প্রধানমন্ত্রীগী লোইশঙ
প্রধান মন্ত্রীনা মধ্য প্রদেশকী করাহলদা পাঙথোকপা নুপীশিংগী সেল্ফ হেল্প গ্রুপশিংগী কনফরেন্সতা ৱা ঙাংখ্রে
প্রধান মন্ত্রীনা পি.এম. কৌশাল বিকাস য়োজনাগী মখাদা পার্তিক্যুলর্লী ভলনরেবল ত্রাইবেল গ্রুপ্স স্কিলিং সেন্তর মরি শঙ্গাখ্রে
‘ভারতকী ইচানুপীশিং অমসুং ইমাশিংনা ঐহাক্কী ‘রক্ষা কৱচ’ (ঙাকথোক্নবা চুঙ্গোই) ওইরি’
“ঙসিগী অনৌবা ভারত্তা নুপীগী শক্তিগী ফিরাল অসি পঞ্চায়ত ভবনদগী রাস্ত্রপতি ভবন ফাওবদা ৱাংনা পাইরি”
“নখোয়না খুদোংথিবা পুম্নমক মায়োক্নরবসু চীতাহশিং অসিদদি অকাইবা অমত্তা থোকহল্লোই হায়না ঐহাক্না থাজৈ”
“নুপীশিংগী শক্তি অসিনা হৌখিবা চহিচাগী ভারত অমসুং চহিচা অসিগী অনৌবা ভারত অসিগী মরক্তা খেন্নবা পুরক্লিবা ফেক্তর অমা ওইরক্লি”
“মতমগা ইরোইননা ‘সেল্ফ-হেল্প গ্রুপশিং’না ‘নেস্নেল হেল্প গ্রুপশিং’ ওল্লকখি”
“সরকার অসিনা খুঙ্গংগী শেন্মীৎলোন্দা নুপী ওন্তপ্রিনোরশিংগী অনৌবা ওইথোকপা য়াবশিং লৈহন্নবা লেপ্পা লৈতনা হোৎনদুনা লাকখি”
“মীরৈবাক্তগী লাকপা দিগনিতরীশিংগী মথেল-লুকোইদা কোর্স সিরিএলশিংনা শেম্বা য়ামদ্রবদা আইতেম অমা মতম চুপ্পদা হাপকনি”
“লৈবাক শিনবা থুংবদা পুলিস ফোর্সশিংদা লৈরিবা নুপীশিংগী মশিং অসি লাখ ১ ওইরম্বদগী লাখ ২ হেন্না হেনগৎলে”
Posted On:
17 SEP 2022 2:41PM by PIB Imphal
প্রধান মন্ত্রী, শ্রী নরেন্দ্র মোদীনা মধ্য প্রদেশকী শিওপুরগী করাহলদা পাঙথোকপা সেল্ফ হেল্প গ্রুপ সম্মেলন্দা শরুক য়াখ্রে। থৌরম অসিদা প্রধান মন্ত্রীনা পি.এম. কৌশাল বিকাস য়োজনাগী মখাদা পার্তিক্যুলর্লী ভলনরেবল ত্রাইবেল গ্রুপ্স (পি.ভি.তি.জি.) স্কিলিং সেন্তর মরিসু শঙ্গাখ্রে। প্রধান মন্ত্রীনা এস.ঐচ.জি. মেন্বরশিংদা বেঙ্ক লোন সেঙ্কসন লেত্তরশিং খুৎশিন্নখি অমসুং জল জীবন মিসনগী মখাদা কিতশিংসু মহাক্না খুৎশিন্নখি। থৌরম অদুদা এস.ঐচ.জি. মেম্বর ওইবা নুপী লাখ অমনা শরুক বাখি অমসুং তোঙান-তোঙানবা সেন্তরশিংদগী নুপী লাখ ৪৩রোমসু কন্নেক্ত তৌখি।
মীতিন অদুদা ৱা ঙাংলদুনা প্রধান মন্ত্রীনা হায়খি মদুদি করিগুম্বা মতমনা য়ারবদি মহাক্না মহাক্কী মমাদগী মহাক্কী মপোক নুমিৎকীদমক থৌজাল নীজনবা হোৎনগনি। ঙসি মহাক্কী মমাগা মহাক্না উন্নবা ফংদ্রবসু ত্রাইবেলগী ইমা লাখ কয়াদগী থৌজালশিং ফংজবা অসিদা মহাক্কী মমানা শোইদনা হরাওরমগনি হায়না মহাক্না ফোঙদোকখি। মহাক্না হায়খি ‘ভারতকী ইচানুপীশিং অমসুং ইমাশিংনা ঐহাক্কী ‘রক্ষা কৱচ’ (ঙাকথোক্নবা চুঙ্গোই) ওইরি’। মহাক্না হায়খি মদুদি বিশ্বকর্মা জয়েন্তিদা সেল্ফ হেল্প গ্রুপশিংগী অচৌবা কনফরেন্স পাঙথোকপা অসিমক য়াম্না অখন্নৈ অমসুং বিশ্বকর্মা পুজাগী নুমিৎকী য়াইফ-পাউজেলসু পীখি।
