প্রধানমন্ত্রীগী লোইশঙ
প্রধান মন্ত্রীনা মহারাস্ত্রদা লুপা করোর ৭৫,০০০গী ওইগদবা প্রোজেক্তশিং উরেপ উয়ুং তমখ্রে অমদি লৈবাক্কী মফমদা কত্থোকখ্রে
মহারাস্ত্র সমৃদ্ধী মহামার্গ শঙ্গাখ্রে
“ঙসি মহারাস্ত্র চাউখৎনবগীদমক অনৌবা থৱানমিচাক তরামাথোইগী চবুন অমা থৌরক্লি”
“ইনফ্রাস্ত্রকচরনা থৱায় য়াওদ্রবা লম্বী অমদি ফ্লাইওভরশিংখক্তমক কোনশিনবা য়ারোই, মসিগী পাক চাউবা য়াম্না হেন্না চাউই”
“মমাঙদা চাকথুং ফিথুংদ্রবশিং হৌজিক্তি লৈঙাক্কী প্রাইওরিতী ওইররি”
“শমজিনবগী রাজনিতী অসি লায়না অমনি”
“শমজিনবগী চৎনবী থম্লিবা পোলিতিকেল পার্তীশিং লৈবাকসিগী লাইশোলগী খ্বায়দগী চাউবা য়েক্নবনি”
“লৈবাক অমত্তবু শমজিন্দুনা চলাইবা য়ারোই, অশানবা মীৎয়েঙ অমগা লোয়নবা মতম চুপ্পগী ওইবা পাম্বৈ লৈবাক অমগী খোঙজেলগীদমক য়াম্না মরুওই”
“গুজরাতকী মীখলগী মহৈশিং অসি মতম চুপ্পগী চাওখৎপা অমদি মতম চুপ্পগী পাম্বৈগী শেন্মিৎলোনগী খুজিল থৌরাংগী মহৈনি”
Posted On:
11 DEC 2022 2:43PM by PIB Imphal
প্রধান মন্ত্রী, শ্রী নরেন্দ্র মোদীনা ঙসি মহারাস্ত্রতা লুপা করোর ৭৫,০০০ হেনবগী তোঙান তোঙানবা প্রোজেক্ত কয়া উরেপ উয়ুং তমখ্রে অমদি লৈবাক্কী মফমদা কত্থোকখ্রে। মসিদা লুপা করোর ১৫০০ হেনবগী নেস্নেল রেল প্রোজেক্তশিং, নেস্নেল ইনস্তিত্যুৎ ওফ ৱন হেল্থ (এন.আই.ও.), নাগপুর অমদি নাগ তুরেল মোৎশিনবা হন্থহন্নবগী প্রোজেক্ত, নাগপুর য়াওরি। থৌরম অদুদা, প্রধান মন্ত্রীনা ‘সেন্ত্রেল ইনস্তিত্যুৎ ওফ পেত্রোকেমিকেল্স ইঞ্জিনিয়রিং এন্দ তেক্নোলোজী (সিপেত), চন্দ্রপুর’ লৈবাক্কী মফমদা কত্থোকখি অমদি ‘সেন্তর ফোর রিছর্চ, মেনেজমেন্ত এন্দ কন্ত্রোল ওফ হিমেগ্লোবিনোপেথিজ, চন্দ্রপুর’সু শঙ্গাখি।
ঙসি অঙনবদা, প্রধান মন্ত্রীনা নাগপুরদগী বিলাসপুর ফাওবা চৎকদবা বন্দে ভারত এক্সপ্রেস লমথাখি, ‘নাগপুর মেত্রো ফেজ ১’ লৈবাক্কী মফমদা কত্থোকখি, অমদি ‘নাগপুর মেত্রো ফেজ – ২’ উরেপ উয়ুং তমখি। প্রধান মন্ত্রীনা কিলোমিতর ৫২০ শাংনা কোল্লিবা অমদি নাগপুরগা সির্দীগা শম্নহল্লিবা হিন্দু হ্রুদয়সম্রাৎ বালাসাহেব থাকরে মহারাস্ত্র সম্রুদ্ধী মহামার্গকী ফেজ -১ সু শঙ্গাখি।
