প্রধানমন্ত্রীগী লোইশঙ
প্রধান মন্ত্রীনা গান্ধীনগরগী গিফ সিতীদা আই.এফ.এস.সি.এ.গী ময়াই লোইশঙগী উরেপ উয়ুং তমখ্রে
প্রধান মন্ত্রীনা গিফ সিতীদা ভারতকী খ্বাইদগী অহানবা ইন্তর্নেস্নেল বুলিয়ন এক্সচেঞ্জ – আই.আই.বি.এক্স. হাংদোকখ্রে
“ভারতনা গ্লোবেল ফাইনান্সকী মাইকৈ তাক্লিবা য়ু.এস.এ., য়ু.কে. অমসুং সিঙ্গাপোরগুম্বা লৈবাক কাঙলুপকী মনুং চল্লক্লি”
“লৈবাক্কী মীচম মীয়ামগী অনিংবা অপাম্বশিং অসি গিফ সিতীগী মিৎয়েংগী শরুক অমনি”
“গিফ সিতীনা লন অমসুং লৌশিং অনিমক শিংথানৈ”
“মালেমগী শেন্মিৎলোন্দা লৈরিবা ঐখোয়গী ঙসি অমসুং হেন্না ফগৎলবা হয়েংগী থৌদাংদা তেংবাংবা ঙম্বা ইন্সতিত্যুসনগী ঐখোয়না মথৌ তারে”
“ঙসিদি, ইন্তিগ্রেসন হায়বসিনা ঐখোয়না খন্ন-নৈনগদবা খ্বাইদগী মরু ওইবা ৱাফম্নি। ঐখোয়না গ্লোবেল মার্কেত অমসুং গ্লোবেল সপ্লাই চেনগা খোঙজেল য়াঙনা পুন্সিনহল্লি”
“নাকল অমদা, ঐখোয়না লোকেল ৱেলফিয়রগীদমক্তা গ্লোবেল কেপিতেল পুশিল্লক্লি। অতোপ্পা নাকল অমদনা, ঐখোয়না গ্লোবেল ৱেলফিয়রগীদমক্তা লোকেলগী প্রদক্তিবিতীগী কান্নবা লৌরি”
“তেক্নোলোজী, সাইন্স অমসুং সোফৱেয়রগী মতাং খুদিংদা, ভারতকী নাক্তা অতৈদগী হেনবা খুদোংচাবা অমসুং এক্সপেরিএন্স অনিমক লৈ”
“কাঙলোন শেম্বগী হীরমদা মালেমগী লুচিংবা ওইবনা অদোমগী পান্দম ওইগদবনি, আইনগী কাঙলোনগী অৱ
Posted On:
29 JUL 2022 6:19PM by PIB Imphal
প্রধান মন্ত্রীনা গান্ধীনগরগী গিফ সিতীদা লৈবা ইন্তর্নেস্নেল ফাইনেন্সিএল সর্ভিস সেন্তর ওথোরিতী (আই.এফ.এস.সি.এ.)গী ময়াই লোইশঙ বিলদিংগী উরেপ উয়ুং তমখ্রে। মহাক্না ভারতকী খ্বাইদগী অহানবা ইন্তর্নেস্নেল বুলিয়ন এক্সচেঞ্জ ওইরিবা ইন্দিয়া ইন্তর্নেস্নেল বুলিয়ন এক্সচেঞ্জ (আই.আই.বি.এক্স.) গিফ-আই.এফ.এস.সি.দা হাংদোকখ্রে। মহাক্না এন.এস.ই. আই.এফ.এস.সি.-এস.জি.এক্স. কন্নেক্তসু হৌদোকখি। গুজরাতকী মুখ্য মন্ত্রী, শ্রী ভুপেন্দ্র ভাই পতেল, কেন্দ্র মন্ত্রী, শ্রীমতি নির্মলা সিতারামন, কেন্দ্র অমসুং রাজ্য মন্ত্রী, দিপ্লোমেত, কারবার মালেমগী লুচিংবশিংসু ঙসিগী থৌরমদা শরুক য়াখি।
