প্রধানমন্ত্রীগী লোইশঙ
পি.এম.না গোৱাদা গোৱা নিং-খা তমহনবা নুমিৎ পাংথোকপগী থৌরমদা শরুক য়াখ্রে
পি.এম.না ‘ওপরেসন বিজয়’গী নিংতম লান্মী অমসুং ভেতেরেনশিংগী মফমদা থাগৎ ৱাহৈ ফোংদোকখ্রে
“গোৱাগী মীয়াম্না নিং-খা তম্বা অমসুং স্বরাজকী ইহৌবু কৈদৌনুংদা খোঙজেল হন্থহনখিদে। মখোয়না নিংতম্বগী মৈরীবু ভারতকী পুৱারীদা খ্বাইদগী শাংনা চাকহন্দুনা থমখি”
“ভারত অসি লৈবাক্না ‘ইশাগী হায়বা ৱাফম”দগী হেন্না ৱাংনা থম্বা ইথিল অমনি অমসুং মসিবু খ্বাইদগী মরু ওইনা লৌই। মসিদা “লৈবাক্না অহানবদা” হায়বা মন্ত্রা অমখক লৈ। মসিদা ৱারেপ অমখক লৈ – এক ভারত, শ্রেস্থ ভারত”
“সর্দার পতেলনা করিগুম্বা চহি খরা হেন্না শাংথনা হিংলম্লবদি, গোৱানা নিং-খা তম্বগীদমক্তা মতম শাংনা ঙাইরম্লোই”
“লৈঙাকপগী থৌওং খুদিংদা খ্বাইদগী মরু ওইবা পীবসিনা রাজ্যসিগী অনৌবা শক্তাক্নি। মফম খরদা থবক হৌবা নত্ত্রগা থবক চত্থদুনা লৈবা মতমদা, গোৱানা থবকশিং লোইশিল্লি”
পি.এম.না পোপ ফ্রান্সিসকা উন্নখিবা অমসুং মহাক্না ভারতকী তোঙানবগী মগুন চেনবা অমসুং মতিক লৈবা গনতন্ত্রবু পামজববু নীংশিংখি
“লৈবাক অসিনা মনোহর পরিকারদা গোৱাগী পুকচেল শেংবা, হৈ-শিংবা অমসুং নিংহন্নবা লৈতবগী মগুনগী মমি তাবা উখি”
Posted On:
19 DEC 2021 5:18PM by PIB Imphal
প্রধান মন্ত্রী, শ্রী নরেন্দ্র মোদীনা গোৱাদা গোৱা নিং-খা তমহনবা নুমিৎ পাংথোকপগী থৌরমদা শরুক য়াখ্রে। প্রধান মন্ত্রীনা থৌরম অসিদা ‘ওপরেসন বিজয়’গী নিংতম লান্মী অমসুং ভেতেরেনশিংগী মফমদা থাগৎ ৱাহৈ ফোংদোকখ্রে। মহাক্না নৌনা শেমজিল্লবা ফোর্ত অগুৱাদা জেল ম্যুজিয়ম, গোৱা মেদিকেল কোলেজগী সুপর স্পিসিএলিতী ব্লোক, খা গোৱাগী অনৌবা দিস্ত্রিক্ত হোস্পিতাল, মোপা এয়রপোর্ত্তা লৈবা এভিএসন স্কিল দিভেলপমেন্ত সেন্তর অমসুং মারগাওগী দাবোলিম-নাভেলিমদা লৈবা গ্যাস ইন্স্যুলেতেদ সবস্তেসন য়াওনা চাউখৎ-থৌরাংগী প্রোজেক্ত কইয়া শঙ্গাখি। মহাক্না গোৱাদা লৈবা বার কাউন্সিল ওফ ইন্দিয়া ত্রস্তকী ইন্দিয়া ইন্তর্নেস্নেল য়ুনিভর্সিতী ওফ লিগেল এজুকেসন অমসুং রিসর্চকী উরেপ উয়ুংসু তমখি।
প্রধান মন্ত্রীনা মীতিন অদুদা ৱা ঙাংবদা গোৱাগী লমদম, হৱা- নুংশিৎ, সমুদ্র অসি মহৌশাগী নীংথরবা খুদোলনা থৌজাল্লি হায়না ফোংদোকখি। অদুগা ঙসিদি, গোৱা মীয়ামগী থৱাই য়াওবগী ইথিলনা গোৱানা নিং-খা তম্লিবা অসিদা হেন্না চাউথোকচবা পোকহল্লি। মহাক্না অজাদ মৈদান্দা লৈরিবা শহীদ মেমোরিএলদা অথৌবশিংগী মফমদা ইকায় খুম্নবা উৎপগী খুদোংচাবা ফংজরে হায়না ফোংদোকখি। মহাক্না মিরামারদা সেল পেরেদ অমসুং ফ্লাই পাস্তপুসু য়েংখি। মহাক্না লৈবাক্কী মগুৎ শিন্দুনা ‘ওপরেসন বিজয়’গী অথৌবশিংগী মফমদা ইকায় খুম্না উৎপা ফংজবদসু নুংঙাইবা ফাওই হায়না ফোংদোকখি। প্রধান মন্ত্রীনা গোৱানা ঙসি পুরক্লিবা খুদোংচাবা অমসুং নুংঙাইরবা থৌওং কয়াবু পীবা ঙমহল্লিবা গোৱাগী মতিক লৈরবা ইথিলবুসু থাগৎপা ফোংদোকখি
