গুজরাতকী মীয়াম্না য়াবা মুখ্যমন্ত্রী শ্রী ভুপেন্দ্র পতেল জী, পার্লিয়ামেন্তকী ঐগী মরূপ অমসুং গুজরাত ভাজপাগী অধ্যক্স শ্রীমান সি.আর. পতিল জী, গুজরাত লৈঙাক্কী মন্ত্রীশিং, এম.পি.শিং অমসুং এম.এল.এ. পুম্নমক অমদি মফমসিদা মশিং য়াম্না তিনবিরিবা কচ্ছকী ঐগী নুংশিরবা ইচে ইচল অমসুং ইয়ামবা ইনাওশিং !

ঐগী নুংশিরবা ইচিন ইনাওশিং, কমদৌবিরি? নুংঙাইরিবা নৎত্রা? কচ্ছতা নোং নীংথিনা তারে, মদুগী নুংঙাইবা ময়ামগী মায়থোঙদা মমি তাবা উই‍।

মরূপশিং,

ঙসিদি য়াম্লবা ৱাখল কয়ানা পুক্নিং নুংশিহল্লে‍। ভুজিয়ো দুঙ্গরদা স্মৃতিবন মেমোরিএল অমসুং অঞ্জারদা বীর বাল স্মারক শঙ্গারিবসি কচ্ছকী, গুজরাতকী, লৈবাক পুম্বগী মীওইশিংনা থেংনখিবা অৱা অনাশিংগী খুদম্নি‍। মসি শেমগৎপদা হুমাংখক্তা নত্তনা ইমুং কয়াগী পিরাংনা মফমসিগী নুং অমসুং চেকশিংদা ঈশিং চাইখিবনি‍।

অঞ্জারদা অঙাঙশিংগী ইমুং মনুংশিংনা বাল স্মারক শাননবগী ৱাফম হৌদোরকখিবা ঐ নীংশিংলি‍। মদুগী মতুংদা ঐখোয়না মসিবু ঐখোয় মশেল হোৎনমিন্নদুনা শেমগৎনবা ৱারেপ্নখি‍। ঙসিদি মতমদুদা শকমিন্নখিবা ৱাশক্তু মঙফাওনরে‍। ঙসি নীংশিং খুভম অসিবু ঐনা পুক্নিং নুংশিনা ইমুং মনুং, অঙাঙ কায়নখ্রবা ময়ামগী মফমদা কত্থোকচরি‍।

ঙসি লুপা করোর ৪৪০রোমগী ওইগদবা প্রোজেক্ত কয়া কচ্ছতা উরেপ উয়ুং তম্লি অমদি শঙ্গাদুনা মীয়ামদা কত্থোক্লি‍। মসিদা ঈশিং, মৈ, লম্মী-থোং অমসুং দেরীগা মরী লৈনবা প্রোজেক্তশিং য়াওরি‍। মসি গুজরাতকী, কচ্ছকী চাওখৎনবগীদমক দবল ইঞ্জিন লৈঙাক্না হোৎনখিবদুগী মহৈনি‍। ইমা আশাপুরা খুরুমজবদা হেন্না নুংঙাইনবা ঙসি অনৌবা ফেসিলিতীশিংগী উরেপ উয়ুংসু তম্লি‍। হায়রিবা ফেসিলিতীশিং অসি শেমগৎপা লোইরক্লবা মতমদা লাই খুরুম্বা লাকপা মীওইশিংদা অনৌবা ৱাখল্লোন অমা পোক্লক্কনি‍। ঐখোয়গী মীয়াম্না য়াবা মুখ্যমন্ত্রী ভুপেন্দ্র ভাইগী মীৎয়েঙ মখাদা কমদৌনা কচ্ছনা মাঙদা চঙশিল্লি, গুজরাতনা মাঙদা চঙশিল্লি হায়বগী খুদমসু মসিনা ওইরিবনি‍।

ইচিন ইনওশিং,

ঙসি ভুজ লমদমদা লাক্তুনা স্মৃতিবনদা লাকপগী লম্বীদা কচ্ছগী মীয়াম্না উৎপিরকখিবা মীনুংসি, থৌজালশিংগীদমক ঐনা লমদম অসিবু ইকোক নোঞ্জরি অমদি মফমসিগী মীয়ামগী মফমদসু ইকোক নোঞ্জরি‍। মফমসিদা লাকপদা খরা থেঙখ্রে, ঐ ভুজদা মতম চানদি য়ৌরকপনি অদুবু অদুবু রোদ সো তৌদুনা তরাম্না ওকপিরম্বা অমদি স্মৃতিবন য়ৌরুরবা মতুংদা মফমদুদগী থোক্লনিংবগী ৱাখল পোকখিদে‍।

চহি কুনলোমগী মমাঙদা কচ্ছনা থেংনখিবা অৱাবা অমসুং মদুগী মতুংদা কচ্ছনা ইচঙ থৌবা উৎখিবা, মদুগী মমি স্মৃতিবন অসিদা তারি‍। বৱম অমৃতাস: কী মচানুপা হায়না ঐখোয়গী পুন্সিদা হায়নবনা ঐখোয়গী ৱাখলদা লৈবগুম, চরৈবতি-চরৈবতিগী লাইৱানা ঐখোয়বু পুক্নিং থৌগৎপগুম, নীংশিং খুভম অসিনা মাঙদা চঙশিন্নবগী ইথিল ফাওহল্লি‍।

