প্রধানমন্ত্রীগী লোইশঙ
পি.এম.না গুজরাত্তা ভিদিও কন্ফরেন্সিংগী খুত্থাঙদা পি.এম.জে.এ.ৱাই.-এম.এ. য়োজনা অয়ুস্মান কার্দ য়েন্থোকপা হৌদোকখ্রে
“মালেমগী লৈবাক কয়াদা হেল্থ ইন্স্যুরেন্সকী মরমদা ঙাঙনরি অদুবু ভারতনা মদুগী ৱাংমদা চত্তুনা হেল্থ এস্যুরেন্স ফংহল্লি”
“ঙসি ঐখোয়গী স্কীমশিংনা মীচম মীয়ামগী মথৌ তাবশিং হকথেংননা ফংহল্লি”
“লৈবাক মীয়াম মপাঙ্গল কল্লবা মতমদা, লৈবাকসু মপাঙ্গল কল্লকই”
“অয়ুস্মান কার্দ অমা হায়বসি লুপা লাখ ৫গী এ.তি.এম.নি। মসি চহি খুদিংগী লেম্না লায়েংবগী কান্নবা পীগদবা এ.তি.এম. কার্দ অমনি”
“চহি ৩০-৪০গী মতমদা, লুপা করোর ১.৫-২গী ওইগদবা লায়েংবগী গরেন্তী পীরি”
Posted On:
17 OCT 2022 5:59PM by PIB Imphal
প্রধান মন্ত্রী, শ্রী নরেন্দ্র মোদীনা ঙসি ভিদিও কন্ফরেন্সিংগী খুত্থাঙদা গুজরাত্তা পি.এম.জে.এ.ৱাই.-এম.এ. য়োজনা অয়ুস্মান কার্দ য়েন্থোকপা হৌদোকখ্রে। প্রধান মন্ত্রীনা ভিদিও কন্ফরেন্সিংগী খুত্থাঙদা পি.এম.জে.এ.ৱাই.-এম.এ. য়োজনা অয়ুস্মান কার্দ বিনিফিসরীশিংগসু ৱারী ৱাতায় শানখি।
বনসকন্থগী তুৱারদগী শ্রী পিয়ুসভাইগা ৱারী শানবদা, প্রধান মন্ত্রীনা মহাক্কী ইমুং মনুং অমসুং মহাক্কী হকশেলগী ফীভমগী মরমদা হংখি। অয়ুস্মান ভারত স্কীম্না মহাক্কী মফমদা অনৌবা পুন্সি অমা পীরে খঙবদা প্রধান মন্ত্রীনা হরাওখি। লৈঙাক্না মহাক্কুম্বা খুদিংমকপু মতম পুম্নমক্তা য়েংশিনগনি হায়না প্রধান মন্ত্রীনা থাজবা পীখি।
প্রধান মন্ত্রীনা মাহিসাগরদগী শ্রী দামোর লালাভাই সোমাভাইগা ৱারী শানরদুনা, মহাক্কী কেন্সর লায়েং নীংথিনা চত্থখিবরা হায়না হংখি। শ্রী দামোরগী লায়েংবা অদু অয়ুস্মান ভারত স্কীম্না লায়েংখি অমদি মহাক্না লুপা অমা ফাওবা তিংখিদে তাবদা প্রধান মন্ত্রীনা নুংঙাইবা ফোঙদোকখি। মহাক্না শ্রী দামোরদা চুরুৎ থকপা তোক্নবা ৱাশক্নবা অমদি স্কীম অসিগী মরমদা মীয়ামদা খঙহন্নবা ৱাফমসু থমখি।
গান্ধীনগরগী দার্জীদগী শ্রীমতী রামিলাবেন্না প্রধান মন্ত্রীগী মফমদা, অয়ুস্মান কার্দ লৈরমদ্রবদি মহাক্না মহাক্কী লায়েংনবগীদমক লোন লৌরমগনি অমদি মহাক ওপরেসন তৌরমদবসু য়াই হায়না পাউদমখি। মমা ওইবীশিং অমসুং ইচল ইচেশিংনা স্কীম অসিগী কান্নবা লৌরি তাবদা প্রধান মন্ত্রীনা নুংঙাইবা ফোঙদোকখি।
