নোংচুপ বেঙ্গোলগী রাজ্যপাল শ্রী জগদীপ ধংখরজী, কলচর অমসুং তুরিজমগী কেন্দ্র মন্ত্রী, শ্রী কিশন রেদ্দীজী, ভিক্তোরিয়া মেমোরিএল হোলগা মরী লৈনবা দিগনিতরীশিং, য়ুনিভর্সিতীশিংগী ভাইস-চাঞ্চেলরশিং, আর্ত অমসুং কলচরগী মীওইশিং, নুপী অমদি নুপাশিং!

অহানবা ওইনা, ঐহাক্না নোংচুপ বেঙ্গোলগী বীরভুমগী হিংসাগী থৌদোক অদুবু নুংঙাইতবা ফোঙদোকচরি, ঐহাক্না অৱাবা ফোঙদোকচরি। রাজ্য সরকারনা বঙ্গোলগী অথোইবা লমদম অসিদা অসিগুম্বা তমথিরবা পাপ চেল্লবা থৌওংশিং পাঙথোক্লিবা মীওইশিংবু শোইদনা চৈরাক পীগনি হায়না ঐহাক্না থাজৈ। ঐহাক্না বেঙ্গোলগী মীয়ামদা অসিগুম্বা থৌদোক থোকহল্লিবা মীওইশিং, অসিগুম্বা মরাল লৈবা মীওইশিংবু শৌগৎলিবা মীওইশিংবু কৈদৌনুংদা ঙাকপীগনু হায়না হায়জনীংই। কেন্দ্র সরকারগী মাইকৈদগী ঐহাক্না রাজ্য অসিদা ৱাফম অমগী থাজবা পীরি মদুদি মরাল লৈবশিংবু অথুবদা চৈরাক ফংহন্নবা মথৌ তাবা মতেং পুম্নমক ফংহনগনি।

