প্রধানমন্ত্রীগী লোইশঙ
প্রধান মন্ত্রীনা বেঙ্ক দিপোজিৎ ইন্স্যুরেন্স থৌরমদা দিপোজিতরশিংদা থমখিবা ৱারোল
Posted On:
12 DEC 2021 4:43PM by PIB Imphal
ফম্বাক্তা লেংশিনবীরিবা শেল-থুম মন্ত্রীজী, কেন্দ্রগী শেল-থুম মন্ত্রীজী, আর.বি.আই.গী গবর্নর, নাবার্দকী চেয়র্মেন, দিপোজিৎ ইন্স্যুরেন্স অমসুং ক্রেদিৎ গেরেন্তী কোর্পোরেসন অমসুং লৈবাক্কী বেঙ্ককী ব্রাঞ্চশিংগী মীওইশিং, তোঙান-তোঙানবা রাজ্যশিংগী মফম কয়াদগী লেংশিনবীরক্লিবা মন্ত্রী পরিশদকী ঐহাক্কী মরুপশিং, মখোয়গী মফমগী এম.পি. অমসুং মফমশিংদা লৈরিবা দিপোজিতরশিং অমসুং ঐহাক্কী নুংশীরবা ইচিল ইনাওশিং!
ঙসি অসি বেঙ্কিং সেক্তর অমসুং বেঙ্ক একাউন্ত হাংবা লৈবাক্কী মীওই করোর কয়াগী ওইনা য়াম্না মরু ওইবা নুমিৎনি। দিকেদ কয়াদগী লৈরক্লবা শিংনবা অমগী ৱারোইশিন করম্না পুরকখিবগে হায়বসি ঙসিগী নুমিৎনা শাখি ওইরগনি। ঙসিগী থৌরম অসিগী থোনখ্রিবা মমিংদা “দিপোজিতর ফর্স্ত” অসিদা শেল থম্বশিংগী ৱাখল্লোনবু খ্বাইদগী অহানবদা থম্লগা শেমখিবনি। হৌখিবা নুমিৎ খরনিদা, দিপোজিতর লাখ ১ হেনবনা চহি কয়াদগী চপ্তুনা লৈরুরবা শেল ফংনখ্রে। শেনফম অসি পুন্না লুপা করোর ১৩০০দগী হেনবনি। ঙসিগী থৌরম অসিগী মনুংদা অমসুং মসিগী মতুংদা দিপোজিতর লাখ ৩গী বেঙ্কতা চপ্তুনা লৈখ্রবা শেনফমশিং ফংলগনি। মসিদি য়াম্না অরায়বা ৱা নত্তে, অদুনা ঐহাক্কী লৈবাক্কী মিদিয়াগী ইচিল-ইনাওশিংদা ঐহাক্না করিগুম্বা খরা হায়জনীংই। ঐহাক্না থেংনখিবগী মতুং ইন্না, স্বছতা অভিয়ান পাংথোক্লিঙৈ মতমদসু, ঐহাক্কী মিদিয়াগী মরুপশিংদা ঐহাক্না হায়জখিবগী মখা পোন্না, ঐহাক্কী মতেং পাংবীরি। ঐহাক্না ঙসিসু করিগুম্বা খরা হায়জগে। বেঙ্ক অমা লুপখিবা মতমদা নুমিৎ কয়া অমা তিভিদা, পাউচেদা মরী লৈনবা ই-পাউনা ৱাই চাই। থৌদোক অসিনসু মখল অমনি। চাউর-চাউরবা হেদলাইন ওইরিবনি। মহৌশানা তাবনি। লৈবাক অসিনা ঙসিদি অচৌবা শেমদোকপা অমা পুরক্লে, য়াম্না কান্নবা খুদোংচাবা অমা হৌদোক্লে। দিপোজিতরশিংদা মখোয়গী শেল হন্দোক্লি। মসিগী মতাংদা অদোম্না পাউ য়াম্না ফোংহন্নীংই। হঞ্জিন হঞ্জিন্না তমহন্নীংই। মোদীনা পাংথোকপনি