তেক ৱর্ল্দগী লুচিংবশিং, ইন্তর্নেস্নেল দেলিগেৎশিং অমসুং মরুপশিং,

এল্লারিগু নমস্কারা, ভারত্তা তরাম্না ওকচরি! নম্ম কন্নদা নাদিগে স্বাগতা, নম্ম বেঙ্গলুরিগে স্বাগতা,

ঐহাক্না অমুক হন্না বেঙ্গলুরু তেক সম্মিৎতা ৱা ঙাংবা ফংজবদা নুংঙাইবা পোকই। নখোয় পুম্নমক কর্নাতকাগী পুকচেল চাউবা মীয়াম অমসুং মখল কয়াগী নাৎ অসি শোইদনা পাম্লমগনি হায়না ঐহাক্না থাজৈ।

মরুপশিং,

বেঙ্গুলরু অসি তেক্নোলোজী অমসুং লৌশিং লৈবা লুচিংবগী মতৌ চেল্লিবশিংগী ময়ুমনি। মসি ইনক্লুসিব সিতী অমনি। মসি ইনোভেতিব সিতী অমসুনি। চহি কয়াদগী বেঙ্গলুরু অসি ভারতকী ইনোভেসন ইন্দেক্সতা মকোক্তা লৈদুনা লাকখি।

মরুপশিং,

ভারতকী তেক্নোলোজী অমসুং ইনোভেসন্না মালেমবু শুমহৎতুনা লাকখি। অদুবু তুংলমচৎনা ঐখোয়গী হৌজিক অসিদগী হেন্না চাউগনি। মরমদি ভারত্তা : ইনোভেতিব ওইবা নহারোল লৈ অমসুং তেক এক্সেস হেনগৎলক্লি।

মরুপশিং,

ভারতকী নহারোলগী শক্তি অসি মালেম শিনবা থুংবদা খঙনরি। মখোয়না তেক গ্লোবেলাইজেসন অমসুং তেলেন্ত গ্লোবেলাইজেসন লাকহনখি। হেল্থ কিয়র, মেনেজমেন্ত, ফাইনান্স – দোমেন কয়াদা নহা ওইরিবা ভারত মচাশিংনা লমজিংবা অদোম্না থেংনগনি। মালেমগী য়াইফনবা ঐখোয়গী তেলেন্ত শীজিন্নরি। ভারত্তসু মখোয়গী শাফু অসি উবা ফংলি। ভারতনা চহি অসিদা গ্লোবেল ইনোভেসন ইন্দেক্সতা ৪০শুবা রেঙ্কতা হাইগৎলকপা ঙমখি। ২০১৫দা ঐখোয়না রেঙ্ক ৮১দা লৈরমখি। য়ুনিকোর্ন স্তার্ত-অপশিংগী মশীং অসি ২০২১দগী শরুক অনি হেনগৎলকখি! হৌজিক ঐখোয়না মালেমগী খ্বাইদগী চাউবা স্তার্তঅপ হবকী ৩শুবা ওইরি। ঐখোয়না শকখঙলবা স্তার্তঅপ ৮১,০০০ হেন্না লৈ। ভারত্তা আর এন্দ দি সেন্তরশিং লৈবা ইন্তর্নেস্নেল কম্পনী কয়া লৈ। মসি ভারতকী তেলেন্ত পুলনা মরম ওইদুনা ওইথোকপনি।

মরুপশিং,

তেক শীজিন্নবগী চাং হেনগৎলক্লিবা অসিনা ভারতকী নহারোলদা শক্তি পীরি। লৈবাক অসিদা মোবাইল অমসুং দেতাগী রিভোল্যুসন লাক্লি। হৌখিবা চহি ৮দা ব্রোদবেন্দ কন্নেক্সন মশিংনা মিলিয়ন ৬০দগী মিলিয়ন ৮১০দা হেনগৎখি। স্মার্তফোন শীজিন্নবশিংগী মশিংনা মিলিয়ন ১৫০দগী মিলিয়ন ৭৫০ য়ৌখি। ইন্তর্নেতকী শাহৌনা শহরগী মফমদগী খুঙ্গংশিংদা হেন্না খোঙজেল য়াঙখি। অনৌবা দেমোগ্রাফিক অমনা ইনফোর্মেসন সুপর-হাইৱেগা শম্নহল্লি।

মরুপশিং,

মতম শাংনা তেক্নোলোজী অসি এক্সক্লুসিব দোমেন অমা ওইনা উদুনা লাকখি। মসি অৱাংবা থাক অমসুং শক্তি লৈবশিংগী খক্তনা হায়না হায়নরমখি। অদুবু তেক্নোলোজী করম্না দিমোক্রেতাইজ তৌগনি উৎখি। ভারতনা তেক্তা হ্যুমেন তচকা করম্না পীগনি উৎখি। ভারত্তা তেক্নোলোজীনা মান্নবা মিৎয়েং য়েংবা অমসুং পাঙ্গল হাপ্নবা শাফু ওইরি।  মালেমগী খ্বাইদগী চাউবা হেল্থ ইন্সুরেন্স স্কিম আয়ুশ্মান ভারতনা ইমুং মিলিয়ন ২০০দা, হায়বদি অপুনবা মীওই মিলিয়ন ৬০০কী মফমদা সেফতী নেত পীরি। প্রোগ্রাম অসি তেক প্লেৎফোর্ম অমদা বেজ তৌদুনা চত্থবনি। ভারতনা মালেমগী খ্বাইদগী চাউবা তিকা থাবগী খোঙথাং, কোবিদ ভেক্সিনেসন দ্রাইব চত্থখি। মসি কোৱিন কৌবা তেক-বেজ প্লেৎফোর্ম অমগী খুত্থাংদা চত্থখি। ঐখোয়না হেল্থ সেক্তরদগী এজুকেসন সেক্তরদা চংশিল্লসি।