প্রধান মন্ত্রীনা তিল্লিবা মীয়ামদা ৱা ঙাঙবদা, ঙসিগী নুমিৎ অসিদি মপাঙ্গল হেনগৎলক্লিবা ভারতকী শেন্মিৎলোন অমসুং তেক্নোলোজীগী শক্তি অমসুং ভারতকী তৌবা ঙম্বগী মতিক্তা মালেম্না থাজবা হেনগৎলক্লিবা অসিগী য়াম্না মশক থোকপা নুমিৎনি হায়খ্রে। “ঙসি, গিফ সিতীদা লৈবা ইন্তর্নেস্নেল ফাইনেন্সিএল সর্ভিস সেন্তর ওথোরিতী (আই.এফ.এস.সি.এ.)গী ময়াই লোইশঙ বিলদিংগী উরেপ উয়ুং তমখ্রে। বিলদিং অসিগী আর্কিতেকচরনা পুক্নিং হুনা নীংথিরিবসিগা মান্ননা বিলদিং অসিনা ভারতপু শেন্মিৎলোনগী সুপরপাৱর ওইহন্নবা লোইনাইদ্রবা খুদোংচাবা কয়াসু শেমগনি হায়বগী ঐহাক্না থাজবা থম্মি”, মহাক্না হায়খি। আই.এফ.এস.সি.না ইন্নোভেসন খুমাং চাউশিলহনগনি অমসুং চাউখৎ-থৌরাংদা শাহৌ লৌনবা অকোয়বগী ফিভম শীন-লাঙবগা লোয়ননা থৌওং অসিগী খোঙজেলসু হেন্না য়াঙখৎহনগনি হায়না প্রধান মন্ত্রীনা ফোংদোকখি। ঙসি হৌদোক্লিবা ইন্সতিত্যুসন অমসুং প্লেতফোর্মশিংনা ভারত মচা করোর ১৩০বু হৌজিক্কী মতমগী মালেমগী শেন্মিৎলোনগা শম্নহনবদা তেংবাংগনি। “ভারতনা গ্লোবেল ফাইনান্সকী মাইকৈ তাক্লিবা য়ু.এস.এ., য়ু.কে. অমসুং সিঙ্গাপোরগুম্বা লৈবাক কাঙলুপ মনুং চল্লক্লি”, হায়না মহাক্না মখা তাখি।
প্রধান মন্ত্রীনা গিফ-সিতীগী ওইবা মহাক্কী অহানবা ৱাখল্লোন নীংশিংলদুনা গিফ সিতী অসি কারবারখক্কী নত্তনা লৈবাক্কী মীচম মীয়ামগী অনিংবা অপাম্বশিংসু গিফ সিতীগী মিৎয়েংগী শরুক অমনি হায়খি। ভারতকী হয়েংগী মতমগী পান্দমশিং অসি গিফ সিতীদা শম্নরি অমসুং সনাগী মতমগুম্লবা ভারতকী মমাংগী মতমগী মিৎয়েংগসু মসিগা মরীসু লৈনরি।
ইং ২০০৮না মালেমগী শেন্মিৎলোনগী ইরাং অমসুং রিসেসনগী শিংনবা কয়া থেংনখিবা মতমদা, ভারত্তনা পোলিসী মথৌ তৌদবগী অকোয়বগী ফিভম লৈখি হায়না প্রধান মন্ত্রীনা পাউদমখি। “অদুবু, গুজরাতনা মতমদুদা ফিন্তেক সেক্তরদা অনৌবা অমসুং অচৌবা খোঙথাং থাংজিনখি। ঙসিদি, মদুগী ৱাখল্লোনশিং অদুনা খুমাং য়াম্না চাউশিনবদা ঐহাক্না নুংঙাইজৈ”, হায়না মহাক্না হায়খি।
