নমস্কার!

খুঙ্গংগী অসিগী মচা-মশু, পরোংখ খুঙ্গংগী লমদমদা পোকখিবা লৈবাক্কী ইকায় খুম্ননীংঙাই ওইরবা রাস্ত্রপতি, শ্রী রাম নাথ কোবিন্দজী, শ্রীমতি সবিতা কোবিন্দজী, উত্তর প্রদেশকী রাজ্যপাল শ্রীমতি অনন্দিবেন পতেল, মীয়াম্না য়াবা উত্তর প্রদেশকী মুখ্য মন্ত্রী, য়োগী অদিত্যনাথজী, ফম্বাক্তা লেংখৎপীরিবা মন্ত্রীপরিশদকী ঐহাক্কী মরুপ, উত্তর প্রদেশ সরকারগী মন্ত্রী, এম.পি., এম.এল.এ. অমসুং মশিং য়াম্না লেংবীরক্লিবা ঐহাক্কী নুংশিরবা ইচিল ইনাওশিং!

রাস্ত্রপতিজীনা ঐহাকপু মফমসিদা লাক্কদবনি হেক হায়বীরকপদগী ঐহাক্না মফমসিদা লাক্তুনা খুঙ্গংগী মীয়ামগা উন্ননবা ঙাইদুনা লৈরকখিবনি। মফমসিদা ঙসি লাকপসিদা থম্মৈদা তসেংনা নুংঙাইবা ফাওই। খুঙ্গং অসিনা রাস্ত্রপতিজীগী অঙাং ওইরিঙৈগী পুন্সি উখি অমসুং মহাক্না চাউরগা ভারতকী চাউথোকচনীংঙাই ওইবা মীওই অমা ওইরকপসু খুঙ্গংসিনা উদুনা লাক্লি।

মফমসিদা লাক্ত্রিঙৈগী মমাংদা রাস্ত্রপতিজীনা ঐহাক্কী মফমদা খুঙ্গং অসিগা মহাক্কী লৈনবা মরীগী ৱারী কয়া লীবি। মহাক্না ক্লাস ৫ লোইরবা তুংদা মহাক্কী ময়ুমদগী কিলোমিতর ৫-৬ লাপ্পা মফমদা মহাক্কী মমিং চনখিবদা, মহাক্না মখোঙদা করিমত্তা তোংদনা স্কুল ফাওবা চেন্দুনা লাকখিবনি। মহাক্না চেন্দুনা লাকখিবা অসি হকচাং ফনবা হায়দুনা লাকখিবা নত্তে, নুংশা য়াম্না শাবনা মখোঙ পোকপা খরদা ওইরবসু হন্থহনবা হায়না চেন্দুনা লাকখিবনি।

অমুক্তা খনবীয়ু, নুংথিলগী নুংশা অসুক য়াম্না শাবা মতমদা ক্লাস ৫দা তম্লিবা মহৈরোই অঙাং অমনা স্কুলদা চেন্দুনা লাকখিবনি। পুন্সিদা অসুম্না অৱাবা মাইয়োক্নবা, অসিগুম্বা হোৎনবা কনবনা মীওই অমা ওইবদা য়াম্না তেংবাংই। ঙসি, ঐহাক্না রাস্ত্রপতিগী খুঙ্গংদা লাকপা মতমদা থেংনরিবা থৌওংশিংনা ঐহাক্কী পুন্সিগী নীংশিংনীংঙাই ওইবা নুংঙাইবা থৌওং অমগুম্লে।