প্রধান মন্ত্রীনা চহি হুমফু-তরাগী মতুংদা ভারত্তা চীতাহশিংনা অমুক হল্লকপা অসিদা মহাক্না য়াম্না চাউথোকচবা অমসুং নুংঙাইবা ফোঙদোকখি। মহাক্না হায়খি, “মফম অসিদা লাক্ত্রিঙৈ মমাংদা ঐহাক্না কুনো নেস্নেল পার্কতা চীতাহশিং থাদোকপগী খুদোংচাবা ফংজখি”। থৌরম মফম অদুদা মহাক্না অথোইবা মীথুংলেনশিং হায়না কৌরিবা চীতাশিংগীদমক মীপুম খুদিংমক্না হৌগৎতুনা খুপাক খুনবা হায়খি অমদি মীয়াম্না হৌগৎতুনা খুপাক খুখি। লমদম অদুগী মীয়ামদা মহাক্না হায়খি, “নখোয়দা থাজবা থম্বনা মরম ওইদুনা চীতাহশিং অসি নখোয়দা শীন্নখিবনি। নখোয়না খুদোংথিবা পুম্নমক মায়োক্নরবসু চীতাহশিং অসিদদি অকাইবা অমত্তা থোকহল্লোই হায়না ঐহাক্না থাজৈ। মরম অসিনা ঙসি ঐহাক্না নখোয়দা চীতা নিপানগী থৌদাং শীন্নরি”। ঙসি এস.ঐচ.জি.শিংনা উ-চারা লাখ ১০ থাখিবা অদুবু শীংথারদুনা প্রধান মন্ত্রীনা হায়খি মসিনা ভারতনা অকোইবগী ফীভম ঙাকশেন্নবা খোঙথাংশিংদা অনৌবা শক্তি পীরগনি।
ভারত্তা নুপীশিংনা মশক তাকপা হেনগৎলক্লিবা অসিগী মতাংদা ফোঙদোক্লদুনা প্রধান মন্ত্রীনা হায়খি মদুদি নুপীশিংগী শক্তি অসিনা হৌখিবা চহিচাগী ভারত অমসুং চহিচা অসিগী অনৌবা ভারত অসিগী মরক্তা খেন্নবা পুরক্লিবা ফেক্তর অমা ওইরক্লি। শ্রী মোদীনা মখা তারদুনা, “ঙসিগী অনৌবা ভারত্তা নুপীগী শক্তিগী ফিরাল অসি পঞ্চায়ত ভবনদগী রাস্ত্রপতি ভবন ফাওবদা ৱাংনা পাইরি”। হন্দক্তা পাঙথোকখিবা পঞ্চায়তকী মীখলদা নুপী লিশিং ১৭না পঞ্চায়ত বোদীশিংদা কারকখি হায়না মহাক্না ফোঙদোকখি। মসি অচৌবা অহোংবগী খুদম অমনি হায়না মহাক্না ফোঙদোকখি।
প্রধান মন্ত্রীনা লৈবাক্কী নীংতম ইহৌ অমসুং ঙাকশেলদা নুপীনা শরুক তমখিবা অদু নীংশিংখি। হন্দক্তা পাঙথোকখিবা হর ঘর তিরঙ্গা কেম্পেন্দা নুপী অমসুং এস.ঐচ.জি.