ভারত ইমানা য়াইফরে!

ভারত ইমানা য়াইফরে!

ঙসিগী য়াইফরবা থৌরম অসিদা শরুক য়ারিবা গুজরাতকী রাজ্যপাল, অচার্য় দেবব্রতজী, ঐখোয়গী মীয়াম্না য়াবা মুখ্য মন্ত্রী, শ্রী ভুপেন্দ্র ভাই পতেল, ঐহাক্কী পার্লিয়ামেন্তকী মরুপ, শ্রী সি.আর. পাতিল, ভারতকী সরকারগী মন্ত্রী শ্রী অনুরাগজী, রাজ্যগী মন্ত্রী, শ্রী হর্শ সাংঘবীজী, মেয়র কিরিত ভাই, শান্ন-খোৎনবগী লুপ অমসুং মীহুৎশিং অমদি লৈবাক্কী মফম খুদিংদগী লাক্লিবা শান্নরোইশিং!

অদোম পুম্নমকপু ঐহাক্না তরাম্না ওক্লি, ইকায় খুম্নজরি। ঙসিগী শক্তম, ঙসিগী অকোয়বগী ফিভম অসি ৱাহৈনা ফোংদোকপা ঙম্লরোই। খ্বাইদগী চাউবা স্তেদিয়ম, মালেমগী নহা ওইরিবা লৈবা অমসুং লৈবাক্কী শান্ন-খোৎনবগী খ্বাইদগী চাউবা থৌরম অমা! থৌরম অসিনা অসুক য়াম্না নীংথিবা অমসুং তোপ-তোপ্পা ওইরিবসিদা, মসিগী ইনর্জী অসিদি মহৌশা মান্নদবা তোঙানবা অমা ওইফম থোকপনি। লৈবাক্কী মফম খুদিংদগী লাক্লিবা শান্নরোই ৭০০০ হেনবা, শরুক য়ারিবা মীওই ১৫০০০ হেনবা , কোলেজ, য়ুনিভর্সিতী অমসুং স্কুল ৩৫০০০ হেনবগা অমসুং মহৈরোই লাখ ৫০ হেনবগা নেস্নেল গেম্সকা হকথেংননা থেংনরিবা অসি মমাংদা অমুক্তা থোকখিদ্রি অমসুং য়াম্না নীংথিবা মতৌ ওইরি। ‘জুরেগা ইন্দিয়া, জিতেংগে ইন্দিয়া’ অসি নেস্নেল গেম্স অসিগী এন্থেম্নি। ঐহাক্না জুরেগা ইন্দিয়া হায়রক্কে, অদোম্না জিতেংগে ইন্দিয়া হায়বীরকউ। ‘জুরেগা ইন্দিয়া, জিতেংগে ইন্দিয়া’, ‘জুরেগা ইন্দিয়া, জিতেংগে ইন্দিয়া’, ‘জুরেগা ইন্দিয়া, জিতেংগে ইন্দিয়া’ খোল্লাও অসিনা ঙসিদি অতিয়া নিল্লে। অদোমগী থৱাই য়াওবগী মতৌসি অদোমগী মাইথোংদা মমি তারি। শান্নরোইশিংগী মায়থোংদা তারিবা থাজবগী মমিনা ভারতকী শান্নখোৎনবগী সনাগী য়ুগ তাক্লি। নেস্নেল গেম্সকী প্লেতফোর্ম অসিনা অদোম পুম্নমক্কী লোঞ্চিং পেদ ওইগনি। মশান্নশিং অসিদা শরুক য়ারিবা শান্নরোই খুদিংবু ঐহাক্না মায় পাকপগী য়াইফ পাউজেল পীজরি।