তিল্লিবা মীয়ামগী মফমদা ৱা ঙাঙলদুনা, প্রধান মন্ত্রীনা ধন্তেরাস অমসুং দিৱালীগী মাঙওইননা মীয়ামগী হকশেলগী ওইবা অসিগুম্বা অচৌবা থৌরম অমা পাঙথোকপদা নুংঙাইবা ফোঙদোকখি। ধন্তেরাস লাকপগা লোয়ননা অয়ুর্বেদ হৌদোক্লম্বা লোর্দ ধনবন্তারীবু থৌরম অসিদা লাৎলিবা অসি তান চানবা অমনি হায়না মহাক্না ফোঙদোকখি। সাস্ত্রগী ৱাফম পল্লদুনা, প্রধান মন্ত্রীনা, “অরোগ্যম পরামম ভাগ্যম” থীখি অমদি মুখ্য মন্ত্রী ভুপেন্দ্র পতেলগী লুচিং মখাদা গুজরাৎকী মীওই লাখ কয়াদা আরোগ্য ধন পীননবা অসিগুম্বা অচৌবা থৌরম অমা পাঙথোকপদা নুংঙাইবা ফোঙদোকখি।
‘সর্বে সন্তু নিরামায়া’ হায়বদি পুম্নমকপু লায়না লাইথুং চেন্দবা ওইরসনু হায়বা ৱাখল্লোনগী মতাঙদা পল্লদুনা, অয়ুস্মান ভারতনা পুম্নমক্কী হকশেল ফহন্নবগী পান্দম থম্লি হায়না প্রধান মন্ত্রীনা ফোঙদোকখি। স্তেত অদুগী মীওইশিংদা কার্দ লাখ ৫০ য়েন্থোক্নবগী চাউরবা কেম্পেন অদুগীদমক প্রধান মন্ত্রীনা অপেনবা ফোঙদোকখি। থৌওং অসিদা গুজরাৎ লৈঙাক্কী মীয়ামগীদমক খঞ্জবা মতৌ উবা ফংলি। “মালেমগী লৈবাক কয়াদা হেল্থ ইন্স্যুরেন্সকী মতাঙদা ঐখোয়না তাদুনা লাক্লি অদুবু ভারতনা মদুগী ৱাংমদা চত্তুনা হেল্থ এস্যুরেন্স পীরি”, হায়না মহাক্না হায়খি।
প্রধান মন্ত্রীনা অহোংবা লাক্লবা রাজনিতীগী ৱাখল্লোন অমসুং থবক শুনিংবগী মচৎগী মরমদসু পনখি। মমাঙগী লৈঙাক্কী মতমদা, মীচম মীয়ামগী য়াইফনবা স্কীমশিং অসি মমিংতগী ওইনা লৈরম্মী। অদুগুম্বা স্কীমশিংগী শেনফমশিং অকক্নবা মফম খরা অমদি রাজনিতীগী কান্নবা য়েংলগা শীজিন্নরম্মী। “অসিগুম্বা ফীভম অসি হোংদোকপা মথৌ তারম্মী অমদি ঐখোয়না অহোংবা অসি পুরকপা হৌখি। ঙসিদি থৌরাং য়াৎপা মতমদা, ঐখোয়না মীচম মীয়ামগী ফীভমশিং অমদি মখোয়গী মথৌ তাবশিং হান্না নৈনৈ”, হায়না মহাক্না হায়খি। “ঐখোয়গী স্কীমশিংনা ঙসিদি মীচম মীয়ামগী মথৌ তাবশিং হকথেংননা ফংহল্লি”, হায়না প্রধান মন্ত্রীনা মখা তাখি।
