প্রধান মন্ত্রী, শ্রী নরেন্দ্র মোদীনা লুচিংবা কেন্দ্রগী কেবিনেতকী মফমদা শাংহাই কোওপরেসন ওর্গনাইজেসন (এস.সি.ও.)গী মেম্বর স্তেৎশিংগী ওথোরাইজ বোদীশিংগী মরক্তা লৈরিবা নহারোলগী থবক-থৌরমশিংদা তেংবাংনবগী থৌওংগা মরী লৈননা শাংহাই কোওপরেসন ওর্গনাইজেসনগী মেম্বর স্তেৎশিংগী মরক্তা য়ানচে খুৎয়েক পীনখিবগী ৱারোল পাউদমখ্রে।

নহারোলগী থবক-থৌরমশিংদা তেংবাংনবগা মরী লৈননা শাংহাই কোওপরেসন ওর্গনাইজেসন (এস.সি.ও.)গী মেম্বর স্তেৎশিংগী মরক্তা ১৭/৯/২০২১দা য়ানবা পুরকখিবগী মতুং ইন্না, হায়রিবা য়ানচে অসিদা ভারত সরকারগী য়ুথ এফিয়র্স অমসুং স্পোর্তকী ইকায় খুম্ননীংঙাই ওইরবা মন্ত্রীনা খুৎয়েক পীখি। এস.সি.ও. সেক্রেতরিএৎকী থবক থৌরম পাংথোকপগী ওফিসিএল ওইবা লোন্না রসিয়ন অমসুং চাইনীজনা ওইবনি।

তেংবাংনবগী হীরমদা মনুং চনবশিংদি: স্তেত য়ুথ পোলিসীবু থবক্তা ওন্থোক্লিবা য়ুথ অমসুং য়ুথ পব্লিক ওর্গনাইজেসন (এসোসিএসন)গা লোয়ননা পায়খৎলিবা থবকশিংদা তেংবাংনবগী চাং হেনগৎহনবগা লোয়ননা মালেমগী ওইনা নহারোলশিংনা তেংবাংনবা হেনগৎহন্নবা পান্দম থম্বা শৌগৎপগী অতোপ্পা থৌওংশিংনি। তেংবাংবগী লমদা নহারোলগা মরী লৈনবা থবক্কা মরী লৈনবা প্রোফেস্নেল স্তাফশিংগী ত্রেনিং;  স্তেত য়ুথ পোলিসী অমসুং নহারোলগী খোঙথাংশিংদা শৌগৎপগী থবকশিংদা শরুক য়াবা সাইন্তিফিক, রিফরেন্স অমসুং মেথোদোলোজিকেল মেতরিএল, স্তেত বোদী, য়ুথ পব্লিক ওর্গনাইজেসন, অতোপ্পা ওর্গনাইজেসন অমসুং এসোসিএসনশিংগী ৱর্ক এক্সপেরিএন্স লান্নবা; মাঙহন-তাকহনবা য়াবা থৌওংশিংদা নহারোলশিংবু শরুক য়াহন্দনবা পায়খৎপা হীরমশিংদা রিসর্চকী থবক পায়খৎপা; নহারোলশিংগী থবক ফংবা অমসুং য়াইফ য়ুম্বালগী ফিভম হেন্না ফগৎহন্নবা ওন্তোপ্রিনরশিপ অমসুং ইন্নোভেতিব প্রোজেক্তশিংদা নহারোলশিংবু শরুক য়াহনবগী পান্দম থম্বা ইকোনোমিক অমসুং হ্যুমেনিতরিয়নগী পুন্না পাংথোকমিন্নবা থৌওংশিং খুমাং চাউশিলহনবা; এস.সি.ও. য়ুথ কাউন্সিলগী থবক-থৌরমশিংবু শৌগৎপগী থৌওং কয়াসু মখা তানা মনুং চল্লি।

য়ানচে অসিগী পান্দমদি অমনা অমবু থাজবগী চাং, মরুপ-মপাং ওইবগী মরী অমসুং এস.সি.ও. মেম্বর স্তেতশিংগী নহারোলশিংগী মরক্তা তেংবাংনবগী চাং হেনগৎহনবা; নহারোলশিংগী মরক্তা তেংবাংনবগী থৌওংদা চাউখৎপা পুরক্নবা হোৎনবগী থৌওংবু এস.সি.ও. মেম্বর স্তেতশিংগী মরক্তা লৈরিবা নুংশি-চান্নবগী মরীবু হেন্না চেৎশিলহন্নবা ইলিমেন্ত অমা ওইনা শকখঙবা; মালেমগী এক্সপেরিএন্সতা য়ুম্ফম ওইদুনা নহারোলগী মরক্তা তেংবাংনবগী ফিভম্বু মখা তানা চাউখৎহনবনি।

***