মরূপশিং,

অসিগুম্বা চাউরবা থৌরমবু তেল্লবা মতমদা শীন-লাঙবা ঙম্বগী গুজরাতকী মীয়ামগী তৌবা ঙম্বগী মতিকপুসু ঐহাক্না থাগৎপা ফোংদোক্লি। মসি গুজরাতকী মতিক্নি, গুজরাত মীয়ামগী মতিক্নি। অদুবু, করিগুম্বা অৱাৎ-অপা লৈরবসু, গুজরাতী অমা ওইনা ঐহাক্না মাংজৌননা ঙাকপীনবা হায়জরি। ঙরাং অহমেদবাদতা পাংথোকপা ফজরবা দ্রোন শো উৎখি, মীয়াম খুদিংনা থৌওং অসিদা পুক্নিং লুপখি অমসুং মসিগুম্বা থৌওং অমা উবদা চাউথোকচবা ফাওনখি। দ্রোনগুম্বা তেক্নোলোজীবু অসুক য়াম্না নীংথিনা শিজিন্নবগী মতৌনা গুজরাত অমসুং ভারতপু অনৌবা থাক্তা পুরগনি। মফমসিদা মতম খরগী মমাংদা নেস্নেল স্পোর্ত কনক্লেব পাংথোকখিবা অদুগী মায় পাকপগী মতাংদা ৱারী কয়া শান্নরি। মসিগুম্বা হোৎনজমন কয়াগীদমক্তা ঐহাক্না মুখ্য মন্ত্রী, শ্রী ভুপেন্দ্র ভাই পতেল, অমসুং মহাক্কী অপুনবা তীম্বু থাগৎচরি। ঙসিদগী নুমিৎ খরনিগী মমাংদা, নেস্নেল গেম্স মাস্কোত, ‘সাৱজ’ হাংদোকখি। গিরগী নোংশাবু উৎলিবা মাস্কোত অসিনা ভারতকী নহাশিংনা শান্নবুংদা খোঙদাবা মতমদা চেল্লিবা অকীবা পোক্তবগী ইথিলগী ৱাখল্লোন তাক্লি। ভারতনা মালেমগী থাক্তা চাউখৎলকপগী খুদম অমসু মসিনা ওইরি।

মরূপশিং,

অদোম্না ঙসি লৈরিবা স্তেদিয়ম অমসুং স্পোর্ত কমপ্লেক্স অসিগী তোঙানবা মগুন অমা চেল্লি। মসিনা তোঙানবা ইথিল অমসু পীরি। মসিনা মালেমগী খ্বাইদগী চাউবা স্তেদিয়ম্নি। সর্দার পতেল স্পোর্ত ইনক্লেব অমসুং কমপ্লেক্স অসিগী তোঙানবা মগুন অমসু লৈরি। অতোপ্পা কমপ্লেক্সশিংনা অখন্নবা মশান্না খরগী ফেসিলিতী খক্তদা অকক্নবা মতমদা, সর্দার পতেল স্পোর্ত কমপ্লেক্সনা ফুতবোল, হোক্কী, বাস্কেতবোল, কবদ্দী, বোক্সিং অমসুং লোন তেন্নিসকুম্বা মশান্না কয়াগী ফেসিলিতী লৈরি। মসিনা, মওং অমদা, লৈবাক্কী অপুনবা মোদেল অমা ওইরি। ইনফ্রাস্ত্রকচরগী স্তেন্দর্দনা ফবা মতমদা, শান্নরোইশিংগী থাজবসু চাং য়াম্না হেল্লি। ঐখোয়গী শান্নরোই খুদিংনা কমপ্লেক্স অসিদা থেংনবা এক্সপেরিএন্স খুদিং নুংঙাইগনি হায়বগী ঐহাক্না থাজবা থম্লি।

ঐহাক্কী নহারোল মরূপশিং,

লাইবক ফবা অমনা, হৌজিক অসি নবরাত্রীগী শেংল্বা কুহ্মৈসু পাংথোক্লি। গুজরাতকী ইমা দুর্গা লাৎচবা অমসুং গর্বাগী মতাংদা মশাগী তোঙানবা শক্তাক লৈজরি। অতোপ্পা রাজ্যশিংদগী লাক্লিবা শান্নরোইশিংনা, নবরাত্রী কুহ্মৈগী নুংঙাইবসু শোইদনা লৌবীয়ু হায়জরি। গুজরাত মীয়াম অসি মীথুংলেনগী সেবা, অমসুং অদোম্বু তরাম্না ওক্নবা করিমত্তা চিত্থহল্লোই। নীরজ চোপ্রানা ঙরাং গর্বাগী নুংঙাইবা লৌবা ঐহাক্না উরে। কুহ্মৈগী মসিগুম্বা নুংঙাইবা মতৌনা ভারত মচা খুদিংবু অমত্তা ওইহল্লি, অমনা অমগী মতেং পাংবগী ইথিল পীরি। ঐহাক্না মসিগুম্বা থৌরম অসিদা, অদোম পুম্নমক অমসুং গুজরাতকী মীয়াম্বু নবরাত্রীগী য়াইফ পাউজেল পীরি।