মরূপশিং,

ঐনা স্মৃতিবনগী তোঙান তোঙানবা শরুকশিং ফাওরগা লাকপা মতমদা কুইরবা থৌদোক কয়া পুক্নিংদা ফাওরকখি‍। মরূপশিং, অমেরিকাদা ৯/১১গী চাউরবা তেরোরিস্তনা লান্দাখিবগী মতুংদা মফমদুদা নীংশিং খুভম অমা শেমগৎখি, “গ্রাউন্দ জিরো”, ঐ মফমদু উরুরে‍। ঐনা জাপানগী হিরোসিমাগী থৌদোক্কী মতুংদা মফমদুদা শেমগৎখিবা নীংশিং খুভম ওইনা লৈরিবা ম্যুজিয়মসু উরুরে‍। অদুগা ঙসি স্মৃতিবন উরুরবা মতুংদা ঐনা লৈবাক মীয়ামদা পুক্নিং নুংশিনা হায়জনিংবদি, লৈবাক পুম্বগী মীয়ামদা হায়জনিংবদি ঐখোয়গী স্মৃতিবন মালেমগী ফাওর-ফাওরবা নীংশিং খুভমশিংগা চাংদম্নবদা খোঙফম অমত্তসু মনিংদা হন্থদে হায়বসিনি‍।

মফমসিদা, মহৌশা, মালেম, পুন্সি, হায়রিবসিগী মরমদা তাক্নবা ফীভম লৈরি‍। ঐনা কচ্ছকী মীয়ামদা হায়জনিংবদি অদোমগী নাক্তা মীথুং লাক্লবদি স্মৃতিবন য়েংহন্দনা হলহনবিখিনু‍ হায়না হায়জরি‍। হৌজিক অদোমগী কচ্ছকী মহৈ মশিংগী লোয়শঙদসু অঙাঙশিংদা মালেম অমসুং মহৌশাগী মওং মতৌ খঙননবা মহৈশঙগী অঙাঙশিংনা তুর চৎপা মতমদা নুমিৎ অমা স্মৃতিবন চৎননবা কাইথোকপিয়ু হায়না হায়গনি‍।

মরূপশিং,

ঐ নীংশিংলি, য়ুহা হাখিবা জনুৱারী ২৬কী নুমিৎ অদু, ঐ দিল্লীদা লৈ‍। য়ুহা হাখিবা অদু দিল্লীদসু নীকখি‍। পুং খরগী মনুংদা দিল্লীদগী অহমদবাদতা য়ৌরকখি‍। অদুগা মথঙগী নুমিত্তা কচ্ছতা লাকখিবনি‍। মতমদুদা ঐ মুখ্যমন্ত্রী ওইদ্রি, ইচম চমবা রাজনিতীগী ভার্তিয়া জনতা পার্তীগী থৌমী মচা অমা ওইরম্মি‍। ঐনা কমদৌনা মীওই কয়াগী মতেঙ পাংবা ঙমগনি হায়বা খঙলমদে‍। অদুবু লাংফমগী মতমদুদা ঐনা ময়ামগী মরক্তা লৈদুনা ঐনা ঙমবা মওংদা ময়ামগী অৱাবদা শরুক য়াননবা হোৎনগনি হায়না লেপখি‍।

ইখঙ খঙহৌদনা ঐ মুখ্যমন্ত্রী ওইবা তাখি‍। অদুগা মুখ্যমন্ত্রী ওইরবা মতমদা ঐনা মীয়ামগী মতেং পাংনিংবগী ৱাখলদুনা য়াম্না মতেং ওইখি‍।  মতমদুগী ৱাফম অমসু ঐ নীংশিংলি‍। য়ুহা হাবনা শোকহল্লবা মীয়ামগী মতেং পাংনবগীদমক মপান লৈবাকশিংদগী মীওই কয়া লাকখি‍। মখোয়না ঙকখিবা ৱাফম অমদি কমদৌনা মফমদুদা কমদৌনা ভোলুন্তিয়র কয়ানা মশাগী ওইজবা থিদনআ, লাইনিং অমসুং খুন্নাইগী লূপশিনা মীয়ামগী মতেং পাংলমবদুনি‍। মালেমগী মফম কয়াদা মখোয়না চৎলুবদা মফমসিদা তৌরম্লিবা মতেং পাংবগী মওং মতৌ মফম অতৈদা থেংনরক্তে হায়না মখোয়না ঐঙোন্দা হায়খি‍। অপুনবগী পাঙ্গল অদুননি লাংফমগী মতমদুদা কচ্ছকী, গুজরাতকী চৈঙাক ওইখিবা‍।

