ভারত ইমানা য়াইফরে, ভারত ইমানা য়াইফরে!

কার্বী আংলোং কোরতে ইংগজির, কে-দো আ-অপহন্ত, নেলি কার্দোম পজির ইগ্লো।

অসমগী রাজ্যপাল, শ্রী জগদিশ মুখীজী, অসমগী মীয়াম্না য়াবা মুখ্য মন্ত্রী, শ্রী হিমন্তা বিস্বা শর্মজী, কার্বী নিংথৌ শ্রী রামসিং রোংহাংগজী, কার্বী আংলোং ওতোনোমস কাউন্সিলগী শ্রী তুলিরাম রোংগহাংগজী, অসম সরকারগী মন্ত্রী, শ্রী পিয়ুশ হজারিকাজী, জোগেন মোহনজী, ঐহাক্কী হাউসকী মরুপ, শ্রী হোরেন সিংগ বেজী, এম.এল.এ. শ্রী ভবেশ কলিতাজী, মীয়ামগী মীহুৎ অমসুং কার্বী আংলোংগী ঐহাক্কী নুংশিরবা ইচিল ইনাওশিং!

ঐহাক্না অদোমগী নাক্তা লাকপগী খুদোংচাবা ফংজরে। অদোম্না ঐহাকপু নুংশিবীরিবা অসি উবদা ঐহাক্না লাইগী থৌজাল ফংলে খঞ্জৈ। অদোম্না ঙসিসু মশিং য়াম্না লাকপীরি, থাপ্ল-থাপ্লবা মফমদগী ঐহাকপু থৌজাল পীনবা লাকপীরি। অদোম্না হরাও-তয়াম্না অমসুং ইশাগী নাৎকী মচু কয়ানা লৈতেংলবা ফিজোল শেত্তুনা লাকপীদুনা ইশাগী চৎনবীগী মতুং ইন্না ঐহাক্কী ইফমদা য়াইফ পাউজেল পীবিবগীদমক্তা ঐহাক্না খ্বাই পুম্নমকপু থাগৎচরি।

ইচিল ইনাওশিং,

লৈবাক অসিনা ঙসি নীংতম্বগী অমৃত মহোৎসব পালন তৌরিবসিদা ঐখোয়গী লৈবাক্কী শক্নাইরবা মচানুপা লচিত বোর্ফুকানগী ৪০০শুবা মপোক কুমওনা তাবা অসিসু য়াম্না নুংঙাইবা তান চাবনি। মহাক্কী পুন্সিনা লৈবাক নীংবা অমসুং লৈবাক্কী পাঙ্গলগী ইথিলনি। কার্বী আংলোংদগী থোক্লকপা ঐখোয়গী লৈবাক্কী অসিগুম্বা শক্নাইরবা মীওইবু ইকায় খুম্নজরি।

মরূপশিং,

বি.জে.পি.গী দবল ইঞ্জিনগী সরকারনা মফম অমদা হেক্তা লৈরবসু, সবকা সাথ, সবকা বিকাস, সবকা বিশ্বাস অমসুং সবকা প্রয়াসকী ৱাখল্লোনগা লোয়ননা মথৌ পাংথোক্লি। ঙসিদি ৱারেপ অসি কার্বী আংলোংগী অসিগুম্বা লমদম অসিদা অমুক্কা হন্না মপাঙ্গল লৈরক্লে। অসম লমদমগী শান্তি লৈনবা অমসুং খোঙজেল য়াঙনা চাউখৎহন্নবগীদমক্তা য়ানবা পুরকখিবা খুদিংমক, থবক ওইনা হৌজিক য়াম্না কন্না পায়খৎলি। য়ানবা পুরকখিবগী মখা পোন্না, লুপা করোর ১০০০গী তোঙানবা প্রোজেক্ত কয়াগী শঙ্গাবা অমসুং উরেপ উয়ুং তম্বগী থৌরম ঙসি পাংথোক্লি। দিগ্রী কোলেজ ওইরো, ভেতেরিনরী কোলেজ ওইরো, লুপশিং অসিনা মফমসিগী নহাশিংদা থবক্কী অনৌবা খুদোংচাবা কয়া পীগনি।