ঐহাক্কী নহামরূপশিং,

লৈবাক অমগী চাউখৎ-থৌরাং, মদুবু মালেম্না ইকায় খুম্নবগা মখোয়না শান্ন-খোৎনবদা মায় পাকপগা হকথেংনবা মরী লৈনৈ। লৈবাক্কী লুচিং থৌদাং অসি নহাশিংদা পীবনি, শান্ন-খোৎনবা, নহারোলগী পাঙ্গলনা মদুগী শক্তি পীবনি। চাউখৎ-থৌরাং অমসুং শেন্মিৎলোন্দা মকোক থোংলিবা লৈবাকশিংনা মেদল লিস্ততসু মকোক্তা লৈবা অদোম্না উরমগনি। মরম অদুনা, শান্নবুংদা শান্নরোইশিংনা মায় পাকপনা অতোপ্পা সেক্তরদা মায় পাকপগী লম্বীসু য়াৎলি। স্পোর্তকী সোফ পাৱরনা লৈবাক্কী শক্তাকপু চাং কয়া মপাঙ্গল কলহল্লি।

মরূপশিং,

ঐহাক্না শান্ন-খোৎনবগা মরী লৈনবা ঐহাক্কী মরুপশিংদা মায় পাকপা হায়বসি থবক পাংথোকপা হৌবদগী হৌই হায়রিবনি। মসিনা হায়বদি, অদোম্না করিগুম্বা অমা হৌবা মতমদা, অদোমগী মায় পাকপসু হৌই হায়বনি। অদোম্না, করিগুম্বা, মখা তানা চৎপগী ইথিল মাঙদ্রবদি, মায় পাকপনসু অদোম্বু তান্নগনি। নীংতম্বগী অমৃতকাল অসিদা লৈবাক্না মসিগুম্বা ইথিলগা লোয়ননা অনৌবা ভারত অমা শেম্লি। মালেম্না ওলিম্পিক্সকুম্বা শান্ন-খোৎনবগী মহা কুম্ভগীদমক্তা ঙাওজবা মতম অমা লৈরম্মি। অদুবু, মতমদুদা মসিগী থৌরম অসি শুপ্নগী জেনেরেল নোলেজকী হীরম অমখক্কা মান্নরম্মি। অদুবু, হৌজিক্তি মসিদা অহোংবা য়াম্না লাক্লে। অনৌবা মুদ লাক্লে, অনৌবা অকোয়বগী ফিভম লৈরে। ইং ২০১৪দগী হৌনা লৈবাক অসিদা ‘ফর্স্ত অমসুং বেস্ত’কী চৎনবী অমা হৌরক্লিবা অসিগা লোয়ননা ঐখোয়গী নহারোলশিংনা শান্ন-খোৎনবদসু মশক থোকপা থৌওং পাংথোক্তুনা চৎনবী অসিগী মগুন ঙাক্লি।

