ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ମଧ୍ୟପ୍ରଦେଶର ସେୱପୁରର କରାହାଲ ଠାରେ ଆୟୋଜିତ ସ୍ୱୟଂ ସହାୟକ ଗୋଷ୍ଠୀ ସମ୍ମେଳନରେ ଭାଗ ନେଇଛନ୍ତି । ଏହି ଅବସରରେ ସେ ପିଏମ କୌଶଳ ବିକାଶ ଯୋଜନା ଅନ୍ତର୍ଗତ ନିର୍ମିତ ଚାରିଟି ସମ୍ବେଦନଶୀଳ ଜନଜାତି ସମୂହ ଦକ୍ଷତା କେନ୍ଦ୍ର ଉଦଘାଟନ କରିଛନ୍ତି । ସ୍ୱୟଂ ସହାୟକ ଗୋଷ୍ଠୀ ସଦସ୍ୟାମାନଙ୍କୁ ପ୍ରଧାନମନ୍ତ୍ରୀ ବ୍ୟାଙ୍କ ଋଣ ଅନୁମୋଦନ ପତ୍ର ପ୍ରଦାନ କରିବା ସହ ଜଳ ଜୀବନ ମିଶନ ଅନ୍ତର୍ଗତ କିଟ୍ ପ୍ରଦାନ କରିଛନ୍ତି । ପ୍ରାୟ ଏକ ଲକ୍ଷ ସ୍ୱୟଂ ସହାୟକ ଗୋଷ୍ଠୀ ସଦସ୍ୟା ଏହି ଅବସରରେ ଉପସ୍ଥିତ ଥିଲେ ଓ ପ୍ରାୟ ୪୩ ଲକ୍ଷ ସଦସ୍ୟା ବିଭିନ୍ନ କେନ୍ଦ୍ରରୁ ଯୋଡି ହୋଇଥିଲେ ।

ସଭାକୁ ସମ୍ବୋଧିତ କରି ପ୍ରଧାନମନ୍ତ୍ରୀ କହିଥିଲେ ଯେ, ଯଦି ସମୟ ହୁଏ ତେବେ ନିଜ ଜନ୍ମଦିନରେ ସେ ମାଆଙ୍କ ଆଶୀର୍ବାଦ ନେବାକୁ ଯିବେ । ଆଜି ଯଦିଓ ସେ ନିଜ ମାଆଙ୍କୁ ଭେଟିବାକୁ ଯାଇପାରିବେ ନାହିଁ, ତେବେ ତାଙ୍କ ମାଆ ଜାଣି ଖୁସି ହେବେ ସେ ଲକ୍ଷ ଲକ୍ଷ ଜନଜାତି ମାଆଙ୍କ ଆଶୀର୍ବାଦ ପାଇଛନ୍ତି । ଭାରତର ଝିଅ ଓ ମାଆମାନେ ମୋ ରକ୍ଷା କବଚ ବୋଲି ସେ କହିଛନ୍ତି । ବିଶ୍ୱକର୍ମା ଜୟନ୍ତୀ ଅବସରରେ ଏଭଳି ବିଶାଳ ସ୍ୱୟଂ ସହାୟକ ଗୋଷ୍ଠୀ ସମ୍ମିଳନୀ ଆୟୋଜିତ ହେବା ନିଆରା ବୋଲି କହିବା ସହ ସେ ବିଶ୍ୱକର୍ମା ପୂଜାର ଅଭିନନ୍ଦନ ଜଣାଇଛନ୍ତି ।