ঙসি ঐনা কচ্ছ লমদমদা লাক্লিবসি, ঐগা অদোমগা য়াম্না কুইরবা, অচেৎপা মরী লৈ‍। মশিং থিঙমদ্রবা মমিংশিংগী নীংশিং খুভমশিং ঐগী মাঙদা চোংথোরকখি‍। মীওই কয়াগী মমিং নীংশিংলক্লি‍। ঐখোয়গী ধীরুভাই সাহ, তারাচন্দ শেরা, অনন্ত ভাই দাবে, প্রতাপ সিংহ জাদাজা, নরেন্দ্র ভাই জাদেজা, হীরা লাল পারিখ, ভাই ধনসুখ থক্কর, রসিক থক্কর, গোপাল ভাই, অঞ্জারগী চম্পক লাল সাহনচিংবা মশিং থীঙমদ্রবা মীওইশিংগা লোয়ননা থবক তৌমিন্নবগী তাঞ্জা ফংখিবা, মখোয় ঙসিদি মালেমসি থাদোক্তুনা চৎখ্রে‍। অদুবু মখোয়গী থৱায়না মফম অমা হেক্তদা লৈরবসু, কচ্ছনা চাওখৎলকপা উবদা মখোয়দা হরাওজবা ফাওরমগনি, মখোয়না ঐখোয়গী ইফমদা থৌজালবিরমগনি‍।

অদুগা ঙসি ঐগী মরূপশিংগা উনবদা, ঐখোয়গী পুস্পদান ভাই, মঙ্গলদাদা ধনজী ভাই, জীবা সেথনচিংবা মীওইশিংনা ঙসিসু কচ্ছ চাওখৎনবগী পুক্নিং থৌগত্তুনা লাক্লি‍। ঐনা মতম পুম্নমক্তা থাগত্তুনতা লৈবা কচ্ছকী অখন্নবা ৱাফম অমা লৈ‍। মফমসিগী লম্বীদা চত্তুনা মীওই অমনা মঙলান অমা শাগৎলবদি কচ্ছ পুম্বনা মদুবু মঙফাওনহন্নবা পুন্না হোৎনমিন্নৈ‍। হায়রিবা কচ্ছকী থৌওং অসিনা চিংনবা পুম্বা, পুথোক্নরকখিবা ৱাফম পুম্বা অরানবা তাহনখি‍। কচ্ছ অমুক হন্না হৌগৎপা ঙম্লরোই হায়না হায়নখিবা মীওই কয়া লৈখি‍। অদুবু কচ্ছকী মীয়াম্না মফমসিগী শক্তমবু মপুং ফানা হোংদোক্লে‍।

মরূপশিং,

মুখ্যমন্ত্রী ওইনা অহানবা দিৱালী অদু য়ুহা হাখিবা মতুংগী কচ্ছকী মীয়ামগীসু অহানবা দিৱালীনি, ঐ মদুগী দিৱালী অদু পাঙথোকখিদে‍। ঐগী লৈঙাক্কী মন্ত্রী অমত্তনা দিৱালী পাঙথোকখিদে‍। অদুগা ঐখোয় পুম্নমক্না য়ুহা হাখিবা মতুংগী অহানবা দিৱালী অদু, ইমুং মনুং কায়নখ্রবা ময়ামগী অৱাবা মরক্তুদা ঐ ময়ামগী মরক্তা লাক্তুনা শরুক য়ারখি‍। অদোমসু খঙবিরমগনি ঐনা চহি কয়াগী মমাঙদগী দিৱালী অসি ঙমখৈদ চত্তুনা লৈবাকসিগী লান্মীশিংগা লোয়ননা পাঙথোক্তুনা লাক্লি‍। অদুবু চহি অদুদা মদুগী থৌওং অদু থাদোক্তুনা য়ুহা হাবনা অৱাবা তাহল্লবা মীওইশিংগী মরক্তা লাক্তুনা দিৱালী য়াওখি‍। ঐ নুমিৎ চুপ্পা চৌবারিদা লৈখি‍। অদুগা নুমিদাংৱাইরমদা ত্রম্বো খুলদা চৎখি‍। ঐগা লোয়ননা ঐগী মন্ত্রী মন্দলগী মীওই পুম্নমকসু গুজরাত্তা য়ুহা হাবনা অৱাবা তাখিবা মফমশিংদা চত্তুনা দিৱালীগী নুমিত্তা মখোয়গী অৱাবদা শরুক য়াখি‍।

