প্রধানমন্ত্রীগী লোইশঙ
প্রধান মন্ত্রীনা অহমেদবাদতা অহমেদবাদ ইজুকেসন সোসাইতিদা অহমেদবাদ মেত্রো প্রোজেক্কী ফেজ-১ শঙ্গাখ্রে
প্রধান মন্ত্রীনা গান্ধীনগর স্তেসন্দা গান্ধীনগর অমসুং মুম্বাইগী মরক্তা চেনগদবা অনৌবা বন্দে ভারত এক্সপ্রেস লমথাখি
প্রধান মন্ত্রীনা অহমেদবাদ মেত্রো রেল প্রোজেক লমথাখ্রে
“ঙসি অসি ২১শুবা চহিচাগী ভারত, সহরগী চৎথোক-চৎশিন অমসুং অত্মানির্ভর ভারতকী মশক থোকপা নুমিৎ অমনি”
“লৈবাক অসিগী সহরশিংদগী ২১শুবা চহিচাগী ভারতনা অনৌবা ইনোৎ ফংলগনি”
“লৈবাক অসিদা মেত্রোগী পুৱারিদা অহানবা ওইনা কিলোমিতর ৩২ শাংবা পরিং অমা অমুক্তদা মথৌ পাংথোক্লে”
“খোঙজেল য়াংবা অসি ২১শুবা চহিচাগী ভারতনা মরুওইবা মরম অমা ওইনা লৌনবা অমসুং য়াংনা চাউখৎনবা খন্নরি”
“খোঙজেল য়াংবগী মরুওইবা অদু নেসনেল গতিশক্তি মাস্তর প্লান অমসুং নেসনেল লোজিস্তিক্স পোলিসিদা ময়েক শেংনা উবা ফংলে”
“হৌখিবা চহি ৮দা, ঐখোয়না মীয়ামগী অনিংবশিংগা ইনফ্রস্ত্রকচরগা শম্নহল্লে”
Posted On:
30 SEP 2022 1:47PM by PIB Imphal
অহমেদবাদতা অহমেদবাদ ইজুকেসন সোসাইতিদা পাংথোকপা মীয়ামগী থৌরম অমদা প্রধান মন্ত্রী শ্রী নরেন্দ্র মোদীনা অহমেদবাদ মেত্রো প্রোজেক্কী ফেজ-১ শঙ্গাখ্রে। প্রধান মন্ত্রী শ্রী নরেন্দ্র মোদীনা অহমেদবাদ মেত্রো রেল প্রোজেক লমথাখ্রে অমসুং কালুপুর স্তেসন্দগী দুর্দরসন কেন্দ্র মেত্রো স্তেসন ফাওবা মেত্রো তোংখ্রে। ঙসি প্রধান মন্ত্রীনা গান্ধীনগর স্তেসন্দগী গান্ধীনগর-মুম্বাই বান্দে ভারত এক্সপ্রেস লমথাখি অমসুং মফম অদুদগী ত্রেন্দা কালুপুর স্তেসন ফাওবা চৎখি।
মীয়ামদা ৱা ঙাংবদা প্রধান মন্ত্রীনা হায়খি ঙসি অসি ২১শুবা চহিচাগী ভারত, সহরগী চৎথোক-চৎশিন অমসুং অত্মানির্ভর ভারতকী মশক থোকপা নুমিৎ অমনি। মহাক্না বান্দে ভারত ত্রেন অমসুং অহমেদবাদা মেত্রো তোঙবদা মহাক্না অপেনবা ফোঙদোকখি।
এয়রলাইন অমগী মনুংদা তারিবা খোঞ্জেল অদুগা চাংদম্নবদা বান্দে ভারত এক্সপ্রেস মনুংদা খোঞ্জেল শরুক ১০০ হন্থহল্লিবা সাউন্দ-প্রুপ সিস্তেম অদু প্রধান মন্ত্রীনা থাগৎখি। মশিং য়াম্না থোরকপগীদমক প্রধান মন্ত্রীনা অহমেদবাদকী মীয়াম থাগৎখি অমসুং অহমেদবাদকী ত্রেন তোংলিবা মীয়ামগী মরমদা পাউদমখি। প্রধান মন্ত্রীনা হায়খি “ঙসি ঐনা অহমেদবাদ মপুংফানা ইকায়খুম্নবা উৎপা ঙমদ্রে, অহমেদবাদনা ঐগী থম্মোয় হুখ্রে”।
