প্রধানমন্ত্রীগী লোইশঙ
প্রধান মন্ত্রীনা মধ্য প্রদেশকী কুনো নেস্নেল পার্কতা লমলক্কী চীতাহশিং থাদোকপগী থৌরমদা জাতিদা ৱা ঙাংখ্রে
“ঙসি ভারতকী লমদম অসিদা চীতাহ হল্লক্লে”
“ঐখোয়গী হৌরকফমশিংদগী ঐখোয়না থাপতোরকপা মতমদা ঐখোয়দা চাউনা মাংজবা লাকই”
“অমৃত হায়বা অসিদা অশিববু হিংগৎহনবা ঙম্বগী শক্তি চেল্লি”
“মালেমগী ওইবা গাইদলাইনশিং অসি ঙাক্না চৎতুনা ভারতনা চীতাহশিং অসি সেতল তৌহন্নবা অঙম্বা থাক্তা হোৎনরি”
“ইকো-তুরিজম হেনগৎলকপনা মরম ওইরগা থবক্কী খুদোংচাবশিং হেনগৎলক্কনি”
“মহৌশা অমসুং অকোইবগী ফীভম, শা-উচেক অসি ভারতকী ওইনদি শুপ্নগী সস্তেনেবিলিতী অমসুং সেক্যুরিতীগী ৱাফম খক্তা নত্তে, মসি ঐখোয়গীদমক্তদি সেন্সিবিলিতী অমসুং স্পিরিচুএলিতীগী হৌরকফমসু ওইরি”
“ঙসি ঐখোয়গী উমং অমসুং পুন্সিগী অচৌবা অহোবা অমা চীতাহগী খুত্থাংদা মেনশিনবা ঙমখ্রে”
“ঙসি নাকল অমরোমদা মালেমগী খোঙজেল য়াংনা চাউখৎলক্লিবা ইকনোমীশিংগী মরক্তা ঐখোয়সু য়াওবা ফংলে মসিগা লোয়ননা লৈবাক অসিগী উমুংনা কোনবা মফমশিংসু লেপ্পা লৈতনা পাকথোক চাউথোরক্লি”
“ইং কুমজা ২০১৪দগী লৈবাক অসিদা অনৌবা প্রোতেক্তেদ এরিয়া ২৫০রোম হাপচিনখি”
“থাখিবা মতমদগী ঙনখৎনা কৈগী মশিং শরুক অনি ওইহন্নবা পান্দমসু ফংবা ঙমখি”
“হৌখিবা চহি খরা অসিদা শামুশিংগী মশিংসু লিশিং ৩০ হেন্না হেনগৎখি”
“
Posted On:
17 SEP 2022 12:09PM by PIB Imphal
প্রধান মন্ত্রী, শ্রী নরেন্দ্র মোদীনা ঙসি কুনো নেস্নেল পার্কতা – ভারত্তগী মুৎখ্রবা – লমলক্কী চীতাহশিং থাদোকখ্রে। নামীবিয়াদগী পুরকখিবা চীতাহশিং অসি মালেমগী ইহান হানবা ইন্তর-কন্তিনেন্তেল লার্জ ৱাইল্দ কার্নিবোর ত্রান্সলোকেসন প্রোজেক্ত ওইরিবা প্রোজেক্ত চীতাহগী মখাদা ভারত্তা পুরকখিবনি।
প্রধান মন্ত্রীনা কুনো নেস্নেল পার্ক্কী রিলিজ পোইন্ত অনিদা চীতাহশিং অসি থাদোকখি। প্রধান মন্ত্রীনা চীতাহ মিত্রাশিং, চীতাহ রিহেবিলিতেসন মেনেজমেন্ত গ্রুপ অমসুং মহৈরোয়শিংগা লোয়ননা থৌরম পাঙথোক্লিবা মফমদা ৱারী শাখি। প্রধান মন্ত্রীনা পুৱারী ওইরবা থৌরম অসিদা জাতিদা ৱা ঙাংখি।