অৱাবনা থল্লবা মতমদুদা ঐনা চেৎনা থাজবগা লোয়ননা লাংফম অসিবু ঐখোয়না খুদোংচাবদা ওন্থোক্কনি হায়না হায়খিবা ঐ নীংশিংলি‍। অদোম্না লান্ফম অমগুম্না উরিবা অদু ঐনা ভারতকী চাওখৎপগী য়ুম্বী অমা ওইনা উই হায়বা ৱাফমসু হায়খি‍। অদুগা ঙসি ঐনা লাল কিলাদগী ওগস্ত ১৫দা ২০৪৭ ফাওবদা ভারত চাওখৎলবা লৈবাক অমা ওইগনি হায়না লাথোকখি‍। ঐনা কচ্ছতা হায়খিবা ৱাফম তাহৌবশিংনা, ২০০১-০২গী য়ুহা হাবগী লাংফমগী চৈনা চৈথেং মরক্তুদা ঐনা হায়খিবশিং ঙসিদি অদোমগী মাঙদা তশেং তশেংনা থবক ওইনা উবা ফংলে‍। মরম অসিনা ঙসিগী হিন্দুস্তান অদোম্নদি অৱাৎপতনা থল্লবা ফীভম অমদা উবিরমগনি, অদুবু ঙসি ঐনা ২০৪৭গী মঙলান মঙলিবসি, ২০০১-০২দা মীশি মীনাগী অঙৌবা ফিজোলনা কুপখিবা কচ্ছকী মঙলান ঙসি মঙফাওনহন্বগুম, ২০৪৭দা হিন্দুস্তান্দসু থবক ওইনা উৎকনি‍।

অদুগা কচ্ছকী মীয়াম, ভুজগী মীয়ামগী হোৎনজমলনা মফম অসিদা অওনবা পুরক্তুনা উৎলি‍। কচ্ছতা অওনবা পুরক্লিবা অসি ভারতখক্তগী নত্তনা মালেম পুম্বগী অচৌবা মহৈগী লূপশিংগীদমক, রিছর্চ ইন্সতিত্যুৎশিংগীদমক থিজিন হুমজিন্নবগী মচাক অমা ওইরি‍। ২০০১দা মপুং ফানা মাঙ তাকখ্রবা মতুংদা কচ্ছতা পায়খৎলক্লিবা থবকশিং অসি মঙদা ফাওবা মঙলুদ্রবা ঙাক্তনি‍।

কচ্ছতা ২০০৩দা ক্রান্তিগুরু স্যামজি কৃষ্ণবর্মা য়ুনিভর্সিতী লিংখৎপগা লোয়ননা মফমসিদা কলেজ ৩৫ হেন্না লিংখৎখি‍। মসিদসু নত্তনা তেনখ্রবা মতমসিদা অফবা মহৈশঙ ১০০০ হেন্না লিংখৎখ্রে‍।

য়ুহা হাবা অদুদা কচ্ছকী দিস্ত্রিক্ত হোস্পিতাল মপুং ফানা মাঙ তাকখি‍। ঙসিদি কচ্ছতা য়ুহা হাবনা শোকহনবা ঙম্লরোইদবা মতমগা চুনবা লায়েংশঙ লৈরে, হেল্থ সেন্তর ২০০ হেন্না মথৌ তৌরি‍। মতম পুম্বদা কঙদুনা লৈরমবা, ঈশিংনা পুন্সিগী খ্বাইদগী অচৌবা শিংনবা ওইরমবা কচ্ছ, ঙসিদি হায়রিবা কচ্ছ দিস্ত্রিক্ত অদুগী য়ুমথোঙ খুদিংদা নর্মদাগী ঈশিং য়ৌরে‍।

ঐখোয়না থাজবা অমদি নীংজবগী মতুং ইন্না গঙ্গাজীদা ইরুজৈ, য়মুনাজী, সরয়ু অমসুং নর্মদা জীদসু ইরুজৈ, অদুগা নর্মদাগী মরমদদি কয়ামুক য়াম্না শেংবগে হায়ববু মমীংখক পনবদা মহৈ য়াল্লি হায়নরিবনি‍। অদুগুম্বা নর্মদাগী মফমদা চৎচনবগীদমক মীয়াম্না খোঙচৎ কয়া চৎনরম্মি, ঙসিদি হায়রিবা ইমা নর্মদা অদু কচ্ছ লমদমদা লেঙলক্লে‍।

তপ্পর, ফতেহগর অমসুং সুবাই বান্ধদা নর্মদাগী ঈশিং য়্রৌরক্কনি হায়বসি মঙদা ফাওবা মঙনরুবা ৱাফম নত্তে‍। অদুবু হায়রিবা মঙলান অদুসু কচ্ছকী মীয়াম্না মঙফাওনহল্লে‍। ঈথৈ লৌখোংগী মরমদা শুকখন খল্লুদ্রবা কচ্ছতা চেক দেম লিশিং কয়া শাদুনা সুজলাম-সফলাম জল অভীয়ান পায়খত্তুনা লৌফম হেক্তর লিশিং কয়াদা ঈথৈ লৌখোংগী কান্নবা ফংহল্লে‍।

ইচিন ইনাওশিং,

মমাঙ থাদা রায়ন খুঙ্গঙদা ইমা নর্মদাগী ঈশিং য়ৌরকপা মতমদা মীয়াম্না কুম্হৈগুম হরাওবা ফোঙদোকখিবা উরগা মালেমদা মীওই কয়া ঙক্নখি‍। মখোয়না ঙক্নরিবদু ঈশিং হায়বসি কচ্ছকী মীওইশিংগীদমক্তা করি ওইবগে হায়বদু মখোয়না খঙদবননি‍। পোক্লবা মতুংদা চহি মরি ফাওবা নোং চুবা উদবা অঙাঙ কয়া লৈরম্বা মতম অমা লৈরম্মি‍। অদুগুম্বা ফীভম অমা কচ্ছকী মীয়াম্না থেংনদুনা, পুন্সিগী অৱাবা কয়া থেংনদুনা লাকখ্রবনি‍। কচ্ছতা কেনেল লৈরক্কনি, দ্রিপ ইরিগেসনগী খুদোংচাবা লৈরক্কনি হায়বসি চহি ২০লোমগী মমাঙদা হায়রুরবদি মদুদা থাজবা মী য়াম্না তাঙলমগনি‍।