“লৈবাকসিগী মীয়াম মপাঙ্গল কনহল্লবা মতমদা, লৈবাক অসিসু মপাঙ্গল কলক্কনি। মরম অসিননি ঐখোয়না মীচম মীয়ামবু, মরুওইনা লৈবাকসিগী নুপী ওইবীশিংবু মপাঙ্গল কলহনবদা অহেনবা মীৎয়েঙ থম্লিবা”, হায়না প্রধান মন্ত্রীনা ফোঙদোকখি। মহাক্না গাস কন্নেক্সন লেম্না পীবা, পক্কাগী য়ুম, তোইলেৎ, চেঙ-হৱাই লেম্না ফংহনবা, অমদি তোতি ঈশিংনচিংববু হায়রিবা থৌরাং অসিগী খুদম ওইনা পীখি। হৌজিক ফাওবদা স্কীম অসিগী মখাদা লৈবাক শিনবা থুংবদগী লায়রবা অনাবা মীওই করোর ৪গী ময়াদা অরোগ্যগী কান্নবা ফংহনখ্রে হায়না প্রধান মন্ত্রীনা পাউদমখি। মখোয়শিংগী মনুংদা, লায়রবা অনাবা মীওই লাখ ৫০রোমদি গুজরাত্তগীনি হায়না মহাক্না মখা তাখি। মহাক্কী লৈঙাক্কী ফিরেপ পল্লদুনা, লৈঙাক অসিনা হায়রিবা বিনিফিসরীশিং অসিগী লায়েংনবগীদমক লুপা করোর কয়া চাদিং তৌখ্রে হায়না প্রধান মন্ত্রীনা পাউদমখি। স্কীম অসিগী ৱাংমদা লায়েং চত্থরম্লবদি বিনিফিসরীশিংগী ফুরিৎখাউদগী শেল য়াম্না তিংলমগনি হায়বা ৱাফম থম্লদুনা, প্রধান মন্ত্রীনা অয়ুস্মান ভারতকী অপুনবা বিনিফিসরীশিংগী তঙ্খায়দি মহাক্কী ইমা অমসুং ইচে-ইচলশিংনা হায়না অপেনবা ফোঙদোকখি। অসিগুম্বা ইমা অমসুং ইচে-ইচলশিং অসিনা ইমুংগী খল্লগা মখোয়গী লায়নাশিং লোৎশিন্দুনা থম্নরম্মী অমদি অৱাবা খাঙলম্মী মরমদি লায়েংমল ৱাংবনা মরম ওইরগা মখোয়গী শেন্দোল ৱাংখৎলক্কদবগীদমক মখোয়না কিরম্মী হায়না শ্রী মোদীনা মখা তাখি। “অসিগুম্বা খুদোংচাদবশিং অসিদগীসু অয়ুস্মান ভারত য়োজনানা লায়রবা ইমা অমসুং ইচে-ইচলশিংবু মনীং তমহল্লে”, হায়না মহাক্না মখা তাখি। “চম্না ফোঙদোক্লবদা, অয়ুস্মান কার্দ অমা হায়বসি লুপা লাখ ৫গী এ.তি.এম. অমনি। মসি চহি খুদিংগী কান্নবা পীগদবা এ.তি.এম. কার্দ অমনি”, হায়না মহাক্না হায়খি। করিগুম্বা মীওই অমনা চহি ৩০-৪০ হিংলবদি, মতম অসিদা মখোয়না লুপা করোর ১.৫-২গী লায়েংবগী কান্নবা ফংগদৌরিবনি হায়না মহাক্না শন্দোক্না তাকখি। “য়ুস্মান কার্দনা অদোমগী অশেংবা মরূপ, খ্বাইদগী চাউনা অৱাবা কোকহনগদবা মরূপ ওইগদৌরিবনি”, হায়না মহাক্না মখা তাখি।
