ভারত ইমানা য়াইফরে,

ভারত ইমানা য়াইফরে,

ভারত ইমানা য়াইফরে,

মধ্য প্রদেশকী রাজ্যপাল, শ্রী মঙ্গুভাই পতেল, মধ্য প্রদেশকী মুখ্য মন্ত্রী শিবরাজ সিংহকী চৌহান, কেন্দ্রগী মন্ত্রী মন্দলগী ঐহাক্কী মরুপশিং, মধ্য প্রদেশ সরকারগী মন্ত্রীশিং, এম.পি.শিং অমসুং এম.এল.এ.শিং, ঙসিগী থৌরম অসিদা শরুক য়াবীরিবা য়াম্লবা দিগনিতরীশিং। থৌরম অসি মফম অসিদা মখোয়গীদমক পাঙথোক্লিবা, মসিদা তীনবীরিবা মশিং য়াম্লবা সেল্ফ-হেল্প গ্রুপশিং খুরুমজরি!

ময়ামবু সেল্ফ-হেল্প গ্রুপকী কনফরেন্স অসিদা তরাম্না ওকচরি। হৌজিক্তা ঐখোয়গী মুখ্য মন্ত্রী, ঐখোয়গী নরেন্দ্র সিংহ তোমরজীনা ঐহাক্কী ইপোক নুমিৎ নীংশিবীখি। ঐহাক্না কয়া নীংশিংগনদে অদুবু করিগুম্বা থৌরাং লৈত্রবদি, করিগুম্বা থৌরম লৈত্রবদি ঐহাক্না ইমাগী মনাক চৎতুনা মহাক্কী মখোঙ শোক্তুনা থৌনিজৈ। অদুবু ঙসি ঐহাক্কী ইমাগী মনাক্তা চৎপা ফংলরোই। অদুবু মধ্য প্রদেশকী ত্রাইবেল এরিয়াগী খুঙ্গং কয়া কয়াগী হোৎনবা কনবা ইমা লাখ কয়ানা মফম অসিদা ঙসি ঐঙোন্দা থৌজাল পীনবীরি। ঙসিগী মীকুপ অসি ঐহাক্কী ইমানা উবদা মহাক্কী মচানুপানা ঙসি মহাক্কী মনাক্তা লাক্ত্রবসু ইমা কয়ানা ঐহাকপু থৌজাল পীনবীবা অসিদা শোইদনা অপেনবা পোক্কনি। ঐহাক্কী ইমানা ঙসি হেন্না হরাওগনি। মশিং য়াম্লবা ইমা অমদি ইচে-ইচলশিং, ইচানুপীশিংনা পীবীরিবা থৌজালশিং অসিনা ঐখোয় পুম্নমক্কীদমক অচৌবা পাঙ্গল ওইরগনি। অমসুং ঐহাক্কী ওইনদি লৈবাক অসিগী ইমা অমদি ইচে-ইচলশিং অসি, লৈবাক অসিগী ইচানুপীশিং অসি ঐহাক্কী খ্বাইদগী অচৌবা চুঙ্গোইনি। ঐহাক্কী পাঙ্গল, ঐহাক্কী ইথিলগী হৌরকফমনি।