২০০২দা গুজরাত গৌরব য়াত্রা পাঙথোকপদা মান্দবীদা লাকপা মতমদা ঐনা কচ্ছকী মীয়ামগী থৌজাল নিখিবা ঐ নীংশিংলি‍। ঐনা নিখিবা থৌজাল অদুদি কচ্ছকী শরুক অয়ামবা মফমদা ইমা নর্মদাগী ঈশিং য়ৌহল্লকপা ঙম্নবনি‍। অদোমগী থৌজালনা পীখিবা পাঙ্গল থৌনাগী মহৈনা ঙসি ঐখোয় পুম্নমক য়াইরবা পুংফম অসিদা পুনমিন্নবা ফংলিবনি‍। ঙসি কচ্ছ-ভুজ কেনেল শঙ্গাদুনা মীয়ামগী মফমদা কত্থোকখ্রে‍। মসিনা খুঙ্গঙ চা কয়াগী লৌমী ইমুং লিশিং কয়াদা কান্নবা পীরগনি‍।

ইচিন ইনাওশিং,

কচ্ছ মীয়ামগী ৱাহৈ ৱাতা কয়া য়াম্না খোঙথুম্নবগে হায়ববু মফমসিদা অমুক লাখ্রবা মীওই অদু কচ্ছপু কাউথোকপা ঙম্লোই‍। ঐদি কচ্ছতা চাম্মরক হন্না লাকপগী তাঞ্জা ফংল‍ি‍। মফমসিগী দাবেলি, ভেলপুরি, কচ্ছকী পতলী সাস, কচ্ছগী খারে, কচ্ছগী মহাও কয়া লৈ‍। হোৎনবগী মহৈ লেম্না মাঙদে হায়নবা পাউরৌ অমা লৈ‍। কচ্ছনা পাউরৌ অসিবু থবক ওইনা পাঙথোক্তুনা উৎলে‍। 

উহৈ পুথোকপগী লমদা কচ্ছ দিস্ত্রিক্তনা ঙসিদি গুজরাত পুম্বগী মকোক ওইরি তাবদা ঐ নুংঙাই‍। মফমসিগী গ্রীন দেত্স, কেসর হৈনৌ, কফোই অমসুং কমলম্নচিংবা উহৈ কয়া লৈবাকসিদতা নত্তনা অতৈ লৈবাকশিংদসু অথুমবা মহাও য়েল্লি‍।

মরূপশিং,

কচ্ছতা লৈবা মীওইশিংনা মশানা পামদ্রবসু শা-শন পুদুনা নৎত্রগা শা-শন হুন্দোক্লম্লগা লাঞ্জেন্নবা মতমদু ঐ কাউবা ঙমদে‍। খুজিল থৌরাং ৱাৎপনা, চৎন-পথাপ লৈতবনা শা-শন হুন্দোক্লমবা মফমসিগী মীওইশিংনা থেংনদুনা লাকখি‍। শা-শন লোইবনা চহি চা কয়া হিংনবগী পাম্বৈ ওইদুনা লাকখিবা মফমসিগী ফীভম য়াম্না পুক্নিং নুংশিনিংঙাই ওইরম্মি‍। অদুবু ঙসিদি অদুগুম্বা কচ্ছ অদুদা লৌমীশিংনা শা-শন লোইদুনা লনথুম লেপশিনবা হৌরে‍। চহি কুনসিদা কচ্ছতা শঙ্গোম পুথোকপগী চাং শরুক অহুম হেনগৎলে‍।

ঐনা মফমসিদা মুখ্যমন্ত্রী ওইনা থবক পায়খৎপা মতমদা, ২০০৯দা মফমসিদা সর্হদ দেরী হৌদোকখি‍। মতম অদুদা মফমসিদা নোংমদা শঙ্গোম লিতর ১৪০০ ফাওবা য়ৌদনা খোমজিনবা ঙম্লম্মি‍। মদু হৌদোকখিবদু শঙ্গোম লিতর ১৪০০ ফাওবা য়ৌদনা হৌদোকখিবনি‍। অদুবু ঙসিদি হায়রিবা সরহদ দেরী অসিনা নোংমদা শঙ্গোম লিতর ৫ য়ৌনা লৌমীশিংদগী খোমগৎলে‍। ঙসিদী দেরী অসিনা মরম ওইরগা চহি খুদিংগী লৌমীশিংগী ফুরিৎখাউদা, কচ্ছকী লৌমীশিংগী ফুরিৎখাউদা চাউরাক্না লুপা করোর ৮০০লোম য়ৌহনবা ঙম্লে‍। ঙসি অঞ্জান তালুকাগী চন্দ্রানী খুঙ্গঙদা সরহদ দেরীগী মতমগা চুনবা অনৌবা প্লান্ত অমা শঙ্গারিবসিনসু লৌমী, শা-শন য়োক্লিবা মীওইশিংদা চাউনা কান্নবা পীরগনি‍। মফমসিদা মতমগা চুনবা তেক্নোলোজী শীজিন্নদুনা শঙ্গোমগী পোত্থোকশিং পুথোক্কদৌরিবা অসিনা লৌমীশিংগী শেন্থোক হেনগৎহনবদা মতেং ওইরগনি‍।