প্রধান মন্ত্রীনা হায়খি লৈবাক অসিগী সহরশিংদগী ২১শুবা চহিচানা অনৌবা ইনোৎ ফংলগনি। মতমগী অহোংবা মতুংইন্না, ঐখোয়গী সহরশিং লেপ্তনা মতমগা চুনবা মওংদা শেমগৎপা দরকার ওই। সহরদা চৎথোক-চৎশিনগী থবক অনৌবা ওইগদবনি অমসুং চৎথোক-চৎশিনগী মওং অমদগী মওং অমদা লাইনা শম্নবা য়াগদবনি। মসিগী য়েংলগা সহরগী চৎথোক-চৎশিনগী থবকশিং শেমগৎনবা শেন য়াম্না থাদরে। হৌখিবা চহি ৮দা , সহর ২৪ হেনবদা মেত্রো থবক হৌরে নত্ত্রগা খুমাংচাউশিল্লে। উরান স্কিমগী মখাদা অপীকপা সহর কয়া এয়রলাইন্না শম্নরে। মসিগা চপ মান্নবা মওংদা রেলৱেজনা অনৌবা থবক কয়া পায়খৎলে। ঙসিদি গান্ধীনগর স্তেসন অসি মালেমগী এয়রপোর্ত অমদগী তাদ্রে। অহমেদবাদ রেলৱেজ স্তেসন নৌনা শেমগৎনবা সরকারনা ৱারেপ লৌখিবা অদুশু মহাক্না পনখি।
মহাক্না হায়খি ত্বিন সিতিশিং হায়বদি অনন্দ-নদিয়াদ, ভারুচ অনকালেশ্বর, ভালসাদ অমসুং ভাপী, সুরত অমসুং নবসারি, বদোদারা-হালোই কালোল, মোরভি-ৱানকানর অমসুং মহেসানা কারিনা মখা তানা গুজরাতকী মিংচৎ হেনগৎহনগনি।
শ্রী মোদীনা হায়খি লাক্লিবা চহি ২৫ অসিদা চাউখৎপগী থাক অমদা পুরক্নবা হোৎনবদা সহরশিং হায়বদি অহমেদবাদ, সুরত, বদোদারা, ভোপাল, ইন্দোর, জয়পুরনা মরুওইবা থৌদাং কয়া লৌগনি। মালেমগী ললোন-ইতিক্কী দরকার মতুংইন্না অরিবা সহরশিং ফগৎহল্লে অমসুং পাকথোক-চাউথোকহল্লে অমসুং অনৌবা সহরশিং শেমগৎলে। অসিগুম্বা খুদোংচাবশিং ফংলবা সহরশিংগী মনুংদা গিফ সিতিশিং অসি অফবা খুদম অমনি।
প্রধান মন্ত্রীনা হায়খি লৈবাক অসিদা মেত্রোগী পুৱারিদা অহানবা ওইনা কিলোমিতর ৩২ শাংবা পরিং অমা অমুক্তদা মথৌ পাংথোক্লে। রেলৱে লাইনগী মথক্তা মেত্রো ত্রেক শাবগী খুদোংচাদবা কয়া লৈরবশু প্রোজেকশিং য়াংনা লোইশিল্লে।
বান্দে ভারত এক্সপ্রেসকী মতাংদা প্রধান মন্ত্রীনা হায়খি অহমেদবাদ অমসুং মুম্বাইগী মরক্তা চৎথোক-চৎশিন নুংঙাইরগনি অমসুং অরাপ্পা হন্থরগনি। এক্সপ্রেস ত্রেন অমনা অহেমদবাদতগী মুম্বাই ফাওবা চেনবদা চাউরাক্না পুং ৭দগী ৮ ফাওবা চঙই অমসুং সাতাব্দি ত্রেন অমনা পুং ৬দগী ৭ ফাওবা চঙই। অদুবা বান্দে ভারত এক্সপ্রেসনা গান্দীনগরদগী মুম্বাই ফাওবদা পুং ৫দগী ৫.৩০ ফাওবা চঙগনি। বান্দে ভারত এক্সপ্রেস অসি অতোপ্পা ত্রেনশিংদগী মী য়াম্না পুবা ঙম্মী।