মশিং য়াম্না তীল্লিবা ইচিল-ইনাওশিং ঙসি অসি য়াম্না মরু ওইবা নুমিৎ অমসু ওইরি। ঙসি অসি বিশ্বকর্মা পুজাসু তারি। বিশ্বকর্মা জয়েন্তি অসিদা মশিং য়াম্লবা সেল্ফ-হেল্প গ্রুপশিংনা মফম অসিদা তিল্লিবা অসিমক অফবা খুদমনি। ঐহাক্না ময়ামদা অমদি ইরৈবাকচা খুদিংমক্তা বিশ্বকর্মা পুজাগী য়াইফ-পাউজেল পীজরি। ঙসি চহি ৭৫গী মতুংদা চীতাহশিংনা ভারতকী লমদমদা অমুক হন্না হল্লকপা অসিদা ঐহাক্না য়াম্না নুংঙাই। মীকুপ খরগী মমাংদা ঐহাক্না কুনো নেস্নেল পার্কতা চীতাহশিং থাদোকপগী খুদোংচাবা ফংজখি। ঐহাক্না ময়ামদা ৱাফম অমদা হায়জগে? মদুগী পাউখুম পীবীগদ্রা? ঐহাক্না মীপুম খুদিংমক্তা হায়জগে? ঐহাক্না ফোরম অসিদসু হায়জগে? ময়াম্না খুম্বীরকউ। ঙসি ঐহাক্না মফম অসিদগী মালেম পুম্বদা পাউজেল অমা পীজনীংই। ঙসি ঐখোয়গী লৈবাক অসিদা চহি ৭৫রোমগী মতুংদা চীতাহ নিপাল থাদোক্লি। অফ্রিকাদগী লাপনা লাকই। শাংলবা খোঙচৎ অমগী মতুংদা য়ৌরক্লি। ঐখোয়দা অচৌবা মীথুংলেনশিং থুংলরে। মীথুংলেনশিং অসিগী মরমদা ঐহাক্না হায়জগে? মীথুংলেনশিং অসিবু ইকাই খুম্নবা ওইনা ময়াম্না লেপখৎপীদনা খুপাক হৌনা খুবীয়ু। মসিবু চহি কয়াগী মতুংদা ওইথোকহনখিবা ঐখোয়গী ইরৈবাকচাশিংবুসু থাগৎচরি। খুপাক হৌনা খুবীয়ু মরুপশিং, চীতাহশিংগীদমক খুপাক খুবীয়ু। ময়ামদা ঐহাক্না তৌবীমল খঙবা উৎচরি।

পুৱারী ওইরবা থৌরম অসিগীদমক ঐহাক্না লৈবাক অসিগী মীয়াম অমসুং মধ্য প্রদেশকী মীয়ামবু থাগৎপা ফোঙদোকচরি। মফম অসিগী প্রজাশিংদা ঐহাক্না অখন্ননা য়াইফ-পাউজেল পীজরি। ভারত অসি য়াম্না চাউই। মসিদা উমং য়াম্না লৈ। মফম কয়াদা লমলক্কী শাশিং লৈ। অদুবু ভারত সরকারনা চীতাহশিং অসি মফম অসিদা পুরক্নবা ৱারেপ লৌরিবা অসি করিগীনো খঙলব্রা? নখোয়না খন্থরুবা তৌব্রা? মসি খ্বাইদগী চাউবা ৱাফমনি। নখোয়দা চীতাহ শিন্নরিবা অসিগী মরমদি ঐখোয়না নখোয়দা থাজবা থম্বগীনি। নখোয়না খুদোংথিবা পুম্নমক মায়োক্নরবসু চীতাহশিং অসিদদি অকাইবা অমত্তা থোকহল্লোই হায়না ঐহাক্না থাজৈ। মরম অসিনা ঙসি ঐহাক্না নখোয়দা চীতা নিপানগী থৌদাং শীন্নরি, অমসুং লৈবাক অসিগী মীয়াম্না ঐহাক্কী থাজবা মাংহল্লোই হায়না ঐহাক্না থাজৈ। মধ্য প্রদেশকী মীয়াম্না ঐহাক্কী থাজবা মাংহন্দ্রি অমসুং শিওপুরগী মীয়াম্না ঐহাক্কী থাজবা মাংহল্লোই হায়না ঐহাক্না চেৎনা থাজৈ। ঙসি মধ্য প্রদেশকী সেল্ফ হেল্প গ্রুপশিংনা রাজ্য অসিদা উ-চারা লাখ ১০ থাখি। অকোইবগী ফীভম ঙাকশেন্নবা অপুনবা খোঙথাং অসিনা, ভারতনা অকোইববু নুংশিবা, পাম্বীশিংবু ঈশ্বর ওইনা উবা ঐখোয়গী লৈবাক অসিনা, ঙসিগী ভারতনা নখোয়গী খোঙথাংশিংদগী অনৌবা পাঙ্গল অমা ফংলগনি।