মরূপশিং, ঙসি শঙ্গারিবা অমসুং উরেপ উয়ুং তম্লিবশিং অসি শুপ্নগী বিলদিং অয়া শঙ্গাবা নত্ত্রগা উরেপ উয়ুং তম্বা নত্তে। মসিদি কোলেজ অমগী, য়ুনিভর্সিতী অমগী নত্ত্রগা ইন্সতিত্যুৎ অমগী উরেপ উয়ুং তম্বা নত্তে। মসিদি মফমসিগী নহারোলশিংগী য়াইফরবা তুংগী মতমগী উরেপ উয়ুং তম্বনি। অৱাংবা থাক্তা মহৈ তম্নবগীদমক্তা হৌজিক চুনবা খুদোংচাবা লৈবনা মরম ওইরগা, লাইরবা ইমুংগী অঙাংশিংসু অফবা মহৈ-মশিং তম্বা ঙম্লগনি। মসিগী ইন্সতিত্যুৎশিং অসিনা লৌমী অমসুং এনিমেল হসবেন্দরী তৌজবা মীওইশিংদা হেন্না ফবা খুদোংচাবসু পীগনি। প্রোজেক্তশিং অসিগী মথক্তা য়ানবা পুরকখ্রবা অতোপ্পা থৌওংশিংগী মতাংদসু অসম সরকারনা থবক কন্না পায়খৎলি। খুৎলায় থাদোক্তুনা মীচম মীয়ামগী পুন্সিদা চঙজরক্লবা মীওইশিংবু তেংবাংবগী থবকসু কন্না চত্থরি।

ইচিল ইনাওশিং,

নীংতম্বগী অমৃত মহোৎসবকী মতমসিদা লৈবাক্না লৌখিবা ৱারেপ কয়াগী মরক্তা য়াম্না মশক নাইবা ৱারেপ অমদি অমৃত সরোবরগা মরী লৈনবশিংনি। জিলা খুদিংদা য়ামদ্রবদা অমৃত সরোবর ৭৫০০ লৈহন্নবা পান্দম, অসিগুম্না চাউরবা পান্দমগা লোয়ননা লৈবাক অসিনা তুংলমচত্তা খোঙদারি। ঐহাক্না নুমিৎ খরনিগী মমাংদা জম্মু কশ্মিরদা মসিগী থবক হৌদোক্লম্লবনি। অসমদা ঙসি অমৃত সরোবর ২৬০০ হেনবগী থবক হৌখিবা অসিদা ঐহাক্না য়াম্না নুংঙাইবা ফাওই। সরোবর শেম্বগী থৌওং অসি মীয়াম্না শরুক য়াবদা মপুং ওইনা য়ুম্ফম ওইবনি। ত্রাইবেল খুন্নাইশিংদা অসিগুম্বা সরোবরশিং অসিগী নীংথিরবা চৎনবী লৈ। মসিনা খুঙ্গংশিংদা ঈশিং মরাং কায়হনবতা নত্তনা  মসিনা শেল তানবগী পাম্বৈ অমসু ওইগনি। অসমদা ঙা অসি নোংমগী চিঞ্জাক্কী য়াম্না মরু ওইবা মথেল অমা ওই। মসিগুম্বা অমৃত সরোবরশিং অসিদগী ঙা য়োকপগী লমদসু কান্নবা য়াম্না ফংগনি।