মরুপশিং,

ঐহাক্না, আজাদী কা অমৃত মহোৎসব অসিদা ভরাত মীয়ামগী মহুৎ শিন্দুনা অথৌবা য়াওললোইশিংবু অমদি লমদম অসিগীদমক মখোয়না কত্থোকখিবশিং অদুবু ইকাই খুম্নবা উৎচরি। শাহীদ দিৱসনা লাকপদা ঐহাক্না লৈবাক অসিগীদমক মখোয়গী থৱায় থাখিবা থৌনা লৈবা অথৌবা পুম্নমক্তা জাতিগী মহুৎশিন্দুনা ইকাই খুম্নবা উৎচরি। মসি শ্রীমদ ভাগবত গীতাদসু ইরমখি – মহাকপু খুৎলাই অমত্তনা মচেৎ তাহনবা ঙমলোই, মহাকপু মৈনা চাকহনবসু ঙমলোই। অসিগুম্বা মীওইশিং অসিনা লৈবাক অসিগীদমক কত্থোকখি। মখোয়না অমর ওইখি। মখোয়ন ইথিল পীরিবা লৈরাং অমা ওইদুনা মীরোল কয়াদা মখোয়গী লৈনম মখা তানা শন্দোক্লি। মরম অসিনা চহি কয়া লৈরবসু অমর ওইরবা অথৌবা ভগত সিংহ, রাজগুরু অমসুং সুখদেবনা থৱায় থাখিবগী ৱারী অসি লৈবাক্কী অঙাং খুদিংমক্কী মচিলদা শোন্দুনা লৈরি। অথৌবশিং অসিগী ৱারীশিংনা ঐখোয় পুম্নমক্তা লৈবাক্কীদমক অয়ুক নুমিদাং খাইদনা থবক তৌনবা ইথিল পীরি। আজাদী কা অমৃত মহোৎসব মনুংদা শাহীদ দিৱস পাঙথোকপা অসিনা হেন্না মরু ওইরি। ঙসি লৈবাক অসিনা নীংতম ইহৌদা শরুক তমখিবা অথৌবশিংদা ইকাই খুম্নবা উৎচরি অমসুং মখোয়না শরুক তমখিবশিং অদু নীংশিলহল্লি। ঙসি লৈবাক পুম্বনা বাঘা জতিন্না হায়রম্বা– ‘আমরা মোরবো, জাত জোগবে’ (লৈবাক অসি মীকপ থোকহন্নবা ঐখোয়না শীগনি), নত্ত্রগা খুদিরাম বোস না হায়রম্বা – ‘এক বার বিদাই দে মা, ঘুরে আশি’ (ইমা ঐঙোন্দা বিদাই অমুক্তং হায়বীয়ু, ঐহাক য়াম্না থুনা হল্লকনি) অমুক হন্না নীংশিংহল্লি। বঙ্কিম বাবুগী ভান্দে মাতরমনা ঙসি ভারতকী পুন্সিগী মন্ত্র ওইরি। ঝান্সিগী রানি লক্ষ্মিবাই, ঝলকারী বাই, কিত্তুরগী রানি চেনম্মা, মাতঙ্গিনি হাজরা, বিনা দাস, কমলা দাস গুপ্তা, কনকলতা বরুৱা অসিনচিংবা থৌনা ফবী কয়ানা নারি শক্তিগা লোয়ননা নীংতম ইহৌগী মৈরা চুখৎখি।অসিগুম্বা অথৌবশিং অসিবু নীংশিংলদুনা ঙসি অয়ুক্তগী মফম কয়ামরুমদা ‘প্রভাত ফেরিশিং’ চৎলি। ঐখোয়গী নহা ওইরিবা মরুপশিংনা স্কুলশিং অমসুং কোলেজশিংদা অখন্নবা থৌরমশিং পাঙথোক্লি। অমৃত মহোৎসবকী পুৱারী ওইরবা মতম অসিদা শাহীদ দিৱস অসিদা ভিক্তোরিয়া মেমোরিএলদা বিপব্লোবী ভারত গেলরী শঙ্গাখি। ঙসি মফম অসি নেতাজী সুভাস চন্দ্র বোস, ওরোবিন্দো ঘোশ, রাস বিহারি বোস, খুন্দি রাম বোস, বাঘা জতিন, বিনোই, বাদল, দিনেশ অসিনচিংবা অথৌবা লান্মী কয়াগী ৱারীনা শেংদোকখি। নিরভিক সুভাস গেলরীগী মুংদা নোংচুপ বেঙ্গোলগী কোলকতাদা নীংথিজরবা মনি অমগী শক্লোন লৌদুনা বিপ্লোবী ভারত গেলরী ওইনা হাপচিল্লি।

মরুপশিং,

বিপ্লোবী ভারত গেলরী অসি চহি কয়া অসিদা নোংচুপ বেঙ্গোলগী মমল য়াম্লবা কলচরেল অমসুং হিস্তোরিকেল হেরিতেজ য়োকখৎনবা ঐখোয়গী ফিরেপ অদুগী খুদম অমসু ওইরি। ওল্দ করেন্সী বিল্দিং, বেলবেদেয়র হাউস, ভিক্তোরিয়া মেমোরিএল নত্ত্রগা মেতকাফ হাউদ ওইরবসু মমিং লৈরবা গেলরীশিংবু চাউথোকহনবা অমসুং ফজথোকহনবগী থবক অসি অয়াম্বা লোইশিনবা ঙম্লে। মালেমগী ওইনা খ্বাইদগী লিরবা ম্যুজিয়মশিংগী মনুংদা অমা ওইরিবা কোলকতাগী ইন্দিয়ন ম্যুজিয়ম অসি ঐখোয়গী সরকারনা অনৌবা মওং অমদা মালেমগী মমাংদা পুথোক্নবা থবক পাইখৎলি।

