ପୋଷ୍ଟ କରାଯିବା ଦିନାଙ୍କ:
29 SEP 2022 1:09PM by PIB Bhubaneswar
ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଆଜି (୨୯.୦୯.୨୦୨୨) ସୁରଟରେ ୩୪ଠଠ କୋଟି ଟଙ୍କାରୁ ଉଦ୍ଧ୍ୱର୍ ବିଭିନ୍ନ ପ୍ରକଳ୍ପର ଶିଳାନ୍ୟାସ କରିବା ସହ ଅନେକ ପ୍ରକଳ୍ପ ଦେଶ ଉଦେଶ୍ୟରେ ଉତ୍ସର୍ଗ କରିଛନ୍ତି । ପ୍ରଧାନମନ୍ତ୍ରୀ ସଡ଼କ ଭିତ୍ତିଭୂମି କାର୍ଯ୍ୟର ପ୍ରଥମ ପର୍ଯ୍ୟାୟ ଓ ହୀରା ଗବେଷଣା ବାଣିଜି୍ୟକ (ଡ୍ରିମ) ନଗରୀର ମୁଖ୍ୟ ପ୍ରବେଶ ଦ୍ୱାର ମଧ୍ୟ ଉଦଘାଟନ କରିଛନ୍ତି । ଏହା ବ୍ୟତୀତ ପ୍ରଧାନମନ୍ତ୍ରୀ ଜୈବ ବିବିଧତା ଉଦ୍ୟାନର ମଧ୍ୟ ଶିଳାନ୍ୟାସ କରିଛନ୍ତି । ଡକ୍ଟର ହେଡ ଗେୱାର ସେତୁର ଭୀମରାଡ଼ - ବାମରୋଲୀ ସେତୁ ମଧ୍ୟରେ ପ୍ରାୟ ୮୭ ହେକ୍ଟର ପରିମିତ ସ୍ଥାନରେ ଏହା ଅବସ୍ଥିତ । ସୁରଟର ବିଜ୍ଞାନ କେନ୍ଦ୍ର ଠାରେ ମଧ୍ୟ ପ୍ରଧାନମନ୍ତ୍ରୀ ମୋଦୀ ସଂଗ୍ରହାଳୟର ଉଦଘାଟନ କରିଛନ୍ତି ।
ସମବେତ ଜନତାଙ୍କୁ ଉଦବୋଧନ ଦେଇ ପବିତ୍ର ନବରାତ୍ରୀ ଅବସରରେ ସୁରଟର କେତେକ ପ୍ରକଳ୍ପର ଶିଳାନ୍ୟାସ ଓ ଉଦଘାଟନ କରିବାର ସୁଯୋଗ ପାଇଥିବାରୁ ଖୁସି ପ୍ରକଟ କରିଥିଲେ । ବିଶେଷ ପାକ ପ୍ରସ୍ତୁତି ଅଞ୍ଚଳରେ ନବରାତ୍ରୀ ପାଳନ କରୁଥିବା ତାଙ୍କ ଭଳି ଲୋକଙ୍କୁ ସୁରଟ ଆସିବା ଟିକେ କଷ୍ଟକର ବୋଲି ସେ ମଜାଳିଆ ଢଙ୍ଗରେ କହିଥିଲେ । ୭୫ଟି ଅମୃତ ସରୋବର କାର୍ଯ୍ୟ ପୁରା ଦମରେ ଚାଲିଥିବାରୁ ପ୍ରଧାନମନ୍ତ୍ରୀ ସନ୍ତୋଷ ବ୍ୟକ୍ତ କରିଥିଲେ । ପ୍ରଧାନମନ୍ତ୍ରୀ କହିଥିଲେ ଯେ ସୁରଟ ନଗରୀ ହେଉଛି ଜନ ସଂହତି ଓ ସାଧାରଣ ଅଂଶୀଦାରୀତାର