ইচিল ইনাওশিং,

ঐহাক্না রাস্ত্রপতিজীগা লোয়ননা মফম কয়া য়েংবদা, ভারতকী খুঙ্গংগী মশক থোকপা মওং-মতৌ কয়া অমা ঐহাক্না পরোংখ খুঙ্গংদা উবা ফংখি। ঐহাক্না মফমসিদা খ্বাইদগী অহানবা ওইনা পত্থরী মাতাগী থৌজাল লৌবগী খুদোংচাবা ফংজখি। লাইশঙ অসিনা স্পিরিচুএল ওইবা ইথিল অমগা লোয়ননা খুঙ্গং অমসুং লমদম অসিগী এক ভারত – শ্রেস্থ ভারতকী খুদম ওইরি। লাই নীংববু লৈবাক নীংবা ওইবা মন্দির কয়াসু লৈ হায়না ঐহাক্না হায়জনীংই। ঐহাক্না লৈবাক নীংবা হায়রিবগী মরমদি রাস্ত্রপতিজীগী মপাবুংগী ৱাখল্লোনবু ঐহাক্না ইকায় খুম্নবগীনি। মহাক্কী ৱাখলগী মিৎয়েং শানববু ঐহাক্না কোক নোঞ্জরি। মহাক্না মশাগী পুন্সি মনুংদা তীর্থ মফমশিংদা চৎপা, তোঙানবা লমকোয়ফমশিংদা চৎপা, ইশ্বরগী থৌজাল লৌনবগীদমক্তা য়ুমদগী থোক্তুনা চৎলম্মি। করিগুম্বা মতমদা বদ্রিনাথতা চৎকনি, কেদর্নাথতা অমুক চৎকনি, অয়োধ্যা, কাশী, মথুরানচিংবা তোঙান-তোঙানবা মফমশিংদা চৎখি।

মতমদুদা মহাক্কী শেল থুমগী ফিভম য়াম্না ফবা নত্তে, মহাক্না চৎলুবা মফমশিংদগী পুরকপা প্রসাদশিংবু খুঙ্গংগী মীপুম খুদিংদা য়েনবা ঙম্লম্বা নত্তে। মহাক্কী ৱাখল লৈবগী মতৌ য়েংসি, মহাক্না চৎলুবা লাইনীংফম খুদিংদগী নুং অমা পুদুনা লাকখি। নুংশিংদুবু মহাক্না উপাল অমগী মখাদা থম্মি। হিন্দুস্তানগী মফম কয়া, শেংলবা লাইফম কয়াদগী পুরকপা নুং ময়াম লৈবদুদা খুঙ্গংগী মীয়াম্না অশেংবা মফমদগী লাকপা নুংনি খন্দুনা মফমদুবু লাইশঙগী মওংগুম্না খন্নখি। মরম অদুনা, মতাং অসিদা লৈবাক নীংবগী লৈবাক নীংবা ঙাক্তা ঙাইরে হায়না ঐহাক্না হায়রিবনি।

রাস্ত্রপতিগী মপাবুংনা লাইশঙ অসিদা পুজা তৌরম্মি। শেংলবা লাইশঙ অসিদা নোংমদি চৎলুবা হায়বসি ঐহাক্কী ৱাখল্লোন্দা মতম কুইনদগী লৈরক্লবনি। ঙসিদি, লাইশঙ অসিদা চৎচবা ফংবসিদা ঐহাক্না লাইবক ফবনি খঞ্জৈ।

মরুপশিং,

পরোংখকী লৈবাক্তগী রাস্ত্রপতিজীনা ফংলিবা সংস্কারগী শাখীদি মালেম পুম্বনা ওইরি। নাকল অমদনা সংবিধান, নাকল অমদনা সংস্কার, অদুগা রাস্ত্রপতিজীনা খুঙ্গংসিদা মহাক্কী ফম অসিনা থম্বা অকক্নবা কয়াদগী থোক্লকপা ঙম্লিবা অসিনা ঐহাকপু ঙকহল্লে। মহাক মশামক্না ঐহাকপু হেলিপেদতগী ওকপা লাকখি। মহাক্কী লুচিং মখাদা ঐখোয়না থবক তৌরিবনি, মহাক্কী ফমগী তোঙানবা মগুন অমা লৈরিবনি, অদুনা ঐহাক্না ইকায়বসু খরা ফাওজৈ।