মরুপশিং,

ঐখোয়গী হৌখ্রবা মতমগী লেগেসীনা ঐখোয়গী হৌজিকপু লমজিংলি, অফবা তুংলমচৎ অমা শেমগৎনবা ঐখোয়দা ইথিল পীরি। মরম অসিনা ঙসি লৈবাক অসিনা মাগী পুৱারী, মাগী হৌখ্রবা মতমবু থৌনাগী হৌরকফম অমা ওইনা লৌরি। ঐখোয়গী মফম অসিদা অরিবা লাইশঙশিংদগী ঈশ্বরগী মীতমশিং হুরানবগী পাউশিং তাখিবা মতম অদু অদোম্না নীংশিংবীরমগনি। ঐখোয়গী কলাগী পোৎলমশিং অদু করিসু মমল লৈতবগুম্না মখোয়বু মপালদা আইন্না য়াদবা মওংদা য়োনখি। অদুবু হৌজিক্তি ভারতকী অদুগুম্বা মমল য়াম্লবা লন অদু অমুক হন্না পুরকপা ঙমখ্রে। কিশন রেদ্দীজীনা মসি কুপ্না হায়বীখ্রে। শুপ্নগী নুমিৎ নিনিগী মমাংদা ওস্ত্রেলিয়ানা অসিগুম্লবা স্কল্পচরশিং, অয়েকপা লাইশিং অমসুং অতোপ্পা আর্তিফেক্তশিং ভারত্তা অমুক হন্না খুৎশিন্নরকখি। মসিদা অয়াম্বদি নোংচুপ বেঙ্গোলগী ওইখি। হৌখিবা চহিদা য়ু.এস.নসু ভারত্তা আর্তিফেক্ত ১৫০ হেন্না খুৎশিন্নরকখি। অসিগুম্বা খুদমশিং অসি লৈবাক অমগী ইথিল হেনগৎলকপা অমসুং লৈবাক অনিগী মরক্তা মরী ফগৎলকপনা উবা ফংবনি। ২০১৪ গী মমাংগী দিকেদশিংদা ভারত্তা মীতম খরা খক্তমক পুরকপা ঙমখি। অদুবু হৌখিবা চহি ৭ অসিদা মসিগী মশিং অসি চনি য়াঙ্খৈ হেন্না হেনগৎলকপা ঙমখি। ঐখোয়গী সংস্কৃতি, সভ্যতাগী খুদমশিং অসিনা ভারতকী হৌজিক্কী হৌরক্লিবা অমসুং তুংলমচৎকী মীরোলশিংবু মখা তানা ইথিল পীবা ওইরসনু, মাইকৈ অসিদা মসি য়াম্না চাউবা খোঙথাং অমনি।

ইচিল-ইনাওশিং,

মসিগী অতোপ্পা নাকল অমসু লৈরি, লৈবাক অসিনা নৌনা মশাদা থাজবা থম্বগা লোয়ননা লৈবাক অসিনা নেস্নেল অমসুং স্পিরিচ্যুএল হেরিতেজ শেমগৎলিবা মওং অসিনি। মসিগী হীরম অসি ‘হেরিতেজ তুরিজমনি’। শেন্মীৎলোনগী মীৎয়েংদগী য়েংবদা ‘হেরিতেজ তুরিজম’ অসিনা চাউখৎ-থৌরাংগী অনৌবা লমশিং হাংদোক্তুনা মতিক-ময়াই কয়া অমা লৈরি। হেরিতেজ তুরিজমহেনগৎহন্নবা ভারত্তা হৌজিক লৈবাক শিনবা থুংনা অভিয়ান অমা চত্থরি। দান্দীদা থুমগী সত্যগৃহগী নীংশিং খুভম শেমগৎপা নত্ত্রগা জালিয়ন ৱালা বাঘ মেমোরিএল শেমগৎপা ওইরবসু, এক্তা নাগর কেৱারিয়াদা স্তেচু ওফ য়ুনিতী নত্ত্রগা বারনাসীদা পন্দিৎ দীন দয়াল উপাধ্যায়গী নীংশিং খুভম ওইরবসু, দিল্লিদা বাবা সাহেব মেমোরিএল নত্ত্রগা রাঞ্চিদা ভাগৱন বিরসা মুন্দা মেমোরিএল পার্ক এন্দ ম্যুজিয়ম ওইরবসু, নত্ত্রগা অয়োধ্যা অমসুং বনারসকী ঘাতশিং ফজহনবা ওইরবসু খোঙথাংশিং লৌখৎলি। স্বদেশ দর্হনগুম্বা স্কিম কয়ামরুমগী খুত্থাংদা হেরিতেজ তুরিজমবু শাহৌ পীরি। মসিনা হেরিতেজ তুরিজমনা মীয়ামগী ইনকম হেনগৎহনবা অমসুং অনৌবা থবক্কী খুদোংচাবশিং পীবদা অচৌবা থৌদাং অমা লৌই হায়না মালেম শিনবা থুংনা তাক্লি। ২১শুবা চহিচাগী ভারতনা মসিগী তৌবা ঙম্বা অসি খঙলদুনা মাংদা চংশিল্লি।