মরুপশিং,

নুপীশিংগী শক্তি অসিনা হৌখিবা চহিচাগী ভারত অমসুং চহিচা অসিগী অনৌবা ভারত অসিগী মরক্তা খেন্নবা পুরক্লিবা ফেক্তর অমা ওইরক্লি। ঙসিগী অনৌবা ভারত্তা নুপীগী শক্তিগী ফিরাল অসি পঞ্চায়ত ভবনদগী রাস্ত্রপতি ভবন ফাওবদা ৱাংনা পাইরি। শিওপুর জিলাদা মফম অসিদা ঐঙোন্দা জিলা পঞ্চায়তকী চিয়রপর্সন ওইনা থবক তৌরিবা ত্রাইবেল ইচলশিংদগী অমনা পাউদমখি। হন্দক্তা পাঙথোকখিবা পঞ্চায়তকী মীখলদা মধ্য প্রদেশ শিনবা থুংবদা নুপী লিশিং ১৭না পঞ্চায়ত বোদীশিংদা কারকখি। মসি অচৌবা অহোংবগী খুদম অমনি, অচৌবা অহোংবগী অহৌবনি।

মরুপশিং,

নীংতম ইহৌদা খুৎলাই পাইবদগী সত্যাগ্রহদা লৈবা ইচানুপীশিংনা কনাদগী তাবা লৈতে। ঙসি ভারতনা মাগী আজাদী কা অমৃত মহোৎসব পালন তৌরিবা মতম অসিদা ঐখোয়না হন্দক্তা পাঙথোকখিবা হর ঘর তিরঙ্গা কেম্পেন্দা নুপী অমসুং এস.ঐচ.জি.শিংনা মখোয়গী ময়ুমশিংদা মচু অহুমগী ফিরাল চীংখৎপা উবা ফংখি। জাতিগী চাউথোকচাবগী মীকুপ অসিদা নখোয়না মগুন হাপখি। কোরোনাগী মতমদা অৱাবা তারবা মতমদা মীওইবা জাতিগী শেনবা তৌবগী ৱাখল্লোনগা লোয়ননা নখোয়না মশিং য়াম্লবা মাস্কশিং তুখি, পি.পি.ই. কিতশিং শাবদগী মচু অহুমগী ফিরাল করোর কয়া শাখিবা, শীংনবা খুদিংমক্না লৈবাক অসিদা অনৌবা থৌনা হাপখি। ওন্তপ্রিনোর্শিপনা মরম ওইদুনা নুপীশিংদা শক্তি পীখি। অমসুং ঙসি ঐহাক্না ৱাফম অমা ফোঙদোকচগে। ঐহাক্না লৈঙাক পাইরকপা চহি ২০-২২গী এক্সপরিয়েন্সতা য়ুম্ফম ওইরগা ঐহাক্না ৱাফম অমা হায়জনীংই। নখোয়গী গ্রুপ অসি করম্বা চহিদা শেমখি? ইচে-ইচল ১০-১২না পুনশিন্দুনা থবক খরা হৌখি। থবক-থৌরম অসিগীদমক নখোয় পোক্লকখিবা মতমদা নখোয়না সেল্ফ-হেল্প গ্রুপ অমা শেম্মি, অদুগা থবক হৌই। মথং-মথং ঐখোয়না থবক পাইখৎসি। মফম অমদগী মফম অমদা নখোয়না শেল খোমজিন্নবা হোৎনৈ। অদুবু নখোয়গী হোৎনবশিং, নখোয়গী অখাং কনবা অদুনা মরম ওইরগা ঐহাক্না সেল্ফ হেল্প গ্রুপশিং অসি নেস্নেল হেল্প গ্রুপ ওইরকপা ওইনা উবা ফংই। হয়েং নখোয়না সেল্ফ হেল্প গ্রুপ ওইরবসু ঙসিদু নখোয়না জাতিবু মতেং পাংলিবা নেস্নেল হেল্প গ্রুপ ওইরি। নুপীগী সেল্ফ হেল্প গ্রুপশিংগী মপাঙ্গলনা অমৃত কাল অসিদা চাউখৎপা ভারত, আত্মনির্ভর ওইবা ভারত অমা ওইহন্নবা মরু ওইবা থৌদাং অমা লৌনবা লেপ্পি।