হায়বগী নত্তেকো। অশেংবা মরমদি, দিপোজিতরশিংদা থাজবা লৈহন্নবনি। মীওই খরগী অশোইবদগী নত্ত্রগা মপুকচেল শেংদবদগী বেঙ্ক মুৎপা য়াই, অদুবু দিপোজিতরশিংগী শেলদি মাঙলরোই। মখোয়গী শেলশিং তেক্ত কায়দনা লৈরগনি। মসিগী ৱাফম অসিনা লৈবাক্কী দিপোজিতরশিংদা থাজবা পোকহনগনি। বেঙ্কিং পথাপ্তা থাজবা লৈহনগনি। মসি য়াম্না মরু ওইবনি।
ইচিল ইনাওশিং,
মতম চাবা ৱারোইশিন পুরকপগী থৌওংনা লৈবাক অমনা শিংনবা অমনা অচৌবা শিংনবা ওইরকপদগী কলহৌবা ঙম্মি। মসিদি অদোম্নসু নীংথিনা খঙলবনি। অচৌবা শিংনবদি নাথৈদুনা চৎলু হায়বা মতম কুইনদগী চৎনরক্লবা চৎনবী অমা ঐখোয়গী মফমদা লৈ। মদুবু নমশিন্দুনা অদুমক থম্মু খন্নৈ। ঙসিগী অনৌবা ভারতনা শিংনবগী ৱারোইশিন পুরকপা পাম্মি অমসুং হোৎনৈ, ঙসিগী ভারতনা শিংনবদগী নাথৈদুনা চেন্দে। বেঙ্ক অমনা অৱাবা তাবা মতমদা দিপোজিতরশিংনা মশাগী শেল পীথোকপগী হৌনবী লৈরম্মি, শেল অসিদি দিপোজিতরশিংগীনি। মখোয়না মশাগী শেল অমুক হন্না ফংবা অসি ওইথোকপগী মওং লৈরমদে। খুদোংচাদবা কয়া মাইয়োক্নরম্মি। মাইকৈ খুদিংদা মসিগী পাউনা ৱাই চাইনরম্মি। মসিনা মহৌশানা তাবা থবক অমসু ওইরম্মি। মীওই খুদিংনা য়াম্না থাজবগা লোয়ননা বেঙ্ক শেল থমজিন্নৈ। অকক্নবা তোলোব ফংবা মিদ্দল ক্লাসকী মীওই অয়াম্বনা অসুম্না শেল তুংশিন্নৈ। মখোয়গী পুন্সিদদি বেঙ্ক খক্তনা মখোয়গী শেল তুংশিনফম্নি। অদুবু মীওই খরগী অশোইবদগী বেঙ্কনা করিগুম্বা লুপ্পা মতমদা, মখোয়গী শেল চপ্পদা নত্তনা পুন্সি ফাওবা লুপ্পগী ফিভম তারিবনি। পুন্সি অসে পুংমম মমখিবগুম্না খন্নৈ। হৌজিক্তি ক্রি তৌগনি? ইচা-ইশুশিংগী কোলেজকী ফী থীগদবনি- কদাইদগী থীগনি? ইচা লুহোংগদবনি – কদাইদগী লুহোংগনি? অহল লাইয়েংগদবনি – কদাইদগী করিনা লাইয়েংগনি? শেল কদাইদা লৌরুগনি? অসিগুম্বা ফিভম অসি করম্না লাক্লিবনো? হৌজিক্তি করি তৌগনি? অসুম্না খন্নবা ঙাক্তনি। ৱাহংশিং অসিগী পাউখুম হান্নদি লৈরমদে। বেঙ্কতগী মশা শেল লৌথোক্নবা হোৎনবদা চহি কয়া চঙনখিবা ঙাক্তনি। ঐখোয়গী লাইরবা ইচিল-ইনাওশিং, মিদ্দল ক্লাসকী মরুপশিংনা দিকেদ কয়াদগী অসিগুম্বা শিংনবা কয়া থেংনদুনা