প্রধানমন্ত্রীগী লোইশঙ
প্রধান মন্ত্রী বদোদারাদা গুজরাত গৌরব অভিয়ান শরুক য়াখ্রে
লুপা কোতি ২১,০০০গী চাউখৎ-থৌরাংগী প্রোজেকশিং শঙ্গাখি অমসুং উরেপ-উয়ুং তমখি
প্রধান মন্ত্রী অৱাস য়োজনাগী মখাদা য়ুম লাখ ১.৪ হেন্না শঙ্গাখি অমসুং উরেপ-উয়ুং তমখি
লুপা কোতি ১৬,০০০ হেনবগী প্রোজেকশিংগী খুৎথাংদা লমদম অসিদা রেলৱেগী খুদোংচাবা হেন্না ফংহল্লগনি
লুপা কোতি ৮০০ গী শেন্ফম অমা খাক্তুনা ‘মুখ্যামন্ত্রী মাত্রুশক্তি য়োজনা’ হৌদোকখ্রে
“২১শুবা চহিচাগী ভারত য়াংনা চাউখৎনবগীদমক নুপীশিং য়াংনা চাউখৎহনবা অমসুং মখোয়দা শক্তি পীবা অসি চপ মান্ননা দরকার ওই”
“নুপীশিং দরকার ওইবশিং অমসুং অনিংবশিং খঙজিন্দুনা ঙসিদি ভারতনা থৌরাংশিং শেম্লে অমসুং ৱারেপশিং লৌরে”
“বদোদারা অসি কলচরগী সহর অমনি। মাইকৈ খুদিংমক্তগী লাকপা মীওইশিং সহর অসিনা চেকশিন্না শেন্নরি”
“ৱারেপ লৌবদা অমসুং থাক খুদিংমক্তা গুজরাত্তা নুপীশিং চাউখৎনবা খুদোংচাবা হেন্না পীনবা ঐখোয়না হোৎনরি”
Posted On:
18 JUN 2022 3:25PM by PIB Imphal
ঙসি প্রধান মন্ত্রী শ্রী নরেন্দ্র মোদী বদোদারাদা গুজরাত গৌরব অভিয়ান শরুক য়াখ্রে। মহাক্না লুপা কোতি ২১,০০০গী চাউখৎ-থৌরাংগী প্রোজেকশিং শঙ্গাখি অমসুং উরেপ-উয়ুং তমখি। থৌরম অদুদা স্কিমশিংগী কান্নবা ফংলবা মীওইশিং, চীফ মিনিস্তর শ্রী ভুপেন্দ্রভাই পতেল, য়ুনিয়ন অমসুং স্তেৎ মিনিস্তরশিং, মীয়ামগী মীহুৎশিং অমসুং অতোপ্পা শক্নাইরবা মীওই কয়া শরুক য়াখি।
থৌরমগী অহৌবদা প্রধান মন্ত্রীনা হায়খি ঙসি অসি মহাক্কী মমা খুরুম্বা নুমিৎ অমনি। ঙসি মহাক্না মশাগী চহি ১০০শুরবা মহাক্কী মমা খুরুমখি। তুংদা মহাক্না পভাগাধ চিংদা নৌনা শেমজিনবা শ্রী কালিকা মাতা লাইশঙ শঙ্গাখি অমসুং মফম অদুদা মহাক্না লৈবাক্কীদমক থৌনিজখি অমসুং অমৃত কাল অসিদা লৈবাক্কী সেবা তৌনবা থৌনা পীনবা অমসুং লৈবাক্কীদমক ৱাশকখিবশিং থবক ওইনা পাংথোকপা ঙম্নবা নিজখি। তুংদা মহাক্না থৌরম অদুদা শরুক য়াখিবা মমিং য়াম্লবা ‘মাত্রু শক্তি’দা খুরুমখি।