ইচিন ইনাওশিং,

কচ্ছনা মশাবু মাঙদা চঙশিনবতা নত্তনা গুজরাত পুম্বগী চাওখৎপগী অনৌবা খোঙজেল অমা হাপ্লি‍। গুজরাত্তা লাংফম অমগী মথঙদা অমা তাবা মতম অমা লৈরম্মি‍। মহৌশাগী লাংফমশিং গুজরাতনা মায়োক্নরিঙৈদা শরৌগী থৌওংশিংসু হৌরকখি‍। লৈবাকসিদা অমদি মালেমসিদা গুজরাৎপু মিংচৎ থিহন্নবগীদমক, মফমসিদা শেল থাদবা থৎংনবগীদমক শরৌ অমগী মথঙদা অমা শিল্লকখি‍। অদুগুম্বা ফীভমদু লৈনা লৈনা গুজরাতনা দিজাস্তর মেনেজমেন্ত এক্ত চৎনবা অহানবা স্তেত ওইখি‍। হায়রিবা এক্ত অসিনা পুক্নিং থৌগত্তুনা লৈবাক পুম্বগী ওইনা অদুগুম্বা এক্ত অমা শেমখি‍। কোরোনাগী লাংফম মতমদা হায়রিবা এক্ত অসিনা লৈঙাক খুদিংদা এদমিনিস্ত্রেসন খুদিংদা চাউনা মতেং পাংখি‍।

মরূপশিং,

শরৌ কয়াবু তুংদা নাথৈরম্লগা গুজরাতনা অনৌবা ইন্দস্ত্রিএল পোলিসী পুরক্তুনা ইন্দস্ত্রী চাওখৎহন্নবগী অনৌবা লম্বী অমা খনখি‍। মসিগী কান্নবা কয়া কচ্ছনা ফংখি, কচ্ছতা শেল থাদরকখি‍। কচ্ছতা ইন্দস্ত্রী চাওখৎহন্নবগীদমক লুপা করোর লাখ কয়া থাদরকখ্রে‍। ঙসি কচ্ছতা মালেমগী খ্বাইদগী চাউবা সিমেন্ত প্লান্ত লৈরে‍। ৱেল্দিং পাইপ পুথোকপগী লমদা কচ্ছ মালেম পুম্বগী ওইনা অনিসুবদা লৈরে‍। মালেমগী অনিসুবা খ্বাইদগী চাউবা তেক্সতাইল্স প্লান্ত কচ্ছতা লৈরে‍। কচ্ছতা এসিয়াগী অহানবা স্পিসিএল ইকনমিক জোন লিংখৎখি‍। কন্দলা অমসুং মুন্দ্রা হিথাংফমদা লৈবাকসিগী অপুনবা কার্গোগী চাদা ৩০ হেন্দল তৌরি‍। কচ্ছ ভারত্তা শীজিন্নরিবা থুমগী চাদা ৩০ পুথোক্লিবা মফম্নি, কচ্ছকী থুম চাদবা হিন্দুস্তান মচা অমত্তা লৈরম্লোই‍। মফমসিদা থুমগী রিফাইনরী ৩০ হেন্না লৈ‍।

ইচিন ইনাওশিং,

কচ্ছতা নুংশা মঙাল, নুংশিত্তগী মৈ পুথোকপগী মরমদা খন্নরুদবা মতম অমা লৈরম্মি‍। ঙসিদি কচ্ছতা চাউরাক্না মৈ মেগাৱাৎ লিশিং অমা মখায়দি সোলার অমসুং ৱিন্দ ইনর্জীদগী পুথোক্লি‍। ঙসি কচ্ছকী খাবরাদা খ্বাইদগী চাউবা সোলার-ৱিন্দ হায়ব্রিদ পার্ক শেমগৎলি‍। লৈবাকসিদা ঙসি গ্রীন হায়দ্রোজেনগী থৌরাং পায়খৎলিবসিদা গুজরাতকী চাউরবা থৌদাং লৈ‍। মতৌ অসুম্না গুজরাত মালেম পুম্বদা গ্রীন হায়দ্রোজেনগী কোনুং ওইনা মশক তাকপদা কচ্ছকী অচৌবা থৌদাং লৈগনি‍।