লাক্লিবনি। কো-ওপরেতিব বেঙ্ককী মতাংদা ওইরগনা ৱাফম অসি হেন্না লুশিল্লি। তোঙান-তোঙানবা মফমদগী ঙসিগী থৌরম অসিদা শরুক য়ারিবা মীওইশিংনা হায়রিবা থৌদোকশিং অসি থেংনখ্রবা ঙাক্তনি, নীংথিনা খঙলবনি। ঐখোয়গী সরকারনা অসিগুম্বা ফিভমশিং অসি হোংদোক্নবগীদমক্তা য়াম্না নীংথিনা খন্নদুনা ৱারেপ লৌরে, আইন্দা শেমদোকপা পুরক্লে। ঙসিগী থৌরম অসি হায়রিবা ৱারেপশিং অদুগী মহৈনি। ঐহাক্না মুখ্য মন্ত্রী ওইবা মতমদা বেঙ্কশিংদা অসিগুম্বা থৌদোক খরা থোকখিবা ঐহাক্না হৌজিকসু নীংশিংলি। মতমদুদা ঐখোয়বু মীয়াম্না কোইতান তান্নবনি। মসিদি ভারত সরকার নত্ত্রগা মরী লৈনবা বেঙ্কশিংনা থেংনদুনা লোইশিনগদবা ৱাফম্নি, অদুবু মখোয়না তাইনবদি মুখ্য মন্ত্রী খক্তনি। ঐখোয়গী শেলগী মরমদা থবক খরা পায়খৎপীয়ু হায়রকপশিংদা ঐহাক্না মতমদুদা য়াম্না ৱাখি অমসুং মখোয়গী অৱাবশিংসু মহৌশানা তাবা ঙাক্তনি। মতমদুদা ভারত সরকারদসু হঞ্জিন-হঞ্জিন্না হায়জদুনা তকশিল্লমই। লুপা লাখ ১গী শেনফমদগী হেনগত্তুনা লুপা লাখ ৫ য়ৌহনগদবনি, মসিনা অয়াম্বা ইমুংশিংবু ঐখোয়না তেংবাংদুনা নুংঙাইহনবা ঙমগনি। অদুবু ঐহাক্না হায়জবশিং অমত্তা তাবীরমদে। মখোয়না তৌদ্রবনিনা মীয়াম্না ওইনা তৌরে, ঐহাকপু মফমসিদা থাবীরক্লে। অদুগা ঐহাক্না হৌজিক্তি তৌদুনা উৎলে।
মরুপশিং,
ইং ৬০গী দিকেদতগী হৌদুনা ঐখোয়গী লৈবাক্কী বেঙ্কসিংদা দিপোজিতরশিংগী শেল ইন্স্যুরেন্স তৌবগী থৌওং লৈবা হৌখ্রবনি। থৌওং অসি হৌজিক চাউরাক্না চহি ৬০দি হৌখ্রে। মমাংদদি, বেঙ্কতা হাপখিবা শেনফমশিংদগী শুপ্নগী লুপা লিশিং ৫০ ফাওবতং ফংবগী গেরেন্তী লৈ। মসিবু হেনগৎহন্দুনা, লুপা লাখ ১ য়ৌহনখি। মসিনা হায়বদি, করিগুম্বা বেঙ্ক অমনা লুপ্পা মতমদা, দিপোজিতরনা থমখিবা শেলশিংদগী শুপ্নগী লুপা লাখ ১খক ফংগনি হায়বনি। অদুবু, মদু করম্বা মতমদা ফংগনি হায়বগী শোইদবা নত্ত্রগা অকক্নবা লৈরমদে। চহি ৮-১০ ফাওবদি, মসিগী ৱারোইশিন অমত্তা লৈরমদে। লাইরবা অমসুং মিদ্দল ক্লাস্কী মীওইশিংগী অৱাবা খঙদুনা ঐখোয়না হায়রিবা শেনফম অসি লুপা লাখ ১দগী হেনগত্তুনা লুপা লাখ ৫দা লেপ্লে। হায়বদি, হৌজিক্কী মতমদা বেঙ্ক অমনা