চহি ৮গী মমাঙদা, ভারতকী শান্নরোইশিংনা মালেমগী ওইবা থৌরম ১০০দগী তানা শরুক য়ারম্মি হায়বসি অদোম্না খঙলবনি। হৌজিক্তি, মসিগী মশিংনা হেনগত্তুনা ৩০০ য়ৌরে। ভারতকী শান্নরোইশিংনা চহি ৮গী মমাঙদা, মশান্না ২০-২৫ খক্তমক শান্নরম্মি। হৌজিক্তি, ভারতকী শান্নরোইশিংনা মশান্না চাউরাকপা ৪০ শান্নরে। ভারতকী মেদল মশিং অমসুং মমিং চৎপগী মতৌসু নোংমগী হেনগৎলক্লি। কোরোনাগী লুরবা মতমগী মরক্তা ভারতকী শান্ন-খোৎনবগী মোরেল হন্থহন্দনবা হোৎনখি। ঐখোয়না শান্ন-খোৎনবগী ইথিলগা লোয়ননা স্পোর্তকীদমক্তা হোৎনখি। তি.ও.পি.এস.কুম্বা স্কিমগী খুত্থাংদা মিসন মোদতা চহি কয়া চঙনা হোৎনখি। ঐখোয়গী শান্নরোইশিংবু মীরমদা থাদুনা ত্রেনিং তৌহনখি, তঙাই ফদবা ইনফ্রাস্ত্রকচর ফংহনখি। ঙসিদি, মমিং লৈরবা শান্নরোইশিংগী মায় পাকপদগী হৌরগা তুংগী মায় পাক্কদবা শান্নরোই শেমগৎপা ফাওবদা, তি.ও.পি.এস.না অচৌবা থৌদাং লৌরি। ঙসিদি, ঐখোয়গী নহা খুদিংনা মশান্না খুদিংদা রেকোর্দ থম্লি, মশাগী রেকোর্দতগীসু হেন্দোক্না চৎলি। ভারতনা হন্দক্কী তোকিয়ো ওলিম্পিক্সতা মশক থোকপা পরফোর্মেন্স উৎখি। মান্নবা মতৌ ওইনা, বেদমিন্তন তীম্না থোমাস কপ লৌখিবনসু অনৌবা নুংঙাইবা অমা পুরকখি। তোঙানবা ইন্তর্নেস্নেল ইভেন্তশিংদা পেরা এথলীতশিংনা মায় পাকপা কয়া পুরকখি, য়ুগান্দাদা পেরা বেদমিন্তন তীম্না মেদল ৪৭ ফংদুনা লৈবাক্কী মিংচৎ পুরকখি। মসিগুম্বা অনৌবা ইহৌ অসিদা নুপী শান্নরোইশিংনা মান্নবা অমসুং মপাঙ্গল লৈবা মতৌগা লোয়ননা শরুক য়ারি। ঐখোয়গী নুপীমচাশিংনা তিরঙ্গাগী মপাঙ্গল খ্বাইদগী হেন্না উৎলি।

মরূপশিং,

মসিগুম্বা মায় পাকপা অসি মমাংগী মতমদসু ওইথোক্লম্বনি, অদুবু ভারতকী স্পোর্ত অসিদা তঙাই ফদবা প্রোফেস্নেলিজম লৈবগী মহুত্তা শেঞ্জা থুমজা অমসুং মশাগী মীওই খক্তদা খুদোংচাবা পীবগী মতৌনা অয়েৎপা কয়া পীদুনা লাকখি। ঐখোয়না মসি চুম্থোকখি অমসুং নহাশিংদা মখোয়গী মঙলান ফংবা ঙমগনি হায়বগী থাজবা পীখি। পোলিসী শেম্বা খক্কী থৌওংখক্তদা থাজবা থমদবা অনৌবা ভারতনা লৈবাক্কী নহাশিংগী অপাম্বগা লোয়ননা তুংলমচত্তা চঙশিল্লি। ফিত ইন্দিয়া অমসুং খেলো ইন্দিয়াগুম্বা হোৎনবগী থৌওংনা মীয়ামগী ইহৌ ওইরে। লৈবাক্কী স্পোর্ত বজেৎনা হৌখিবা চহি ৮দা চাউরাক্না ৭০%গী চাং হেনগৎখি। লৈবাক মনুংদা স্পোর্ত য়ুনিভর্সিতী কয়া লিংখৎলে অমসুং এদভান্স ওইবা স্পোর্ত ইনফ্রাস্ত্রকচর কয়াসু লৈবাক্কী কাচিন কোয়া খুদিংদা লৈহল্লে। শান্নবদগী পোত্থারবা শান্নরোইশিংগী পুন্সিবুসু হেন্না নুংঙাইহন্নবা থবক কয়াসু পায়খৎলি। অনৌবা জেনেরেসন্না এক্সপেরিএন্স লৈরবা পোত্থাখ্রবা শান্নরোইশিংগী মফমদগী অহেনবা কান্নবা ফংবগী মাইকৈদসু থবক কয়া পায়খৎলি।