রাস্ত্রপ্তিজীনা ঐহাক্কী মফমদা মীচং মীখাই নাইবীরে হায়না ঐহাক্না হাইরিবনি, সংবিধানগী কাঙলোনসু ঐহাক্না ইন্দুনা চৎলি, অদুবু সংস্কারগী মখা পোনবা থবকসু মতম মতমদা তৌদবা য়াদে হায়না মহাক্না নুংশিনা হায়বী। ঙসিদি অদোম্না ঐহাক্কী খুঙ্গংদা লাকপনি, ঐহাক্না অতিথীগী সেবা তৌগে খন্না লাক্লিবনি, ঐহাক্না রাস্ত্রপতি ওইনা লাকপা নত্তে। ঐহাক্না খুঙ্গং অসিদা অঙাং ওইনা পুন্সি হৌখিবনি, ঙসিনা খুঙ্গং অসিগী মীয়াম অমা ওইনা অদোম্বু ওকপা লাকপনি হায়না মহাক্না ঐঙোন্দা তাকপী। অতিথী ভেবো ভবাঃগী সংস্কারনা ভারত মচা ঐখোয়গী লু-তোংদা য়াওরি হায়বসিগী নীংথিরবা খুদম অমা ঙসি রাস্ত্রপতিজীনা উৎপীরে। ঐহাক্না রাস্ত্রপতিজীবু মসিগীদমক্তা থম্মোই শেংনা ইকায় খুম্নজরি।

রাস্ত্রপতিনা মহাক্কী মপা-মপুগী ময়ুম্বু মীফম ফম্নবা মফম ওইহনবীরে। মসিনা ৱা খন্নফম অমসুং ত্রেনিং সেন্তর অমা ওইনা নুপীশিংগী মপাঙ্গল হাপ্পগী লমদা অনৌবা শক্তি পীরি। মহাক্না হোৎনবদগী মফমসিদা অম্বেদকার ভবনগী মওংদা বাবাসাহেবকী ৱাখল্লোনগী ইথিল লৌফম সেন্তর ওইনা লৈরে। পরোংখ খুঙ্গংনা তুংগী মতমশিংদা অদোমগী ৱাখল্লোনগা লোয়ননা চাউখৎ-থৌরাংগী লম্বীদা খোঙজেল য়াঙনা খোঙদাগনি অমসুং লৈবাক্কী মাঙদা খুঙ্গং চাউখৎপগী মোদেল অমা ওইনা পীবিগনি হায়না ঐহাক্না থাজবা থম্মি।

মরুপশিং,

ঐখোয়না মফম কয়াদা চৎলবসু, চাউরবা শহর নত্ত্রগা মালেমগী মফম অমা হেক্তদা চত্তুনা লৈরুরবসু, করিগুম্বা ঐখোয়না ইশাগী খুঙ্গংদা পুন্সি হিংলকপা ওইরবদি, ঐখোয়গী নুংদগী ইশাগী খুঙ্গংবু কৈদৌনুংদা কাওথোকপা ঙম্লোই। মসিনা ঐখোয়গী লু-তোংদা য়াওখি, ঐখোয়গী মরক্তা মতম পুম্বদা লৈ। মরম অদুনা ভারতকী থৱাইদি খুঙ্গংদা লৈ হায়রিবনি, মসিগী মখা তাবা মরমদি, খুঙ্গং হায়বসি ঐখোয়গী থৱাইদা য়াওবগীনি।