প্রধান মন্ত্রীনা লুপা করোর ১৫৭৫ হেন্না চঙনা শেমগৎলিবা, ও.পি.দি., আই.পি.দি., দাইগ্নোস্তিক সর্ভিস, ওপরেসন থিএতর অমদি মেদিকেল সাইন্সকী অচৌবা স্পিসিএল্তী অমদি সুপরস্পিসিএল্তী পুম্নমক কোনশিল্লবা দিপার্তমেন্ত ৩৮ লৈদুনা স্তেত-ওফ-দি-আর্ত ফেসিলিতীশিং লৈবা লায়েংশঙ অমা ওইরিবা, এইমস নাগপুরসু লৈবাক্কী মফমদা কত্থোকখি। লায়েংশঙ অসিনা মহারাস্ত্রগী বিদর্ভা রীজন্দা মতমগা চুনরবা হকশেলগী ফেসিলিতীশিং ফংহল্লি অমদি অকোয়বদা লৈরিবা গারজিরোলী, গোন্দিয়া অমদি মেলঘাৎকী ত্রাইবেলশিংগীদমক্তা থৌজালগী মশক অমা ওইরি।
থৌরমদুদা ৱা ঙাঙলদুনা, প্রধান মন্ত্রীনা সঙ্কস্তী চতুর্থীগী য়াইফ পাউজেল পীখি অমদি লোর্দ গনপতীবু খোল্লাউ লাউখি। প্রধান মন্ত্রীনা মহারাস্ত্রগী নাগপুরদগী চাওখৎ থৌরাংগী থবক চবুল অমা হৌদোক্লিবা অখন্নবা নুমিৎ অসিনা মীয়ামগী পুন্সিদা অওনবা পুরক্লগনি হায়খি। “ঙসি চাওখৎপগী অনৌবা পন্দোল লোম্বদা মতেং পাংগদবা অমদি অনৌবা মায়কৈ তাক্কদবা অনৌবা থৱানমিচাক তরামাথোইগী চবুল অমা মহারাস্ত্র চাওখৎনবগীদমক থোরক্লি”, হায়না মহাক্না হায়খি। প্রোজেক্ত ১১মক মথং মথং পল্লদুনা, প্রধান মন্ত্রীনা হায়খি, “হিন্দু হ্রিদয় সম্রাত বালাসাহেব থাকরে মহারাস্ত্র সমৃদ্ধী মহামার্গ হৌজিক নাগপুরদগী সির্দী ফাওবা শেম শাবা লোইরে, এইমসনা বিদর্ঙাগী মীয়ামদা কান্নবা পীরগনি, নেস্নেল ইনস্তিত্যুৎ ওফ ৱন হেল্থ লিংখৎপা, চন্দ্রপুরদা শাগৎলিবা আই.সি.এম.আর.গী রিছর্চ সেন্তর, সিপেত চন্দ্রপুর শঙ্গাবা, নাগ তুরেল মোৎশিনবা হন্থহন্নবা নাগপুরদা পায়খৎলিবা মখল মখা কয়াগী প্রোজেক্তশিং, মেত্রো ফেজ ১ শঙ্গাবা অমদি ফেজ ২ উরেপ উয়ুং তম্বা, নাগপুর অমদি বিলাসপুরগী মরক্তা চেল্লিবা বন্দে ভারত এক্সপ্রেস, ‘নাগপুর’ অমদি ‘অজ্নি’ রেলৱে স্তেসন নৌনা শেমগৎপগী প্রোজেক্ত, অজ্নিদা হোর্সপৱার লিশিং ৪২গী মেন্তেনেন্স দিপো শঙ্গাবা অমদি নাগপুর-ইতার্সী লাইনগী কোহলি-নারখের লম্বী শঙ্গাবা।” প্রধান মন্ত্রীনা লোইশিল্লবা অমদি নৌনা পায়খৎকদৌরিবা প্রোজেক্তশিংগীদমক মহারাস্ত্র মীয়ামগীম ফমদা নুংঙাইবা ফোঙদোকখি।
