ভারত ইমানা য়াইফরে! ভারত ইমানা য়াইফরে! ভারত ইমানা য়াইফরে!

ঐহাক্না শেংলবা লমদম অসিগী মফমদা থম্মোই শেংনা ইকায় খুম্নবা উৎচদুনা কোক নোঞ্জরি। ঙসিদি, ঐহাক্না অদি শক্তি ইমা পাতেশ্বরীগী লমদম অমসুং অপিকপা কাশী হায়না খঙনবা বলরাম্পুরগী মফমসিদা অমুক্কা হন্না লাকপা ফংজরে। অদোমগী মফমগী য়াইফ-থৌজাল কয়া অমসু ঐহাক্না ফংজরে।

য়ু.পি.গী রাজ্যপাল, শ্রীমতি অনন্দিবেন পতেল; য়ু.পি.গী নহা ওইরবা, থবক কনবা, মীয়াম্না পাম্নবা মুখ্য মন্ত্রী, য়োগি অদিত্যনাথজী; হান্নগী মুখ্য মন্ত্রী ওইবীরম্বা শ্রীমান কেশব প্রসাদ মোর্য়াজী; কেন্দ্র মন্ত্রী, গজেন্দ্র সিংহ সেখাৱৎজী, কৌশল কিশোরজী; রাজ্য সরকারগী মন্ত্রী, মহেন্দ্র সিংহজী, রমাপতি সাস্ত্রীজী, মুকুৎ বিহারী ভর্মাজী, ব্রজেশ পাথকজী, আশুতোশ তান্দনজী, বলদেব ওলাখজী, শ্রী পলতু রামজী, ফম্বাক্তা লৈবীরিবা ঐহাক্কী পার্লিয়ামেন্তকী মরুপ্লোই, এম.এল.এ., জিলা পঞ্চায়ৎকী মীহুৎ অমসুং ঐহাক্কী নুংশিরবা ইচিল-ইনাওশিং, য়াওল্লোইশিংগী লমদম অসিনা লৈবাক্কী নিংতম ইহৌদা মশক থোকপা থৌদাং য়াবীখি। রাজা দেবী বক্ষ সিংহ, রাজা কৃষ্ণ দত্ত রাম অমসুং পৃথবী পাল শিংহগুম্বা মপাঙ্গল লৈবা মীওইশিংনা বৃতিশ লৈঙাক্কী মাইয়োক্তা লান্থেংননবা থৌওং অমত্তা চিত্থহনখিদে। অয়োধ্যাদা শারিবা প্রভু শ্রী রামগী শেংলবা লাইশঙগী ৱাফম পুথোকপা খুদিংগী বলরাম্পুর লৈবাক্কী নিংথৌরেল পাতেশ্বরী প্রসাদ সিংহগী কত্থোকপগী ৱারী শোইদনা পন্নগনি। বলরাম্পুরগী মীয়াম অসি অফবা মীওই মশক অদুক্কী মতিক খঙই, মদুদি মখোয়না নানাজী দেশমুখ অমসুং অতল বিহারী বাজপায়গী শক্লোন্দা ভারত রত্না অনিবু শেমখ্রিবনি।

