প্রধানমন্ত্রীগী লোইশঙ
প্রধান মন্ত্রী নবেম্বর ১৯দা অরুনাচল প্রদেস অমসুং উত্তর প্রদেসতা চৎকনি
অৱাং-নোংপোক্তা চৎথোক-চৎশিন ফগৎহন্নবা মরুওইবা খোঙথাং অমদা, প্রধান মন্ত্রীনা অরুনাচল প্রদেসকী অহানবা গ্রিনফিল্দ এয়রপোর্ত-‘দোনয়ি পোলো এয়পোর্ত, ইতানগর’ শঙ্গাগনি
এয়রপোর্তকী মমিং অসি অরুনাচল প্রদেসতা থায়না মমাঙঙৈগী নুমিৎ(দোনয়ি) অমসুং থা(পোলো) ইকায়খুম্নবা উৎপগী চৎনবীগী মমি অদু তারি
লুপা কোতি ৬৪০ চংনা শেমগৎপা এয়রপোর্ত অসিনা লমদম অসিগী চৎথোক-চৎশিন ফগৎহনগনি অমসুং ললোন-ইতিক অমসুং তুরিজম চাউখৎনবগী কেতেলাইস্ত অমা ওইনা থবক তৌগনি
প্রধান মন্ত্রীনা লুপা কোতি ৮৪৫০ চংনা শাবখিবা মেগাৱাত ৬০০গী কামেং হায়দ্রো পৱার স্তেসন লৈবাক মীয়ামদা কৎথোক্কনি
প্রোজেক অসিনা অরুনাচল প্রদেস মৈ মরাংকাইনা পুথোকপা রাজ্য অমা ওইহল্লগনি
প্রধান মন্ত্রীনা বনারসীদা থা অমা চুপ্না পাংথোক্কদবা থৌরম ‘কাসি তামিল শঙ্গমাম’ হৌদোক্কনি
থৌরম অসিদা ‘এক ভারত শ্রেস্থা ভারত’কী ৱাখল্লোনগী মমি তারি
থৌরম অসিনা চহি কয়া কুইরবা তামিল নাদু অমসুং কাসিগী মরক্তা লৈনবা মরী হরাও-তয়াম্বা ফোঙদোক্নবা, হেন্না চৎশিনহন্নবা অমসুং অমুক হন্না মশক তাক্নবা পান্দম থম্লি
Posted On:
17 NOV 2022 3:30PM by PIB Imphal
প্রধান মন্ত্রী শ্রী নরেন্দ্র মোদী লাক্লিবা নবেম্বর ১৯, ২০২২দা অরুনাচল প্রদেস অমসুং উত্তর প্রদেসতা চৎকনি। প্রধান মন্ত্রীনা অয়ুক্কী পুং ৯:৩০ রোম তাবদা ইতানগরদা দোনয়ি পোলো এয়রপোর্ত শঙ্গাগনি অমসুং মেগাৱাত ৬০০গী কামেং হায়দ্রো পৱার স্তেসন লৈবাক মীয়ামদা কৎথোক্কনি। তুংদা মহাক্না উত্তর প্রদেসকী বরানাসীদা চৎকনি অমসুং নুংথিলগী পুং ২ রোম তাবদা মতমদা মহাক্না ‘কাসি তামিল শঙ্গমাম’ হৌদোক্কনি।
অরুনাচল প্রদেসতা প্রধান মন্ত্রী
অৱাং-নোংপোক্তা চৎথোক-চৎশিন ফগৎহন্নবা মরুওইবা খোঙথাং অমদা, প্রধান মন্ত্রীনা অরুনাচল প্রদেসকী অহানবা গ্রিনফিল্দ এয়রপোর্ত-‘দোনয়ি পোলো এয়পোর্ত, ইতানগর’ শঙ্গাগনি। এয়রপোর্ত অসিগী মমিং অসিদা অরুনাচল প্রদেসকী ইনাকখুল্লবা চৎনবীশিং অমসুং কলচরগী মমি তারি অমসুং মসিদা থায়না মমাঙঙৈগী নুমিৎ(দোনয়ি) অমসুং থা(পোলো) ইকায়খুম্নবা উৎপগী চৎনবীগী মমি অদু তারি।
অরুনাচল প্রদেসকী অহানবা গ্রিনফিল্দ এয়রপোর্ত ওইরিবা এয়রপোর্ত অসি লম একর ৬৯০ হেনবদা লুপা কোতি ৬৪০ হেন্না চংনা শেমগৎপনি। মিতর ২৩০০ শাংবা রেনৱে লৈবা এয়রপোর্ত অসি মখল খুদিংমক্কী নোং-চিংগী ফিবমদা শীজিন্নবা য়াগনি। মতমগী অনৌবা বিল্দিং অমা ওইরিবা এয়রপোর্ত তর্মিনেল অসিদা ইনর্জি লিক্না শীজিন্নবা, রিনিউএবল ইনর্জি অমসুং রিসাইক্লিংগী খুদোংচাবশিং য়াওরি।