୭୫ ବର୍ଷ ପରେ ଭାରତକୁ ଚିତା ଫେରିଥିବାରୁ ଖୁସି ବ୍ୟକ୍ତ କରି ପ୍ରଧାନମନ୍ତ୍ରୀ କହିଛନ୍ତି ଯେ, ସମ୍ମେଳନକୁ ଆସିବା ପୂର୍ବରୁ ଚିତା ବାଘଗୁଡିକୁ କୁନୋ ଜାତୀୟ ଉଦ୍ୟାନରେ ଛାଡିବାର ସୌଭାଗ୍ୟ ମିଳିଥିଲା । ଚିତାମାନଙ୍କୁ ସମ୍ମାନିତ ଅତିଥି ଭାବେ ସମ୍ଭୋଧନ କରି ସେମାନଙ୍କ ପାଇଁ ଛିଡା ହୋଇ ତାଳି ବଜାଇବାକୁ ସେ ସଭାରେ ଉପସ୍ଥିତ ସମସ୍ତଙ୍କୁ ଅନୁରୋଧ କରିଥିଲେ । ଚିତାଗୁଡିକୁ ଆପଣମାନଙ୍କ ଜିମାରେ ଛଡା ଯାଇଛି, କାରଣ ଆପଣମାନଙ୍କ ଉପରେ ବିଶ୍ୱାସ ଅଛି । ମୋର ବିଶ୍ୱାସ ରହିଛି ଯେତେ ପ୍ରତିକୂଳ ପରିସ୍ଥିତି ଆସିଲେ ମଧ୍ୟ ଆପଣମାନେ ଚିତାମାନଙ୍କ କ୍ଷତି ହେବାକୁ ଦେବେ ନାହିଁ । ସେଥିପାଇଁ ଆଜି ଆପଣମାନଙ୍କୁ ୮ଟି ଚିତାଙ୍କ ଦାୟିତ୍ୱ ଦେବାକୁ ଆସିଛି ବୋଲି ସ୍ଥାନୀୟ ଲୋକଙ୍କୁ ପ୍ରଧାନମନ୍ତ୍ରୀ କହିଛନ୍ତି । ୧୦ ଲକ୍ଷ ଚାରା ରୋପଣ ସମ୍ପର୍କରେ ଉଲ୍ଲେଖ କରି ପ୍ରଧାନମନ୍ତ୍ରୀ କହିଛନ୍ତି ଯେ, ଏହା ଭାରତର ପରିବେଶ ସଂରକ୍ଷଣ ପ୍ରୟାସକୁ ନୂତନ ଶକ୍ତି ପ୍ରଦାନ କରିବ ।

ଭାରତରେ ମହିଳାମାନଙ୍କ ବର୍ଦ୍ଧିତ ପ୍ରତିନିଧିତ୍ୱ ଉପରେ ଗୁରୁତ୍ୱ ପ୍ରଦାନ କରି ପ୍ରଧାନମନ୍ତ୍ରୀ କହିଛନ୍ତି ଯେ, ବିଗତ ଶତାବ୍ଦୀର ଭାରତ ଓ ଚଳିତ ଶତାବ୍ଦୀର ନୂଆ ଭାରତରେ ମହିଳା ଶକ୍ତି ନିର୍ଣ୍ଣାୟକ ଭୂମିକା ଗ୍ରହଣ କରିଛି । ଆଜିର ନୂଆ ଭାରତରେ ପଞ୍ଚାୟତ ଭବନ ଠାରୁ ରାଷ୍ଟ୍ରପତି ଭବନ ପର୍ଯ୍ୟନ୍ତ ମହିଳା ଶକ୍ତିର ଧ୍ୱଜ ଉଡୁଛି । ନିକଟରେ ଅନୁଷ୍ଠିତ ପଞ୍ଚାୟତ ନିର୍ବାଚନରେ ୧୭ ହଜାର ମହିଳା ନିର୍ବାଚିତ ହୋଇଛନ୍ତି । ଏହା ପରିବର୍ତ୍ତନର ପ୍ରତୀକ ବୋଲି ସେ କହିଛନ୍ତି ।