মরুপশিং,

সেক্তর অমা হেক্তা মাইপাকপা হায়বা অসি নুপীশিংনা শরুক য়াবা হেনগৎলকপনা লম অদু মথন্তা মাইপাকচরকই। মোদেল অসিগী ফজবা খুদম অসি নুপীশিংনা লমজিংবা স্বচ্ছ ভারত অভিয়ান অসিনি। ঙসি খুঙ্গংশিংগী লৌউ-শিংউ, এনিমেল হসবেন্দরী, দিজিতেল সর্ভিসশিং, এজুকেসন, বেঙ্কিং সর্ভিসশিং, ইন্সুরেন্স সর্ভিসশিং, মার্কেতিং, স্তোরেজ, ন্যুত্রিসন অসিগা ইচে-ইচলশিং অমসুং ইচানুপীশিংগা মরী লৈনরক্লি। মসিদা দীন দয়াল অন্ত্যোদয় য়োজনানা মরু ওইবা থৌদাং লৌরিবা অসিদা ঐহাক্না অপেনবা পোকই। ঙসি ইচে-ইচলশিংনা তৌরিবা থবকশিং, মখোয়না লম কয়াদা মাংজিল থানা থৌদাং য়ারিবা অসি য়েংঙু। নুপী খরনা পশু শখী, খরনা কৃশী শকী, খরনা বেঙ্ক শখি ওইনা, খরনা পোশন শখী ওইনা মখোয়না অসিগুম্বা সর্ভিস কয়াদা ত্রেনিং তৌদুনা শীংথানীংঙাই ওইবা থবকশিং তৌরি। জল জীবন মিসন অসি নখোয়না মাইপাক্না লুচিংবগী, মাইপাক্না শরুক য়াবগী অচৌবা খুদম অমসু ওইরি। হৌজিক্তা ঐহাক্না ইচল অমগা ৱারী শাবগী খুদোংচাবা অমা ফংজখি। পাইকী খুত্থাংদা ঈশিং সপ্লাই তৌবগী কেম্পেন অসিনা শুপ্নগী চহি অহুমগী মনুংদা ভারত্তা য়ুমথোং করোর ৭না পাইপকী ঈশিংগী কন্নেক্সন পীবা ঙমখি। মসিগী মনুংদা ইমুং লাখ ৪০দি মধ্য প্রদেশতগী ওইখি। তোতি ঈশিংনা য়ৌবা মফমশিংগী ইমা অমসুং ইচে-ইচলশিংনা দবল ইঞ্জিন সরকার অসিবু থৌজাল পীবিরি। মাইপাকপা অসিগীদমক প্রধান মন্ত্রীনা ভারতকী নুপীশিংবু থাগৎখি। কেম্পেন অসি মাইপাকগী ক্রেদিত অসি ঐহাক্কী লৈবাক অসিগী ইমা অমদি ইচে-ইচলশিংদা পীজনীংই। ঙসি তোতি ঈশিংগী প্রোজেক্ত ৩,০০০ হেনবগী মেনেজমেন্ত অসি মধ্য প্রদেশতা সেল্ফ হেল্প গ্রুপশিংনা পাইরি হায়না ঐঙোন্দা পাউদমলকখি। মখোয়না নেস্নেল হেল্প গ্রুপশিং ওইরক্লি। পানী সম্মিতি ওইরবসু, পাইপলাইনশিং য়েংশিনবা নত্ত্রগা ঈশিং তেস্ত তৌবা ওইরবসু ইচে-ইচলশিং অসিনা য়াম্না শীংথানীংঙাই ওইবা থবক তৌরি। ঙসি মফম অসিদা য়েন্থোক্লিবা কিতশিং অসি ৱাতর মেনেজমেন্তদা ইচে-ইচলশিং অমসুং ইচানুপীশিংনা থৌদাং লৌবা হেনগৎহন্নবা খোঙথাং অমনি।