ভারত্তা ওপন কোর্সশিংগী খ্বাইদগী চাউবা ওনলাইন রিপোজিতরী লৈ। তোঙান-তোঙানবা সবজেক্তশিংদা কোর্স লিশিং কয়া ফংলি। মাইপাক্না সর্তিফিকেসন মিলিয়ন ১০ হেন্না তৌখ্রে। পুম্নমক অসি ওনলাইন্দা লেম্না তৌখি। ঐখোয়গী দেতা তরিফশিং অসি মালেমগী খ্বাইদগী নেম্বশিংগী মরক্তা অমনি। কোবিদ-১৯ মনুংদা দেতাগী মমল নেম্বনা লায়রবা মহৈরোয়শিংনা ওনলাইন ক্লাসশিং য়াওবদা মতেং পাংখি। মসি য়াওদনা মমাংগী চহি অনি অসি মখোয়না মাংলমগনি।

মরুপশিং,

ভারতনা তেক্নোলোজীবু লায়রবগী মায়োক্তা লান শোক্নবদা খুৎলাই ওইনা শিজিন্নরি। স্বামিত্ব স্কিমগী মখাদা দ্রোন শিজিন্নদুনা খুঙ্গংগী মফমশিংদা লম মেপ্পিং তৌখি।  মীয়ামদা প্রোপর্তী কার্দশিং পীখি। মসিনা লমগী চয়েৎনবা হন্থহনখি। মসিনা লায়রবশিংদা ফাইনান্সিএল সর্ভিসশিং অমসুং ক্রেদিৎ ফংহনবদা মতেং পাংখি। কোবিদ-১৯ মনুংদা লৈবাক কয়ানা সমস্যা অমা মায়োক্নখি। মখোয়না মীয়াম্না মতেং মথৌ তারে খঙখি। বেনিফিৎ ত্রান্সফরনা মখোয়বু মতেং পাংগনি হায়বা মখোয়না খঙখি। অদুবু মীয়ামদা কান্নবা য়ৌহন্নবগী ইনফ্রাস্ত্রকচর লৈখিদে। অদুবু ভারতনা করম্না তেক্নোলোজীনা অফবা থবক তৌনবগী শাফু ওইবগে উৎখি। ঐখোয়গী জন ধন আধার মোবাইল (জে.এ.এম.) ত্রিনিতীনা দাইরেক্ত বিনিফিৎ ত্রান্সফরগী শক্তি ঐখোয়দা পীখি লাইরবশিংদা তেংবাংবা থৌওংনি হায়না মহাক্না খুদম ওইনা পনখি। স্বামিত্ব স্কিম্না প্রোপর্তী রেকোর্দশিংগী অশেংবা অচুম অরান খঙহল্লি অমসুং লাইরবশিংদা ক্রেদিতকী খুদোংচাবসু পীরি। ওথেন্তিকেদ অমসুং ভেরিফাইদ তৌরবা বেনিফিসরীশিংদা হকথেংননা কান্নবা য়ৌহনখি। লায়রবশিংগী বেঙ্ক একাউন্তশিংদা লুপা করোর কয়া চংখি। কোবিদ-১৯ মনুংদা মীওই খুদিংমক্না অপীকপা ললোন-ইতিকশিংগী মতাংদা ৱানখি। ঐখোয়না খোঙথাং অমা মাংজৌননা থংদুনা মখোয়দা মতেং পীখি। ঐখোয়না স্ত্রীৎ ভেন্দরশিংদা ললোন-ইতিক অমুক হন্না হৌনবগী ৱার্কিং কেপিতেল পীদুনা মতেং পাংখি। দিজিতেল পেমেন্তশিং তৌবা হৌবশিংনা ইনসেন্তিবশিং ফংখি। মসিনা দিজিতেল ত্রাঞ্জেক্সনশিংবু মখোয়গী পুন্সিগী শরুক অমা ওইহনখি।  

