প্রধান মন্ত্রীনা অম্বাজীদা লুপা করোর ৭২০০ হেন্না চঙনা শাবা চাউখৎ-থৌরাংগী তোঙানবা প্রোজেক্ত কয়াগী উরেপ উয়ুং তম্বগা লোয়ননা লৈবাক মীয়ামদা খুৎশিন্নখ্রে। প্রধান মন্ত্রীনা পি.এম. অৱস য়োজনাগী মখাদা শাবা য়ুম ৪৫,০০০ হেনববু মীয়ামদা খুৎশিন্নদুনা উরেপ উয়ুং তমখ্রে। প্রধান মন্ত্রীনা তরঙ্গা হিল-অম্বাজী-অবু রোদ ন্যু ব্রোদ গেজ লাইন অমসুং প্রসাদ স্কিমগী মখাদা পায়খৎপা অম্বাজী লাইশঙগী লাই নীংবগী ফেসিলিতীশিং চাউখৎহনবগী থবক্কী উরেপ উয়ুং তমখি। প্রধান মন্ত্রীনা ৱেস্তর্ন ফ্রৈত কোরিদোরগী কিলোমীতর ৬২ শাংবা ন্যু পালনপুর-ন্যু মাহেসানা সেক্সন অমসুং কিলোমীতর ১৩ শাংবা ন্যু পালনপুর-ন্যু চতোদার সেক্সন (পালনপুর বাইপাস লাইন) মীয়ামদা খুৎশিন্নখ্রে। প্রধান মন্ত্রীনা মিথা-থারদ-দীসা রোদ পাকথোক চাউথোকহনবা য়াওনা অতোপ্পা রোদ প্রোজেক্ত কয়াসু মীয়ামদা খুৎশিন্নখি।

প্রধান মন্ত্রীনা তোঙানবা হাউজিং স্কিম কয়াগী বেনিফিশরী ৭কী মফমদা শো শিন্নখিবগা লোয়ননা মুখ্য মন্ত্রী গাউমাতা পোশন য়োজনা হৌদোকখি অমসুং গাউশালাশিংদা চেকশিংসু শিন্নখি। মহাক্না বেনিফিশরী খরগা ভিদিও লিঙ্ককী খুত্থাংদা ৱারীসু শাখি।

ঙসি তিনখিবা মীয়ামগী মফমদা প্রধান মন্ত্রীনা ৱা ঙাঙবদা নবরাত্রীগী মঙাশুবা নুমিত্তা ইমা অম্বাগী দর্শন তৌবা ফংবদা নুংঙাইবা ফাওই হায়না ফোংদোকখি। লৈবাক অসিনা চাউখৎপা ভারত অমগী অচৌবা ৱারেপ লৌবগী মতমদা মহাক্না অম্বাজীদা লাক্লি হায়না প্রধান মন্ত্রীনা হায়খি। “ইমা অম্বাগী থৌজালদগী ঐখোয়না ঐখোয়গী ৱারেপশিং পাংথোকপা ঙম্বগী পাঙ্গল ফংলগনি”, হায়না মহাক্না মখা তাখি।

প্রধান মন্ত্রীনা হাউজিং স্কিমগী বেনিফিশরী ৬১,০০০বু থাগৎখিবগা লোয়ননা য়াম্না নুংঙাইরবা দিৱালী অমনা মখোয়বু ঙাইদুনা লৈরে হায়না ফোংদোকখি। নুপীশিংবু ইকায় খুম্নবগী ভারতকী চৎনবীগী মতাংদা মহাক্না ৱাফম থমখি। মহাক্না হায়খি, “ঐখোয়না নুপীশিংবু ইকায় খুম্নবগী ৱারী শাবা মতমদা, নুপীশিংবু ইকায় খুম্নবা হায়বসি ঐখোয়গী সংস্কারদা কয়া য়াম্না লুনা লৈবগে হায়বা খঙবা ঙম্মি”। অতোপ্পা লৈবাক্তা তৌদবগুম্না, ঐখোয়গী চৎনবীদা শক্তি- পাৱর হায়বসি ফেমিনিন জেন্দরগা মরী লৈনৈ অমসুং থৌনা ফবা লান্মীশিংগা ইমাগী মমিংগা মরী লৈনবগী চৎনবী অমসু লৈ হায়না মহাক্না হায়খি। মহাক্না ৱাফম অসিগা মরী লৈননা, অর্জুন, শ্রী কৃষ্ণ অমসুং হনুমাঞ্জীগী খুদম পীখি। “মসিদি ঐখোয়গী সংস্কারনি”, হায়না প্রধান মন্ত্রীনা হায়রদুনা ঐখোয়না ঐখোয়গী লৈবাক ভারতপু ইমা ওইনা উই, অমসুং ইশাবুনা ইমা ভারতকী মচাশিংনি হায়না লৌই হায়না ফোংদোকখি। মসি ওইরবসু, নুপীশিংগী হক অমসুং শেল-থুমগী হীরমদা অপাম্বা ফোংদোকপদা অকক্নবা খরদি অদুমক লৈরি হায়না প্রধান মন্ত্রীনা হায়খি। তোঙানবা হাউজিং স্কিমগী মখাদা শারিবা য়ুমশিংবু নুপীশিংনা মপু ওইহন্দুনা মসিগী চৎনবী অমদি শেমদোক্লে। লৈবাক্কী লাইরবশিংগী মফমদা য়ুম করোর ৩ হেন্না খুৎশিন্নখ্রে।