প্রধান মন্ত্রীনা গিফ সিতীনা কম্মর্স অমসুং তেক্নোলোজীগী হব অমা ওইনা মশাগী মপাঙ্গল লৈবা শক্তাক অমা শেম্লি হায়না ফোংদোকখি। গিফ সিতীনা লন অমসুং লৌশিং অনিমক শিংথানৈ। ভারতনা গিফ সিতীগী খুত্থাংদা মালেমগী সর্ভিস সেক্তরদা অচৌবা মফম কন্দুনা তুংলমচৎকীদমক্তা চঙশিনবা উবদা মহাক্না নুংঙাইবা ফাওখি। গিফ সিতী অসিদি লন-থুম তাশিনবগী থোউওং পাংথোক্লিবা অমসুং মালেমগী খ্বাইদগী ফরবা ৱাখল্লোন কয়ানা পুন্সিন্নদুনা মখোয় মশেলদগী তম্নরিবা মফম্নি হায়না মহাক্না হায়খি। “মসিদি, ভারতকী ফাইনান্স অমসুং কারবারগী লমদা মমাংদা চাউখৎলম্বশিংবু নৌহৌননা অমুক পুরকপগী পাম্বৈ অমসু ওইরি”, হায়না প্রধান মন্ত্রীনা মখা তাখি।
মতিক লৈবা ফিন্তেক সেক্তর অমা হায়রগা কারবার তৌবদা লাইহনবা অকোয়বগী ফিভম, রিফোর্ম পাংথোকপা অমসুং কাঙলোন নাইবা খক্তদা অকক্নবা লৈতে হায়বসি ঐখোয়না নীংশিংগদবনি হায়না প্রধান মন্ত্রীনা ফোংদোকখি। মসিদি, তোঙান-তোঙানবা সেক্তরশিংদা থবক তৌরিবা প্রোফেস্নেলশিংদা হেন্না নুংঙাইবা পুন্সি মহিং অমসুং অনৌবা খুদোংচাবা পীবগী পাম্বৈ অমসু ওইরিবনি।
নীংতম্বা ফংলবা তুংদা ফাওবদা লৈবাক অসিনা কারবার অমসুং ফাইনান্সকী চাউখৎলবা চৎনবীশিংদগী লাপ্তুনা লৈরক্লিবা অমসুং মালেমগা লৈনবা নাৎ, শেন্মিৎলোন অমসুং অতোপ্পা মরীশিংদা অকক্নবা লৈহন্দুনা লাক্লিবসি মীখা পোল্লগা লৈরকপগী চৈথেং অমসুং মশাদা থাজবগী চাং নেম্বনা ওইরম্বা য়াই। “অদুবু, ‘অনৌবা ভারত’না হৌজিক্তি মসিগী অরিবা ৱাখল্লোন হোংদোক্লে অমসুং ঙসিদি, ইন্তিগ্রেসন হায়বসিনা খন্ন-নৈনগদবা খ্বাইদগী মরু ওইবা ঐখোয়গী ৱাফম ওইরে। ঐখোয়না গ্লোবেল মার্কেত অমসুং গ্লোবেল সপ্লাই চেনগা খোঙজেল য়াঙনা পুন্সিনহল্লি”, হায়না মহাক্না ফোংদোকখি। “গিফ সিতী অসিদি ভারত অমসুং মালেমগী খুদোংচাবশিংগা শম্নবগী য়াম্না মরু ওইবা লম্বী অমনি। অদোম্না গিফ সিতীগা মরী লৈনবা মতমদা, অদোম্না মালেম পুম্বগা মরী লৈনরিবনি”, হায়না মহাক্না মখা তাখি।