ঙসিদি, লৈবাক অসিনা নীংতম্বগী অমৃত মহোৎসব পাংথোক্লি, মসিনা মরম ওইরগা, ভারতকী খুঙ্গং, ঐখোয়গী খুঙ্গংগীদমক্তা ঐখোয়না মঙলিবা মঙলানগী মরু ওইবা হেনগৎলে। ঐখোয়গী নীংতম ইহৌগী মনুংদা মহাত্মা গান্ধীনা ভারতকী নীংতম্ববু ভারতকী খুঙ্গংশিংগা মরী লৈননা য়েংখি। ভারতকী খুঙ্গং হায়বদি, স্পিরিচুএলগা লোয়ননা অচুম্বা ৱাখল্লোনগী মতৌ চেনবনি। ভারতকী খুঙ্গং হায়বদি চৎনবীসু থাক নাইনা চাউখৎপগী থৌওংসু লৈবা হায়বনি। ভারতকী খুঙ্গং হায়বদি সংস্কার অমসুং কোওপরেতিব লৈবা হায়বনি। মান্নবা মিৎয়েং য়েংবা অমসুং নুংশি চান্নবা লৈবা হায়বনি।

অসিগুম্বা খুঙ্গং অমসুং মখোয়গী রিনাইজেন্সপু নীংতম্বগী অমৃত মতমসিদা শকখঙবা হায়বসি ঐখোয়গী থৌদাংনি। মসিগী ৱারেপ অসিগা লোয়ননা, লৈবাক্কী খুঙ্গং-লাইরবা, লৌমী অমসুং পঞ্চায়তী লোকতন্ত্রগী তোঙানবা মাইকৈদা ঐহাক্না থবক তৌরি। ঙসিদি, লৈবাক্কী খুঙ্গংশিংদা লম্বী শোরোক কয়া খোঙজেল য়াঙনা শেমগৎলি, ওপ্তিকেল ফাইবর য়ৌহল্লি, য়ুম শারি, এল.ই.দি. স্ত্রীত লাই থাল্লি। ঐখোয়গী খুঙ্গংশিংনা শহরগা লোয়ননা চাউখৎ-থৌরাংগী মাইকৈদা খোঙথাং মান্ননা চৎমিন্নরি, মসিদি অনৌবা ভারতকী ৱাখল্লোন অমসুং অনৌবা ভারতকী ৱারেপ্নি।

অদোমসু অমুক্তা খন্থবীয়ু, লৌউবগা মরী লৈনবা অরুবা থবক কয়া দ্রোনগী মতেংদগী পাংথোকপা হৌরক্কনি হায়বসি অদোম্না মমাংদা খল্লম্বরা? অদুবু লৈবাক্না মাইকৈ অসিদা চঙশিনবা হৌরে। খুঙ্গং অসিগী য়াম্লবদা মীওই ৩০০গী মথক্তা স্বামিত্বগী মখাদা মশাগী লমগী চে-চাং শিন্নখ্রে হায়না ঐহাক্কী ইফমদা পাউদম্লি, প্রোপর্তী কার্দ য়েন্থোক্লে হায়রি। তেক্নোলোজীগী মতেংদগী লৌমীগী খুদোংচাবা অমসুং শেন্থোক মতৌ করম্না হেনগৎহনগনি হায়বগী মতাংদসু ঐখোয়না থবক পায়খৎলি।

মরুপশিং,

ঐখোয়গী খুঙ্গংশিংদা খ্বাইদগী চাউবা পাঙ্গল, শিন্মীগী শক্তি, অমসুং খ্বাইদগী চাউবা পুক্নিং চেৎপগী মতৌ লৈ। মরম অদুনা, ভারতকী খুঙ্গংশিংবু মপাঙ্গল লৈহনবা হায়বসি ঐখোয়গী সরকারগী অহানবা মিৎয়েং চঙবা থৌওংশিংগী মনুং চল্লি। জন ধন য়োজনা, অৱাস য়োজনা, উজ্বালাগী মখাদা গ্যাস কন্নেক্সন লেম্না ফংলিবা, য়ুম্থোং খুদিংদা ঈশিং ফংহনবগী খোঙথাং, অয়ুশমান ভার্ত য়োজনা, পুম্নমক অসিগী কান্নবসি খুঙ্গংগী মীওই করোর কয়ানা ফংলবনি। লৈবাক অসিনা লাইরবগী য়াইফ য়ুম্বালগীদমক্তা পাংথোক্লিবা থবকশিং অসি শীংথানীংঙাইনি।

