وزیر اعظم جناب نریندر مودی نے ویڈیو کانفرنسنگ کے ذریعے احمد آباد میں ’سنٹر اسٹیٹ سائنس کانکلیو‘ کا افتتاح کیا۔

اجتماع سے خطاب کرتے ہوئے وزیر اعظم نے روشنی ڈالی کہ اس کانکلیو کی تنظیم سب کا پریاس کی واضح مثال ہے۔ وزیر اعظم نے کہا کہ "21ویں صدی کے ہندوستان کی ترقی میں سائنس اس توانائی کی طرح ہے، جس میں ہر علاقے کی ترقی اور ہر ریاست کی ترقی کو تیز کرنے کی طاقت ہے۔ آج جب ہندوستان چوتھے صنعتی انقلاب کی قیادت کرنے کی جانب گامزن ہے، ہندوستان کی سائنس اور اس شعبے سے وابستہ لوگوں کا کردار بہت اہم ہے۔ ایسے میں انتظامیہ اور پالیسی سازی میں لوگوں کی ذمہ داری بہت بڑھ جاتی ہے۔

وزیراعظم نے اس بات پر زور دیا کہ سائنس حل، ارتقاء اور اختراع کی بنیاد ہے اور اسی پریرتا کے ساتھ، آج کا نیا ہندوستان جئے جوان، جئے کسان، جئے وگیان کے ساتھ ساتھ جئے انوسندھان کے ساتھ آگے بڑھ رہا ہے۔

ان اسباق پر تبصرہ کرتے ہوئے جو ہم تاریخ سے سیکھ سکتے ہیں، جو مرکز اور ریاستوں دونوں کے لیے مددگار ثابت ہوں گے، وزیر اعظم نے کہا کہ اگر ہم پچھلی صدی کی ابتدائی دہائیوں کو یاد کریں، تو ہمیں معلوم ہوتا ہے کہ دنیا کس طرح تباہی اور المیہ کے دور سے گزر رہی تھی۔ لیکن اس دور میں بھی خواہ مشرق ہو یا مغرب، ہر جگہ سائنسدان اپنی عظیم دریافتوں میں مصروف تھے۔ مغرب میں آئن سٹائن، فرمی، میکس پلانک، نیلز بوہر اور ٹیسلا جیسے سائنسدان اپنے تجربات سے دنیا کو جگا رہے تھے۔ اسی دور میں سی وی رمن، جگدیش چندر بوس، ستیندر ناتھ بوس، میگھناد ساہا، اور ایس چندر شیکھر سمیت کئی سائنسدان اپنی نئی دریافتیں منظر عام پر لا رہے تھے۔ وزیر اعظم نے مشرق اور مغرب کے درمیان فرق کو واضح کیا کیونکہ ہم اپنے سائنس دانوں کے کام کو مناسب پہچان نہیں دے رہے ہیں۔ وزیراعظم نے نشاندہی کی کہ جب ہم اپنے سائنسدانوں کی کامیابیوں کا جشن مناتے ہیں تو سائنس ہمارے معاشرے کا حصہ بن جاتی ہے، ثقافت کا حصہ بن جاتی ہے۔ جناب مودی نے سب سے درخواست کی کہ وہ ہمارے ملک کے سائنسدانوں کی کامیابیوں کا جشن منائیں۔ "سائنسدان"، وزیر اعظم نے کہا، "ملک کو ان کے جشن کو منانے کے لیے کافی وجوہات دے رہے ہیں۔" انہوں نے کورونا ویکسین تیار کرنے اور دنیا کی سب سے بڑی ویکسین مہم میں تعاون کرنے میں ہندوستانی سائنسدانوں کے کردار کی تعریف کی۔