প্রধান মন্ত্রীনা হায়খি ঙসি হৌদোক্লিবা প্রোজেকশিং অসিনা গুজরাতকী চাউখৎ-থৌরাংগী নমুনাদা য়ুমফ্ম ওইরগা ভারতকী চাউখৎ-থৌরাংগী থবকশিংদা থৌনা পীরগনি। মমাশিংগী হকচাং ফনবা, লায়রবশিংগী য়ুম শানবা, লম্বী-থোঙ অমসুং অৱাংবা থাক্কী লাইরিক তম্বীবগী মতাংদা য়াম্লবা শেনফম থাদরিবা অসিনা গুজরাতগী উদোগ চাউখৎহনবদা অচৌবা মতেং অমা ওইরগনি। হায়রিবা প্রোজেকশিং অসি হকশেল, মচি ওইবা চীঞ্জাক অমসুং নুপীশিংদা শক্তি পীবগা মরি লৈনৈ।
মহাক্না হায়খি চাউখৎ-থৌরাংগী থবকশিংদা নুপীশিংনা মরুওইবা থৌদাং লৌনবা দবল ইঞ্জিনগী সরকারনা হোৎনরিবশিং অসি ইমা কালিকাগী থৌজালদগী অনৌবা ইনোৎ অমা ফংলে। ২১শুবা চহিচাগী ভারত য়াংনা চাউখৎনবগীদমক নুপীশিং য়াংনা চাউখৎহনবা অমসুং মখোয়দা শক্তি পীবা অসি চপ মান্ননা দরকার ওই। নুপীশিংগী দরকার ওইবশিং অমসুং অনিংবশিং খঙজিন্দুনা ঙসিদি ভারতনা থৌরাংশিং শেম্লে অমসুং ৱারেপশিং লৌরে।
প্রধান মন্ত্রীনা হায়খি হিরম খুদিংমক্তা নুপীশিংগী খুদোংচাবা কয়া পীরে অমসুং মখোয়গী পুন্সিগী তাঙ্কক খুদিংমক য়েংলগা নুপীশিংদা শক্তি পীনবা সরকারনা স্কিম কয়া শেম্লে। সহর অসি মমা অমগুম সন্সকার কয়া পুথোক্লিবা সহর অমা ওইনা বদোদারা অসি মত্রু শক্তি হরাও-তয়াম্বা ফোঙদোকপা চুনবা সহর অমনি। মাইকৈ কয়াদগী লাকপা মীওইশিং সহর অসিনা চেকশিন্না শেন্নরি অমসুং হরাওবা অমসুং অৱাবা মতমদা মখোয় শৌগৎলি অমসুং মাঙলোমদা চঙশিন্নবা খুদোংচাবা কয়া পীরি।
প্রধান মন্ত্রীনা হায়খি সহর অসিনা শক্নাইরবা মীওই কয়া হায়বদি শ্বামি বিবেকানন্দা, মহারিসি অর্বিন্দ, বিনোবা ভাবে অমসুং ববাসাহেব অম্বেকারদা ইথিল পীখি। মহাক্কী পুন্সি খোঙচৎতা সহর অসিনা অচৌবা থৌদাং লৌখি। ২০১৪দা মহা বদোদারা অমসুং কাসি বিশ্বনাথ অনিমক্না থৌজালখি। মমা অমগী হকচাং অসি মহাক খক্তগী নত্তনা ইমুং-মনুং পুম্নমক অমসুং মরুওইনা অঙাংগীদমক য়াম্না মরুওই। চহি ২০গী মমাংদা গুজরাগী সেবা তৌনবা ঐঙোন্দা খুদোংচাবা ফংবা মতম অদুদা মচি ওইবা চীঞ্জাক চাবা ৱাৎপা অসি অচৌবা শিংনবা অমা ওইখি। মতম অদুদগী ঐখোয়না হিরম অসিদা থবক তৌরকপদগী ঙসি মদুগী অফবা ফলশিং উবা ফংলে।