মরুপশিং,

ভারতনা পাম্বৈ অহুমগী অপুনবা খোঙথাংশিংগী খুত্থাংদা চহি চামা মীনাই-নাইথং ওইরম্বদগী নীংতম্বা ফংখি। পাম্বৈ অমনা ইহৌ, অনিশুবা পাম্বৈনা সত্যাগৃহ অমসুং অহুমশুবা পাম্বৈনা মীয়াম ভাব তাহন্নবা কেম্পেনশিংনা ওইখি। পাম্বৈ অহুম অসিনা ঐহাক্কী ৱাখলদা মচু অহুমগী ফরালগী মচু অহুমগী মওংদা থোরক্লি। সেফ্রোন মচুনা ইহৌ, অঙৌবনা সত্যগৃহ অমসুং অশংবনা লৈবাক অসিগী অনৌবা অমা শেম্বা পাম্বগী ৱাখল্লোন অদুবু তাকই। ঐহাক্কী ওইনদি জাতিগী ফিরালদা য়াওরিবা হিগোক্কী অকোইবা অসিনা লৈবাক অসিগী কলচরগী ওইবা ৱাখল্লোন অদুবু তাকই। বেদদগী বিবেকানন্দ, বুদ্ধদগী গান্ধি, মসিগী সাইকল অসি লোইবা নাইদে। মথুরাগী বৃন্দাবন, কুরুক্ষেত্রগী মোহন, মহাক্কী সুদরশন চক্র অমসুং পোরবন্দরগী তরেং ফাওবা মসিগী সাইকল অসি লেপ্পা লৈতে।

অদুগা মরুপশিং,

ঙসি ঐহাক্না বিপ্লোবী ভারত গেলরী শঙ্গাবা মতমদা মচু অহুমগী জাতিগী ফিরাল অসিদা অনৌবা ভারতকী তুংলমচৎ অদু ঐহাক্না উবা ফংলে। সেফ্রোন মচুনা হোৎনবা কনবা, থৌদাং য়াবা অমসুং নেস্নেল সিক্যুরিতীগী ইথিল পীরি। অঙৌবা মচুনা সবকা সাথ, সবকা বিকাস, সবকা বিস্বাস অমসুং সবকা প্রয়াসকা মান্নৈ। অশংবা মচু অসিনা অসিনা অকোইবদা লৈরিবা ঈশিং-নুংশিৎকী ফিভম ঙাক-শেন্দুনা থম্নবগী রিন্যুৱেবল ইনর্জীগী অচৌবা পান্দমশিং তাক্লি। গ্রীন ইনর্জীদগী গ্রীন হাইদোজেন ফাওবা, বাইওফ্যুলদগী ইথানোল ব্লীদিং ফাওবা, নেচরেল ফার্মিংদগী গোবরধন য়োজনা ফাওবা, পুম্নমক মসিগী মশেক মঙাল ওইরক্লিল অমসুং মচু অহুমগী ফিরালগী হিগোক মচুগী চক্র অসিনা লৈবাক অসিগী ব্লু ইকোনোমীগা মান্নৈ। ভারত্তা লৈরিবা লোইবা নাইদ্রবা মেরিন রিসোর্সশিং, অচৌবা সমুদ্র মপানশিং, ঐখোয়গী ৱাতর পাৱর অসিনা মখাতানা লৈবাক অসিগী চাউখৎ-থৌরাংদা ইনোৎ হাপলি।