প্রধান মন্ত্রীনা ঙসিগী প্রোজেক্তশিং অসি মহারাস্ত্রগী দবল ইঞ্জিন লৈঙাক্কী থবক্ক খোঙজেলগী খুদমশিংনি হায়বা ৱাফম থমখি। মহাক্না সম্রুদ্ধী মহামার্গ অসি নাগপুর অমদি মুম্বাইগী মরক্তা লৈরিবা অরাপ্পা হন্থহনবখক্কী নত্তে মহারাস্ত্রগী দিস্ত্রিক্ত ২৪বু মতমগা চুনরবা কন্নেক্তিবিতীনা শম্নহনবসুনি হায়বা ৱাফম থমখি। থবক পীবগী খুদোংচাবা হেনগৎহনবগী মথক্তা, হায়রিবা কন্নেক্তিবিতী প্রোজেক্তশিং অসিনা লমদম অসিদা লৈরিবা লৌমী, লাই খুরুম্বশিং অমদি ইন্দস্ত্রীশিংদসু কান্নহনগনি হায়না প্রধান মন্ত্রীনা হায়খি।
হায়রিবা প্রোজেক্তশিং অসি মওং চুম্না থৌরাং য়াৎখিবগী মওং মতৌগী মরমদা, প্রধান মন্ত্রীনা ঙসি শঙ্গারিবা প্রোজেক্তশিং অসিনা ইনফ্রাস্ত্রকচর দিভেলপমেন্তকী মপুং ওইবা মীৎয়েঙগী মশক অমা পীরি হায়খি। “এইমস নাগপুর ওইরবসু নৎত্রগা সমৃদ্ধী মহামার্গ ওইরবসু, বন্দে ভারত এক্সপ্রেস ওইরবসু নৎত্রগা নাগপুর মোত্রো ওইরবসু, প্রোজেক্তশিং অসিগী মওং মতৌ খেন্নরম্বদি য়াই অদুবু মখোয় অসি লৈ চবুল অমগী মওংদা পুন্না থম্মিন্নবা মতমদা, মপুং ফাবা চাওখৎপগী মহাও অমা মীপুম খুদিংদা য়ৌহনগনি”, হায়না মহাক্না হায়খি। দবল ইঞ্জিন লৈঙাক্কী থৌরাংশিং পল্লদুনা, প্রধান মন্ত্রীনা মীচম মীয়ামগী হকশেলগী থৌরাং নৎত্রগা লনথুম শেমগৎপগী ওইরবসু, লৌমীশিং মপাঙ্গল কলহনবা নৎত্রগা ঈশিং য়োকশিনবা ওইরবসু, ইনফ্রাস্ত্রকচরদা মীওইবগী মচৎ হাপ্পা অমদি মীওইবগী মচৎনা মীপুম খুদিংগী পুন্সিদা ইথিল পীরিবা অহানবা থৌরাংনি হায়বা ৱাফম থমখি।
ইনফ্রাস্ত্রকচরেল দিভেলপমেন্তকী মপুং ওইবা মীৎয়েঙগী খুদমশিং পীরদুনা, প্রধান মন্ত্রীনা, “লায়রবা ইমুং খুদিংদা লুপা লাখ ৫ ফাওবগী লেম্না লায়েংবগী খুদোংচাবা পীরিবা অয়ুস্মান ভারত স্কীম অসি ঐখোয়গী সোসিএল ইনফ্রাগী খুদম অমনি, কাসী, কেদরনাথ, উজ্জেন্দগী হৌরগা পন্ধরপুর ফাওবদা ঐখোয়গী লাইনীংগী ওইবা মফমশিং শেমগৎলিবা অসি কলচরেল ইনফ্রাগী খুদম অমনি, লায়রবা মীওই করোর ৪৫ হেনববু বেঙ্কিং সিস্তেমগা শম্নহল্লিবা জন ধন য়োজনা ঐখোয়গী শেলথুমগী ইনফ্রাস্ত্রকচরগী খুদম অমনি”, হায়খি। নাগপুর এইমসকুম্বা মতমগা চুনরবা লায়েংশঙ অমদি মেদিকেল কলেজ হাংদোক্নবগী কেম্পেন অসি মেদিকেল ইনফ্রাস্ত্রকচরগী খুদম অমনি হায়না মহাক্না মখা তাখি। “ইনফ্রাস্ত্রকচরনা থৱায় য়াওদ্রবা লম্বী অমদি ফ্লাইওভরশিং কোনশিনবখক্তা য়ারোই, মসিগী পাক চাউবা য়াম্না হেন্না চাউই”, হায়না মহাক্না মখা তাখি।