মরুপশিং,

হৌখিবা চহি ৮দা সরকারনা সেল্ফ হেল্প গ্রুপশিংবু শক্তি পীনবা খোঙথাং কয়ামরুম পাইখৎখি। ঙসি লৈবাক অসিগী ইচে-ইচল করোর ৮ হেনবনা কেম্পেন অসিদা য়াওরি। ঐখোয়গী পান্দমদি খুঙ্গংগী ইমুং খুদিংমক্তগী য়ামদ্রবদা ইচে-ইচল অমনা কেম্পেন অসিদা য়াওবা হায়বা অসিনি। মফম অসিদা মধ্য প্রদেশকী ইচে-ইচল লাখ ৪০ হেনবনা সেল্ফ-হেল্প গ্রুপশিংদা থবক তৌরি। ২০১৪গী মমাংদা চহি ৫ অসিদা নেস্নেল লাইবলিহুদ মিসনগী মখাদা তেংবাং পীখিবা অসি হৌখিবা চহি ৭ অসিদা শরুক ১৩ হেনগৎলকখি। মমাংদা সেল্ফ-হেল্প গ্রুপ খুদিংমক্না গরেন্তী য়াওদনা লুপা লাখ ১০ ফাওবগী লোনশিং ফংলম্বা অদু হৌজিক্তি মসিগী লিমিত অসি শরুক অনি ওইহনখ্রে হায়বদি লাখ ১০দগী লাখ ২০ ওইরে। অনৌবা য়ুনিতশিং হাংনবা ফুদ প্রোসেসিংগা মরী লৈনবা সেল্ফ হেল্প গ্রুপশিংদা লুপা লাখ ১০দগী করোর ৩গী তেংবাং পীরি। য়েংঙু সরকার অসিনা ইমা অমদি ইচে-ইচলশিং অসিদা কয়া য়াম্না থাজবা থম্লিবনো, মখোয়গী পুকচেল শেংবা, মখোয়গী হোৎনরিবশিং, মখোয়গী মতিক-ময়াই অসি য়েংলগা গ্রুপশিং অসিদা লুপা করোর ৩ ফাওবা পীরি।

মরুপশিং,

খোয়গী সরকারনা খুঙ্গংগী শেন্মীৎলোন্দা নুপী ওন্তপ্রিনোরশিংগী অনৌবা ওইথোকপা য়াবশিং শেম্নবা লেপ্পা লৈতনা হোৎনদুনা লাকখি। ‘ৱান দিস্ত্রিক্ত, ৱান প্রদক্ত’ ইনিসিএতিনা জিলা খুদিংমক্তগী লোকেল প্রদক্তশিংবু অচৌবা কৈথেলশিংদা য়ৌহন্নবা খোঙথাং পাইখৎলি। মীকুপ খরগী মমাংদা ঐহাক্না ৱান দিস্ত্রিক্ত ৱান প্রদক্ত কেম্পেনগী থবক তৌরিবা ইচল অমগা ৱারী শাখি। ঐহাক্না প্রদক্ত খরা উবা ফংজখি অমসুং মখোয়না ঐঙোন্দা খুদোল ওইনা প্রদক্ত খরা পীরকখি। খুঙ্গংগী ইচে-ইচলশিংনা শাবা প্রদক্তশিং অসি ঐহাক খক্তগী নত্তনা লৈবাক পুম্বগী ওইনা মমল য়াম্না লৈ। মধ্য প্রদেশতা শিবরাজজীগী সরকারনা প্রদক্তশিং অসি মার্কেত্তা য়ৌহন্নবা অখন্নবা খোঙথাংশিং পাইখৎলিবা অসিদা ঐহাক্না নুংঙাইবা পোকই। সেল্ফ হেল্প গ্রুপশিংগী ইচে-ইচলশিংগীদমক সরকার অসিনা রুরেল মার্কেত কয়া শেমখি। এস.ঐচ.জি.শিংনা কৈথেলশিংদা লুপা করোর ৫০০রোম ওইগদবা প্রদক্রশিং য়োনখি হায়না ঐঙোন্দা পাউদমলকখি হায়বদি শেল পুম্নমক অসি নখোয়না কন্না হোৎনবদগী খুঙ্গংগী ইচে-ইচলশিংদা য়ৌহনবা ঙমখি।

মরুপশিং,

ঐখোয়গী ত্রাইবেল ইচে-ইচলশিংনা ত্রাইবেল এরিয়াশিংগী উমংগী পোত্থোকশিংবু খ্বাইদগী ফাবা প্রদক্তশিংদা ওন্থোকপদা শীংথানীংঙাই ওইবা থবক তৌরি। মধ্য প্রদেশ য়াওনা লৈবাক অসিগী ত্রাইবেল ইচে-ইচল লাখ কয়ানা প্রধান মন্ত্রী বন ধন য়োজনাগী কান্নবসিং লৌরি। মধ্য প্রদেশকী ত্রাইবেল ইচে-ইচলশিংনা পুথোকপা খ্বাইদগী ফবা প্রদক্তশিং অসি য়াম্না শীংথানৈ। পি.এম. কৌশাল বিকাস য়োজনাগী মখাদা ত্রাইবেল এরিয়াশিংদা অনৌবা স্কিলিং সেন্তরশিং হাংদুনা খোঙথাং অসিদা হেন্না শাহৌ পীরগনি।