ঙসিদি, ভারতনা মালেমগী খ্বাইদগী চাউবা শেন্মিৎলোনশিংগী মনুংদা অমা ওইরে। মরম অদুনা, ঐখোয়গী শেন্মিৎলোননা তুংগী মতমদা ঙসিগী চাংদগী হেন্না চাউরকপা মতম অদুগীদমক্তা ঐখোয়না হৌজিক্তগী শেম শাদুনা লৈগদবনি। মরম অদুনা, মালেমগী শেন্মিৎলোন্দা লৈরিবা ঐখোয়গী ঙসি অমসুং হয়েংগী থৌদাংদা তেংবাংবা ঙম্বা ইন্সতিত্যুসনগী ঐখোয়না মথৌ তারে। ইন্দিয়া ইন্তর্নেস্নেল বুলিয়ন এক্সচেঞ্জ – আই.আই.বি.এক্স. অসিদি মাইকৈ অসিদা থাংজিনবা মরু ওইবা খোঙথাং অমা ওইরি। ভারতকী নুপীশিংদা শেন্মিৎলোনগী মপাঙ্গল হাপ্পদা সনানা লৌরিবা মরু ওইবা থৌদাংগী মতাংদা প্রধান মন্ত্রীনা পনখি। ভারতকী শক্তাক অসি অচৌবা কৈথেল অমা ওইরিবসিদা অকক্নদুনা লৈগদবা নত্তে, মার্কেত হিংহনবা হায়বসিনা ঐখোয়গী শক্তাক ওইহনগদবনি। “নাকল অমদা, ঐখোয়না লোকেল ৱেলফিয়রগীদমক্তা গ্লোবেল কেপিতেল লৌশিল্লি। অতোপ্পা নাকল অমদনা, ঐখোয়না গ্লোবেল ৱেলফিয়রগীদমক্তা লোকেলগী প্রদক্তিবিতীগী কান্নবা লৌরি”, হায়না মহাক্না মখা তাখি।
ভারতকী পাঙ্গলনা ইনভেস্তরশিংনা অফবা রিতর্ন পীবা ঙমবদগী হেল্লি হায়না প্রধান মন্ত্রীনা হায়খি। “তংদু লৈতাদবা কয়ানা মালেমগী সপ্লাই চেন্দা চৈথেং পীবা অমসুং মালেম্না মসিগুম্বা চৈথেং অসিনা হেন্না শোকচিনহল্লকদরা নুংনাংলিঙৈ মতমদা, ভারতনা মালেমদা মগুন লৈবা পোত্থোক অমসুং সেবা লেপ্তনা ফংহন্দুনা লাকখি”, হায়না মহাক্না শন্দোক্না তাকখি। “ঐহাক্না অনৌবা ভারতকী অনৌবা ইন্সতিত্যুসন, অনৌবা পথাপ অমসুং অদোমগী মফমদগী থাজবা য়াম্না লৈ। ঙসিগী ২১শুবা চহি-চা অসিদা ফাইনান্স অমসুং তেক্নোলোজীগী মরক্তা অচেৎপা মরী লৈনরি। তেক্নোলোজী, সাইন্স অমসুং সোফৱেয়রগী মতাং খুদিংদা, ভারতকী নাক্তা অতৈদগী হেনবা খুদোংচাবা অমসুং এক্সপেরিএন্স অনিমক লৈ”, হায়না প্রধান মন্ত্রীনা মখা তানা ফোংদোকখি। প্রধান মন্ত্রীনা ভারতনা ফিতেক্তা মকোক থোংনা লৈরিবা অসিবু পল্লদুনা, মহাক্না গিফ-সিতীগী স্তেকহোলদরশিংনা ফিন্তেক্তা অহেনবা মিৎয়েং চঙনবা হায়খি। “অদোম্না ফিতেক্তা অনৌবা ইন্নোভেসনশিংবু পান্দম ওইনা থমগনি অমসুং গিফ-আই.এফ.এস.সি.না ফিন্তেক্কী মালেমগী লেবোরেতরী ওইনা থোক্লক্কনি হায়বগী ঐহাক্না থাজবা থম্লি”, হায়না মহাক্না হায়খি।