ইচিল ইনাওশিং,

অদোম্না হৌখিবা দিকেদ কয়াদা য়াম্না শাংলবা মতম অমা ৱানা লেনখ্রে। অৱাং নোংপোক্তা ইং ২০১৪গী মতুংদগী খুদোংচাদবা কয়া হন্থরি, মীয়ামগীদমক্তা চাউখৎপসু পুরক্লে। অসমগী ত্রাইবেলগী লমদমদা কনাগুম্বা অমনা লাকপদা, অৱাং নোংপোক্কী অতোপ্পা রাজ্যশিংদা চৎপদা হোংলক্লিবা ফিভমশিং উরুবদা য়াম্না নুংঙাইবা ফাওনরি। কার্বী আংলোং নত্ত্রগা ত্রাইবেলগী খুন্নাই অতোপ্পশিংনা চাউখৎপা অমসুং থাজবগী ৱাখল্লোন্দা থবক পায়খৎলি।

মরূপশিং,

ঐহাক্না অদোম অমসুং অদোমগী লমদমগী শিংনবা অমসুং অৱাবা মাইয়োক্নরিবা কয়াবু ঐহাক্না অদোমগী ইমুং মনুং, ইচিল ইনাও, নত্ত্রগা ইচাগুম্না খঙনবা হোৎনদুনা লাক্লি হায়বসি অদোম্না খঙলবা ৱাফম অমনি অমসুং অদোম্নসু ঐহাকপু ৱাখলদগী হেন্দোক্লগা থম্মোইদগী তাকপীদুনা লাক্লি। অদোম ঐহাক্কী থম্মোইবু মতম খুদিংদা শোকখি। ঐহাক্কী থম্মোই খুদুম চনখ্রে। ইমুং মনুং অমগুম্না ৱারী শাদুনা ৱারোইশিন থিনবা হোৎনরকপা হায়বসিদা পুক্নিংগী অপাম্বা খঙবগী মথৌ তাই, অৱাবা কয়া খঙবগী মথৌ তাই, অদোমগী মঙলান খঙবগী মথৌ তাই। অদুগা ঐহাক্না অদোমগী অপাম্বসু খঙলে। অদোমগী শেংলবা ৱাখল অমসুং অপাম্বগীদমক্তা ঐহাক্না পুন্সি কত্থোক্লবসু করিমত্তা খল্লোই।

মরূপশিং,

মীওই খুদিং, অসমগী থাপ্লবা মফমশিংদা উমংগী পুন্সি হিংলিবা ঐহাক্কী নহারোল মরুপশিংসু পুন্সিদা মাংজিল থানা চৎপগী অপাম্বা লৈগনি। মখোয়গী অপাম্ববু খঙলদুনা, ঐহাক্না মখোয়গী মঙলান মঙফাওনহন্নবগীদমক্তা অদোমগী মঙলান্না মীওই খুদিংগী ৱারেপ ওইহন্নীংই অমসুং ৱারেপ অসি ফংহন্নবা ঐখোয় পুন্না হোৎনমিন্নসি অমসুং মায় পাকপসু পুন্না ফংমিন্নসি হায়জনীংই।

ইচিল ইনাওশিং,

দিকেদ কয়াদগী চত্থদুয়া লাক্লবা হাৎন-শুনবা অমসুং অফা অপুনগী থৌওংশিং মতৌ করম্না মাঙখ্রে অমসুং মীয়াম্না অনৌবা ৱারোইশিন কয়া থিরি হায়বসি লৈবাক পুম্বনা উরি। লমদম অসিগী ৱারী শাবা মতমদা বোমগী মখোল খরা তা, নোংমৈ কাপ্নবগী মখোল খরা তা, অসুম্না তৌরম্লিবনি। ঙসিদি খুবাক খুবগী মখোল ওইনা তারে। য়াইফরে হায়না লাওনরে। কার্বী আংলোংগী লুপ কয়ানা মমাংগী চহিগী সেপ্তেম্বরদা শান্তি অমসুং চাউখৎপগী ৱারেপ লৌখি। ইং ২০২০গী বোরোগী য়ানবা পুরকখিবনা লমদমসিদা শান্তি লৈবগী অনৌবা থোঙ হাংখি। অসমখক্তদা নত্তনা ত্রিপুরাদসু NLFTনা শান্তিগী মাইকৈদা খোঙ থাংজিল্লি। চাউরাক্না দিকেদ অনি মখায়দগী লৈরক্লিবা ব্রু-রিয়াংগী শিংনবগী ৱারোইশিনসু হৌজিক পুরক্লে। অতোপ্পা মফমশিংদসু শান্তি লৈহন্নবগীদমক্তা ঐখোয়না লেপ্তনা হোৎনরি। য়াম্না লুনা খন্দুনা হোৎনরি।