লুপ্পা মতমদা, দিপোজিতরশিংনা লুপা লাখ ৫ ফাওবগী শেনফম হঞ্জিল্লক্লগনি। মসিগী খুদোংচাবা অসিনা চাউরাক্না মীওই ৯৮%কী একাউন্ত মপুং ফানা কোনশিনখ্রে। হায়বদি, ২%গী চাং খরতমক লেমহৌরে। মীওই ৯৮%কী শেল পুম্নমক কভর তৌরে হায়বনি। হৌজিক্কান্দি দিপোজিতরশিংগী মশিংসু য়াম্না হেনগৎলে। নিংতম্বগী ৭৫শুবা চহি চৎলি। অমৃত মহোতসব চৎলি। অদুগা ঐখোয়না হৌদোক্লিবা থৌওং অসিদগী নীওই করোর ৭৬কী শেলবু মপুং ওইনা ইন্স্যুর তৌরবনি। অসিগুম্বা খুদোংচাবা অসিদি চাউখৎপা লৈবাকশিংদা ফাওবা লৈতে।
মরুপশিং,
ঐখোয়না আইন্দা অনৌবা কাংলোন হাপচিন্দুনা, শেমদোক্তুনা শিংনবা অমগী ৱারোইশিন পুরক্নবা হোৎনবনি। শেল হন্দোরকপগী মমাংদা অকক্নবা মতম লৈরমদবদু ঐখোয়গী সরকারনা নুমিৎ ৯০ (থা ৩)গী মনুংদা ফংহনগনি হায়বগী আইন শেমখ্রবনি। হায়বদি, মসিগী দাইত্ব খুদিংমক ঐখোয়না ইশাদা পীশিঞ্জরে হায়বনি। মসিনা তাকপদি, ঐখোয়না লৈবাক্কী লাইরবা, মিদ্দল ক্লাস অমসুং মীচম মীয়ামগীদমক্তা খল্লি হায়বনি। আইন্দা শেমদোকপগী নুমিৎ ৯০গী মনুংদা দিপোজিতর লিশিং কয়াগী ক্লেম পীথোকখিবা অসিদসু ঐহাক্না য়াম্না নুংঙাইবা ফাওই।
মরুপশিং,
ঐখোয়না লৌশিং লৈবা, ৱাখল্লোন লুবা ৱাফম কয়াবু ইশা-ইশাগী হৈনবী মওংদা ফোংদোক্নৈ। ঐহাকসু ইশাগী অচম্বা মওংদা ফোংদোকচৈ। লৈবাক খুদিংমক্না চাউখৎপা পাম্মি, নুংঙাই য়াইফবা পাম্মি। অদুবু ঐখোয়না নীংশিংগদবা ৱাফম অমা লৈ। লৈবাক চাউখৎপদা বেঙ্ককী অচৌবা থৌদাং লৈ। বেঙ্ক চাউখৎহন্নবগীদমক্তা দিপোজিতরশিংগী শেল তেক্ত কায়দনা থম্বগী চপ মান্নবা মরু ওইবা লৈ। ঐখোয়না বেঙ্ক কনগে হায়রবদি, দিপোজিতরশিংবু শেল ঙাক শেন্দুনা থম্বগী তঙাই ফদবা লৈ। ঐখোয়না থৌওং অসিমক পাংথোক্তুনা বেঙ্কসু কনবীরে, দিপোজিতরশিংবুসু কনবীরে। ঐখোয়গী বেঙ্কশিং অসি দিপোজিতর অমসুং শেন্মিৎলোনগী থাজবগী মঙালনি, মৈরীনি। মসিগী থাজবা অসিবু মপাঙ্গল লৈহন্নবগীদমক্তা ঐখোয়না হৌখিবা চহি খরদগী লেপ্তনা হোৎনদুনা লাক্লি। অপীকপা পব্লিক সেক্তর বেঙ্কশিংনা চহি খরা অসিদা অচৌবা বেঙ্কশিংগা পুন্সিন্নদুনা মখোয়গী মপাঙ্গল, মতিক অমসুং নুং-পান ফাওনা উবগী মগুন অসি হীরম খুদিংমক্তা ফগৎহনখ্রবনি। আর.