وزیراعظم نے اس بات کا اعادہ کیا کہ حکومت سائنس پر مبنی ترقی کی سوچ کے ساتھ کام کر رہی ہے۔ وزیر اعظم نے مزید کہا "2014 کے بعد سے، سائنس اور ٹیکنالوجی کے میدان میں سرمایہ کاری میں خاطر خواہ اضافہ ہوا ہے۔ حکومت کی کوششوں کی وجہ سے، آج ہندوستان عالمی اختراعی اشاریہ میں 46 ویں نمبر پر ہے، جب کہ 2015 میں ہندوستان 81 ویں نمبر پر تھا"۔ انہوں نے تسلیم کیا کہ ملک میں ریکارڈ تعداد میں پیٹنٹ رجسٹرڈ ہو رہے ہیں۔ انہوں نے جدت کےماحول اور ایک متحرک اسٹارٹ اپ ماحولیاتی نظام کو بھی واضح کیا۔

وزیر اعظم نے نشاندہی کی کہ "سائنس، ٹیکنالوجی اور اختراع کی طرف جھکاؤ ہماری نوجوان نسل کے ڈی این اے میں ہے۔ ہمیں اس نوجوان نسل کو پوری طاقت کے ساتھ عاونت فراہم کرنے کی ضرورت ہے۔ وزیر اعظم نے نوجوانوں کے اختراعی جذبے کی حمایت کے لیے تحقیق اور اختراع کے شعبے میں، نئے شعبوں اور مشنوں کی فہرست گنوائی۔ انہوں نے خلائی مشن، نیشنل سپر کمپیوٹنگ مشن، سیمی کنڈکٹر مشن، مشن ہائیڈروجن اور ڈرون ٹیکنالوجی کی مثالیں دیں۔ اسی طرح، قومی تعلیمی پالیسی، مادری زبان میں سائنس اور ٹیکنالوجی کی تعلیم دے کر اس کو فروغ دے رہی ہے۔

وزیر اعظم نے روشنی ڈالی کہ ہندوستان کو اس امرت کال میں تحقیق اور اختراع کا عالمی مرکز بنانے کے لیے، ہمیں بیک وقت کئی محاذوں پر کام کرنا ہوگا۔ انہوں نے سائنس اور ٹیکنالوجی سے متعلق تحقیق کو مقامی سطح تک لے جانے کی ضرورت پر زور دیا۔ انہوں نے ریاستوں سے کہا کہ وہ اپنی مقامی ضروریات کے مطابق تحقیق اور اختراع کو فروغ دیں۔ وزیر اعظم نے زور دیا کہ ریاستی حکومتوں کے ذریعہ زیادہ سے زیادہ سائنسی اداروں کی تشکیل اور عمل کو آسان بنانے پر زور دے کر اختراع کی حوصلہ افزائی کی جا سکتی ہے۔ انہوں نے مزید کہا کہ ریاستوں میں اعلیٰ تعلیم کے اداروں میں اختراعی لیبز کی تعداد میں بھی اضافہ کیا جانا چاہیے۔ انہوں نے ہر ریاست سے سائنس، اختراعات اور ٹکنالوجی کے حوالے سے جدید پالیسی وضع کرنے کو بھی کہا۔ "بطور حکومت، ہمیں اپنے سائنسدانوں کے ساتھ زیادہ سے زیادہ اشتراک اور تعاون کرنا ہوگا، اس سے سائنسی جدیدیت کا ماحول پیدا ہوگا۔"

وزیر اعظم نے اس بات پر زور دیا کہ ریاستوں کو بہت سے قومی سطح کے سائنسی اداروں اور قومی تجربہ گاہوں کی صلاحیت اور مہارت کا بھرپور فائدہ اٹھانا چاہیے۔ وزیر اعظم نے مزید کہا کہ "ہمیں سائنسی اداروں اور مہارت کے زیادہ سے زیادہ استعمال کے لیے اپنے سائنس سے متعلقہ اداروں کو سائلو کی حالت سے باہر نکالنا ہوگا۔" انہوں نے بنیادی سطح پر سائنس کے فروغ کے پروگراموں پر زور دیا۔ انہوں نے ریاستی سائنس کے وزراء کو بھی مشورہ دیا کہ وہ اپنے سائنس کے نصاب کے اچھے طریقوں اور پہلوؤں کو شیئر کریں۔