জাতিদা মহাক্কী ৱারোল পীবদা প্রধান মন্ত্রীনা মীওইবা জাতিদা হৌখিববু শেমচোকচনবা অমসুং অনৌবা তুংমলমচৎ অমা শেমগৎনবা তাঞ্জা অমা পীরিবা খুদোংচাবা কয়া অদু ফোঙদোক্লদুনা তৌবীমল খঙবা ফোঙদোকখি। শ্রী মোদীনা ঙসি ঐখোয়গী মাংদা অসিগুম্বা মীকুপ অমা লাক্লে হায়খি। মহাক্না হায়, “দিকেদ কয়াগী মমাংদা বাইওদাইভর্সিতীগী চহি য়াম্না লিরবা মরী অদু তৎখি অমসুং মুৎখি, ঙসি ঐখোয়না মদুবু অমুক হন্না শমজিন্নবগী খুদোংচাবা অমা ফংলি”। “ঙসি ভারতকী লমদম অসিদা চীতাহ হল্লক্লে”। প্রধান মন্ত্রীনা মসিগী মরু ওইবা থৌরম অসিনা ভারতকী মহৌশাবু নুংশিবগী ৱাখল্লোন অদুসু মপুং ফাবা শক্তিগা লোয়ননা য়াকাইহল্লে হায়খি। শ্রী মোদীনা পুৱারী ওইরবা থৌরম অসিদা ইরৈবাকচা পুম্নমকপু থাগৎপা ফোঙদোকখি লোয়ননা দিকেদ কয়াগী মতুংদা ভারতকী লমদম অসিদা চীতাহ অমুক হল্লকপা ঙমহনবদা মতেং পাংখিবা নামীবিয়া অমসুং মফম অদুগী সরকারবু মহাক্না অখন্ননা থাগৎপা ফোঙদোকখি। প্রধান মন্ত্রীনা হায়, “চীতাহশিং অসিনা মহৌশাগীদমক ঐখোয়গী থৌদাংশিং অদুগী মরমদা ঐখোয়দা খঙহনবা খক্তা নত্তনা মসিনা ঐখোয়গী হ্যুমেন ভেল্যুশিং অমসুং চৎনবীশিং অদুসু খঙহনগনি হায়না ঐহাক্না থাজৈ”।
আজাদী কা অমৃতকালগী মতাংদা পল্লদুনা প্রধান মন্ত্রীনা ‘পঞ্চ প্রন’গী মতাংদা নীংশিংখি অমসুং ‘ঐখোয়গী হেরিতেজকীদমক চাউথোকচবা পোকপা’ অমসুং ‘মীখা পোনবগী ৱাখল্লোন্দগী নীংতম্বা ফংবা’ হায়বা অসিগী মরু ওইবা অদু থমখি। প্রধান মন্ত্রীনা মখা তারদুনা হায়খি, “ঐখোয়গী হৌরকফমশিংদগী ঐখোয়না থাপতোরকপা মতমদা ঐখোয়দা য়াম্না মাংজবা লাকই”। মহাক্না হৌখিবা চহিচাশিংদা মহৌশাবু য়েৎখাই-থিনগাই তৌবা অসিনা শক্তি অমসুং চাউখৎপগী খুদম ওইনা লৌনরমখিবা মতম অদু নীংশিংখি। “ইং ১৯৪৭তা লৈবাক অসিদা অরোইবা চীতাহ অহুম খক্তমক ঙাইবা মতমদা মখোয়বুসু মীনুংশি লৈতনা অমসুং থৌদাং মশক খঙদবা মওংদা সাল উমুংদা হাৎতোকখি”, হায়না মহাক্না মখা তাখি।
ইং কুমজা ১৯৫২দা ভারত্তগী চীতাহশিং অসি মুৎখ্রবসু হৌখিবা দিকেদ তরেৎ অসিদা মখোয়বু রিহেবিলিতেত তৌনবা মহৈ য়ানগদবা খোঙথাং অমত্তা পাইখৎখিদে হায়না প্রধান মন্ত্রীনা ফোঙদোকখি। আজাদী কা অমৃত মহোৎসবকী মতম অসিদা লৈবাক অসিনা অনৌবা শক্তিগা লোয়ননা চীতাহশিং রিহেবিলিতেত তৌবা হৌখি হায়না প্রধান মন্ত্রীনা