ত্রাইবেলশিংগী খুঙ্গংশিংদা সিকল-সেলগী খুদোংচাদবা থেংনরিবা অসিগী মতাংদা প্রধান মন্ত্রীনা হায়খি সেপ্তেম্বর থা অসি ‘পোসান মাহ’-মচি ওইবা চীঞ্জাক্কী থা হায়না পাংথোক্নবা লৌখিবা ৱারেপ অদুনা গুজরাতকী নুপীশিংদা মতেং পাংলগনি। মচি ওইবা চীঞ্জাক্কী মথক্তা, শ্বাছ ভারত অমসুং উজ্জৱালা স্কিমশিংগী খুৎথাংদা নুপীশিংদা খুদোংচাবা কয়া পীনবা সরকারনা থবক পায়খৎলে।
মহাক্না হায়খি ৱারেপ লৌবদা অমসুং থাক খুদিংমক্তা গুজরাত্তা নুপীশিং চাউখৎনবা খুদোংচাবা হেন্না পীনবা ঐখোয়না হোৎনরি। নুপীশিংগী অশিন-অরাং তৌবগী থৌনা অসি খঙবদগী খুঙ্গংদা প্রোজেক কয়াদা লুচিংবগী থৌদাং শীন্নরে। ইমুং-মনুংগী শেন-থুমগী ৱারেপ লৌবদা নুপীশিংনা মরুওইবা থৌদাং অমা লৌনবা থবক পায়খৎলে। হিরম অসিদা জন ধন একাউন্তশিং, মুদ্রা য়োজনা অমসুং শ্বারোজগর য়োজননা মতেং পাংলি। সহরগী লায়রবা ইমুংশিংগী য়ুম লাখ ৭.৫ শাখ্রে। মিদল ক্লাস ফেমিলি লাখ ৪.৫ য়ুম শানবা মতেং পাংখ্রে। ফিয়ার রেন্ত অমসুং শ্বানিধি য়োজনা অসিনা খুঙ্গংগী লায়রবশিং অমসুং মিদল ক্লাস কাংবুশু মতেং পাংলে। য়াইফ-থৌরাংশিং অসিগা লোয়ন্না রাজ্য অসিগী উদোগ অমসুং ইনফ্রাস্ত্রকচর চাউখৎনবা থবক পায়খৎলি।
প্রধান মন্ত্রীনা হায়খি গুজরাত্তা তুরিজম চাউখৎনবা পায়খৎলিবা থবকশিং অসিনা বদোদারাদা য়াম্না কান্নগনি। পাভাগাধ, কেবরিয়া তুরিজমগী মফমশিং ওইনা শেমগৎলে। বদোদারা রেলৱেজ অমসুং এভিএসনগী মচাক-মথুম কয়া শেমগৎলে। লাইরিক-লাইশুগী লমদা সেন্ত্রেল য়ুনিভর্সিতি, রেল য়ুনিভর্সিতি, বির্সা মুন্দা ত্রাইবেল য়ুনিভর্সিতিনা অনৌবা থৌনা পীরগনি।
থৌরমশিংগী অকুপ্পা মরোলশিং:
প্রধান মন্ত্রীনা লুপা কোতি ১৬,০০০ হেনবগী প্রোজেকশিং শঙ্গাখি অমসুং উরেপ-উয়ুং তমখি। শঙ্গাখিবা প্রোজেকশিং অদুগী মনুংদা দেদিকেদেত ফ্রেদ কোরিদোরগী কিলোমিতর ৩৫৭ শাংবা নিউ পালানপুর-মাদার সেক্সন; অহমেদবাদ-বোতাদ সেক্সনদা কিলোমিতর ১৬৬ গেজ ওনখৎপা; পালানপুর-মিথা সেক্সনদা কিলোমিতর ৮১ ইলেকত্রিক ফংহনবা য়াওরি। প্রধান মন্ত্রীনা সুরত, উধনা, সোমনাথ অমসুং সবারমতি স্তেসনশিং নৌনা শেমগৎনবা উরেপ-উয়ুং তমখি অমসুং রেলৱেজগী অতোপ্পা প্রোজেকশিংগী উরেপ-উয়ুং তমখি। হায়রিবা প্রোজেকশিং অসিনা লমদম অসিদা উদোগ অমসুং লৌউ-শিংউ চাউখৎহনবদা মতেং পাংগনি। প্রোজেকশিং অসিনা লমদম অসিদা চৎথোক-চৎশিন নুংঙাইবা হেনগৎহনগনি অমসুং পেসেঞ্জরশিংদা খুদোংচাবা কয়া ফংবা হেনগৎহনগনি।