মরূপশিং,

তংদু লৈতাদবা, হাৎন-শুনবনা য়াম্না শোকহনবা মীয়াম্না খ্বাইদগী অৱাবা নংই, মখোয়গী মপীনা কৈদৌনুংদা কংদে। মখোয়সিদি ঐখোয়গী ইমা, ইচে-ইচল অমসুং অঙাংশিংনি। উমংদা লৈরম্বদগী খুৎলায় থাদোক্তুনা ময়ুম-মকৈগী মনাক্তা অমুক্কা হন্না হল্লকপা উবদা ঐহাক্না নুংঙাইবা ফাওই। মখোয়গী মমাশিংগী মমিত্তা য়েংলুবা মতমদা নুংঙাইবা অমসুং হরাওবগী মতৌ উবা ফংই অমসুং নুংঙাইবগী পীরাং অমুক শিন্থৈ। মখোয়গী পুন্সিদা অনৌবা থাজবা অমসুং নুংঙাইবা অমুক হল্লক্লে খঙবদা ঐহাক্কী মখোয়গী থৌজাল ফাওবা ঙম্মি। ঙসি মশিং য়াম্না লাক্লিবা ইমাশিং, ইচে-ইচলশিং, মখোয়না পীবা থৌজালশিংনা ঐখোয়না শান্তি পুরক্নবা হোৎনবগী থৌওংশিংদা অনৌবা পাঙ্গল হাপ্পীরি, অনৌবা ইথিল পীবিরি। লমদমসিগী মীয়ামগী পুন্সি, মফমসিগী ইচানুপা ইচানুপীশিংগী পুন্সিনা হান্নদগী হেন্না ফগৎনবা হায়দুনা কেন্দ্র অমসুং রাজ্যগী দবল ইঞ্জিন সরকার অসিনা য়াম্না কন্না হোতনরি। খোঙফম চেৎনা হোৎনরি, তেংবাংবগী ৱাখল্লোনগা লোয়ননা হোৎনরি।

ইচিল ইনাওশিং,

অসম, অৱাং নোংপোক্তা সরকার অমসুং খুন্নাইনা পুন্না হোৎনমিন্নদুনা লমদমসিদা শান্তি অমুক লৈরক্লিবা অসিগা লোয়ননা মমাংগী আইন কয়াদসু অহোংবা পুরক্লি। অৱাং নোংপোক্কী রাজ্য কয়াদা আর্ম্দ ফোর্স স্পিসিএল পাৱর্স এক্ত (এ.এফ.এস.পি.এ.) মতম কয়াদগী লৈরক্লি। অদুবু, হৌখিবা চহি ৮গী মনুংদা শান্তি লৈরকখিবা অমসুং লো অমসুং ওর্দরগী ফিভম ফগৎলখিবদগী, ঐখোয়না অৱাং নোংপোক্কী মফম কয়াদগী এ.এফ.এস.পি.এ. লৌথোকখি। হৌখিবা চহি ৮গী মনুংদা অৱাং নোংপোক্তা থোকপা হাৎন-শুনবগী থৌওংনা ৭৫%গী চাংদা হন্থরকখি। মসিনা মরম ওইরগা, অহানবদা ত্রিপুরা অমসুং মথংদা মেঘালয়দগী এ.এফ.এস.পি.এ. লৌথোকখ্রিবনি। অসমদদি এক্ত অসি দিকেদ ৩দগী চৎনদুনা লাকখিবনি। ফিভম ফগৎলক্তবনা মরম ওইরগা, মমাংগী সরকারনা মসিবু অদুমক হঞ্জিন-হঞ্জিন্না শাংদোক্তুনা লাকখিবনি। অদুবু, হৌখিবা চহি খরদা ফিভম নীংথিনা ফগৎলকখিবনা ঙসিদি অসমগী জিলা ৩দগী এ.এফ.এস.পি.এ. লৌথোক্লে। অতোপ্পা মফমশিংগী ফিভম ফগৎহন্নবা অমসুং মদুগী মহৈ ওইনা এ.এফ.এস.পি.এ. লৌথোকপা য়ানবা ঐখোয়না কন্না হোৎনরি। মনিপুর অমসুং নাগালেন্দদা হীরম অসিগী মতাংদা খোঙজেল য়াঙনা থবক পায়খৎলিবনি।