প্রধান মন্ত্রীনা চহি তুন্থ্রাদগী কুন্থ্রামঙারোমগী মমাঙদা লুপা করোর ৪০০রোম চঙগনি হায়না পাদুনা উরেপ উয়ুং তমখিবা অদুবু লোইশিনবদি লোইশিনখিদ্রবা গোগখুর্দ দামবু খুদম ওইনা পীখি। শ্রী মোদীনা দাম অসিগী চাউরাকপা শেঞ্জং হৌজিক্তি লুপা করোর লিশিং ১৮দা হেনগৎলক্লে হায়বা ৱাফম থমখি। “ইং ২০১৭দা দবল ইঞ্জিন লৈঙাক শেম্লবা মতুংদা, দাম অসিগী থবক খোঙজেল য়াঙ্খৎলকখি, অমদি প্রোব্লেম খুদিংমক ৱারোইশিন পুরকখি”, হায়না মহাক্না হায়খি। প্রধান মন্ত্রীনা চহি অসিদা দাম অসি মপুং ফানা থল্লে হায়বা ৱাফমদা অপেনবা ফোঙদোকখি।
প্রধান মন্ত্রীনা অমুক নৌহৌননা ফোঙদোকখিবদা, “অজাদী কা অমৃৎ কাল অসিদা, লৈবাক অসিনা চাওখৎপা ভারত অমগী অথোইবা ফিদমগা লোয়ননা মাঙদা চঙশিল্লি অমদি মসি লৈবাকসিগী অপুনবগী পাঙ্গলনা ফংবা ঙমগদৌরিবনি। চাওখৎপা ভারত অমা শেমগৎনবগী লাইৱাদি লৈবাক্কী চাওখৎনবগীদমক স্তেতশিং চাওখৎপনি।” থেংনখিবশিংদগী তমশিনহৌদুনা, প্রধান মন্ত্রীনা চাওখৎপা খরখক ওইরবদি, খুদোংচাবসু খরখক ওইগদৌরিবনি হায়বা ৱাফম থমখি। মহাক্কী ৱাফম মখা তানা ফোঙদোক্লদুনা, প্রধান মন্ত্রীনা অখন্নবা খরদা মহৈ মশিং ফংহনবা মতমদা লৈবাকসিগী হৈশিংবা মাঙদা থোরক্লোই, মীওই খরখক্না বেঙ্ককা শম্নদুনা লৈবদা ত্রেদ বিজিনেসসু খরখক ওই, অমদি অফবা কন্নেক্তিবিভী ময়োল্লম খরখক্তা লৈরবদি, চাওখৎপসু মফম খরদুখক্তা নৈশিন্দুনা লৈ হায়না শন্দোক্না তাকখি। মদুগী মহৈনা, লৈবাকসিগী য়াম্লবা মীশিংনা চাওখৎপগী মপুং ফাবা কান্নবসু ফংদে অমদি ভারতকী তশেং তশেংবা মপাঙ্গলসু ফুদোকপা ঙমদে হায়না প্রধান মন্ত্রীনা হায়খি। প্রধান মন্ত্রীনা হৌখিবা চহি ৮সিদা, হায়রিবা ৱাখল্লোন অমদি লম্বী পরিং অসি ‘সবকা সাথ, সবকা বিকাস, সবকা বিস্বাস, অমদি সবকা প্রয়াস’কী য়ুম্ফমগা লোয়ননা হোংলক্লি হায়বা ৱাফম থমখি। “মমাঙদা চাকথুং ফিথুংদনা লৈরম্বশিং হৌজিক্তি লৈঙাক্কী প্রাইওরিতী ওইরে”, হায়না শ্রী মোদীনা হায়খি। লৌমীশিংনা লমজিংদুনা চাওখৎপা পুরকপগী খুদম পীরদুনা, শ্রী মোদীনা বিদর্ভাগী লৌমীশিংনা পি.এম. কিসান সম্মান নিধিগী অচৌবা কান্নবসু ফংলি অমদি শা-শন লোইবশিংদা কিসান ক্রেদিৎ কার্দকী খুদোংচাবা ফংহল্লিবা অসিসু লৈঙাক অসিননি হায়খি।