ସ୍ୱାଧୀନତା ସଂଗ୍ରାମ ଓ ଦେଶ ସୁରକ୍ଷାରେ ମହିଳାମାନଙ୍କ ଅବଦାନକୁ ପ୍ରଧାନମନ୍ତ୍ରୀ ସ୍ମରଣ କରିଛନ୍ତି । ନିକଟରେ ହୋଇଥିବା ହର ଘର ତ୍ରିରଙ୍ଗା ଅଭିଯାନ ଓ କରୋନା ସମୟରେ ସେ ମହିଳା ତଥା ସ୍ୱୟଂ ସହାୟକ ଗୋଷ୍ଠୀଗୁଡିକର ଭୂମିକାକୁ ପ୍ରଶଂସା କରିଛନ୍ତି । ସମୟ କ୍ରମେ ସ୍ୱୟଂ ସହାୟକ ଗୋଷ୍ଠୀ ରାଷ୍ଟ୍ର ସହାୟତା ଗୋଷ୍ଠୀରେ ପରିଣତ ହୋଇଛି । କୌଣସି କ୍ଷେତ୍ରର ସଫଳତା ସହ ସେହି କ୍ଷେତ୍ରରେ ମହିଳାମାନଙ୍କ ପ୍ରତିନିଧିତ୍ୱ ହାର ବୃଦ୍ଧି ସହ ସିଧାସଳଖ ଜଡିତ ବୋଲି ପ୍ରଧାନମନ୍ତ୍ରୀ କହିଛନ୍ତି । ମହିଳାମାନଙ୍କ ନେତୃତ୍ୱାଧୀନ ସ୍ୱଚ୍ଛ ଭାରତ ଅଭିଯାନ ଏହାର ସବୁଠାରୁ ଭଲ ଉଦାହରଣ । ସେହିପରି ବିଗତ ତିନି ବର୍ଷରେ ଭାରତର ୭ କୋଟି ଘରକୁ ପାଇପ ପାଣି ସଂଯୋଗ ଯୋଗାଇ ଦିଆଯାଇଛି ଓ ଏଥିରେ ମଧ୍ୟପ୍ରଦେଶର ୪୦ ଲକ୍ଷ ପରିବାର ଅଛନ୍ତି । ପ୍ରଧାନମନ୍ତ୍ରୀ ଏହି ସଫଳତାର ଶ୍ରେୟ ଭାରତର ମହିଳାଙ୍କୁ ପ୍ରଦାନ କରିଛନ୍ତି ।

ବିଗତ ୮ ବର୍ଷରେ ସ୍ୱୟଂ ସହାୟକ ଗୋଷ୍ଠୀଗୁଡିକୁ ସଶକ୍ତ କରିବା ପାଇଁ ସରକାର ଅନେକ ପଦକ୍ଷେପ ନେଇଛନ୍ତି ବୋଲି ପ୍ରଧାନମନ୍ତ୍ରୀ ଗୁରୁତ୍ୱାରୋପ କରିଛନ୍ତି । ଆଜି ଦେଶର ୮ କୋଟିରୁ ଅଧିକ ଭଉଣୀ ଏହି ଅଭିଯାନ ସହିତ ସାମିଲ ହୋଇଛନ୍ତି । ପ୍ରତ୍ୟେକ ଗ୍ରାମୀଣ ପରିବାରର ଅତିକମରେ ଜଣେ ଝିଅ ଏହି ଅଭିଯାନରେ ସାମିଲ ହେଉ ବୋଲି ଆମର ଲକ୍ଷ୍ୟ ରହିଛି ବୋଲି ଶ୍ରୀ ମୋଦୀ କହିଛନ୍ତି ।

