ময়াম পুম্নমক্কী মফমদা নীংখা তম্বগী অমৃত মহোৎসব অসিদা য়াইফ পাউজেল পীজরি।

ঙসিদগী নুমিৎ খরনিগী মনুংদা লৈবাক অসিনা নীংখা তম্লকখিবা চহি ৭৫ মপুং ফারগনি, অমসুং ঐখোয় পুম্নমক্না পুৱারী ওইহৌরগদবা নীংতম্বগী নুমিৎ অসিগীদমক শেম শারি। ভারতকী কাচিন কোয়া শীনবা থুংনা মচু অহুমগী ফিরালনা পাইরি। হরাও তয়াম্বা পোক্তবা মফম অমত্তা গুজরাত্তা লৈত্রে। অমসুং সুরতনা মসিগী মগুন অমুক্কা হেন্না হাপ্লি। ঙসিদি লৈবাক পুম্বনা সুরত্তা পুক্নিং চিংশিল্লক্লি। নাকল অমরোমদা, অপীকপা ভারত অসি সুরতকী তিরঙ্গা য়াত্রাদগী উবা ফংলি, অমরোমদা ভারতকী মফম অমহেক্তদগী মীওই খরতা ওইরবসু সুরত্তা লৈতবা য়াওরম্লোই অমসুং ঙসিদি সুরতকী লৈহাওদা পাঙথোক্লিবা তিরঙ্গা য়াত্রা অসিদা ভারত পুম্বনা শরুক য়ারি। অমসুং খুন্নাই অসিগী কাংলুপ খুদিংমক্না শরুক য়ারিবসি উবদা হরাওনিংঙাইগী মশক অমনি। মচু অহুমগী ফিরালদা শক্তি কয়া য়াম্না হাপ্পা য়াগদগে হায়বদু সুরত্তগী ঐখোয়না উবা ফংলে। সুরতনা ঙসিদি মালেম পুম্বদা মাগী লল্লোন ইতীক, মাগী ইন্দস্ত্রীশিংগী মরম্না মশাগী তোপ-তোপ্পা মশক অমা তাকচবা ঙম্লে। ঙসি সুরত্তা মচু অহুমগী য়াত্রা পাঙথোক্লিবা অসিনা মরম ওইদুনা মালেম পুম্বগী পুক্নিং চিংশিনফম ওইরগনি।

মরুপশিং,

ময়াম্না তিরঙ্গা য়াত্রাদা ভারত ইমাগী তেব্লোগা লোইননা লৈবাক অসিগী নাৎ অমসুং শক্তম তাকপা য়াবা তেব্লো কয়া অমা উৎপীরি। মরুওইনা, ইচানুপীশিংনা উৎপা থৌনা ফবগী পার্ফোরমেন্স অমসুং নহাশিংনা শরুক য়াবা উবদা অদুক্কী মতীক নুংঙাই। মচু অহুমগী য়াত্রা অসিদা সুরৎকী মীয়াম্না নীংতম ঈহৌগী ইথিল অদু অমুক নৌহৌননা হিংগৎহনবীরে। কনাগুম্বা অমনা পোৎ য়োল্লি, দুকান্দার ওই, কনাগুম্বা অমনা লুমগী আর্তিসান ওই, কনাগুম্বা অমনা ফি তুবা নৎত্রগা লোনবগী থবক তৌই, কনাগুম্বা অমনা পোৎ চৈ পুথোক পুশিনগী থবক তৌই, কনাগুম্বা খরনা হিরা মনি-মুক্তাগী থবক তৌই। সুরতকী মীয়াম অমসুং সুরতকী অপুনবা তেক্সতাইল ইন্দস্ত্রীনা থৌরম অসিবু অমুক্কা হেন্না মশক থোকহল্লে। হর ঘর তিরঙ্গা কেম্পেন অসিদা মীয়মা পুম্নমক্না শরুক য়াবীবগীদমক অমসুং অখন্নবা মচু অহুমগী খোঙচৎ অমা ওইহনবীবগীদমক ময়াম পুম্নমকপু থাগৎপা ফোংদোকচরি। ঐহাক্না অখন্ননা সনৱার প্রসাদ বুধিয়াজি অমসুং 'সাকেৎ-সেবা হি লক্সিয়া'বু হৌদোকপীরিবা ভোলুন্তিয়র পুম্নমকপু থাগৎপা ফোংদোকচরি। পার্লিয়ামেন্ততা ঐহাক্কী মরুপ ওইরিবা সি.আর. পতিলজিনা থৌরাং অসিবু হেন্না মপাঙ্গল কলহনবীরি।

মরুপশিং,

ঐখোয়গী জাতিগী ফিরাল অসিনা লৈবাক অসিগী তেক্সতাইল ইন্দস্ত্রী, লৈবাক অইসগী খাদি অমসুং ঐখোয়গী ইরোমদোম লেপচবগী খুদম অমা ওইরি। হীরম অসিদা, সুরতনা মতম চুপ্পদা ইরোমদোম লেপচবা ভারত অমগী য়ুম্ফম থোন্নবা শেম শাদুনা লাক্লি। সুরতকী তেক্সতাইল ইন্দস্ত্রীনা ভারতকী ইন্দস্ত্রীগী ইনোৎ, ভারতকী হৈশিংবা অমসুং ভারতকী য়াইফ-থৌরাংগী খুদম ওইদুনা লাক্লি। মরম অসিনা, মচু অহুমগী ফিরালগী য়াত্রা অসিনসু মশা মথন্তা অদুমক চাউথোকচবা অমসুং ইনোৎ অদু পুদুনা চৎলি।