চাকথুং ফিথুংদ্রবশিংদা প্রাইওরিতী পীবগী ৱাফম মখা তারদুনা, প্রধান মন্ত্রীনা ভেন্দরশিংদা অরায়বা লোন পীবা অমদি এস্পিরেস্নেল দিস্ত্রিক্ত ১০০ হেনবনচিংবা খোঙথাঙশিং পনখি। প্রধান মন্ত্রীনা মরাথ্বারা অমদি বিদর্ভা য়াওনা লৈবাকসিগী দিস্ত্রিক্ত ১০০ হেনবা চাওখৎপগী পেরামিতর কয়াদা শোত্থনা লৈরি। “হৌখিবা চহি ৮সিদা, হায়রিবা শোত্থহৌরবা মফমশিং অসিবু খোঙলৈ থুনা চাওখৎনবগী ইনর্জীগী অনৌবা মকোন ওন্থোক্নবগী মায়কৈদা ঐখোয়না থবক পায়খত্তুনা লাক্লি”, হায়না মহাক্না হায়খি।
প্রধান মন্ত্রীনা মীপুম খুদিংমক্কীম ফমদা ভারত্তা শমজিনবীগী রাজনিতী থোরক্লি হায়না চেকশিনৱাসু থমখি। পোলিতিকেল পার্তীশিংনা অরানবা ৱাশক শক্তুনা লৈঙাক শেম্নবগী পান্দমগা লোয়ননা রাজনিতীগী মীৎয়েঙদা খাজনা থীরিবা মীয়ামগা ৱানা তাঞ্জবা শেল মৎলি অমদি শমজিনবগী থৌওংশিং চত্থরি হায়না মহাক্না চেকশিনৱা থমখি। লৈবাকসিনা লাক্কদৌরিবা চহি ২৫সিদা চাওখৎপা লৈবাক অমা ওইরক্নবগী লম্বীদা থবক চঙশিল্লিঙৈ মতমসিদা, পোলিতিকেল পার্তী খরনা মখোয় মশাগী ওইজবখক্কীদমকভারতকী শেন্মিৎলোন থুগাইবা পাম্লি হায়না প্রধান মন্ত্রীনা অমুক হন্না ফোঙদোকখি। অহানবা ইন্দস্ত্রিএল রিভোলুসনগী কান্নবা লৌহৌবা ঙমহৌদনা মাঙখ্রবা খুদোংচাবশিং অমদি অনিসুবা ইন্দস্ত্রিএল রিভোলুসন্দা শোত্থনা লৈহৌবগী নুংনাংবা প্রধান মন্ত্রীনা ফোঙদোকখি। মরিশুবা ইন্দস্ত্রিএল রিভোলুসনগী মতম লাকপদা, ভারতনা তাঞ্জা অদু মাঙহল্লোইদবনি হায়না মহাক্না হায়খি। “লৈবাক অমত্তা শমজিন্বা মতৌনা চলাইবা য়ারোই, অশানবা মীৎয়েঙ য়াওবা মতম চুপ্পগী ওইবা পাম্বৈ লৈবাক্কী চাওখৎ খোঙজেলগীদমক য়াম্না মরুওই”, হায়না শ্রী মোদীনা ফোঙদোকখি।
প্রধান মন্ত্রীনা মতম অমদা লায়রবা লৈবাক ওইনা লৌনরম্বা, অদুবু ইনফ্রাস্ত্রকচরদা চাউনা অহোংবা পুরক্তুনা মখোয়গী মরাইবক হোংদোকখ্রবা, অমদি শেন্মিৎলোনগী অচৌবা মফম ওইখ্রবা সাউথ কোরিয়া অমদি সিঙ্গাপোরগুম্বা লৈবাকশিংগী খুদম পীখি। হৌজিক মথৌ তারিবসি লৈঙাক্কী শেঙ্গাউদগী শেনয়েক খুদিংমক নহা মীরোলগী তরং তরংবা তুংলমচৎ অমা শেম্বদা থাদবদুনি হায়বা ৱাফম মহাক্না থমখি।