সহরগী মফমশিংগী লুপা কোতি ১,৮০০ অমসুং খুঙ্গংশিংগী মফমশিংগী লুপা কোতি ১,৫৩০গী য়ুমশিং য়াওনা পুন্না য়ুম লাখ ১.৩৮ প্রধান মন্ত্রী অৱাস য়োজনাগী মখাদা প্রধান মন্ত্রীনা মীয়ামদা কৎথোকখি। মসিগী মথক্তা লুপা কোতি ৩১০ হেনবগী য়ুম ৩০০০ হেনবগী খাত মহুরতশু পাংথোকখি।
থৌরম অদুদা প্রধান মন্ত্রীনা খেরা, অনন্দ, বদোদারা, ছোতা, উদেপুর অমসুং পঞ্জমহলদা লুপা কোতি ৬৮০ হেনবগী তোঙান-তোঙানবা চাউখৎ-থৌরাংগী প্রোজেকশিং পায়খৎনবা উরেপ-উয়ুং তমখি।
গুজরাতগী দাবোই তালুকাদা লৈবা কুনধেলা খুঙ্গংদা গুজরাত সেন্ত্রেল য়ুনিভর্সিতি শানবা প্রধান মন্ত্রীনা উরেপ-উয়ুং তমখি। বদোদারা সহরদগী কিলোমিতর ২০রোম লাপ্পা মফম অসিদা লুপা কোতি ৪২৫ রোম চংনা য়ুনিভর্সিতি অসি শাগনি অমসুং মসিনা মহৈরোয় ২৫০০ হেন্না অৱাংবা থাক্কী মহৈ তম্বগী খুদোংচাবা পীগনি।
লুপা কোতি ৮০০ গী শেন্ফম অমা খাক্তুনা ‘মুখ্যামন্ত্রী মাত্রুশক্তি য়োজনা’ প্রধান মন্ত্রীনা হৌদোকখ্রে। য়োজনা অসিগী মখাদা অঙ্গনৱাদি সেন্তরশিংদগী থা খুদিংগী মীরোনবীশিং অমসুং খোমজিংবীশিংদা চানা কেজি ২, তুর দাল কেজি ১ অমসুং অচাথাউ কেজি ১ লেম্না পীগনি। প্রধান মন্ত্রীনা ‘পোসান সুধা য়োজনা’গী মখাদা রাজ্য অদুগী ত্রাইবেলশিংগীদমক লুপা কোতি ১২০ রোম য়েন্থোকখি। ত্রাইবেলশিংগী খুন্দাবা জিলাশিংদা লৈরিবা মীরোনবীশিং অমসুং খোমজিংবীশিংদা আইরন, কেলসিয়ম তেব্লেদশিং ফংহন্নবা অমসুং মচি ওইবা চীঞ্জাক্কী মতাংদা ৱাখল তাহনবগী থবক চাংয়েং ওইনা পায়খৎপদা মাইপাকপদগী খোঙথাং অসি পায়খৎলকপনি।
*****
(Release ID: 1835125)
Visitor Counter : 121
Read this release in:
English
,
Urdu
,
Hindi
,
Marathi
,
Bengali
,
Assamese
,
Punjabi
,
Gujarati
,
Odia
,
Tamil
,
Telugu
,
Kannada
,
Malayalam