ভারত ইমানা য়াইফরে,

ভারত ইমানা য়াইফরে,

ভারত ইমানা য়াইফরে,

ঙসি অসি ২১শুবা চহিচাগী ভারতকী, অর্বান কন্নেক্তিভিতীগী অমদি মরোমদোম লেপচবা ভারতকী অচৌবা নুমিৎ অমনি‍। মতম খরগী মমাঙদা ঐনা গান্ধীনগর-মুম্বাই বন্দে ভারত এক্সপ্রেসকী খোঙজেল য়াঙবা ত্রেন অমা তোংখি‍। খোঙচৎ অদু মিনৎ খরখক্তগী ওইরবসু ঐগীদমক্তা য়াম্না চাউথোকচনিংঙাই মীৎকুপ অমদি ওইখি‍। মরমদি মদু লৈবাকসিগী অহুমশুবা অদুগা গুজরাতকীনা অহানবা বন্দে ভারত ত্রেননি‍। ঐনা কালুপুর রেলৱে স্তেসন্দগী মালুপুর মেত্রো স্তেসন য়ৌরবা মতুংদা মফমদুদগী অহমদবাদ মেত্রো তোংদুনা থালতেজ য়ৌখি‍। মসিনা তাকপদি মীওই অমনা বন্দে ভারতকী খুত্থাঙদা লাক্তুনা মেত্রোদা হকথেংননা য়ৌদুনা মফমদুদগী মখোয়গী ময়ুমদা চৎপা য়ারে নৎত্রগা থবক মফমদা চৎনবগীদমক ময়োল্লমগী অতোপ্পা মফম অমদা চৎপা য়ারে‍। খোঙজেল কয়ামুক য়াম্না য়াঙবগে হায়ববু থৌরমগী সিদ্যুলদগী মিনৎ ২০ ঙনখৎনা থলতেজতা থুংখি‍। ঙসি ঐনা ত্রেন্দা চৎপা মতমদা, দিপার্তমেন্তকী মীওইশিংনা ফজবা মশক কয়া তাক্লকখি অমদি খোঙজেল কয়ানো, করিনো, করি করি ফীভম লৈবগে হায়বনচিংবগী এদভর্তাইজেমন্তসু তৌরমখি‍। অদুবু দিপার্তমেন্তকী মীওইশিংনা উশিনবা য়ৌদবা, ঐনা পামজবা ৱাফম অমদি ময়মদা তমজনিংই‍। ঐ মেথমেতিক্সিয়নসু নত্তে, সাইন্তিস্তসু নত্তে‍। অদুবু বন্দে ভারত ত্রেন অসিদা চৎপা মতমদা এরোপ্লেন তোংদুনা চৎপদা মনুংদা তারিবা খোঞ্জেলদুগী শরুক চাম্মা থোকপগী অমমুক্কী চাংখক তাই‍। হায়বদি ত্রেন অসি তোংবদা তারিবা খোঞ্জেলদগী এরোপ্লেন মনুংদা তাবনা শরুক চাম্মা হেল্লি‍। এরোপ্লেন্দা ৱারী শাননিংলবদি নীংথিনা তাদবা য়াওই‍। অদুবু ঐনা শুম য়েংবদা বন্দে ভারত ত্রেন্দদি নুংঙাইনা মীয়ামদা ৱারী ৱাতায় শানবা য়াই মরমদি খোঞ্জেল নিন্দ্রে‍। মসিনা তাকপদি এরোপ্লেন তোংবা হৈনজবা মীওইশিংনা তারিবা খোঞ্জেলদুগী মরমদা খল্লুরগদি মখোয় শোয়দনা বন্দে ভারত ত্রেন তোংনিংগনি‍। অহমদবাদকী মীয়াম্না মসিবু তরাম্না ওক্কনি, নবরাত্রিগী কুমহৈসু তৌরি, নুমিদাং পুম্বা দান্দিয়া শান্নরি, ঐখোয়গী ময়োল্লম, ঐখোয়গী গুজরাত তুমদুনা লৈবা নত্তে, অসিগুম্বা নবরাত্রীগী নুমিৎ অমদা, অসুম্না শাখ্রবা মরকসিদা মতৌ অসুম্না মীয়াম চোন্না তিনবা ঐনা অহানবনি উরিবা মরুপশিং, ঐ মফমসিদা চাউরকপনি, অসুক য়াম্না চাউবা থৌরম অমা পাঙথোকপা হায়বসি ঐগী অহানবা ৱাখল ওইখিবনি‍। থৌরম অসিগীদমক্তা অহমদবাদকী মীয়ামদা ঐনা হন্না হন্না ইকোক নোঞ্জরি‍। অদুগা মসিনা তাক্লিবদি অহমদবাদ মীয়াম্না মেত্রো হায়বসি করিনো হায়বা খঙলে হায়বনি‍। ঐ নোংমা ঐখোয়গী অর্বান দিভেলপমেন্ত মন্ত্রীশিংগা ৱারী শানখি‍। মদুদা ঐনা লৈবাক পুম্বদা মেত্রো থম্বা মথৌ তাই অমদি মদু ঐখোয়গী থৌদাংনি, অদুম ওইনমক অহমদবাদতনা খ্বাইদগী য়াম্না রিতর্ন লাক্কনি হায়না হায়খি‍। মখোয়না কমদৌননো হংলকপা মতমদা ঐনা খুমখি, ঐখোয়গী অহমদবাদ মচাশিংদি ওতো রিক্সোদা চৎলবদি শেল কয়াম চঙগনি, মতম কয়াম চঙগনি, কয়া য়াম্না শাগনি অদুগা মেত্রোদা চৎলগনা কমদৌবা হায়বসিদা নৈনরগা থুনমক মেত্রোদা চৎনরক্কনি‍। অহমদবাদকী পেসেঞ্জরশিংনা খ্বাইদগী য়াম্না শেলগী কান্নবা পীবা ঙমগনি‍। অসুম্না মতম অমদা অহমদবাদকী ওতো রিক্সোশিংনা ঈশৈ ঙংদুনা থৌনরম্বদু হৌজিক্তি মেত্রোশিংনা মহুৎ শিল্লগনি‍। ঐনা অহমদবাদকী মরমতা থাগৎপদা লোইবা নাইররোই‍। ঙসিদি অহমদবাদনা ঐগী পুক্নিং শুমহৎখ্রে‍।