ଗୋଟିଏ ଜିଲ୍ଲା ଗୋଟିଏ ଉତ୍ପାଦ ଉପକ୍ରମ ସମ୍ପର୍କରେ ଆଲୋକପାତ କରି ପ୍ରଧାନମନ୍ତ୍ରୀ କହିଛନ୍ତି ପ୍ରତି ଜିଲ୍ଲାର ସ୍ଥାନୀୟ ଉତ୍ପାଦକୁ ବଜାରକୁ ନେବା ପାଇଁ ଏହି ଉପକ୍ରମ ଆରମ୍ଭ ହୋଇଛି । ଗ୍ରାମ୍ୟ ଅର୍ଥନୀତିରେ ମହିଳା ଉଦ୍ୟୋଗୀଙ୍କ ପାଇଁ ନୂତନ ସମ୍ଭାବନା ସୃଷ୍ଟି କରିବାକୁ ସରକାର ନିରବଚ୍ଛିନ୍ନ ଉଦ୍ୟମ କରୁଛନ୍ତି । ସ୍ୱୟଂ ସହାୟକ ଗୋଷ୍ଠୀଗୁଡିକ ପାଇଁ ପ୍ରସ୍ତୁତ ବଜାରରେ ସେମାନେ ୫୦୦ କୋଟି ଟଙ୍କାର ଉତ୍ପାଦ ବିକ୍ରି କରିଛନ୍ତି । ପିଏମ ବନ ଧନ ଯୋଜନା ଓ ପିଏମ କୌଶଳ ବିକାଶ ଯୋଜନାର ସୁଫଳ ମହିଳାମାନଙ୍କ ପାଖରେ ପହଞ୍ଚୁଛି । ଏହି ଅବସରରେ ଜିଇଏମ ପୋର୍ଟାଲରେ ଏସଏଚଜି ଉତ୍ପାଦ ପାଇଁ ଥିବା ସାରସ ସମ୍ପର୍କରେ ପ୍ରଧାନମନ୍ତ୍ରୀ ସୂଚନା ଦେଇଛନ୍ତି ।

ଜାତିସଙ୍ଘରେ ପହଞ୍ଚିବା ପାଇଁ ଭାରତର କଠିନ ପରିଶ୍ରମ ସମ୍ପର୍କରେ ପ୍ରଧାନମନ୍ତ୍ରୀ ଗୁରୁତ୍ୱାରୋପ କରିବା ସହ ଭାରତର ଉଦ୍ୟମ କ୍ରମେ ୨୦୨୩କୁ ଜାତିସଙ୍ଘ ମୋଟା ଦାନା ଶସ୍ୟ ବର୍ଷ ଭାବେ ଘୋଷଣା କରାଯାଇଥିବା ଏବଂ ଆନ୍ତର୍ଜାତିକ ସ୍ତରରେ ଏହା ପାଳିତ ହେଉଥିବା କହିଛନ୍ତି । ସେପ୍ଟେମ୍ବରକୁ ଦେଶରେ ପୋଷଣ ମାସ ଭାବରେ ପାଳନ କରାଯାଉଛି । ସେ ଏହା ସୁନିଶ୍ଚିତ କରିଛନ୍ତି ଯେ, ଭାରତ ଗସ୍ତରେ ଆସୁଥିବା ବିଦେଶୀ ଅତିଥିଙ୍କ ମେନୁରେ ମୋଟା ଦାନାରେ ପ୍ରସ୍ତୁତ ଅତିକମରେ ଗୋଟିଏ ବ୍ୟଞ୍ଜନ ସ୍ଥାନ ପାଇବ ।