অদুগা মরুপশিং,

লৈবাক অসিগী নহারোলশিংনা মচু অহুমগী ফীরাল অসিগী মশেক ঞঙাল হেনগৎহনবগী থবক পাইখৎলকপদা ঐহাক্না নুংঙাইবা পোকই। থেংখাং খুদিংমক্তা ভারতকী নীংতম ইহৌগী লমজিং মৈরা পাইখিবা অদু লৈবাক অসিগী নহারোলশিংনি। ভগত সিংহ, সুখদেভ সিংহ, রাজগুরুবু নুমিৎ অসিদা ফাঁসি তৌখি; মখোয় চহি ২৩-২৪ খক্তা শুখি। খুদিরাম বোসপু ফাঁসি তৌখিবা মতমদা মখোয় ময়ামগী মনুংদা মহাক্না নহা খ্বাইদগী ওইখি। ভগৱন বির্সা মুন্দানা চহি ২৫-২৬ শুখি, চন্দ্র শেখর অজাদনা ২৪-২৫ শুখি, অদুগা মখোয়না বৃতিশ সাসনবু নিকহনখি। ভারতকী নহারোলশিংগী তৌবা ঙম্বা অসি মমাংদসু হৌজিকসু হন্থবা উদ্রি। ঐহাক্না লৈবাক অসিগী নহারোলশিংদা হায়নিংবদি অদোমগী শক্তি অমসুং মংলানশিং অদু কৈদৌনুংদা হন্থনা খল্লোইদবনি। ভারতকী নহারোলশিংনা তৌবা ঙমদবা থবক অমত্তা লৈতে। ভারতকী নহারো।শিংনা ফংবা ঙমদবা পান্দম অমত্তা লৈতে। ২০৪৭দা নীংখাতম্বগী চহি ১০০ শুবা মতমদা ভারতনা ফংগদবা পনখৈ অদু ঙসিগী নহারোলশিংগী থৌনাদা মপুংফানা মখা পোল্লি। মরম অদুনা ঙসিগী নহারোলশিংগী খ্বাইদগী চাউবা পান্দম অসি অনৌবা ভারত অমা শেম্বদা মখোয়গী থৌদাং লৌবা অদুনি। মথংগী চহি ২৫দা নহারোলশিংগী হোৎনবা কনবনা ভারতকী মরাইবক লেপ্পা ঙমগনি অমসুং ভারতকী তুংলমচৎ শেম্বা ঙমগনি।