ଆଶ୍ଚର୍ଯ୍ୟଜନକ ଦୃଷ୍ଟାନ୍ତ । ସୁରଟର ସବୁଠାରୁ ବଡ଼ ବୈଶିଷ୍ଟ୍ୟ ଉପରେ ଆଲେକପାତ କରି ପ୍ରଧାନମନ୍ତ୍ରୀ ଏହି ନଗରୀ ଶ୍ରମକୁ ସମ୍ମାନ ଦେଇଥାଏ ବୋଲି କହିଥିଲେ । “ଭାରତବର୍ଷରେ ଏମିତି କୌଣସି ସ୍ଥାନ ନାହିଁ ଯେଉଁଠାରୁ, ସୁରଟକୁ ଲୋକେ ଆସି ରହିଛନ୍ତି । ଏହା ଏକ “ମିନି ହିନ୍ଦୁସ୍ତାନ” ବୋଲି ଶ୍ରୀ ମୋଦୀ କହିଥିଲେ ।
ଶତାବ୍ଦୀର ଆରମ୍ଭ ଯୁଗ କଥା ମନେ ପକାଇ ପ୍ରଧାନମନ୍ତ୍ରୀ କହିଥିଲେ ଯେ ଯେତେବେଳେ ଥ୍ରୀ ‘ପି’ ଯଥା- ପବ୍ଲିକ, ପ୍ରାଇଭେଟ, ପାର୍ଟନରସିପ କଥା ବିଶ୍ୱରେ ଚର୍ଚ୍ଚା ହେଉଥାଏ ସେତେବେଳେ ସୁରଟ ହେଉଛି ଫୋର ‘ପି’ର ଉଦାହରଣ। “ଫୋର ‘ପି’ ହେଲା- ପିପୁଲ, ପବ୍ଲିକ, ପ୍ରାଇଭେଟ ଓ ପାର୍ଟନରସିପ । ଏହି ମଡେଲ ସୁରଟକୁ ସ୍ୱତନ୍ତ୍ର ଭାବେ ଗଢ଼ି ତୋଳିଥାଏ” ବୋଲି ଶ୍ରୀ ମୋଦୀ କହିଥିଲେ । ସେ କହିଥିଲେ ଯେ ଆଜି ସୁରଟ ବିଶ୍ୱର ଦ୍ରୁତତମ ମହାନଗରୀ ଭାବେ ଅଭିବୃଦ୍ଧି ହାସଲ କରିଛି । ସେ ଦିନ ଆଉ ନାହିଁ ଯେତେବେଳେ ସୁରଟ ମହାମାରୀ ଓ ବନ୍ୟା ପାଇଁ ନାମିତ ହେଉଥିଲା। ଜନସାଧାରଣଙ୍କ ଜୀବନରେ ସୁରଟର ଜୈବ ବିବିଧତାପୂର୍ଣ୍ଣ ଉଦ୍ୟାନ ଉତ୍ତମ ପ୍ରଭାବ ପକାଇ ବୋଲି ସେ କହିଥିଲେ ।
ଡବଲ ଇଞ୍ଜିନ ସରକାରଙ୍କ ସକାରାତ୍ମକ ପ୍ରଭାବ ଉପରେ ଆଲୋକପାତ କରି ପ୍ରଧାନମନ୍ତ୍ରୀ କହିଥିଲେ ଯେ ଗରିବ ଓ ମଧ୍ୟବିତ୍ତ ଲୋକମାନଙ୍କ ପାଇଁ ସୁରଟରେ ଆବାସ ଓ ଅନ୍ୟାନ୍ୟ ସୁବିଧା ସୁଯୋଗ ଆଶାତୀତ ଭାବେ ବୃଦ୍ଧି ପାଇଛି । ଏ ପର୍ଯ୍ୟନ୍ତ ଦେଶରେ ୪ଠ ନିୟୁତରୁ ଅଧିକ ଗରିବ ରୋଗୀ ଆୟୁଷ୍ମାନ ଭାରତ ଜରିଆରେ ମାଗଣା ଉପଚାର ସୁବିଧା ପାଉଛନ୍ତି । “ସେଥିରୁ ୩୨ ଲକ୍ଷରୁ ଅଧିକ ରୋଗୀ ଗୁଜରାଟର ହୋଇଥିବା ବେଳେ ସୁରଟରୁ ୧.୨୫ ଲକ୍ଷ ରୋଗୀ ଅଛନ୍ତି” ବୋଲି ପ୍ରଧାନମନ୍ତ୍ରୀ କହିଥିଲେ ।