বান্দে ভারত কোচশিং দিজাইন তৌখিবা অমসুং শাখিবা তেক্নিসিয়ানশিং অমসুং ইঞ্জিনিয়ারশিংগা মহাক্কা উনখিবগী মতাংদা প্রধান মন্ত্রীনা পাউদমখি অমসুং মখোয়গী থবকশিং অদুদা থমখিবা থাজবা অমসুং পামজবশিং অদু ফোঙদোকখি। কাসি রেলৱেজ স্তেসন্দা বান্দে ভারত এক্সপ্রেস তোংনবা প্রধান মন্ত্রীদা পাউদমখিবা অদুগী মতাংদা প্রধান মন্ত্রীনা হায়খি পোৎ হাপফম য়াম্না লৈবা অমসুং মতম য়াম্না চঙদবা মরম্না মসিগী ত্রেন অসি শিন্মীশিং অমসুং লায়রবশিংগী ত্রেন অমা ওইরে। মসি বান্দে ভারতকী শক্তিনি। প্রোজেকশিং য়াংনা লোইশিন্নবা দবল ইঞ্জিন সরকারনা হোৎনবদগী মেত্রো প্রোজেকশিংগী ক্লিয়ারেন্সশিং অমসুং অতোপ্পা পর্মিসনশিং য়াংনা ফংবা ঙম্লে। লায়রবশিংগী য়েংলগা মেত্রোনা চেনগদবা লম্বীশিং থৌরাং তৌরে। কালুপুর অসি মল্তি-মোদাল হব অমা ওইরে।
প্রধান মন্ত্রীনা হায়খি ইলেকত্রিক বসশিং শানবা অমসুং চেনহন্নবা সরকারনা ফেম স্কিম হৌদোক্লে অমসুং মসিনা সহরশিংদা লৈরবা লায়রবশিং, মিদল ক্লাস মরুপশিং বসশিংদগী কামথোরকপা মৈখুদগী কল্লগনি। হৌজিক ফাওবদা স্কিম অসিগী মখাদা লৈবাক অসিদা ইলেকত্রিক বস লিশিং ৭ হেন্না অয়াবা পীখ্রে। হায়রিবা ইলেকত্রিক বসশিং অসিগীদমক কেন্দ্র সরকারনা লুপা কোতি ৩,৫০০ চাদিং তৌখ্রে। হৌজিক ফাওবদা স্কিম অসিগী মখাদা গুজরাত রাজ্যদা ইলেকত্রিক বস ৮৫০ পীখ্রে অমসুং মসিগী মনুংদা গুজরাতকী লম্বীশিংদা বস ১০০ মাঙজৌন্না চেল্লি।
মমাঙদা লৈরম্বা কেন্দ্র সরকারশিংগী মতাংদা প্রধান মন্ত্রীনা হায়খি সহরশিংদা লম্বী চিনবা ফনবা থবকশিং পায়খৎলমদে। খোঙজেল য়াংবা অসি ২১শুবা চহিচাগী ভারতনা মরুওইবা মরম অমা ওইনা লৌনবা অমসুং য়াংনা চাউখৎনবা তঙাইফদবনি হায়না খন্নরি। খোঙজেল য়াংবগী মরুওইবা অদু নেসনেল গতিশক্তি মাস্তর প্লান অমসুং নেসনেল লোজিস্তিক্স পোলিসিদা ময়েক শেংনা উবা ফংলে।ঐখোয়গী রেলৱেজশিংগী খোঙজেল য়াংখৎনবা হোৎনরিবশিং অসি খুদম অমনি। মথং চহিগী অগস্ত ফাওবগী মনুংদা, বান্দে ভারত ত্রেন ৭৫ চেনহন্নবা ঐখোয়না য়াংনা থবক পায়খৎলি। ভারতকী বান্দে ভারতকী ফজবা অসিদি মসিনা শুপ্নগী সেকেন্দ ৫২দা পুংদা কিলোমিতর ১০০ গী খোঙজেল য়ৌবা ঙম্বা অসিনি।
রেলৱে নেতৱার্কতা পায়খৎলিবা চাউখৎ-থৌরাংগী থবকশিংগী মতাংদা প্রধান মন্ত্রীনা হায়খি লৈবাক অসিগী রেলৱেজ নেতৱার্ককী অয়াম্বা শরুক মী শেন্নদবা গেতশিং লৈহন্দ্রে। ইস্তর্ন অমসুং ৱেস্তর্ন দেদিকেতেদ ফ্রেদ কোরিদোর হেক লোইবগা পোৎ-চৈ পুবা ত্রেনশিংগী খোঙজেল হেনগৎলগনি অমসুং মী পুবা ত্রেনশিং মতম থেংবা হন্থরগনি।
প্রধান মন্ত্রীনা হায়খি খোঙজেল য়াংবা অসি মরুওইবা মরম অমা ওইদুনা লৈবাক অসিদা ইনফ্রাস্ত্রকচর শেমগৎনবা ৱাখল্লোন্দা অচৌবা অহোংবশিং লৈরে। হৌখিবা চহি ৮দা মীয়ামগী অনিংবশিংগা ইনফ্রাস্ত্রকচরগা ঐখোয়না শম্নহল্লে। মতম অমদা চাউখৎ-থৌরাংগী থবকশিং লাউথোকপা অসি মীখলগী অমাং-অতোংগী ৱাখলদা পাংথোক্লমখি। তেক্স থিবা মীওইশিংগী শেনফম অসি রাজনিতিগী খুদোংচাবশিং ফংনবা খক শীজিন্নরমখি। দবল ইঞ্জিনগী সরকারনা মসিগী ৱাখল্লোন অসি হোংহল্লে।
প্রধান মন্ত্রীনা হায়খি লৈনুং অমসুং মথক্তা মেত্রো শানবা স্কুলশিং অমসুং ইঞ্জিনিয়ারিংগী মহৈরোয়শিংদা ৱাখল তাহনগদবনি। মসিনা লৈবাক অসি চাউখৎহনবদা তেক্নোলোজিগী থৌদাংগী মতাংদা মখোয়দা থাজবা লৈহনগনি। মীয়ামগী লন-থুম মাঙহন্দবা অমসুং মখোয়না মপুনি হায়না খঙবা মীরোল অমা থোরক্কনি অমসুং মখোয়দা শেন থাদবা কান্নগনি।
লোইশিল্লকপগী ৱারোলদা প্রধান মন্ত্রীনা হায়খি অজাদি কা অমৃত কালদা চাউখৎলবা ভারত অমা শেম্নবা মতমগী অনৌবা ইনফ্রাস্ত্রকচর শেমগৎনবা অহেনবা খোঙজেল অমসুং শক্তি দরকার ওইরে। মসিগী মাইকৈ অসিদা গুজরাতকী দবল ইঞ্জিন সরকারনা অকনবা থবক পায়খৎলে। সবকা প্রায়াস আশিদা ঐনা থাজবা থম্লি অমসুং মসিনা থবক ওইনা পাংথোকপা ঙমহনগনি।
থৌরম অদুদা গুজরাতকী চীফ মিনিস্তর শ্রী ভুপেন্দ্র পতেল, গুজরাতকী রাজ্যপাল শ্রী অচার্য়া দেবব্রাদ, রেলৱেজগী য়ুনিয়ন মিনিস্তর শ্রী অসবিনি বৈসনাব, হাওসিং অমসুং আর্বান এফেয়ার্সকী য়ুনিয়ন মিনিস্তর শ্রী হরদিব সিংহ পুরি, এম.পি শ্রী সি আর পতিল, রেলৱেজগী রাজ্য মন্ত্রী শ্রীমতি দরসানা বিক্রম জারদোসি অমসুং অহমেদেবাদকী মেয়োর শ্রী কৃতি পারমার শরুক য়াখি।
নুঙগীৱারোল
বন্দে ভারত এক্সপ্রেসনা এয়রক্রাফ তোংবগা মান্নবা নুংঙাইবা অমা ফাওহল্লি। মসিদা লৈবাক অসিনা পুথোকচবা ত্রেন কোল্লিসন এবোইদেন্স সিস্তেম-কাবাচ য়াওনা খ্বাইদগী নৌবা অশোই-অঙাম থোকহন্দনবা খুদোংচাবশিং হাপ্লে। ইজুকিউতিপ কোচশিং য়াওনা ক্লাস খুদিংমক্তা ঙাথবা য়ারবা সিতশিং য়াওরে অমসুং সিতশিং ১৮০ দিগ্রিদা লৈবা য়ারে। কোচ খুদিংমক্তা পেসেঞ্জরশিংগী নুংঙাইনবা ইঞ্জি ৩২গী স্কৃনশিং হাপ্লে।