শিংনা লৌখিবা থৌদাং অমসুং কোরোনা লাইচৎ মনুংদা মখোয়না হোৎনখিবশিং অদুবু থাগৎখি। মহাক্না হায়খি মতমগা ইরোইননা ‘সেল্ফ-হেল্প গ্রুপশিং’না ‘নেস্নেল হেল্প গ্রুপশিং’ ওল্লকখি। সেক্তর অমা হেক্তা মাইপাকপা হায়বা অসি নুপীশিংনা শরুক য়াবা হেনগৎলকপগা হকথেংননা মরী লৈনৈ হায়না প্রধান মন্ত্রীনা ফোঙদোকখি। মোদেল অসিগী ফজবা খুদম অসি নুপীশিংনা লমজিংবা স্বচ্ছ ভারত অভিয়ান অসিনি। মতৌ অসুম্না হৌখিবা চহি অহুমগী মনুংদা ভারত্তা য়ুমথোং করোর ৭না পাইপকী ঈশিংগী কন্নেক্সন ফংবা ঙমখি মসিগী মনুংদা ইমুং লাখ ৪০দি মধ্য প্রদেশতগী ওইখি। মাইপাকপা অসিগীদমক প্রধান মন্ত্রীনা ভারতকী নুপীশিংবু থাগৎখি।
প্রধান মন্ত্রীনা হৌখিবা চহি ৮দা সরকারনা সেল্ফ হেল্প গ্রুপশিংবু শক্তি পীনবা খোঙথাং কয়ামরুম পাইখৎখি। শ্রী মোদীনা হায়খি, “ঙসি লৈবাক অসিগী ইচে-ইচল করোর ৮ হেনবনা কেম্পেন অসিদা য়াওরি। ঐখোয়গী পান্দমদি খুঙ্গংগী ইমুং খুদিংমক্তগী য়ামদ্রবদা ইচে-ইচল অমনা কেম্পেন অসিদা য়াওবা হায়বা অসিনি”।
‘ৱান দিস্ত্রিক্ত, ৱান প্রদক্ত’ ইনিসিএতিবকী মতাংদা পল্লদুনা প্রধান মন্ত্রীনা হায়খি মদুদি মসি জিলা খুদিংমক্তগী লোকেল প্রদক্তশিংবু অচৌবা কৈথেলশিংদা য়ৌহন্নবা খোঙথাং অমনি। শ্রী মোদীনা হায়খি মদুদি সরকার অসিনা খুঙ্গংগী শেন্মীৎলোন্দা নুপী ওন্তপ্রিনোরশিংগী অনৌবা ওইথোকপা য়াবশিং শেম্নবা লেপ্পা লৈতনা হোৎনদুনা লাকখি। মহাক্না হায় এস.ঐচ.জি.শিংনা কৈথেলশিংদা লুপা করোর ৫০০রোম ওইগদবা প্রদক্রশিং য়োনখি। পি.এম. ভন ধন য়োজনা অমসুং পি.এম. কৌশাল বিকাস য়োজনাগী কান্নবশিংনা নুপীশিংদসু য়ৌশিল্লি। মহাক্না জি.ই.এম. পোর্তেলদা এস.ঐচ.জি.গী প্রদক্তকীদমক লৈরিবা ‘সরাস’ স্পেসকী মরমদা পাউদমখি।
প্রধান মন্ত্রীনা ভারতনা য়ুনাইতেদ নেসনস য়ৌনবা চাউনা হোৎনখিবা অমসং ইং ২০২৩বু কোর্স সিরিএল্সকী চহি হায়না লাউথোক্তুনা মালেমগী থাক্তা পালন তৌগদৌরিবা অসিগী মতাংদা ফোঙদোকখি। লৈবাক শিনবা থুংনা সেপ্তেম্বর থাবু মচি ওইবা চীঞ্জাক চাবগী থা হায়না পালন তৌরিবা অসিসু প্রধান মন্ত্রীনা নীংশিংখি। প্রধান মন্ত্রীনা হায়খি মদুদি মীরৈবাক্তগী লাকপা দিগনিতরীশিংগী মথেল-লুকোইদা কোর্স সিরিএলশিংনা শেম্বা য়ামদ্রবদা আইতেম অমা মতম চুপ্পদা হাপকনি।