ভারতকী অয়াম্বা মফম্না মুঘলশিংগী মখাদা লৈখিবা মতমদা গোৱানা পোর্তুগীজশিংগী মখাদা লৈখিবনি হায়না প্রধান মন্ত্রীনা পনখি। ভারতনা মসিগী মতুংদগী ইহৌ কইয়া উবা ফংখি। শক্তি শিনখ্রবা মতুংগী চহি চা কয়াদা গোৱানা ভারতকী শরুক ওইবগী ইথিল কৈদৌনুংদা কাওখিদে অমসুং ভারতকী অতোপ্পা লমদমশিংনসু গোৱাবু কৈদৌনুংদা কাওখিদে হায়না প্রধান মন্ত্রীনা ফোংদোকখি। মসিদি মতমগী মতুং ইন্না মপাঙ্গল অদুমক কনখৎলকখিবা মরী অমনি। গোৱাগী মীয়াম্না নিং-খা তম্বা অমসুং স্বরাজকী ইহৌবু কৈদৌনুংদা খোঙজেল হন্থহনখিদে। মখোয়না নিংতম্বগী মৈরীবু ভারতকী পুৱারীদা খ্বাইদগী শাংনা চাকহন্দুনা থমখি। মসিগী মরমদি, ভারত অসি রাজনিতীগী শক্তিখক ওইবনা নত্তে। ভারত হায়বসিদি মীওইবা খুন্নাইগী অনীঙবা-অপাম্বা ঙাক শেন্নবগীদমক্তা লৈবা ৱাখল্লোন অমসুং ইমুং-মনুং অমনি। ভারত অসি ‘ইশাগী হায়বা ৱাফম”দগী লৈবাক্না হেন্না ৱাংনা থম্বা ইথিল অমনি অমসুং মসিবু খ্বাইদগী মরু ওইনা লৌই। মসিদা “লৈবাক্না অহানবদা” হায়বা মন্ত্রা অমখক লৈ। মসিদা ৱারেপ অমখক লৈ – এক ভারত, শ্রেস্থ ভারত, হায়না প্রধান মন্ত্রীনা ফোংদোকখি।
ভারত শিনবা থুংবগী মীয়ামগী থম্মোইনুংদা লৈবাক্কী শরুক অমসুং লৈবাক মীয়াম খরদি নিং-খা তমদ্রি হায়বা ৱাফম অসিনা মরম ওইরগা য়াম্না নুংঙাইতবগী ফিভম অমা লৈরম্মি হায়না প্রধান মন্ত্রীনা ফোংদোকখি। সর্দার পতেলনা করিগুম্বা চহি খরা হেন্না শাংথনা হিংলম্লবদি, গোৱানা নিং-খা তম্বগীদমক্তা মতম শাংনা ঙাইরম্লোই হায়না মহাক্না পাউদমখি। প্রধান মন্ত্রীনা ইহৌ অসিগী অথৌবশিংগী মফমদা ইকায় খুম্নবা উৎখি। গোৱা মুক্তি বিমোচন সমিতীগী সত্যগ্রহদা সত্যগ্রহী ৩১গী মপুন্সি মাঙখি। অসিগুম্বা কত্থোকপশিং অমসুং বীর কর্নেল সিংহ বেনিপালগুম্বা পঞ্জাবকী অথৌবশিংগী মতাংদা মীয়াম্না খন্থনবা প্রধান মন্ত্রীনা হায়খি। “গোৱাগী নিং-তম ইহৌগী পুৱারী অসি ভারতকী ৱারেপকী খুদম অমখক ওইবা নত্তে, মসিদি ভারতকী অমত্তা ওইবা অমসুং নুংশি-চান্ননা লৈবগী হৌজিক-হৌজিক লৈরিবা ইথিলনি”, হায়না প্রধান মন্ত্রীনা ফোংদোকখি।