কুহ্মৈ মতম মনুংসিদা লৈবাক মীয়াম করোর ৮০ হেনবদা লেম্না রেসন য়েনবগী স্কিমগীদমক্তা সরকারনা চাউরাকপা লুপা করোর লাখ ৪ চাদিং তৌরি অমসুং মখোয়বুসু তেংবাংলি হায়না প্রধান মন্ত্রীনা হায়খি। ইচে-ইচল অমসুং ইমাশিংনা চাকখুম চলায়বদা অৱাবা মাইয়োক্নহন্দনবা স্কিম অসি অমুক শাংদোক্লে হায়না মহাক্না মখা তাখি। মমাংগী দিকেদ অনিদগী মহাক্না ঐখোয়গী ইমা অমসুং ইচে ইচলশিংবু মপাঙ্গল হাপ্নবা থবক তৌবগী খুদোংচাবা ফংবদা নুংঙাইবা ফাওই অমসুং বনস্কন্থানা মসিগুম্না হোংলক্লিবা ফিভমগী শাখী ওইরি হায়না মহাক্না হায়খি। প্রধান মন্ত্রীনা লমদমসিগী নুপীশিংগী মফমদা হায়জখিবা ৱারোল নিংশিংলদুনা, মখোয়না মহাক্কী হাজবা তাবীবগীদমক্তা থাগৎপা ফোংদোকখি অমসুং নর্মদাগী ঈশিংনা লমদম অসিদা নুংঙাই য়াইফবগী মতৌ লৈহল্লি অমসুং নুপীমচাশিংনা স্কুল অমসুং কোলেজ থৱাই য়াওনা কারি হায়না মহাক্না মখা তাখি। মখোয়না মেলন্যুত্রিসনগী মাইয়োক্তা থেংনরিবা লান অসিদা তেংবাংবগী মতৌবুসু শকখঙখি। ইং ২০১৪গী মতুংদগী, ভারত্তা নুপীশিংগী পুন্সিগী মরী লৈনবা হীরম কয়াগী ৱারোইশিন পুরকখি অমসুং মখোয়না হৌজিক্তি ভারতকী চাউখৎ-থৌরাংগী খোংচৎকী শাফুসু ওইরে হায়না প্রধান মন্ত্রীনা হায়খি। লৈবাক্কী নুপীগী শক্তিনা মরু ওইবা স্কিম খুদিংগী ময়োলদা লৈবগী মতৌদা মীয়ামগী পুক্নিং চিংশিল্লদুনা, প্রধান মন্ত্রীনা অমাংশঙ, গ্যাস কন্নেক্সন, হর ঘর জল, জন ধন একাউন্ত নত্ত্রগা মুদ্রা স্কিমগী মখাদা গেরেন্তী য়াওদনা লোন পীবগী থৌওংশিংগী মতাংদা পনখি। “মমানা নুংঙাইবা মতমদা, ইমুংনা নুংঙাইগনি, অমসুং ইমুংনা নুংঙাইবা মতমদা, খুন্নাইনা নুংঙাইগনি অমসুং খুন্নাইনা নুংঙাইরকপা মতমদা লৈবাক্না নুংঙাইগনি। ঐখোয়না লেপ্পা লৈতনা ফংনবা হোৎনরিবা অসি মসিগুম্বা চাউখৎ-থৌরাং অসিবুনি”, হায়না প্রধান মন্ত্রীনা ফোংদোকখি।