ইমা অমদি ইচে-ইচলশিং,

হৌজিক মতম অসিদা ওনলাইন শোপ্পিংগী চৎনবী অসি হেনগৎলক্লি। মরম অসিনা ‘সরাস’ কৌবা সরকারগী পোর্তেল জি.ই.এম. গভর্নমেন্ত ই-মার্কেৎ প্লেস অসিদা নখোয়গী প্রদক্তশিংগীদমক অখন্নবা মফম অমা খক্তুনা থম্মি। মসিগী খুত্থাংদা নখোয়না সরকারদা, সরকারগী বিভাগশিংদা নখোয়গী প্রদক্তশিং হকথেংননা য়োনবা য়ারি। শিওপুরদা উ হকপগী অফবা থবকসু তৌরি। মসি লৈবাক অসিদা দিমান্দ চাউনা লৈ। নখোয়সু অথুবদা জি.ই.এম.দা রেজিস্তর তৌবীনবা ঐহাক্না হায়জরি।

মরুপশিং,

সেপ্তেম্বর থা অসি লৈবাক অসিদা মচি ওইবা চীঞ্জাক্কী থা হায়না পালন তৌরি। ভারতকী খোঙথাংশিংগা লোয়ননা য়ুনাইতেদ নেসনস য়ৌনবা চাউনা হোৎনখিবা অমসং ইং ২০২৩বু কোর্স সিরিএল্সকী চহি হায়না লাউথোক্তুনা মালেমগী থাক্তা পালন তৌগদৌরি। মচি ওইবা কোর্স সিরিএলশিং পুথোকপদা লৈবাক অসিগী ওইনা মাংজিল থারিবা লৈবাকশিংদা মধ্য প্রদেশসু অমনি। ঐখোয়গী ত্রাইবেল এরিয়াশিংদা মসিগী ফজরবা চৎনবী লৈ। কোদো, কুদবী, বাজরা অমসুং রাগী অসিগুম্বা কোর্স সিরিএলশিং অসি ঐখোয়গী সরকানা লেপ্পা লৈতনা থৌগৎলি অমসুং মীরৈবাক্তগী লাকপা দিগনিতরীশিংগী মথেল-লুকোইদা কোর্স সিরিএলশিংনা শেম্বা য়ামদ্রবদা আইতেম অমা মতম চুপ্পদা হাপকনি হায়না ঐহাক্না লেপখি। মসি মীরৈবাক্তগী লাকপা মীথুংলেনশিংগী পুখমদা য়াওহনগদবনি। মসিদা সেল্ফ হেল্প গ্রুপশিংগীদমক খুদোংচাবা কয়া লৈরি।

মরুপশিং,

মতম অমদা ইমা অমদি ইচে-ইচলশিংনা য়ুম মনুংদা সমস্যা কয়া মায়োক্নরমখি, মখোয়দা য়ুমগী ওইবা ৱারেপশিং লৌবদা মফম কয়া পীরমদে। য়ুম কয়াদা মসিগী চৎনবী অসি লৈরমখি, করিগুম্বা মপা অমদি মচানুপানা বিজিনেসকী ৱারী শাবা মতমদা করিগুম্বা মমা অদুনা চাকশঙদগী থোরকপা তারবদি মচানুপা নত্ত্রগা মপা অদুনা অসুম্না হায় –চৎলো নহাক্কী থবক্তি চাকশঙদনি, ঐখোয় ৱারী খরা শাগে। হৌজিক্তি মসি তৌদ্রে। ঙসিদু ইমা অমদি ইচে-ইচলশিংগী ৱাখল্লোনশিং অমসুং পাউতাকশিং, মসিগী কান্নবা অসি ইমুং মনুংদসু খঙবীবা হেনগৎলকপা হৌরে। অদুবু ঐখোয়গী সরকারনা মসিগী মরুমদা তাঙ্কক নাইনা খোঙথাংশিং লৌখৎখি। মমাংদা অসিগুম্বা খোঙথাংশিং পাইখৎলমখিদে। ২০১৪দগী হৌদুনা সরকার অসিনা লৈবাক অসিনা নুপীশিংগী ইকাই খুম্নবা হেনগৎহন্নবগী মাইকৈদা অমসুং মখোয়না নুমিৎ খুদিংগী থেংনবা শীংনবশিং কোকহন্নবা লেপ্পা লৈতনা থবক পাইখৎতুনা লাকখি। অমাংশঙ লৈতবা অমসুং চাকশঙদগী শীং মৈ থাবদগী থোরকপা মৈখুনা থোকহনবা খুদোংচাদবশিং হায়রিবশিং অসিগা মরী লৈনবা সমস্যাশিং অসি থেংনবদা নুপীশিংনা করম্না চাউনা খুদোংচাদবা মায়োক্নখি, কনাগুম্বা অমনা কিমি অনি-অনি, মরি-মরি চৎতুনা ঈশিং শোকখি। লৈবাক অসিদা অমাংশঙ করোর ১১ হেন্না শাদুনা, ইমুং করোর ৯ হেনবদা গ্যাস কন্নেক্সন পীদুনা অমসুং ভারতকী খ্বাইদগী মনুং হঞ্জিনবা শরুকশিংদা লৈবা ইমুং করোর কয়াদা তোতি ঈশিং ফংহনবগা লোয়ননা মখোয়গী পুন্সি অসি হিংবদা লায়থোকহনখি।