তুং কোইনা চৎপা অমসুং অইং-অশাগী প্রোজেক্তশিংগী ওইনা গিফ-আই.এফ.এস.সি.না গ্লোবেল দেত অমসুং ইক্বিতী কেপিতেলগী লম্বী ওইরকপা হায়বসিনা প্রধান মন্ত্রীনা ফোংদোকখিবা মহাক্কী অতোপ্পা থাজবনি। এয়রক্রাফ লীজ তৌবা, শিপ ফাইনান্সিং, কার্বন ত্রেদিং, দিজিতেল করেন্সী, অমসুং আই.পি. রাইত অমসুং ইনভেস্তমেন্ত মেনেজমেন্ত ফাওবগী থৌওংশিংদা আই.এফ.এস.সি.এ.না ফাইনেন্সিএল ইন্নোভেসন লৈহন্নবা থবক পাংথোক্কদবনি হায়বনা মহাক্কী অহুমশুবা অপাম্বা অমসুং থাজবনি। প্রধান মন্ত্রীনা মসিমসু হায়খি, “আই.এফ.এস.সি.এ.না রেগ্যুলেসন অমসুং ওপরেসন কোস্তপু ভারত খক্তদা কম্পিতিতিব ওইহনবতা নত্তনা, দুবাই অমসুং সিঙ্গাপোরগা চাংদম্নবদসু হেন্না কম্পিতিতিব ওইহনগদবনি”। “অদোমগী পান্দমদি কাঙলোন শেম্বগী হীরমদা মালেমগী লুচিংবা ওইবনা ওইগদবনি, আইনগী রুলগী অৱাংবা স্তেন্দর্দ থগদবনি, অমসুং মালেম্না খ্বাইদগী পাম্নবা ৱাতাইশিনবগী ময়োল ওইনা চোংথোক্কদবনি”।
লৈবাক্না মমাংগী চহি ৮দা ফাইনেন্সিএল ইনক্লুজনগী অনৌবা ৱেব অমা উখি হায়না প্রধান মন্ত্রীনা হায়খি। লাইরবদগী লাইরবা ফাওবনা ঙসিদি ফোর্মেল ফাইনেন্সিএল ইনক্লুজনগী শরুক ওইরে। ঐখোয়গী চাউরবা মীশিং কাঙলুপ অমনা ঙসি ফাইনান্সকী শরুক ওইরকপসিদা, সরকারগী ইন্সতিত্যুসন অমসুং লন্নাইগী প্লেয়রশিংনা মাং থানা পুন্না থোকমিন্নরকপা হায়বসি হৌজিক মতমগী তঙাই ফদবনি হায়না মহাক্না হায়খি। মীয়াম খুদিংনা চাউখৎনীংবনা মরম ওইরগা ইনভেস্ত তৌবা পাম্বনিনা, ফাইনান্সকী মতাংদা নীংথিনা খঙবনা বেসিক বেঙ্কিংগী মথক্তা থমগদবনি হায়না প্রধান মন্ত্রীনা মীয়ামদা ফোংদোকখি।
গিফ সিতী, আই.এফ.এস.সি.এ., আই.আই.বি.এক্স. অমসুং এন.এস.ই. আই.এফ.এস.সি.-এস.জি.এক্স. কন্নেক্তকী মরমদা ৱাফম খরা
গিফ সিতী (গুজরাত ইন্তর্নেস্নেল ফাইনান্স তেক-সিতী) অসিবু ভারত খক্কী নত্তনা মালেমগী ফাইনেন্সিএল অমসুং তেক্নোলোজী সর্ভিসশিংগী অপুনবা হব অমা ওইহন্নবা শেমখিবনি। আই.এফ.এস.সি.এ. অসিদি ভারতকী ইন্তর্নেস্নেল ফাইনেন্সিএল সর্ভিস সেন্তর (আই.এফ.এস.সি.)