মরূপশিং,

ভারতকী সিভিলাইজেসন অমসুং কলচরগী মতাংদা হায়রদুনা, প্রধান মন্ত্রীনা স্পোর্তনা চহি লিশিং কয়াদগী ভারতকী লিগেসী অমসুং চাউখৎপগী খোঙচৎকী শরুক অমা ওইদুনা লাক্লি। নীংতম্বগী অমৃত কালগী মতমসিদা, লৈবাক অসিনা মশাগী হেরিতেজপু চাউথোকচবগা লোয়ননা হান্নগুম্না হঞ্জিলহল্লক্লি। লৈবাক্কী থৱাই য়াওবগী মতৌনা মশান্না অমখক্তদা অকক্নবা থমদ্রে, ‘কালারিপায়ত্তু’ অমসুং ‘য়োগআসন’ গুম্বা অতোপ্পা মশান্না কয়াসু মমিং চৎপা হেনগৎলক্লি। মসিগুম্বা মশান্নশিংবু নেস্নেল গেম্সতা মনুং চল্লিবা অসিদা ঐহাক্না নুংঙাইবা ফাওই। মশান্নশিং অসিবু মফমসিদা মহুৎ শিল্লিবা অদোমগী মফমদা অখন্ননা ৱাফম অমা থম্নীংই। নাকল অমদা, অদোম্না চহি লিশিং কয়াগী চৎনবী তুংলমচত্তা পুরি, অতোপ্পা নাকল অমদনা, অদোম্না শান্ন-খোৎনবগী তুংগী মালেম্বুসু লুচিংলি। লাক্কদৌরিবা চহিশিংদা, মশান্নশিং অসি মালেম্না শকখঙলগনি, মদুগী মতমদা, অদোমগী মিংবু হীরম অসিদা লিজেন্দ হায়না খঙনগনি

মরূপশিং,

ঐহাক্না লোইশিল্লকপদা অদোম শান্নরোইশিংগী মফমদা মন্ত্রা অমা পীনিংই। করিগুম্বা অদোম্না কম্পিতিসন অসিদা মায় পাকপা পাম্লবা, অদোম্না কম্মিতমেন্ত অমসুং কন্তিনুইতীগা লোয়ননা হিংবা তমগদবনি। মায়থীবা অমসুং মায় পাকপা হায়বা অসিনা অরোইবা মহৈনি খল্লোইদবনি। শান্ন-খোৎনবগী ইথিলনা পুন্সিগী শরুক অমা ওইরকপা মতমদা, নহা ওইরিবা ভারতকুম্বা লৈবাক্কী মঙলান মঙফাওনবা ঙমগনি, লোইনাইদ্রবা অমসুং ওইথোকপা য়াবা থৌওং কয়া পাংথোকপা ঙমগনি। অদোম্না নিংশিংগদবদি, লান শোক্নবা মফমদা চাউখৎ থৌরাং লাকপনি। অদোম্না শান্নবুংগী মপান্দসু হায়রিবা থৌওং অসি লেপ্তনা পাংথোক্কদবনি। মসিগী খোঙজেল অসিনা অদোমগী পুন্সিগী মিসন ওইহনগদবনি। নেস্নেল গেম্সতা অদোম্না মায় পাকপনা মসিগী নুংঙাইবা ফোংদোকপা অমসুং তুংগীদমক্তা অনৌবা থাজবা অমা লৈহনগনি হায়বগী ঐহাক্না থাজবা থম্মি। মসিগী থাজবা অসিগা লোয়ননা, ঐহাক্না ৩৬শুবা নেস্নেল গেম্স হৌদোক্লে হায়না লাউথোক্লি।

*****