নুংঙাইবা ফোঙদোকখি। শ্রী মোদীনা হায়, “অমৃত হায়বা অসিদা অশিববু হিংগৎহনবা ঙম্বগী শক্তি চেল্লি”। প্রধান মন্ত্রীনা মখা তারদুনা হায়খি আজাদী কা অমৃত মহোৎসব অসিদা থৌদাং অমসুং থাজবগী অমৃত অসিনা ঐখোয়গী হেরিতেজপু হিংগৎহনবা খক্তা নত্তনা হৌজিক চীতাহশিংনা ভারতকী লমদম অসিদা অমুক হন্না হল্লকপা ঙমহল্লি।
রিহেবিলিতেসন অসি মাইপাক্নবা হোৎনবদা চহি কয়া কন্না হোৎনখিবা অদুদা মীয়ামগী পুক্নিং চীংশিল্লদুনা প্রধান মন্ত্রীনা হায়খি, রাজনিতীগী ওইনা মরু ওইনা লৌদনবা লম অমগীদমক শক্তি কয়া শীজিন্নখি। মহাক্না হায়, ময়েক শেংবা চীতাহ এক্সন প্লান অমা শেমখি অমরোমদা ঐখোয়গী তেলেন্ত লৈবা বিজ্ঞানিকশিংনা পাকশন্না রিসর্চ চত্থখি, খা অফ্রিজা অমসুং নামীবিয়াগী অখং-অহৈশিংগা লোয়ননা খুৎশম্নদুনা থবক তৌমিন্নখি। প্রধান মন্ত্রীনা মখা তারদুনা হায়খি চীতাহগা খ্বাইদগী চুনগদবা মফমশিং খঙদোক্নবা লৈবাক শিনবা থুংবদা সাইন্তিফিক সর্ভেশিং চত্থখি অমসুং য়াইফরবা অহৌবা অসিগীদমক কুনো নেস্নেল পার্ক অসি খনখি। মহাক্না মখা তাখি, “ঙসি ঐখোয়গী মাংদা ঐখোয়না কন্না হোৎনখিবা অদুগী মহৈ উবা ফংলে”।
প্রধান মন্ত্রীনা নৌহৌনা ফোঙদোকখি মদুদি মহৌশা অমসুং অকোইবগী ফীভম ঙাকশেল্লবা মতমদা ঐখোয়গী তুংলমচৎসু শাফনা থম্বা ঙম্মি হায়বা অসি অচুম্বনি। চাউখৎপা অমসুং য়াইফনবগী লমশিং থোকচরকই। শ্রী মোদীনা মখা তারদুনা হায়খি কুনো নেস্নেল পার্কতা চীতাহশিংনা অমুক হন্না চেন-চোংবা মতমদা মফম অসিগী গ্রাসলেন্দ ইকোসিস্তেম অসি অমুক হন্না রিস্তোর তৌগনি, বাইওদাইভর্সিতী হেন্না হেনগৎলক্কনি। শ্রী মোদীনা হায়খি মফম অসিদা ইকো-তুরিজম হেনগৎলকপনা মরম ওইরগা থবক্কী খুদোংচাবশিং হেনগৎলক্কনি অসুম তৌনা চাউখৎপগী লম্বীদা অনৌবা ওইথোকপা য়াবা কয়া লাক্কনি।
প্রধান মন্ত্রীনা কুনো নেস্নেল পার্কতা থাদোকখিবা চীতাহশিং অসি য়েংনবগীদমক ইরৈবাকচাশিংনা থা খরা খাংনবা অমসুং ঙাইবীনবা হায়খি। মহাক্না হায়, “ঙসি চীতাহশিং অসিনা মীথুংলেনশিং ওইনা লাকপনি, মফম অসিগী মরমদা খঙদ্রি”, “কুনো নেস্নেল পার্কতা চীতাহশিং অসিনা মশাগী ময়ুম ওইজবা ঙমহন্নবগীদমক ঐখোয়না চীতাহশিং অসিবু থা খরগী মতম পীবা মথৌ তাই”। প্রধান মন্ত্রীনা মালেমগী ওইবা গাইদলাইনশিং অসি ঙাক্না চৎতুনা ভারতনা চীতাহশিং অসি সেতল তৌনবা অঙম্বা থাক্তা হোৎনরি হায়না ফোঙদোকখি। প্রধান মন্ত্রীনা মখা তারদুনা হায়খি, “ঐখোয়না হোৎনরিবশিং অসি মাইথীহল্লোইদবনি”।