২০১৪দগী হৌনা সরকারনা পাইখৎলিবা খোঙথাংশিং অসিবু নীংশিংলদুনা প্রধান মন্ত্রীনা হায়খি মদুদি লৈবাক অসিনা নুপীশিংগী ইকাই খুম্নবা হেনগৎহন্নবগী মাইকৈদা অমসুং মখোয়না নুমিৎ খুদিংগী থেংনবা শীংনবশিং কোকহন্নবা লেপ্পা লৈতনা থবক পাইখৎতুনা লাকখি। শ্রী মোদীনা অমাংশঙ লৈতবা অমসুং চাকশঙদগী শীং মৈ থাবদগী থোরকপা মৈখুনা থোকহনবা খুদোংচাদবশিং হায়রিবশিং অসিগা মরী লৈনবা সমস্যাশিং অসি থেংনবদা নুপীশিংনা করম্না চাউনা খুদোংচাদবা মায়োক্নবগে নীংশিংখি। প্রধান মন্ত্রীনা লৈবাক অসিদা অমাংশঙ করোর ১১ হেন্না শাদুনা, ইমুং করোর ৯ হেনবদা গ্যাস কন্নেক্সন পীদুনা অমসুং ভারতকী খ্বাইদগী মনুং হঞ্জিনবা শরুকশিংদা লৈবা ইমুং করোর কয়াদা তোতি ঈশিং ফংহনবগা লোয়ননা মখোয়গী পুন্সি অসি হিংবদা লায়থোকহনখিবগীদমক নুংঙাইবা ফোঙদোকখি। মাত্রু বন্দনা য়োজনাগী মখাদা মীরোল্লিবা মমাশিংগী একাউন্তশিংদা হকথেংননা লুপা করোর ১১০০০ ত্রান্সফর তৌখি। মধ্য প্রদেশকী মমাশিংনা স্কিম অসিগী মখাদা লুপা করোর ১৩০০ ফংখি। মহাক্না য়ুমশিংগী শেল-থুমগী ওইবা ৱারেপশিং লৌবদা নুপীশিংনা থৌদাং য়াবা হেনগৎলক্লিবা অসিগী মতাংদসু ফোঙদোকখি।
জন ধন বেঙ্ক একাউন্তশিংগী মতাংদা ৱা ঙাংলদুনা প্রধান মন্ত্রীনা হায়খি মদুদি লৈবাক অসিদা মসিনা নুপীশিংদা শক্তি পীনবা অচৌবা পাম্বৈ অমা ওইরক্লি। প্রধান মন্ত্রীনা কোরোনাগী মতমবু নীংশিংলদুনা মসিদা জন ধন বেঙ্ক একাউন্তশিংগী শক্তিনা সরকারনা নুপীশিংগী বেঙ্ক একাউন্তশিংদা শাফনা অমসুং হকথেংননা শেল ত্রান্সফর তৌবা ঙমখি হায়নখি। মহাক্না হায়, “ঙসি পি.এম. আৱাজ য়োজনাগী মখাদা শাখিবা য়ুমশিং নুপীশিংগী মমিংদা লৈরি। ঐখোয়গী সরকারনা নুপী করোর ২ হেন্না ইনেবল তৌদুনা য়ুমগী মপুশিং ওইহল্লি। মুদ্রা স্কিমগী মখাদা হৌজিক ফাওবদা লৈবাক শিনবা থুংবদা লৈরিবা অপীকপা বিজিনেসশিং অমসুং বিজিনেসশিংদা লুপা করোর লাখ ১৯গী লোন পীখ্রে। শেলশিং অসিগী চাদা ৭০দি নুপী ওন্তপ্রিনোরশিংনা ফংখি। সরকারগী অসিগুম্বা খোঙথাংশিং অসিনা মরম ওইদুনা য়ুমথোংশিংদা ঙসিদি শেল-থুমগী ওইবা ৱারেপশিং লৌবদা নুপীশিংগী থৌদাং হেনগৎলক্লি”।
প্রধান মন্ত্রীনা হায়খি, “নুপীশিংগী ইকনোমিক এম্পাৱরমেন্তনা খুন্নাইদা মখোয়বু চপ মান্ননা শক্তি পীরি”। ভারতকী ইচানুপীশিংনা করম্না সাইনিক স্কুলশিংদা এনরোল তৌবগে, পুলিস কম্মান্দোশিং ওইবগে অমসুং আর্মীদা য়াওবগে হায়না পল্লদুনা প্রধান মন্ত্রীনা সরকার অসিনা মখোয়গীদমক লোন্দুনা লৈরুরবা থোংশিং হাংলকপা অমসুং অনৌবা খুদোংচাবশিং পীবা অসিগীদমক থাগৎখি। হৌখিবা চহি ৮ অসিদা লম খুদিংমক্তা শীংথানীংঙাই ওইরবা অহোংবশিং পুরক্লিবা অসুদা মীপুম খুদিংমক্কী মীৎয়েং চীংশিল্লদুনা