অফঘানিস্তান্দগী লাকপা সিখ-হিন্দু খুন্নাইগী মীওইশিংগা প্রধান মন্ত্রী, শ্রী নরেন্দ্র মোদীগা ঙসিগী অঙনবদা ৭ লোক কলয়ান মার্গতা উন্নখ্রে। মখোয়না প্রধান মন্ত্রীবু ইকায় খুম্নবা উৎলদুনা সিখ অমসুং হিন্দুগী মীওইশিংবু অফঘানিস্তান্দগী ভারত্তা তেক্ত-কায়দনা পুবীরকপগীদমক্তা থাগৎপসু ফোংদোকখি।

প্রধান মন্ত্রীনা দেলিগেৎ অসিবু তরাম্না ওক্লদুনা মখোয় অসি মশামক্কী ময়ুমদা লাকপা মীথুংলেন নত্তে অমসুং ভারত অসি মখোয়গী ময়ুম্নি হায়না ফোংদোকখি। মখোয়না অফঘানিস্তান্দা থেংনখিবা খম থেংবা খুদোংচাদবা কয়া অমসুং মখোয়বু ভারত্তা তেক-কায়দনা পুরক্নবগীদমক্তা ভারত সরকারনা তেংবাংখিবগী মতাংদা মহাক্না ৱাফম থমখি।  হীরম অসিগা মরী লৈননা, মহাক্না সিতিজনশিপ এমেন্দমেন্ত এক্ত (সি.এ.এ.)কী মরু ওইবগী মতাং অমসুং মসিনা খুন্নাইদা পীগদবা কান্নবগী মতাংদসু ৱাফম থমখি। মহাক্না তুংগী মতমদসু খুদোংচাদবা অমসুং অৱাবা কয়াগী ৱারোইশিন পুরক্নবা লেপ্তনা তেংবাংগনি হায়বগী থাজবা খুন্নাই অসিদা পীখি।

গুরু গ্রন্থ সাহিবকী চৎনবীবু ইকায় খুম্নবগী তঙাই ফদবা লৈবা অমসুং মসিনা মরম ওইরগা গুরু গ্রন্থ সাহিবকী স্বরুপ্পু অফঘানিস্তান্দগী ভারত্তা তেক্ত-কায়দনা পুরক্নবগীদমক্তা তঙাই ফদনা শীন-লাঙখিবনি হায়না প্রধান মন্ত্রীনা ফোংদোকখি। চহি কয়া অসিদগী মহাক্না অফঘানশিংদগী ফংখিবা নুংশিবগী মতাংদা প্রধান মন্ত্রীনা পাউদম্লদুনা মহাক্না কাবুলদা চৎখিবগী মতাংদসু নৌহৌননা নীংশিংখি।

শ্রী মঞ্জিন্দর সিংহনা প্রধান মন্ত্রীবু খুন্নাই অসিবু তেক্ত-কায়দনা পুবীরক্নবগীদমক্তা ভারত্তগী মতেং থাবীরকখিবগীদমক্তা থাগৎপা ফোংদোকখি অমসুং মীওই অমত্তনা মখোয়গীদমক্তা লেপ্পীদবা মতমদা, প্রধান মন্ত্রীনা লেপ্তনা অমসুং মতম চানা তেংবাংবীখি হায়নসু ফোংদোকখি। দেলিগেৎ অসিগী অতোপ্পা মীহুৎশিংনা প্রধান মন্ত্রীবু অসিগুম্বা অৱাবা মতমদা মখোয়গীদমক্তা লেপ্পীবগীদমক্তা থাগৎপা ফোংদোকখি। গুরু গ্রন্থ সাহিবকী স্বরুপ্পু আফঘানিস্তান্দগী ভারত্তা তেক্ত-কায়দনা পুরক্নবা শীন-লাঙলে হায়না মহাক্না হায়বদা তাবা মতমদা মিৎলুদগী পী তাখি হায়না দেলিগেৎশিংনা ইকায় খুম্নবা উৎলদুনা ফোংদোকখি। মখোয়না প্রধান মন্ত্রীবু মখোয়গী খুন্নাইগী মীওইশিংদা কান্নবা কয়া ফংহনগদবা সি.এ.এ. পুবীরকপগীদমক্তসু ফোংদোকখি। মহাক অসি ভারত খক্তগী প্রধান মন্ত্রী নত্তে, মহাক্না মালেম শিনবা থুংবদা লৈরিবা হিন্দু অমসুং সিখশিংনা মরু ওইনা থেংনবা শিংনবা কয়াবু নীংথিনা খঙবীবা অমসুং অসিগুম্বা তাঞ্জা কয়াদা খুদক্কী ওইবা তেংবাং কয়া পীনবা হীরম খুদিংদা হোৎনবীবগীদমক্তা মহাকপু মালেমগী প্রধান মন্ত্রীনি হায়নসু মখোয়না ফোংদোকখি। কেন্দ্রগী মন্ত্রী, শ্রী হর্দীপ সিংহ পুরী অমসুং কেন্দ্রগী রাজ্য মন্ত্রী, মিস মীনাক্সী লেখিসু থৌরম অসিদা শরুক য়াখি।

*********