খুরুমজরি মরুপশিং,

মীফম অসি নোংজু-নুংশাগী ফীভমগা মরী লৈনরি। দিল্লীদসু হৌজিক নোংজু থা খোঙলৈ থুনা য়ৌরক্লি। অদুমওইনমক মপালদা তেম্পরেচরসু হন্থদে অমসুং হাউস মনুংগী অশাবা অসি হন্থবা ঙমগদ্রা নত্ত্রগা ঙমলোইদ্রা ঐহাক্না হায়বা ঙমদে। মসিগী মতম অসি য়াম্না মরু ওই মরমদি ঐখোয়না ‘আজাদী কা অমৃত মহোৎসব’ পাঙথোক্লি। ওগস্ত ১৫ অসি অখন্ননা মরু ওই; অমসুং চহি ২৫গী মতুংদা লৈবাক অসিনা ভারতকী নীংতম্বা ফংবগী চহি চামা শুবগী থৌরম পাঙথোকপা মতমদা, ঐখোয়গী চহি ২৫গী খোঙচৎ অদু করম তৌগনি; ঐখোয়না মাংদা কয়াম খোঙজেল য়াংনা চংশিনগনি অমসুং করম্না হেন্না নৌবা পনখৈশিং য়ৌনবা হোৎনগনি হায়বা অদু ঐখোয়না থৌরাং তৌবা তাই। মতম অসি অসিগুম্বা ফিরেপশিং লৌবগী অমসুং ফিরেপশিং অসিদা কত্থোক্তুনা লৈবাক অসি লমজিংবগী মতমনি। হাউস অসিনা লৈবাকপু লমজিংগদবনি। হাউস অসিগী ইকাই খুম্নরবা মেম্বর পুম্নমক্না লৈবাক অসিদা অনৌবা ইনোৎ হাপ্পদা থৌদাং লৌগদবনি। মরম অসিনা মীফম অসি ৱাখল্লোন অসিদগী য়েংলকপদা য়াম্নসু মরু ওই।

 
মীফম অসি মরু ওইরিবগী মরমদি রাস্ত্রপতিগী অমসুং উপ রাস্ত্রপতিগী ফমশিংগীদমক মীখলশিংসু পাঙথোক্লি। ঙসি ভোৎ থাদবগী থৌওংসু চত্থখি। অমসুং মতম অসিদা অনৌবা রাস্ত্রপতি অমসুং অনৌবা উপ রাস্ত্রপতিগী তেনরসু হৌরগনি।

ঐখোয়না হাউস অসি পাউ ফাওননবগী অফবা পাম্বৈ অমনি, ওপন মাইন্দগা লোয়না দাইলোগ অমসুং খন্ন-নৈনবগী শেংলবা মফম অমনি। পোলিসী অমসুং ৱারেপশিংগীদা য়াম্না অফবা মওংদা শরুক তম্নবা মফম অসিদা দিবেৎ, ক্রিতিসিজম অমসুং হিরমশিংগী য়াম্না কুপ্না এনালাইসিস তৌই। ঐহাক্না ইকাই খুম্নরবা এম.পি.শিংদা কুপ্না খন্থদুনা অমসুং কুপ্না খন্ন-নৈনবগা লোয়ননা য়ারিবা হাউস অসি মখৈ কান্নবা অমসুং মহৈ য়ানবা ওইহন্সি হায়না হায়জনীংই। মরম অসিনা মীপুম খুদিংমক্না কোওপরেসন পীবীয়ু অমসুং সবকা প্রয়াসকী খুত্থাংদা খক্তা দেমোক্রেসীনা মাইপাকই। হাউস অসি সবকা প্রয়াসনা মরম ওইদুনা লৈরিবনি। সবকা প্রয়াসকা লোয়ননা হাউসনা খ্বাইদগী অফবা ৱারেপ লৌবা ঙমহল্লি। অমসুং মসিনা মরম ওইদুনা হাউসকী ইকাই খুম্নবা হেনগৎহন্নবগী ঐখোয়গী থৌদাংশিং থুংহনবগা লোয়ননা ঐখোয়না মীফম অসি লৈবাক্কী য়াইফনবগীদমক কান্নবা লৌহৌসি। অমসুং ঐখোয়না মত চুপ্পদা নীংশিংগদবা অসি নীংতম্বা ফংনবা মখোয়গী নহা ওইরিঙৈগী মতম অমসুং মখোয়গী পুন্সি চুপ্পা কত্থোকখিবা অমসুং কৈশুমশঙদা মখোয়গী মপুন্সি লোমখিবা অমসুং মখোয়না কত্থোকখিবশিং অদুগী মঙলানশিং থুংহনবসু মথৌ তাই। ওগস্ত ১৫না লাকপদা ঐখোয়না মখোয়গী মঙলানশিং অদু খঙনা, ঐখোয়না হাউস অসি খ্বাইদগী অফবা মওংদা মসিগী অফবা কান্নবা অদু লৌহৌগনি হায়না ঐহাক্না থাজবা থম্মি।

পুম্নমকপু ঐহাক্না থাগৎচরি!

খঙহঞ্জবা: মসি পি.এম.গী ৱারোলগী চাউরাকপা ৱাহন্থোক্নি। অশেংবা ৱারোলদি হিন্দীদা পীখি।

***