বি.আই.না কো-ওপরেতিব বেঙ্কশিং য়েংশিনবা মতমদা বেঙ্কশিং অসিদা মীচম দিপোজিতরশিংনা থাজবা থম্বা হেনগৎলি। ঐখোয়না কো-ওপরেতিবকী অনৌবা খুদোংচাবা শিল্লে, অনৌবা মন্ত্রালয় শেম্লে। কো-ওপরেতিব সংস্থানশিংবু মপাঙ্গল লৈহন্নবগীদমক্তা থৌওংশিং অসি পান্দম্নি। কো-ওপরেতিব মন্ত্রালয়গী মওংদা কান্নবা খুদোংচাবা কয়া শেম্বা অসিদগী কো-ওপরেতিব বেঙ্কশিংসু মপাঙ্গল য়াম্না লৈরগনি।
মরুপশিং,
বেঙ্ক অসি শেল য়াম্না পায়বা মীওইশিংগীদমক্নি হায়বা ৱাফম কয়া দিকেদ কয়াদগী চৎনদুনা লাক্লি। শেল য়াম্না লৈবা মীওইশিং খক্তনা শেল হাপচিনবনি। কারবার চাউনা তৌবা মীওই খক্তনা অথুবা মতমদা লোন ফংই। পেন্সন অমসুং ইন্স্যুরেন্সকুম্বা খুদোংচাবশিং ফাওবা মখোয়গীদমক্তা শিন লাঙবনি হায়বা ফাওবা খন্নরম্মি। অসিগুম্বা ৱাফম অসি মালেম খ্বাইদগী চাউবা গনতন্ত্র চৎপা লৈবাক্কী ওইনা অফবা ৱাফমদি নত্তে। অসিগুম্বা খুদোংচাবা অমসুং ৱাখল্লোন অসি অফবা নত্তে। মসিবু শেমদোক্নবগীদমক্তা ঐখোয়না লেপ্তনা হোৎনদুনা লাক্লি। ঙসিদি, লৌমী, অপীকপা দুকান ফম্বা, লৌমী, য়ুম-কৈ শাবা অমসুং মীগী য়ুমদা থবক তৌবা মীওইশিং ফাওবদা পেন্সনগী খুদোংচাবগা মরী লৈনহল্লে। লৈবাক্কী লাইরবশিংনা লুপা ২ ফাওবগী এক্সিদেন্ত অমসুং লাইফ ইন্স্যুরেন্স কভরেজ লৈনরে। পি.এম. জীবন জ্যোতী বিমা অমসুং পি.এম. সুরক্সা বিমা য়োজনাগী মখাদা লৈবাক-মীয়াম চাউরাকপা করোর ৩৭ অসি হায়রিবশিংগী মনুং চল্লবনি। হায়বদি, লৈবাক্কী শেল-থুমগী সেক্তর অমসুং বেঙ্কিং সেক্তর অসি মওং অমদা গনতন্ত্রগী থৌওং চেল্লে হায়বনি।
মরুপশিং,
ঐখোয়গী শিংনবশিং অসি বেক একাউন্ত খক্তগী নত্তে, খ্বাইদগী মনুং হঞ্জিনবা মফমশিংদা বেঙ্ককী সেবা য়ৌহনবা অসিসু অমা ওই। বেঙ্ক ব্রাঞ্চ অমগী খুদোংচাবা নত্ত্রগা বেঙ্ককা পাউ ফাওনবগী খুদোংচাবা অসি ঙসিদি লৈবাক্কী খুঙ্গং অয়াম্বা খুদিংগী কিলোমীতর ৫গী অরাপ্পগী মনুংদা লৈরে অমসুং ফংলে। লৈবাক শিনবা থুংবদা ঙসিদি বেঙ্কিং তচ পোইন্ত চাউরাকপা লাখ ৮.