প্রধান মন্ত্রীনা লৈবাকসিগী নহাশিং অমদি খাজনা থীরিবশিংবু ‘হন্থনা তানবা, হেন্না চাদিং তৌবা’ হায়রিবা থৌরাং পুদুনা চৎলিবা মশাগী ওইজবা থিবা পোলিতিকেল পার্তীশিংবু মীয়ামদা পুথোক্তুনা খঙহন্নবা ৱাফম থমখি। প্রধান মন্ত্রীনা অসিগুম্বা ফত্তবা পোলিসী শেম্বনা মরম ওইরগা শেন্মিৎলোন পুম্বা মাঙ তাকখিবা মালেমগী লৈবাক কয়াগী মরমদা পনখি। নাকল অমরোমদা, প্রধান মন্ত্রীনা লৈবাকসিদা পায়খৎলিবা তুং কোইগদবা চাওখৎপা অমদি তুং কোইগদবা পাম্বৈশিংগীদমক পায়খৎলিবা থৌরাংশিংদা মীয়াম্না শৌগৎলকপা উবদা নুংঙাইবা ফোঙদোকখি। “গুজরাতকী মীখলগী মহৈশিং অসি মতম চুপ্পগী ওইনা চাওখৎপা অমদি মতম চুপ্পগী ওইবা পাম্বৈগী শেন্মিৎলোনগী খুজিল থৌরাংগী মহৈনি”, হায়না মহাক্না মখা তাখি।
থৌরমদুদা মহারাস্ত্রগী মুখ্য মন্ত্রী, শ্রী একনাথ সিন্দে, মহারাস্ত্রগী গভর্নর, শ্রী ভগৎ সিংহ কোস্যারী, মহারাস্ত্রগী উপ মুখ্য মন্ত্রী, শ্রী দেবেন্দ্র ফদ্নাবিস অমদি রোদ ত্রান্সপোর্ত এন্দ হায়ৱেজকী কেন্দ্র মন্ত্রী, শ্রী নিতিন গারকরী অমদি অতৈ কয়াসু শরুক য়াখি।
বেকগ্রাউন্দ
নাগপুর মেত্রো
অর্বান মোবিলিতীদা অনৌবা য়াওল পুরক্কদবা অতোপ্পা খোঙথাঙ অমদা, প্রধান মন্ত্রীনা ‘নাগপুর মেত্রো ফেজ ১’ প্রধান মন্ত্রীনা লৈবাক্কী মফমদা কত্থোকখি। মহাক্না মেত্রো ত্রেন অনি – খাপ্রিদগী ওতোমোতিব স্ক্বার (ওরেঞ্জ লাইন) ফাওবা অমদি প্রজাবতী নগরদগী লোকমান্য নগর (এক্বা লাইন) ফাওবা – খাপ্রি মেত্রো স্তেসন্দগী লমথাখি। নাগপুর মেত্রোগী ফেজ ১ লুপা করোর ৮৬৫০ হেন্না চঙনা শেমগৎপনি। প্রধান মন্ত্রীনা লুপা করোর ৬৭০০ হেন্না চঙনা শেমগৎকদবা নাগপুর মেত্রো ফেজ-২গী উরেপ উয়ুংসু তমখি।
রেল প্রোজেক্তশিং
নাগপুর রেলৱে স্তেসন্দা, প্রধান মন্ত্রীনা নাগপুর অমদি বিলাসপুরগী মরক্তা চেনগদবা বন্দে ভারত এক্সপ্রেস লমথাখি।
প্রধান মন্ত্রীনা মথঙশিৎনা লুপা করোর ৫৯০ অমদি লুপা করোর ৩৬০রোম চঙনা অমুক নৌহৌননা শেমগৎকদবা নাগপুর রেলৱে স্তেসন অমদি অজ্নি রেলৱে স্তেসনগী উরেপ উয়ুং তমখি। প্রধান মন্ত্রীনা গভর্নমেন্ত মেন্তেনেন্স দিপো, অজ্নি (নাগপুর) অমদি নাগপুর-ইতার্সি থর্দ লাইন প্রোজেক্তকী কোহলি-নারখের সেক্সন লৈবাক্কী মফমদা কত্থোকখি। হায়রিবা প্রোজেক্তশিং অসি মথঙশিৎনা লুপা করোর ১১০ অমদি লুপা করোর ৪৫০রোম চঙনা শেমগৎপনি।
সম্রুদ্ধি মহামার্গ
প্রধান মন্ত্রীনা কিলোমিতর ৫২০ শাংবা অমদি নাগপুর অমসুং সির্দি শম্নহল্লিবা হিন্দু হ্রুদয়সম্রাত বালাসাহেব থাকরে মহারাস্ত্র সম্রুদ্ধি মহামার্গকী ফেজ – ১ শঙ্গাখি।