୨୦୧୪ ଠାରୁ ସରକାରଙ୍କ ପଦକ୍ଷେପ ସମ୍ପର୍କରେ ଉଲ୍ଲେଖ କରି ପ୍ରଧାନମନ୍ତ୍ରୀ କହିଛନ୍ତି ମହିଳାମାନଙ୍କ ସମ୍ମାନ ବୃଦ୍ଧି ଓ ସେମାନେ ଦୈନନ୍ଦିନ ସମ୍ମୁଖୀନ ହେଉଥିବା ସମସ୍ୟାଗୁଡିକୁ ସମାଧାନ କରିବା ପାଇଁ ଲଗାତର ଉଦ୍ୟମ ହେଉଛି । ଶୌଚାଳୟ ନଥିବା ଯୋଗୁଁ ମହିଳାମାନେ ଭୋଗୁଥିବା ସମସ୍ୟା ଓ ରୋଷେଇ କଲାବେଳେ କାଠରୁ ବାହାରୁଥିବା ଧୂଆଁଜନିତ ସମସ୍ୟା ସମ୍ପର୍କରେ ସେ ଉଲ୍ଲେଖ କରିଥିଲେ । ଦେଶରେ ୧୧ କୋଟିରୁ ଅଧିକ ଶୌଚାଳୟ ନିର୍ମାଣ, ୯ କୋଟିରୁ ଅଧିକ ପରିବାରକୁ ଗ୍ୟାସ ସଂଯୋଗ ଓ ଦେଶର ଆଭ୍ୟନ୍ତରୀଣ ଅଞ୍ଚଳର କୋଟି କୋଟି ପରିବାରକୁ ପାଇପ ପାଣି ଯୋଗାଣ ଦ୍ୱାରା ସେମାନଙ୍କ ଜୀବନ ସହଜ ହୋଇଛି ବୋଲି ପ୍ରଧାନମନ୍ତ୍ରୀ କହିଛନ୍ତି । ମାତୃ ବନ୍ଦନା ଯୋଜନା ଅନ୍ତର୍ଗତ ୧୧ ଶହ କୋଟି ଟଙ୍କା ଆସନ୍ନପ୍ରସବା ମାଆମାନଙ୍କ ଆକାଉଣ୍ଟକୁ ସିଧାସଳଖ ଟ୍ରାନ୍ସଫର ହୋଇଛି । ମଧ୍ୟପ୍ରଦେଶର ମାଆମାନେ ମଧ୍ୟ ଏହି ଯୋଜନାରେ ୧୩ ଶହ କୋଟି ଟଙ୍କା ପାଇଛନ୍ତି । ପରିବାରର ଆର୍ଥିକ ନିଷ୍ପତ୍ତି ନେବାରେ ମହିଳାମାନଙ୍କ ବର୍ଦ୍ଧିତ ଭୂମିକା ସମ୍ପର୍କରେ ପ୍ରଧାନମନ୍ତ୍ରୀ ଉଲ୍ଲେଖ କରିଛନ୍ତି ।

ଦେଶର ମହିଳା ସଶକ୍ତିକରଣରେ ଜନଧନ ଆକାଉଣ୍ଟ ବୃହତ ମାଧ୍ୟମ ପାଲଟିଛି । କରୋନା ସମୟରେ ଜନ ଧନ ଆକାଉଣ୍ଟ ମାଧ୍ୟମରେ ହିଁ ସରକାର ସୁରକ୍ଷିତ ଓ ସିଧାସଳଖ ଭାବେ ମହିଳାମାନଙ୍କ ଆକାଉଣ୍ଟକୁ ଟଙ୍କା ପଠାଇଥିଲେ । ଏବେ ପିଏମ ଆବାସ ଯୋଜନାରେ ମିଳୁଥିବା ଘର ମାଲିକାନାରେ ମହିଳାମାନଙ୍କ ନାମ ସାମିଲ କରାଯାଉଛି । ଆମ ସରକାରଙ୍କ ଦ୍ୱାରା ୨ କୋଟିରୁ ଅଧିକ ମହିଳା ଘର ମାଲିକ ହୋଇ ପାରିଛନ୍ତି । ମୁଦ୍ରା ଯୋଜନାରେ ଏପର୍ଯ୍ୟନ୍ତ ୧୯ ଲକ୍ଷ କୋଟି ଟଙ୍କାରୁ ଅଧିକ ଋଣ କ୍ଷୁଦ୍ର ବ୍ୟବସାୟ ଓ ଉଦ୍ୟୋଗଗୁଡିକୁ ପ୍ରଦାନ କରାଯାଇଛି । ଏହି ଅର୍ଥର ପ୍ରାୟ ୭୦ ପ୍ରତିଶତ ମହିଳା ଉଦ୍ୟୋଗୀମାନେ ପାଇଛନ୍ତି । ଏଭଳି ଉଦ୍ୟମ ଯୋଗୁଁ ଘରର ଆର୍ଥିକ ନିଷ୍ପତ୍ତିରେ ମହିଳାମାନଙ୍କ ଭୂମିକା ବଢୁଥିବାରୁ ପ୍ରଧାନମନ୍ତ୍ରୀ ଖୁସି ବ୍ୟକ୍ତ କରିଛନ୍ତି ।

