ভারত অমসুং বাঙ্গলাদেশকী মরক্তা রেলগী খুত্থাংদগী লমদম অনিগী মীয়ামগী মরী হেন্না ফগৎহন্নবগীদমক্তা ভারত অমসুং বাঙ্গলাদেশ সরকারনা মীফম কয়া পাংথোক্লবা তুংদা হন্দক্তা শেমজিন্দুনা শিজিন্নবা হৌখ্রবা হলদিবারী-চিলাহাতী রেল লিঙ্ক ফাওদুনা অনৌবা পেসেঞ্জর ত্রেন সর্ভিস, মিতালী কেসপ্রেস হৌদোক্নবা ৱারেপ লৌখ্রে। লৈবাক অনিগী প্রধান মন্ত্রী অনিমক্না মার্চ ২৭তা ভর্চুএলগী খুত্থাংদা শঙ্গাখিবা ন্যু জালপাইগুরী (ভারত) অমসুং ধাকা (বাঙ্গলাদেশ)গী মরক্তা চেনবা মসিগী অহুমশুবা ত্রেন সর্ভিস, মিতালী এক্সপ্রেস অসিবু নই দিল্লীগী রেল ভবন্দগী ঙসি (হায়বদি জুন ১, ২০২২) ভারত সরকারগী কেন্দ্রগী রেলৱে মন্ত্রী, শ্রী অশ্বিনি ভৈশ্নো অমসুং বাঙ্গলাদেশকী রেলৱে মন্ত্রী, মোহম্মদ নুরুল ইস্লাম সুজন্না পুন্না লমথামিন্নখি। কোবিদ লাইচৎকী অথিংবা লৈবা মরম্না ত্রেন অসি মমাংদা হৌবা ঙমদনা লৈরকখিবনি।

শ্রী অশ্বিনি ভৈশ্নোনা থৌরম অসিদা ৱা ঙাঙবদা মিতালী এক্সপ্রেস অসি লৈবাক অনিগী মরী অসিবু হেন্না ফগৎহনবা, মরা চেৎহনবা অমসুং খুমাং চাউশিনবগী মশক থোকপা থৌওং অমা অমুক ওইরগনি হায়না ফোংদোকখি। লৈবাক অনিগী মরক্তা থাক খুদিংদা অফবা মরী লৈবনা থৌওং অসিগী খোঙজেল য়াঙখৎহনবদা তেংবাংখি। রেলৱে অনি অসিগী মরক্তা খুৎশম্মিন্নদুনা পাংথোকপা থবক থৌরম কয়া লৈরি। ঙসিগী মিৎকুপ অসি খুদোংচাবা য়াম্না পীগদবা মিৎকুপ্নি, মসিদি লৈবাক অনিগী মরীবু হেন্না চেৎশিন্নহন্নবা অচৌবা খোঙথাং থাংজিনবগী চপ চাবা মতম্নি।

মিতালী এক্সপ্রেসনা চইয়োলদা অনিরক (নোংমাইজিং অমসুং য়ুমশকইশা নুমিৎকী পুং ১১:৪৫দগী ন্যু জালপাইগুরী থাদোক্কনি অমসুং ধাকাদা পুং ২২:৩০দা য়ৌগনি অমসুং নিংথৌকাবা অমসুং শগোলশেল নুমিৎকী পুং ২১:৫০দা ধাকা থাদোক্তুনা ন্যু জালপাইগুরীদা পুং ৭:১৫দা য়ৌগনি) চেনগনি অমসুং ন্যু জালপাইগুরীদগী ধাকা ফাওবগী কিলোমিতর ৫৯৫ (মসিগী মনুংদগী কিলোমিতর ৬১না ভারতকী শরুক্তা লৈবা লম্বীনি) কোন্দুনা চেনগনি। ইন্দিয়ন রেলৱেগী এল.ঐচ.বি. কোচ (মাইত্রী অমসুং বনধন এক্সপ্রেসতা শিজিন্নবগুম্না) শিজিন্নগনি অমসুং মসিদা ফর্স্ত এ.সি. ৪, এ.সি. চেয়র কার ৪ অমসুং পাৱর কার ২ য়াওগনি। মসিদা ক্লাস অহুম লৈগনি – এ.সি. ফর্স্ত (কেবিন) স্লীপর, এ.সি. ফর্স্ত (কেবিন) সীত অমসুং এ.সি. চেয়র কার; অমসুং মসিগী ভারানা মথংশিৎনা য়ু.এস.দি. ৪৪, য়ু.এস.দি. ৩৩ অমসুং য়ু.এস. ২২ ওইগনি।

অহেনবা অমসুং অনৌবা পেসেঞ্জর সর্ভিস, মিতালী এক্সপ্রেসনা বাঙ্গলাদেশকা অৱাং বেঙ্গোলগা শম্নবগা লোয়ননা ভারতকী অৱাং নোংপোক লমদমশিংগা শম্নবনা মরম ওইরগা লৈবাক অনিগী তুরিজমদা য়াম্না চাউনা কান্নবা পীগনি। মসিনা বাঙ্গলাদেশ মীয়াম্না ত্রেনগী খুত্থাংদা নেপালদা চৎপগী খুদোংচাবসু পীগনি।

মসিগী অনৌবা ত্রেন অসি ভারত অমসুং বাঙ্গলাদেশকী মরক্তা হান্নদগী লৈরবা ত্রেন সর্ভিস অনি, মিং ওইনা পল্লবদা কোলকাতা-ধাকা-কোলকাতা মাইত্রী এক্সপ্রেস (চয়োল অমদা নুমিৎ মঙানি চেনবা) অমসুং কোলকাতা-খুলনা-কোলকাতা বন্ধন এক্সপ্রেস (চয়োলদা নুমিৎ অনি চেনবা)কী মথক্তনি। পনখ্রিবা ত্রেন অনিগী সর্ভিস অসি কোবিদ লাইচৎকী অথিংবা লৈবনা লেপ্তুনা লৈরুরবনি অমসুং মে ২৯, ২০২২দগী হৌজিক অমুক চেনবা হৌখিবনি।

মিতালী এক্সপ্রেসকী পুংফমঃ

***