মরুপশিং,

ঙসি, ঐহাক্না লৈবাক শেম্বা অমসুং ঙাক-শেনবশিংগী লমদমদগী দিসেম্বর ৮গী হেলিকোপ্তর পোকখায়বদা লৈখিদ্রবা অথৌবা লান্মীশিংগী মফমদা ইকায় খুম্নবা উৎচরি। ভারতকী দিফেন্স স্তাফকী চীফ, জেনেরেল বিপিন রাৱৎনা লৈখিদবা অসি ভারত মচা অমসুং লৈবাক নীংবা মীওই খুদিংগী অচৌবা মাঙজবনি। লৈবাক্কী ফোর্সপু মরোমদোম লেপচবা ঙমহন্নবগীদমক্তা জেনেরেল বিপিন রাৱৎজীনা কন্না হোৎনদুনা পাংথোকখিবা থবক খুদিংমক লৈবাক শিনবা থুংবনা উনখ্রবনি। লান্মী অমা হায়বসি মহাক্না ফোর্সতা থবক তৌরগা লৈবা মতমদা খক্তা লান্মী ওইবা নত্তে। মহাক্তি পুন্সি চুপ্পগী লান্মী ওইবনি। মহাক্কী মপুন্সি পুম্বা অসি লান্মী অমগুম্না হিংই, থকসি-খাসি, লৈবাকপু তেক্ত কায়দনা থম্নবগীদমক্তা মহাক্কী পুন্সিগী মিৎকুপ খুদিংমক কত্থোক্তুনা লৈবনি। “নৈনা ছিন্দন্তি শাশ্ত্রনি নৈনা দহতী পাৱক” হায়না গীতাদা হায়রম্মি। খুৎলায় অমত্তনা শোকহনবা ঙম্লোই, মৈ অমত্তনা চাকহনবা ঙম্লোই। জেনেরেল বিপিন রাৱৎনা লাক্কদৌরিবা মতমশিং অসিদা মহাক্কী ভারতনা অনৌবা ৱারেপকা লোয়ননা মাংজিল থানা চঙশিনবা উরগনি। লৈবাক্কী ঙমখৈগী ঙাক-শেনবগী ফিভম ফগৎহনবগী থবক, ঙমখৈগী ইনফ্রাস্ত্রকচর মপাঙ্গল হেন্না কনখৎহনবগী থবকশিং অমসুং আর্মী অহুমগী মরক্তা তেংবাংনবা হেন্না লৈহন্নবা অমসুং লৈবাক্কী আর্ম্দ ফোর্সপু মরোমদোম লেপ্পা ঙমহন্নবা হোৎনবগী খোঙজংদি মখা তানা খোঙজেল য়াঙনা চত্থখিগনি। ভারতনা হৌজিক অৱাবা মতমদা লৈরবসু, ঐখোয়গী খোঙজেল অমসুং চাউখৎপদি লেপ্পা লৈরোই। ভারতনা কৈদৌনুংদা লেপ্লোই, তপথরোই। ঐখোয় ভারত মচা খুদিংনা পুল্লগা হোৎনগনি, লৈবাক মনুং অমসুং মপান্দা লৈরিবা শিংনবা খুদিংমকপু মতিক চানা মাইয়োক্নগনি। ভারতপু মপাঙ্গল হেন্না কনখৎহনগনি।

 মরুপশিং,

দিওরিয়াদা লৈবা অমসুং উত্তর প্রদেশকী মচারোই, গ্রুপ কেপ্তেন বরুন সিংহগী মপুন্সি কন্নবা দাক্তরশিংনা কন্না হোৎনরি। মহাক্কী মপুন্সি কনবীনবগীদমক্তা, ঐহাক্না ইমা পাতেশ্বরীদা থৌনীজরি। লৈবাক্না ঙসি বরুন সিংহ অমসুং ঐখোয়না মাঙজখ্রবা অথৌবশিংগী ইমুং-মনুংগীদমক্তা লেপ্লি