৫ লৈরে। লৈবাক্কী বেঙ্কিং অমসুং শেল-থুমগী পথাপ্পু ঐখোয়না দিজিতেল ইন্দিয়াগী মখাদা অনৌবা মপাঙ্গল হাপ্লে। ঙসিদি, ভারতকী মীচম নাগ্রিক অমনা মফম-মতম অমা হেক্তদগী নোংমগী পুং ২৪গী মনুংদা দিজিতেলগী খুত্থাংদা খ্বাইদগী পীকপা ত্রাঞ্জেক্সন ফাওবা পাংথোকপা ঙম্লে। চহি খরগী মমাংদদি, ৱাফম অসিগী মতাংদা খনবদি লায়রদনা, ভারতকী তৌবা ঙম্বগী মতিক্তা থাজবা কাঙবুশিংবু করেক কথাইনরম্মিবনি।
মরুপশিং,
ঐখোয়গী সরকারনা বেঙ্ক অমসুং লৈবাক মীয়ামগী মপাঙ্গল হেনগৎহন্নবা লেপ্তনা হোৎনদুনা লাক্লি। থেলা গারী, লম্বীদা পোৎ য়োনবা অমসুং হোকরশিংনা বেঙ্কতগী লোন ফংগনি হায়বা ৱাফমসি হান্না খন্নরম্বনে? মখোয়নসু খল্লম্লোই অমসুং ঐখোয়নসু খনলমদে। অদুবু, ঙসিদি ঐহাক য়াম্না নুংঙাইরে। অসিগুম্বা মীওইশিংনা স্বনিধি স্কিমগী মখাদা বেঙ্ক লোন ফংদুনা মশাগী কারবার চাউখৎহন্নরি। ঙসিদি, মুদ্র য়োজনানা লৈবাক্কী মফম কয়াগী মখোয়গুম্বা ইমুংশিংদা থবক পীবগী থৌরাংগা মরী লৈনহল্লি অমসুং মখোয়না মসি ওইরক্কনি হায়বা কৈদৌনুংদা থাজবসু লৈরমদে। ঐখোয়গী লৈবাক্কী অপুনবা লৌমীগী মনুংদগী অপীকপা লম লৈজবা লৌমীনা ৮৫%গী শরুক ওই হায়বসি অদোম্না খঙলবনি। বেঙ্ক অসুক য়াম্না লৈরবসু, মখোয়না অতোপ্পা মীওইশিংদগী শেন্দোই ৱাংনা শেল পুবা তাই। ঐখোয়না অসিগুম্বা লৌমী করোর কয়াদা কিসান ক্রেদিত কার্দকী খুদোংচাবগা মরী লৈনহল্লে অমসুং য়েন-ঙানু অমদি ঙা য়োকপা মীওইশিংসু খুদোংচাবা অসিগী মনুং চনহল্লে। ঙসিদি, বেঙ্কতগী ফংলিবা করোর কয়াগী অরায়বা অমসুং অহোংবা লোনশিংগী মতেংদগী মরুপশিং অসিগী পুন্সিদা নুংঙাই য়াইফবা হায়বদু লাক্লে।
মরুপশিং,
মশিং য়াম্লবা লৈবাক মীয়াম্বু বেঙ্ক একাউন্ত হাংহনবা ওইরো, য়াম্না লায়না বেঙ্ক লোন ফংহনবা ওইরো, দিজিতেল পেমেন্তকী চৎনবীবু য়াম্না থুনা চৎনহনবা ওইরো, অসিগুম্বা শেমদোকপগী থৌওং কয়ানা চহি ১০০গী মনুংদা থোকপা খ্বাইদগী চাউবা অৱাবা মতমদা ভারতকী বেঙ্ককী পথাপ্পু নীংথিজনা অমসুং অয়েৎপা লৈতনা মথৌ তৌহনবা ঙম্বদা তেংবাংলি। অসিগুম্বা থৌওং অসিগীদমক্তা ঐহাক্না বেঙ্ককী মরুপ খুদিংবু থাগৎচনীংই, মখোয়না লুরবা মতমদা মীয়ামগী সেবা তৌবা লেপখিদে। মালেমগী চাউখৎলবা লৈবাক ফাওবনা মখোয়গী মীয়ামদা