মহাক্না মতম খরগী মমাংদা ইতালী অমসুং ভেতিকান শহরদা চৎখিবা মতমদা পোপ ফ্রান্সিসকা উন্নবগী খুদোংচাবা ফংখিববু নীংশিংখি। পোপ্না ভারতকী মতাংদা লৈবা ৱাখল্লোন অসি খঙবদা য়াম্না নুংঙাইনীংঙাই ওইখি। প্রধান মন্ত্রীনা মহাক্কী মফমদা ভারত্তা লাক্নবা পাউজেল পীরম্বগী মতাংদা হায়খি। মদুদা পোপ্না পীরকখিবা পাউখুম্বু প্রধান মন্ত্রীনা নৌহৌনা নীংশিংখি, “মসিদি অদোম্না ঐহাক্কী মফমদা পীবা খ্বাইদগী চাউবা খুদোলনি” হায়না পোপ্না খুম্লকখি। পোপ্না ভারতকী তোঙানবগী মগুন চেনবা অমসুং মতিক লৈবা গনতন্ত্রবু পামজববু প্রধান মন্ত্রীনা পাউদমখি। সেন্ত ক্বীন কেতেভানগী শেংলবা অরিবা মতমগী পোৎলমশিংবু জোর্জিয়া সরকারদা খুৎশম্নখিবগী মতাংদসু প্রধান মন্ত্রীনা পাউদমখি।
প্রধান মন্ত্রীনা গোৱানা লৈঙাকপগী থৌওংদা খঙফম চেৎপগী ৱাফম পল্লদুনা গোৱাগী মহৌশাগী ফজবা অসিনা মফমসিগী তোঙানবা শক্তাক অমা মতম পুম্বদগী ওইদুনা লাক্লি অমসুং লমদমসিগী সরকারনা হৌজিক্তি গোৱাগী অনৌবা মশক্তাক অমবু মরা চেৎহল্লি হায়না ফোংদোকখি। মফম খরদা থবক হৌবা নত্ত্রগা থবক চত্থদুনা লৈবা মতমদা, গোৱানা থবকশিং লোইশিল্লি। রাজ্যসিবু অহাঙবদা মপান্থোং ওইশিনবা থিংবা, তীকা থাবা, “য়ুম্থোং খুদিংদা ঈশিং ফংহনবা”, পোকপা অমসুং শিবগী রেজিস্ত্রেসন তৌবা অমসুং মীয়ামগী পুন্সি মহিং নুংঙাইহন্নবা অতোপ্পা স্কিমশিংগী মতাংদা গোৱানা নীংথিজনা থবক পাংথোকপগী খুদমশিংবু প্রধান মন্ত্রীনা মীয়ামদা তাকখি। মহাক্না স্বয়ম্পুর্না গোৱা অভিয়ানগী থবক তৌবগী মতৌবু থাগৎখি। রাজ্যসিগী লৈঙাকপগী মাই-পাকপশিং অসিগীদমক্তা মহাক্না গোৱাগী মুখ্য মন্ত্রী অমসুং মহাক্কী কাংবুশিংবু থাগৎখি। রাজ্যসিগী তুরিজম্বু হেন্না খুমাং চাইশিলহন্নবগীদমক্তা পায়খৎলিবা খোঙথাং কয়াগী মতাংদসু প্রধান মন্ত্রীনা ৱাফম থমখি। রাজ্যসিনা হন্দক্তা লোইশিনখিবা ইন্তর্নেস্নেল ফিল্ম ফেস্তিবেল ওফ ইন্দিয়াবু মাই পাক্না পাংথোকখিবগীদমক্তা রাজ্যসিবু থাগৎপা ফোংদোকখি।
প্রধান মন্ত্রীনা লৈখিদ্রবা শ্রী মনোহর পরিকারগী মফমদা ইকায় খুম্নবা উৎখি। “ঐহাক্না গোৱাগী মাই-পাকপশিং উবা মতমদা, অসিগুম্বা অনৌবা শক্তাক অসি মপাঙ্গল হেন্না লৈবা উবা ফংই। ঐহাক্না মরুপ মনোহর পরিকারবুসু নীংশিংলি। মহাক্না গোৱাবু চাউখৎপগী অনৌবা থাক্তা পুখৎলম্বতা নত্তনা, গোৱাগী তৌবা ঙম্বগী মতিকপুসু পাকথোক চাউথোকহল্লমখি। মীওই কম্না মহাক্কী অরোইবা মিৎকুপ ফাওবদা রাজ্যগীদমক্তা অমসুং মসিগী মীয়ামগীদমক্তা লেপ্তুনা করম্না লৈবা ঙম্লম্লিবনো?”, হায়না মহাক্না ফোংদোকখি। লৈবাক অসিনা মনোহর পরিকারদা গোৱাগী পুকচেল শেংবা, হৈ-শিংবা অমসুং নিংহন্নবা লৈতবগী মগুনগী মমি তাবা উবা ফংই হায়রদুনা মহাক্কী ৱারোল লোইশিনখি।
***
(Release ID: 1783338)
Visitor Counter : 203
Read this release in:
English
,
Urdu
,
Marathi
,
Hindi
,
Assamese
,
Bengali
,
Punjabi
,
Gujarati
,
Odia
,
Tamil
,
Telugu
,
Kannada
,
Malayalam