ইচিল ইনাওশিং,

লৈবাক নীংবগী ইথিলনা খ্বাইদগী মমাংদা থমদুনা ঐখোয় পুন্না হোৎনমিন্নরিবা অসিনা লৈবাকপু ২১শুবা চহি চাদা অনৌবা থাক্তা পুদুনা চৎকনি। ঈশিং ৱাৎপনা লৈবাক চাউখৎপদা অপনবা ওইহন্দনবা হোৎনবা হায়বসিসু য়াম্না মরু ওইবনি। লৈবাক্কী তুরেলশিংগী ঈশিংবু নীংথিনা শিজিন্নবা অমসুং লৌমীশিংগী লৌবুক্তা ঈশিং মরাং কায়না য়ৌহনবা অসি সরকারগী খ্বাইদগী অহানবা মিৎয়েং চঙবা থবক্নি। সর্য়ু কেনেল নেস্নেল প্রোজেক্ত লোইশিনখিবা অসি পুকচেল শেংনা ৱাখল খনবা মতমদা, থবক খুদিংমক মাই পাকই হায়বগী খুদম্নি। মসিগীদমক্তা অদোম খুদিংনা দিকেদ কয়াদগী ঙাইদুনা লাক্লিবনি। ঘাগরা, সর্য়ু, রাপ্তি, বানগঙ্গা অমসুং রোহিনিগী ঈশিংগী মপাঙ্গলনা লমদম অসিদা হৌজিক নুংঙাই য়াইফবগী য়ুগ অমা পুদুনা লাক্লগনি। বলরাম্পুরগা লোয়ননা বহরাইচ, গোন্দা, শ্রাৱস্তি, শিধার্থনগর, বস্তি, গোরখপুর, মহারাজগঞ্জ অমসুং কুশীনগরগী মরুপ খুদিংমক, ঐহাক্কী লৌমী ইচিল-ইনাও লাখ কয়াগী মফমদা ঐহাক্না থাগৎপগা লোয়ননা য়াইফ পাউজেল পীজরি। নোং তাবা মতমদা লমদমসিনা থেংনবা খুদোংচাদবশিংগী ৱারোইশিন পুরকপদা মখোয়দা তেংবাংলগনি। ঐহাক্কী নুংশিরবা মরুপশিং, অরাম খৌরাংবা মীওই অমদা ঈশিং খুজোক অমা পীথকপা মতমদা মহাক্না পুংফম অদুবু কৈদৌনুংদা কাওবা ঙমদে, ঈশিং পীথকপীরিবা মীওইবু মপুন্সি চুপ্পগী নীংশিংদুনা লৈ হায়বসি পুৱারীনা শাখিনি হায়বসি ঐহাক্না খঙই। অদুগা, ঙসিদি লৌমী লাখ কয়াগী খৌরাংলবা লৌবুকশিংদা ঈশিং ফংলগনি। অদোমগী য়াইফ পাউজেলশিংনা ঐখোয়বু পুন্সি চুপ্পা থবক তৌবা ঙম্নবা পাঙ্গল পীরগনি হায়বা ঐহাক্না অচেৎপা থাজবা থম্মি। অদোমগী থৌজালনা ঐখোয়বু অনৌবা থাক্তা য়ৌহনবা ঙমগনি।

ইচিল ইনাওশিং,

হেক্ত্যার ২দগী তাবা লম লৈবা লৌমীশিংদা ঐখোয়না পীরিবা ইরিগেসনগী খুদোংচাবা অসিনা মহাক্কী পুন্সি হোংহল্লগনি হায়বা ৱাফম অসি ঐহাক্না অদোমগী মফমদা ঙসি থমজনীংই। মীওই অমনা শিগদৌবগৈ ফমুংদা হিপ্তুনা লৈবা মতমদা, মহাক্না হিংনবা ঈগী মথৌ তাই, পাঙ্গলগী মথৌ তাই। তাঞ্জা অদুদা, দাক্তর অমনা ঈ পীদুনা লাইয়েংবা মতমদা মহাক্কী পুন্সি কল্লি। লমদম অসিনা মতৌ অসুম্না অনৌবা পুন্সি অমা ফংলগনি।

মরুপশিং,

বলরাম্পুরগী মসুর হৱাইগী মহাওনা হৌখিবা চহি কয়াদগী লৈবাক শিনবা থুংনা শন্দোক্লি। হৌজিক্তি, নাৎকী ওইবা মহৈ-মরোংগা লোয়ননা লমদমশিং অসিগী লৌমীশিংনা মমল অমসুং শেন্দোং য়াম্না ফংবা য়াবা অতোপ্পা মরৈ-মরোং থাদুনা কারবার তৌবসু য়ারগনি।