ইতানগরদা অনৌবা এয়রপোর্ত অমা শেমগৎপা অসিনা লমদম অসিদা চৎথোক-চৎশিন ফগৎহনবা খক নত্তনা, মসিনা ললোন-ইতিক অমসুং তুরিজম চাউখৎনবগী কেতেলাইস্ত অমা ওইনা থবক তৌদুনা লমদম অসিগী শেন-থুমগী ফিবম ফগৎহনবা ঙম্লগনি।
থৌরম অদুদা প্রধান মন্ত্রীনা মেগাৱাত ৬০০গী কামেং হায়দ্রো পৱার স্তেসন লৈবাক মীয়ামদা কৎথোক্কনি। লুপা কোতি ৮৪৫০ হেন্না চংনা শাখিবা অমসুং অরুনাচল প্রদেসকী ৱেস্ত কামেং জিলাদা কিলোমিতর ৮০ হেন্না পাক-চাউনা লৈরিবা প্রোজেক অসিনা অরুনাচল প্রদেস মৈ লেম-পানা পুথোকপা রাজ্য অমা ওইহল্লগনি অমসুং নেসনেল গ্রিদতা কান্নবা পীরগনি। মসিগী প্রোজেক অসিনা লৈবাক অসিদা মৈখু চেন্দবা ইনর্জি শীজিন্নবগী পান্দম অদু ফংনবা হোৎনবদা চাউনা মতেং পাংলগনি।
বরানসীদা প্রধান মন্ত্রী
প্রধান মন্ত্রীগী পান্দমনা লমজিংদুনা, ‘এক ভারত শ্রেস্থা ভারত’কী ৱাখল্লোন য়োকখৎপা অসি সরকারগী মরুওইবা থবকশিংগী মনুংদা অমনি। মসিগী পান্দম অসি মমি তাবা থবক অমা ওইনা, প্রধান মন্ত্রীনা নবেম্বর ১৯দা বনারসীদা থা অমা চুপ্না পাংথোক্কদবা থৌরম ‘কাসি তামিল শঙ্গমাম’ হৌদোক্কনি।
থৌরম অসিগী মরুওইবা পান্দমদি, লৈবাক অসিগী খ্বাইদগী মরুওইবা অমসুং লীরবা লাইরিক-লাইশু তমফম অনি- তামিল নাদু অমসুং কাসিগী মরক্তা লৈনবা মরী হরাও-তয়াম্বা ফোঙদোক্নবা, হেন্না চৎশিনহন্নবা অমসুং অমুক হন্না মশক তাক্নবা পান্দম থম্লি। রাজ্য অনি অসিগী অখঙ-অহৈশিং, মহৈরোয়শিং, ফিলোসোফরশিং, ললোনবশিং, খুৎহৈবশিং, কলাকারশিং য়াওনা শীনফম খুদিংমক্কী মীওইশিং পুন্নবা, লৌশিং পীথোক-পীশিন তৌন্নবা, কলচর অমসুং খ্বাইদগী ফবা থবকশিং অমনা অমদগী তম্নবগী খুদোংচাবা অমা পীনবা থৌরম অসিনা পান্দম থম্লি।
তামিল নাদুদগী দেলিগেদ ২৫০০ হেন্না কাসিদা চৎলবা য়ারি। মখোয়না সেমিনারশিং শরুক য়াগনি, মফম কয়াদা চৎতুনা শীনফম মান্নবা মফম অদুগী মীওইশিংগা উনগনি। রাজ্য অনিগী ইয়োং, হেন্দিক্রাফ, ৱান দিস্ত্রিক ৱান প্রদক, লাইরিকশিং, দোকুমেন্তরিশিং, মথেল-লুকোইশিং, পুৱারি, লমকোয়ফমশিং একজিবিসন অমা থা অমা চুপ্না কাসিদা পাংথোক্কনি।
থৌরম অসি এন.ই.পি ২০২০গা ইরোইন্না চৎমিন্নদুনা ভারতকী লৌশিংগী পুক্কৈ অসি অনৌবা মতমগী লৌশিংগা পুনশিন্নবা মীৎয়েং থম্লি। থৌরম অসি আই.আই.তি মদ্রাস অমসুং বি.ঐ.য়ুনা শীন্দুনা পাংথোক্কদবনি।
****
(Release ID: 1876810)
Visitor Counter : 130
Read this release in:
Assamese
,
English
,
Urdu
,
Marathi
,
Hindi
,
Bengali
,
Punjabi
,
Gujarati
,
Odia
,
Tamil
,
Telugu
,
Kannada
,
Malayalam