মরুপশিং,

গুজরাতনা ভারতকী নীংতম লালগী পুৱারীদা মশক থোক্না শরুক য়াখিবগী ৱারী ইখ্রে। গুজরাতনা বাপুগী শক্তম লৌদুনা নীংতম্বগী ঈহৌ লুচিংখি। নীংতম্লবা মতুংদা এক ভারত শ্রেস্থা ভারতকী য়ুম্বী লিংখৎপীরম্বা আইরন মেন সর্দার পতেলগুম্বা অথৌবশিং গুজরাতনা খুদোল তম্বীখি। বর্দোলি ঈহৌ অমসুং দন্দি য়াত্রানা পীখিবা পাউজেলনা লৈবাক শীনবা থুংববু অমত্তা ওইনা পুনশিলহনবীখি। অসিগুম্বা মঙাল চাউরবা গুজরাতকী হৌখ্রবা ৱারীশিং অসিগী মরুওইবা শরুক অমদি ঐখোয়গী সুরত অমসুং মসিগী হেরিতেজনা ওইরি।

মরুপশিং,

ভারতকী মচু অহুমগী ফিরাল অসিদা মচু অহুম খক্তমক নত্তে য়াওরিবা। ঐখোয়গী মচু অহুম অসি ঐখোয়গী হৌখ্রবশিং, হৌজিক ওইরিবা ৱারেপ অমসুং তুংগী মঙলানশিংগী ঐখোয়না চাওথোকচরিবা অসিগী মমি অমনি। ঐখোয়গী মচু অহুম অসি ভারতকী লিংজেল মান্নবা, ভারতকী অপুনবা অমসুং ভারতকী মখল মথেল শুনা লৈরিবা অসিগী খুদম অমনি। ঐখোয়গী লান্মীশিংনা মচু অহুম অসিদা লৈবাক অসিগী তুংলমচৎ, লৈবাক অসিগী মঙলান উরি অমসুং মসিবু কৈদৌনুংদা লৈখা তাহন্দ্রি। ঙসিদি নীংতম্লকপগী চহি ৭৫ মতুংদা, ঐখোয়না অনৌবা ভারত অমগী খোঙচৎ অমা হৌরকপা মতমদা, মচু অহুম অসিনা অমুক্কা হন্না ভারতকী লিংজেল মান্নবা অমসুং ময়েক শেংবা লিক্লম তাক্লি। তিরঙ্গা য়াত্রা অসিবু লৈবাক শীনবা থুংনা পাঙথোক্তুনা লৈবাক অসিগী শক্তি অমসুং কত্থোকপবু হর ঘর তিরঙ্গা অভিয়ান্দা উৎলিবা অসি উবদা ঐহাক অদুক্কী মতীক হরাওবা পোকচৈ। ওগস্ত ১৩দগী ১৫ ফাওবদা ভারতকী য়ুম্থোং খুদিংদা মচু অহমগী ফিরাল অসি পাইহল্লগনি। খুন্নাই অসিগী কাংলুপ খুদিংমক, কাংলুপ খুদিংগী মীয়াম্না লিংজেল মান্নবগী ইনোৎ, অপুনবগী শক্তমগা লোইননা লৈবাক অসিনা অনৌবা মঙলান অমসুং ৱারেপকা পুন্দুনা চৎলি। মসিনি ভারতপু নুংশিজবা মীয়ামগী মশক হায়বদু। মসিনি ইমা ভারতকী মচা হায়বদু। নুপা নুপী, অঙাং অহল খাক্তনা কেম্পেন অসিদা শরুক য়াই অমসুং মখোয়গী থৌদাংশিং লৌনরি। লাইরবা মীয়াম, ফি লোনবা অমসুং হেন্দলুম ৱার্করশিংনসু হর ঘর তিরঙ্গা কেম্পেন্না মরম ওইদুনা অহেনবা চাগা তানবা ঙমজবা উবদা অপেনবা পোকচৈ। অসিগুম্বা থৌরম অসিনা নীংতম্বগী অমৃত মহোৎসবতা অনৌবা পাঙ্গল অমা পীরগনি। মীয়াম শরুক য়াবা কেম্পেনশিং অসিনা অনৌবা ভারতকী য়ুম্ফম চেৎহনগনি। থাজবা অসিগা লোইননা, ঐহাক্না গুজরাত, সুরতকী প্রজা মীয়ামদা অমসুং ময়াম পুম্নবমক্তা য়াইফ-পাউজেল পীজরি। করিগুম্বা সুরতনা অমুক্তং লেপখ্রবদি কৈদৌনুংদা মনীং হন্দুনা চেন্দে। মসিনি সুরতকী অখন্নবা মশক অমসুং সুরতনা খুমাং চাউশিনবগী মওং, সুরতনা চাউখৎপগী অনৌবা পনখৈ লানবা। পুম্নমকসিগী মনীংদা ঐগী সুরতকী মীয়াম্না লেপ্লি, মখোয়নি ঐহাক্কী ইচিল ইনাও অমসুং ইচে ইচলশিং, ঙসিদি অসিগুম্বা তিরঙ্গা য়াত্রা অসিনা লৈবাক পুম্ববু ইনোৎ হাপ্লগনি।

পুম্নমক্কী মফমদা য়াইফ-পাউজেল পীজরি।

পুম্নমকপু থাগৎচরি!

খঙহঞ্জবাঃ প্রধান মন্ত্রীগী পাউজেলগী শরুক খরদি গুজরাতি লোলদসু পীখি, মদুসু হন্দোকচরে।

***************