ଆର୍ଥିକ ସଶକ୍ତିକରଣ ମହିଳାମାନଙ୍କୁ ସମାଜରେ ମଧ୍ୟ ସଶକ୍ତ କରିଥାଏ ବୋଲି ପ୍ରଧାନମନ୍ତ୍ରୀ ମନ୍ତବ୍ୟ ଦେଇଛନ୍ତି । ଭାରତର ଝିଅମାନେ ଏବେ ସୈନିକ ସ୍କୁଲରେ ପଢୁଛନ୍ତି, ପୁଲିସ କମାଣ୍ଡୋ ହେଉଛନ୍ତି ଓ ସେନାରେ ସାମିଲ ହେଉଛନ୍ତି । ଆମ ସରକାର ଝିଅମାନଙ୍କ ପାଇଁ ବନ୍ଦ ଥିବା କବାଟଗୁଡିକ ଖୋଲି ଦେଇଛନ୍ତି ଓ ସେମାନଙ୍କ ପାଇଁ ନୂଆ ସୁଯୋଗ ସୃଷ୍ଟି କରିଛନ୍ତି । ବିଗତ ୮ ବର୍ଷରେ ହୋଇଥିବା ଆଖିଦୃଶିଆ ପରିବର୍ତ୍ତନ ପ୍ରତି ସମସ୍ତଙ୍କ ଦୃଷ୍ଟି ଆକର୍ଷଣ କରି ପ୍ରଧାନମନ୍ତ୍ରୀ କହିଛନ୍ତି ଏହା ଗର୍ବର କଥା ଯେ, ଦେଶର ପୁଲିସ ବାହିନୀରେ ମହିଳାଙ୍କ ସଂଖ୍ୟା ଏକ ଲକ୍ଷରୁ ଦ୍ୱିଗୁଣିତ ହୋଇ ୨ ଲକ୍ଷରୁ ଅଧିକ ହୋଇଛି । ଆମ ଦେଶର ୩୫ ହଜାରରୁ ଅଧିକ ଝିଅ ଏବେ କେନ୍ଦ୍ରୀୟ ବାହିନୀଗୁଡିକରେ ସାମିଲ ହୋଇ ଦେଶର ଶତ୍ରୁମାନଙ୍କ ବିରୋଧରେ ଲଢୁଛନ୍ତି । ୮ ବର୍ଷ ପୂର୍ବରୁ ଥିବା ସଂଖ୍ୟା ଏବେ ଦ୍ୱିଗୁଣିତ ହୋଇସାରିଛି । ଆପଣମାନଙ୍କ କ୍ଷମତା ଉପରେ ମୋର ଦୃଢ ବିଶ୍ୱାସ ରହିଛି । ସମସ୍ତଙ୍କ ପ୍ରୟାସ ଦ୍ୱାରା ଆମେ ନିଶ୍ଚିତ ଭାବେ ଏକ ଉନ୍ନତ ସମାଜ ଓ ମଜବୁତ ଦେଶ ନିର୍ମାଣରେ ସଫଳ ହେବା ବୋଲି ପ୍ରଧାନମନ୍ତ୍ରୀ କହିଛନ୍ତି ।