মরুপশিং,

সরকারনা চলায়বা মায় পাক্লবা ই-কম্মর্স প্লেতফোর্মগী মতমদা অদোম তারব্রা? মসি ভারত্তা ওইথোকখি। ঐখোয়গী জি.ই.এম. কৌবা সরকারগী ই-মার্কেৎপ্লেস অমা লৈ। মসি অপীকপা ললোন-ইতিক তৌবা অমসুং বিজিনেসশিংনা সরকারগী মথৌ তাবশিং থুংহল্লিবা প্লেৎফোর্ম অমনি। তেক্নোলোজী কারবার পীক্না তৌজবশিংদা অচৌবা কস্তমর ফংহনবদা তেংবাংলি। মসিদা নত্তনা, শেঞ্জা থুমজা তৌবগী থৌওংবুসু মসিনা হন্থহল্লি। মান্নবা মতৌ ওইনা, তেক্নোলোজীনা ওনলাইন্দা তেন্দর লাওবদসু তেংবাংলি। মসিনা প্রোজেক্ত কয়াগী খোঙজেল হেনগৎহনবগা লোয়ননা নুং-পান ফাওনা উবসু হেনগৎহল্লি। মখোয়না মমাংগী চহিদা লুপা ত্রিলিয়ন অমগী শেনফমগী প্রোক্যুরমেন্ত তৌখ্রে।

মরুপশিং,

ইন্নোভেসন তৌবসি য়াম্না মরু ওই। অদুগা মসিদা ইন্তিগ্রেসন্না তেংবাংবা মতমদা মসিনা শাফু অমা ওইরকই। সাইলোশিং লৌথোক্নবা, সিনর্জী লৈহন্নবা অমসুং সর্ভিস শোইদনা পীনবা তেক্নোলোজী শিজিন্নরি। শেয়র তৌবা প্লেতফোর্মশিংদা সাইলো অমত্তা লৈতে। খুদম ওইনা, পি.এম. গতিশক্তী নেস্নেল মাস্তর প্লান অসিনি। ভারতনা মথংগী চহি খরসিদা ইনফ্রাস্ত্রকচরদা লুপা ত্রিলিয়ন ১০০ থাদগনি। ইনফ্রা প্রোজেক্ত অমা হেক্তদা স্তেকহোল্দরশিংগী মশিং অসি য়াম্না চাউই। চৎনবী ওইনা ভারত্তা অচৌবা প্রোজেক্তশিং অসি অয়াম্বনা থিন্থদুনা লৈগল্লি। চাদিং হেন্না তৌবা অমসুং অপীবা মতমদগী হেন্দোকপা হায়বা অসি মহৌশানি। অদুবু হৌজিক্তি গতিশক্তীগী শেয়র প্লেতফোর্ম অসিনা মরম ওইরগা, কেন্দ্র, রাজ্য সরকার, জিলাগী লৈঙাক্লোই অমসুং তোঙানবা বিভাগশিংনা পাউ ফাওনদুনা থবক থৌরম শীন্দোকপা য়ারে। অমগা অমগা করি তৌরি খঙনরে। প্রোজেক্ত, লম শিজিন্নবা অমসুং ইন্সতিত্যুসনশিংগা মরী লৈনবা ই-পাউ কয়া মফম অমখক্তদা ফংলে। অদুনা, স্তেকহোলদরশিংনসু মান্নবা দেতাদুমক উরে। মসিনা পাউ ফাওনহনবদা তেংবাংই অমসুং খুদোংচাদবা অমা লাক্ত্রিঙৈদা মদুগী ৱারোইশিন পুথোকপা ঙমহল্লে। মসিনা এপ্রুবেল অমসুং ক্লিয়ারেন্সশিংসু য়াম্না থুনা পাংথোকহল্লে।

মরুপশিং,

ভারত অসি সরকারগী কা হেনবা কাঙলোন লৈবা মফম অমা ওইনা খঙনদ্রে, মদুগী মহুত্তা ইনভেস্তরশিংগী রেদ কার্পেতকীদমক্তা খঙনরে। এফ.দি.আই. রিফোর্ম ওইরো, নত্ত্রগা দ্রোন শিজিন্নবগী কাঙলোন্দা কোমথোকপা ওইরো, সেমি-কন্দক্তর সেক্তরদা খোঙথাং কয়া পায়খৎপা, তোঙানবা সেক্তরশিংদা প্রদক্সন ইন্সেন্তিব স্কিম লৈহনবা, নত্ত্রগা কারবার তৌবদা হেন্না নুংঙাইহনবা ওইরো,

মরুপশিং,

ভারতনা অফবা থৌওং কয়া অমা অমত্তা ওইনা পুন্সিল্লক্লি। অদোমগী ইনভেস্তমেন্ত অমসুং ঐখোয়গী ইন্নোভেসন্না মশক থোকপা থবক পাংথোকপা ঙমগনি। অদোমগী থাজবা অমসুং ঐখোয়গী তেক তেলেন্তনা থবক কয়া ওইথোকহনবা ঙমগনি। ঐখোয়না মালেমগী শিংনবা কয়াগী ৱারোইশিন পুরক্নবা লুচিংবগী থৌদাং লৌরিবা অসিদা ঐহাক্না অদোম্বু ঐখোয়গা থবক তৌমিন্নসি হায়বা পাউজেল পীজরি। বেঙ্গলোর তেক সম্মিৎদা খন্ন-নৈনরিবশিং অসি কান্নবা অমসুং মহৈ য়ানবা ওইগনি হায়না ঐহাক্না থাজৈ। ময়ামদা য়াইফ-মঙ্গোল পীজরি।

***