তরঙ্গা হিল-অম্বাজী-অবু রোদ লাইন অসি ইং ১৯৩০দা বৃতিশ লৈঙাক্কী মতমদগী ৱাহৌদোক থমখ্রবনি হায়না প্রধান মন্ত্রীনা পাউদমখি। মসিগী তঙাইফদবা অসি চহি ১০০গী মতুংদা খঙলে, অদুবু লাইবক থীবদি, মসিবু মতম শাংনা পাংথোক্তনা লাকখিবা অসিনি। “ইমা অম্বানা মসি ঐহাক্না পাংথোকপা পাম্বজাৎনি। নীংতম্বগী অমৃত মহোৎসবকী মতমদা ঐখোয়না মসিগী রেলৱে লাইন অসিবু ইমা অম্বাগী খুয়াখাদা শিন্নবা ফংবসি ঐখোয়গী লাইবক ফবনি”, প্রধান মন্ত্রীনা হায়খি। মসিগী রেল লাইন অমসুং বাই-পাস অসিনা মফমসিবু ত্রাফিক জামদগী নীং তমহনগনি অমসুং মসিনা মার্বল ইন্দস্ত্রীদসু তেংবাংগনি হায়না মহাক্না হায়খি। অখন্নবা ফ্রৈত কোরিদোর অসিনা লমদম অসিবু মশক থোক্না তেংবাংগনি হায়না মহাক্না হায়খি। কিসান রেলনা মফমসিদগী থৌবা হৌবা য়াদৌরবনিনা লৌমীশিংদসু মতেং য়াম্না ফংলগনি হায়না মহাক্না হায়খি। মসিগী গব্বর তীর্থ চাউখৎহনবগীদমক্তা মহাক্না রাজ্য সরকারবু থাগৎখি।

প্রধান মন্ত্রীনা মহাক্কী পান্দমদি লাইশঙ অসিগী অকোয়বদা মীয়ামগী অপাম্বা মফম মশিং য়াম্না শেমগৎপা অমসুং পুম্নমক অসিবু য়েংনবা চাউরাক্না নুমিৎ ২-৩গী প্রোগ্রাম শেমহনবনি হায়খি। অম্বাজীনা নাকল অমদা, থাজবা অমসুং লাইনীংবগী পন্থুংফম ওইরি, অদুগা নাকল অমদনা, ঐখোয়গী জৱানশিং থম্লিবা ভারতকী ঙমখৈসু ওইরিবনি হায়না প্রধান মন্ত্রীনা হায়খি। কেন্দ্র সরকারনা সুইগম তালুক্তা সীমা দর্শন প্রোজেক্ত অমা হন্দক্তা হৌদোকখ্রে হায়না মহাক্না হায়খি। প্রোজেক্ত অসিনা ভারত মীয়াম্বু বোর্দর সেক্যুরিতী ফোর্সকী জৱানশিংগী পুন্সি মহিংগী মতাংদা খঙহনবা অমসুং লমকোয়বশিংদা মান্নবা এক্সপেরিএন্স থেংনহনবা পাম্লি। প্রোজেক্ত অসিনা রাসস্ত্রীয় এক্তা (লৈবাক অমত্তা ওইবা), পাঞ্চ প্রান (ৱাশক মঙা)গী মরক্তা অমা ওইবা, অমসুং লমদমসিগী তুরিজমদা কান্নবা শাফু পীবদসু পাঙ্গল হাপকনি হায়না প্রধান মন্ত্রীনা মখা তানা পাউদমখি। দীসা এয়র ফোর্স স্তেসন্দা পায়খৎলিবা রনৱে অমসুং অতোপ্পা থবক কয়ানা লমদম অসিগী এয়র ফোর্স দিফেন্সকী মপাঙ্গল হেনগৎহনগনি হায়না শ্রী মোদীনা হায়খি। “মসিনা লমদম অসিগী তঙাই ফদ্রবা শেন্মিৎলোনগী তেংবাংসু পীগনি”, হায়না মহাক্না হায়খি।

প্রধান মন্ত্রীনা মহাক্কী ৱারোল লোইশিনবদা, সরকারগী হোৎনজমন্না মরম ওইরগা, হৌখিবা দিকেদ অনিসিদা বনস্কন্থাগী শক্তমদা অচৌবা অহোংবা পুরকখ্রে হায়খি। প্রধান মন্ত্রীনা গ্রাউন্দ লেভেলদা মসিগুম্বা চাউখৎপা পুরকপগীদমক্তা বনস্কন্থাগী নুপীশিংগী হোৎনজমন্দা মহৈ পীখি। “নর্মদাগী নীর, সুজলম সুফলম অমসুং দ্রিপ ইরিগেসন্না ফিভম অসিদা অহোংবা পুরকপদা অচৌবা থৌদাং য়াখি”, হায়না মহাক্না মখা তাখি। ঙসি হৌদোকখিবা প্রোজেক্তশিং অসিদগী লৌমী, নুপী অমসুং নহাশিংনা খ্বাইদগী হেনবা কান্নবা ফংগনি হায়না শ্রী মোদীনা হায়খি।