মরূপশিং,

অৱাং নোংপোক রাজ্যশিংগী নুংগী ওইবা শিংনবা কয়াগী ৱারোইশিন পুরকপগী থবকশিং অদুমক পায়খৎলি, অদুগা রাজ্যশিংগী মরক্তা দিকেদ কয়াদগী লৈরক্লিবা ঙমখৈগী উংখৎনবা কয়াগী ৱারোইশিন পুরক্নবসু ঐখোয়না হোৎনরি। হিমন্তা অমসুং অৱাং নোংপোক্কী অতোপ্পা মুখ্য মন্ত্রীনা হোৎনবদগী লমদমসিবু লৈবাক্কী শেন্মিৎলোনগী মপাঙ্গল হাপ্পা য়ুনিৎ অমা ওইনবা খোঙফম চেৎনা হোৎনরিবা অসিগীদমক্তা মখোয়বু থাগৎপা ফোংদোকচনীংই। সবকা সাথ, সবকা বিকাসকী ৱাখল্লোনগা লোয়ননা, ঙসিদি, ঙমখৈগা মরী লৈনবা হীরম কয়াগী ৱারোইশিন থিবগী থৌওং পাংথোক্লি। অসম অমসুং মেঘালয়গী মরক্তা য়াশিন্নবা পুরকখিবনা অতোপ্পা হীরম কয়াগী পুক্নিং থৌগৎলগনি। মসিনা অপুনবা লমদম অসিগী চাউখৎ-থৌরাংগী মঙলান্দা অনৌবা শাফু পীরগনি।

ইচিল ইনাওশিং,

বোরো এক্কোর্দ অইরো, নত্ত্রগা কার্বী আংলোংগী য়ানবা পুরকখিবা ওইরো, লোকেল সেল্ফ গবর্নমেন্ত অসিদসু ঐখোয়না অহোংবা কয়া পুরকখ্রে। কেন্দ্র সরকারনা হৌখ্রবা চহি ৭-৮ অসিদা লোকেল গবর্নমেন্তকী ইন্সতিত্যুসনশিংবু হেন্না মপাঙ্গল লৈহন্নবা অমসুং নুং পান উবা ঙমহন্নবা হোৎনদুনা লাক্লি। কার্বী আংলোং ওতোনোমস কাউন্সিল ওইরো নত্ত্রগা অতোপ্পা লোকেল গবর্নমেন্ত ওইরো, মখোয়গী থৌদাং চাউনা লৈ। মখোয়গী তেংবাংদগী কেন্দ্র অমসুং রাজ্য সরকারগী স্কিমশিংনা খুঙ্গং খুদিংদা য়ৌহনবা ঙমগনি। মীয়ামগী কান্নবা, নুংঙাই য়াইফবা অমসুং শরুক য়াবা হায়বসিদা ঐখোয়না খ্বাইদগী অহানবা মিৎয়েং চঙলি।