মরুপশিং,

ভারতকী নীংতম ইহৌ অসিনা ঐখোয়বু ‘এক ভারত-শ্রেস্থা ভারত’কী থবক পাইখৎনবা মতম পুম্বদা ইথিল পী। নীংতম্বা পামজবা মীওইশিংগী তোঙান-তোঙানবা লাইনিং-লাইশোনশিং, তোঙান-তোঙানবা লোলশিং লৈ, রিসোর্সশিং ফাওবদা খেন্নৈ, অদুবু জাতিগী ৱাখল্লোন অমসুং লৈবাকনীংবা অসিদি চপ মান্নখি। মসি ‘ভারত ভক্তি’গী ফোর্ম্যুলাগা মরী লৈনৈ, ফিরেপ অমগীদমক লান্থেংনখি। ভারত ভক্তিগী হোংবা নাইদ্রবা ইথিল, অপুনবগী শক্তম, অমত্তা ওইবগী ৱাখল্লোন অসি ঙসিমকসু ঐখোয়গী খ্বাইদগী মরু ওইবা ওইগদবনি। অদোমগী রাজনিতীগী ৱাখল্লোন অদু অমা হেক্তা ওইরবসু, অদোম্না রাজনিতী দল অমা হেক্তগী মনুং চল্লবসু য়াই, অদুবু ভারতকী অমত্তা ওইবগী ৱাখল্লোন অসিদা মখল অমা হেক্তগী শীংনবা চত্থবদা মদু ভারতকী নীংতম লান্মীশিংদা খ্বাইদগী চাউনা মীনম্বনি। অপুনবগী ৱাখল্লোন য়াওদনা, ‘এক ভারত শ্রেস্থা ভারত’কী থৌনা অসি মপাঙ্গল কনখৎহনবা ঙম্লোই। লৈবাক অসিগী কন্সতিত্যুস্নেল ইন্সতিত্যুসনশিং ইকাই খুম্নবা উৎপা, কন্সতিত্যুস্নেল পোস্তশিং ইকাই খুম্নবা উৎপা, প্রজা খুদিংমক্তা চপ মান্নবা মীৎয়েং য়েংবা, মখোয়দা মীনুংশি উৎপা অসিনা লৈবাক অসিগী অমত্তা ওইবগী ৱাখল্লোন অদু উৎলি। হৌজিক্কী মতম অসিদা লৈবাক অসিগী অমত্তা ওইবগী ৱাখল্লোন্দা শিংনদুনা থবক পাইখৎলিবা হীরম খুদিংমক্তা মীৎয়েং চংগদবনি অমসুং অকনবা মওংদা মায়োক্নগদবনি। ঙসিদি ঐখোয়না নীংতম্বগী অমৃত মহোসব পাংথোক্লি, অপুনবগী শক্তমগী অমৃত অসি ঙাকশেনবা হায়বসি ঐখোয়গী অমত্তা ঙাইরবা থৌদাংনি।

ইচিল ইনাওশিং,

ঐখোয়না অনৌবা ভারত অসিদা অনৌবা ভিজন অমগা লোয়ননা মাংলোমদা চংশিল্লি। মসিগী অনৌবা ভিজন অসি ভারতকী মরোমদোম লেপ্পা ঙমজবা, মীপাল তাংদবা, অরিবা শক্তাক অমসুং তুংলমচত্তা খুমাং চাউশিনবনি। অদুগা থৌদাং মশক খংবা হায়বসিনা য়াম্না মরুওইবা অমনি। ঐখোয়না পুকচেল শেংনা থবক তৌবা হেল্লিবমখৈ, ঐখোয়না ময়েক শেংনা হোৎনরিবমখৈ লৈবাক অসিগী তুংলমচত্তা হেন্না কান্নবা পুরক্কনি। মরম অদুনা ‘দিভোসন তু দ্যুতি’ অসি ঐখোয়গী নেস্নেল স্পিরিৎ ওইগদবনি। ‘রেস্পেক্ত তুৱার্দস দ্যুতি’ অসি ঐখোয়গী নেস্নেল মোতিবেসন ওইগদবনি।   থৌদাংনা ভারতকী নেস্নেল কেরেক্তর ওইগদবনি। অদুগা মসিগী থৌদাং হায়বসি করিনো? ঐখোয়না হৈখোয়গী অকোইবদা ঐখোয়গী থৌদাংশিংগী মতাংদা য়াম্না লাইনা ঐখোয়না ৱারেপ লৌবা য়াগনি, হোৎনবা য়াগনি অমসুং ফলশিং পুরকপা ঙমগনি। ঐখোয়না অমোৎ অকাই চাইথোক্তবা মতমদা ঐখোয়গী থৌদাং পাংথোকই অমসুং লম্বীশিংদা, ত্রেনশিংদা, বস স্তেন্দশিংদা অমসুং লম্বী মচাশিং অমসুং লৈথেলশিংদা তরু তনান্না থম্নবা থৌদাং লৌই। মতমচানা ভেক্সিন কাপথোকপা, ঈশিং য়োকশিনবদা থৌদাং য়াবা অমসুং অকোইবগী ফীভম ঙাক-শেন্নবা মতেং পাংবা অসিসু থৌদাং লৌবগী খুদমশিংনি। ঐখোয়না দিজিতেল পেমেন্তশিং তৌবা, অতোপ্পশিংদা মসিগী মতাংদা খংহনবা অমসুং ত্রেন তৌবদা ঐখোয়গী থৌদাং ঙাক্না চৎলি। ঐখোয়না লমদম অসিদা শাজবা পোত্থোক অমা লৈবা অমসুং ভোকেল ফোর লোকেল ওইবা মতমদা ঐখোয়গী থৌদাং পাংথোক্লে। ঐখোয়না আত্মানির্ভর ভারত কেম্পেন্দা পুক্নিং থৌগৎপা মতমদা ঐখোয়গী  থৌদাং পাংথোক্লবনি। ঙসি, ভারতনা দোলর বিলিয়ন ৪০০ হায়বদি লুপা করোর লাখ ৩০রোম ওইবা প্রদক্তশিং এক্সপোর্ত তৌবগী অনৌবা রেকোর্দ অমা থম্বা ঙমখিবা অসিদা ঐহাক্না নুংঙাইবা পোকই। ভারতকী এক্সপোর্তশিং হেনগৎলক্লিবা অসি ঐখোয়গী ইন্দস্ত্রী, ঐখোয়গী এম.এস.ই.শিং, ঐখোয়গী মেন্যুফেকচরিং কেপাসিতী, ঐখোয়গী এগ্রীকলচর সেক্তরগী মপাঙ্গল হেনগৎলকপগী খুদম অমনি।

