প্রধান মন্ত্রী, শ্রী নরেন্দ্র মোদীনা গান্ধীনগর অমসুং মুম্বাই মরক্তা চেনবা অনৌবা বন্দে ভারত এক্সপ্রেস গুজরাতকী গান্ধীনগর স্তেসন্দগী ঙসি লমথাখ্রে অমসুং মফমদুদগী কালুপুর রেলৱে স্তেসন ফাওবা তোংদুনা চৎখ্রে।

প্রধান মন্ত্রীনা গান্ধীনগর স্তেসন্দা য়ৌবা মতমদা মহাক্না গুজরাতকী মুখ্য মন্ত্রী, শ্রী ভুপেন্দ্র ভাই পতেল, রাজ্যপাল শ্রী অচার্য়া দেবব্রত, কেন্দ্রগী রেলৱে মন্ত্রী, শ্রী অশ্বিনি বৈশ্নব অমসুং কেন্দ্রগী হাউজিং অমসুং অর্বান এফিয়র্স মন্ত্রী, শ্রী হর্দীপ সিংহ পুরীনা লোয়নখি। প্রধান মন্ত্রীনা বন্দে ভারত এক্সপ্রেস ২.০গী ত্রেন কোচশিং য়েংশিনখি অমসুং মদুদা য়াওরিবা ফেসিলিতীশিংগী মতাংদা ভ্বাফম কয়া খঙদোকখি। শ্রী মোদীনা বন্দে ভারত এক্সপ্রেস ২.০গী লোকোমোতিব ইঞ্জিনগী কন্ত্রোল সেন্তরসু য়েংশিনখি।

প্রধান মন্ত্রীনা গান্ধীনগর অমসুং মুম্বাই মরক্তা চেনবা অনৌবা অমসুং অপগ্রেদ তৌরবা বন্দে ভারত এক্সপ্রেস লমথাখ্রে অমসুং মফমদুদগী কালুপুর রেলৱে স্তেসন ফাওবা তোংদুনা চৎখ্রে। প্রধান মন্ত্রীনা রেলৱে স্তাফকী ইমুং মনুংগী মীওই, নুপী ওন্তোপ্রিনর, রিসর্চ তৌবা মীওই অমসুং নহা কয়া য়াওনা মহাক্কা ত্রেন তোংমিন্নরিবশিংগা ৱারী শাখি। মহাক্না বন্দে ভারত এক্সপ্রেসপু মশক থোক্না মায় পাকহল্লিবা থৌমী, ইঞ্জিনিয়র অমসুং অতোপ্পা স্তাফশিংগসু ৱারী শাখি।

গান্ধীনগর অমসুং মুম্বাইগী মরক্তা চেল্লিবা বন্দে ভারত এক্সপ্রেস ২.০ অসি গেম চেঞ্জর অমা ওইগনি অমসুং ভারতকী ব্যুজিনেস হব অনিগী কন্নেক্তিবিতী হেন্না ফগৎহনগনি। প্লেন তোংবগী মান্নবা নুংঙাইবা ফংদুনা, প্লেন তিকেৎকী অৱাংবা মমল তিংদনা কারবার তৌবা মীওইশিংনা গুজরাত্তগী মুম্বাই অমসুং মুম্বাইদগী গুজরাত ফাওবা চৎপা য়াহল্লগনি। বন্দে ভারত এক্সপ্রেস ২.০না গান্ধীনগরদগী মুম্বাই ফাওবা চৎপগী ৱান ৱে ত্রাভেল তাইম অসি চাউরাক্না পুং মঙা মখায় ওইগনি।

বন্দে ভারত এক্সপ্রেস অসিনা অতৈদগী হেনবা অমসুং প্লেন তোংদুনা চৎপগী মতৌগা মান্নবা খুদোংচাবা কয়া পীগনি। মসিদা লমদম অসিদা শাজবা ত্রেন কোলিজন এভোইদেন্স সীস্তেম – কবচ য়াওনা তেক্ত-কায়হন্দবগী স্তেত ওফ দি আর্ত ফীচর কয়া য়াওরি।

বন্দে ভারত ২.০দা শুপ্নগী সেকেন্দ ৫২দা পুংদা কিলোমীতর ০দগী ১০০ ফাওবগী খোঙজেল য়ৌবা অমসুং খ্বাইদগী য়াঙবা ওইনা পুংদা কিলোমীতর ১৮০ ফাওবগী খোঙজেল য়ৌবা ঙম্বগুম্বা হেন্না এদভান্স ওইবা অমসুং ফগৎলবা মতৌ য়াওরি। হেন্না ফগৎলবা বন্দে ভারত এক্সপ্রেসকা তোন ৪৩০ লুম্বা হান্নগী ভর্জনগা চাংদম্নবদা শুপ্নগী তোন ৩৯২ খক লুম্মি। ত্রেন অসিদা অপাম্বগী মখা পোন্না পীবা ৱাই-ফাই কন্তেন্ত য়াওগনি। হান্নগীগা চাংদম্নবদা, কোচ খুদিংদা হান্না পীরম্বা ইঞ্চী ২৪”গী মহুত্তা হন্দক্কী অসিদা ইঞ্চী ৩২”গী স্ক্রীনশিং য়াওরি অমসুং মসিনা পেসেঞ্জরশিংগী মফমদা ই-পাউ অমসুং ইন্তর্তেনমেন্ত পীরি। মসিদা য়াওরিবা এ.সি.না ইনর্জী ইফিসিএন্ত ওইবগী চাং ১৫% হেন্দুনা বন্দে ভারত এক্সপ্রেসনা ইনভাইরনমেন্ত ফ্রেনলী ওইগনি। ত্রেক্সন মোতোরগী দস্ত ফ্রী এয়র কুলিংগী খুদোংচাবা লৈদুনা মসিদা তোংদুনা চৎপসি য়াম্না নুংঙাইবা এক্সপেরিএন্স ওইগনি। ত্রেন অসিগী ক্লাস খুদিংদা রিক্লাইনিং সীত য়াওরি অমসুং একজেক্যুতিব ক্লাস্তনা দিগ্রী ১৮০ লৈবা য়াবগী অনৌবা খুদোংচাবা য়াওরি।

অনৌবা বন্দে ভারত এক্সপ্রেস অসিদা ফোতো কেতালাইতিক অলত্রা ভাইওলেত এয়র প্যুরিফিকেসন সীস্তেম য়াওগনি অমসুং মসিবু নুংশিৎ শেংদোক্নবগীদমক্তা রুফ মাউন্তেদ পেকেজ য়ুনিত (আর.এম.পি.য়ু.)তা থমগনি। চান্দিগরগী সেন্ত্রেল সাইন্তিফিক ইন্সত্রুমেন্ত ওর্গনাইজেসন (সি.এস.আই.ও.)না পীবা পাউতাক্কী মতুং ইন্না দিজাইন তৌদুনা পথাপ অসি নুংশিৎপু মহিক-মতাই, বেক্তেরিয়া, ভাইরসনচিংবদগী চুম্থোক্তুনা শেংদোক্নবগীদমক্তা আর.এম.পি.য়ু.গী মতাই অনিমক্তা থম্মি অমসুং মসিনা অশেংবা নুংশিৎ ফংহল্লি।

*****