হৌজিক্তি, লৈবাক্কী পান্দম অমা লৈরি, য়োজনা খুদিংবু ১০০%গী চাংদা বেনিফিশরীগী মফমদা য়ৌহনবা, মসিনা হায়বদি ১০০%গী চাংদা মপাঙ্গল হাপ্পা হায়বনি। অচান মীরাই লৈতবা, মান্নদবা মিৎয়েং য়েংদবা! খুন্নাইদা অচুম্বা ৱায়েল পীবা হায়রিবা অসি মসিবুনি। বাবাসাহেবকী মান্নবা মিৎয়েং য়েংবা হায়বা ৱাখল্লোন্দা য়ুম্ফম ওইদুনা ঐখোয়গী সংবিধান ঐখোয়দা পীবিরমখি। বাবাসাহেবকী মঙলান অদু ঙসিদি মঙফাওনরে। মাইকৈ অসিদা ঐখোয়না তুংলমচৎকীদমক্তা চঙশিল্লি।

মরুপশিং,

ঙসিগী থৌরম অসি অতোপ্পা হীরম অমগী ওইনসু পুৱারী ওইরি। ৱাফম অসি মীওই খুদিংনা নীংথিনা খঙজিনফম থোকই, মরমদি, লৈবাক্কী লোকতন্ত্রগী মপাঙ্গল, লৈবাক্কী খুঙ্গংগী পাঙ্গলবু মসিনা অমত্তা ওইনা উৎলি। ঙসিগী ফম্বাক অসিদা ইকায় খুম্নরবা রাস্ত্রপতিজী, য়ু.পি.গী রাজ্যপাল অনন্দিবেন পতেলজী, অমসুং মুখ্য মন্ত্রী, য়োগি অদিত্যনাথজী লেংশিনবীরি। ঐহাক্কী ইফমদসু অদোম মীয়াম্না লৈবাক্কী সেবা তৌনবা চাউরবা থৌদাং অমা শিন্নবীরি। ঐখোয় মীওই মরিমক অপীকপা খুঙ্গংগী মফমদগী লাক্তুনা ঙসিগী থাক অসিদা য়ৌরকপনি।

ঐহাক্কী পোক্নফমসু গুজরাতকী অপীকপা লমদম অমনি। খুঙ্গংগী সংস্কৃতী, সংস্কার, অমসুং ঐখোয়গী লমদমগা মরী লৈনবা অৱাবা কয়ানা ঐখোয়গুম্বা মীওই কয়াবু শেম্বীরকখি, ঐখোয়গী সংস্কারবু মপাঙ্গল লৈহনখিবনি। মসিমক ঐখোয়গী লোকতন্ত্রগী পাঙ্গলনি। ভারতকী খুঙ্গংদা পোকপা লাইরবদগী লাইরবা মীওইসু রাস্ত্রপতি, প্রধান মন্ত্রী, রাজ্যপাল, মুখ্য মন্ত্রীগী থাক ফাওবা য়ৌবা ঙমগনি।

অদুবু ইচিল ইনাওশিং,

ঐখোয়না লোকতন্ত্রগী অসিগুম্বা পাঙ্গলগী মতাংদা ৱারী শাবসিদা মসিগী মাঙদা লেপ্লিবা ইমুং-মনুংগী মীওই শৌগৎনদুনা কান্নবা ফংহনবগী চৎনবীদগী চেকশিন্না লৈবগী মথৌ তাই। অসিগুম্বা থৌওং অসিদি রাজনিতী নত্তে, মসিনা হীরম খুদিংদা অয়েৎপা, ঐখোয়গী চাউখৎ-থৌরাংগী লম্বীবু থিংজিল্লি। মাঙ থানা চৎপা ঙমহন্দে।