ঈচিল ইনাওশিং,

লৈবাকসিগী ময়োল্লমশিংনা ২১শুবা চহিচাগী ভারত্তা অনৌবা খোঙজেল হাপকদৌরিবনি‍। মতমগী অহোংবা অমদি মথৌ তাবগী মতুং ইন্না ঐখোয়না ঐখোয়গী ময়োল্লমশিংবু লেপ্পা লৈতনা মতমগা চুনবা ওইহনবা তাই‍। ময়োল্লমশিংগী চত্থোক চৎশিনগী পাম্বৈ মতমগা চুনবা ওইহনবা তাই, অপনবা লৈতবা কন্নেক্তিভিতী লৈহনবা তাই, চত্থোক চৎশিনগী পাম্বৈ অমনা অমবু শৌগৎনবা মথৌ তাই, মসি তঙাই ফদনা তৌদ্রবা য়াদ্রবনি‍। গুজরাত্তা মোদীবু য়েংশিনবা অফবা অমদি অকনবা মীওই কাঙলুপ কয়া লৈরি‍। মখোয়না খঙগদবদি, ঐনা মফমসিগী মুখ্য মন্ত্রী ওইরিঙৈদা, চপ চাবা চহিদুদি ঐ নীংশিংদ্রে, চহি কয়াগী মমাঙদনি অহমদবাদতা মল্তি মোদেল ত্রান্সপোর্তেসনগী মরমদা মালেমগী ওইবা মীফম অমা পাঙথোকখি‍। মতমদুদা ঐনা ৱাখল্লোন অসি পুক্নিংদা ফাওরকখি‍। অদুবু ভারত লৈঙাক্না মরম ওইরগা ঐনা থবক ওইনা পায়খৎপা ঙমখিদে‍। হৌজিক্তি অদোম্না ঐবু মফম অদুদা থাবিরে অমদি ঐনা থবক ওইনা তৌরে‍। ঙসিদি হায়রিবা মঙলান অদু মঙফাওনরক্লে অমদি চহি নিপানসিদা খনখিবা ৱাখলশিংগা লোয়ননা ময়োল্লমশিংগী ইনফ্রাস্ত্রকচর শেমগৎপদা চাউরবা শেন্ফম থাদরি‍। হৌখিবা চহি নিপানসিদা লৈবাকসিগী ময়োল্লম দজন অনিমুক্তা মেত্রো চেনবা হৌখিবা অমদি থবক খোঙজেল লৈনা পায়খৎলি‍। লৈবাকসিগী ময়োল্লম মচা দজন কয়া নোংথক্কী লম্বীনা শম্নহল্লে‍। অপীকপা ময়োল্লমশিং নোংথক্কী লম্বীনা শম্নহনবদা উরান স্কীম্না অচৌবা শক্লোন অমা লৌরি‍। ঐখোয়গী রেলৱে স্তেসনশিংগী ফীভম কমদৌরম্মি হায়বা অদোম মমুৎ তানা খঙলিবনি‍। ঙসিদি গান্ধীনগর রেলৱে স্তেসন অসি মালেমগী এয়রপোর্ত অমদগী তাদ্রে অদুগা নুমিৎ নিনিগী মমাঙদসু ভারত লৈঙাক্না অহমদবাদ রেলৱে স্তেসন মতমগা চুননা শেমদোক্নবা অয়াবা পীখ্রে‍।