প্রধান মন্ত্রীনা হায়খি ঙসি মালেমনা মহৌশা অমসুং অকোইবগী ফীভম অসিদা য়েংবা মতমদা সস্তেনেবল দিবেলপমেন্তগী মতাংদা ঙাংনৈ। মহাক্না হায়, “মহৌশা অমসুং অকোইবগী ফীভম, শা-উচেক অসি ভারতকী ওইনদি শুপ্নগী সস্তেনেবিলিতী অমসুং সেক্যুরিতীগী ৱাফম খক্তা নত্তে। ঐখোয়গীদমক্তদি মসি ঐখোয়গী সেন্সিবিলিতী অমসুং স্পিরিচুএলিতীগী হৌরকফমসু ওইরি”। মহাক্না মখা তারদুনা হায়খি, “ঐখোয়গী অকোইবদা লৈরিবা খ্বাইদগী পীকপা জীবগীদমক্তা ফাওবা ঐখোয়না খনবীয়ু ঐহাবনা ঐখোয়দা তাকপীরকখি। ঐখোয়গী চৎনবী অসিদা করিগুম্বা মরম লৈতনা জিবা পানবা অমনা লৈখিদবা থোকপা মতমদা ঐখোয়দা নুংঙাইতবনা থল্লি। অপুনবা স্পেসিস অমা লৈরম্বা অদু ঐখোয়না মরম ওইদুনা মুৎখি হায়বা অসি ঐখোয়না করম্না য়াজগনি?”।
প্রধান মন্ত্রীনা মখা তারদুনা হায়খি ঙসি চীতাহশিং অসি অফ্রিকাগী লৈবাক খরদা অমসুং ইরানদা ফংই অদুম ওইনমক ভারতকী মমিং অসি মতম কয়াগী মমাংদগী লিস্ত অসিদগী লৌথোকখ্রে। শ্রী মোদীনা হায়, “তুংদা লাক্কদবা চহিশিংদা অঙাংশিংনা মসিগী অশোইবা অসি থেংননরোই। মখোয়না ঐখোয়গী ইশাগী লৈবাক অসিদা চীতাহশিংনা চেন-চোংদুনা শান্নবা উবা ফংলগনি হায়না ঐহাক্না থাজৈ। ঙসি ঐখোয়গী উমং অমসুং পুন্সিগী অচৌবা অহোবা অমা চীতাহগী খুত্থাংদা মেনশিনবা ঙমখ্রে”।
প্রধান মন্ত্রীনা হায়খি মদুদি ঙসি ২১শুবা চহিচাগী ভারতনা ইকনোমী অমসুং ইকোলোজী অসি চানাদবা লমশিং নত্তে হায়না মালেম পুম্বদা পাউজেল অমা পীরি। মহাক্না হায়খি মদুদি অকোইবগী ফীভম ঙাকশেনবগা লোয়ননা লৈবাক অসি খুমাং চাউশিনহনবসু য়াই হায়বা অসুগী ভারতনা ময়েক শেংবা খুদম অমা ওইরি। প্রধান মন্ত্রীনা হায়খি “ঙসি নাকল অমরোমদা মালেমগী খোঙজেল য়াংনা চাউখৎলক্লিবা ইকনোমীশিংগী মরক্তা ঐখোয়সু য়াওবা ফংলে মসিগা লোয়ননা লৈবাক অসিগী উমুংনা কোনবা মফমশিংসু লেপ্পা লৈতনা পাকথোক চাউথোরক্লি”।