মরূপশিং,

কচ্ছকী মফম অসি ভারত খক্তগী নত্তনা মালেম পুম্বগী খুদম অমনি‍। লৌউ-শিংউ অমসুং শা-শন য়োকপদা মাঙজিন থাবা, ইন্দস্ত্রী চাওখৎপগী লমদা মাঙজিন থাবা, তুরিজমদসু মাঙজিন থাবা, আর্ত অমসুং কলচরদসু মাঙজিন থাবা মফম মালেমদা অতাঙবনি‍। কচ্ছতা লৈতবা করিবু লৈরিবগে‍। কচ্ছনা, গুজরাতনা নাৎকী লনবু চাউথোকচবগা লোয়ননা থাগোন্নবগী খুদম লৈবাক পুম্বদা উৎলি‍।

হন্দক ওগস্ত ১৫দা লাল কিলাদগী ঐনা লৈবাক মীয়ামগী মফমদা মখোয় মখোয়গী নাৎকী লনবু হেন্না য়োকখৎনবা ৱাফম থমখি‍। হৌখিবা চহি ৭-৮সিদা ঐখোয়গী নাৎকী লন য়োকখৎনবগী ৱাখল থৌনা লাক্লিবা অসি ঙসিদি ভারতকী পাঙ্গল ওইরে‍। মশাগী নাৎকী লনগী মরমদা ৱারী ৱাতায় শাবদা হৈনরমদবা ফীভমদুদগী ঙসিদি ভারত ৱাংমা লান্থোরক্লে‍।

হৌজিক য়েংবিয়ু, ঐখোয়গী কচ্ছতা লৈতবা করিবু লৈবগে? ময়োল্লম শেমগৎপগী মতাঙদা ঐখোয়গী হৈশিংবা ধোলাবীরাদা উবা ফংলি‍। মমাঙ চহিদা ধোলাবীরাবু ৱর্ল্দ হেরিতেজ সাইত ওইনা লাউথোকখ্রে‍। ধোলাবীরাগী চেক খুদিংদা ঐখোয়গী ইপা ইপুগী হৈশিংবা, মখোয়গী ৱাখল লৌশিংগী মমি তারি‍। মালেমগী লুপ কয়া হৌগৎনরকপা মতমদা ঐখোয়গী ইপা ইপুশিংনা ধোলাবীরাগুম্বা ময়োল্লম লিংখৎলমখি‍।

মতৌ অসুম্না মান্দবী জহাজ শাবদা মাঙজিল থারম্মি‍। ঐখোয়গী পুৱারী, ঐখোয়গী নাৎকী লন অমসুং ঐখোয়গী নীংতম লান্মীশিংবু কয়া য়াম্না নাথৈদুনা থম্বিরম্বগে হায়বগী খুদম অমা হায়রগদি, ঐখোয়গী স্যামগী কৃষ্ণ বর্মা লৈরে‍। নীংতম্লবা মতুংদা চহি কয়া মহাক্কী অস্থি মীরৈবাক্তা লৈখি‍। মুখ্যমন্ত্রী ওইনা ঐনা মহাক্কী অস্থিবু ইমা লৈবাক্তা পুরক্তুনা শিন্নখি‍। ঙসি লৈবাকসিনা অজাদী কা অমৃৎ মহোৎসব পাঙথোক্লিবসিদা, গুজরাতকী, লৈবাকসিগী মীয়াম্না মান্দবীদা লৈরিবা ক্রন্তিতীর্থদা শ্রদ্ধাঞ্জলি কৎপা ফংলে‍।

ভারত অমা, অপুনবা ভারতকীদমক লৌমী, শা-শন লোইবা লৌমীশিংগী পুন্সিদা অহোংবা পুরক্নবগীদমক মপুন্সি কত্থোকখিবা সরদার সাহবকী স্তেচু ওফ লিবর্তী ঙসি লৈবাকসিগী মিংচৎ পুরক্লি‍। নুমিৎ খুদিং লম কোয়বা লিশিং কয়ানা মফমদুদগী পুক্নিং থৌগত্তুনা, অমত্তা ওইবগী ইথিল পুদুনা হন্নরি‍।

মরূপশিং,

হৌখিবা চহি ২০লোমসিদা কচ্ছকী, গুজরাতকী নাৎকী লনশিংবু য়োকখত্তুনা মালেমগী মাঙদা পুথোক্নবা লেপ্পা লৈতনা হোৎনরি‍। কচ্ছকী রন, ধোর্দো তেন্ত সিতী, মান্দবী সমুদ্র খোঙবাল, ঙসি লৈবাকসিগী অচৌবা লমকোয় লমথুংফম ওইরে‍। মফমসিগী খুৎশা-হৈবগী পোত্থোকশিং মালেম পুম্বদা য়ৌরি‍। নিরোনা, ভুজৌরী অমসুং অজরখপুরনচিংবা খুঙ্গঙশিংগী হেন্দিক্রাফ্ত ঙসি লৈবাকসিগী, মালেমগী মফম পুম্বদা ইথক হৌহল্লি‍। কচ্ছকী রোগন আর্ত, মুদ আর্ত, বান্ধনী, অজরখ প্রিন্তিংগী মরমদা মায়কৈ খুদিংদা শিংথানরি‍। জি.আই. তেগ ফংলবা মতুংদা কচ্ছকী সোল অমসুং ফি লোনবগী পোত্থোক্কী দিমান্দ হেনগৎলক্লি‍।