মরূপশিং,

লৈবাকসিগী ময়োল্লমশিংদা চাউখৎপগী ফীভম পুরক্নবা মীৎয়েঙ থম্লি, য়াম্লবা শেল থাদরি মরমদি হায়রিবা ময়োল্লমশিং অসিনা লাক্কদৌরিবা চহি কুনমঙাসিদা চাওখৎলবা ভারত অমা শেম্লক্কদৌরিবনি‍। অহমদবাদ, সুরত, বরোদা, ভোপাল, ইন্দোর, জয়পুরনচিংবা ময়োল্লমশিং অসিনা ভারতকী চহি ২৫গী মরাইবক লেপকদৌরিবনি‍। থাদরিবা শেন্ফমশিং অসি কন্নেক্তিভিতীখক্তদা নত্তে‍। ময়োল্লম কয়াদা স্মার্ত ফেসিলিতীশিং শেমগৎলি, তঙাই ফদনা চঙদ্রবা য়াদ্রবা ফেসিলিতীশিংগী ফীভম ফগৎহল্লি‍। ময়োল্লমগী ময়ায়গী শরুক অমদি ময়োল্লমগী খুঙ্গঙগা তাইনবা মফমশিং শেমগৎলি‍। গান্ধীনগর, অহমদবাদ অনি অসি কমদৌনা ময়োল্লম ফাইবোক ওইনা চাওখৎমিন্নবগে হায়বগী চপ চারবা খুদম্নি‍। লাক্কদৌরিবা মতমশিংদা গুজরাতকী ময়োল্লম ফাইবোক কয়া শেমগৎনবগী থৌরাংশিং য়াৎলি‍। হৌজিক ফাওবদা ময়োল্লম ফাইবোক হায়রগা নিউ য়োর্ক-নিউ জর্জী খক্তনি তানরিবা‍। ঐখোয়গী ভারতসু তুংদা লৈহৌবা য়াবা নত্তে, অমদি মসিমক অদোম্না মীৎমাঙদা উবা ফংলগনি‍। ময়োল্লম ফাইবোক্কী খুদম ওইনা অহমদবাদ গান্ধীনগর শেমগৎপগুম, অনন্দ –নাদিয়ার, উধর ভরূচ – অংক্লেস্বর, ভালসদ অমসুং ভাপি, সুরত অমসুং নবসারি, ভদোদরা – হালোল কালোল, মোর্বি – ৱঙ্কনের অমসুং মেহসানা – কারিনচিংবা ময়োল্লম ফাইবোকশিংনা গুজরাৎপু মপাঙ্গল হেন্না কনখৎহনগনি‍। অরিবা ময়োল্লমশিং শেমগৎপা অমদি পাকথোক চাউথোকহনবদা মীৎয়েঙ থম্বগা লোয়ননা, অনৌবা ময়োল্লমশিংসু মালেমগী বিজিনেস দিমান্দকী মতুং ইন্না শেমগৎলি‍। গিফ্ত সিতীশিং অসিসু অসিগুম্বা প্লগ এন্দ প্লে ফেসিলিতীশিংগী চপ চারবা খুদমশিংনি‍।

মরূপশিং,

ঐনা গিফ্ত সিতীগী মরমদা হৌদোকখিবা ঐ নীংশিংলি, ২০০৫-০৬ অদুৱাইদা ওইরমগনি‍। মতমদুদা ঐনা শাগৎখিবা মঙলান অদুগী ভিদিও প্রজেন্তেসন অমা শেমখিবনি‍। মতমদুদা মীয়াম্না নুপাসিনা ঙাঙলিবসি লৈবাকসিদা করিগুম্বা খরদি শোয়দনা থোক্লগনি হায়না খন্নখিবনি‍। মতমদুদা ইরকখিবা ৱারোল কয়া ঐনা পাখি, তাখি‍। ঙসিদি গিফ্ত সিতী ময়াম্না উবা ফংলে, মরূপশিং, অদুগা মসি উবা মতমদা, মফম অসি মীওই লিশিং কয়াদা থবক পীনবগী মফম ওইরক্লি‍।