মরুপশিং,

ঐহাক্না মীয়ামগী পুন্সিগীদমক্তা মতম শাংনা থবক তৌবগী খুদোংচাবা অমা ফংজদুনা লাক্লি। ঐহাক্না মমাংগী সরকার কয়া অমা উখ্রে, মখোয়গী থবকশিংসু উখ্রে। শাংলবা মতম অসিদা ঐহাক্না নুংঙাইজদবা থৌওং কয়া অমা উখি। মখোয়শিং অদুদি লৈবাক্কী মতম, লন-থুম অমসুং লৈবাক্কী রিসোর্সশিংবু লান্না শিজিন্নবা অমসুং মদুগী ইকায় খুম্নদবা অসিনি। মসিনা সরকারগী শেল ওইরবদি, ঐহাক্না করিগী ৱারুগদগে? – অসিগুম্বা ৱাখল্লোন অসিনা লৈবাক অসিনা খল-নাইনা অমসুং হীরম খুদিংদা চাউখৎপদা খ্বাইদগী চাউনা অয়েৎপা পীরি। মসিগী ৱাখল্লোন অসিনা সর্য়ু কেনেল প্রোজেক্তপুসু লোইশিনবা ঙমদনা লৈহল্লম্লিবনি। থবক অসি ঙসিদগী চহি ৫০গী মমাংদগী হৌখিবনি। অদোমসু অমুক্তা খন্থবীয়ু, থবক অসি চহি ৫০গী মতুংদা লোইশিনবা ঙম্লিবনি। প্রোজেক্ত অসিগী থবক হৌখিবা মতমদা, মসি লমদমসিগী মীয়ামখক্তগী নত্তে হায়বসি লৈবাক্কী মীয়াম খুদিংনা খঙবীয়ু, ভারতকী মীয়াম খুদিংনা খঙবীয়ু, ভারতকী নহাশিংনা খঙবীয়ু, য়াইফরবা তুংলমচৎ অমগীদমক্তা থাজবা থম্লিবা লৈবাক্কী নহা খুদিংনা খঙবীয়ু।

মরুপশিং,

প্রোজেক্ত অসিগীদমক্তা থবক হৌখিবা মতমদা, মসিদা চঙগদবা শেনফম অসি লুপা করোর ১০০দগী তারম্মি। শেনফম কয়া চঙলমগদবনি হায়বা অদোম্না অমুক্তা হায়বীরক্কেরা? কয়া হায়বা? করোর ১০০। অমুক্কসু হংগে, কয়া হায়বা? করোর ১০০। অদুগা শেনফম অসি হৌজিক্তি কয়া য়ৌরে হায়বা অদোম খঙবরা? ঙসিদি, লুপা করোর লিশিং ১০গী চাউরাকপা শেনফম থাদরবা তুংদা প্রোজেক্ত অসি লোইশিনবা ঙম্লে। করোর কয়া হায়বা? করোর লিশিং ১০। হান্না ওইরমগদবনা করোর ১০০, হৌজিক ওইরিবনা করোর লিশিং ১০। শেল অসি কনাগীনো, মরুপশিং? লন-থুম অসি কনাগীনো? অদোমগীনি নত্ত্রগা অদোমগী নত্তে? লন-থুম অসিগী অশেংবা মপুদি অদোম্নি। নত্ত্রনে? অদোমগী হোৎনজমনগী পৈশা খুদিংমক মরম চানা শিজিন্নফম থোকপরা? নত্ত্রগা থোক্তবরা? অসুম্না পান্থোক্তবা মীওইশিং অসি অদোমগী মফমদা অরানবা তৌরবনি। নত্ত্রনে? অসিগুম্বা মীওইশিংবু অদোম্না চৈরাক পীফম থোক্তবরা?