সম্রুদ্ধি মহামার্গ নৎত্রগা নাগপুর-মুম্বাই সুপর কম্ম্যুনিকেসন এক্সপ্রেৱে, অসি লৈবাক শিনবা থুংনা কন্নেক্তিভিতী অমদি ইনফ্রাস্ত্রকচর ফগৎহন্নবগী প্রধান মন্ত্রীগী মঙলান মঙফাওনহন্নবগী মায়কৈদা থাংজিনবা অচৌবা খোঙথাঙ অমনি। কিলোমিতর ৭০১ শাংবা এক্সপ্রেসৱে – লুপা করোর ৫৫,০০০রোম চঙনা শেমগৎলিবা – অসি মহারাস্ত্রগী দিস্ত্রিক্ত ১০ অমদি মমিং লৈরবা ময়োল্লমগী মফম অম্রাবতী, ঔরঙ্গবাদ অমসুং নাসিক ফাওনা চত্তুনা, ভারতকী খ্বায়দগী শাংবা এক্সপ্রেৱেশিংগী মরক্তা অমা ওইরি। এক্সপ্রেসৱে অসিনা অতোপ্পা থংনবা দিস্ত্রিক্ত ১৪গী কন্নেক্তিভিতীগী ফীভম ফগৎহনবদসু মতেং ওইদুনা, বিদর্ভা, মরাথ্বারা অমদি অৱাং মহারাস্ত্র রীজন য়াওনা স্তেত অসিগী দিস্ত্রিক্ত ২৪রোমদা চাওখৎপা পুরকপদা মতেংসু ওইগনি।
পি.এম. গতি শক্তিগী মখাদা ইনফ্রাস্ত্রকচর কন্নেক্তিভিতী প্রোজেক্তশিং পুন্না থৌরাং য়াৎমিন্নবা অমদি খুৎশম্ননা পায়খৎমিন্নবা হায়রিবা প্রধান মন্ত্রীগী মীৎয়েঙ অসিগী পরিংদা, সম্রুদ্ধি মহামার্গ অসিনা দিল্লী মুম্বাই এক্সপ্রেসৱে, জৱাহরলাল নেহরু পোর্ত ত্রস্ত অমদি অজন্তা এল্লোরা কেব্স, সির্দি, ভেরুল, লোনারনচিংবা লমকোয় মফমশিং শম্নহনগনি। সম্রুদ্ধি মহামার্গনা মহারাস্ত্রগী শেন্মিৎলোন চাওখৎহনবদা অচৌবা ইনোৎ হাপ্পদা চাউনা মতেং পীগনি।
এইমস নাগপুর
লৈবাক শিনবা থুংনা হকশেলগী ইনফ্রাস্ত্রকচর মপাঙ্গল কনখৎহন্নবা প্রধান মন্ত্রীগী খোঙফমবু এইমস নাগপুর লৈবাক মীয়ামদা কত্থোকপনা হেন্না চেৎশিনহল্লগনি। জুলাই ২০১৭দা প্রধান মন্ত্রীনা উরেপ উয়ুংসু তমখিবা লায়েংশঙ অসি সেন্ত্রে সেক্তর স্কীম প্রধান মন্ত্রী স্বাস্থ্য সুরক্সা য়োজনাগী মখাদা লিংখৎখিবনি।
লুপা করোর ১৫৭৫ হেন্না চঙনা শেমগৎলিবা এইমস নাগপুর ও.পি.দি., আই.পি.দি., দাইগ্নোস্তিক সর্ভিস, ওপরেসন থিএতর অমদি মেদিকেল সাইন্সকী অচৌবা স্পিসিএল্তী অমদি সুপরস্পিসিএল্তী পুম্নমক কোনশিল্লবা দিপার্তমেন্ত ৩৮ লৈদুনা স্তেত-ওফ-দি-আর্ত ফেসিলিতীশিং লৈবা লায়েংশঙ অমনি। লায়েংশঙ অসিনা মহারাস্ত্রগী বিদর্ভা রীজন্দা মতমগা চুনরবা হকশেলগী ফেসিলিতীশিং ফংহল্লি অমদি অকোয়বদা লৈরিবা গারজিরোলী, গোন্দিয়া অমদি মেলঘাৎকী ত্রাইবেলশিংগীদমক্তা থৌজালগী মশক অমা ওইরি।
নেস্নেল ইনস্তিত্যুৎ ওফ ৱন হেল্থ, নাগপুর