তেংবাংবদা লুনা থোকপা মতমদা, ভারতনা লৈবাক্কী কাঙলুপ খুদিংগী মীওইশিংদা হকথেংননা য়াম্না থুনা তেংবাংখি। ঐখোয়না হৌখিবা চহি খরসিদা, লৈবাক্কী বেঙ্কিং সেক্তরবু মপাঙ্গল লৈহনখ্রে, অসিগুম্বা ইশাদা থাজবা লৈবগী মতৌ অসিনা ঐখোয়না লৈবাক মীয়ামগী পুন্সি কন্নবগীদমক্তা অসিগুম্বা চাউরবা ৱারেপ লৌবা ঙমখ্রিবনি। ঐখোয়না লৈবাক্কী শেন্মিৎলোন্দা শেমদোকপা কয়াদি পুরক্লে, তুংগী মতমদসু অফবা ফিভম কয়া লাকপগী মওং অমসু ঐখোয়না উরে।
ইচিল ইনাওশিং,
ফাইনেন্সিএল ইনক্লুসন অমসুং ইজ ওফ এক্সেস তু ক্রেদিত কার্দকী খ্বাইদগী কান্নবা ফংবশিংদি ঐখোয়গী ইচল, ইমা অমসুং ইচানুপীশিংনি। লৈবাক্কী নিংতম্লবা মতুংগী দিকেদ কয়া ফাওবদা ঐখোয়গী অয়াম্বা ইচেল-ইচলশিংনা অসিগুম্বা কান্নবা ফংদনা লাকপসি লাইবক থীবনি। মখোয়শিংবু য়ুমদা নত্ত্রগা চাকখুমদা খক্তা নমশিন্দুনা থম্বগী চৎনবী লৈরম্মিবনি। মখোয়গী শেল তুংশিনফমদি চেঙ মরক্তা হাপ্পা অসিখক্নি, মসিদসু মখোয়না নুংঙাইবা ফাওরিবনি। অসিগুম্বা শেল তুংশিনবগী থৌওংবু ঙাক-শেন্নবগীদমক্তা শেমখিবা বেঙ্কশিংবু লৈবাক মীয়াম অয়াম্বনা শিজিন্নরমদে। মসি ঐখোয়গী ওইবা য়াম্না খঞ্জিনগদবা ৱাফম্নি। মসিগী ৱারোইশিন পুরকপদা জন ধন য়োজনাগী অচৌবা থৌদাং লৈ অমসুং মসিগী মাই পাকপসু ঐখোয়না উবা ফংলে। জন ধন য়োজনাগী মখাদা হাংবা বেঙ্ক একাউন্ত করোর কয়া অসিদগী তংখায় হেনবগী চাংদি ঐখোয়গী ইমা, অচল – নুপীশিংগীনি। মসিগী বেঙ্ক একাউন্তশিং অসিনা নুপীশিংগী শেল-থুমগী ফিভমদা অহোংবা য়াম্না লাক্লে। অফবা স্কিম অমা মীয়ামদা পীবা মতমদা, খুন্নাইদা খেন্নবা লৈরম্বশিং লৈহন্দনবা হোৎনবদা ঐখোয়দা মতেং য়াম্না ফংই। ইশাগী বেঙ্ক একাউন্ত লৈবদগী নুপীশিংগী মশাদা থাজবগী চাং য়াম্না হেনগৎলে, শেল-থুমগী ওইবা ৱারেপ লৌবগী মনুং চনবগী থবক্তসু য়াম্না চাউখৎলে। হৌজিক্তি, ইমুং অমনা ৱারেপ খরা লৌনবা মতমদা, নুপীশিংসু য়াওহল্লে, মখোয়গী অনীংবা অপাম্বসু তারে।
মরুপশিং,