ঐহাক্কী নুংশীরবা ইচিল ইনাওশিং,

মমাংগী সরকারনা থৌৱা শাখিদবদগী লৈবাক্না শরুক ১০০ হেনবা শেনফম পুথোকপা তাখি, তিংবা তাখি। লমদমসিগী ঐখোয়গী লৌমী মরুপ্না চহি ২০গী মমাংদা নত্ত্রগা ৩০গী মমাংদা ইরিগেসন্দগী হৌজিক ফংগদৌরিবা ঈশিং অসি ফংলম্লবদি করি ওইরমগনি হায়বা অমুক্তা খন্থবীয়ু। ঐহাক্কী লৌমীশিংদা ঈশিং ফংলম্লবদি, চহি ২৫-৩০গী মমাংদা ফংলম্লবদি, মখোয়না সনা মচা পোকপা ঙম্লম্লগনি, ঙম্লম্লোইদরা? লৈবাকপু লন-থুম্না থনলম্লনি, থনলম্লোইদরা? ইচাশিংবু মহৈ-মশিং নীংথিনা তমহনবা ঙম্লগনি, ঙম্লোইদরা?

ইচিল ইনাওশিং,

দিকেদ কয়া থেংথখিবা অসিনা মরম ওইরগা, মফমসিগী ঐহাক্কী লৌমী ইচিল-ইনাওশিং, মরুপশিংনা করোর-করোর কয়া মাঙজরবনি।

অদুনা মরুপশিং,

ঐহাক্না ঙসি দিল্লীদগী লাকপদা, কনাগুম্বা অমা লাক্লগা মোদীজীগী প্রোজেক্ত অসিগী রিবোন্দি ঐখোয়না কক্লম্বনিন ঐখোয়না হৌদোক্লম্বনি হায়রকপা ঐহাক্না অয়ুক্তগী ঙাইরিবনি। অসিগুম্বা ঙাংবগী হৈনবী লৈবা মীওই খরা লৈ। মখোয়না অঙাং ওইরিঙৈদা মসিগী রিবোন কক্লম্বা ওইরম্বা য়াই।

মরুপশিং,

মীওই খরগী মরু ওইবা থবক্তি রিবোন ককপনি, ঐখোয়গী মরু ওইবনা, মতম চানা প্রোজেক্ত লোইশিনবনি। ঐহাক্না ইং ২০১৪দা সরকার পায়রকপা মতমদা, দিকেদ কয়া পন্দুনা লৈরক্লবা ইরিগেসনগী প্রোজেক্ত কয়া অমা লৈবাক অসিগী কাচিন কোয়া খুদিংদা লৈরম্বা থেংনবদা ঐহাক্না অঙকপা ফাওখি। সর্য়ু নহার প্রোজেক্ত অসিনা মফম কয়া অমগী কেনেলশিং অমত্তগা শম্নদবা, ঈশিং য়ৌফম থোকপা পন্থুংফম অমত্তা য়ৌদবগী ফিভম উবা ফংখি। প্রোজেক্ত অসিদা হৌখিবা দিকেদ ৫দা পাংথোকখিবা থবক্কী চাংদগী ঐখোয়না চহি ৫দগী তাবা মতমদা পাংথোক্তুনা উৎলবনি। মরুপশিং, দবল ইঞ্জিন সরকার হায়বদো মসিমক্নি। মসিনি দবল ইঞ্জিন সরকারগী থবক্কী খোঙজেল। য়োগীজীনা লাক্লবা তুংদা ঐখোয়না বান্সাগর প্রোজেক্ত হৌদোকখি হায়বা অদোম্না নীংশিংবীয়ু। নুমিৎ খরগী মমাংদসু, ঐখোয়না অর্জুন সহায়ক নহার প্রোজেক্ত হৌদোকখি। চয়োল অসিদা গোরখপুরগী হারগী প্লান্ত অমসুং এমস হৌদোক্লিবা অসিসু চহি কয়াদগী ঙাইনদুনা লাক্লবনি। কুশিনগর ইন্তর্নেস্নেল এয়র্পোর্তকী ফাইলশিংসু চহি কয়াদগী লান্নদুনা লাকখিবনি। অদুবু, এয়রপোর্ত অসিবু থবক হৌহনবগী থবক্তি দবল ইঞ্জিন সরকার অসিনা পাংথোকখিবনি।