গুজরাতকী মুখ্য মন্ত্রী, শ্রী ভুপেন্দ্র ভাই পতেল, রেলৱেগী কেন্দ্র মন্ত্রী, শ্রী অশ্বিনি বৈশ্নব, কেন্দ্রগী রেলৱেগী রাজ্য মন্ত্রী, শ্রীমতি দর্শনা বিক্রম জার্দোশ, এম.পি., শ্রী সি.আর. পাতিল, শ্রী প্রবতভাই পতেল, শ্রী ভারাসিনহ ধাবী অমসুং শ্রী দিনেশভাই অনাবাইদ্যসু ঙসিগী থৌরমসিদা অতোপ্পা মীথুংলেন কয়াগা লোয়ননা শরুক য়াখি।

বেকগ্রাউন্দ

প্রধান মন্ত্রীনা অম্বাজীদা লুপা করোর ৭২০০ হেন্না চঙনা শাবা চাউখৎ-থৌরাংগী তোঙানবা প্রোজেক্ত কয়াগী উরেপ উয়ুং তম্বগা লোয়ননা লৈবাক মীয়ামদা খুৎশিন্নখ্রে। প্রধান মন্ত্রীনা পি.এম. অৱস য়োজনাগী মখাদা শাবা য়ুম ৪৫,০০০ হেনববু মীয়ামদা খুৎশিন্নদুনা উরেপ উয়ুং তমখি। প্রধান মন্ত্রীনা তরঙ্গা হিল-অম্বাজী-অবু রোদ ন্যু ব্রোদ গেজ লাইন অমসুং প্রসাদ স্কিমগী মখাদা পায়খৎপা অম্বাজী লাইশঙগী লাই নীংবগী ফেসিলিতীশিং চাউখৎহনবগী থবক্কী উরেপ উয়ুং তমখি। অনৌবা রেল লাইন অসিনা শক্তি পীথ ৫১গী মনুংদা অমা ওইরিবা অম্বাজীদা লাকপা লাইনীংবা লাখ কয়াদা কান্নবা পীগনি, অমসুং হায়রিবা মফমশিংদা অসিদা লাইনীংবশিংনা লাই নীংবগী নুংঙাইরবা এক্সপেরিএন্স ফংহনগনি। উরেপ উয়ুং তমখিবা অতোপ্পা প্রোজেক্তশিংগী মনুংদা দীসাগী এয়রফোর্স স্তেসনগী রনৱে অমসুং মরী লৈনবা ইনফ্রাস্ত্রকচর; অম্বাজী বাইপাস রোদশিং য়াওরি।

প্রধান মন্ত্রীনা ৱেস্তর্ন ফ্রৈত কোরিদোরগী কিলোমীতর ৬২ শাংবা অনৌবা পালনপুর-ন্যু কহেসানা সেক্সন অমসুং কিলোমীতর ১৩ শাংবা ন্যু পালনপুর-ন্যু চতোদর সেক্সন (পালনপুর বাইপাস লাইন) অসিসু মীয়ামদা খুৎশিন্নখি। মসিনা পিপাবব, দীন্দয়াল পোর্ত ওথোরিতী (কান্দলা), মুন্দ্রা অমসুং গুজরাতকী অতোপ্পা হিংথাংফমশিং চৎপগী কন্নেক্তিবিতী হেন্না ফগৎহনগনি। সেক্সনশিং অসি হাংদোকপদগী, ৱেস্তর্ন দেদিকেতেদ ফ্রৈত কোরিদোরগী কিলোমীতর ৭৩৪ মথৌ তৌবা হৌগনি। লম্বী অসি হাংদোকপনা গুজরাতকী মেহসানা-পালনপুর; রাজস্থানগী স্বরুপগঞ্জ, কেশবগঞ্জ, কিশনগর; হরিয়ানাগী রেৱারী-মনেসর অমসুং নার্নাউলগী ইন্দস্ত্রীশিংদা কান্নবা য়াম্না পীগনি। প্রধান মন্ত্রীনা মিথা-থারদ-দীসা শোরোক পাকথোক চাউথোকহনবা য়াওনা অতোপ্পা রোদ প্রোজেক্ত কয়াসু মীয়ামদা খুৎশিন্নখি।

চাউখৎ-থৌরাংগী য়াম্লবা প্রোজেক্ত কয়া শঙ্গাবা অমসুং উরেপ উয়ুং তম্বগী মতৌনা প্রধান মন্ত্রীনা মালেমগী থাক্কী ইনফ্রাস্ত্রকচর শেমগৎপা, অর্বানগী চত্থোক-চৎশিন তৌবগী পাম্বৈ ফগৎহনবা অমসুং মলতি-মোদেল কন্নেক্তিবিতী ফগৎহন্নবা খোঙফম চেৎলিবা অসিগী মমি তারি। মহাক্কী সরকারনা মীচম মীয়ামগী পুন্সি মহিং ফগৎহনবদা মহাক্না মিৎয়েং চঙবগী মতৌবুসু থৌওংশিং অসিনা তাক্লি।

*****