মরূপশিং,

অহমদবাদকী ত্রান্সপোর্ত হায়রগা, অদোমগী ত্রান্সপোর্ত হায়রগা বস অঙাঙবা, থোঙ অঙাঙবা অমদি রিক্সোৱালাশিং ওইনা লৌনরম্বা মতম অমা লৈরম্মি‍।

মরূপশিং,

গুজরাতনা ঐবু থৌগল তৌনবগী তাঞ্জা অমা পীরকপা মতমদা ঐখোয়না মফমসিদা বি.আর.তি. কোরিদোরগী থবক পায়খৎপা ঙমখিবা ঐ নুংঙাইখি‍। মদু লৈবাকসিগী ওইনা অহানবসু ওইখিবনি‍। ঐনা লৈবাকসিগী অহানবা বি.আর.তি. বসকী খোঙচৎ উবা ফংখি, অমদি মপান লমদগী মীওইশিং লাক্লম্লগা ময়ুমদা মখোয়না গুজরাত্তা চৎলুবা মতমদা বি.আর.তি. বস তোংখিবগী ৱারী কয়া পাখি, তাখি‍।

মরূপশিং,

মতমদুদসু মীচম মীয়াম্না মখোয়গী খুদোংচাবশিং হেনগৎহনগদগে, মখোয়দা কমদৌনা অপনবা লৈতবা কন্নেক্তিভিতীনা কান্নবা পীহনগদগে হায়বসিদা থবক পায়খৎখিবনি‍। মীচম মীয়ামগী মথৌ তাবা অমদি লৈবাকসিবু অৱাংবা থাক্তা পুখৎনবগী ফিরেপ হায়রিবা লম্বী অনিসিদা চাওখৎ লমজেল চেনবগী খোঙচৎ অসিনা দিমোক্রেসী অমদি লৈঙাক্লোনগী থৌদাং ওইরি‍। ঙসিদি, অদুগুম্বা মঙলানশিং অদু মঙফাওনরকপা ঐখোয়না উরি‍। মসিদীগদমক্তা ঐনা ময়ামগী মফমদা থম্মোয় শেংনা নুংঙাইবা ফোঙদোকচরি‍।

মরূপশিং,

ঙসিদি অহমদবাদ মেত্রোগী কিলোমিতর ৩২গী শরুক্কী খোঙচৎ হৌরে, অমদি ৱাফম অমখক তাবদা অদোম ঙক্কনি‍। ভারত্তা মেত্রো লৈবা হৌরকপদগী হৌজিক ফাওবদা কিলোমিতর ৩২গী খোঙচৎ অমা হৌরকপগী অহানবা রেকোর্দ থম্লে‍। মসি তোপ তোপ্পা মশক অমনি‍। রেলৱে লাইন মথক্তা মেত্রো ত্রেক শেম্বগী খুদোংচাদ্রবা শিংনবা কয়া থেংনরগসু, থবক অসি থুনা লোইশিনবা ঙমখি‍। মসিদা মেত্রোগী অহেনবা লমসু মথৌ তাহনখিদে‍। ঙসিদি, মেত্রো অসিগী অহানবা তাঙ্কক্কী শরুক শঙ্গারে, অদুগা গান্ধীনগরনা অনিসুবা তাঙ্গক্তা শম্নহন্নবা থবক চঙশিল্লি‍।