মরুপশিং,

চহি কয়াদগী মঙলক্লবা মঙলান কয়া ঐখোয়গী সরকারনা মতৌ করম্না মঙফাওনহল্লিবনো হায়বসিগী খুদমদি কেন-বেত্বা লিঙ্ক প্রোজেক্তনা ওইরগনি। চহি কয়াদগী প্রোজেক্ত অসিবু পাম্নদুনা লাকখিবনি। হন্দক্কী নোংমা-নিনিগী মমাংদা কেবিনেৎনা মসিগী অয়াবসু পীখ্রবনি অমসুং মসিদা লুপা করোর লিশিং ৪৫ থাদরগনি। মসিগী উত্তর প্রদেশ অসিনা খুদোল্পোত অচৌবা অমা ফংলবনি, লুপা করোর ৪৫ থাদরগদবনি। প্রোজেক্ত অসিনা বুন্দেলখন্দগী মীয়ামদা ঈশিংগী অৱাবদগী মনীং তমহনবদা অচৌবা থৌদাং য়াগনি।

ইচিল ইনাওশিং,

লৌমীশিংগীদমক্তা লেপ্পা অহানবা সরকার অমা লৈবাক্না হেক নীংতম্বদগী লৈরে। হেক্ত্যার লাখ ২দগী তাবা লম লৈবা লৌমীশিংদা সরকারগা মরী লৈনহন্দুনা কান্নবা পীবগী থবক হৌরে। লৌবুক্তগী কৈথেলফাওবা মখোয়গী তেংবাংলগনি। অসিগুম্বা অপীকপা লৌমীশিং অসিদা পি.এম. কিসান সম্মান নিধীগী করোর লিশিং কয়া মখোয়গী বেঙ্ক একাউন্ততা হকথেংননা পীরি। মখোয়গী চাগা হেনগৎহন্নবগীদমক্তা লৌউবগা মরী লৈনবা অতোপ্পা খুদোংচাবা কয়া পীরি। লম য়াম্না চাউনা লৈবগী মথৌ তাদবা মরী লৈনবা খুদোংচাবা ফংহন্নবগীদমক্তা মখোয়দা তাকপীরি। অসিগুম্বা ৱাখল্লোন অসিগা লোয়ননা য়েন-ঙানু য়োকপা ওইরো, খোই য়োকপা ওইরো নত্ত্রগা ঙা য়োকপা ওইরো, মখোয়গীদমক্তা লৈবাক্কী থাক্তা লৈবা অনৌবা স্কিম কয়া অমা হৌদোক্লে। ঙসিদি, ভারত অসি শঙ্গোম পুথোকপদা মালেমদা মমিং চৎলি, অদুবু ঐখোয় অসি খোইহী পুথোকপদসু মালেমদা মশক থোকপা মফম কনবা ঙম্লে তাবদা অদোমসু নুংঙাইরমগনি হায়না খল্লি। ঐখোয়গী সরকারনা হোৎনবদগী, মমাংগী চহি ৭তগী খোইহী পুথোকপা হেনগৎলে, হান্নদগী চাউরাক্না শরুক অনিগী চাং হেনগৎলে অমসুং মসিনা মরম ওইদুনা লৌমীশিংনা করোর ৭০০ হেনবা শেল তানবা ঙম্লে।

মরুপশিং,

অদোমগী তঙাই ফদবা খুদিংবু খন্নরবা তুংদা, ঐখোয়না অদোমগী পুন্সি নুংঙাইহন্নবগীদমক্তা অহিং নুংথিল নাইদনা হোৎনরি। মসিগী খুদম অসি প্রধান মন্ত্রী অৱাস য়োজনাগী মখাদা শারিবা লাইরবশিংগী পক্কা য়ুমশিংদা উবা ফংগনি। পি.এম. অৱাসকী মখাদা মৈ, উজালা এল.ই.দি. বল্ব, য়ুম্থোং খুদিংদা ঈশিংগী কনেক্সন ফংনরি। ঐহাক্না মফম অসিদা খোঙচৎ চৎখিবদা হায়রিবশিং অসি উবা ফংজবদা ঐহাক্না য়াম্না নুংঙাইবা ফাওই। মফমসিগী থারু কাঙলুপকী ইচিল-ইনাওশিংদা স্কিমশিং অসিগী কান্নবা ফংবা অসিদা ঐহাক্কী নুংঙাইবগী চাংসু য়াম্না হেনগৎলে অমসুং মখোয়দগী য়াইফ-থৌজালসু লেপ্তনা ফংলগনি।