মুদ্র য়োজনাগী মখাদসু চাউরাকপা ৭০%গী কান্নবদি নুপীশিংনা ফংলিবনি। নুপীশিংনা করিগুম্বা লোন ফংবা মতমদা, লোন শিংবগী ত্রেক রেকোর্দসু নুপীশিংগীনা য়াম্না হেন্না ফজৈ হায়বসি ঐখোয়না উবা ফংলে। য়ুমশকৈশা নুমিত্তা মখোয়গী লোন শিংবা অরৈবা নুমিৎ তারবদি, মখোয়না নিংথৌকাবা নুমিত্তা লাক্তুনা শিংদোক্লৈ। মতৌ অসুম্না, সেল্ফ হেল্প গ্রুপ অসি ইশাবু তেংবাংজবগী অমত্তা ঙাইরবা খুদম্নি, মসি য়াম্না ফজবা থৌওংনি। ঐখোয়গী ইমা-ইচেশিংনা শেল খরা-খরা তপ্না তুংশিল্লি। মীপুম খুদিংনা হোৎনবদগী, শরুক য়াবদগী, শেল-থুমগী ফিভমদা মপাঙ্গল হাপ্পগী খোংজং অসি খোঙজেল য়াঙনা মাংজিল থারি। অদুগা, ঐখোয় পুন্না মসিবু চাউখৎহনগদবনি।
মরুপশিং,
ভারতকী বেঙ্কিং সেক্তরনা লৈবাক্কী অপাম্বা ফংহনবগীদমক্তা হান্নদগী হেনবা ফজবা থবক পাংথোকপা হায়বসি হৌজিক্কী মতমগী তঙাই ফদবনি। নিংতম্বগী অমৃত মহোৎসব অসিদা বেঙ্ক ব্রাঞ্চ খুদিংনা মখোয়না মমাংগী চহি ৭৫দা পাংথোকখিবা থবকশিংবু তুংদা থনমদুনা, মসিদগী শরুক অনি হেন্না নীংথিনা পাংথোকপগী পান্দমগা লোয়ননা মখা তানা চত্থগদবনি। মমাংদা থেংনখিবা থৌরমশিংনা মরম ওইদুনা, মখোয়না লোন পীবদা খঞ্জান্নরিবা অসিদগী থোক্লকপা মতম ওইরে। লৈবাক্কী মফম খুদিংগী মীয়াম্না মশাগী মঙলান মঙফাওননহন্নবগীদমক্তা বেঙ্কশিংগা মরী লৈনবা পাম্লে। অদোম্না মাং থানা থোক্লক্তুনা মীয়ামগী মতেং পাংলবদি, মীয়ামগী শেল-থুমগী ফিভম ফগৎলক্কনি অমসুং মসিদগী অদোমগী পাঙ্গল লৈবসু হেনগৎলকনি। অদোম্না অসুম্না হোৎনবনা লৈবাকপু মরোমদোম লেপচবা ঙমহনবদা, মিদ্দল ক্লাসকী নহাশিংনা মাং থানা থোক্তুনা চাউখৎহন্নবা হোৎনবদা তেংবাংগনি। বেঙ্ক অমসুং দিপোজিতরশিংগী থাজবনা অনৌবা থাক্তা য়ৌরগনি অমসুং ঙসিগী থৌরম অসিনা দিপোজিতর করোর কয়াদা অমুক হন্না থাজবা পীগদবা থৌওং অমা ওইরগনি। মসিদগী বেঙ্কশিংগী রিস্ক লৌবগী মতিকসু শরুক য়াম্না হেনগৎপা য়াই। অদুনা, মসিদি বেঙ্কশিং অমসুং দিপোজিতরশিংগী খুদোংচাবনি। অসিগুম্বা য়াইফরবা থৌরম অসিদা ঐহাক্না মীয়াম্বু অমুক হন্না থাগৎচরি।
***
(Release ID: 1780797)
Visitor Counter : 172
Read this release in:
English
,
Urdu
,
Marathi
,
Hindi
,
Assamese
,
Bengali
,
Punjabi
,
Gujarati
,
Odia
,
Tamil
,
Telugu
,
Kannada
,
Malayalam