ইচিল ইনাওশিং,

অহমদবাদ অমসুং মুম্বাইগী মরক্তা বন্দে ভারত ত্রেন হৌদোকপা অসিনা লৈবাকসিগী অচৌবা ময়োল্লম অনিগী মরক্কী খোঙচৎ নুংঙাইহনবতা নত্তনা মতম চঙবসু হন্থহল্লগনি‍। ইচম চম্বা এক্সপ্রেস ত্রেন্না অহমদবাদতগী মুম্বাই য়ৌবা মতমদা পুং তরেৎ মখায়, নিপান মখায় চঙলি‍। করিমগুম্বা মতমদা মদুদগী হেন্না মতম চঙবসু য়াওই‍। সতাব্দি ত্রেন্না পুং তরুক মখায়দগী তরেৎ মখায়রোম চঙই‍। অদুবু বন্দে ভারত ত্রেন্না অহমদবাদতগী মুম্বাই য়ৌবা মতমদা য়াম্লবদা পুং মঙা মখায়রোমতমক চঙগনি‍। তপ্না তপ্না ফীভমসু ফগৎলক্কনি‍। অদুগা ঙসি ঐনা চেন্নাইদা বেন্দে ভারত ত্রেন শেমগৎলিবা ইঞ্জিনিয়রশিং, ৱাইয়রমেন, ফুতর, ইলেক্ত্রিসিয়ন পুম্নমক উনবদা মখোয়না হায়রকখিবদি সর ঐখোয়দা থবক পীবিয়ু, ঐখোয়না মসিদগী হেন্না ফবা, হেন্না য়াঙবা পুথোকপা ঙমগনি হায়বসিনি‍। লৈবাকসিগী ইঞ্জিনিয়রো তেক্নিক্সিয়নশিংদা অসিগুম্বা থাজবা লৈ‍। মখোয়গী থাজবা অদুনা মরম ওইরগা লৈবাকসিনা হেন্না খোঙজেল য়াঙনা চাওখৎলক্কনি হায়না ঐনা চপ চানা থাজবগা লোয়ননা হায়বা ঙমহল্লি‍। মসিদসু নত্তনা, ত্রেন অতৈদগী মসিদনা মীয়াম্না চৎনবা হেনগৎলক্কনি‍। নোংম ঐ কাসিগী স্তেসন্দা মীওই অমদা মরুপ, বন্দে ভারত ত্রেনসিবু কমদৌবগে হায়না হংলম্মি‍। মহাক্না ত্রেন অয়াম্বা বন্দে ভারত ওইরম্লবদি কয়াদা ফরমগদবনো হায়না মহাক্না খুম্লকখি‍। লায়রবশিংনসু মসিদা তোংবা পাম্মি, শিন্মীশিংনসু পাম্মি‍। ঐনা করিগীনো হংলুবদা, মহাক্না মরম অনি হায়রকখি‍। অমনা মনুংদা পোৎ পুশিন্নবগী মফম চাওনা লৈরে‍। অদুগা মরম অমনা মখোয়না ঙন্না য়ৌবা ঙম্লবনিনা ত্রেন তিকেৎকী শেন্ফম অদু পুং অমদা তানবা ঙম্লে হায়বসিনি‍। মসিনি বন্দে ভারতকী মতিক ময়াই‍। অতোপ্পা ত্রেনশিংগা চাংদম্নবদা মসিদা পেসেঞ্জর মশিং হেন্না চৎপা য়ারে‍।

মরূপশিং,

ঙসিগী তাঞ্জা অসিদা, অহমদবাদনা কমদৌনা দবল ইঞ্জিন লৈঙাক্কী কান্নবা ফংলিবগে হায়বদুসু ময়ামগী মফমদা থমজগে‍। বোতর রেল লাইনবু ওভরহেদ স্পেস মেত্রো প্রোজেক্কীদমক শীজিন্নবা হৌদোরকপা মতমদা কেন্দ্র লৈঙাক্না খুদক্তা অয়াবা পীখি‍। মসিনা ভাস্না-ওল্দ হায় কোর্ত পরিংদা খুদক্তা মেত্রোগী থবক হৌবা ঙমহনখি‍। ঐখোয়না অহমদবাদ মেত্রোগী থবক হৌরকপা মতমদা, খ্বাইদগী হেন্না লায়রবা মীওইসু কান্নবা ফংহনবা য়াগদবা মওংদা লম্বী অসি শেমখিবনি‍। লম্বী য়াত্থোকপদা পব্লিক ত্রান্সপোর্ত খ্বাইদগী হেন্না মথৌ তাবা, অপীকপা লম্বী অমা লান্থোকপদা মতম য়াম্না লৌবা মফমশিংদা মেত্রো অসি ফাওহনখিবনি‍। অহমদবাদপু মল্তিমোদেল কন্নেক্তিভিতীগী মফম অমা ওইহন্নবা চেকশিন্না হোৎনখি‍। ঙসিদি মল্তিমোদেল হব অমা কালুপুরদা শেমগৎলি‍। মফমসিদা সিতী বসশিং বি.আর.তি. স্তেসনগী মমাঙদা অমদি গ্রাউন্দ ফ্লোরদা খামগনি‍।

মথক থংবা ফ্লোরদা তেক্সী অমসুং লনাই কারশিংগী মফম লৈগনি‍। সারসপুর এন্ত্রীরোমদা অনৌবা মেত্রো স্তেসন অমা লৈরে অমদি দ্রোপ অমসুং পিক-অপ, পার্কিং ফেসিলিতীশিংগা খোঙজেল য়াঙবা রেল স্তেসনশিংগা শম্নহল্লে‍। কালুপুর রোদ ওভর ব্রিদ্জকা সারসপুর রোদ ওভিব্রিদ্জকা শম্নহন্নবগীদমক লেন ১৩গী লম্বী অমসু স্তেসন অসিগী মমাঙদা শেম্লগনি‍। কালুপুরগী মথক্তা সাবরমতি বুলেৎ ত্রেন স্তেসনসু মল্দিমোদেল ত্রান্সপোর্ত হব অমা ওইনা শেমগৎলি‍।