মরুপশিং,

য়ুম অমা লৈবগী মতাংদা ঐখোয়গী লমদমসিদা মতম শাংবদগী চৎনবী অমা চৎনদুনা লাক্লি। ঐহাক্কী ইমা, ইচে-ইচলশিংনসু ৱাফম অসিবু নীংথিনা খঙবীয়ু অমসুং ঐহাক্কী নুপা মরুপশিংনসু ইশাগী য়ুমদা শোইদনা পাউ তম্বীয়ু। ঐখোয়গী মফমগী চৎনবী অমা লৈদুনা লাক্লি। করিগুম্বা য়ুম, দুকান, গারী, লৌ লৈরবদি নুপাগী মিংদা লৈগদবনি হায়বা অমা লৈ। নুপীশিংগী মিংদা করি অমত্তা লৈতে, মরম অদুনা ঐখোয়না করি পাংথোক্লে? ঐখোয়না পি.এম. অৱাস য়োজনাগী মখাদা শাবা য়ুমশিং অসি ইমা, ইচেল-ইচলশিংগী মমিংদা পীরি। মসিনা মরম ওইদুনা নুপীশিংনা মখোয়গী মমিংদা লন-থুম লৈরে খঙবদা য়াম্না নুংঙাইবা ফাওনরে, মশাদা থাজবা হেনগৎলে। দবল ইঞ্জিন সরকারনা হোৎনবদগী য়ু.পি.গী ইমুং লাখ ৩০ হেনবা লাইরবশিংনা মশাগী পক্কা য়ুম লৈরে। লাক্কদৌরিবা মতমশিংদা অহেনবা য়ুম কয়া অমগসু শানবগীদমক্তা সরকারনা লুপা লাখ করোর ২ হেনবা শিন লাঙলে। হৌজিক ফাওবা য়ুম ফংদ্রিবা মীওইশিংনা লাক্কদৌবা মতমদা শোইদনা ফংলগনি।

মরুপশিং,

সরকার অমনা অতোপ্পগী অপাম্বা খঙবা মতমদা, মখোয়না লাইরবগী তাই। অদুনা খেন্নবদি লাকপা তাবনি। খেন্নবা লাকইকো? লৈবাক অসিনা চহি ১০০গী মতুংদা লাকপা খ্বাইদগী চাউবা লাইচৎ অমা কন্না লান্থেংনরি। কোরোনা লাক্লবা তুংদা মীপুম খুদিংনা খন্নৈ, ঐখোয়না মতৌ করম্না লান্থেংনবা ঙমগনি। মীওই খুদিংনা কোরোনানা মরম ওইদুনা অৱাবা কয়া খাঙনখি।

অদুবু মরুপশিং, কোরোনাগী মতমসিদা, লাইরবা অমত্তনা মবুক হাঙনা তুমহন্দনবা ঐখোয়না পুকচেল শেংনা হোৎনখি। মরম অদুনা পি.এম. গরীব কলয়ান অন্না য়োজনাগী মখাদা রাসন লেম্না পীবগী হৌজিক-হৌজিক চত্থরিবা থবক-থৌরমশিংসু ঐখোয়না য়াওশং মতুং ফাওবা শাংদোকখ্রে। লাইরবশিংদা লেম্না রাসন পীনবগীদমক্তা সরকারনা লুপা করোর লাখ ২গা লিশিং ৬০ হেন্না চাদিং তৌখি।