অহমেদবাদ মেত্রো রেল প্রোজেক্কী ফেজ-১ অসি ইস্ত-ৱেস্ত কোরিদোরদা অপ্পারেল পার্কতগী থালতেজ ফাওবা অমসুং নোর্থ-সাউথ কোরিদোরদা মোতেরাদগী গ্যাসপুর ফাওবদা পুন্না অশাংবা কিলোমিতর ৩২নি। ইস্ত-ৱেস্ত কোরিদোরদা থালতেজ-বাসত্রাল রুত্তা স্তেসন ১৭ লৈরি। মসিগী কোরিদোর অসিদা কিলোমিতর ৬.৬কী লৈনুংগী শরুক অমা লৈরি অমসুং মসিদা স্তেসন ৪ লৈ। কিলোমিতর ১৯ শাংবা নোর্থ-সাউথ কোরিদোর অসিনা গ্যাসপুরদগী মোতেরা স্তেসন ফাওবা শম্নদুনা পুন্না স্তেসন ১৫ লৈ। ফেজ-১ প্রোজেক অসি পুন্না লুপা কোতি ১২,৯০০ হেন্না চঙনা পায়খৎপনি।
অহমেদবাদ মেত্রো অসি লৈনুংগী তেন্নেলশিং, ভাইয়াদকশিং অমসুং থোঙশিং, মথক অমসুং লৈনুংগী স্তেসনশিং, বাল্লাস্তলেস রেল ত্রেকশিং অমসুং দ্রাইভর য়াওদনা চেনবা অসিনচিংবা খ্বাইদগী নৌবা অমসুং ফবা ইনফ্রাস্ত্রকচর প্রোজেক অমনি। মেত্রো ত্রেন্দা ইনর্জি য়াম্না চঙদবা প্রোপুলসন সিস্তেম অমা য়াওদুনা মসি ইনর্জি চাদা ৩০-৩৫ ফাওবা কনবা ঙম্লে। ত্রেন অসিদা অফবা মখলগী সস্পেন্সন সিস্তেম অমা য়াওদুনা অতোঙবশিং য়াম্না নুংঙাইবা অমা ফাওহল্লে।
ভারত রেলৱেজ অমসুং বসশিংগা লোয়ন্না মল্তি-মোদালগী চৎথোক-চৎশিনগী খুদোংচাবশিং ফংহল্লে। মসিদা বি.আর.তি.এসগা লোয়ন্না রানিপ, বাদাজ, এ.ই.ই স্তেসনগা শম্নরে অমসুং ভারত রেলৱেজনা গান্ধীধাম, কালুপুর অমসুং সবরমাতি স্তেসনগা শম্নরে। কালুপুরদা মেত্রো লাইন অসি মুম্বাই অমসুং অহমেদবাদকা শম্নবা অয়াংবা রেল সিস্তেমগা শম্নগনি।
তোঙান-তোঙানবা চাউখৎ-থৌরাংগী প্রোজেকশিং শঙ্গাবা অমসুং উরেপ-উয়ুং তম্বা অসিনা প্রধান মন্ত্রীগী মালেম থাক্কী ইনফ্রাস্ত্রকচর শেমগৎনবা, সহরগী চৎথো—চৎশিন ফগৎহন্নবা অমসুং মল্তি-মোদাল কন্নেক্তিবিতি ফগৎনবা থাজবা পীখিবশিং অদুগী মমিনি। মহাক্কী সরকারনা মীচম মীয়াম হিংবা লাইবা হেনগৎহন্নবা মীৎয়েং চঙলি হায়বদু মসিনা উৎলে।
******
(Release ID: 1864037)
Visitor Counter : 114
Read this release in:
English
,
Urdu
,
Marathi
,
Hindi
,
Assamese
,
Bengali
,
Punjabi
,
Gujarati
,
Odia
,
Tamil
,
Telugu
,
Kannada
,
Malayalam