ইচিল ইনাওশিং,

লৈবাক চাউখৎপগীদমক্তা রাজ্য, খুঙ্গং অমসুং লৈকায় চাউখৎপগী মথৌ য়াম্না তাই। লোকেলগী তঙাই ফদবগী মখা পোন্না, লোকেলগী ফিভমগী মহকা পোন্না চাউখৎ-থৌরাংগী স্কিম শেম্বা মতমদা খুঙ্গংশিংদা তসেংবা চাউখৎপা পুরক্কদবনি হায়বসিদা ঐখোয়না নীংথিনা খন্ন-নৈনফম থোকই। মরম অদুনা, হৌখিবা চহিশিংগী স্কিমশিংদা ঐখোয়না লোকেলগী তঙাই ফদবশিংবু নীংথিনা নৈনখি। খুদম ওইনা হায়রবদা, হান্নদগী চলায়দুনা লাক্লবা লাইরবশিংদা ইয়ুম পীবগী স্কিমগী মতাংদা, হীরম খুদিংমক দিল্লীদগী শীন –লাঙখি। অদুবু কার্বী আংলোংগুম্বা ত্রাইবেল লমদমগী চৎনবী, য়ুম শঙ্গাবগা মরী লৈবা সংস্কৃতী, অমসুং মেতরিএল ফংবগী মতৌদা খেৎনবা লৈ। মরম অদুনা, বেনিফিশরীগী একাউন্ততা হকথেংননা শেল পীননবা প্রধান মন্ত্রী অৱস য়োজনাদা ঐখোয়না অহোংবা পুরকখি। মসিদগীদি, মদুগুম্বা বেনিফিশরীশিংনা মখোয়না অপাম্বগী মতুং ইন্না মশানা য়ুম শাজবা য়ারে। মসি ঐহাক্কী য়ুম্নি, ঐহাক্না শাজবনি হায়না য়াম্না চাউথোকচনা মালেমগী মাঙদা হায়বা য়ারগনি। ঐখোয়গী ওইনদি, মসিগী প্রধান মন্ত্রী অৱস য়োজনা অসি সরকারনা মীনুংশি ফাওবগী প্রোগ্রাম নত্তে। ঐখোয়গী ওইনদি, মসিগী য়োজনা অসি লাইরবগী মঙলানগী কোনুং শাবগী, অমসুং মশাগী অপাম্বা মতুং ইন্না ময়ুম শাজবগী মঙলান্নি। খুঙ্গং চাউখৎপা মতমদা খুঙ্গংগী মীওই খুদিংদা কান্নবা ফংহনবা হায়বসি ঐখোয়গী হর ঘর জল য়োজনাদসু য়াওরি। য়ুম্থোং খুদিংদা তোতি ঈশিং ফংহল্লি, মদুবু পানি সমিতীনা শেন্নহল্লি, সমিতীশিং অদুগী মনুংদসু অয়াম্বদা নুপীশিংদা মরু ওইবা পীরি। ঈশিংগী তসেংবা মগুন অসিদি নুপীশিংতনা খঙবনি, নুপাশিংনদি কয়া খঙলোই, মরম অদুনা ঐখোয়না সমিতীগী মতাংদা নুপীশিংদা হেন্না মরু ওইবা থৌদাং পীরি। য়োজনা অসিনা হৌদ্রিঙৈদা, শুপ্নগী ২%দগীসু তাথবা ইমুং মশিংদা তোতি ঈশিং ফংলম্মি হায়না ঐহাক্কী ইফমদা পাউদম্বীরক্লি। হৌজিক্তি, চাউরাক্না ৪০%গী ইমুংদা তোতি ঈশিং য়ৌনরে। অসমগী ইমুং খুদিংদসু তোতি ঈশিং য়ৌরক্লগনি হায়বগী ঐহাক্না থাজবা থম্মি।