ଏହି ଅବସରରେ ମଧ୍ୟପ୍ରଦେଶ ରାଜ୍ୟପାଳ ଶ୍ରୀ ମଙ୍ଗୁଭାଇ ପଟେଲ, ମଧ୍ୟପ୍ରଦେଶ ମୁଖ୍ୟମନ୍ତ୍ରୀ ଶିବରାଜ ସିଂହ ଚୌହାନ, କେନ୍ଦ୍ର ମନ୍ତ୍ରୀ ଶ୍ରୀ ନରେନ୍ଦ୍ର ସିଂହ ତୋମର, ଶ୍ରୀ ଜ୍ୟୋତିରାଦିତ୍ୟ ସିନ୍ଧିଆ ଓ ଡଃ ବୀରେନ୍ଦ୍ର କୁମାର ଓ କେନ୍ଦ୍ର ରାଷ୍ଟ୍ରମନ୍ତ୍ରୀ ଶ୍ରୀ ଫଗନ ସିଂହ କୁଲସ୍ତେ ଓ ଶ୍ରୀ ପ୍ରହଲ୍ଲାଦ ପଟେଲ ଉପସ୍ଥିତ ଥିଲେ ।

ପୃଷ୍ଠଭୂମି

ଏହି ସମ୍ମେଳନରେ ଦୀନଦୟାଲ ଅନ୍ତ୍ୟୋଦୟ ଯୋଜନା- ଜାତୀୟ ଗ୍ରାମୀଣ ଜୀବିକା ମିଶନ (ଡିଏୱାଇ- ଏନଆରଏଲଏମ) ଦ୍ୱାରା ପ୍ରୋତ୍ସାହନ ପାଉଥିବା ହଜାର ହଜାର ମହିଳା ସ୍ୱୟଂ ସହାୟକ ଗୋଷ୍ଠୀ (ଏସଏଚଜି) ସଦସ୍ୟା/ଗୋଷ୍ଠୀ ସଂସାଧନକାରୀ ଉପସ୍ଥିତ ଥିଲେ ।

କାର୍ଯ୍ୟକ୍ରମ ଅବସରରେ ପ୍ରଧାନମନ୍ତ୍ରୀ ପିଏମ କୌଶଳ ବିକାଶ ଯୋଜନା ଅନ୍ତର୍ଗତ ନିର୍ମିତ ଚାରିଟି ସମ୍ବେଦନଶୀଳ ଜନଜାତି ସମୂହ ଦକ୍ଷତା କେନ୍ଦ୍ର ଉଦଘାଟନ କରିଛନ୍ତି ।

ଡିଏୱାଇ- ଏନଆରଏଲଏମର ଉଦ୍ଦେଶ୍ୟ ଗ୍ରାମାଞ୍ଚଳର ଗରିବ ପରିବାରଗୁଡିକୁ ପର୍ଯ୍ୟାୟକ୍ରମେ ଏସଏଚଜିରେ ସାମିଲ କରିବା ଓ ସେମାନଙ୍କ ଜୀବିକାରେ ବିବିଧତା ଆଣି ସେମାନଙ୍କ ରୋଜଗାର ଓ ଜୀବନର ଗୁଣବତ୍ତା ବୃଦ୍ଧି ପାଇଁ ଦୀର୍ଘକାଳୀନ ସହାୟତା ପ୍ରଦାନ କରିବ । ସଚେତନତା ସୃଷ୍ଟି କରି ମହିଳା ଏସଏଚଜି ସଦସ୍ୟମାନଙ୍କ ସଶକ୍ତିକରଣ ଓ ଘରୋଇ ହିଂସା, ମହିଳା ଶିକ୍ଷା ଓ ଅନ୍ୟ ଲିଙ୍ଗ ସମ୍ବନ୍ଧୀୟ ସମସ୍ୟା, ପୋଷଣ, ସ୍ୱଚ୍ଛତା, ସ୍ୱାସ୍ଥ୍ୟ ଆଦି ସମ୍ପର୍କରେ ବ୍ୟବହାର ପରିବର୍ତ୍ତନକାରୀ ବାର୍ତ୍ତା ମାଧ୍ୟମରେ ମହିଳା ଏସଏଚଜି ସଦସ୍ୟାମାନଙ୍କୁ ସଶକ୍ତ କରିବା ପାଇଁ ପ୍ରୟାସ ଜାରି ରହିଛି ।

SR