মরূপশিং,

ঐখোয়গী ময়োল্লমশিংগী লায়রবা মীওইশিং, মিদল ক্লাস ইমুংশিং, মিদল ক্লাসকী মরূপশিংবু মৈখু চেনবা বস তোংহন্দনবগীদমক ভারত লৈঙাক্না ইলেক্ত্রিব বস পুথোকপা অমদি চলাইবগী ফেম স্কীম হৌদোকখ্রে‍। মসিনা অকোয়বগী ফীভমসু ঙাকথোক্লগনি, মীয়াম্না মখোয় নিনবগী অৱাবসু লৈররোই, মৈখুসু চেল্লরোই অমদি থুনসু য়ৌবা ঙম্লগনি‍। হৌজিক ফাওবদা লৈবাকসিদা ইলেক্ত্রিক বস লিশিং ৭ হেন্না অয়াবা পীখ্রে‍। হায়রিবা বসশিং অসিদা কেন্দ্র লৈঙাক্না লুপা করোর ৩৫০০রোম থাদরি‍। হৌজিক ফাওবদা গুজরাতকীসু বস চানিপান য়াঙ্খৈর,মসু অয়াবা পীখ্রে, মখোয়গী মনুংদা বস কয়া অমদি ঙসিমক লম্বীদা চেল্লে‍।

ইচিল ইনাওশিং,

ময়োল্লমশিংদা লম্বী চিনবদগী কোকহন্নবা, ত্রানশিংগী খোঙজেল হেনগৎহন্নবা ঐখোয়না মতম শাংনা হোৎনদনা লাকখ্রে‍। অদুবু ঙসিগী ভারত অসিনা খোঙজেলবু মরুওইনা লৌদুনা খোঙজেল য়াঙনা চাওখৎপা পুরক্নবা হোৎনরি‍। খোঙজেল য়াঙবদা থম্লিবা মীৎয়েঙ অসি ঙসি গতিশক্তি নেস্নেল মার্তর প্লান, নেস্নেল লোজিস্তিক পোলিসীদা মমি তারি, অমদি ঐখোয়গী রেলৱেগী খোঙজেল য়াঙ্খৎহন্নবা হোৎনরিবা অসিদসু উবা ফংলি‍। ঙসিদি ভারত্তা শাবা লৈবাকসিগী রেল নেৎৱর্কনা বন্দে ভারদ ত্রেনশিংগী খোঙজেল হেনগৎহল্লে‍। পুংদা কিলোমিতর ১৮০গী খোঙজেল য়ৌবা ঙমবা ত্রেনশিং অসিনা ইন্দিয়ন রেলৱেজকী ফীভম অমসুং মায়ওন হোংহল্লগনি হায়বসি ঐগী চপ চাবা থাজবনি‍। মথঙ চহিগী ওগস্ত ফাওবদা বন্দে ভারত এক্সপ্রেস ত্রেন ৭৫ চেলহন্নবা ঐখোয়না পান্দম থম্লি‍। ভারতকী বন্দে ভারত ত্রেনগী অফবা ৱাফম অমা হায়রগদি শুপ্নতগী সেকেন্দ ৫২দা পুংদা কিলোমিতর ১০০গী খোঙজেল য়ৌবা ঙম্বা অসিনি‍। চীতাহনা কয়া য়াম্না থুনা য়াঙনা চেনবা ঙম্বগে হায়বগী মতাঙদা মিদিয়াদা খন্নখি‍। ত্রেন অসিনা সেকেন্দ ৫২দা থুনা য়াঙনা চেনখৎপা ঙম্লি‍।