মরুপশিং,

ভারতমচা খুদিংমক্না মখোয়গী থৌদাংশিংদা অহানবা মীৎয়েং থম্লবা, মদু পুক্নিং চংনা ইল্লবা মতমদা, ভারতনা মাংলোমদা চংশিনবদা খুদোংথিবা অমত্তা মায়োক্নরোই, কনাগুম্বা অমত্তনা মাংলোমদা চংশিনবদা থিংবা ঙম্লোই। করিগুম্বা ঐখোয়না ঐখোয়গী অকোইবদা য়েংলবদি, নহা লাখ কয়া, নুপী লাখ কয়া, ঐখোয়গী অঙাং, ঐখোয়গী ইমুং মনুংশিংনা মসিগী সেন্স ওফ দ্যুতী অসিদা হিংলি। করিগুম্বা মসিগী ৱাখল্লোন অসি ভারত মচা খদিংমক্কী লমচৎ অমা ওইরক্লবদি, ভারতকী তুংলমচৎ অসি মশেক মঙাল লৈরবা অমা ওইরক্কনি। করিগুম্বা ঐহাক্না শৈরেং ইবা মুকুন্দ দাস জীগী ৱারোলদা হায়রবদি, ‘বোঙ্গো ভুমে  বোঙ্গো ভুমে, বোঙ্গো ভুমে বোঙ্গো ভুমে, ভারতভুমে জেগেছে আজ ভারতবাশি আর কি মানা সোনে, লেগেছে আপোন কারে, জার জা নীছে মোনে”। ভারতকী প্রজাশিংগী মসিগী ৱাখল্লোন অসি অকনবা মওংদা মখা চত্থবা ওইরসনু, নীংতম লান্মীশিংগী থৌনানা মতম পুম্বদা ঐখোয়বু ইথিল পীবা ওইরসনু, মসিগা লোয়ননা ঐহাক্না বিপ্লোবী ভারত গেলরীগীদমল নখোয় পুম্নমকপু য়াইফ-পাউজেল পীজরি! ভন্দে মাতরম! থাগৎচরি!

*******