প্রধান মন্ত্রীনা লৈবাক শিনবা থুংবদা পুলিস ফোর্সশিংদা লৈরিবা নুপীশিংগী মশিং অসি লাখ ১ ওইরম্বদগী লাখ ২ হেন্না হেনগৎলে হায়না চাউথোকচবা পোকপগা লোয়ননা পাউদমখি। প্রধান মন্ত্রীনা ঐখোয়গী ইচানুপী লিশিং ৩০ হেনবনা হৌজিক সেন্ত্রেল ফোর্সশিংগী শরুক অমা ওইরি অমসুং লৈবাক অসিগী য়েকনবশিংগী মায়োক্তা লান্থেংনরি হায়না ফোঙদোকখি। প্রধান মন্ত্রীনা মখা তারদুনা হায়খি, “চহি ৮গী মমাংদা লৈরম্বা অদুদগী মশিং অসি শরুক অনি হেনগৎপা ঙমখি”। “নখোয়গী পাঙ্গলদা ঐহাক্না চেৎনা থাজবা থম্মি। সবকা প্রয়াসকা লোয়ননা ঐখোয়না অফবা খুন্নাই অমসুং মপাঙ্গল কনবা লৈবাক অমা শেমগৎপদা শোইদনা মাইপাক্কনি হায়না ঐহাক্না থাজৈ”।
থৌরম অসিদা মধ্য প্রদেশকী রাজ্যপাল, শ্রী মঙ্গুভাই পতেল, মধ্য প্রদেশকী মুখ্য মন্ত্রী, শ্রী শিবরাজ সিংহ চৌহান, কেন্দ্রগী মন্ত্রীশিং, শ্রী নরেন্দ্র সিংহ তোমর, শ্রী জ্যোতিরাদিত্য সিন্ধিয়া অমসুং দা. বিরেন্দ্র কুমার অমসুং কেন্দ্রগী রাজ্য মন্ত্রীশিং, শ্রী ফগ্গন সিংহ কুলাস্তে অমসুং শ্রী প্রহলাদ পতেলনা শরুক য়াখি।
বেকগ্রাউন্দ
থৌরম অসিদা দীনদয়াল অন্ত্যোদয়া য়োজনা-নেস্নেল রুরেল লাইবলিহুদ মিসন (দি.এম.ৱাই-এন.আর.এল.এম.)গী মখাদা য়োকখৎলিবা নুপী সেল্ফ হেল্প গ্রুক (এস.ঐচ.জি.) মেম্বরশিং/কম্ম্যুনিতী রিসোর্স পর্সন লিশিং কয়াসু শরুক য়াখি।
থৌরম অসিদা, প্রধান মন্ত্রীনা পি.এম. কৌশাল বিকাস য়োজনাগী মখাদা লিংখৎপা পার্তিকুলর্লী ভলনরেবল ত্রাইবেল গ্রুপ্স (পি.ভি.তি.জি.) স্কিলিং সেন্তর মরিসু শঙ্গাখি।
দি.এ.ৱাই.-এন.আর.এল.এম.না তাঙ্কক নাইনা খুঙ্গংগী লায়রবা য়ুমথোংশিংবু এস.ঐচ.জি.দা পুশিল্লক্নবা অমদি মখোয়গী পুন্সি হিংনবগী মখল মথেলগী পাম্বৈশিং পীবদা অমদি মখোয়গী শেন্থোক অমসুং পুন্সি মহিং ফগৎহনবদা ঙাক্লৌ পীরি। মিসন অসিনা ইমুং মনুংদা ওৎ নৈবা, নুপীদা মহৈ মশিং তমহনবা অমসুং ন্যুত্রিসন, সেনিতেসন, হকশেলনচিংবা জেন্দরগা মরী লৈনবা হীরমশিংদা পাক শন্না খঙহনবা অমসুং লমচৎ হোংহন্নবগী পাউ ফাওদোক ফাওজিন তৌদুনা নুপী এস.ঐচ.জি. মেম্বরশিংবু মপাঙ্গল কলহন্নবা থবকসু পায়খৎলি।
******
(Release ID: 1860162)
Visitor Counter : 127
Read this release in:
English
,
Urdu
,
Marathi
,
Hindi
,
Assamese
,
Bengali
,
Punjabi
,
Gujarati
,
Odia
,
Tamil
,
Telugu
,
Kannada
,
Malayalam