ইমা অমদি ইচে-ইচলশিং,

মীরোল্লিঙৈদা সমস্যা কয়া থেংনবগে হায়বা নখোয়না হেন্না খঙই।  অফবা চিঞ্জাল অমসুং থবক্নবা ঈশিং লৈরমদে, চেকঅপ ফেসিলিতীশিং লৈরমদে। মরম অসিনা ঐখোয়না মাত্রু বন্দনা য়োজনা হৌদোকখি। মসিগী মখাদা মীরোল্লিবা মমাশিংগী একাউন্তশিংদা হকথেংননা লুপা করোর ১১০০০ ত্রান্সফর তৌখি। মসিগী মখাদা মধ্য প্রদেশকী মমাশিংনা স্কিম অসিগী মখাদা লুপা করোর ১৩০০ ফংখি। আয়ুশ্মান ভারত স্কিমগী মখাদা লুপা লাখ ৫ ফাওবগী লেম্না লায়েং ফংহন্দুনা লায়রবা ইমুংশিংগী ইচে-ইচলশিংগী মতেং পাংখি।

ইমা অমদি ইচে-ইচলশিং,

লৈবাক অসিনা বেতি বচাও, বেতি পরাও কেম্পেনগী অফবা ফলশিং ঙসিদি ফংবা হৌরে। ইচানুপীশিংবু মহৈ নীংথিনা তমহন্নবা, মখোয়না মরক্তা স্কুল তোকখিদনবা স্কুলশিংদা ইচানুপীশিংগীদমক তোখাইবা অমাংশঙ শারে, সেনিতরী পেদশিং থম্লে। সুকন্য সমৃদ্ধি য়োজানাগী মখাদা নুপীমচা করোর ২.৫গী একাউন্তশিং হাংখি।

মরুপশিং,

ঙসি জন ধন বেঙ্ক একাউন্তশিংনা লৈবাক অসিদা মসিনা নুপীশিংদা শক্তি পীনবা অচৌবা পাম্বৈ অমা ওইরক্লি। কোরোনাগী মতমবু নীংশিংলদুনা মসিদা জন ধন বেঙ্ক একাউন্তশিংগী শক্তিনা সরকারনা নুপীশিংগী বেঙ্ক একাউন্তশিংদা শাফনা অমসুং হকথেংননা শেল ত্রান্সফর তৌবা ঙমখি। ঐখোয়গী লমশিং অসি অয়াম্বনা নুপাগী মমিংদা লৈ। করিগুম্বা লৌ লৈরবদি মদু নুপাগী মমিং, দুকান লৈরবদি নুপাগী মমিং, য়ুম লৈরবদি নুপাগী মমিং, কার লৈরবদি নুপাগী মমিং, স্কুতর লৈরবদি নুপাগী মমিং ঙাক্তা ওই, নুপীশিংগী মমিংদা করিগুম্বা অমত্তা লৈতে, মপুংরোইবগী মমিংদা লৈতবা ওইরগনি মচানুপাগী মমিংদা লৈ। মসিগী চৎনবী অসি মুৎথৎতুনা ঐখোয়গী ইমা অমদি ইচে-ইচলশিংদা থক্তি পীরি। ঙসি পি.এম. আৱাজ য়োজনাগী মখাদা শাখিবা য়ুমশিং নুপীশিংগী মমিংদা লৈরি। ঐখোয়গী সরকারনা নুপী করোর ২ হেন্না ইনেবল তৌদুনা য়ুমগী মপুশিং ওইহল্লি। মুদ্রা স্কিমগী মখাদা হৌজিক ফাওবদা লৈবাক শিনবা থুংবদা লৈরিবা অপীকপা বিজিনেসশিং অমসুং বিজিনেসশিংদা লুপা করোর লাখ ১৯গী লোন পীখ্রে। শেলশিং অসিগী চাদা ৭০দি নুপী ওন্তপ্রিনোরশিংনা ফংখি। সরকারগী অসিগুম্বা খোঙথাংশিং অসিনা মরম ওইদুনা য়ুমথোংশিংদা ঙসিদি শেল-থুমগী ওইবা ৱারেপশিং লৌবদা নুপীশিংগী থৌদাং হেনগৎলক্লি।