ইচিল ইনাওশিং,

হান্নগী সরকারগী মতাংদদি অদোম্না কুপ্না খঙলবনি। হান্নগী সরকারদি মাফিয়াশিংবু ঙাক-শেনবনি। ঙসিগী য়োগীজীগী সরকারনা মাফিয়া মুত্থৎনবা হোৎনরি। অদুনবু য়ু.পি.গী মীয়াম্নবা খেন্নবা ম্যেক শেংনা উরে হায়রিবনি। মমাংগী সরকার পায়রম্বশিংনা খুৎকন-পাঙ্গলবশিংবু য়োকখৎলম্মি। ঙসিগী য়োগিজীগী সরকারনা লাইরবা, দলিৎ, শোত্থরবা অমসুং ত্রাইবেলশিংবু মপাঙ্গল কনখৎহন্নবা কন্না হোৎনরি। মমাংগী সরকার পায়রম্বশিংনা লমশিংবু আইনগী ৱাংমদা লৌশিল্লম্মি। অসিগুম্বা মাফিয়াশিংদগী ঙসিদি অরানবা তৌবগী শেল থিহল্লে, বুলদোজর থৌজিন্দুনা লমশিং তকখায়রি। অদুনবু ময়েক শেংনা খেন্নবা উরে হায়না য়ু.পি.গী মীয়াম্না হায়নরিবনি। য়ু.পি.গী ইচানুপীশিংনা য়ুমদগী থোকপা মতমদা ১০০রক খল্লম্মি। ঙসিদি, ফত্তবা মীনা অরানবা তৌদ্রিঙৈদা ১০০রক হান্না খল্লে। অদুনবু ময়েক শেংনা খেন্নবা উরে হায়না য়ু.পি.গী মীয়াম্না হায়নরিবনি। হান্নদি ইচানুপীশিংনা য়ুমদা নমশিন্দুনা লৈবা তারম্মি, ঙসিদি য়ু.পি.গী অরানবা তৌবশিং জেলদা নমশিন্দুনা লৈরে। মরম অসিনবু খেন্নবা লৈরে হায়রিবনি।

মরুপশিং,

ঐহাক্না ঙসি স্কিম অমগী মতাংদসু মীয়ামদা পাউদম্নীংই, মসিনা য়ু.পি.দা য়াম্না তেংবাংগনি। মসিগী স্কিম অসিদি স্বামিত্বা য়োজনানি। মসিগী মখাদা খুঙ্গংগী লম, য়ুম, লৌবুক মেপ্পিং তৌদুনা মপু ওইবগী চে-চাংশিংবু মপু মশাদা শিন্নরগনি। মসিগী স্কিম অসিনা অতেনবা মতমগী মনুংদা য়ু.পি.গী খুঙ্গংশিংদা য়ৌরক্লগনি। মসিদগীদি, অদোমগী লমবু আইনগী ৱাংমদা খোপচিনবদগী থিংলগনি, বেঙ্কতগী তেংবাং ফংবদা লায়রগনি। হৌজিক্তি, নহাশিংনা মশাগী কারবারগীদমক্তা শেল তাখৎনবা বেঙ্কতগী তেংবাং লৌবদা অয়েৎপা লৈররোই।

মরুপশিং,

ঐখোয় পুল্লগা উত্তর প্রদেশপু অনৌবা অৱাংবা থাক্তা পুখৎকদবনি, উত্তর প্রদেশকী অনৌবা শক্তাক অমা শেমগদবনি। উত্তর প্রদেশপু মনিংদা ইন্থদুনা থম্লম্বা মীওইশিংদগী ঐখোয়না মতম পুম্বদা চেকশিন্না লৈগদবনি। ইচিল-ইনাওশিং, ঐহাক্না অদোম্বু সর্য়ু নহার প্রোজেক্তকীদমক্তা থাগৎপা ফোংদোক্লি। ঐহাক্কা লোয়ননা খুৎ থাংগৎমিন্নদুনা লাওনা অমুক্তা লাওসি – ভারত ইমানা য়াইফরে! ভারত ইমানা য়াইফরে! ভারত ইমানা য়াইফরে!

অদোম্বু হন্না হন্না থাগৎচরি।

***