অদুনা মরুপশিং,

ঐহাক্না ইমুং-মনুংগী মীওই খকপু শৌগৎপগী মাইয়োক্তা ৱাফম থম্বা মতমদা মীওই খরনদি রাজনিতীগী ৱারোল ঙাঙলিবনি খল্লি। ঐহাক্কী রাজনিতী দলগী মাইয়োক্তা ৱা ঙাংলিবনি হায়না শন্দোকই। ঐহাক্কী ৱাফম অসিনা পানবা মীয়াম্না ঐহাক্কী ইফমদা শাওনীংবা ফাওই হায়বা ঐহাক্না খঙই। লৈবাক্কী মীওই খুদিংনা থৌওং অসিগী মাইয়োক্তা অমত্তা ওইনা লৈরে। লৈবাক্কী নহারোলশিংনা ইমুং-মনুংগী মীওই শৌগৎপগী মতাংদা মোদীনা হায়রিবা অসিদা য়াম্না লুনা লৌবা অসিদা মখোয়না য়াম্না হেন্না নুংঙাইতবা ফাওনরে।

মরুপশিং,

ঐহাক্কী ৱাফমগী অরানবা ৱাহন্থোক হনবীগনি হায়না ঐহাক্না মখোয়গী মফমদা হায়নীংই। ঐহাক্কী রাজনিতী দল নত্ত্রগা মীওই অমত্তগা নুংঙাইনদবা লৈতে। লৈবাক অসিবু মপাঙ্গল লৈবা ওপোজিসন লৈবা, গনতন্ত্রদা কত্থোকপা রাজনিতী দল লৈবা হায়বসি ঐহাক্কী অপাম্বনি। ইমুং-মনুংগী শৌগৎনবগী পথাপ্তা পন্দুনা লোইরিবা পার্তীশিংনা মসিদগী থোক্লকপা হায়বসি ঐহাক্কী অপাম্বনি। মসিনা ওইথোক্লবা মতমদা লোকতন্ত্রনা হেন্না মপাঙ্গল লৈগদৌরিবনি, লৈবাক্কী নহারোলশিংনা রাজনীতিদা খোঙদাবগী অহেনবা খুদোংচাবা ফংগদৌরিবনি।

ফরে, অসিগুম্বা পার্তীশিংদগী ঐহাক্না কা হেন্না থাজবা থম্লুরে। মরম অদুনা, ঐহাক্না অদোমগী মরক্তা লৈদুনা, অসিগুম্বা ফত্তবা চৎনবীনা ঐখোয়বু ঙমহল্লোইসি হায়জরি। খুঙ্গংগী লাইরবগী মচানুপা, মচানুপীসু রাস্ত্রপতি, প্রধান মন্ত্রী ওইবা ঙমহন্নবা ঐখোয়না অসিগুম্বা চৎনবী থিংবগী য়াম্না তঙাই ফদে।

মরুপশিং,

ঐহাক্না রাস্ত্রপতিজীগী খুঙ্গংদা লাকপসিদা অদোমগী মফমদগী খুদোল অমা নিজগে। ঐখোয়গী খুঙ্গংদা লাক্লে, করিমত্তসু পুরক্তে, ঐখোয়দগী ওইনা নিজগে হায়রিবা অসিবু করম্না প্রধান মন্ত্রীনো হায়না অদোম্না খল্লম্বসু য়াই। ঐহাক নিজগেকো, অদোম্না পীবিগনিকো...ঐহাক্না খুঙ্গংদগী নিরবদি শোইদনা ফংগনি, খুঙ্গং কয়াদগী লাক্লিবা মীওইশিংনসু পীবিগনিকো? অমুক্তা য়েংবীয়ু, অদোম্না ইশাগী খুঙ্গংবু য়াম্না চাউখৎহল্লবনি।