মরূপশিং,

ঙসিদি লৈবাকসিগী রেল নেৎৱর্ক্কী য়াম্লবা শরুক য়মা মী পান্নদবা গেৎশিংদগী মনীং তমহল্লে‍। ইস্তর্ন অমসুং ৱেস্তর্ন দেদিকেতেদ ফ্রৈৎ কোরিদোর লোইরক্লবা মতমদা পোৎ-চৈ পুথোক পুশিন তৌনবা ত্রেনগী খোঙজেলসু হেনগৎলক্লগনি অমদি পেসেঞ্জর ত্রেনশিং থেঙনা য়ৌরকপগী ৱাফমসু হন্থহল্লগনি‍। অদুগা মরূপশিং, পোৎ-চৈ পুথোক পুশিন তৌবা ত্রেনশিংগী খোঙজেল হেনগৎলক্লবা মতমদা, গুজরাৎকী পোৎ-চৈ থাংবা মীওইশিংনা হৌজিক লৈরিবা অসিদগী হেন্না খোঙজেল য়াঙনা থবক তৌরক্লগনি‍। ভারতনা মালেমগী মফম শিনবা থুংনা য়ৌবা ঙম্লগনি‍। ঐখোয়গী পোৎলম মপান্দা থাদোক্তুনা অমদি মপানগী পোৎলমশিং মফমসিদা পুশিল্লক্তুনা ঐখোয়বু খোঙজেল য়াঙবা থাক অমদা পুরক্লগনি‍। গুজরাতনা অৱাংথংবা ভারতকা নক্ননা লৈবা মরম্না, কংফালতনা কোইশিনবা মফমশিংগা নক্নবা মরম্না, গুজরাতকী সমুদ্র খোঙবালশিংনা কান্নবা য়াম্না লৌবা য়াগনি‍। সৌরাস্ত্র অমসুং কত্চ পুম্বা মসিদগী কান্নবা ফংলগনি‍।

মরূপশিং,

খোঙজেলগা লোয়ননা, ঙসিদি ইনফ্রাস্ত্রকচর দিভেলপমেন্তকী ৱাখল্লোন্দসু চাউনা অহোংবা লাক্লে‍। হৌখিবা চহি ৮সিদা, ঐখোয়না ইনফ্রাস্ত্রকচরবু মীয়ামগী মঙলানগা শম্নহল্লে‍। ইনফ্রাস্ত্রকচর শেমগৎনবগী লাউথোকপা মতমদা মীখলগী অমাঙ অতোংখক য়েংলগা লাউথোক্নরম্বা মতম অমা লৈরম্মি‍। তেক্সপেয়রশিংগী শেন্থোকপু রাজনিতীগী কান্ননবগীদমক শীজিন্নরম্মি‍। হায়রিবা ৱাখল্লোন অসিবু দবল ইঞ্জিন লৈঙাক্না হোংদোক্লে‍। তুং কোইনা চৎকদবা চাওখৎ খোঙজেলগী য়ুম্ফম অকনবা অমদি তুংগী ৱাখল্লোন্দা শেমগৎপা ইনফ্রাস্ত্রকচরনা ওইরি‍। ঙসিদি ভারতনা হায়রিবা ৱাখল্লোনসিদা থবক তৌরি, ভারতকী মালেমদা মফম কল্লি‍।

মরূপশিং,

অজাদী কা অমৃৎ কাল অসিদা চাওখৎলবা ভারত অমা শেম্নবগীদমক মতমগা চুনবা ইনফ্রাস্ত্রকচরশিং শেমগৎপগী থবক্তা অহেনবা খোঙজেল হাপ্পা মথৌ তাই‍। হীরম অসিদা গুজরাতকী দবল ইঞ্জিন লৈঙাক্নসু ইচঙ থৌনা চঙশিল্লি‍। পুম্নমক্না হোৎনমিন্নদুনা হায়রিবা থবক থৌরাংশিং অসি ঐখোয়না হেক ঙম্লিবমখৈ পাঙথোমিন্নখিগনি হায়না ঐনা থাজবা থমজরি‍।