সরকারনা পাইখৎখিবা থবক্কী মতাংদা পল্লদুনা প্রধান মন্ত্রীনা হায়খি মদুদি ইং কুমজা ২০১৪দা ঐখোয়গী সরকারনা শেম্বা মতমদা লৈবাক অসিদা অনৌবা প্রোতেক্তেদ এরিয়া ২৫০রোম হাপচিনখি। ঐখোয়গী লমদম অসিদা এসিয়াতিক লায়নশিংগী মশিংদসু চাউনা হেনগৎলকখি। মতৌ অসুম্না ঙসি গুজরাতনা লৈবাক অসিগী এসিয়াতিক লায়নশিংগী খ্বাইদগী চাউবা মফম ওইবা ঙমখি। শ্রী মোদীনা মখা তারদুনা হায়খি, “দিকেদ কয়া কন্না হোৎনখিবা, রিসর্চ-বেজ পোলিসীশিং অমসুং জন-ভাগীদারীনা মসিদা অচৌবা থৌদাং লৌখি”, মহাক্না হায়, “লমলক্কী শাশিংগীদমক ঐখোয়না ইকাই খুম্নবা হেনগৎহনগনি অমসুং মখোয়দা য়েকনবা ওইনা লৌবা হন্থহনগনি হায়না গুজরাত্তা ৱাশক লৌখিবা অদু ঐহাক্না নীংশিংলি। ঙসি ৱাখল্লোন অদুনা পীবা ফল অদু ঐখোয়গী মাংদা উবা ফংলে”। প্রধান মন্ত্রীনা হায়খি মদুদি কৈগী মশিং শরুক অনি ওইহন্নবা পান্দমসু থাখিবা মতমদগী ঙনখৎনা ফংবা ঙমখি। মহাক্না অসামদা মচি অমা পানবা শামু গন্ধাশিং মুৎখিবা য়াবগী অকিবা লৈরমখিবা অদুবু ঙসিদি মখোয়গী মশিং অসিসু হেনগৎহনখি হায়না মহাক্না নীংশিংখি। হৌখিবা চহি খরা অসিদা শামুশিংগী মশিংসু লিশিং ৩০ হেন্না হেনগৎখি। শ্রী মোদীনা ৱেতলেন্দশিং পাকথোক চাউথোক্তুনা ভারতকী ফ্লোরা অমসুং ফৌনা ঙাকশেনবগী পাইখৎলিবা থবক্কী মতাংদসু ফোঙদোকখি। মহাক্না হায়খি মদুদি মালেম শিনবা থুংবগী ওইনা মীওই করোর কয়াগী পুন্সি অমসুং তঙাই ফদবশিং অসি ৱেতলেন্দ ইকোলোজীগী মখা পোল্লি। প্রধান মন্ত্রীনা হায়খি, “ঙসি লৈবাক অসিদা ৱেতলেন্দ ৭৫ রামসর সাইতস ওইনা লাউথোকখ্রে, মসিগী মনুংদা সাইত ২৬না হৌখিবা চহি ৪দা হাপচিনখিবনি”। “লৈবাক অসিনা হোৎনখিবশিংগী কান্নবা অদু তুংদা লাক্কদবা চহিচাশিংদা ময়েক শেংনা উবা ফংলগনি অমসুং মসিনা চাউখৎপগী অনৌবা লম্বী য়াৎলগনি”।
প্রধান মন্ত্রীনা ঙসি ভারতনা কোকহল্লিবা মালেমগী সমস্যাশিং অসিগী মতাংদা মীয়ামগী পুক্নিং চিংশিনখি। মহাক্না মালেমগী খুদোংচাদবশিং খঙদোক্নবা অমসুং মখোয়গী ৱারোইশিনশিং পুরক্নবা অমসুং ঐখোয়গী পুন্সিগী মতাংদসু হোলিস্তিক ওইবা মওং অমদা পাইখৎপা তঙাই ফদে হায়না নৌহৌনা ফোঙদোকখি। মালেমগীদমক লাইফ হায়বদি লাইফস্তাইল ফোর দি এনভাইর্নমেন্ত হায়বা মন্ত্র অমসুং ইন্তর্নেস্নেল সোলর এলাইন্সকী মতাংদা পল্লদুনা প্রধান মন্ত্রীনা হায়খি মদুদি ভারতনা মালেমদা ফম্পাক অমা পীরি। খোঙথাংশিং অসিগী মাইপাকপা অদুনা মালেমগী মাইকৈ অমসুং তুংলমচৎকী মরাইবক লেপ্পকনি।