ইচিল ইনাওশিং,

ত্রাইবেলগী খুন্নাইগী সংস্কৃতী, মফমসিগী লোল, চাকচা-য়ুথক, কলা, হেন্দিক্রাফ, অসিগুম্বা ময়াম অসি হিন্দুস্তানগী নীংথিরবা হেরিতেজনি। অসমদি হীরমশিং অসিদা হেন্না মশক থোক্লি। সংস্কৃতীগী মগুন চেল্লবা অসিগুম্বা হেরিতেজনা ভারতপু অমত্তা ওইনা পুল্লি, এক ভারত, শ্রেস্থ ভারতকী ৱাখল্লোনবু মপাঙ্গল হেন্না হাপ্লি। মরম অদুনা, ত্রাইবেলশিংগী কলা-সংস্কৃতী, আর্ত-ক্রাফপু চাউখৎহন্নবা, য়োকখৎনবা, মখোয়শিংবু তুংগী চারোন-শুরোন ফাওবা য়ৌহন্নবা পথাপ লৈহন্নবা ঐখোয়গী সরকারনা কন্না হোৎনরি। লৈবাক শিনবা থুংবদা ঙসি ত্রাইবেল ম্যুজিয়ম শারিবশিং, ত্রাইবেল নীংতম লান্মীগী মিংদা ম্যুজিয়ম শারিবশিং, মসিগী মরুমদসু হায়রিবা ৱাখল্লোন অসি লৈ। ত্রাইবেল তেলেন্ত অমসুং ত্রাইবেল খুন্নাইগী লোকেলগী পোত্থোকশিংবু হেন্না পুক্নিং থৌগত্তুনা খুমাং চাউশিলহন্নবা কেন্দ্র সরকারনা কনা হোৎনরি। কার্বী আংলোং য়াওনা অসমগী হেন্দলুমগী কত্তন ফি, ৱা, উ অমসুং ধাতুনা শাবা কোনশিং, অমসুং খুৎনা শাবা  অতোপ্পা পোৎলমশিংগী ইনাক খুল্লবা চৎনবী লৈরি। অসিগুম্বা লোকেল পোত্থোকশিং অসিগী ভোকেল ওইবগী য়াম্না তঙাই ফদবা অমা লৈ। পোত্থোকশিং অসিনা লৈবাক্কী অমসুং মালেমগী কৈথেল, য়ুম্থোং খুদিংদা য়ৌনবা সরকারনা মথৌ তাগদবা প্লেৎফোর্ম খুদিংমক শারি। মনুং হঞ্জিনবা উমংদা লৈবা ঐহাক্কী ইচিল-ইনাওশিং, কলাগা মরী লৈনবা ঐহাক্কী ইচিল ইনাওশিং, ঐহাক্না মফম খুদিংদা চৎপদা অদোমগী ৱারী শাই। মফম খুদিংদা ভোকেল ফোর লোকেলগী ৱারী শাই। করিগীনো হায়বদা, অদোম্না পাংথোক্লিবশিং অদুবু হিন্দুস্তানগী য়ুম্থোং খুদিংদা মফম লৈহনবা অমসুং মালেমগী মাঙদা চাউথোকচহন্নবনি।

মরূপশিং,

নীংতম্বগী অমৃত মতম অসিদা কার্বী আংলোংনা শান্তি লৈবা অসুং চাউখৎপগী মাইকৈদা খোঙদারি। ঐখোয়না হৌজিক তুং হন্দুনা য়েংগদবা নত্ত্রে। হৌখিবা দিকেদশিংদা পাংথোকপা ঙমখিদ্রবা চাউখৎ-থৌরাংগী থবকশিংবু ঐখোয়না লাক্কদৌরিবা চহি খরসিদা পুন্দুনা মেনখৎমিন্নগদবনি। অসমগী চাউখৎপগীদমক্তা ঐহাক্না অদোমগীদমক্তা লেপ্লি। অদোম্না ঙসি মশিং য়াম্না থোকপীরক্তুনা থৌজাল পীবা লাক্নরি। অদোমগী মীনুংশি অসিগী ঐহাক্না নীংথিনা লমন শিংগনি হায়না ঐহাক্না খ্বাই খিবিক্কী মফমদা থাজবা পীজরি। অদোম্বু শোইদনা চাউখৎহনগনি। ঐহাক্না অদোম খুদিংবু থাগৎচরি।

কার্দোম! থাগৎচরি!

ভারত ইমানা য়াইফরে

ভারত ইমানা য়াইফরে

ভারত ইমানা য়াইফরে

অমুক্কসু হন্না থাগৎচরি! কার্দোম!

******