ସୁରଟର ବୟନ ଓ ହୀରା ବ୍ୟବସାୟ ଉପରେ ମନ୍ତବ୍ୟ ଦେଇ ପ୍ରଧାନମନ୍ତ୍ରୀ କହିଥିଲେ ଯେ ଦେଶବ୍ୟାପୀ ଏହା ଅନେକ ଲୋକଙ୍କୁ ଜୀବନ ଜୀବିକାରେ ସହାୟକ ହୋଇଥାଏ । ଯେତେବେଳେ ଡ୍ରିମ ସିଟି ପ୍ରକଳ୍ପ କାର୍ଯ୍ୟ ସମ୍ପୂର୍ଣ୍ଣ ହେବ ସୁରଟ ବିଶ୍ୱର ସବୁଠାରୁ ସୁବିଧାଜନକ ଓ ନିରାପଦ ହୀରା ବ୍ୟାପାର କେନ୍ଦ୍ର ଭାବେ ପରିଣତ ହେବ ବୋଲି ସେ କହିଥିଲେ । ନଗରୀର ଭିତ୍ତିଭୂମି ବିକାଶ ଉପରେ ଆଲୋକପାତ କରି ପ୍ରଧାନମନ୍ତ୍ରୀ କହିଥବଲେ ଯେ ନଗରୀରୁ ବିମାନବନ୍ଦର ପର୍ଯ୍ୟନ୍ତ ହୋଇଥିବା ସଡ଼କ ସଂଯୋଗ ସୁରଟର ସଂସ୍କୃତି, ସମୃଦ୍ଧି ଓ ଆଧୁନିକତାକୁ ସୂଚିତ କରୁଛି । ଦିଲ୍ଲୀର ପୂର୍ବତନ ସରକାର ନଗରୀର ବିମାନବନ୍ଦର ବିକାଶ ପାଇଁ ଧ୍ୟାନ ଦେଉ ନ ଥିଲେ ବୋଲି ସେ କହିଥିଲେ । “ଆଜି ଦେଖନ୍ତୁ, ଦିନକୁ ଏଠାରୁ କେତେ ବିମାନ ଯାତାୟତ କରୁଛି । ପ୍ରତିଦିନ କେତେ ଲୋକ ଏଠାରେ ଓହ୍ଲାଉଛନ୍ତି” ବୋଲି ପ୍ରଧାନମନ୍ତ୍ରୀ କହିଥିଲେ । ସୁରଟ ମେଟ୍ରୋ ପାଇଁ ଅନୁମୋଦନ ସମୟରେ ମଧ୍ୟ ଏକାଭଳି ପରିସ୍ଥିତି କିପରି ଉପୁଜିଥିଲା ପ୍ରଧାନମନ୍ତ୍ରୀ ତା’ର ଅବତାରଣା କରିଥିଲେ ।
ଲଜିଷ୍ଟିକ୍ସର ଗୁରୁତ୍ୱ ଉପରେ ଆଲୋକପାତ କରି ପ୍ରଧାନମନ୍ତ୍ରୀ କହିଥିଲେ ଯେ ସୁରଟବାସୀ ଏହାର ବ୍ୟାବସାୟିକ ଗୁରୁତ୍ୱ ଉପରେ ଅବଗତ ଅଛନ୍ତି । ଜାତୀୟ ଲଜିଷ୍ଟିକ୍ସ ନୀତି ଉପରେ ମନ୍ତବ୍ୟ ଦେଇ ପ୍ରଧାନମନ୍ତ୍ରୀ କହିଥିଲେ ଯେ ବହୁମୁଖୀ ସଂଯୋଗ ଉପରେ କାର୍ଯ୍ୟ ଚାଲିଛି । ହାଜିରା-ଗୋଗା ରୋପାକ୍ସ ନୌ ସେବା ଦ୍ୱାରା ଉଭୟ ସମୟ ଓ ଅର୍ଥ ବଂଚାଯାଇ ପାରୁଛି । ଏହାଦ୍ୱାରା ୪ଠଠ କିଲୋମିଟ ରାସ୍ତା ଦୂରତ୍ୱ ହ୍ରାସ ପାଇବା ସହ ରୋପାକ୍ସ ଫଳରେ ସମୟ ୧ଠ-୧୨ ଘଣ୍ଟାରୁ ୩-୪ ଘଣ୍ଟାକୁ ହ୍ରାସ ପାଇଛି । ସୁରଟରୁ କାଶୀ ଓ ପୂର୍ବ ଉତ୍ତର ପ୍ରଦେଶ ସହ ସଂଯୋଗୀକରଣର ଉଦାହରଣ ଦେଇ ପ୍ରଧାନମନ୍ତ୍ରୀ କହିଥିଲେ ଯେ ଟ୍ରକ ବୋଝେଇ ମାଲ ପରିବହନ ହେଉଥିବା ବେଳେ ବର୍ତ୍ତମାନ ରେଳବାଇ ଓ ଉପକୂଳ ବିକାଶ ଅନନ୍ୟ ନବୋନ୍ମେଷ ଉପାୟରେ ସାମଗ୍ରୀ ପରିବହନ ପାଇଁ ଆଗେଇ ଆସୁଛନ୍ତି । ରେଳବାଇ ପକ୍ଷରୁ କୋଚର ପରିପାଟୀ ଏପରି ପରିବର୍ତ୍ତନ କରାଯାଇଛି ଯେ କାର୍ଗୋ ଠିକ ଭାବେ ଫିଟ ହୋଇ ପାରିବ। ଏକ ଟନ ବିଶିଷ୍ଟ କଣ୍ଟେନର ମାନ ସେଥିପାଇଁ ସ୍ୱତନ୍ତ୍ର ଭାବେ ତିଆରି ହୋଇଛି । ଏଗୁଡ଼ିକରୁ ସହଜରେ ମାଲ ବୋଝେଇ ଓ ଖଲାସ ହୋଇ ପାରୁଛି । ପ୍ରାଥମିକ ସଫଳତା ପରେ ଏବେ ସୁରଟରୁ କାଶୀ ନୂତନ ଟ୍ରେନ ଚଳାଚଳ ପାଇଁ ପଦକ୍ଷେପ ନିଆଯାଉଛି । ଟ୍ରେନ ସୁରଟରୁ ମାଲ କାଶୀ ପର୍ଯ୍ୟନ୍ତ ନେବ ।
ପ୍ରଧାନମନ୍ତ୍ରୀ ସୁରଟର ପରିବର୍ତ୍ତିତ ପରିଚୟ ଦେଇ ଏହା କିପରି ହୀରା ନଗରୀରୁ ସେତୁ ନଗରୀ ଓ ବର୍ତ୍ତମାନ ବିଦୁତଚାଳିତ ଯାନ ନଗରୀକୁ ପରିବର୍ତ୍ତିତ ହୋଇଛି ବୋଲି ମନ୍ତବ୍ୟ ଦେଇଥିଲେ । ପ୍ରଧାନମନ୍ତ୍ରୀ ଇଲେକଟ୍ରିକ ଯାନର ଉପକାରିତା ଉପରେ ପ୍ରାଧାନ୍ୟ ଦେଇ ଖୁବଶୀଘ୍ର ସୁରଟ ବିଦୁତଚାଳିତ ଯାନ ପାଇଁ ପ୍ରସିଦ୍ଧି ଲାଭ କରିବ ବୋଲି କହିଥିଲେ । ଶ୍ରୀ ମୋଦୀ କହିଥିଲେ ଯେ ବର୍ତ୍ତମାନର