প্রধান মন্ত্রীনা মালেমগী শীংনবশিং অসিবু ঐখোয় ইশাগী লনাইগী শীংনবশিং ওইনা লৌদুনা মসিবু কোকহন্নবা হোৎনবগী মতম য়ৌরক্লে অমসুং ঐখোয়গী পুন্সিশিংদা অপীকপা অহোংবা অমা পুরকপনা পৃথিবী পুম্বগী তুংলমচৎকী য়ুম্ফম ওইরকপা য়াগনি। “ভারতকী খোঙথাংশিং অমসুং চৎনবীশিং অসিনা অপুনবা মীওইবা জাতিবু মাইকৈ অসিদা লমজিংগনি অমসুং অফবা মালেম অমগী মঙলান্দা পাঙ্গল হাপকনি হায়না ঐহাক্না থাজৈ” হায়না ফোঙদোক্লদুনা প্রধান মন্ত্রীনা ৱারোল পীবা লোইশিনখি।
বেকগ্রাউন্দ
ধান মন্ত্রীনা কুনো নেস্নেল পার্কতা লমলক্কী চীতাহ থাদোক্কদৌরিবসি ভারতকী লমলক্কী শা-উচেকশিং অমসুং মখোয়গী লৈফম চাফম অমুক হিংগৎহন্নবা অমদি মখল মথেল শুনা থম্ননবগী থৌরাংগী শরুক অমনি। চীতাহ অসি ভারত্তগী মুৎখ্রে হায়না ১৯৫২দা লাউথোকখ্রবনি। থাদোক্লিবা চীতাহশিং অসি নামীবিয়াদগী চহি অসিগী অঙনবা শরুক্তা খুৎয়েক পীনখিবা এম.ও.য়ু. অমগী মখাদা পুরকপনি। ভারত্তা চীতাহ থাদোক্লিবা অসি মালেমগী ইহান হানবা ইন্তর-কন্তিনেন্তেল লার্জ ৱাইল্দ কার্নিবোর ত্রান্সলোকেসন প্রোজেক্ত অমা ওইরিবা প্রোজেক্ত চীতাহগী মখাদা পাঙথোকপনি।
চীতাহনা ভারতকী ওপন ফোরেস্ত অমসুং গ্রাসলেন্ত ইকোসিস্তেম অমুক হঞ্জিলহনবদা মতেং ওইগনি। মসিনা বাইওদাইভর্সিতী য়োকখৎপদা অমদি ঈশিং মরাং কায়হনবা, কার্বোন সিক্বেস্ত্রেসন অমসুং লৈহাউগী ইনিল ঙাক্তুনা থম্বনচিংবা ইকোসিস্তেম সর্ভিসশিং ফগৎহনবদা মতেং পাংদুনা খুন্নাইদা চাউনা কান্নহনগনি। থৌরাং অসি অকোইবগী ফীভম ঙাকথোকপা অমদি লমলক্কী শা-উচেকশিং য়োকখৎপা হায়রিবা প্রধান মন্ত্রীগী ফিরেপগী পরিংদা পায়খৎপনি অমদি ইকো-দেবেলপমেন্ত অমসুং ইকোতুরিজম থৌওংশিংগী খুত্থাংদা লোকেল কম্ম্যুনিতীদা হিংনবগী পাম্বৈগী খুদোংচাবা হেন্না ফগৎহনগনি।
*****
(Release ID: 1860120)
Visitor Counter : 187
Read this release in:
English
,
Urdu
,
Hindi
,
Marathi
,
Bengali
,
Assamese
,
Punjabi
,
Gujarati
,
Odia
,
Tamil
,
Telugu
,
Kannada
,
Malayalam