মরূপশিং,

ঙসি অসি য়াম্না মরুওইবা নুমিৎ অমনি‍। অদুবু ঙসি ঐনা গুজরাতকী মীয়ামদা ৱাফম অমগা হায়জনিংই‍। নুমিৎ হুম্নি মরিনিগী মতুংদা মেত্রো অসি মীয়াম্ন তোংবা য়ারকপা মতমদা ময়াম পুম্নমক ঙন্না চত্তুনা য়েংনগনি হায়বা ঐ খঙই‍। অদুবু ঐনা পাম্বদি ঐখোয়গী ক্লাস নাইন, তেন, ইলেবেন, ত্বেল্ব অমদি ইঞ্জিনিয়রিং তম্লিবা মহৈরোয়শিংনা অর্বান মিনিস্ত্রিগা ৱারী শানদুনা, মেত্রোদা থবক তৌরিবা মীওইশিংগা ৱারী শানদুনা হায়রিবা রেলৱে স্তেসনশিং অসি কমদৌনা অসুক লুনা তৌদুনা শারিবনো হায়বসিগী মতাঙদা ৱারী শাহন্নিংবনি‍। মসিদা শেল কয়াম চঙলমগনি, কদায়দগী শেলনো, ঐখোয়গী লৈবাক মীয়ামগী শেলনি‍। থবক অসি কমদৌনা ওইরক্লিবনো, কয়াম চাউনা পায়খৎলিবনো, মতম কয়া য়াম্না চঙবগে, করম্বা মখলগী তেক্নোলোজী শীজিন্নবগে হায়বসিদা মখোয়দা খঙহল্লগদি ঐখোয়গী অঙাঙশিংনা চাওখৎ মায়কৈদা খোঙ থাংজিল্লক্কনি‍। মরম অসিনা এজুকেসন দিপার্তমেন্তনা মেত্রো তোংবখক নত্তনা মেত্রো স্তেসনশিংগা উনদুনা মখোয়সি কমদৌনা শারকপনো, কমদৌনা চেল্লিবনো, করি থবক তৌরিবনো, লৈনুংহুৎ অসি কমদৌনা মখাদা শারিবনো, শাংল-শাংলবা লৈনুংহুৎশিং কমদৌনা হুৎলিবনো হায়বনচিংবা খঙহনবিয়ু হায়জরি‍। অসুম তৌবনা লৈবাকসিদা তেক্নোলোজী শীজিন্নদুনা খোঙজেল য়াঙনা চঙশিল্লি হায়বা থাজহনগনি অমদি মপু ওইবগী ইথিল অমা পোকহনগনি‍। অদোম্না অনৌবা মীরোয়সিদা শেমগৎলিবশিং অসি নখোয়গীনি, নখোয়গী তুংগীদমক্তনি হায়বা তাকপিবা মতমদা ঐখোয়গী নহাশিংনা অসিগুম্বা লনথুমশিং অসি কৈদৌনুংদসু মাঙহন তাকহন্নিংলোই‍। মসিদা মাঙ তাকপা থোরকপা মতমদা মশাগী য়ুমগী লনথুম মাঙবগুম মখোয়দা ফাওহনগনি‍। চৎলিবা খোঙজেল অসিদা খজিক্তং অকায়বা লাকপদা মেত্রো অসিদা অমাঙ অতা থোক্কদৌরিবনি‍। মসিদা ঐখোয় পুম্নম্কী থৌদাং লৈ হায়বসি ঐখোয়গী নহারোলশিংদা তম্বিগদবনি‍। মখোয়দা ৱাখল তাহল্লবা মতমদা, মখোয়না বন্দে ভারত হায়রকপা মতমদা মখোয়গী পুক্নিংদা ইমা ভারতীগী মমি তাগনি‍। ভারত ইমাগী অফবা তুংলমচৎকীদমক বন্দে ভারতনা চেল্লি‍। অসিগুম্বা ৱাখল্লোন, ইথিলশিং অনৌবা মহৈ মশিংগী থৌওং অসিদা য়াওরি‍। নেস্নেল এজুকেসন পোলিসীদা অঙাংশিংবু অসিগুম্বা মফমশিংদা চৎননবা থৌরাং য়াওরি‍। করিগুম্বা অদোমগী য়ুমদা খরুং লৈরবদি অঙাংশিংদা মদুবু চফু শাফমদা চত্তুনা কমদৌনা শাবগে হায়বা য়েংহনবিয়ু‍। মখোয়দা মেত্রো স্তেসন অসিবুসু য়েংহনবিয়ু‍। মেত্রোগী শিল লাংলিবশিংসু শন্দোক্না তাকপিয়ু‍। অসুম্না তৌবনা অঙাংশিংদা নোংমদি মখোয়সু ইঞ্জিনিয়র ওইগনি, লৈবাক্কীদমক করিগুম্বা খরা তৌগনি হায়বগী ইথিল পোকহনগনি‍। অসিগুম্বা মঙলানশিং মখোয়দা উহনবিগদবনি‍ মরুপশিং‍। মরম অসিনা মেত্রোবু চত্থোক চৎশিনগীখক্তা নত্তনা মেত্রোগী মায় পাকপবু তাকপি তম্বিনবা পাম্বৈ অমা ওইনসু শীজিন্নগদবনি‍। হায়রিবা থাজবা অসিগা লোয়ননা ঙসি ঐনা অমুক্কা হন্না অহমদবাদকী মীয়ামদা, গুজরাতকী মীয়ামদা অমদি লৈবাক মীয়ামদা মমল য়াম্লবা খুদোল অসি তমজবা অসিদা ঐঙোন্দা চাউথোকচবা, পেঞ্জবগা লোয়ননা নুংঙাইবা ফোঙদোকচরি‍। ময়াম পুম্নমক খুৎ থাঙ্গত্তুনা ঐগা লোয়ননা খোঞ্জেল হৌনা লাউবিরকউ‍।

ইমা ভারতনা য়াইফরে,

ইমা ভারতনা য়াইফরে,

ইমা ভারতনা য়াইফরে,

হন্না হন্না থাগৎচরি !

*******