କେନ୍ଦ୍ର ସରକାର ରାଜ୍ୟଗୁଡ଼ିକୁ ବିଦୁତଚାଳିତ ଯାନର ଅଧିକ ଉପଯୋଗ ଦିଗରେ ସାହାଯ୍ୟ କରୁଛନ୍ତି ଓ ଦେଶର ଅନ୍ୟ ସହର ତୁଳନାରେ ସୁରଟ ଏଥିରେ ଆଗରେ ରହିଛି । “ଆଜି ସୁରଟ ନଗରୀରେ ୨୫ଟି ଚାର୍ଜିଂ ଷ୍ଟେସନ ଉଦଘାଟିତ ହୋଇଥିବା ବେଳେ, ସେହି ପରିମାଣର କେନ୍ଦ୍ର ସ୍ଥାପନ ପାଇଁ ଶିଳାନ୍ୟାସ ମଧ୍ୟ ହୋଇଛି । ସୁରଟରେ ଭାରତରେ ୫ଠଠ କେନ୍ଦ୍ର ସ୍ଥାପନର ଏହା ଅୟମାରମ୍ଭ ମାତ୍ର” ବୋଲି ସେ କହିଥିଲେ ।
ଭାଷଣ ଶେଷରେ ପ୍ରଧାନମନ୍ତ୍ରୀ ଗତ ଦୁଇ ଦଶନ୍ଧିରେ ସୁରଟରେ ହୋଇଥିବା ବିକାଶ ଉପରେ ଧ୍ୟାନ କେନ୍ଦ୍ରୀତ କରିଥିଲେ। ଆଗାମୀ ବର୍ଷରେ ଉନ୍ନୟନର ଗତି ଆହୁରି ତୀବ୍ର ହେବ । “ଆଜି ଏହି ବିକାଶ ଡବଲ ଇଞ୍ଜିନ ସରକାର ଉପରେ ଜନସାଧାରଣଙ୍କ ଆସ୍ଥା ଉପରେ ପର୍ଯ୍ୟବସିତ, ଆସ୍ଥା ବଢ଼ିଲେ, ଉଦ୍ୟମ ବଢ଼େ ଓ ସବକା ପ୍ରୟାସ ଜରିଆରେ ବିକାଶର ଗତି ମଧ୍ୟ ବଢ଼େ” ବୋଲି ପ୍ରଧାନମନ୍ତ୍ରୀ କହିଥିଲେ ।
ଗୁଜରାଟ ମୁଖ୍ୟମନ୍ତ୍ରୀ ଶ୍ରୀ ଭୂପେନ୍ଦ୍ର ପଟେଲ, ସଂସଦ ସଦସ୍ୟ ଏମ.ସି.ଆର. ପାଟିଲ ଓ ଶ୍ରୀ ପ୍ରଭୁଭାଇ ବାସବମ, କେନ୍ଦ୍ର ରାଷ୍ଟ୍ରମନ୍ତ୍ରୀ ଶ୍ରୀମତୀ ଦର୍ଶନା ବିକ୍ରମ ଯାରଦୋସ ଓ ଗୁଜରାଟର ସ୍ୱରାଷ୍ଟ୍ର ମନ୍ତ୍ରୀ ଶ୍ରୀ ହର୍ଷ ସଂଘରୀ ଏହି ଅବସରରେ ଉପସ୍ଥିତ ଥିଲେ ।
ପୃଷ୍ଠଭୂମି
ପ୍ରଧାନମନ୍ତ୍ରୀ ସୁରଟରେ ୩୪ଠଠ କୋଟି ଟଙ୍କାର ବିଭିନ୍ନ ପ୍ରକଳ୍ପର ଶିଳାନ୍ୟାସ ଓ ଉଦଘାଟନ କରିଛନ୍ତି । ଏଗୁଡ଼ିକ ମଧ୍ୟରେ ଜଳ ଯୋଗାଣ, ନର୍ଦମା ପ୍ରକଳ୍ପ, ଡ୍ରିମ ସିଟି, ଜୈବ ବିବିଧତା ଉଦ୍ୟାନ ଓ ସାଧାରଣ ଭିତ୍ତିଭୂମି, ଐତିହ୍ୟର ପୁନରୁଦ୍ଧାର, ବିଦୁତ ଯାନ ଭିତ୍ତିଭୂମି ଓ କେନ୍ଦ୍ର ଓ ରାଜ୍ୟ ସରକାରଙ୍କ ବିଭିନ୍ନ ଉନ୍ନୟନ କାର୍ଯ୍ୟ ଅନ୍ତର୍ଭୁକ୍ତ ।