প্রধান মন্ত্রীনা মহাক্না মুখ্য মন্ত্রী ওইরিঙৈদা চিরঞ্জীবী, বালভোগ অমসুং খিলখিলাৎ স্কীমশিং হৌদোক্লম্মী হায়না নীংশিংখি। মুখ্যমন্ত্রী অমৃতম চহি কয়াগী মমাঙদা গুজরাত্তা হৌদোকখ্রে। পি.এম.জে.এ.ৱাই.-এম.এ. হৌদোকপনা গুজরাতকী মীওইশিংবু গুজরাৎকী ৱাংমদসু লেম্না লায়েংবগী খুদোংচাবা পীরগনি।
বেকগ্রাউন্দ
গুজরাৎকী মতম অমগী মুখ্য মন্ত্রী ওইনা, প্রধান মন্ত্রীনা লায়েংবা অমদি অনা অয়েক্কী চাউরবা শেনফমদগী লায়রবশিংবু ঙাকথোক্নবগীদমক ২০১২দা ‘মুখ্যমন্ত্রী অম্রুতম (এম.এ.ৱাই.)’ স্কীম হৌদোকখি। ইং ২০১৪দা ‘এম.এ.’ য়োজনা অসিনা চহিদা লুপা লাখ ৪ ফাওবগী শেন্থোক লৈবা ইমুংশিং কোনশিনখি। স্কীম অসি অতোপ্পা কাঙলুপশিংদসু মথং মথং শন্দোকখি অমদি তুংদা মুখ্যমন্ত্রী অম্রুতম বতসাল্য (এম.এ.ভি.) য়োজনা হায়না মমীং ওনখি।
স্কীম অসিগী মায় পাকপগী এক্সপরিএন্স লৌদুনা, প্রধান মন্ত্রীনা ইমুংগী মীশিং অমসুং চহি খায়দনা প্রাইমারী, সেকেন্দরী অমসুং তর্সরী কেয়র হোস্পিতালাইজেসনগীদমক ইমুং অমদা চহিদা লুপা লাখ ৫ ফাওবগী লায়েংমল পীবা মালেমগী খ্বাইদগী চাউবা হেল্থ ইন্স্যুরেন্স স্কীম অয়ুস্মান ভারত প্রধান মন্ত্রী জন অরোগ্য য়োজনা (এ.বি.-পি.এম.জে.এ.ৱাই.) ২০১৮দা হৌদোকখি। এ.বি.-পি.এম.জে.এ.ৱাই. হৌদোকখিবগা লোয়ননা গুজরাতনা ইং ২০১৯দা এম.এ./ এম.এ.ভি. য়োজনাবু এ.বি.-পি.এম.জে.এ.ৱাই.গা পুনশিন্নদুনা পি.এম.জে.এ.ৱাই.-এম.এ. য়োজনা হায়না মমিং ওনখি অমদি এম.এ./ এম.এ.ভি. অমসুং এ.বি.-পি.এম.জে.এ.ৱাই.গী মখাদা লৈরিবা বিনিফিসরীশিং কো-ব্রান্দেদ পি.এম.জে.এ.ৱাই.-এম.এ. কার্দ পায়বা য়াহনখি।
থৌরম অদুদা, প্রধান মন্ত্রীনা কার্দ য়েন্থোকপা হৌদোকখি, তুংদা কলরদা নমথোক্লবা অয়ুস্মান কার্দ লাখ ৫০ গুজরাৎ শিনবা থুংবদা লৈরিবা বিনিফিসরীশিংগী থোঙজিলদা নেস্নেল হেল্থ ওথোরিতীগী ইমপেনেল তৌরবা এজেন্সীশিংনা ই-কে.ৱাই.সি. তৌরবা মতুংদা য়েন্থোকখি।
*****
(Release ID: 1868638)
Visitor Counter : 154
Read this release in:
English
,
Urdu
,
Marathi
,
Hindi
,
Bengali
,
Assamese
,
Punjabi
,
Gujarati
,
Odia
,
Tamil
,
Telugu
,
Kannada
,
Malayalam