خطاب کے اختتام پر، وزیر اعظم نے اس یقین کا اظہار کیا کہ ’اسٹیٹ سینٹر سائنس کانکلیو‘ ملک میں سائنس کی ترقی کی جانب ایک نئی جہت اور عزم کا اضافہ کرے گا۔ وزیر اعظم نے سب سے زور دیکر کہا کہ وہ سائنس اور ٹیکنالوجی کے میدان میں کسی بھی موقع کو ہاتھ سے جانے نہ دیں۔ وزیر اعظم نے کہا کہ آنے والے 25 سال ہندوستان کے لیے سب سے اہم سال ہیں کیونکہ یہ آنے والے ہندوستان کی نئی شناخت اور طاقت کا تعین کریں گے۔ وزیر اعظم نے شرکا پر زور دیا کہ وہ اس کانکلیو سے حاصل ہونے والے سبق کو اپنی ریاستوں تک لے جائیں اور قوم کی تعمیر میں اپنی حصہ رسدی کریں۔
اس موقع پر گجرات کے وزیر اعلیٰ بھوپیندر پٹیل اور سائنس اور ٹیکنالوجی کے مرکزی وزیر مملکت ڈاکٹر جتیندر سنگھ بھی موجود تھے۔

پس منظر

ملک میں اختراعات اور کاروبار کو آسان بنانے کے لیے وزیر اعظم کی انتھک کوششوں کے مطابق، اپنی نوعیت کا پہلا کانکلیو، پورے ملک میں ایک مضبوط سائنس، ٹیکنالوجی اور انوویشن (ایس ٹی آئی) کی تعمیر کے لیے ماحولیاتی نظام کے لئے- تعاون پر مبنی وفاقیت کے جذبے میں - مرکز-ریاست تال میل اور تعاون کے طریقہ کار کو مضبوط کرے گا ۔

دو روزہ کنکلیو کا انعقاد سائنس سٹی، احمد آباد میں 10سے11 ستمبر 2022 کو کیا جا رہا ہے۔ اس میں ایس ٹی آئی ویژن 2047 سمیت مختلف موضوعات پر اجلاس شامل ہوں گے۔ جن میں ریاستوں میں ایس ٹی آئی کے لیے مستقبل کی ترقی کے راستے اور وژن؛ صحت - سب کے لیے ڈیجیٹل صحت دیکھ بھال ؛ 2030 تک تحقیق و ترقی میں نجی شعبے کی سرمایہ کاری کو دوگنا کرنا؛ زراعت - کسانوں کی آمدنی کو بہتر بنانے کے لیے تکنیکی مداخلت؛ پانی - پینے کے قابل پینے کے پانی کی پیداوار کے لیے اختراع؛ توانائی- ہائیڈروجن مشن میں ایس اور ٹی کے کردار سمیت سب کے لیے صاف توانائی؛ ڈیپ اوشین مشن اور ساحلی ریاستوں/مرکز کے زیر انتظام علاقوں کے ساتھ ساتھ ملک کی مستقبل کی معیشت کے لیے اس کی مطابقت شامل ہیں۔
کانکلیو میں گجرات کے وزیر اعلیٰ، سائنس و ٹیکنالوجی کےمرکزی وزیر (سائنس و ٹیکنالوجی)، ریاستوں کے سائنس و ٹیکنالوجی کے وزراء اور ریاستوں اور مرکز کے زیر انتظام علاقوں کے سکریٹریز، صنعت کے رہنماؤں، کاروباری افراد، غیر سرکاری تنظیموں، نوجوان سائنسدانوں اور طلباء نے شرکت کی۔

۔۔۔۔۔۔۔۔۔۔۔۔۔۔۔۔۔۔۔۔۔

 (ش ح ۔ اع  ۔ ر ا  (

10112