ପ୍ରଧାନମନ୍ତ୍ରୀ ସଡ଼କ ଭିତ୍ତିଭୂମି କାର୍ଯ୍ୟର ପ୍ରଥମ ପର୍ଯ୍ୟାୟ ଓ ହୀରା ଗବେଷଣା ଓ ବାଣିଜ୍ୟ (ଡ୍ରିମ ସିଟି)ର ମୁଖ୍ୟ ପ୍ରବେଶ ଦ୍ୱାର ଉଦଘାଟନ କରିଛନ୍ତି । ସୁରଟରେ ହୀରା ବ୍ୟବସାୟର ଦ୍ରୁତ ପ୍ରଗତି ଦୃଷ୍ଟିରୁ ସ୍ଥାନାଭାବ ଓ ଅନ୍ୟାନ୍ୟ ବାଣିଜି୍ୟକ ଆବଶ୍ୟକତାକୁ ଦୃଷ୍ଟିରେ ରଖି ଡ୍ରିମ ସିଟି ପ୍ରକଳ୍ପ ଆରମ୍ଭ କରାଯାଇଛି । ପ୍ରଧାନମନ୍ତ୍ରୀ ଏହି ପ୍ରକଳ୍ପର ଦ୍ୱିତୀୟ ପର୍ଯ୍ୟାୟର ମଧ୍ୟ ଶିଳାନ୍ୟାସ କରିଛନ୍ତି ।
ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଜୈବ ବିବିଧତା ଉଦ୍ୟାନର ମଧ୍ୟ ଶିଳାନ୍ୟାସ କରିଛନ୍ତି । ଡକ୍ଟର ହେଡ ଗେୱାର ସେତୁରୁ ଭୀମରାଡ଼ - ବାମମେରୀ ସେତୁ ମଧ୍ୟରେ ପ୍ରାୟ ୮୭ ହେକ୍ଟର ପରିମିତ ଅଞ୍ଚଳରେ ଏହା ନିର୍ମିତ ହେଉଛି । ପ୍ରଧାନମନ୍ତ୍ରୀ ପିଲାମାନଙ୍କ ପାଇଁ ସୁରଟ ବିଜ୍ଞାନ କେନ୍ଦ୍ରରେ ମୋଦୀ ସଂଗ୍ରହାଳୟ ମଧ୍ୟ ଉଦଘାଟନ କରିଛନ୍ତି । ଏହି ସଂଗ୍ରହାଳୟ ଅନେକ ଜ୍ଞାତବ୍ୟ ବିଷୟ ସୂଚନା ଦେବ ।
ଏହି ଶିଳାନ୍ୟାସ ଓ ଉନ୍ନୟନ ପ୍ରକଳ୍ପ ଉଦଘାଟନୀ କାର୍ଯ୍ୟ ପ୍ରଧାନମନ୍ତ୍ରୀଙ୍କ ବିଶ୍ୱସ୍ତରୀୟ ଭିତ୍ତିଭୂମି ସୃଷ୍ଟି ଦୂରଦୃଷ୍ଟିର ପରିଚାୟକ । ଏହା ସହରାଞ୍ଚଳ ବିକାଶ ସହ ବହୁମୁଖୀ ସଂଯୋଗ ପ୍ରକ୍ରିୟାକୁ ମଧ୍ୟ ତ୍ୱରାନ୍ୱିତ କରିବ । ଜନସାଧାରଣଙ୍କ ଜୀବନରେ ସୁଖ ସ୍ୱାଚ୍ଛନ୍ଦ୍ୟ ଆଣିବା ନେଇ ସରକାରଙ୍କ ଉଦ୍ୟମ ଏଥିରେ ପ୍ରତିଫଳିତ ହୋଇଛି ।
SM/MB