মরুপশিং,

নুপীশিংগী ইকনোমিক এম্পাৱরমেন্তনা খুন্নাইদা মখোয়বু চপ মান্ননা শক্তি পীরি। ঐখোয়গী সরকার অসিনা ইচানুগীশিংগীদমক থোং লোন্দুনা লৈরুরবা হাংহনখি। হৌজিক ভারতকী ইচানুপীশিংনা সাইনিক স্কুলশিংদা এনরোল তৌরি, পুলিস কম্মান্দোশিং ওইদুনা জাতিগী শেবা তৌরি। মসি খক্তা নত্তনা ভারত ইমাগী মচানুপীশিংনা ঙমখৈদা তাদুনা আর্মীদা য়াওদুনা ভারত ইমাবু ঙাকশেল্লি। হৌখিবা চহি ৮ অসিদা লম খুদিংমক্তা শীংথানীংঙাই ওইরবা অহোংবশিং পুরক্লিবা অসুদা মীপুম খুদিংমক্কী মীৎয়েং চীংশিল্লদুনা প্রধান মন্ত্রীনা লৈবাক শিনবা থুংবদা পুলিস ফোর্সশিংদা লৈরিবা নুপীশিংগী মশিং অসি লাখ ১ ওইরম্বদগী লাখ ২ হেন্না হেনগৎলে। ঐখোয়গী ইচানুপী লিশিং ৩৫ হেনবনা হৌজিক সেন্ত্রেল ফোর্সশিংগী শরুক অমা ওইরি অমসুং লৈবাক অসিগী য়েকনবশিংগী মায়োক্তা লান্থেংনরি। চহি ৮গী মমাংদা লৈরম্বা অদুদগী মশিং অসি শরুক অনি হেনগৎপা ঙমখি। মসিগী অহোংবা অসি লম খুদিংমক্তা উবা ফংলি। নখোয়গী পাঙ্গলদা ঐহাক্না চেৎনা থাজবা থম্মি। সবকা প্রয়াসকা লোয়ননা ঐখোয়না অফবা খুন্নাই অমসুং মপাঙ্গল কনবা লৈবাক অমা শেমগৎপদা শোইদনা মাইপাক্কনি হায়না ঐহাক্না থাজৈ। মশিং হেন্না য়ামখৎলক্তুনা ঐখোয়বু নখোয়না থৌজাল পীনবীগনি। নখোয়না ঐঙোন্দা ইথিল পীদুনা নখোয়গীদমক থবক হেন্না পাইখৎনীংবা পোকহল্লি। নখোয়না ঐঙোন্দা থৌনা হাপখি। ঐহাক্না থমোয় শেংনা থাগৎপা ফোঙদোকচরি। অমুক্কা হন্না থাগৎচরি।

খুৎ অনিমক থাংখৎতুনা ঐহাক্কী লোয়ননা হৌনা হায়বীয়ু,

ভারত ইমানা য়াইফরে,

ভারত ইমানা য়াইফরে,

ভারত ইমানা য়াইফরে,

ভারত ইমানা য়াইফরে,

হন্না-হন্না থাগৎচরি!

*****