লৈবাক্না মশাগী নীংতম্বগী অমৃত মহোৎসব পাংথোক্লি, অদুনা ঐখোয়গী হোৎনবসু হেনগৎহনফম থোকই। অমৃত কাল অসিদা লৈবাক্না লৈবাক্কী জিলা খুদিংদা অমৃত সরোবর ৭৫ লৈহনগনি হায়না ৱারেপ লৌখ্রবনি। পরোংখতসু অমৃত সরোবর অনি শেম্লে হায়না হৌজিক্তা য়োগিজীনা হায়বীরে। অদোম্না মসিগী অমৃত সরোবর অসিদা মতেং পাংগদবনি, কার সেবাসু তৌগদবনি, মসিগী ফজবসু ঙাক্তুনা থমগদবনি।

ঐহাক্না করিগুম্বা অমগা পাম্লি, অদোম্না শোইদনা পীগনি হায়বসু ঐহাক্না থাজৈ। মসিদি, নেচরেল ফার্মিংনি। পরোংখ খুঙ্গংগী মীওই অয়াম্বনা নেচরেল ফার্মিংদা মায় ওন্সিনবীয়ু, অদুম্না তৌরবদি, অদোম্না লৈবাক্কী অচৌবা খুদম ওইগনি।

মরুপশিং,

ভারতকী মায় পাকপগী লম্বী অমখক লৈ – মীয়াম পুন্না হোৎনমিন্নবা। মীয়াম পুন্না হোৎনমিন্নবা মতমদতা আত্মির্ভর ওইবগী মঙলান মঙফাওনগনি। আত্মনির্ভর ভারত হায়বদি আত্মানির্ভর খুঙ্গং, আত্মানির্ভর নহারোল হায়বনি। ঐখোয়গী খুঙ্গংনা চাউখৎপগী খোঙজেল য়াঙবা মতমদা লৈবাক্কী চাউখ্রৎপনা খোঙজেল য়াঙগনি। খুঙ্গং চাউখৎপা মতমদা লৈবাক চাউখৎকদৌরিবনি।

ইকায় খুম্নরবা কোবিন্দজীগী শক্তমদা লৈবাক অসিদা রাস্ত্রপতি পীবিরিবা পরোংখনা খুঙ্গংগী লৈহাওদা পাঙ্গল কয়া য়াম্না লৈ হায়বা ঙসি উৎলবনি। ঐখোয়না মসিগী পাঙ্গল অমসুং হৈ-শিংবা অসিবু চুম্না শিজিন্নগদবনি। ঐখোয়না পুন্না হোৎনমিন্নদুনা থবক তৌগনি, লৈবাক্কী অপাম্বা লোইনা পীগনি।

ৱারেপ অসিগা লোয়ননা, ঐহাক্না ইকায় খুম্ননীংঙাই ওইরবা রাস্ত্রপতিজীবু ঐহাকপু মফমসিদা লাকপগী খুদোংচাবা ফংহনবগীদমক্তা থম্মোই শেংনা থাগৎচরি। ঐহাক্না অদোম খুদিংবু থম্মোই শেংনা অমুক্কা হন্না ইকায় খুম্নবা উৎচরি। ঐহাক্না চৎলুবা খুঙ্গংসিগী লৈরক খুদিংদা অদোম্না ঐহাকপু ইকায় খুম্নবা উৎপীখিবা, লৈ চাইবীখিবা, নুংশিবীবা উৎপীখিবনা ঐহাক্কী থম্মোইবু পেলহল্লে। অদোমগী নুংশিবসি ঐহাক্না কৈদৌনুংদা কাওরোই। অদোম্নসু ঐহাকপু অসুম্না তরাম্না ওকপীবসি কৈদৌনুংদা কাওরোই হায়বা ঐহাক খঙই। খুঙ্গংগী মফমদা ঐহাক্না মতম শাংনা লেনবা ফংজখি, ইশামক্কী অঙাং ওইরিঙৈগী মরুপশিংগা উন্নবসু ফংজখি। মরম অদুনা, অদোম খুঙ্গংগী মীওই খুদিংবু ঐহাক্না থম্মোই শেংনা ইকায় খুম্নবগা লোয়ননা ঐহাক্কী ৱারোল লোইশিঞ্জরগে।

পুম্নমকপু হন্না-হন্না থাগৎচরি!

*****