মরম অসিনা ঙসি গুজরাত্তখক নত্তনা লৈবাকসিদা, মালেমসিদা কচ্ছ য়েংলুদ্রিবা মীদুদি করিসু উদ্রিবনি হায়নবা হেনগৎলক্লি‍। মসিগী অচৌবা কান্নবা কচ্ছকী, গুজরাতকী তুরিজমদা ফংলি, ঐগী নহা মীরোলনা ফংলি‍। ঙসি নেস্নেল হায়ৱে নম্বর ৪১ পাকথোকহনবগী থবক হৌদোক্লিবা অসিনা লম কোয়বশিংদা চাউনা কান্নগনি, ঙমখৈগী মফমশিংগীদমক্তসু য়াম্না মরু ওইবা অমা ওইরি‍।

মরূপশিং,

ভারত পাকিস্তান লানগী মতমদা মফমসিগী ইমাশিং-ইচে-ইচলশিং-ইচানুপীশিংগী থৌনা ঙসিসু অথৌবশিংগী ৱারী মরক্তা ইনরি‍। কচ্ছ চাওখৎপা, পুম্নমক্না হোৎনমিন্নদুনা অওনবা পুরকপগী অথোইবা খুদম অমনি‍। কচ্ছ লম অমখক নত্তে, মসি মালেমগী মফম অমখক্তা নত্তে, কচ্ছতি থৱায়নি, অহিংবা ৱাখল্লোন অমনি, থৱায় পানবা ইহুল অমনি‍। মসি ঐখোয়বু নীংতম্বগী অমৃৎকালগী পান্দমশিংবু ফংনবা লম্বী তাক্কদৌরিবা ইহুল অদুনি‍।

কচ্ছকী ইচিন ইনাওশিংগী মফমদা অমুক্কা হন্না হায়জরি, অদোমগী মীনুংসি, অদোমগী থৌজালনা কচ্ছকী য়াইফবা পুরকপদা নত্তনা মসিনা পুক্নিং থৌগত্তুনা হিন্দুস্তানগী কাচিন কোয়া শিনবা থুংনা করিগুম্বা খরা তৌরম্নবগী ইথিল পীরি‍। মসি অদোমগী পাঙ্গলনি, মরম অসিনা কচ্ছকী ক খমীরগী খ মখোয়গী মমিংনা কচ্ছী থা তরানিথোইনি হায়না ঐনা হেক হেক হায়‍।

অদোম্না তরাম্না ওকপিবা, ইকায়খুম্নবা উৎপিবগীদমক, অদোমগী মীংনুংসিগীদমক ঐগী পুক্নিংদা অদোমগী লমন তোন্দুনা লৈরগনি‍। অদুম ওইনমক স্মৃতিবন অসি মালেম অসিগী মরুওইবা পুক্নিং চিংশিন্নিংঙাই ওইরবা মফম অমনি‍। মসিবু শেন্নবগী থৌদাং ঐগী কচ্ছকীনি, ঐগী ইচিন ইনাওশিংগীনি‍। মফমসি অশোঙবা উমঙ ওইদবা মফম অমত্তা লৈহনবিগনু‍। ঐখোয়না ভুজিয়া দুঙ্গর অসিবু অশঙ অমান্না থলহন্নবা হোৎনগদবনি‍।

মরূপশিং, কচ্ছকী রনোৎসব্তা লৈরিবা থৌনা অসিগা মান্ননবা স্মৃতিবন অসিদসু লৈ হায়বসি অদোম খল্লম্লোই‍। তাঞ্জা অসি মাঙহনবিগনু ইচিন ইনাওশিং, মঙলান কয়াগা লোয়ননা ঐনা থবক অসি পায়খৎপনি‍। অচৌবা ফিরেপ অমগা লোয়ননা থবক অসি পায়খৎখিবনি অমদি মসিদা অদোম্না মপুং ফানা শরুক য়াশিল্লকপা পাম্মি‍। মালেমসিদা ঐখোয়গী ভুজিয়া দুঙ্গরগী ইৱায় ইনিলনা নিলহন্নবগীদমক অদোমগী মতেং পাম্মি‍।

ময়াম পুম্নমকপু চাওখৎ থৌরাংগী প্রোজেক্তশিং অসিগীদমক অমুক্কা হন্না নুংঙাইবা ফোঙদোকচরি অমদি য়াইফ-পাউজেল পীজরি‍। ঙসি নুমিৎ কয়ানিগী মতুংদা ঐগা লোয়ননা লাউবিয়ু –

ঐ নর্মদে হায়না লাউরক্কে – অদোম্না সর্বদে হায়না খুমবিরকউ‍।

নর্মদে – সর্বদে !

নর্মদে – সর্বদে !

নর্মদে – সর্বদে !

হন্না হন্না থাগৎচরি !

দিস্ক্লেমর: প্রধানমন্ত্রীগী ৱারোলগী শরুক খরা গুজরাতী লোলদা পীখি, মদুগী চাউরাকপা ৱাহন্থোক পীবনি‍।

***