প্রধান মন্ত্রীনা নেস্নেল ইন্সতিত্যুৎ ওফ ৱন হেল্থ (এন.আই.ও.), নাগপুর উরেপ উয়ুং তমখিবা অসি ‘ৱন হেল্থ’ পরিংদা লৈবাকসিদা কেপাসিতী অমদি ইনফ্রাস্ত্রকচর ফগৎহন্নবগী মায়কৈদা থাংজিনবা খোঙথাঙ অমনি।
‘ৱন হেল্থ’ পরিংনা মীওইবগী হকশেল অসি শা-ঙা অমদি অকোয়বগী ফীভমগী হকশেলগা মরী লৈনৈ হায়না শকখঙলি। পরিং অসিনা মীওইবদা নারিবা লৌনগনবা লায়না অয়াম্বা জুনোতিক (শাদগী মীওইবদা) শন্দোরকপা ওইগনি হায়বা ৱাফম থম্লি। লুপা করোর ১১০ হেন্না চঙনা লিংখৎকদৌরিবা ইনস্তিত্যুৎ অসিনা স্তেকহোল্দরশিংগা খুৎশম্নদুনা অমদি তেংবাংনদুনা চৎমিন্নগনি অমদি লৈবাক শিনবা থুংনা ‘ৱন হেল্থ’ পরিংদা থিজিন হুমজিনবা অমদি কেপাসিতী শেমগৎপদা মরুওইবা থৌদাং লৌগনি।
অতৈ প্রোজেক্তশিং
প্রধান মন্ত্রীনা নাগপুরদা নাগ তুরেলগী পোলুসন হন্থহন্নবগী প্রোজেক্ত উরেপ উয়ুং তমখি। নেস্নেল রিভর কঞ্জার্বেসন প্লান (এন.আর.সি.পি.)গী মখাদা পায়খৎকদৌরিবা প্রোজেক্ত অসি লুপা করোর ১৯২৫ হেন্না থাদদুনা মথৌ তৌহনগদবনি।
বিদর্ভা রীজন্দা, মরুওইনা ত্রাইবেল মীয়ামগী মরক্তা সিকল সেলগী লায়না নাবগী চাং য়াম্না ৱাংই। থলাসেমিয়া অমদি ঐচ.বি.ই.গুম্বা অতৈ হিমোগ্লোবিনোপেথীশিংগা লোয়ননা লায়না অসিনা লৈবাকসিদা লায়নাগী পোৎলুম মশক থোক্না পুহল্লি। ৱাফম অসিগী ৱাখৈ পুরক্নবগীদমক, প্রধান মন্ত্রীনা ফেব্রুৱারী ২০১৯দা ‘সেন্তর ফোর রিছর্চ, মেনেজমেন্ত এন্দ কন্ত্রোল ওফ হিমোগ্লোবিনোপেথিজ, চন্দ্রপুর’গী উরেপ উয়ুং তমখিবনি। প্রধান মন্ত্রীনা, লৈবাকসিদা হিমোগ্লোবিনোপেথীগী লমদা ইনোবেতিব রিছর্চ, তেক্নোলোজী শেমগৎনবা, হ্যুমেন রিসোর্স শেমগৎনবগী সেন্তর ওফ এক্সেলেন্স অমা ওইরক্নবগী মীৎয়েঙ থম্লিবা, সেন্তর অসি লৈবাক্কী মফমদা কত্থোকখি।
প্রধান মন্ত্রীনা সেন্ত্রেল ইনস্তিত্যুৎ ওফ পেত্রোকেমিকেল্স ইঞ্জিনিয়রিং এন্দ তেক্নোলোজী (সিপেত) চন্দ্রপুর লৈবাক্কী মফমদা কত্থোককি। ইনস্তিত্যুৎ অসিনা পোলিমর অমদি এলাইদ ইন্দস্ত্রীশিংগী মথৌ তাবা ফংহন্নবগীদমক হৈ-শিংলবা হ্যুমেন রিসোর্সশিং শেমগৎনবা পান্দম থম্লি।
*****
(Release ID: 1882503)
Visitor Counter : 148
Read this release in:
English
,
Urdu
,
Marathi
,
Hindi
,
Bengali
,
Assamese
,
Punjabi
,
Gujarati
,
Odia
,
Tamil
,
Telugu
,
Kannada
,
Kannada
,
Malayalam