শিংগী ফাইনেন্সিএল প্রদক্ত, ফাইনেন্সিএল সর্ভিস অমসুং ফাইনেন্সিএল ইন্সতিত্যুসনশিংগী কাঙলোন য়েংশিনবা অমসুং চাউখৎহনবগী অপুনবা রেগ্যুলেতর অমনি। বিলদিং অসি গিফ-আই.এফ.এস.সি.বু ইন্তর্নেস্নেল ফাইনেন্সিএল সেন্তরগী মকোক থোংবা ওইবগী থাক অমসুং শক্নাইবা হেনগৎলক্লিবা মতৌবু উৎপা ঙমগদবা আইকোনিক ওইবা স্ত্রকচর অমা ওইহনগনি হায়বগী পান্দম থম্নরি।
আই.আই.বি.এক্স.না মতিক চাবা মমল খঙদোকপা ঙমহনগনি অমসুং ভারত্তা সনাগী ফাইনেন্সিএলাইজেসন তৌবদা শাফু পীবতা নত্তনা মসিনা থাজনীংঙাই ওইবা সোর্সিং অমসুং ক্বালিতীগী থাজবসু পীগনি। মসিনা ভারতপু মালেমগী বুলিয়ন মার্কেত্তা মশাগী ফংফম থোকপা থাক্তা য়ৌহনবদা মপাঙ্গল হাপকনি অমসুং মালেমগী ভেল্যু চেন্দা ইন্তিগ্রেতী অমসুং ক্বালিতী পীদুনা তেংবাংগনি। আই.আই.বি.এক্স.না ভারতপু প্রন্সিপাল কঞ্জ্যুমর অমা ওইনা মালেমগী বুলিয়ন মমলদা ইথিল পীবা ঙমহন্নবা ভারত সরকারনা খোঙফম চেৎলিবা অসিদসু মশক থোক্না তেংবাংগনি।
এন.এস.ই. আই.এফ.এস.সি.-এস.জি.এক্স. কন্নেক্ত অসিদি গিফ ইন্তর্নেস্নেল ফাইনেন্সিএল সর্ভিস সেন্তর (আই.এফ.এস.সি.)দা লৈরিবা এন.এস.ই.গী সবসিদিএরী অমসুং সিঙ্গাপোর এক্সচেঞ্জ লিমিতেদ (এস.জি.এক্স.)কী ফ্রেমৱর্ক ওইগনি। কন্নেক্ত অসিগী মখাদা, সিঙ্গাপোর এক্সচেঞ্জকী মেম্বরশিংনা নিফতী দিরাইভেতিবতা পীরকপা ওর্দর খুদিংবু এন.এস.ই.-আই.এফ.এস.সি. ওর্দর মেৎচিং অমসুং ত্রেদিং প্লেতফোর্মদা থারক্তুনা মেৎচিংসু তৌগনি। ভারত অমসুং মালেমগী জুরিসদিক্সন শিনবা থুংবগী ব্রোকর-দীলর খুদিংনা কন্নেক্তকী খুত্থাংদা ত্রেদিং দিরাইভেতিবকীদমক্তা মশিং য়াম্না শরুক য়াগনি হায়বগী থাজবা থম্নরি। মসিনা গিফ-আই.এফ.এস.সি.গী দিরাইভেতিব মার্কেত্তা লিক্বিদিতীশিংবু য়াম্না হেন্না লুশিনহনগনি অমসুং মালেমগী পার্তিসপেন্ত মশিং য়াম্না পুশিল্লক্তুনা মফমসিগী ফাইনেন্সিএল ইকোসীস্তেমদা কান্নবা শাফু পীগনি।
***
(Release ID: 1846433)
Visitor Counter : 225
Read this release in:
English
,
Urdu
,
Marathi
,
Hindi
,
Bengali
,
Assamese
,
Punjabi
,
Gujarati
,
Odia
,
Tamil
,
Telugu
,
Malayalam