লল্লোন ইতিক তৌদুনা শেল তানবা মিদ্দল ক্লাসকী কাঙবু ওইরবসু, অনিমকপু বজেৎ অসিনা হরাওহল্লে‍। অদোম য়েংবিয়ু, ২০১৪গী মমাঙদা করি ফীভম লৈরম্মী‍। চহিদা লুপা লাখ ২ হেন্না তানবা মীওইশিংদগী তেক্স লৌরম্মী‍। বি.জে.পি. লৈঙাক্না অহানবদা লুপা লাখ ৫ ফাওবগী শেন্থোকপু তেক্স কোকপিরম্মী, অদুগা হন্দক্কী বজেত অসিদনা লুপা লাখ ৭ ফাওবা হেনগৎহল্লে‍।

ঙসি মিদ্দল ক্লাস ইমুংশিংগী শেন্থোক্তা তেক্স লৌদ্রিবা অসি য়ু.পি.এ. লৈঙাক্কী মতমদা চাদা ২০গী তেক্স লৌরম্লিবনি‍। হৌজক্তি থবক নৌনা ফংলকপা নহাশিং, থাদা তলব লিশিং ৬০-৬৫ ফংলম্বা মীওইশিং হৌজিক্তি শেল হেন্না শীজিন্নবা ঙম্লগনি‍। লায়রবা অমদি মিদ্দল ক্লাসকী য়াইফনবগীদমক থবক তৌবা লৈঙাক্তি অসিগুম্বা ফিরেপ লৌই‍।

মরূপশিং,

পুম্নমক চাওখৎমিন্নদুনা পুম্নমক হোৎনমিন্নবগী ৱাখল্লোনবু হেন্না মপাঙ্গল হাপকদবা বজেৎ অসিনা ইমুং খুদিংগী মপাঙ্গল হাপকনি হায়না ঐনা চপ চানা থাজৈ‍। ঐখোয় পুম্নমকপু চাওখৎপা ভারত অমা শেমগৎনবগীদমক পুক্নিং থৌগৎকনি‍। অমুক্কা হন্না মুম্বাই য়াওনা মহারাস্ত্র পুম্ববু বজেৎ অমদি অনৌবা ত্রেনশিংগীদমক নুংঙাইবা ফোঙদোকচরি অমদি য়াইফ-পাউজেল পীজরি‍।

ময়াম পুম্নমকপু থাগৎচরি!

*****